pagbutang og dialogo sa usa ka bata nga mitutok sa iyang ice drop

bahala na mong tanan diha
basta
ako ka!

Yamog Sa Bulak

Kanus-a ang yamog
Sa bulak...

Mauga?

Unya
Kon ang adlaw...

Upaw na.

Akoy
2010.4.18

ITOM NGA INAAN SA AMONG SILINGAN

ang itom nga inaan
sa among silingan
mitabok
sa labat nga kawayan
milupad
mitugpa tupad sa
akong sunoy
nga pulahon

daghan man untang
sabod nga mais
sa ilaha

apan hinay lang gyod kuno
ang ilang
sunoy didto

sulti sa lover birds nga naa sa sulod sa hawla nga puthaw

pwede ba nyor
ayaw og tan-aw kon
remedyohon nako
ning akong
uyab
sud ning hawla
nimong pwerting
tayaa?

ang panahon

dugayon ko
pagtutok ang usa ka dahon sa
doldol nga nahulog gikan sa iyang sanga

hawiran usa nako ang panahon
akong inaton ang oras
nianing usa ka pamalandong kabahin sa usa ka dahon sa doldol nga nahulog gikan sa iyang sanga.

pagkahinay sa usa ka hitabo
nga nagpatihulog lamang sa mga kamot sa hangin

gipasapasa siya
giitsaitsa
gihinganlan nga kini mao ang pagpadpad

nianang mga tutok sa kahaw-ang nga gustong tambalan sa hapyod sa
pamalandong

lahi usab ang panghitabo sa usa ka gamay nga bato
nga imong gibala sa imong tirador nga nakaigo sa usa ka hinog nga manga
nga hapit na mahulog

kalit
apan imong gisalo
imong gihipos.

ngano ba tuod?

nga ang atong mahinumduman
mao man lamang ang
nangagi?

nganong dili man nato
mahinumduman ang umaabot?

usahay mas pait
wala ta'y mahinumduman
anang duha

Yahoo!

Yahoo!
Namugna
Ang
Balak
Abi'g
Imposible
Ganiha
Gibasura
Na
Unta.

Akoy
2010.4.17

Tagsa-tagsa'g Sakyanan

Unta mag-uban ta
Apan ako ug ikaw
Tagsa-tagsa'g sakyanan
Nga gidrayban.

Akoy
2010.4.17

Otot

Gapahiyom, nakautot.
Ingon nila, dili madungan
Ang pagtulog ug pag-utot
Sulayi ra god.

Akoy
2010.4.17

Tigom

Hala, petsa 17!
Hapit na
Hutdan nako'g oras.
Hunahuna, gakatag pa.

Akoy
2010.4.17

Balak

Unsa ang kalibotan sa lingaw-lingaw,
Titik, pulong kun tudling-pulong ang dulaan?
Unsa nga kalibotan ang pinulongan,
Nganong may katawa, kasubo ug katingala?

Akoy
2010.4.17

maong wa ko katulog

wala siya milingkod
sa silya
wala siya misaka sa
katre

iyang gilingkoran ang
akong

kuan.

MAGDULA TAG S....

ganahan na ko kaayo og
S

Magdula ta
anang S

Sumpay sumpay lang god
dakop dakop

hawid hawid
tayhop tayhop

suyop suyop
hawop hawop

panghinangop anang
S
labi na nga dugay na kita
nga wala magkita

magdula na ta anang
S

Sige
mag Suduko na ta

kalami anang dula ta
S
suduko.

alingawngaw

hain
hain
hain ka na?
hain ka na?

pangutana sa usa ka
hangin nga
mibanda sa kilid sa
usa ka bungtod

hain hain hain ka na
hain hain hain ka na ba ba ba ba ba?


nanganak
og nanganak pa gayod ang pangutana
sa usa ka alingawngaw

wala gayod masakpi ang
tubag.

