pressure

adunay granada sa utok
time bomb sa tiyan
og kalibre .45 sa baba
sa atay.

naningkamot ka nga ikaw tuhuan sa uban
daghan sila
ikaw lang usa

pakyas ka lang gihapon kay sila
wala mag-ambat sa imong mga kamot diha sa kakugi

didto sa merkado nag-inom sila og tuba
nagsumsom sa sinugbang baboy og mga tinap-an
naghisgot kanimo og duro nilang pangatawa

nadungog nimo silang tanan
apan bisan sa tanan wala nimo sirad-i ang imong dunggan
wala nimo gigaid ang imong mga kamot

ugma damlag inig-abot sa kahayag
ugma sa adlaw sa imong kalipay og kalamposan
hatagan mo sila
sa angay kanila

usa ka salu-salo
sa usa ka galon nga ihi
usa ka bandihadong igit
usa ka platito nga kugmo
tulo ka tasa nga sip-on
pakapinan pa og
tulo ka palanggana nga lawog
sa mga baboy

lami kanang tanan
alang kanila

ang kasingkasing daghang awit
bug-at ang mga lyrics nga usahay dili
mabitbit sa hunahuna
bisan dili na ganahan mamati ang
gipul-an nga utok
ang baba sa kasingkasing
mopadayon sa pag-awit bisan
gani sa kangitngit sa kagabhion
diin ang bulan og mga bitoon andam
nga mohambin

Ang Kamatuoran Sa Kausaban

Ang Kamatuoran Sa Kausaban
By Genamos_US of Washington DC, USA

Dili ba kung kini atong hunahunaon
Nga kining panahon usahay bakakon
Kung atong tugtan hikapon ang kamatuoran
Basin motipas ang atong pagtuo sa kapalaran

Kay ang kamatuoran sa kagahapon
Mahimo man kining bakak sa karon
Samtang kining mga suwat nahipatik ug nahilagda
Ang kamatuoran sa kinabuhi dili matagna

Kung ang gugma nga atong gibati karon tuiga
Dili ba lahi man sa niaging tuig mga higala
Kung dili man kini ang naghulat nga tinood
Daw usa kini ka bakak nga atong gisunod

Dili malimod ang mga dagway sa kamatuoran
Sa naglakaw nga panahon puno sa kasayoran
Madungagan ug makuha-an kining pagbati
Ang kanhing panahon dili nga gyud mabakwi

Sud-onga kining atong mga palibot
Sa dagan sa kinabuhi usahay dili ta kasabot
Kung ang dughan ta gihapyod sa kangotngot
Kay gibiyaan sa gugma nga napongot

Ang mga panagway sa kausaban
Sa kinabuhi kanunayng atong totokan
Dili kita magdali sa pagpasagad
Sa mga pagtulon-an nga atong natugkad

Magbantay kita nga dili masugamak
Aron ang mga kalisdanan dili mapusdak
Kay ang kamatuoran sa kausaban
Adunay gayod hustong basihanan

panamilit

ayaw kuno pamatia
ang iyang gisulti
ang iyang wala na masulti
maoy hinumdumi
mas undan kadto og busa
makabusog kanimo

ang mga pangandoy

morag mga miming nga
miabot sa lawak
natug sa carpet diha sa
ubos sa katre
walay kisaw nga mipahawa
sa dihang miabot
ang kahayag sa kabuntagon
morag balahibo sa tamsi
nga gidagit sa
huyohoy gikan sa dagat

sa tumang kakapoy niadtong gabhiona

wa ko madungog ang kusog
nga paghot sa iro
wa ko mabati ang tumang
kainit sa
imong halok
wa na ako manumbaling
sa pipila ko ka mga damgo
namatay ko
sa gitik sa kalipay

ang tanang panaw
adunay abtan
mas lami ra gayod
ang balay paholayan
sa kataposan
ang mata mopiyong
maniklop sama sa
payong
ang mga suga sa
bintana
mapalong
mobanos na dayon
ang tumang kahilom
nga gihayagan
lang sa bulan og
bitoon

Uban kanako

Uban kanako
By Genamos_US of Washington DC, USA

Uban kanako sa dalan sa kinabuhi
Aron sa pag-usisa sa matag rekodo niini
Ubani ko nga maglingawlingaw
Sa kaanyag sa kinabuhi puno sa kalinaw

Mangita kita sa atong mga kusog
Aron sa paglaban sa atong pagbarog
Sa mga langiob ning atong dughan
Mga pag-ampo dili kita madutlan

