akong
gilamano ang akong
kaugalingon

mikuha ko sa duha
ka baso
giipisan ko og bino
dayon
gipingki namo ang
ilang mga aping

kami lang duha
ako og ako

 

alang nimo...

ginadili ang
pagsunod kanako
kay wa akoy
saktong padulngan

ginadili ang pagpamati
kanako kay wala akoy
tarong nga gisulti

ginadili ang pag-awat kanako
kay kon sutaon ikaw nga nagbasa karon
mao usab ikaw nga anaa kanako

kon ania ka karon kanunay nga
nagsunod, namati, o kaha ba
puhon mosulhog kanako

na, magpinasayloay tang duha
kon unsa man ang dangatan
o nilugdangan niining atong
kahimtang o binuhatan

sama sa ginasulti sa uban
bahala na

Ginoo na lay mosabot
ning atong palad nga
gubot pas lukot

alang kang P.

sa sayong kaadlawon
ako siyang
gipasabot nga kining
tanan
lumalabay lamang

kasakit, kalipay
kasubo, kalami,
kaanindot
kasumo, kalagot
kahiubos, ug uban
pa

mga lamas lamang
sa kinabuhi

labaw sa tanan
ako siyang gipahimangnoan
anaa kanunay
nagpahipi ang atong
Labaw nga
Makagagahom

ako siyang gisukmatan
nganong nahadlok man siya
kagabii sa iyang
pag-inosara samtang wala pa
ako miabot
gikan sa akong mga
gikalangayan

dili na lang sa habog ang
pader sa balay
dili na lang sa adunay
lima ka iro nga 
nagbantay
dili lamang sa lig-on
nga mga pultahan
nga kinandadohan

asa naman diay ang  imong
mga pagtoo og
pagsalig?
asa naman diay ang kanunay
mong pagsimba sa Diyos?

nganong nagpabilin ka
man nga mahuyang?

sayang ang imong mga
adlaw-adlaw nga pag-ampo
kon ang imong kasingkasing
nagpabiling
luyat sa mga kasakit og
kamingaw

ah, ingon ka
ikaw nga ikaw kana
og wala na gayoy
makausob pa kanimo nga
kon usbon ko ikaw
dili na ikaw ka na

magpakahilom na lamang ako
kay sa laing bahin
karong adlawa atubangon ko
na usab ang
mga lit-ag sa akong mga
kaaway

og mahimong sa akong
paningkamot
sama sa mga nanglabay og
mga lumalabay lamang
usa ka
sa akong mahikalimtan

og kon unsa man puhon
ang imong dangatan
sama kang poncio pilato
sa palanggana nga puno
sa tubig
ako
manghinaw

alang kang J.

hapit sila
mangamatay kagahapon
og iya kining
gisugilon kanako
samtang nagmaniobra
siya sa
manobela sa akong
sakyanan

wala mausab kining
tawhana
sa dihang nag-ung-ong
ang kamatayon

wala siya nahadlok
bisan pag sumala sa iyang
giingon
morag milupad ang iyang
ispiritu sa dihang
nalabay siya
sa iyang gisakyan nga
motor nga miungot
sa karsada nga
gikulinitan sa mga
laing sakyanan

kutabkutaban lang gihapon
siya
nga maingon ko nga kining
tawhana bisag tigulang na
wala man gihapoy
buot

apan sa laing bahin
sakto baya gayod siya

kay ngano kon moabot
ang kamatayon
duna ka pa bay
mahimo?

kadtong iyang kuyog hinoon
nga taas og ambongan
ug dunay kapikas nga
nindot og lawas unya
maanyag
hangtod karon
luspad lang baya gihapon

kalipay kasumo

sa samang
buntag
sa samang higdaanan
ikaw momata
sa samang bentana
ikaw mangabre
og manira
sa samang talan-awon
dakong kahoy nga
mangga
sa atbang sa imong
balay
nga puluy-anan pa
sa imong
mga katigulangan
nga hagbay rang
nangamatay

sa samang 
awit sa mga tamsi
sa samang
kabuntagon

ah, mao kini
ang imong gitawag nga
kada-adlaw
kalipay nga walay sama
nga gitunol sa
kaliwatan

alang kang Z.