ang mga tingog sa nati nga baka
morag tawag sa ambulansya nga sa kalayo
mahilis

mabati niya ang mga tingog sa
gipang-ihaw
sa mga nangamatay niyang mga higala

nanghayhay ang
pato
sa ubos sa ilang balay

naglingkod siya sa bangko sa kilid sa iyang
payag

milabay ang usa ka panon nga maglubong
sa bag-ong mipanaw

mibalik na sa tinood niyang puy-anan
siya ang nakulbaan nganong dugay pa ang iyang turno

usahay manghupaw siya sa hangin
basin og nakalimtan na siya sa Ginoo

pait ang kahimtang sa tigulang nga wala nay pul-ong
ang puti nga bungot
ang mga uban sa iyang ulo nanggitib
ang iyang pagdungog mas abtik na karon
tingog sa trumpeta
ang kanta sa Ave Maria

nahuman na usab ang usa ka hugnaan
sa rosaryo
kasakit, kalipay,
sa himaya,

dakong pagpanghupaw
mas bug-at pa sa daro


milabay ang hangin gikan sa dagat
wala siya kapugong
iyang gipang-it.

platito

tulo ka mani nga
sinanlag
sa ibabaw sa puti
kaayo nga
porselanang platito
alang kanimo

nindot ang
tulo ka mani nga
sinanlag

tulo ka tanghaga
alang lang gayod
kanimo

ako ang
porselanang platito
nga puti

akoa ang
tulo ka mani nga sinanlag
alang lang
gayod kini kanimo

ayaw usiki
ukita.

ikaw na ang maningkamot sa pagsumpay....

pag-abot nimo
mokalit lang og abri ang pultahan
dayog sirado
mao nga kinahanglan nga mas abtik
ka pa sa
manatad

pagsulod nimo
mabati nimo ang kahilom sa mga lumot
makita nimo ang mga asul nga alibangbang
nga naglutawlutaw sa sapa
nagpaabot kanimo ang
kabayo nga
dunay pako

abtik kang mopatong
kay kon dili
masipaan ka sa iyang tiil
kay kon magpahinayhinay
ka iya
kang biyaan og dili ka na
makaadto sa
imong padulngan

hunahunaa nga ang pultahan
nga imong gisudlan dili na
gayod kini moabli
pagbalik
mao nga kinahanglan nga mas
abtik ka gayod
kay sa manatad

karon nga nakasakay ka na
sa likod sa kabayo
molupad kini
moagi sa abri nga dako kaayong
bintana
paingon sa mga panganod

hikapon nimo ang mga buhok sa bitoon
mahapyod nimo ang tutoy sa bulan
panghawid
kay basin og mahulog ka
dili gayod manumbaling kanimo
ang kabayo nga
pak-an

hangod nga moabot na kamo
sa dakong bukid
makita mo ang palasyo
nga gasiga ang suga
sa usa ka lawak
didto ka ikanaog sa kabayo nga
pak-an

mas abtik ka na kay
sa manatad
og karon dinhi na lang ako kutob
ikaw na ang maningkamot
sa pagsumpay ning
akong sugilanon

sa bukid sa Milad

patay
ang tanang
sagbot
pati na gani
ang mga kumpay
sa daplin
sa sapa

nagtapok ang
mga limatok
sa kilid sa
kawayanan

si Rosa
mubong babaye
dagko ang bagtak
nabyuda

si Ambod
taas og bus-ok
nga lalaki
nanguyab ni
Talya

padili-dili
mao nga silang
Rosa na lang
karon ang
nag-ipon

tigbugha sa kahoy
tigsab-og og tubig
mao lang ang rason

puros lang kuno
ugat ang kang Ambod
maoy ingon ni Rosa

si Rosa
mubo nga babaye
dagkog bukton
abtik

kamaong mopabuhi
sa mga patay
nga sagbot sa bukid
pati na gani ang mga
kumpay
kon iyang hikapon
samtang maligo
siya sa sapa
mangabuhi pag-usab

ang dakong toro nga
baka
karon sagbot na
ang kinaon
dili na tahop sa
dihang miabot
si Ambod sa
kinabuhi ni Rosa

sa bukid sa Milad
matod ni Rosa
dili mahimo nga
mag-inosara

kinsa ba ang mag-sag-ob
sa tubig?
kinsa ba ang magbugha sa
kahoy?
kinsa ba ang magtugway
sa baka?
kinsa ba ang magpatuna
sa kabaw?

si Ambod
matod pa ni Rosa
mao ang
iyang pusod.