Andamon ko kining mga bukton
Kung man gani ikaw sapoton
Habolan ko ikaw sa kainit kung gakos
Aron ang kamot sa gugma mobalikos

Bisag sa kalisdanan kita kunoton
Sa dughan ko akong pagkasabton
Mga kagul-anan ug pagsuway kita duawon
Ikaw gihapon ang akong lantawon higugmaon

Ipaambit kanako ang imong mga katawa
Mga komedya ayaw intawon pakyawa
Mga pahiyom mo may talagsaon kalipay
Kay sa dughan ko ikaw ang makahupay

gil-as

kon mohalok na gani ang bugnaw
nga wait sa hangin gikan sa baba sa baybayon
didto sa aping sa panganod
samtang naglutawlutaw kini sa mga buhok sa
cogon sa ulo sa bungtod nga birhen
ang bata sa pangpang nga siak na sa panahon
bation og gamayng gil-as
og nangahulog ang gagmayng bato
didto sa kilid sa pusod sa dagat.

Ang Damgo sa Til-as

nagtubo ako nga wala ka,
inampingan ug puno
sa pag-atiman,
wala nila ako tuguti
nga makigbugno sa gubat
sa kinabuhi

sila nga nahikatulog na sa suwab
sa kalibutan mao ang kanhi
kong mga pako
nga gisakmit  na sa kangitngit


subayon ko unta ang agungoy
sa hangin
aron masuta ko ang
tuburan sa kasakit
ug kalipay

apan ikaw ang akong nakita
sa hanap nga kapunawpunawan,
ikaw ang lim-aw nga gikutaw
sa libog kong pangisip

kuspaw ang imong pamayhon
sama  lang sa imong laraw
dili ikaw ang tubag
sa akong mga pangutana
og salimu-ang

tuktukon ko ang pultahan
sa langit
lungkabon ko ang giyawihang
mga bintana

pamuniton ko ang mga nayagyag
nga mga bitu-on
ug isabwag ko kini
sa mga lunhaw pa og pangisip

uslan ko ang mga pako
ug anting-anting sa mga anghel
aron paghagwa sa ilang katulugon

dimalas

unang ang-ang
guba nang daan
ikaduhang ang-ang
obvious nga kiang
ikatulong ang-ang
nahulog ang buang
adunay ikaupat
libat nga hibat

didto sa sala

gisugdan ko na usab
ang dili nako mahuman
gibalikan ko na usab
ang unta akong likayan
layo na kaayo ang gitugpahan
sa hunahuna
ang kasingkasing nagyampongad
ang reyalidad nahibilin
batang nabiyaan sa nanay
diha sa istasyonan sa bus
ang mga damgo namatong
sa kilid sa mga dahon sa mabolo
ang lawak nanirado
samtang ang alugnan nagsugod
na usab og iyagak
nahapla ang konsyensya
gusto untang matulog
ang mga unod
mibangon ang tiil naglibotlibot
sa lingkoranan
didto sa sala.

ang selos

kanunayng magtakuban ang selos
gitabonan ang mga mata nga nagbaga sa kapungot

giturongan ang mga buhok nga nag-aso sa kaligutgot
gitahi ang mga ngabil og giluklok ang mga pulong sud sa alingagngag

morag bulkan nga hapit nga nga moboto ang kasingkasing
maglanab ang mga bato nga gihilis

andam na ang pakighinabi sa kamatayon
walay pili: pwedeng mopatay og magpakamatay

busa lakaw sa bungtod, tago sa langob
ayaw pakita, amigoha ang hangin, kuyog sa tagolilong.

ning akong kapalaran

dili angay kasinahan ang inyong
mga lingkoranan diha sa mga panganod

kay una sa tanang
hadlok ko anang naa sa taas

dili ko kaagwanta sa bugnaw nga hangin
og sa tumang kahilom sa wanang

naandan ko na ang paghangad
og mas makatulog ako sa banig nga sagbot

panglantaw sa kinabuhi

lahi lahi ang atong mga panglantaw
siya mobalik
o siya mopahawa

paingon sa pagkahurot
og paingon sa pagkapuno

puros mga tinood
mahimo sang puros mga bakak

dili angayan kalibgan
dawaton lang kon unsa ang moabot

motugpa sa palad
hangpon ang magpabilin

kalimtan ang mopahawa
imnon ang puno

ginagmay

ang atong mahimo mao
na lamang ang pag-apod-apod sa
lucky me noodles
sardinas nga dunay barko
pipila ka kumkom sa bugas
nga medyo lagom-lagom
mga ukay-ukay nga pinutos
og daan nga Inquirer
pakapinan sa atong mga
pahiyom og
lamano sa ilang mga kamot
nga hugaw og palad nga
kubalan

