gugmang miluhod

ang gugma kamaong moluhod
mohalok sa tuhod
moduko mag-ampo diha sa
iyang hinigugma
piyong ang  mga mata
nga nangamuyo kanimo nga
unta karong gabhiona
matuman na ang iyang
gihinaman nga
nagbasa nga pangandoy

nindot

ang kagabhion
maanyag
apan nagtapis diha
sa tabil sa
kangitngit

unya hinayhinayon
kag tintal pinaagi sa
nipis kaayong kahayag
sa mga aninipot

mosayaw siya
mosensyas nga andam na
bugnaw ang iyang mga kamot
nga nanawag sa kainit sa imong
mga palad

nindot ang kagabhion
nga giduyugan sa kahilom sa bulan
nindot kaayo ang palibot
ang mga dahon dili tabian

apan mas nindot ka
nga walay sapot nga mitupad kanako
nga naghaploy ning
nangabre kong dughan

morag kog nahingangha
sa dihang milabay ka
wala koy nakitang angayan
nimong balikan

ako mipadayon paghungit
sa sashimi
nga halang gikan sa akong
tutonlan nga misaka
padung sa akong utok

mibalik ka
mao ra gihapong kaputi og
kagamya
mipahiyom, gisinyasan taka
nga duyugi ko sa akong kasubo
nga unta mag-atbang ta
ning lamesa
unya duyugan mo ako
sa kahalang

igo mo lang gihawiran ang
akong kamot
og dayon nimog biya

wala nako kini tagai kaayog bili
naandan ko na ang pag-abot og pagbiya
gani wala na kini
kahulugan alang kanako

akong gipasaligan ang akong kaugalingon
nga mas lami gihapon ang kahalang sa sashimi
bisan og nagpadayon ako
ning akong pag-inosara

ginadili man diay gihapon

ang atong gipanulti
lahi baya sa atong kaugalingon

dunay mga bara ang kaugalingong lawas
mga labat, mga tore, mga kampana

sa dihang miduol ko nimo kalit lang pod
nga nanirado ang imong mga labat, wala nay ganghaan

walay tingog ang imong mga kampana og wa ko masayod
kon adtong adlawa aduna bay patay nga ilubong

o duha ka nagkahinigugmaay nga kaslonon,
ambot, pero gipatas-an man dayon nimo ang imong mga labat

gusto ta nakong mosulod sa imong ganghaan
apan ang imong mga bantay misyagit: ginadili ang pagsulod

ang mosulod, mamatay.

parehos

gibitad sa anak nga babayeng
taas ug buhok ang iyang inahan sulod sa jolibee

naglantaw ko nga nagkaon og C4,

unya sa counter naglibog ang tawong tambok kaayo
kon unsay iyang kaonon

mipasiplat sya nako, mipahiyom, morag miingon
nga ok pa gihapon kon unsay iyang orderon

mipahiyom sab ko
akong giingnan akong kaugalingon

di ra pod diay ko magmingaw karong buntaga

sa dihang nagkita tag personal

lahi gyod
diay,
tinood gyod diay
nga lahi

dili man unta ta
kontra apan dili man
sab ta amigo

karon kabawo na
ko, usa man pod diay
ako ka bakak
diha nimo

ang mumho nga bahaw

ang usa ka mumho
maoy sinugdanan sa
wali ni lolo,

sa tinood lang
mao kana ang binhi
sa iyang uma sa
pangasaba

" mga usikan kamo
mga tapulan, mga
dangag, mga
walay puangod,
sayod ba kamo sa
kakapoy sa nagtanom
sa usa ka uhay, sa
galamog nga kainit
og ulan, sa kasakit
sa hawak sa mga
nagdaro, sa kapait
nga mag-umol sa
mga tiil og kamot
diha sa lapok?"

