pagkadaghan sa
mga habog nga mga tinukod nila
og kita nga naglantaw
mahingangha sa
katas-on og sa kalig-on
sa ilang giantosan
og gibilin kanato

daghang tawo ang
nangamatay
kada ang-ang kada
kwadro kada
hagdan
daghan ang nabalintong
og napandol
og nahapla tungod
sa kahalangdon sa ilang
mga gimugna

ako nga nagtindog og
milantaw pag-ayo
nausikan
kay bisan usa na lang
ka salog
og tipak sa haligi sa maong
kabantog
wala manginahanglan niini

ang ako
mao lamang ang paglantaw og
dayon paglakaw
paingon sa unahan....

gikapoy na kami og panagan
sa matag adlaw og gabii
sa pipila ka tuig

miul-ol na ang among mga tiil
og mibaga na ang kubal
sa among mga lapa-lapa

wala ka ba usab kapoya og
ginukod kanamo?
unsa ba gayod ang imong tuyo?
nganong migukod ka man kanamo?

wala kanamo ang gugma
og wala usab kanamo ang kasilag
wala na kanamo ang kalinaw
og dili usab namo tumong ang kasamok

mopahulay usa kami sa silong sa kahoy
mangutana ngano ba og naunsang hitaboa
nga sa tibuok namong kinabuhi
kanunay man kaming nagdagan og kanunay
ka man usab nga naggukod kanamo....

kape

kon timplahan mo ako sa
kape
ayaw palabihi og asukar
kay ang
katam-is sa akong pangidaron karon
morag lood na
nga pamation

naandan ko na ang katab-ang
og lami na usab
para kanako ang
kapait

ayaw usab palabii og kainit
ang tubig
kay ang akong tilaok
naanad na nianang
medyo bugnaw.

haiku

pagsalig

ayaw dudahi ang
pagpunay og balik-balik
sa tugkaran sa balay

kanang
adlaw og gabii

ah, dili kana sila sama
sa tawo nga
miduaw kay anaay tuyo
kay anaay pangayoon

ah, sila miabot
tungod kay ila kanang
buluhaton
alang kanato

salig lang
nga ang adlaw magpabilin
nga ang bulan
mohatag pa gihapon sa iyang
hinulaman nga
kahayag

salig lang
nga ania pa gihapon ako
nagmahal og
naghandom kanimo

usahay

usahay miga makapangutana baya
upod ako
kon ako kahibalo na ba nga mangawras
sama sa iring
kay niadtong usa ka gabii
nga ako
nangita og kalipay didto sa kalibonan
dapit sa likod
sa inyong pantawan
sa atubangan sa inyong labat nga
kawayan
samtang ang bulan mitibuok
sa iyang kahayag
dakong katingala ang akong
nahigamhan
nganong ang akong anino aduna
may ikog og nganong
ako mora man og kamot nga
migukod niini.

Haiku

naggukod siya
sa naglutaw sa hangin ~
bangaw sa buwa



...

kagahapon

ang mga dahon nga laya
akong gidauban

og ang mga tipaka sa akong
mga kagahapon

akong gisilaban
aron akong mabawi ang tanan

diha sa mga abo og abog
nga ilang gibilin

sa dihang miabot na ang
kasumo sa gugma

kay bisan baya og unsa kalami
ang humba

moabot man gayod ang atong
kamingaw sa ginamos

og dili ba kinilaw nga bangus
nga gihilogan og biasong

midangop ako diha sa
pagpiyong sa akong mga mata

og pagkahuman nianang paboto
sa mga rebentador sulod sa akong karsones

magpabuta-bungol ako
og kon makalitan niining akong gihambin

nga mga kalibog
tutukan ko ang nag-inosarang bombilya

mora bag lami na man hinoon kanang
ako sa dayon mabuta

og mobalik ako sa humba
molamoy aron unta ako magsuka

ang gugma ko kanimo

duna kay gilubong
gusto nakong hinumduman
apan ikaw
dili na ganahan

nindot kadtong imong gilubong
ilalom sa yuta
imong gitago
apan kini mitubo

mangutana ka kon unsay ngalan?
kay imo man gyod nga sa dayon
gikalimtan

sa imong kabangis
ako nalooy
kadtong imong gilubong
gugma ko kadto nga karon
sa gihapon
milabong.