puhon ihatag ko ra
kanimo ang 
pungpong nga kalipay

nga imong hambinon
sa imong dughan
sama sa usa ka gugma
nga tiunay

karon ania ang
kadena sa buwak
nga akong
ibutang sa ibabaw
sa imong ulo

o kaha ba gikan sa
akong mga kamot
ihatag ko kanimo ang
usa ka kumkom nga
tambubuan

anaa ang akong mga
panaad
nga ikaw mahimong
mas lig-on pa kaysa
kanako

ihatag ko usa ang
kabug-aton ang
mga kalami nga
makamaong mopaak
kanimo nga sa
kataposan mohatag
kanimog katam-is
nga akong gikahadlokan
nga basin dili
nimo maantos...

alang kang genoveva

kahinumdom ka ba
sa gibuhat ni
genoveva kanato
nga samtang
nagkabuang kita kon asa
kita mangayo og
panabang
sa tumang kahadlok
siya nag-atubang lamang
kanato
nga katulgon kaayo unya
ang iyang tubag
sa atong mga pangutana
mao lamang ang

"mao" ang laing "mao"
og lain na usab nga
"mao"

nga bisag nangugat na kita
sa atong mga kahigwaos
siya nagpabilin lamang
sa iyang lingkoranan
unya ang iyang mga mata
morag tindahan sa
peryahan
nga namalong na sa suga
unya
naghinayhinay na og
panirado
sa iyang mga bentana

ayaw ko og basola nga karon
sa iyang nag-ung-ong nga
kamatayon
moingon ako nga 
ang akong ikahatag kaniya
mao lang gayod
ang mga buwak
nga akong kutloon diri
sa kilid sa bungtod
diin gitugway nato
ang kanding nga
walay kaligo

ang nawad-an

wala sa hunahuna nga
gisulat ang iyang mga gibati

una, wa siya'y tumong nga kini
mahibaw-an sa hingtundan
kay sayod siya nga ang iyang ipugas
mahimutang lamang sa umahan nga
kabatuhan

ikaduha, mga pagbati lamang kini
nga mas angayan nga isabwag sa hangin
nga sama sa mga dahon
ipalid lamang
unya dili na gani mangutana kon
asa kini sila
milanding

ikatulo, ang iyang dunggan og mga
mata hagbay ra nga nanira
momata lang kini aron matulog
mamati lang kini aron maalaan
nga siya ganahan pang mabuhi

sa kataposan
ikaw lang man seguro ang misalig
gihapon sa kamatinud-anon anang
mga pagbati

siya nawad-an.

lapoy

bongbong ang
imong 
atubangan

sa unahan
pader

nga gilambahan
sa hangin

sa ibabaw ang
adlaw

nga kanunayng
naghatag og

kahayag
og kainit

gisulod ikaw
sa samin nga
balay nga
migilak sa
dagat nga
lubog

unya ang bata
sa gawas
andam nga
molabay
sa  dakong bato
nga gikumkom
sa iyang kamot

katulgon ka nga
naglantaw
sa tumang kakapoy

wakwak

pasayloa nga
ako moingon nga kon
ning taknaa

(lantawa ang imong relo
alas 12:27 sa kagabhion)

kon ikaw nagsulat
og kaha ba nagbasa
kay lagi
wa pa gihapon gihangop
sa kalami
sa katulugon

pasayloa ko sa pag-ingon
nga ako
motoo na gyod nga dunay
wakwak

nga ikaw usa ka wakwak
sama nako
nga kitang klaseha sa wakwak
manggiloy-on

mubog lupad
talawan
di kamaong mangwakwak

wa sukad kapaak
og liog
kakaon og unod
kainom og dugo
sa tawong
balasubas

wa gani kakusi
sa humot og puti nga panit
sa usa ka
bata nga karon gikalimtan
og tabyog
sa nanay nga kusog
mohagok

kadtong babayeng nagpabenta nga mibackride sa motor nga among gisundan sa sayong kabuntagon

sa imong pag-backride
sa motor

kaganihang sayong buntag
benta kaayo ang

imong puti nga paa
ug sa dihang gipalid sa
hangin ang imong
sayal nakita namo ang
imong panty nga
itom

si jeffrey wala na mahimutang
sa iyang gibati

nag-alipasa ang uwagan nga
nakakita sa iyang 
gilawayan

mipahiyom ka 
nga morag gadala og
kamher

wa na mahiluna ang driver nga
taas og simod
og dila
ug ang ngipon sa tunga
halhag 

nag pang tsk tsk tsk ko
nagpanglingo og nakaingon
nga

dinhing dapita di na ko matingala
nganong daghang 
disgrasya.