kami nga namati
morag gitadtad ang
among mga bukog,
morag gipamutol
ang among mga dila,
mora kamig gipamutlan
sa among liog sa
kaulaw,
nawala ang gana
sa among pagkaon,
mibaga ang among
mga nawong,
nagngutngot ang among
mga kasingkasing

apan unsa ba ang
among  mahimo?
ania kami, nagpakilimos
sa iyang kagamhanan

gipangka ang among
ulo sa usa ka mumho
lamang
nangabuak na ang
among mga pagtoo
sa gamay pa kami,

ang binhi sa kasakit
maoy nagpatubo kanamo,
ug sa among pagdako
unya, kon ugaling
buligan man kami sa
kapalaran,

dili na gayod namo
litokon ang iyang
mga pulong

apan ang mumho
dili namo kasilagan
mahalon namo kini
sa gihapon
hangtod sa among
pagkabahaw
 

tambag sa katigulangan

ang among mga katigulangan
kanunayng nag-ingon matag
pamahaw, apil panihapon,

dili sayon ang kinabuhi, kon
gusto kang mokaon, maghago ka

walay naglukdo og kaldero sa
iyang ulo, walay naghambin og

bulawan, walay nagtangag nang
daan og kusahos sa iyang baba

ang mahulog nga mumho sa kilid
sa imong plato, nagdala kana og

gaba, ang sabaw sa tinolang manok
nga mausik sa tasa, maghatod kana

og dimalas, busa, amping, amping
lang gayod, og ayaw panglood.

putol

usa na lang ang nahibilin
alang kanimo

ang mga buak sa
kagahapon di na mauli

ang karon
gubot pas lukot

ugma, mao kana ang paglaum
duna lay gamayng babil

gikapoy ka na unya ang
ugma imong giputol

magsulat kami
sulod sa among mga lawak
amo lang kini
gihipos namo kini
sa usa ka sobre
gitagoan namo kini
sa among mga kahon
dili mo na kini
mabasa
hangtod nga ikaw
masabod sa kamatayon
nga ikaw usab
siging tigpasabod

ikaw? hilomon,
lalom og dulot
nga kon makabasa
og sulat
nga sakit alang
kanimo
magdagkot sa kayo
og magduslit sa
mga sulat
og pagkaugma
pangitaon ang
nagsulat aron sama
sa sakit
imo sang sunugon

dili mo masunog
ang kalag

ikaw? sayon mo
lamang patyon ang
nagsulat

nganong gidauban
mo man ang
kalibotan?

aduna ka ba'y mga
panganod og ulan
sarang
makapalong sa
pagdilaab niini?

pila pa kaha ang
makalas?
ang mausik?
mauli mo pa kaha
ang kalinaw?
mamati pa kaha kanimo
ang katawhan?

makumkom
ang kumo sa kumo
ang mga tudlo
mahipos sa kamot

ang mga pangagho
mahimong tipigan
diha sa usa ka hadla
sa bag-ong mimata
nga bata

apan ang aso
dili mo gayod
makumkom

ang gugma sama
sa kasilag
bisan kanus-a
dili mo gayod
sa hangtod mahipos
sa imong
mga koral

palihog
ayaw ihatag kanila
ang yuta

hiposa una ang
kan-on
ang tubig
ang kalayo
ang sugnod

ayaw itugyan ang
dapog og ang
nataran

palihog
ayoha paghunahuna
ayaw ihatag ang
tanan sa
usa ka dakong plato

dili mo sila igsoon
sayod ka ba
nga daghan silag
gilubong nga buhi
sa ilang kinalot
nga luna

ug daghan pang
luna ang ilang
giandam
kay sa sunod ikaw
na, ikaw na,
nga tighatag,
maoy ilang ilubong
nga buhi

og ngadto
dili mo na madungog
ang ilang
mga katawa

terorista

dili sila motingog
moabot lamang sila
og mopatay

dili sila motingog
pagkahuman
managan, mobuagsa
og mawala

sila ang matagboan
ta matag adlaw
isip tawo nga sama
kanato

dili nato matukib
ang sulod sa ilang
mga kasingkasing
kay

dili sila maningog
mamati lamang
og kon masakitan
mosulod sa atong
mga lawak, sa atong
panimalay
og dayog pamatay

