makalood uyamot

duna koy gwardya

kaniadto nga kon makaasta

morag looron ka,

nanghambog nga kuno

nakapatay siyag labaw sa

napulo

unsa kaha no? wa baya pod

gidungog.

wa may nahadlok.

wa pod gikahadlokan.

gawas lang seguro

sa iyang pagkahambog.

unsa pod kahay atong

mapupo kon ang punoan sa

pobreng kahoy

manghambog nga namunga

siyag

mga ulo sa nangamatay?

ang tikalon

dali ra sultihon nga
oo, ako ang nagpatay
oo, daghan na kog gipatay

apan kon tinood ba kini o bakak
ug unsa pod kahay punto
bahin niini

mao kini ang lisod tuhugon
maong atong himoong
tulikibon

makatawa ko usahay
kay kining mga butanga
dili na baya unta lantugian

kon nakapatay siya
tugutan ta
kon daghan siyag napatay

na unya,
nadato siya?

kabahin kang e.

tungod sa iyang kagamay, kon magtudlo na gani siya, motungtong to siya sa bangko dayong iskrima nga morag italyano sa iyang subject nga english.

makalingaw to siya, kon mokatawa apil ang tibuok kalibotan diha sa kasadya. gamayng tawo, apan dako kaayog mga damgo, niwang apan tambok ang iyang kasingkasing, masakiton ang lawas apan morag dili ang kalag

kon mobulhot na gani to siya sa iyang marlboro makahinumbom kas pugon nga siging gaaso maapil mog kahinumdom ang iyang kamaayong moluto ma-cake ka man o ma-pan mga braso ni mercedes ang dinuguan nga saktong pagkasagol ang pagkaaslom ug pagkamantikaon

wala na ko masayod kon asa na kadto siya, morag gubot sab ang iyang kinabuhi apan suma sa akong nadunggan nahaluna na kuno siya diha sa pag-atiman sa mga kanong tiguwang nga kon sila pay pasultion diha sa pagpangamaw. ... usahay makahunahuna ko , unsa kaha kon nagpadayon siya sa iyang pagkamagtutudlo? ...moasenso kaha ang pilipinas? mahayahay kaha ang iyang kinabuhi?

na hala tubaga inahan, kon asa ka na kaha karon gipadpad sa daotang hangin.

kabahin ni ernie

di nako malimtan

 ang karaang

expression

 ni ernie,

kadtong

"hala tubag inahan"

kon asa man siya karon

unta siya magmalipayon

gitubag na kaha siya

sa iyang inahan?

walay laraw

ingon siya
wala silay gibatbat
diha sa imo

ang ilang mga
nawong 
lubot mo ra

mas nindot ang
imong mga buwak

mas abtik ang imong
mga iro

mas tambok ang 
imong mga baboy

lig-on ang mga ang-ang
sa imong mga
hagdanan

namati ka
nagyango-yango
milantaw sa unahan
nagpaabot kon
kanus-a kaha mahuman
kining
matang sa pag-ulog
ulog

gisabot mo ang
iyang kakulangon
apan wala kay
laraw nga unya sa
kahaponon
imo kining pun-on

duyanduyan

hagbay rang
mibiya ang kalag
sa lawas

apan sigi lang
gihapon tag 
atubang

ang lawas na
lang ang
mahibalo diha
kanimo

hagbay rang midagan
ang akong mga pagbati
ang nahibilin mao
na lang ang
mga hunahuna nga 
anaa nagpailob lang
gihapon sa
atong pagduyanduyan
sa mga pulong

ang aso nga migawas sa balay

naay panahon nga
mora kag buang nagdaub

sa imong mga sagbot
papel, mga bulingon nga
panyo diha sa sulod sa
imong lawak

usa ka panyo usa ka sulat
sa pagpananghid nga
taposon na ang tanan tali
ninyong duha

kinsa pa ba ang mogawas
sa balay aron ilabay kini
bisan gani kon abri ang bentana
dili ka ganahan molabay
nining mga butanga

maong imong gidauban
aron wad-on kalit gayod
dili ka na makapaabot pa

gusto nimong walay mahibalo
niini
apan ang aso nga migawa
anaa
durong sibya sa tanang silingan
kabahin sa nahitabo 
kaninyo