ang mga fashionista

nagpaabot sila
kanimo kay gustong motug-an
sa ilang
mga kagul-anan

og ikaw
mikatawa lang

tan-awa ang nangliki
nga panit
ang lawas nga napulpog
sama sa usa
ka haligi nga
walay kabilya

og dayon pamatia
ang iyang kataposang
ginhawa

huni kini alang kanimo

kalaay

ang dimalas
pirming nanampiling
nasina sa swerte
nga nagsayawsayaw
kay nakadaog og lotto

wala siya masayod
nga ang swerte
tulo na lang ka adlaw
ang gipaabot

kay kini mamatay na
og dayon ilubong
sa lugar diin
naghari ang yawa.

walay makabuot sa kasingkasing

sayod ako nga walay
angay nga ikapanghambog
ang antulanga
tungod kay sa kahumot mo
malaya na siya sa tumang kasina

og sa dihang mibuswak ka
nga haskang pagkapula
kalit lang nalaksot ang
iyang mga gihay,

mibuhakhak ka sa atubangan
sa adlaw
naghugyaw ang imong mga dahon
sa imong kadaogan

apan bisan pa kon unsa ka katahom
kahumot og ka dinayeg
sa tanang mga naghandom
kanimo,

wala akoy mahimo
kay kadtong kulang sa kahomot
nga nalustay
mao man lang gihapon ang akong
gihigugma

ang mga bitoon
pati na ang bulan dili gayod makabuot
kon kinsa ang
makakitik sa panit sa akong
kasingkasing

bisan gani ako
nga nagtago og nagbuhi niini.

pagbalik sa agianan

sa kadugay na
sa mga katuigan
diri sa akong
mga kamot
nakat-unan ko
ang paglitok
sa mga pulong
nga tungod sa
kahapdos ako
na man untang
nahikalimtan,

miduol ako sa
usa ka hugpong
og nagsugod og
litok sa mga pulong
misulay anang
pag-antog sa
akong mga sinsilyo
diha sa bato nga
hantakan,

ikaw nga namati
mikalit og lingi
og sa usa ka senyas
adunay naglingolingo
og busa ako mihunong
og nahilom, og

mibalik ako sa akong
kagahapon kadtong
ako usa lamang ka
bato nga unta daghang
isulti apan wala nay
gahom sa paghisgot.

Sakayang Papel

Gituhil ang anino sa sakayang papel inig
salig niini sa agay ug pagtukaw sa tubig.

Nitapot sa papel ang hangin, namidpid
kini, lakip na ang gibug-aton sa panid.

Kini naunlod sa galiyok-liyok nga kabugnaw
diin ang mga letra nagkisikisi sa pagpanaw.

Ug nibukhad kini sa dila sa dagat
samtang gihapyod sa tumang kaparat.

Pag-abot

Sa mga gabii nga sama niini,
adunay pultahan nga nangita
sa imong mga tudlo.

Ug sa imong pag-abot, hinay-hinay
ko kining giablihan sa paglitok
sa imong ngalan.

Gabanos-gabos dayon ta og pagsubli
sa atong mga sugilanon, ug kining atong
mga kulokabildo nibuswak atong taknaa.

Kini sama sa habohabo nga nikutkot
sa yuta hangtud ang imong mga agik-ik
ug buhakhak sama sa pagbundak sa uwan.

Kini buot motapad kanako aron tudlo-an
ko unsaon hunongon ang mga gulto, ug matag
paduol niini, dili kabugnaw ang akong masinati.

Apan kini kay talagsaong kainit ug kahadlok
nga nikatay sa akong panit ug bukog
samtang kini nanghagit sa kangitngit.

Sungka

Dili na hinungdanon kon bato
o liso sa sandiya ang gihakop
sa atong mga palad, basta
di lang intawn ka manikas,
kay hagbay nang parehas
ang atong mga banwa.

Kanang naa sa wala kay imoha.
Kining naa sa tuo kay akoa.

Apan nahibulong ta nganong kalit mang
nawalis ang gitapis natong pagkahimamat
aning duwaa sa pagsugod sa tuig.

Makighagwa sa langit

Usa ka eskultor ang kangitngit
nga makighagwa sa langit.
Apan ang iyang mga kamot, mokudlit
sa gilay-on sa mga bituon
ug karong gabii gatan-aw ko nila,
ug diha pod nako mahipalgan
ang tibuok nakong kamingaw.