di na ta maghisgot anang
mga economic reforms
og ang mga pros and cons
sa globalization
kapoy na og promote ni
Noynoy
og saway ni Gloria

ginagmay lang god
apan atong gikaya
sa wa pa mahuman ang
karaang tuig

sukod

kon sukdon mo
ang kabug-aton sa lawas
ang katas-on sa
pisi
ang kalay-on sa lupad
sa luwa
ang kalalom sa kamingaw
ang kangitngit
sa kagabhion

sulayon sab natog sukod
panalagsa
ang kalumo sa kasingkasing
ang katas-on
sab sa pasyensya
ang gahom sa kalig-on usab
sa mga kamot
nga kamaong moampo
og sa mga tuhod
nga andam kanunay
nga mopiko.

ang sulti sa pisi

dili ra man unta
kaayo bug-at
apan wa koy mahimo
kay ang ako
ako gayong huktan

sa unang adlaw ning tuig...

ang kalayo sud
sa dughan
dili ko palongon
ang akong kahayag
akong ipadayag
bisan unsang
kakusog sa hangin
kon ugaling
makapalong
dagkotan ko gayod
kini dayon

ang langgam nga itom
dili ko prisohon
ang langgam nga puti
akong paawiton

sa tungatunga sa kasakit

si langging sa akong tan-aw
dili na ganahan motingog
bug-at ang pag-alsa bisan og
usa ka pulong lamang

ang iyang makaya mao na lamang
ang pagpalit sa
kinabaratohang tambal
diha sa katulugon.

sa parke
nagsabog kog mga humay
alang sa mga salampati
nga nag-alirong kanako

pagkahurot na
silang tanan nanglupad palayo kanako

naglingkod ko nga nag-inosara
sa sementadong bangko

ang ako lang
mao ang mga pako nga
naglagablab
ang mga panamilit nga
walay tingog

nga kon naandan na
wala nay mabati ang hunahuna

lagom na ang imong wait
og ang imong buhok hinay hinay nga nangatagak
namyahok na ang imong mga aping
og ang imong mga unod
nangahilis
naningkamot pa gihapon ang imong mga panit
sa paghawid sa imong mga bukog
nagsalimuang na ang hunahuna
naghisgot ang imong baba sa mga larawan
sa imong ginikanan nga hagbay na nga nangamatay
kon unsa ang ihungit
imo man sab dayon ang imong isuka
kuyugan sa dugo gikan sa imong sabakan

naglantaw ko sa imong kasakit
naghinuklog ko
kabahin sa kahimtang sa tawo
ning mga adlaw nga unta ang tanan
maglipay
ikaw ang di katindog og dili ka sayaw
ikaw ang naghangos og dili makalahutay

sa wala pa ako nanamilit kanimo
diin ikaw kanunay nga giduaw sa katulugon
mikuot ko sa akong pitaka
mihatag og kwarta sa nagbantay kanimo
isip bayad sa paghambin mo
sa pag-antos sa kasakit sa kalibotan

morag adunay gamay nga pasalamat
nga niining higayona
dili pa gihapon ako nakakuha sa ripa.

sa pagpatong mo sa usa ka baso
diha sa lamesa nga plastic

diin tunga lang sa tubig ang
sulod

og dayon nimog lakaw pagawas
sa balay

nahigmata ako sa
kahapdos sa bag-ong samad

nga imong gihatag
ning sayo sa buntag

karong gabhiona
sudlan ko na usab ang imong kalibotan
papason ko ang tanan
og sugdan ko na usab
pagsulat
ang bag-ong sinugdanan

bation ko ang pagkapulpog
sa akong mga kalibog
daw bildong gihampak mo
sa itom kaayo nga kaldero

pwera bisita na!

pwera bisita na
ang barko sa bag-ong tuig
molarga na

ang dili mosakay
mabilin

ang dili mangilabot
pahawa

ang nangaangol og
nangamatay

sa dayon
hikalimtan

Adunay Laing Langit

Adunay Laing Langit
By Genamos_US of Washington DC, USA

Adunay koy nakaplagan nga laing langit
Sa nasum-okan kung dapit
Dili mo kini makita sa dalan
Kay gitagu-an sa mabaga nga mga tanaman