dialogo sa usa ka kaadlawon

alarma
sa cell phone

alas tres
sa kaadlawon

ning gamay nga
lawak

kitang duha
naapikhan

blackout
init kaayo

maoy akong
namat-an

ikaw patay
sab sa katulog

pamalihog
kog tunol sa akong
brief

nadat-ugan sa
imong lubot

hangyo

ayaw palihog higugmaa ang
kahaponon

mga damgo lang ang ibalos
niini kanimo

diha sa kangitngit
magtikawtikaw ka unya

nga mag-inosara
wala kay kaestorya gawas

ang bulan og mga bitoon
nga bisan sa ilang kadaghan

haskang hiloma haskang
mingawa

mag-unsa ba ang ilang mga
kahayag?
hapnig lang sa kangitngit?

mahala ang kaadlawon
kay paaboton ka gayod sa kabuntagon

mga bulak og lunsay nga hangin
ilang idalit kanimo

paghapnig

sama sa pipila ka mga
saliko og mga karsones
hapnigon mo ang imong
kaugalingon diha sa sulod
sa usa ka kaban
walay kum-ot
dili lamogan sa mga
bulingon
plantsado

uga.

ablihi ang baybayon

ablihi ang baybayon
pangitaa ang akong mga balak
ang wala pa makadungog
kabahin sa baybayon
dili gayod makasabot niini

ang baybayon morag
hunos
sa aparador
diin akong gitipigan ang akong
mga panglantaw
sa utabangan niini
mao ang samin

sa dili pa ako moabri
sa baybayon
manamin usa ako
sa makaduha

ako unang gipahaluna ang akong pinahapay
dapit sa wala
akong giluwaan ang akong tudlo
og akong gipomada
aron ako sinaw nga tan-awon

gusto ko
malipayon ka

sa ikaduha nakong panamin
gisuot na nako
ang akong brief ang akong karsones
ang akong antipara
ang akong
pustiso ang akong
singsing

dayon nako og gawas sa among balay
aron mangita og
kalinaw

alang sa babayeng wala ko kahalok

wala pa masulat ang
balak alang
kanimo

apan kon imo kong sugton
isulat ko na gayod kini

labi na kon imo
kong pahalukon

mas nindot gayod kini
labi na kon imo kong pahikapon
mas mokurog ka
sa kalami niini

labi na kon imo kong padulgon
basin og
magpangita ka pa
sa uban pa nakong balak
kadtong taas nga balak
kadtong
mas gahi og balatian
kadtong mas
lalom og abtan

ang namutak

inaan.

(pwede pod
ang nangitlog)

ang balak nga wala pa masulat

hunahunaon
pa.

wrong spelling

emo.

dili imo.

Hain Ka Na?

Bisan sa panumdoman, hanap

Sa dughan na lang madumdoman

Gamay. Dili ang imong panagway

Ang nabatyagan, kahidlaw na lamang.

Akoy

2010.4.16

ang mubo nga balak

imo.

routine

ang tanan nga magbalikbalik
wala na gayo'y lami
og bisan unsa pa kalami
kon kini balikbalikon
adlaw gabii
kaadlawon
buntag
wala na gayod ang kahalang
dili na matilawan ang
katam-is

ang tinulo sa kapait
mao ang magpabilin

ang maot mahimong maanyag
ang aslom
halandomon
ang asgad pangitaon

mas maayo nga ang usa
magpahilayo una
aron matawo ang kamingaw

ang kahidlaw
dili moabot kon ang kalami
siging inusnos

pahulay usa
gugma
panahon na usab
sa tagpilaw

tabonan una
ang dayag
ipiyong una ang
gaamag

magtabil ang bilbil
iluwa una ang laway

basin ugma
mogimaw ang gugma


way komo sa pagpaabot
tangtangon una ang botbot.

pagpasug-o

sa akong tan-aw
katol ang tanang parte
sa imong lawas

midagsang ang daghang
mga butoy

gihagit mo ang akong mga
tudlo

karon ako
magpatigkong

wala ako'y kaloton
bisan ang imong hubonhubon

ang imong halok

gahi nga tubig
ang midap-ig sa akong
ngabil

wala na ang haling
sa imong dila

agipo na lang ang
nahabilin

diha sa imong dughan
wala na gani

bisan ang usa ka momho
ni Jasmine

Alimyon sa Kalipay

Talisalop kadto, usa ka Sabado,
didto sa Cagayan de Oro, diin
nangluspad ang ngabil sa adlaw.
Gikawras sa mga bituon
ang aping sa langit.
Giliyok-liyok ang buwan
sa panit sa kangitngit.

Ug sa dihang nilayag nako sa barko,
Nakalimot ko nga wa naman diay laba
kining akong sinina sukad gikamit ko ni
didto sa Timoga.