,,ang haw-ang nga tipaka sa usa ka itlog....

unsa ba ang anaa kanimo
nga kon mahawiran ko lang
ang imong aping
mobuswak man ang tumang
kinabuhi diri sa akong
dughan?

gisulayan nakog buak ang
mga pagbati
aron unta masusi ang sulod
niini
apan atua pa gihapon ang
dakong dag-om sa langit
sulod sa haw-ang nga tipaka
sa usa ka itlog

..ang timbangan....

giestudyohan mo ang
pagpatay

kon giunsa kon ngano
kon unsaon paghipos ang

patay aron dili kini 
makit-an

kon unsaon paghipos
ang baho

ang sunog aron dili
makita ang aso

kon unsaon paglaplap
ang unod aron dili kini 

maatikan sa mga matadero
ug pakialamero

gitun-an mo ang ang
nagpatay

ang iyang nilihokan sa
wala pa ug sa human na

ayaw pagpatay dako kanang
sala

gisundan mo ang mga motibo
ang gisabotan

karon kon andam ka na
isulti kinsa ang gipatay ug

kinsa ang nagpatay dayon
timbangtimbanga kini pag-ayo

ipahamtang ang silot
ayaw padala sa kalooy....

..ang pag-ampo sa usa ka tigulang nga babaye sa simbahan sa Katipunan

mibanting na ang kampana sa simbahan
sa Katipunan

misiga ang suga sa lawak sa tiguwang
nga karon mibakod ug nangandam

bugnaw ang hangin dayon ang mga
iro nagsugod ug uwang

napapas na ang bulan sa lagom nga
kawanangan

dunay sidlak ang gagmay kaayong 
mga bitoon 

pagkalayo sa mga damgo pagkadulom
sa paglaum

giablihan ang pultahan sa kusina
mikanaog sa hagdanan

likod sa balay ang iyang agianan 
paingon sa karaang simbahan

sulod didto nadagkotan na ang dakong
kandila alang sa misa

migawas ang pari mikanta ang usa ka
kantora 

miluhod ang tigulang nga babaye
nagsugod sa iyang mga pangadye

dala ang tanang pag-ampo sa mga apo
sa mga apo sa tuhod 

unta ang mga anak magmabungahon
diha sa ilang katuigan

unta ang ilang mga bana magbinut-an
unta malinawon sila 

unta karong sunod pasko mamauli 
sila sa usa ka noche buena

namati siya pag-ayo sa sermon sa pari
kabahin sa pagpasaylo ug pagpailom

daghang grasya ang mosulod ang
moabot unta , unta makahinumbom

pa silang tanan mahitungod kanako
panapos niyang pag-ampo

balak sa usa ka suheto

adunay tattoo sa walang
bahin sa imong sampot

aloman ang imohang
akong gikalingawan

sulod sa imong baba
 halhag nga ngipon

ang imong pusod wala
maayong pagkaputol 

wala mapapas ang lakra
akong ngabil diha sa siwil. 

kon adunay mopahawa adunay ihaya

ang paglingiw mo
sa akong
ulat diri sa akong
dughan gipasalamatan
ko

dili ko ikaw kalimtan
dili lalim nga ako imong
mahalon

wala mo malitok ang akong
mga kahiwian
ang akong kalibotan morag
balewala lang

ako sab nag-antos
unsaon ko kaha paglantaw
kon ikaw maghilak
unsaon ko kaha pagdawat
ang akong kalipay
nga dili nako masalo diha
kanimo?

gilabay ko ang pagkaon
sa akong plato
wala na nako alisdi ang
tubig sa baso

ang mga bulak sa plorera
nangalaya na
ang mga abog magpabilin
sa mga kurtinang
walay laba

kon adunay mopahawa
adunay ihaya
unya ang magpabilin
anaa, nagtago, nagbakho....