Lab-as didto ang huyohoy sa hangin
Ang palibot sa kanunayng malinawon ug matahom
Adunay sad silay laing adlaw
Nga may talagsa-on ang bidlisiw
Ug mahinay nga kainit

Bughaw nga kalangitan
Puti og abohon nga kapanganoran
Patag og luag ang kapatagan
Inubananan sa nagikis-ikis nga agianan

Walay igsapayan kung pughaw ang kalasangan
Ug mga amang nga basakan
Ang kahilom sa palibot inanay suliran nakalimot
Nga kansang mga tanom nga ihalas
Bulak nga naputos sa mga kolor
Nga dala og inspirasyon ug kahinam

Ang mga hugong sa mga buyog
Daw usa ka melodiya nga giduyogan sa trumpeta
Ang mga dahon lunhaw
Adunay say nanga pagba nga mga laya

Pagkaanindot sa mga talan-awon
Maka-ikag sa atong pagpamalandong
Kay ang mga huni sa kalanggaman
Nga nagkuros sa pag-awit
Kay didto ko natagamtaman
Nga na-a diay laing langit

ang babaye nga gikaon sa cancer sa cervix

naghigda sa gamayng katre
bukog og panit na lang
hangak na kaayo ang mga
pulong nga iyang mabungat
inihap na lang ang mga adlaw
apan ang iyang pangandoy
anaa lang gihapon:

"maayo unta og dili lang sa
karon" pakapinan pa unta og
gamayng pahiyom.

Bag-ong Tuig

sugaton ta sa kalinaw
og kalipay ang bag-ong tuig.
mokaransay ang lingganay
sa tumang himaya
silhigon ta ang mga lawa-lawa
sa galamhan
ablihan ta ang mga bintana
sa atong kasing-kasing
aron kini makadungog
sa hagawhaw sa atong salabutan
supakon ta ang naandang dinagayday
alang sa kausaban

Bulahang Bag-ong Tuig

Bulahang Bag-ong Tuig
By Genamos_US of Washington DC, USA

Sugaton nato ang bag-ong tuig
Nga walay dughan nagsangkiig
Mga nagkalandrakas nga mga ritwal
Aron himoon ang matag tuig nga espesyal

Ania nasab ning ang paghatag og mga gimbut-an
Kung matinood matuman dili kini hisapayan
Kay ang pagbuhat og positibo nga gitampo
Sa kinabuhi kini himoong ehemplo

Ang pag-uswag sa pananalapi
Nga maoy katuyoan ning kinabuhi
Aron sa matag adlaw nga tanan
Ang pamilya nato dili magutman

Daghang mga rason ang akong nahibaw-an
Gikan kini sa mga tawo nga akong nasugatan
Ang pagbag-o sa kinabuhi ilang kining gidumtan
Aron sa kalisod ug kasakit sila mapanalipdan

Dili nato talikdan ang mga nanglabay
Kay mao kadto ang barometro sa atong pagsubay
Ang pagpasalamat ngadto sa kahitas-an
Aron ang grasya padayon magauban

Madako ug gamay gidawat nga mga suliran
Kay sa langit kita mangayo og hinabang
Kung dili kita sa sakit makaantos
Kay sa mga pagsuway kita gihandos

Dili kita mawagtangan og paglaum
Kay adunay Dios nga mopahinumdom
Sa mga kakulian dili kita niya biyaan
Ang pag-antos ug kaluoy kita pagabaslan

Sa mga umaabot nga katuigan
Ang grasya sa Dios kita mapiskan
Aron ang kinabuhi may timik ang kahulugan
Sa gitugon ni Bathala dinhi sa kalibutan

Pagka-anidot nga katuyoan
Sa matag bag-ong tuig nga tanan
Ang paghigugmaay dili hikalimtan
Aron ang tibook tuig mabulahan

Ang Kagahapon

Ang Kagahapon
By Genamos_US of Washington DC, USA

Kadtong nilabayng katuigan
Kay wala ko masayod
Kung asa ang sinugdanan
Sa mga nangapapas nga utlanan

Nilabay ang mga katuigan
Ang dughan ko padayon nagbangutan
Kay sa kagahapon kanunayng gipugngan
Ngano kaha kini lisod buhian?
Ug ngano kaha kini padayon gipahimoslan?