Pangindahay

kagabii...
naghandom ako
nga nanglupad ta
ug gilamoy sa unos.

Nagtan-aw ko
kanatong duha
nga daw mga tulibong
taliwala sa
nagsagunson
nga damgo,
nagmaya sa kalipay
nga wa pa matawo,
nalamat sa hapuhap
nga wa pa nabatyagan

Gitandi ko ang hanap
mong panagway
sa hulagway sa
akong tamboanan...

kinahanglang ba kitang
manglupad sa suwab
ning kalibutan
aron batuhon
sa kaugalingong panudya?

sagubangon ko
ang mga pulong
nga giilad
sa mga panghupaw
ug batilaab

karon naghandom...

dili ko labngan
ang pangindahay


...

kining mobalak ta

kining mobalak ko
tungod kini kay kita napaakan
ako sa usa ka
ligwan

og nagkabuang ko og
dagan
samtang ang iyang talinis
nga dagom mitusok na
sa akong aping
og ang iyang suyod
nagpabilin

pagkaoran-oran mihubag
apil na ang agtang
og wala na ako'y makita
kay nahimo na ako nga
puros aping

og ang mabati mao na lamang
ang kasakit
nga mikulitog sa mga ugat sa akong
kasingkasing

nakabalak ko dili sa kalami
nakabalak ko tungod sa kahapdos

sa kasakit nga
ambot
wala na tingali'y
kataposan

dili ko na lang gayod ibutyag

dili ko na isulti ang tanan
kabahin sa
gugma kong gitagoan
sakto na nga kini
akong gibati

sakto na ang kagilok
sa akong ilok

sakto na nga masaghid
usahay ang akong
pangagho diha sa imong
gininhawa

dili ko na kini isulti
kay sa higayon nga ako
kining ipadungog-dungog kanimo
sayod ko
nga unya mobahakhak ka sa
usa ka dakong katawa

dili kaha malumping kining
akong kasingkasing
kon imong dulaan kini
sama sa usa ka
lata sa gatas nga
kondensada?

dili ko na lang gayod kini ibutyag
kay basin unya og
ang akong kalag sa kasakit
mayagyag

sausa ka hugot nga pag-ampo

sa usa ka hugot nga pag-ampo
kanang sagol dugo na ang imong mga luha
og mga singot sa hwerto

diha sa imong pangaliya
nga unta ihatag na sa Ginoo ang imong gusto

apan wala gayod niya gihatag
pakyas ka, maoy imo,

bisan pa og maayo nang pagkapiko ang imong mga tuhod
nga ikaw dili na lang gani gayod makatindog...

ah, siya ang mas nasayod sa tanan
ayaw pagmahay
wad-a ang kahiubos

mas nahibalo siya kon unsa gayod ang alang kanimo
og niana kita wala nay mahimo....

ah, lawod-lawod ang iyang kaalam og kasayoran
og dili gayod kini nato matupngan

ah, pagpasalamat kay kon wala kini gihatag kanimo
kini dili gayod kanimo makaayo ...

unta mas maayo nga dili ka na lang mangayo
pamatia og pangitaa ang iyang gusto alang kanimo...

kay sa tinood, mao kana ang makaayo
og makatagbaw kanimo pag-ayo.

ligid sa kasagbotan

ligid sa kasagbotan
paglapok-lapok silong sa
kusog kaayo nga ulan

wala ba miabot sa imong
kinabuhi ang kalipay
usahay diha sa pagkamoritsing?

dili ba god makalingaw
lantawon ang atong mga buling?

sama ba unta sa usa ka bata
nga bulingiton
apan baya ang
nawong pagkamalipayon!

pagpauyon sa sulog sa usa suba nga pagbati

akong pahiran ang akong mga luha

panahon na sa pagsadya
sa pagpauyon sa sulog sa usa ka suba nga pagbati
sa gugmang tinipigan

panahon na ang paghubo og pag-ambak
og pagsalom og paglangoy diha
sa lam-aw sa kahinam
og kalipay
nga dili ko na gayod matukib

sa usa ka kahigal nga wala nay sabal
og bisan kon ang mga naglantaw
mosura kanako nga ako usa ka hangal
mangyam-id nga ako
usa ka butakal
dili ko na kini maambat

wala silay labot sa akong pagpaturatoy
niining gugma nga sa imong dughan
karon mitaroy.