walay lalis
ang adlaw mao gayod
ang naa sa
tunga
sa kawanangan

apan sa atong
paglantaw diha
sa layo
og lapad nga
kawanangan

usa lamang kini
sa pipila ka daghan
nga nag-alirong
nga mga bitoon\

walay lalis nga
og kon ikaw pa
aron ako magmalipayon
himoon ko ang Dios
nga maoy sentro
sa akong kinabuhi

sama sa adlaw
Dili kaha Siya usa
gihapon sa pipila
ka daghan kaayong
mga Bitoon
diha sa langit?

sa dihang gisulayan ko
og himo ang akong
kaugalingon
nga tunga-tunga sa
atong kalibotan
gisulayan ko pagkaplag
pag-usab kining
pino nga mga kamatooran

"ayaw palabi" maoy hunghong
sa konsyensya
"usa ka lamang ka abog"
diha sa kordeso
sa langit nga wa pa
nato maabti

tuyok

sa kaayo
o sa kadaotan
moundang ka man
o magpadayon
moiyak ka o
mokatawa
magyaka o
mosyagit

mopadayon gihapon
ang panaw
sa kalibotan

ang iyang
pagtuyok dili sama
sa imong kote
nga kon dili
huktan sa hapos
og ilabay
sa yuta
moundang

apan walay mibungat diha kanimo nga ikaw, usa ka dakong gaba sa mga nilalang ning gusbat tang kalibotan.

kon nahugno ang balay
sa atong silingan, dayon
nimog ingon: da! gabaan!

kon napurdoy si Ekloy,
nabaligya ang kabtangan
naimbargo ang yuta og
mga sakyanan, mao gihapon
ang imong hukom: da! gabaan lagi!

ang tanang mga panghitabo
nga dili sebo, nga sa imong lantaw
nahiagom ang tanan sa kapait og
kapakyas, amo dayon nimog
ingon: gaba! gaba! ninyong
tanan!

maot ka nga tawo, ang imong
apapangig hirig, ang imong kilay
baga ra kaayo, ang imong agtang
habog, ang imong mga tiil mubo,
ang imong mga kamot hiwi,
ang ngabil baga og lagom,
ang imong mata
budlot, bungi ka, yungit,
dunay dakong ila ang imong
aping, daghang alom ang imong
bukton, hilang ang imong ngipon,
misamot kahait ang imong bangkil,

apan walay mibungat diha kanimo
nga ikaw, usa ka dakong gaba sa
mga nilalang ning gusbat tang
kalibotan.

kon gigabaan kitang tanan, kinsa na lang kaha ang gibuligan sa bendesyon ning atong mga kapalaran?

gibasa mo ang gisulat sa
bongbong sa balay nga daan
nga sa tanan gibiyaan
kabahin kini sa subo kaayong
panghitabo (nga dili ko na
gayod isulti kanimo kay mismo
ikaw nasayod man kabahin
niini)
(gikutasan ko, ang mga pulong
gigukod ang hunahuna nga
paspas modagan nga kamaong
molupad nga di na sab makamaong
mobalik ug tugpa balik sa
atong mga kamot)
kumusta na tood ang imong
pamilya? wala na ako makadungog
bahin kanimo,

ang kabahin kanamo, nahilis na,
mora na kamig mga pinayalan
nga gipanghukasan, og karon
nagkatibuagsa na og dili na
ganahan mosangpit sa mga
ngalan,

dili unta nako kini ibungat kanimo
pero ingon sila gigabaan na kuno
kami sa binuhatan sa mga miuna
kanamo,

hangtod kini sa atong ginikanan
(abi mo ug wala ka naapil niini)

kaliwat ka baya usab nilang
adan og eba....

kon gigabaan kitang tanan, kinsa
na lang kaha ang gibuligan sa
bendesyon ning atong mga
kapalaran?