Dili ba kaha kita giduyan lamang
Sa nasuko nga kalisdanan gipanimaslan
Pagkasakit handumon pag-usab
Ang mga nangaging panahon
Puno sa kahiubos nga halandumon

Sa imong paglakaw
Dughan ko nakapanghupaw
Bisan nahugno kining panglantaw
Nahunong ang mga damgo tang gilaraw
Kay sa mga saad kita gimingaw

Didto sa daplin ang nagduka nga baybayon
Akong gisubay ang mga tunob
Sa akong nagkahanap nga handumanan
Aron handumon pag-usab kadtong panahon
Inubanan sa mga hinogan-ob sa mga balod

Gipadpad ang nasaag kung panumduman
Didto sa singsing nga imong gibuhian
Gihatag ko kini sa pagtimaan
Sa mga pagsalig akong gitindugan
Nga kanimo gidawat niadtong nilabyng katuigan

Wala ko damha nga mao diay ni ang dangatan
Sa nagun-ob kung kalibutan nga gisakitan
Gugma ug Pailob sa kanunayng giatiman
Bisan giduaw sa mga halok sa kalisdanan
Nangandoy kini mulambo sa mga katuigan

Pagka-anogon sa mga saad
Imong gibuhi-an nga nilupad
Nga ang dughan ko naglabad
Bisan gibudhian sa walay paglubad
Gikan sa imong bugnawng mga palad

Pasaylo-a ko kung ako man ang nasayop
Sa nabilanggo nga kagahapon kita gihigop
Buhi-an ko nga ikaw karon sa walay mahay
Ug tak-upan kadtong maot nga kagahapon
Aron ako magpabilin nga magmalinawon

Higala

Higala
By Genamos_US of Washington DC, USA

Gusto ko tugkaron ang tinood mong pagbati
Kung ako ba imong unongan bisan sa kataposan ning kinabuhi?
Mahimo ko bang ikasulti kining mga tinagu-an kong pagbati?
Kay sa dughan mo kini akong ipahid ang gibati kung pasalig

Walay tatsa ang atong panag-uban
Kay sa gugma mo ako gipurongan
Imo kung gidawat sa akong pagtawo
Ug mao sab ang akong pagbati ko kanimo

Kung sa takna sa imong pag-subo
Gitagana ko kining akong abaga
Alang kanimo sa imong pagbakho
Kining mga bukton sa kanunay ko kini ihabol kanimo
Aron pad-on kadtong mga kahasol sa imong anino

Kung sa panahon nga ako nanginahanglan kanimo
Andam ka ba motabang sa walay pagdamgo
Bisag adunay kapay gibisihan sa kinabuhi
Ako pa ba gihapon ang imong gipili

Higala, ayaw sa pagkalimot sa atong mga saad
Kay akong idunol kanimo kining akong mga palad
Aron sa paglingaw sa imong mga luha
Nga gikaluha-an sa ibabaw ning yuta

Akong ihatag kanimo akong mga pahiyom
Aron mokanay ang imong katahom
Ibalon mo kini sa imong paglakaw
Inubanan sa imong mga laraw

Dili ko ikaw hikalimtan ning akong dughan
Bisan sa kahadlok imo kung gikuyogan
Kay sa kanimo ako padayon naga-uban
Hangtod sa kapusoran ning kalibutan

Pamati-a ang gibati ko

Pamati-a ang gibati ko
By Genamos_US of Washington DC, USA

Niadtong usa ka dili malimtan nga higayon
Samtang nagdung-aw ko sa kaanyag sa palibot
Ibabaw sa tambuanan sa akong hunahuna
Ang imong panagway daw nilabay nga usa ka bugnawng hangin
Nga nikuray ang akong kahiladman sa tumang katugnaw

Dili ko masabot ang gibati kung kiwag ning akong dughan
Kung kini usa lamang ka alimongaw
Ug sa akong pag-aninaw samtang nagka-awop ang adlaw
Ang iyang kahayag maoy naka-uknol sa iyang palibot

Ang iyang gilaw nilahos sa kahilum
Nga nidakin-as sa lumoy niyang mga buhok
Ug didto niluta ang kaanyag nga walay sama
Inubanan sa madanihon nga pahiyom
Daw usa ka sining sa Mona Lisa

Ug dinhi nasiak ang kahilum sa akong dughan
Nga ang tinubdan sa tingog
Naggikan sa hinagawhaw sa akong kasingkasing
Ug didto natawo ang lengguwahe sa gugma
Nga dugay ko nang gilitok ilawom ning akong dughan

