dili tanan

dili tanang
tunok makabukog

usahay ang mosangit
sa atong mga tilaok

mao ang mga bakak
nga napanitan

ang mga kapakyasan
labaw pa sa tunok sa isda

nga misabod unya nagngotngot
diha sa baba sa atong mga dughan

dili tanan gisakit magbakho
dunay makamaong motago

dili tanang namatay
nahadlok, dili tanan, dili tanan

adunay mipahulay
nga midawat sa hingpit nga kalipay