wala seguro kaayo nako
masabti ang akong nakita

nagpanglingo ko
basig naa pa gihapon ang kasina

dili ko gustong masabtan
mo ako

ang larawan sa inyong pamilya
nga haskang bagaa na jud ninyo

ang lolo gakugos sa apo
unya ang laing apo gataral sa laing apo

daghang pagkaon og ilimnon sa lamesa
mabulukon ang inyong panaghugpong

apan sa kadugayang, masabtan ko ra
gihapon ang tanan

milabay lang ko, kamo ang magpabilin
daghan sab mog iyakan, og ilubong

unya kami, di na mangambat
nagpadayon mi sa pagpanaw

masabtan mo ra gihapon kini
kon wala na ang kasina

transcending

lisod
apan kaya na nakong buhaton

ang pag-ambak sa bintana
mosirko sa hangin
tugpa sa yuta nga morag
iring

latas sa labat
nga morag irong buang


morag kabayo
tigidigtigiding ang dagan


dayog lupad morag
langgam

pagkaanindot sa bakak.

gitina na ang mga
buhok nga puti

gihinol ang kunot nga
aping og agtang

gitaktak sa mga bukton
og mga tiil ang kasakit

nanamin, mipahiyom,
gitutukan ang kaugalingon

og miingon: kaya pa!
pagkaanindot sa bakak.

ang kahilom mao ang pagtapos.

pagkahuman sa kusog kaayo
nga ulan
nga ang tingog sama sa
nagdali nga mga sundalo
paingon sa lain na usab
nga gyira kontra sa mga
bandido didto sa kabukiran
sa Jolo,

pamatia ang nagpabilin
nga tinuloan sa nabuslot
mong sandayong

mora kinig tiguwang nga
nagsungkod og hinay hinay
nga mitindog gikan sa iyang
higdaanan paingon gawas sa
pultahan
nangutana kon miabot na ba
ang mokuha kaniya

hinay nga tulo sa tubig
hangtod nga nawala na kini
sa pag-abot sa kahilom

ang kahilom mao ang
pagtapos.

ugma, balik diri kon makita mo pa ba kini.

ang kaanindot dili
motubay
dili molungtad
lisod hangpon

sama sa alibangbang
nga mitugdong sa buwak
sa santan

pila lang ba ka oras ang
gitagal sa iyang kinabuhi?

ugma, balik diri
kon makita mo pa ba kini.

mapasalamaton sila sa imong kaayo

daghang langgam ang
mohapit ning lugara

sa buntag ang gisabod
nga humay
hinay hinay nilang
gituka

ang tubig sa paya
ilang giinom

gawasnon nga mga
langgam ang imong
gipakaon

ikaw nga nagsubo
nasina sa ilang kalipay

ikaw nga nagpugong
nangandoy sa ilang pagkagawasnon

daghang langgam ang
miawit alang kanimo

mapasalamaton sila sa
imong kaayo

mubo lamang

sa veranda
samtang naglingkod ka
kita mo ang lapad
nga dagat
ang walay kataposang
kawanangan
dili kapugngan ang
pagpanglabay sa
panahon

 hamubo na
lamang ang
agwantahon


ang gumamelang
pula kaayo kaganihang
buntag
nalaya ra dayon
pagkahapon

mga siping kalipay

ang imong
tinanom nga saging
namunga na

walo ka sipi nga
sab-a
nagbitay
nahinggan na
sa iyang
punoan

konsay

gikaligo si konsay
sa iyang anak nga si nidas

lahi ang pagmahal karon

gilugdan ang likod sa way
pagbati kon gisakitan ba
ang tiguwang niyang
inahan

gihisoan  og tuno sa lubi
ang iyang buhok nga puti og
taas kaayo

gibirabira ang iyang bukton
nga morag dahon sa abaka nga
himoong pisi

ang tiguwang blanko ang
tinan-awan sa unahan nga bisag
sakit ang nahitabo kaniya
wala na kini ambata pa

ang gaba kuno dili magsaba
dili kuno kini sili nga mohalang dayon

galagubo ang tubig nga midapat
sa panit
ang sabon nga mibula kon makasulod
sa ilong
makamatay
ang kabo og ang timba
kasa

ang lawom nga atabay
ngiob
duna nay namatay dinhi
kaniadto

apan kinsa ba kaha ang ganahang
manugilon
kabahin sa usa ka sakit nga
kamatayon

alang kang ....