Ngano man, kung sa takna nga ikaw akong makita
Daw ang akong dila masangit sa talinggab sa imong imahe
Nga dili ko masabtan ang dughan ko nga puno sa pagbati
Nga kanimo gusto ko kini ipabati

Ang Giya sa akong Tumong

Ang Giya sa akong Tumong
By Genamos_US of Washington DC, USA

Nagkapakapa ang akong hunahuna
Nga napuno sa mga kasayuran
Gihinay-hinayan ang pagkurikuri sa akong kaisipan
Aron bugnawon ang hunahuna sa mga distraksyon
Kay pamasin adunay sampotanan sa akong emosyon

Kadtong nag-alindasay nga hunahuna
Nga walay insaktong hanig sa mga katuyo-an
Maglisod pag-irog sa iyang padulngan
Kay gisungog sa kapalaran

Kung malisod man kini wad-on
Ang salimbong sa hunahuna
Bunga sa paghuyatid sa pagduha-duha,
O kaha ang huy-ab sa kabalaka
Nga inubanan sa anino sa kahadlok
Kining tanan usa lamang ka mga hagit
Sa nag-inusarang kinabuhi

Kung matipon nato ang mga distraksyon
Aron ilubong sa dayon
Dali ra tugkaron ang tinood nga tumong
Sa gitinguha ko kini ipadayon
Aron ibalon ang singot sa paglimbasog og kalig-on
Nga kansang tumong dali ra kab-oton

Ang kusog sa kaalam naggikan man sa atong hunahuna
Aron agawon ang idlas nga tuyo
Walay pagpanagana og pag-atras sa naghulat nga hagit
O mga ipasumangil sa nagbagbag nga mga pagsulay

Kung kining tanan atong mabuhat
Ang kalampusan nga nagmaya naghulat
Sa gitangkil kung giya sa akong mga tumong
Nga ang kalibutan nagtuyok nga mabulokon
Sa pagpadayon nga wala mag-urong

balak alang kanimo

gusto ko nga ang balak alang
kanimo
mas sadya pa sa mga batang
nag-ilog sa mga candies
nga gisabwag ni
santa claus didto sa plaza
sa Luneta

gusto ko nga kini
mas lanog pa kaysa mga pabuto
karong pagsugod
sa bag-ong tuig
mas mabulukon pa kaysa
mga imported fireworks
didto sa tulay sa
Australia

gusto ko nga kini mas humot
pa kaysa sa sabon
nga Heno de Pravia
mas lamian pa sa fruitcake nga
hinatag ni Tia Gomolka
gikan sa Austria

kining balak alang kanimo
mas nindot pa kini kaysa balak
nga gisulat ko
alang kanako
kay kini dili bakho
kay kini usa ka pagyukbo
kanimo Higala

ang balak alang kanako

kining balaka
walay ritmo
wala say nindot
nga tono

balak kini
alang kanako

sa silong sa kahoy
nga laya na ang
mga dahon

sa mga sanga nga
gibiyaan sa mga langgam

sa mga bato nga nauga
kay wala na'y ulan
kay ang sapa
naughan

sa langit nga walay
bitoon
sa pagsalop sa adlaw

basahon ko kining balak
alang kanako

kon ugaling wala nay lain
ayaw og kabalaka
treat yourself for another
day
for another drink
but don't be drunk
di ba god mas lami
nga ikaw og ikaw lang
ang imong
tinood nga amigo?

di lalim kon ang imong
kaugalingon ang
imong kontra

you will be sleeping with
your own enemy
breathing with the same
enemy
and hurting same enemy

ayaw ana dong
dapat bilib ka sa imong
sarili
kay wa nay laing mobilib nimo
gawas ra usab
nimo

di ba?
yes!

ang halas nga samdan

halas siya nga samdan
napaakan sa
kapwa-halas sa ilang
lasang

nagkamang, nagsusisusi
sa kasagbotan
nangitag tambal aron
ugma
siya buhi lang gihapon

sa unang adlaw ning tuig...

nag-open ko sa PC
basa sa emails
delete ang akong tan-aw
mga spams

as usual dayog balhin sa
FB
scan, skim, lantaw sa mga
pics
bahin sa balay ni M. didto
sa green meadows
kunuhay payag
apan mansion diay

tan-aw sa christmas 2010 ni
G. nga hangtod karon
walay reply

tua si A. nga pagkaplastik
daghang atik
nga og makatalikod kog
gamay
dayog tigbas sa akong
atay

tua pod si G. nga siging
pabula sa iyang mga
modernong balak
nga in truth
wa na ko ma-touch

gamay lang ang akong tinood
nga mga amigo
di na gani maihap sa mga tudlo
sa akong toong kamot

sa unang adlaw ning tuig
silang tanan
akong i-delete.