ako nga misulat og balak sa tungang gabii, og ikaw sab...

morag pareho lagi
tag sakayan nga
gisakyan

hinay kaayong modagan
balikog ang katig

dili balanse ang kabug-aton
tiaw mo nga mihirig man kini

dapit sa wala nga morag
kalunuron paingon ka tiglom

nabalaka na ang uban
di na ganahang motingog

apan nia tang duha
sa tungang gabii

nanaghoy.

alang kang E. nga misamot na og kaarte

naputi ka man
nausob ka na

ang imong buhok
mora na mag
balhibo sa mais

ang imong pahiyom
morag misamot
ka tam-is

likayi na gayod ang
mga hulmigas

misamot kag kaarte
di na pwedeng
magkinamot

morag pilian ka na
usab 
og mga amiga y
amigo

ayaw palabi
maoy akong tambag

naay nangutana 
kon bayot ba daw ka

alang sa akong pag-umangkon nga sayo kaayong miangkon nga siya naa sa depression

una sa tanan,
ayaw kalimti nga
ang tawo
sa iyang pagkanatural
laog,

isulat kana sa entrada
sa imong
balay

ikaduha, ayaw kalimot
nga ikaw tawo,
laog sab, dalo sa bisan
unsa 
nga kon mahimo
sama sa uban
gusto nimo nga angkonon
ang tanan

ikatulo, ginhawa kanunay
kon mahimo
kanang lalom
kanang mas lalom pas lalom

kon makamat ka sa alas
tres sa kaadlawon
lingkod kilid sa imong
abre nga bentana

ingna ang bulan og mga
bitoon
wala ko magsalig sa inyong
kahayag
ingna ang kangitngit
wala ko mahadlok sa imong
gipangtagoan

unya, kon kapoyan ka na
kon mahimo
pagawsa ang imong mga pako
diha sa kilid sa imong
mga bukton

kon makalupad ka na
pahawa sa imong
gikamingawan

sa akong kataposang
tambag
kon galibog ka
ayaw kana palabya
sayo ka kaayong naabtan sa
kalibog
ayaw pagbalibad
kay
makaayo kana
kanimo

ikaw....

daghan pa ako
kaayo'g mga buluhaton

bukid na kaayo nako
ang mga kaso nga anaa
nagpunay og panawag 
kanako og panabang

bisan gani og anaa ako
sa akong suroy
sa lungsod 
bisan gani og anaa ako
sa simbahan
o sa tikbakay usahay

ania gihapon ako
matinud-anon diha sa akong
kalangay kanimo

dili ka tawo
dili ka butang
dili ka langit
dili ka dagat

ikaw ang akong
kasakit nga
sa kanunay akong 
giatiman

nga sa bag-o pa
akong gikasilagan 
nga akong gibugaw
gihinginlan

apan sa dugay nga
panahon
nahimo kang maanyag
lamian
nahimong akong kauban
sa katugnaw
og kamingaw

busa ania ako
matinud-anon na gayod kaayo
kanimo

ikaw ang balak
ang akong sugilanon
ang akong kamingaw
ang akong kasakit

unta....

sa dihang gipangutana
mo ako
kon unsa ang akong
giganahan sa
munich

ah, dili ang ilang
gabaha nga beer
og dagkong sausages

ikaw bya gyod unta to.

wa kapasar

gisukod ko ang
imong pailob

maayo akong
motiglom sa mga
lalom

maayo kaayong
pagkapakug sa akong
ulo

ang imong kamabaw
pastilan

nakasamad sa akong
pagtoo

pagpapas

gikasubo ko
nga usa ka sa mga
gipapas
nako sa akong kinabuhi

ning kabuntagon
dili ko na kinahanglan
ang imong kahayag.