Ug kalit lang, nakighagwa ang mga lakrang
katawa nga namilit niining panaptona,
diri nahisayran ko nga ang kalipay
adunay alimyon, ug kini nisuksok
sa kinasuokan ning dughan.

Apan kalit lang pod gikusokuso sa kabugnaw
sa hangin ang akong paghandom.
Dayon kini gihumol sa akong paglantaw
sa nagbuwang dagat hangtod kini
giwaswasan sa uwan.

Sige lang, daghan pa man diri sa bag
akong mga sinina nga wala pa gilabhan.

Handomanan Sa Usa Ka Bulak

Di matan-aw apan hikit-an, di mahikap apan mabatyagan

Dili siya priso sa hunahuna, lalang siya sa kawanangan, sa kalikopan.

Kalingawan iyang tumong sama sa kalipay ug kalinaw o kaha handomanan

Sa panagway sa katahoman nga aloman dapit sa iyang suwang. Maanyag siya,

Niadtong dalaga pa, niadtong nagka seatmate mi sa third year (HS) hahaha...Unya

Akong bolpen nahulog sa iyang saya, wa tuyoa, tunga-tunga sa iyang sabakan. Unsaon

Na lang nga dili man ko mangahas pagpunit kay duol sa na sa langit, misteryo ug milagro.

Ambot kon siya mipahiyom, kon siya mitan-aw sa kaulaw, kon unsang hitaboa nganong

Dili ko moduol kaniya? Ambot kon unsay nahitabo sa bolpen karon, kon diin na, kon wa

Na ba? Nahutdan ba'g tinta? Basta.

Wa damha giduolan kos iyang mga amiga, nga ako pod nga higala. Ang nanguna, mitug-an

Gani, mitug-an paglabay sa mga katuigan nga "Ikaw akong crush kaniadto."Samtang karon

Ako gipangutana, nganong iyang amiga nga akong katupad gipadunggan,"Never been kissed,

Never been touched, but totally damaged." Hanap. Morag mao morag dili,apan mabatyagan ang

Inalisngaw sa kapungot nga hinungdan ug naingnan, "Kay 'arte' kaayo siya".O, nasuya ko kaniya, sa

Iyang kaarte. Mao seguro ni. Kay daw tandogonon nga dili patandog. Kay tingali nabatyagan nako ang

Iyang kahilas nga basin kami magka-touch o kaha ang kahilas naa ra sulod sa akong 'stage of puberty'

Nga hunahuna. Mao seguro nga wala dinhi, wala didto nga kahilas, kaulaw kun kaarte nga maoy

Hinungdan nganong ang bolpen dili puniton. Na ambot na lang. Hilas is in the mind. Kay ang kaulaw

Hunahuna lamang. Ang kaarte? Ambot lagi.

Hangtod karon dili ko kauyon, kay daghang mapugngan, dili mabuhat tungod sa mga arte-arte lamang.

Tuod man, humanon nato ning asoy sa kasuya sa kaarte nga wala didto wala dinhi. Ug wala diay ni sa

Langit ug sa yuta, wala gani sa mga nanglabayng panahon, kay nabilanggo ra diay sulod sa hunahuna,

Ang bilanggoan nga wala dinhi wala didto nga dili tinuod, kay lagi hunahuna lamang ang iyang mga rehas.

Nagkasuod ra gihapon ming tanan. Kon unsa man kadto, nagkaestorya ra.Pahiyom na lang ang ako ron.

Akoy

2010.4.15

ikaw na pod kaha?

dugay na ang pagtugaw
kon sutaon, mora na ganig pakaulaw

kining sayaw
sa usa ka layaw
kining barog
sa usa ka urog
kining gamay nga kurog
sa usa ka tingog

awit sa usa ka tamsi
nahimo nang kanhi
ang paglupad sa tikarol
nahulipan na ang pagkapuol

mitambling na ko
ikaw na pod seguro?

daghan na ang nahimo
asa na man ang imo?

higala, duha ang mosayaw
duha ang motagbaw
diha sa mabaw
didto sa lim-aw

nahimo na ang pagdagan sa tabili
ikaw na pod unta ang mopuli

humana ang akong pag-utong
ikaw na pod ang mobunal sa shatong

initado kanunay

ang lubot
sa kolon

ang tiyan sa
termos

ang bungtod
sa adlaw

ang batang
walay buot
sa iyang ina-ina

ang asawa nga
walay trabaho
sa banang pulis
nga palahubog

ang sulugoon
sa usa ka among
matapobre

ang imong bag-ong
balak
sa mga jurado.