kitang duha diha sa pag-ampo

gipiyong ko ang akong mata
samtang ako
miampo diha kanimo

abi nako og lig-on ako
apan sa dihang mitupad ka na kanako
og gisimhot mo ang akong dughan
og gihagkan mo ang akong
aping og ngabil

nahumok ako
nahuyang sa imong katahom
sa imong kahumot
sa kaanindot sa imong kalag
sa kalami sa imong lawas

gipiyong ko na lang ang akong mga mata
sa dihang
ako usab sa kataposan

giampoan mo

og sa dihang giablihan mo na ang ganghaan sa langit
misulod ako og miawit

bulahan ang magpaubos

bulahan ang
magpaubos

kadtong imong gikasab-an
nga wala motingog
kadtong imong giinsulto
nga wala mobalos
kadtong imong gisipa
nga natikay-ang og
wala kabangon
kadtong imong giyatakan
og nagpatara lamang

bulahan siya
kay iya na ang imong kalipay

bulahan ang magpaubos
kay iyang nakita
ang mga bato nga bulawan
nga imo lang gilud-an

pagkabulahan gayod sa
nagpaubos
kay siya lang ang hatagan
og luna diha
sa langit

og ikaw nga mapahitas-on
mahulog sama sa usa ka bitoon

ang maldita na si marinel

si marinel
og si samsam
gamay ra og kalainan

anang ilong nga
galisngag
anang wait nga itom
og aping nga
hulog

mas angayan pa gani gamay
ang among
si samsam
labi na og kini
mo-aw-aw

kabahin sa babayeng relihiyosa

pagkaswerte ba
sa babayeng relihiyosa
gigiyahan man god kuno
sa ginoo
kay nakabana
og buotan nga
lalaki

ambongan og
adunahan pa
gayod

og pagkadimalas
gayod sa maong
lalaki

pagkadako gayod
niyang sipyat

yano nga kalipay

nasulayan ko na
ang paglingkod sa
bugnaw og lunhaw
nga carabao
grass

hilom kaayong
misalop ang adlaw

og sa dihang
miabot ang kangitngit

dayog abot usab
sa hayag kaayo nga bulan

walay kisaw ang
kinaiyahan
wala magdali ang
mga kalanggaman

ang usa ka haloan
nauwat nga mitukog
sa lingin nga bulan

unsa ba ang kalipay sa pagkakontento?

babaye nga
nga migakos sa iyang
anak nga lalaki
nga nahinanok
sa kalinaw sa
iyang dughan
dinuyogan
sa awit sa
kahilom

gamay nga bata

magmahay ba ako
kon ikaw wala miabot sa
akong kinabuhi?

gipaabot ko ikaw
og bisan og unsaon ko og
paningkamot nga ikaw hikalimtan lamang
kanunay kang
nagpakita sa akong panumduman

sama sa usa ka damgo
kabahin sa usa ka siwil nga naglangoy
sugat sa sulog sa usa ka suba
og dayon sa kalit nawala

dili katoohan
apan ikaw akong himoon nga tinood
ugma damlag
sa pagsubang sa bulan
sa pagtaob sa dagat
kuhaon ko ikaw sa duyanan
sa akong paghikalimot

balak nga gisulat nga ang background music mao ang nocturne in G minor ni Chopin

usahay kulang ako
sa pagsabot
nganong ako
sapoton nga walay
bag-ong balak ang
akong higala
nga sama usab kanako
nangalap og pulong
aron himoong balak
sa usa ka kagabhion
diin ang bulan
napapas sa mga
itom nga panganod

lisod kaha ang
magtrabaho sa usa
ka call center
labi na nga ang
imong supervisor
dili nimo
igkasinabot

labi na nga imong
bation nga
mas daghan
ka pa og nahibaw-an
kaysa kaniya

labi na nga ang
imong utok
nauga sa usa ka
pangita nga dili
nimo trip

lisod mobalak
kon ang imong
tiyan hangin
na lang ang sud

lisod mobalak
kon ang imong
kasing-kasing
nahawla sa usa
ka kahaw-ang

walay kwarta
ang balakero
walay kita ang
balak
walay mopalit
og balak
walay bunga
ang mga balak

apan, sagdi lang
kay maoy
akong ganahan...