alang kang ....

nagmingaw ka
milakaw kang nag-inosara
nagpahungaw kas imong kabalaka
sa hangin
gusto nimo nga makita ang daghang nanglabay
aron ka mahikalimot
sa nahitabo kaganihang buntag lamang

kon imo unta akong gipangutana
tubagon ko unta ang tanan

nabalaka ka nga dili na nimo mahatag ang
gipangayo sa kagabhion
naghilomhilom lamang ako sa veranda
dili ko na usab makab-ot ang mga bitoon

ang imong ihatag kanako
dili ko na usab dawaton
ang ako pod untang ihatag kanimo
dili mo na kinahanglan

kagabii nakita ko ang bulan
nga mitungtong sa dakong kahoy sa makopa
unya ang daghang  bitoon midayandayan kaniya
wala gayod niya makita ang adlaw
dugay na kana

palaran gihapon kita nga magkita
og  magdulog matag gabii

gimahal mo ba ako? maoy imong pangutana
duna pa gihapoy samad ang akong kasingkasing
apan bisan pa niini
gitubag ko kini sa usa ka haploy
sa imong buhok
gitamnan ko og halok
ang usa ka hardin didto sa disyerto

gipangutana gihapon nimo ako
diha sa akong katulugon

alang kanimo

alang kanimo

ang dili nako malimtan
kadtong imong giingon
nga ang date palms sa
Dubai magsugod lang og
pamulak, dayog pamunga
kon init na kaayo ang
panahon,

unta ikaw, bisag igang
mamuwak pod unta...

pagbalik sa yutang natawhan

pagbalik sa yutang natawhan

ang pagpalayo og pagsuroy sa
mga lain-laing lugar, makapausob
kanato,

ang migikan nga subo, mobalik
nga malipayon,
kadtong gisumhan sa nataran
diin bisag namuwak ang mga
kalachuchi, og mabulukon ang
mga alindanaw nga naglupad
lupad sa hangin,
mobalik nga puno kaayo sa
paghandom,

kay kining kamingaw sa balay
sa nasud, mas motin-aw kon
atua ka sa layo, lantaw sa ilang
mga bungtod nga walay bangaw,
sa ilang suba nga walay kabaw,
sa ilang langit nga bisag daghang
bitoon, apan sa hunahuna mo
walay bisag usa didto ang alang
kanimo...

dili tanan

dili tanang
tunok makabukog

usahay ang mosangit
sa atong mga tilaok

mao ang mga bakak
nga napanitan

ang mga kapakyasan
labaw pa sa tunok sa isda

nga misabod unya nagngotngot
diha sa baba sa atong mga dughan

dili tanan gisakit magbakho
dunay makamaong motago

dili tanang namatay
nahadlok, dili tanan, dili tanan

adunay mipahulay
nga midawat sa hingpit nga kalipay

kalipay

gisul-ob na usab sa
ngiob nga lungsod ang
hinulamang
kahayag sa adlaw

unyang hapon iya sa usab
kining iuli
bisan og dili pa siya
paninglon

sa kangitngit og kabugnaw
manirado ang mga bintana og pultahan
ning mingaw nga lungsod

sulod sa balay nagsukad ang mga nanay
sa kalan-on og ilimnon sa mga tatay
ang mga bata nangatawa
samtang nagdula-dula og gunting og kinumo
sa ilang mga tudlo