pag-ilhanay pinaagi sa balak?

unsaon ba nato pag-inilhanay?
dili sa hawid sa kamot
og pagsulti sa ngalan
dili sa pagbutyag sa asang lugar
ta natawo
o asa ta nagpuyo
o unsa ang atong pangita

uhum, medyo gil-as

apan mamahimo usab nga
mag-ila-ila kita sa atong mga hilig
sa atong mga damgo
og sa atong mga kasubo og
kalipay

uhum, medyo lalom

lisod tugkaron ang pag-ila-ila
kay mahimong magkita ta
magtabi mangatawa
makighinabi
apan wala gayod gihapon
kita mag-ila
wala gihapon nato matugkad
kon kinsa ka
og kinsa ko

uhum, lisod gayod ang
pag-ila-ila

bisan gani sa pag-ila-ila sa
akong kaugalingon
bisag kada adlaw
gisudlay nako ang akong buhok
og hugas ang akong mga kamot
og kaligo niining akong
lawas
bisan gani og nakita og nahikap
na nako ang tanan
tanan kanako
wala gihapon ako makaila
kanako

adunay usa ka higayon
nga gitutukan nako ang akong dagway
giihap ang kunot
gisukod ang akong kalipay sa usa ka pahiyom
gimasahe ang aping
giukab ang baba
gibukad bukad ang ilong
gisirado abre ang akong alingagngag

gawas sa akong ngalan
og akong panginabuhi og
dis-a ako gikan
daghan pa gihapon ako
og wala hisayre
kabahin kanako

unya karon
maghandom ko nga ako kang
ilailahon?

kasabot na ko
dili na kinahanglan nga ilailahon ko ikaw
bation ko na lang

mamati na lang ako sa hangin
sa dagat
bation ko na lang ang gamay nga kainit
sa atong mga pulong
diha sa sulod sa bugnaw
nga kagabhion

siguro
makigtabi ako sa mga bitoon
sa way paggamit
og mga pangutana
sa way pagpangita sa mga tubag

bation na lang
mao kana ang atong panag-ilhanay

Kape?

Misakit akong ngipon
Ikaduha na ni.
Kaduha na pod ko
Wa masayod kon unsay hinungdan.

Akoy
2010.04.15

Karon, Ang Tagdon Karon

Nalimot ko sa balak nga miduaw kanako
Kay wa tagda, wa matagai'g higayon.
Kini na lang tubig nga gabula-bula karon
Kay akong gitungab, ang akong tagdon.

Akoy
2010.4.15

Kamingaw

Kanunay siyang moduaw.
Siya, ang suod kong higala.

Akoy
2010.4.15

Higayon

Unsa Ang Gugma?

Akoy
2010.4.15

dahong laya

dahong laya
sa usa ka sagbot sa akong agianan
akong gikutlo
gibulad sa adlaw
akong gilukip sa tungatunga
sa mga dahon
sa akong libro

timailhan sa usa ka
panghitabo nga dili ko gayod mahikalimtan

dahong laya
sa usa ka sagbot sa akong giagian
gitagakan sa usa ka lusok
nga luha
giughan sa dakong sapa
sa akong pagbati
diha kanimo nga patay na sa akong
handurawan

dahong laya nga nahimong anino
abog
panganod
hangin

usa ka taghoy
nga mikuyog sa hangin og wala na gayod madungog
nimo.

sama niini pananglitan

adunay lakat nga walay kapaingnan
sayod ka
nga walay pulos kining klaseha sa mga tunob
nga wala kasabot
kon mopadayon ba og dili
og kon mopadayon man
daghan ang kataposan

mahulog sa pangpang
human sa usa ka talinis kaayo nga syagit
og dayon mahimong hikalimtan lang dayon
ni bisan sa usa ka pulong
dili na mapahinungdan

mahimo usab nga mahulog kini sa kilid
sa bung-aw nga dagat
og mapapas ang tanan
sama sa usa ka bangaw
kadyot lang
usahay gani dili ka katoo kon
nahitabo ba kini

adunay gugma nga gikapoy
wala na magtikawtikaw
dili na maghisgot
dili na mangalot bisan sa kakatol
sa taliwala sa alimpulos