puro paranoia

gustong tupngan
sa imong anino ang
imong lawas

gukod hangtod
sa pagsalop sa adlaw

latas sa utlanan
paingon didto sa kangitngit

milamog ang
tanan milamog ang
tanan og ang tanan gayod

hangtod nga wala
nay makita hangtod nga
wala na ang tanan

nawagtang nahilos
napalos naloslos.

ang gasa

sa ilang gisalohan nga gugma
gigasahan siya
og usa ka batang babaye

pagkamalipayon na
gayod unta nila

apan kalit lang
nga gikuha siya ni
kamatayon!

kontento

wala nay
labaw pa
sa hulagway
sa pagkakontento
ning irong sakto
og lawog,

ay! pagkabugnaw
ba sa iyang simod
samtang nahinanok
og katulog

shirley

pagkahuman nila og
lantaw sa
rose parade
nagpapicture ang
pamilya

dagko na ang
iyang tulo ka mga anak
mas taas pa niya

nursing ang usa
wala pa ko kabalo
sa laing duha
(maulaw sab
ko mangutana
kay basin
nursing lang usab
gihapon)

wala'y nausob
kang shirley
smiling lang gihapon
siaw, game,
walay bikil

kulong lang gihapon
ang iyang buhok
og puti
tsinita
gwapa lang gihapon
(pwera buyag
biernes ra ba ron)

pagkapaspas gayod
sa panahon
kahilakon ko nga
maghunahuna
kay morag ako
lang man seguro
ang nabiyaan sa
panon

si sol ang usa namo
ka classmate sa
chemistry department
duna nay duha ka
mga ulitawo
nga mga sipat kaayo

si tess
naa nay dalaga
(serious lang gihapon
kaayo sa
kinabuhi,

nangita pa kaha
og bana?)

si rene
wa na ka kahibalo kon
asa apan nag-ingon
si sol
naa na poy ulitawo
nagkuha og nursing
sa ateneo

si nuela
asa na kaha siya karon?
naminyo man
kuno og hapon
(gwapa lang seguro
gihapon)

usahay magmahay
ko, apan
i-justify sab nako

kinsa bay walay
pagmahay ning
atong lakat sa
atong kinabuhi?

kadtong patay na?
og kadtong buhi pa?

miingon akong
amiga nga mangkay
nga puno sab
og pagmahay

"sus dodoy
(iyang tawag nako
dodoy man)

kapoy na og
analyze aning
atong life,

you know naman
you talk ka pa
use ka na lang!"

gitan-aw nako
og balik ang
picture ni shirley
og akong
gi-zoom in
dapit sa iyang
nawong sa iyang
agtang,

hmm, daghan
na sab og kunot,

morag kunot jud
dili jud kay
kunot kunot lang...

makalingaw,
ang rose parade
bisan og wala ko
didto,

wa na koy
pagmahay

wa na koy plano
mo-enroll sa
nursing
(isip double courser)

og wa na sab
koy plano
molupad sa amerika,

kapoy na
diri na lang ko
magkali
sa akong
violet nga kamote.

lantaw sa unahan

sa kataposan
gibiyaan sa tawo ang
kahoy

sa hawan nga disyerto
gitanom niya
ang iyang mga tunob

nanubo didto
ang iyang mga anino

ang mga sagbot
sa tumang pagpanuko
nga matandog
ang kalinaw sa iyang
panaw

nagpakahilom na
lamang

naghandom nga
unta dili na
lang mahulog
ang mga luha
sa mga
panganod

Ang mga matang sa ulan

ang huni
sa talithi mipahilom
sa kasikas sa
mga layang dahon
sa ting-init

bisan sa kangitngit,
misalingsing
ang sagbot
nga nataliwad-an
sa mga ligating

nabuhi ang kaugatan
sa uphag nga panit
sa anig-ig
nga miit-it
sa mga alikabo

mga kinaiya sa ulan
nga mihatod
sa akong panumduman
kanimo...