karong nakasabot ka na sa akong kahimtang

subo tinood
apan nasabtan ko
na ang akong
kaugalingong 
palad


karon mas lumo ka
bisag nanampiling diha
sa bentana
samtang nagsiging
bunok ang ulan
aduna gihapoy gidebuhong
pahiyom ang imong
gauga nga ngabil

mas nakasabot ka na sa
akong kahimtang
busa wala ka nay tingog

usa ka rami nga walay
kisaw sa sapa 

sa ilalom sa mga lahing
sa lubi
nga hapit na nga malata
sa bugnaw nga
busay

..atngal...

gihikap mo ang
pasas
abi mo ug gamay
lang
apan aduna diay
kini gitago nga
kalalom
morag bulkan
ang kainit
kabuthunon diha
tungod sa
imong ilong

..basin di ka na unya makabalik sa imong pinuy-anan

kutob ra diha
ayaw na ug labang

ayaw palabi
basig masakitan 
ka lang

gamay lang
tagidyot nga kalipay

kipat sa mata
dayog piyong

ayaw gisia ang mga
utlanan

basig mawala ka unya

dili ka na unya
makatultol balik sa imong
pinuy-anan

panagbulag

gikuha ang
backpack

gamayng sanina
ug mga

panginahanglan

giablihan ang
pultahan

gisirado ug hinay


dunay bakho nga
nadungog s

samtang
nagtagad siyag

sakyanan
nga nakadlawnan

hangyo sa usa ka uyab nga wala kasabot sa ilang panagsumpay

kantahi ko
sayawa ko
ayaw ko pakitaa
sa imong
gugma
nga dili nako
 makita

wa nako 
nabati

pasaylo

gitugtog ang gitara
miagas ang luha
mitumaw ang mga nota
sa musika
gikan sa nipis nga alambre
nga nagsumpay sa
kamot ug tiil

ang liog mibawog
morag nangitag pasaylo

ommmmm

matag karon ug unya
natawo ang bitoon gikan
sa dugay nga katulugon.

mga matang giagay-ay
karon nagpilok-pilok
sa kahayag.

matang nga imong gidamgo
gihandom gidumdom
dulom nga sawomsom
kasakit nga kagumkom
giluom-luom

gugmang ambot, o kaibog lang ba kaha?

kon buot kwentahon
wala akoy rason nganong ikaw
akong mahalon

tagai kog bulsita kadtong
giputos sa bulad nga pirit
nga baratohon nga imong
gipalit gahapon

palihog kog abri sama sa
pag-abri mo sa imong baba
sa dihang gihagkan ta ka
nga ako mismo naglibog nganong
gibati ko kadtong niadtong
higayona

kasukaon ko, palihog pasukaha
ko diha nimo

apan pastilan, bisan unsang drama
ikaw man gyod gihapon ang ania
sa akong mga mata

kining gugma, o kaibog ba kaha
anaa gihapon sa pesteng yawa....

wa koy gisulti, lagom ug ngabil

daghan pag bilbil....

..pagpaaway sa mga kaka....

gusto nakong
ipaaway ang akong kaka
sa imong kaka

sulod sa gamayng posporo
nga wala nay sulod

kadtong kataposang palito
idagkot mo kanako

magdilaab kos kayo unta
kon mahimo
tupad nimo

unta ikaw sab
mosilaob diha sa atong
duha ka kangitngit

ikaw nga mangingilad

sa wala pa siya mipahawa
daghang siyag nabungat: 