adunay kamatayon nga dili katagad
sa iyang lungon
nga gibudlayan niaanang nga nobena
sa patay nga
haskang tag-asa

adunay kinabuhi nga wala nay kahulugan
nga bisag imo pa kining balakan
og dulgan o hagkan
dili na kamaong mobalos
wala nay tubag kon dili ang laktod
nga kahilom

adunay kataposan ang tanang pagsugod
sama niini
pananglitan

pagyubit

dugay na kining
anaa dinha
gani sa wala ka pa matawo
anaa na kana
nagbalhinbalhin
usahay mas ganahan siya
nga dili na lang una
makita

apan dugay na kana siya dinhi
og didto
usahay motumaw kana siya
magpahipi
og kon moabot ang iyang gana
mohagsa daw sama sa usa ka
buhawi
makalumos og iya kining gikasakit
gikahadlokan
og busa mas daghan ang panahon
sa iyang pagpapahipi
sama sa usa ka alibangbang
nga miawat sa bulok
sa usa ka dahon
sa nangka

nakita mo na kini siya
apan wala ka kaayo nagpakabana
tungod kay ang iyang
kinaiya
yano lamang
sama ka yano sa ulan
sa bukid
sama ka yano sa balas
sa dagat
sama ka yano sa hangin
nga mokapyot usahay sa imong
buhok

sama sa usa ka katulogon
nga midap-ig sa imong pilok
diha sa naglibog nimo
nga kilay

apan kon gitagaan mo lang unta
kini og gamayng panahon
sama kagamay sa tumoy
sa imong tudlo
unta dugay mo na kining
nahikap

og diha ka na unta motoo
og dayon
imo na kining
mayubit

kaniadto

adunay babaye nga dako og tiyan
nagpaabot

humod sa ulan ang maong babayeng
dako og tiyan sa
gawas sa ilang balay

nagtindog lang
wala manangpit og ngalan
nagtindog lang
sa gawas sa balay nga makita
sa ukab nga
bintana

sa iyang pagpunay og pahid
sa iyang mga mata
dili ikalimod nga siya nag-iyak

gipangutana nako
kon unsa ang iyang tuyo
apan wala siya mitingog

mibalik siya sa iyang agi
samtang ang ulan
misamot og kakusog
og gisirad-an sa tigulang nga
babaye ang
pultahan sa balay

ayaw ako pangutan-a
kon kinsa kadtong iyang gisabak
og kinsa ang tinood
nga amahan niadto

patay na ang maong babaye
apan ikaw buhi pa
ikaw kadtong gisabak
kaniadto

ang ngalan nga gisangpit
mao ang
ngalan sa akong manghod
nga kusog kaayong
magdula og kote
kaniadto

ikaw karon ang
namati
ayaw paghilak
ang kinabuhi morag
usa ka handurawan
nga milugsong
sa bukid

wala'y dala kondili
ang mga pagbasol

sukod

i

ang kapuno sa kalipay sa usa ka
dughan
sukdon kini sa
kalapad og kadako
og kalalom
sa kahaw-ang

ii

ang kakusog sa pagdagan
unya sa tubig
sukdon kini sa
kataas og kalapad
sa ugat nga iyang
subayon

iii

ang kaligdong sukdon
kini sa usa ka
matahom nga
pagsulay

iv

ang tanan adunay sukod:

ang mga dangaw
magsukod sa bangaw

ang ulan sukdon sa
kabasa sa mga bulak
og dahon

ang imong kakugi
og pagmabinantayon
sukdon kana sa pipila
ka buslot sa imong
atop inig abot
na sa ting-ulan

v

kining akong gugma diha
kanimo
kon imong masukod
pakyas ako
sa kataposan

sayod ka sa gipanulti
sa mga
makialamon

ang gugmang matuod
walay sukod
ang kalalom og kamatooran
niini
dili masugilon nianang
mga dupa sa pisi

ang tubig niini dili
matukib
sa hinaw-asan sa usa ka
sag-ob

BRIDGE DECK

kining magsakay ta
og barko
makalingaw usab
labi na
og naa ka sa ubos
sa double deck nga
higdaanan
nagkalamoglamog
nga mga
liki
og hubag ang imong
makit-an

hinoon
usahay ang usa ka tiil
nga nagbitay
og unya mokiwilkiwil
pa jud

nan
diha na jud ka kakita og
unsa kahugaw
ang lapalapa
sa Pilipinas

ang bangis nga bulan sa Abril

nakakita ka na ba og usa ka
tamsi nga
nagtampisaw sa tubig
sa ulan nga
gihawiran sa palad
sa usa ka dahon
sa usa ka yahongyahong?