alang sa balak...

ning bugnaw nga kaadlawon
ania ako
mitago kanimo, usa ka ka lawak
nga naghatag kanako
og kainit,
balay ka sa akong pagbati
ikaw ang mga bukton nga
akong gakson
kon ako usa ka hapdos
nga samad sa kapalaran
ikaw ang akong higala nga
kanunay nakighinabi kanako
kon ang tanan
nagbudhi na kanako

alang kanimo dawata kining
giipis kong bino
sa silong sa bulan
kitang duha og ang akong anino
isip ikatulo
maglala og mga banig
sa atong mga damgo

Ang Peligrosong Biyahe sa Gugma

Ang Peligrosong biyahe sa Gugma
By Genamos_US of Washington DC, USA

Ang gugma nagsubay lang sa usa kadalan
Daghang mosakay aron ilang suwayan
Kasingkasing nila dili mapugngan
Kay nanimpalad aron makaplagan

Ang uban nga pagbati sa walay undang
Gumikan kini sa gugma nga hilabihan
Molahos usahay sa walay utlanan
Kung mapandol kini dakong kasakitan

Ang matag kasingkasing may igong agianan
Aron sa pagkaplag sa ilang mga kapalaran
Ang tunob sa mga damgo ilang gisubay
Aron sa hingpit nga katumanan dili magdugay

Sa mga pag-ampo ug pagsuway
Giagian murag walay pagmahay
Pagtoo sa Dios ug pagsalig
Ang tanan sa kahitas-an gisandig

Kay walay makapugong sa unsay moabot
Bisag atong ipadagayag ang atong pagsabot
Magpailob kita sa dughan nga puno sa kagubot
Kay walay igong luna kanang sige og bagotbot

Padayon kita sa pagsakay
Sa biyahe sa gugma kita gikamay
Bawnon nato ang pagbati nga tiunay
Aron busog ang gugma tang ipabuhagay

Ngano?

Ngano?
By Genamos_US of Washington DC, USA

Nihangad ako sa tiilan sa langit
Aron magabakho sa sabakan sa mga panganod
Ug aron akong gihikyad kining mga pangutana
Pamasin madungog akong mga pangamoyo ngadto ni Bathala

Akong gisubay ang mga kagahapon
Aron sa pagkaplag sa mga tubag niini
Kung ang haring adlaw nga nagmaya sa tumang kasidlak
Mao sab kini ang akong gibati sa tumang kalipay

Dili ko masabot kining akong dughan
Kung unsa ka lawom kining kabalaka
Kung ako kaha kining ihilak?
Malimot ba kaha kining akong dughan

Kung akong kining ikatawa?
Makunhuran ba sab kining kasakit
Akong nadunggog ang mga bakho
Sa hangin nga nidakpis sa akong mga aping

Ug akong mga mata nilugmaw
Ang mga luha sa kamingaw
Nihonghong kanako ang kalinaw sa palibut
Aron tapigan kining akong pag-inusara

Ang akong kasingkasing natipak
Sa tumang kasobo sa imong pagbiya
Padayon pagdagayday ang akong mga luha
Samtang akong gigunitan ang imong larawan

Niduyog ang kalangitan sa nagbangutan kung dughan
Akong nadungog ang mga huni sa mga kalanggaman
Nga nagdala og paglaum ug kadasig
Susama sa mga agos sa tubig nga nagdala og kinabuhi

Ngano man kining akong gibati
Sa pagka dili masabot
Unta, gipugos ko naman ikaw akong hikalimtan
Kadtong mabulokon tang kagahapon

Ang imong panagway sa kanunayng dakong buhi
Ning nagsubo kung panumduman
Bisan pa wala kana sa akong kiliran
Ang imong alimyon padayon kung gipangita