mangingilad ka
sayang ang imong 
nakuhang gahom

giilad mo pati na
ang mga ubos pa kaayo
kanimo

gikawat mo ang ilang
dungog
ang ilang katigayonan

gipatoo mo sila nga
imo silang gitabangan

apan pagkahuman
nawala kanila ang tanan

mga tipaka sa itlog
na lang ang ilang nabalon

wala na ang ilang mga
agianan ang paglaum

gikuhaan mo sila sa
ilang kinabuhi ug
panginabuhian

nanglupig ka sayang
ang imong mga bahandi

dili kana imoha
adunay panahon sa pag-uli

sa pagsudya sa pagbayad
sa imong mga gipang-utangan

gimaldisyon ka namo
magkamang ka sa yuta hangtod

sa kahangtoran apil na
ang imong mga kaliwat

ang imong mga mata
langkaton sa imong kalimutaw

ang imong mga unod hiwaon
hangtod nga mora na kinig papel de japon

ang imong mga bukog
tadtaron sa hait nga atsa sa matadero

ang imong mga kamot, bukton mga
tiil, kumagko pagabulagon

ilabay kini sa mga buaya aron
ilang pistahan

sa kataposan walay mabilin
kanimo kondili ang imong kalag na lamang

apan nagpaabot na ang manag-iya niini
unya mosyagit kag pakitabang

magpakalooy ka nga kining tanang
gibasolan mo na

ulahi na ang tanan
walay makadungog kanimo 

ang imong mga giilad
wala na dinha aron malooy kanimo

ang imong mga gipanglupigan
nahimo na nga mga abog

nga gipalid sa hangin unya
dili mo na makit-an pa....

balak alang kang andoy ( nga karon gustong tawgong andy)

sa dihang gihikap ko ang
iyang kamot
unya dayon niyag kusmod
dili ko bulok nga
dili makasabot

wa ko na abrihi ang akong
bulsa aron ipagawas ko ang
baga kong pitaka

kon makita niya ang akong 
salapi dayon niyag pakita usab
sa iyang pahiyom
wala na koy plano sa pagyamyam
sa akong mga kuryom

mas pranka mas desente
kinsa ba goy ganahan sa halok sa usa
ka tiguwang?

sa pagputol sa lambo sa langit

ang talithi nahulog
diha sa iyang tuhod

miluhod sila sa 
kagahapon

gisulayan nilag 
halad ang bulak

ang kandila ug ang
usa ka tasang sekwate

tuod man milandag
apan haskang inita

morag itlog nga pula
ang adlaw

sa dihang giputol mo
ang lambo sa langit

ang gipangtay-an natong mga katawa

gitay-an ang atong
mga katawa

gisulayan natog
hinod sa lana aron 

mobalik ang kasinaw
samas armas

apan ang nahibalik
mao man ang kalisang

ang mga ugat

ang mga gamot 
nga gikan sa usa ka
kahoy
nagkagubot

ang mga ugat sa tiil
nawala didto sa mga buhok
sa ilalom sa utok

nagsimag ang mga mata
sa wala kakita

nagkagulkol ang mga bukog
nga nangaputol nga gihipos
sa patay na nga amahan didto
sa giuk-ok nga kaban

ang nakitang kahugaw

nakita nako
dili angayan
wa kong kaangay
sa hugaw

wala nako nakita
ang demonyo nga
nagkamang sa 
imong kabukugan

dili makita
gisulayan ug litok
aron mahimong
matuod

gibati mo lang
dili mahikap
malitok dili 
mahulma

nakita nako ang
kahugaw
dili angayan nga
imong dugayan

lamdag ang dapit
wala ang adlaw...

diha sa imong pus-on

gilantaw nako ang akong
kaugalingon diha nimo

wa ko ganahi labaw pa
nimo. 

nakita ko ang nakita ko na
mas hagbay pa.

kon isulti ko pa kini modako
ang samad

molanab ang kahapdos diha sa
imong pus-on

makalimot

gilitok ko na ang dili nimo masabtan

sa nakadungog kanako natingala kon
nganong sa sayong kabuntagon nagyamayama
man ako sa akong talad-kan-anan

wala na nako nainom ang kape hangtod nga
kini nabugnaw ug gitugdungan sa langaw

wala na usab abrihi ang TV 
mahimong wala na ako mangilabot sa mga
panghitabo

gusto nakong iyagyag ang tanan apan dili sab
ko ganahan nga ikaw masakitan

nagyamayama ako sa atubangan sa langaw
nga nagpista sa katam-is sa akong kape
gusto nako kining patyon apan dili nako kini
makaya sa akong balatian

milupad ang langaw palayo kanako
nagpabilin ang kape nga bugnaw kuyog nako
nga oran-oran anaa pa gihapon sa usa ka pamasin

makalimot dayon magmalipayon
nagyamayama unya puhon sabton....

nausab ka na.....