ang kanahan
nagpadidit pa
siging padidit
sa kabugnaw na tubig
nga didto
sulod sa yahongyahong

namati ako sa awit
sa tamsi
nga haskang lipaya
sa unang ulan
diri sa among dapit
sa bulan sa
Abril

ingon si Leah
bangis kuno
kining bulana

Dula Sa Kinabuhi

Ang kinabuhi nakigdula
Sa kalamposan ug kapakyasan
Sa mga surpresa ug problema,
Sa kasegurohan ug kulba-hinam
Kay ang tanan iyang panginahanglan.

Akoy
2010.4.13

gihurot pati bukog sa manok sa jolibee

sa wala pa ang kamatuoran
siya pa ang magtambag nga
dili ipaapil og kaon
ang panit sa manok
kay taas kini og
cholesterol

pila ray sugilanon sa dihang
gisultihan siya sa doktor nga mao kini og mao kana
unsa bang hitaboa

nga giorder ba ang bucket
sa KFC
gipakyaw og kitkit ang manok nga haskang
dagkoa
giapil ang bukog
gihurot ang panit
gitilok ang gravy

og mibuhakhak og katawa
mitutok sa gawas
gusto untang moiyak apan wala na kini
mipatulo bisag usa ka
luha

gibayaran ang bill
migawas sa KFC
milakaw paingon sa Capitol
walay lingilingi
mitabok sa kalsada
og wala nay kahadlok kon
maligsan ba siya og dili

sayod na ko kon unsay gisulti sa doktor
dili malalim
dili jud malalim

panagsukliay sa taxi driver og sa pasahero nga abogado

i

misugilon ang abogado kabahin
lagi sausa ka bana nga luyat na
agi og paminsar kon asa kuhaon
ang kwarta nga ibuhi sa tulo niya
ka mga anak
nga motungtong na sa kolehiyo

nga ang asawa nagbagotbot
kay ang gahi sa ilang balay
mao na lamang ang
ubo sa iyang bana

og ang bana usab
wala papiri nga mibalos
nga ang danlog lang kuno sa ilang
balay mao man lang sab ang banyo

ii

dugay nakuha sa taxi driver
ang sugilanon
apan sa pipila ka minuto mikatawa
kini og

iii

ang taxi driver mibalos nga adunay
pasahero nga giilad sa usa ka
sama kaniya
nga gilibotlibot didto sa Carbon
og miingon baya ang pasahero nga


"manong, pwede ba
dili lang sa ta karon magsuroy-suroy
ugma na lang
kay gadali ko!"

iv

og imbis ihatod sa Pier Dos naunsa
ba nga silang duha
nahiadto man hinoon sa Pier Tres

v

nabiyaan ang pasahero sa M/v Virginia
og ang ilang gibuhat mao
na lamang ang pag-inom
og red horse
sa carenderia ni Pering

vi

pagkahuman gikaon ni Pering
ang kuan
sa Pasahero samtang ang taxi
driver hubog kaayong nagligad
sa salog sa carenderia
nalimtan na ang iyang
bayranan

sa boundary
sa tindahan

nagpuyo na lang kini
sa nindot nga damgo sud sa
hubog nga
kalibotan

nalibog sab ko nganong gisulat ko kini
seguro naglibog ka usab nganong imo kining gibasa

apan ayaw kabalaka
ingon ana baya ang kinabuhi
usahay
sakit dawaton apan mas lami kon ang kinabuhi
walay tumong kanang

morag wala kay katarongan
nganong mabuhi

sama sa usa ka alibangbang
nga kaganiha
mibatog pa sa usa ka gumamela
og karon
usa na lamang ang pako
nahagsa sa kabatoan

wala'y reklamo
wala sa'y nangambat
kon ngano
og naunsa

ang bata nga nagpakariling sa
ligid sa guba nga biseklita
milapos sa kalsada

misyagit ang usa ka babae
sa iyang nakita
wala katingog ang driver
sa ten-wheeler truck
wala gani kaatik kon
unsa'y nahitabo didto sa
sulod sa ilalom
sa maong truck