...

sa pagsalop sa adlaw
mangiyak ang mga anghel

kay sila dili alang
sa kangitngit

kay ang kahayag sumala
sa sugo sa

pamalaod sa panahon
mobiya na usab

kay ang kangitngit mobanos
mokaylap

panahon sa usab
alang sa paglupad

sa mga pak-an og itom
sa mga sungayan

sa mga midapig sa
kamatayon

ayaw ako og pangitai
anang butang nga
sayod ka
dili nako ikahatag

sama nianang imong
pagpangita sa adlaw
diri sud sa akong kalimutaw

dili ba tataw na kaayo karon
ang akong kahaponon?

ukba ang akong dughan
pangitaa ang akong kasingkasing

ibalik dayon kon mapul-an ka na
sama sa usa ka

jigsaw puzzle

sa pagpahawa sa pagkapari

mobiya ka aron pagpangita sa imong kaugalingon
mao usab ka na ang imong rason
sa imong pag-abot sa imong pagsulod niining
dako kaayo nga ganghaan nga sa hamubong
higayon imong gitrangkahan
gihuktan sa usa ka lig-on unta kaayo nga
bakos diha sa imong hawak

wala sila mamati sa imong panamilit
og dili sila magpatulo sa ilang mga luha

nahisama ka sa usa ka babaye nga nag-ilis
sa iyang sayal og blouse
nahisama ka sa nagluno og dili makalihok
nga halas.

kapila na ba kahigayon
nga ako moyukbo sa usa

ka dako nga suba nga ang
sulog wala na nagdala kanako

paingon sa dako kaayong dagat
kapila na ba ang higayon nga

ako miduko og mipiyong na lamang
sa akong mga mata aron lang

unta kamong tanan malipay kanako
apan sahi sa sangpotanan sa

kasagaran ang akong pagpakahilom
inyo lang nga gipakasamang usa

ka angayan nga mahitabo sama sa
paghulog lamang sa dahon tungod

sa paglihok sa mga sanga tungod sa
hangin: karon lahi karon mao na

ang akong katapusan nga pagyukbo.
motindog ako og mapahawa og ang

akong hangyo: palihog ayaw na kamo
pangita pa kanako.

nanirado na ang mga lawak
og ang tanan namauli na

ako na lang ang nahibilin dinhi
oran-oran molakaw usab ako

sama kanila og sama kanimo
wala na usab ako'y panahon

nianang pagpaabot nga basin
og adunay usa pa ka pultahan

nga moabli aron ako pasudlon
og patulugon niining usa ka gabii.

ang unahan

sa usa ka airport
nag-alburoto ang panahon
misamot kakusog ang hangin
og ulan og ang eroplano
wala ka tugpa
kay napuno sa gapnod
ang tugkaran

nag-alburoto usab ang usa
ka babaye nga
pution og maayo kaayo nga
moiningles
kay nganong dili siya makalupad
karon gayong orasa
kay lagi adunay siya'y
importanteng conference
sa manila

gipabalik ang eroplano sa
manila tungod kay
zero visibility diri
og ang bana sa pikas lawak
nga mitagbo sa iyang asawa
unta anang adlawa
mipauli na lang sa ila

nagbinundakay og mga
maleta
sa salog
nagputang-inahan ang uban
nag-fuck you
ang mga kano

ako nagpamati lamang
miuyon ako sa sugyot sa panahon
nga dili na lang modayon
aduna kini gipabasa kanako
didto sa unahan
nga wala pa kaayo nako naaninaw
og mipauli ako sa amo
balik
nga nanaghoy.

giunsa pagbuak ang domingo

7am.
way tatsa ang adlaw
nagpamidpid migimaw
sa sidlakang hinilakan
sa mga ginikanang biniyaan,
nagbangotan ang hinikawan
- mugna sa kagabhiong wa mopauli.

8am.
oras sa mga nanagpilaw.
oras sa mga tinun-ang hinanok,
masangpiton ang inahang mipukaw
kinsang kaugmaran sa lim-aw mitulisok,
kinsang kaugmaon biniyaang di malitok
sa mga tigpapatigayon nga sa tunhayng
pagpanaw walay igong kabangkaagan.

12nn.
nanawag si Kaminghoyon,
di matandog ang garbo sa udtong tutok,
diin miulbo ang kasina ug kasilag
ni Haring Adlaw. Naglagiti.
Tingpaniudto sa adunay makutkot ug matisok.
Apan sa nawong sa kawad-on
ang adunahan mopasigarbo lang sa hinikawan.
kay tiyan nga mikotoy kahimtang ning uyamot
daw sama lang sa kakuliang di mapugngan.