nagsugod na ang pagbag-o sa akong
panglantaw

nausab na mang god ang imong buhok
unya morag naitom ka sa kadugay na natong
wala magkita
migamay samot ang imong mga bukton
morag mikiwa ang imong mga kamot nga
wala sukad mihawid kanako

dugay ko na kini giampo nga unta mausab ka
aron sab mausab ko

wala nako giampo nga malabong ang mga
rosas didto sa hardin
nga managhan ang mga buyog aron magubot
ang akong kalibotan

gusto nako ang pag-abot sa ulan aron mabasa
ang mga dahon
aron mahugasan ang mga abog
aron mausab ang kinaiyahan
dinhi sa gamayng tagoanan sa akong kasingkasing

ang pagka guest speaker ni badong

guest speaker si
badong sa graduation sa
irasan elementary school

kabuang tawon siyag
himo sa iyang speech
recall niya ang iyang mga
binuang sa kaniadto

kadtong gibuksan niya
ang sayal ni elena
aron makita ang iyang
panty nga pula
 
gihagkan ang aping ni
adela
sumbagay pa silang
romy 
luhod atubangan sa
flagpole
dupa sa atubangan sa
klase
banggiitang
kopyaero, bugoy,
buluyagon, 
gani kawatan ug balon
unya supakador
nga tapolan sa
gardening sa school
 


karon nga abogado na siya
mas midaghan baya gayod ang
iyang kabuang nga
wala na nila nahibaw-an

karon speaker si badong sa
graduation
mahimo na siyang role model
sa mga duna say ambisyon
nga moasenso gikan sa gamay
nga barangay sa irasan

human niini mohangyo ang
principal sa school kang badong
nga modonate og dakong kwarta
aron ipahuman sa paglabat
sa eskwelahan nga gani
wala pa man gihapon mahuman
unya sigi nang gikawatan
sa mga balhiboug kamot sa
ilang balangay. 

unya mokuot sa badong sa
iyang mahalon nga pitaka mohirit
sa baga nga tagsakalibo aron
iregalo sa maestra ug maestro
nga sa iyang tan-aw mga mosimos
ra gayod sa iyang kahimtang

karon, ; barogan ug adonahan
ambot kon sakto ba kinig 
moralidad ug baroganan, apan
dili na kana ang mas hinungdan

ang importante nga malabat na
ang eskwelahan nga sa gobyerno
baya pinasagdan.

...ang kasingkasing nga nahigugma molingiw lamang.....

ang kasingkasing nga nahigugma
dali rang makasabot
bisan ganig walay pulong nga malitok
diha sa mga kamot nga misulay ug tago
sa bulsa sa karsones
nga wala pay gibuhat diha sa namat-agan
nga pagbudhi

ang nahigugma molingiw dili gustong
makita ang matuod
ug didto sa sulod sa balay sa abre nga
bentana mokinto siya 
dili manumbaling sa ngil-ad nga talan-awon
sa iyang kiliran
iisa niya ang iyang ulo aron lantawon ang
mga tulabong nga nagkalingaw ug
tusik sa gagmayng baki
didto sa gibahaan nga basakan ni
Eman.

ang mga sagbot

i

madungog mo ang
pagpanilhig sa katabang
samtang ikaw nagtagpilaw
pa sa imong katulugon

gadila ka nga namati sa musika
sa silhig nga tukog
ug sa dahon nga gisilhig
gitapok sa tunga sa nataran
aron unya dauban

ii

naghinuktok ka kabahin 
niining pagpanilhig

sa kataposan silhigon kuno
ang mga dautan sama sa mga
sagbot
dayon tapokon kini
ug dauban

iii

ang mga kanding kuno
ilain sa mga karnero
aron kini ihawon o dili ba
kaha sama sa mga sagbot
kay lagi ang mga kanding
sungayan man
pagadauban

iv

sulod sa imong dughan
gibati mo ang mga sagbot nga
nangamang
unya sa imong agtang gihikap
mo kon
anaa ba ang sungay nga
gahi unya talinis

v

busa mibangon ka ug nanamin
gitutukan mo ang imong
kaugalingon

dayon giabrihan mo ang bentana
lantaw sa katabang nga nanilhig
nga milantaw usab sa iyang
daub nga karon kusog na kaayong
misilaub