Ngano man akong iawit kining mga kaguol?
Kay ngano man kini akong ihilak sa tago?
Aron ba tak-upan kining mga kalisod?
Kay kining natagpilaw kung mga pangutana
Wala ko masayod kung kanus-a kini mahigmata

ang batang babaye

mitan-aw siya sa unahan
mihangad
nagtagad sa senyas
gustong
mahibaw-an kon
unsay ihatag kaniya
ugma damlag
sa nahurot na nga
kinaiyahan

ang balak nga wa mahuman

sa sukang aslom
anaa ang sili nga halang
ang ajos nga isog
ang sibuyas nga
nag-iyak

sud sa styrofoam
nanginit ang mga balut
nga wala pa mahalin

ang karsones nga labhan
pagkagabii
nasayod na nga kini
sul-ubon gayod
sa kaadlawon

ang t-shirt nga pula
nag-inosara

unsaon ko kaha
paghuman kining balaka

kabahin kini
sa kalisod og
inhustisya

sa walay pagpakabana
og sa mga pangutana
nga ang mga tubag
idlas pas manatad.

Tambalanan

Tambalanan
By Genamos_US of Washington DC, USA

Didto sa dapit ning akong gipuy-an
Duol sa akong yutang natawhan
Aduna koy nakita nga ospital
Nga gialirongan sa mga koral

Daghan mga tawo kanunayng naglinya
Aron sa pagpahimolos sa sebisyo nga gitagana
Sa tambalan kuno nindot ang mga kahimanan
Aron sa pagtambal para sa atong kaayohan

Doktor, Nars og uban pa
Nga kahibalo sila sa ilang mga bulohaton
Sigon sa mga sugo sa ilang administrasyon

Nindot unta ang pagsirbisyo nga walay gipinig
Bisan gikan sa pobre nga bulsa nga walay pagsalig
Kay mao man kaha ang ilang gipanumpa-an nga mga panaad
Ila unta kining taga-an ug mga pagtagad
Para malipay kining mga pobreng nga palad

Busa atong i-ampo kini sa langit
Kining atong mga kasakit
Aron kadtong nahingtondan mahagit

pangadye sa usa ka kahoy nga wala mamunga

gitisok ang sanga
sa yuta nga abono

nanahon kini
og nahimong kahoy

ang mga langgan
nanugdong og ang

mga hulmigas nanaka
og ang mga kaka

naghimo sa ilang mga
lit-ag

bibo ang maong kahoy
ang iyang mga dahon

kamaong moawit
ang iyang mga gamot

kusog mangita og tubig
aron ang palibot

mahimong bugnaw
sa mga gustong molingkod

sa silong niini
apan kahoy kini nga wala

gayod mamunga bisan
og usa na lang

og wala usab sukad
mamulak

sa matag adlaw nangadye
ang maong kahoy -

"Pag-abot mo
maoy akong hangyo
nga ako
Putlon mo na Ginoo

sa akong daob
mamonga ako og aso
aron ako
makahalok Kanimo"

gitagaan mo ako sa usa ka
slice sa cake
humot, lamian,

sa paglantaw ko lang
nagtubod na gani ang
akong mga laway

nanghambog ka
nga ikaw ang inahan sa
pagkamanggihatagon

og ako hapit nang
mitoo kanimo

gawas lamang
sa dihang nagbilin ka og
kataposang tugon sa wala ka
pa mibiya kanako

nga kining
slice sa cake
dili kini pagakan-on
kondili lantawon lang

og labaw na nga
dili kini
nako hikapon

nagtabisay ang akong
laway
nahisama ako sa
irong buang

gibakwi ko ang
akong mga pasalamat

og gitunglo ko
ang nagpakatawo
kanimo

(pesteng yawa
mamatay ka pa unta!

kan-on ka pa unta
sa bakunawang
nagtago sa ilalom sa yuta)

palihog
ako na ang mamalihog kanimo
tutuki pag-ayo kining
kahayag
kay oran-oran
ako na kining
palungon

dili nato ikalimod
nga ang kahayag nga gihatag
niining kandila
dali rang mawala

gani aron madali
ayaw og kasuko kay
akong tayhopan aron
kini mapalong dayon

ning lawak
nga wala na ang mga balak
nga kaniadto
atong gibasa
kadtong kabahin sa
tiunay nga gugma

Ang Pagpadayag

sa dihang gipaila-ila ko
ang akong kaugalingon kanako,
nabulabog ang dagat
sa alingisig sa kanaway
nga nagsalimuang
sa pagtuong
iyang masupil
ang iyang pagkahulog
sa daw batobalaning dagat
nga bisan ang tagum
nga panganod
way igong gahom sa pagdumili
dihang kini nakig-ambit
sa iyang bulok.

mahulga-on ang tigpa-ila
apan gihangop
ko siya sa halu-ag
nga panabot