6pm.
suwab sa taliabot nga duka.
kilomkilom sa kanunayng kasaba
kay ang katigulangan pay pasultihon
- panahon kini sa pagpangamuyo
ug sa mga dili ingon nato.
inig bagting sa kampanang tayaon
ang balay-ampoanan dugokon
sa mga tumutuong nagkaguliyang,
sa relihiyong daw masulsolan.

ang pag-asdang sa asgad
nga dagat nasagubang
sa yanong tagabaybay
timailhan sa taliabot
nga hulaw --
hunat sa tumang kalaay.
giubanan sa laylay
mahimaraoton
mugna sa insektong
nasina sa kagabhion.
nag-inosarang agakon
ang kalikopang
asgad
ubos sa bulan,
hay-ad

daplin sa baybayon.

akong gitug-an kaninyo ang tanan

akong gitug-an kaninyo ang tanan

nga ang imong magulang maong yungit
bisag dako na
tungod kana kay sa dihang nagburos pa
ang imong mama
og dili gustong magpakasal sa imong
amahan nga wala pa makahuman sa
iyang pag-eskwela

iyang kining gisulayan og pagpakuha
apan sa dihang nasayod na kami niini
amo kining gibabagan sa usa ka pasalig
nga kami ang
moabaga sa pag-gasto sa iyang pagpanganak
nga kining tanan amo gayong ililong
sa among amahan
nga basin makapatay kaniya

akong gitug-an nga ako dili anak sa
inyong lolo
nga ang inyong lola nahigugma sa usa ka higayon
sa laing lalaki
og iya akong ginganlan
sa iyang tinood nga gihigugma


akong gitug-an nga ang inyong amahan
gidaog-daog sa inyong inahan kaniadto
nga siya ang labandero sa iyang mga bulingon
nga siya ang tigpangompra sa merkado
nga siya ang tigluto sa ilang pamahaw
nga piniritong tulakhang
og fried NFA rice

akong gitug-an nga ang inyong iyaan
maong maldita kay sa dihang nakuhaan kini
sa iyang ikaduha nga anak
naabonohan kini siya sa dugo sa usa
ka piniriso nga nakapatay og
tulo ka tawo isip
panimalos sa pag-ilog sa ilang sinunod nga yuta

akong gitug-an nga ang inyong lolo kaniadto
talimaye og ang inyong lola kaniadto nahimong usa
ka kabit sa congressman

akong gitug-an nga ang inyong inahan wala magustuhi
sa pamilya sa inyong amahan
nga ang inahan ni dodoy maoy nangilog
kay ang inyong uyoan minyo nang daan
og duna na gani kini silay anak nga lalaki

gitug-anan ko ikaw sa usa ka talan-awon
diin ang inyong inahan nga dako na og tiyan
sa dihang nagburos kanimo
bisan og basa kaayo
nanuktok sa pultahan sa akong opisina
nagpakalooy nga unta
ang inyong amahan magpakita na kaniya
kay basin og ugma damlag
makit-an na lang nga siya patay na og
naglutawlutaw didto sa suba


daghan akog gitug-an kaninyo samtang nangaon kita
sa Shakey's
samtang gikulinitan nato ang crispy kaayo
nga paa og pako sa manok
samtang gitilawan mo ang greek salad
og miingon ka
nga karon ka pa makakaon niini og
lami man diay kini

dunay itom og misagbat si dodoy nga
kini mao ang
olives og kanang green mao ang lettuce
og kanang puti mao ang
feta cheese

dagko kaayo ang mga kamatis
nga ilang gigamit
og nanam man diay ang olive oil
kon masagol na kini sa black pepper
og bell peppers

midugang ka og gravy sa fried chicken
og misulti nga asgad ra kaayo ang
fried potatoes

gitug-an ko na ang tanan
aron kamo mahigmata og karon
magsugod na kita sa atong
pagpanginabuhi nga
matarong
igmat
manggiloy-on
kahibalong mosabot
kahibalong mahigugma sa tinuoray gayod.

alang sa akong mga pag-umangkon nga batan-on pa kaayong nakauyab sa unibersidad

karon nga nailaila ko na
ang inyong mga tinagoang
mga uyab
akong tahion ang akong
mga ngabil
diha sa usa ka pasalig nga dili ko gayod kamo
isumbong sa inyong
amahan
nga kamo usab diay kahibalo na
nga mahigugma
nga kamo usab diay
naghandom nga kamo makatilaw
sa katam-is nga bation
nga kita usab higugmaon