pagsugod

ang nindot nga
pagsugod mao ang
pagpapa sa tanan
ninyong mga ngalan

ako sab magbaton
og laing ngalan 
laing mga pamaagi

ugma sugdan ko na
ang laing panaw
sa laing agianan

walay usa kaninyo
ang akong
matagboan og
sama nga dili
mo na usab ninyo
ako mahimamat


bag-ong gitib
sa bag-ong lusok
sa bag-ong
agianan

kay abi mo
kon bag-ohon ang
tanan
malimtan na sa 
dayon ang
tanang mga daan

usa na ako nga
puya nga bag-ong
natawo sa sabakan
sa kalibotan

wala akoy nailhan
kaninyo
og sama nga kamo
dili na usab
makaila kanako

gugmang tiunay

midaghan ang 
mga numero
nga nakapapas
sa gana
apan miabot
ang mga pulong
nga balaan
nga mitrapo sa
kainit sa agtang
nga mikuha sa
mga buling
nga miwala sa
salimuang

duha ka pulong
lamang
nga gihingpit sa
usa

anaa ang ikaupat
nga
maghatag sa
kataposan

og wala na maambat
ang mga hait nga
numero
nga misamad sa
bukton
nga mihatag og
bulok
sa atong kahaponon

sayaw sa mga panganod

miuli ako gikan sa 
hospital
dili magpahulay sa
among balay

apan miuli ako aron
pagsulat kanimo
aron ka mahibalo nga
wala ko ikaw hikalimti
nga nagpadayon ako
sa pakighimamat kanimo
nga bisag wala gayod
ako makaila kanimo
ania nagpadayon ako sa
akong mga pagtoo
sa akong paglaom nga
ugma damlag
kitang duha maghiusa na
unya unya ang atong mga
damgo
og gana sa pagpakabuhi
dili na managbangi

gipaabot ko ang higayon
nga sayawon nato ang tanggo
puhon
sa mga panganod
nga dili mo na matumban pa
pag-usab ang
akong tiil.

ang pag-abot sa katigwangon

sa nagkaguwang na siya
nagkahinayhinay man hinoon og
nawala ang iyang mga pagtoo

apil na gani ang sa birhen maria
nga sa usa ka kaadlawon niana giundangan
na man niya ang pagdupa atubangas sa simbahan
diha sa iyang kusina samtang gitak-ang niya ang
inun-onan nga palotpot og sa dihang ako siyang
gipangutana kon ngano, mitubag siya nga siya
usab gikapon na pag-ayo

namasin ko nga nahitabo kini tungod kay ang
iyang mga pangadye wala man god tubaga sa
Diyos Amahan,sa Diyos nga Anak og gani...

( dili ko malitok, tungod kay hadlok usab ako
sa silot sa mga balaaan)

kon matiguwang diay ang tawo
matiguwang usab ang iyang mga pagtoo
(dili pod tanan matod pa sa akong silingan
diin ang iyang mga anak maayo na og
mga panginabuhian unya siya buhong sa ilang
mga gipadala nga salapi alang kaniya
bisan pa sa mabati niya nga kamingaw sa
iya na karong pag-inosara)

kabahin nako nahisama ako sa usa ka ice nga
nahilis sa ting-init unya maayong pagkatunaw
dayon gisuyop sa uga kaayong yuta sa tiilan
sa akong gitindogan

bisan gani ako nga usa na lamang ka hunahuna
nagduda ko asa na kaha akong dapita
sa dihang nahitabo na nga bisan ako diri nako
dili ko na usab makita

dili sa ingon nga ako nawagtang
sama sa usa ka bato nga gihulog sa lalom kaayong
dagat o dili ba kaha sa lalom kaayong suba nga
lubog unya kusog usa kaayo ang sulog maong
dili na maaninaw kon ang gihulgan mao ba usab
ang gipuy-an

sa nahitabo na kini wala na akoy gibati pa nga
kahiubos og kasuko
nga mora ba og ako usa na ka tipik sa uhaw nga
yuta unya dili na ako ang pagkaako kon dili
naapil na ako sa tanan

ning higayona balewala na ang kasakit, kalipay,
kasuko, kahiubos, wala na usab ang hagawha sa
mga pagmahay

malinawon sama sa mga bonbon nga gipuy-an
sa bonjoc sa ilalom sa among balay.