tanghaga sa usa ka lawak

gisulayan pagsulod ni aladin
ang langob

miabracadadra siya
morag kanapulo na niya kining
gibuhat

apan ang langob bungol na
wala na mangabri kaniya

sa kakapoy nahikatulog siya
nagdamgo sa dagat og sa mga bitoon

sinugdanan sa kahingpitan

sinugdanan sa kahingpitan

ang kataposan mao ra diay 

ang akong pag-inusara

ug karon nga miabot na kini 

wala na kanako 

ang kahadlok

diha diay 

sa pagdawat sa bisan 

unsang moabot magsugod

ang kalipay

pagbalikbalik

kon magbalik-balik ang
kasakit
mahimo kining
sum-ol, gani kon hinuklugan
nahisama kini sa ol-ol
nga kamot
nga sa kadugayng
panahon
di na maambat
unya morag wala na lang
diha sa matag-adlaw

ang imong matag adlaw usa
ba ka lamian kaayong lechon?
kon balikbalikon mo kini og
sukad, di ka kaha magsuka?

dili kaha mouk-ok ang dila
kay mangita na og tinolang isda?

ang tanan magbalik-balik ra
busa, ayaw kabalaka

kon gusto mong moabot pa sa
layo, didto pa gayod sa layo,
ayaw na og lakaw
o paghimo sa mga laraw og lakang

ang tanan moabot ra
andama ang imong panglantaw
og mga pagbati

didto sa pikas isla
mahimong kataw-an nila ang
imong kaguol

og ang imong kalipay ingnon
nilang mabaw

kon makita pa nimo ang usa ka lubi
nga gipadpad sa isla
bation og ang kalipay
milabong kini, nahimong kauban sa
isla
og ang kalubian
haskang daghana

mr. lonely

si Bai
autistic

memorized niya
ang tanang ngalan
sa streets

dakong kasamok
kon kantahon
ang
Mr. Lonely

usa ka gabii niana
sa wala sa siya
matulog
gipangutana niya ang
inahan kon ako ba usab
kuno

masuko kon kantahon ang
Mr. Lonely

kon magkita mi ni Bai
dili nako kini
kantahon

si Bai
autistic, makamaong
masuko, memorized niya ang
tanang streets sa Dipolog

bisan asa, si Bai,
siging kasuko, kay matag gabii
bisan asang videoke

madungog gayod niya ang
Mr. Lonely

dili ko na gayod
kini kantahon bisan
kanus-a pa

tuktugaok

ang sunoy nga
imong gitabonan sa
bukag

nga ihawon karong
panihapon
nga imong adobohon

kanunayng
nagtuktugaok

deux ex machina

unsaon ba
ang gutom nga balak?

kon dili mo kini pakan-on
ikaw ang puhon kan-on niini

unsaon ba ang gutom nga balak sa
gutom nga magbabalak?

ang gutom nga balak mokaon sa
magbabalak

sayod ka nga ang magbabalak
dili mahimong mokaon sa iyang balak

kinsa ba ang gahanang mokaon sa iyang
pinalanggang anak?

apan ang anak nga gutom sa iyang kabatan-on
aron mabuhi pa, mokaon sa iyang amahan

ang amahan, gihaon ang iyang kasingkasing
aron makaon na kini sa anak aron matapos na dayong ang tanan

apan dili mawala ang amahan
mobangon kini isip usa ka anino, mosaka sa hagdanan
paingon sa langit

ang anak mabusog, mahimong usa ka laing magbabalak,
nga bisan og unsa kadaghan sa iyang makaon
hangtod sa kahangtoran
gutom lang gayod gihapon

dili dinhi matapos ang sugilanon sa usa ka magbabalak,
magbalikbalik kini

og tungod niini dili mamatay ang balak
dili mawagtang ang mga magbabalak

balikbalika lang ang kasakit
ang kalood sa panghitabo diin ang anak mokaon og amahan
og ang  amahan mosokad sa iyang kasingkasing

balikbalika diha sa paghinuklog ang balak sa usa ka manggahat
didto sa bukid, sa dalan nga gikahadlokan
sa lungsod nga amang
sa kakahoyan nga walay mga dahon
sa mga sapa nga naughan sa tubig

moabot ang ulan, og hangin, og mga kalanggaman
mosaka ang tubig ngadto sa pangpang
mamukol ang mga bungtod
moawit na usab ang mga utitod

ang duha ka kalaw sa among
silingan sulod sa ilang hawla

wala na magtug-an sa saktong
oras, bisag busog pa kini sa
matag-adlaw nga lawog nga
hinog nga saging og kapayas

wala ang kagawasan
hapit na nila malimtan ang paglupad
mahimong kasilagan nila ang
bisag unsang matang kabahin sa
mga pako og hangin

ang duha ka kalaw sa among
silingan sulod sa ilang hawla

nangayog panabang diri kanako
nga usa ka magbabalak, og ako

wa gayoy ikatabang kanila gawas
lamang sa usa ka pagsulat, kay ako

usab nahisama kanila, nagbaton na
og kasilag sa bisan unsang matang

kabahin sa pako og hangin

makatagam ang
pagsulat og sugilanon

gikuhaan ka  og gusok
sa wala nga bahin
sa imong kilid

ang gusok nahimong tawo
kusgan

isog kaayong puhon
manudya kanimo nga moingon:

" gibukiki mo ang akong samad
tan-awa nagdugo gihapon ang akong
dughan!"

sama sa balak

kinsa bay motoo nga sa mga pulong niini
sama sa lasang
kinsa bay motoo nga wala didto ang sawa
og ang unggoy

ang agila

nga kanunayng nagpasiplat kay kon masipyat
ang unggoy

lami na dayon kaayo ang panihapon sa
salag kuyog ang  mga gutom kaayong
mga anak


og ang sawa, nga tulog, apan nagmata ang
usa ka mata
nagpaabot kon kanus-a magduka ang iyang
pamahaw ugma

usa ka bulan nga walay sulod ang
ginhawaan, usa ka adlaw, usa ka tukbunon
usa ka kalipay

kusog kaayong modagan
ang mga kamot sa orasan kon
ikaw mobalak


tiaw mo ba nga mag-abot ang
way pamahaw og way panihapon
diha sa kalimot sa kagutom

kon busog man god ang kasingkasing
madalahig man ang tanan

anad na

galagubo ang tingog sa mga balod sa dagat
samtang ang gamayng payag sa kilid sa baybayon
nagkurog

ang irong itom sa kilid sa haligi
bisag way panihapon
natulog.

pagtintal

ikaw nga
nagpuyo sa disyerto sa
pipila ka tuig sa imong kinabuhi
wa sukad maghisgot kanako kabahin sa kaanindot sa mga balas
galagot ka sa kainit
unya sa kanunay naghisgot ka kanako kon unsaon pagpatubo ang marang dinhing dapita

gidala ko ikaw sa akong dapit

wa ko usab tagaig panahon ang mga kahoy sa gemilina
wa ko hisgoti kanimo ang mga sipi sa saging nga nangahinog sa punoan
kon unsa ang tingog sa iring kon manungkab na kini sa inun-onan sulod sa kaldero didto sa dapogan
ang gilumutan nga atabay
ang kabugnaw sa tubig didto sa sapa diin ang rami naglangoylangod
ang tikarol nga asul
ang kabaw nga nagsigig usap sa sagbot sud sa iyang alingagngag samtang naglunang kini sa lapok
didto sa tunaan

natingala ka kon ngano nga naghandom ako og balas
gikamingawan ang kainit sa disyerto

kon saaran ko ikaw nga akong patuboon ang kamunggay sa imong disyerto

mahalon mo kaha ako?

kon nakapasakit
man, dali dayog ingon
pasayloa kay wa ko
kadto matuyo

abi mo ug
mawa na dayon ang
kasakit?

dili

depression

usa ka ka
utitod nga
nawala diha
sa imong tingkoy
nangayuyok
mikamang paingon
sulod sa dunggan
sulod sa mga
langob diha
sa utok

unya di na
kamaong mogawas

pagpaubos

iisa ang imong mga kamot
ipalayo ang imong mga bukton
kon magyaka ka sa salong
ibilangkad ang  imong mga tiil
hangad sa langit
ipiyong ang imong mga mata
batia ang kalayo sa tanang mga
butang gikan kanimo

hinuktuki pag-ayo ang imong
kagamay
gamay pa sa alom
gamay pa sa tungaw
gaan ka pa sa abog
unya dili ka na makita

salimuang sa kabuntagon sa pagyubit sa dili angayang sabton

wala mo kami
suhuli
dili kaayo daghan
ang kaon og
ilimnon sa
talad

apan mibalak kami
miyubit sa dili nimo
mayubit
misayaw kami sa imong
musika
giawit namo ang imong
gitipigan

nasabtan namo ang
mga kahuyang
gibitbit sa among
mga kamot
ang imong mga
kahigwaos
giabaga namo ang
imong mga
kabug-aton

wala mo kami
suhuli
dili kami maningil
kon unsa man
ugaling
 ang among dangatan
hinaot pa unta
nga kami imo lang
hikalimtan

sing-al

ako gayong
nabantayan
nga inig tungab
ko sa baso nga
imong gitagayan
sa Fundador

mora mag misamot
kalami ang
akong tingog

unya maayo na
ako kaayong
motayming sa
tono

busa sabta na
lang kon nganong
dili ko na gayod
buhian ang
mikropono

swabe ang pagsulod
sa bino
sa akong tilaok
nga giuhaw kaayo
kanimo

pagduda

kulbahinam usab
kining drama
sa mga nagdala
og papel
ning drama sa
mga tinagoan

kon moagak-ak
nga gani ang
siradora sa labat
dayog upo sa ilang
mga ulo
hipos sa ilang
mga kamot
tabon sa ilang
mga tiil

kon moabot ka
ang imong makita
mao na lamang ang
mga lingkoranan
nga morag wala
matandog
diin silang tanan
kaganiha lang
nag-inom og kape
og nanglingkod

kon mangutana ka
kanako
sa imong pagduda
nga adunay nahitabo
dinhing dapita nga
angay unta nimong
mahibaw-an

dayon nakog hikap
sa akong ngabil
hulma nianang usa
ka tam-is nga
pahiyom ug bungat
sa pulong nga
ambot baya

dayon ayohon mog
lantaw ang palibot
lingkod sa usa ka
bangko, tutok sa lamisa
og didto giyagyag mo
ang usa ka saya nga
mga pagduda

lata

nadungog ko ang
imong pagpanilhig
sa nataran
ning sayong kabuntagon
samtang sakit
pa ang akong ulo sa
kahubog kagabii

sakit pa gihapon ang
akong kasingkasing
diha sa dili kapugngan
nga paghinumdom

ah, mamati ako sa
awit sa silhig
pagtapok sa mga
laya nga dahon

unta dili lang usa
nimo kini sunugon

pagtapos og pagsugod

unta sa pagsulat mo sa kataposang balak
makita mo unta ang kahayag, ang pagpahipi
unya sa pulong, tapig sa kaulaw, nga siya
diay dili mao ang matood, nga wala sukad
niya mabungat ang kinaurokan nga kaanyag
nga mitago diha sa pyuos sa buwak,

wala nanguhit ang kaanyag og mihangyo
kanimo nga maanyag siya tungod sa imong
pagamit nianang pulong, wala nanawag ang
sapa, diha sa iyang panaw, aron ikaw ang
manubag alang kaniya,

sa kataposan, ihan-ay ang kahilom sa mga
butang nga nakapahingangha kanimo, kadtong
dinagayday sa tubig gikan sa taas nga pangpang,
kadtong pagpatihulog sa laya nga dahon gikan
sa sanga nga wa makapugong kaniya, kadtong
paglupad sa alibangbang gikan sa buwak sa
rosa ngadto sa buwak nga amarillo,

kadtong giduaw ka sa kahilom, unya nakabig
ka niya diha sa paglingkod lamang, sa paglantaw,
sa pagbuhi sa imong gipanghuptan