kadtong imong gihigugma

kadtong iyang
gihigugma diha sa
puti ug itom nga
larawan kuyog sa
uban, lahi gayod
ang iyang 
bulok, usa siya ka
pula diha sa kapula
sa usa ka rosa

kadtong langgam
nga kalapati nga
imong gihigugma
tupad sa laing mga
puting salapati
sa balay nga usa
ray haligi
lahi gayod ang iyang
mga balahibo
pula diha sa kapula
sa usa ka rosa

ug kon manglupad na
silang tanan
palayo kanimo
diha sa imong dughan
bilin gayod ang iyang
anino
ang iyang kalumo
kahumot
kaanindot

gugma lang gyod lagi gihapon

nagsakit ang mga mata sa 
nagtan-aw ni sisyphus nga 
nagsigig tulod sa dakong
bato saka kanaug sa bungtod.

morag maguba ang ilang 
dughan nganong dugay na
kini niyang gibuhat, balik
balik sulod sa tibuok niyang

kinabuhi, maong dunay wala
kaantos, mihunong duol niya
ug nangutana, kon nganong
iya kining gibuhat, unya ang

iyang tubag nakapahingangha
nilang tanan: kining batoha
walay hinungdan, apan ambot
nganong gihigugma ko pa man.

kumingking

patas ra baya ang tanan

kadtong dunay nindot nga orasan
wala man say mga oras

kadtong dunay mga dagko nga balay
wala man sab nila puy-i

kadtong dunay mga anak nga sa kadaghan
dili na maatiman, adik-adik man sab

kadtong dunay sakyanan nga mahalon
dili man pod makasakay

kadtong daghang bahandi mabilin man
sab sa kalibotan sa kabug-at sa ilang mga
binuhatan

patas ra ang tanan
busa ayaw anang mga kasina

usa lang ang sukod sa imong kalaparan
kon mapahiyomon ka sa adlaw ug sa bulan
wala ra sila sa imong kumingking

garay alang sa iro nga kagiron

gipakita mo lang
nga walay dili malabay dinhing dapita.

sa dihang mibungat siya nga ang tiguwang nga iro nga walay pulos kay di na kamaong mopaghot ipaihaw na lang sa mga palahubog isip ilang sumsuman
gibalibaran nimo.

lisod kaha niya sabton nga ang mga higala dili angay nga budhian nga sama sa iro nga kaniadto nagbantay sa balay unya karon gikagid na unya mapuklid na kon kaligoon mo sa dagat dili makaon?

adunay mga balaod sa kasingkasing
sa panaghigala, dili mo kini mahimong ilawog sa mga barumbado
hangtod dili ka mawad-an sa saktong
barog diha sa kilid sa imong labat samtang naglantaw ka sa mga panganod tupad ang imong iro nga puti nga ang mga mata misimag sa adlaw

syagit sayaw

ang tinubdan
pagbati nga kon matusok sa
baston
mobuswak ang dakong
milagro nga
gipangita sa mga
uhaw
ang tubig nga gikan
sa bato dayon nilag
kahugway
syagit sayaw 
luhod diha
sa pasalamat kanimo
nga nahidagsa dinhing
dapita sa balason nga
yuta
uga, patay ang mga 
kanding ug
baka
ang mga sagbot
nasunog sa kainit
sa adlaw
ang mga puya
wala na kaiyak
samtang ang mga
inahan
nagduyan sa
mga bukog sa ilang
nawalang
mga bana

pagbati lang
oo, pagbati diha
sa timawa
nawala ka sa
lilo sa tubig
didto sa bato
gisuyop ka
sa kalooy dayon
ang mga ihalas
nga baboy
gipangita ka
gihingut-an ang
lasang
aron ka
irokon.

ang mga larawan

matag larawan
naay sugilanon nga 
nagpaluyo
nga atong nahibaw-an
apan dili na
masugilon

ang mga mata dili
mamakak
bisag ang mga baba
mitak-om
bisan pa kini misulay
pagtangag
sa usa ka pahiyom

karon gilantaw ko ang
inyong mga hulagway
isip usa ka pamilya

samdan ang imong dughan
gitabonan sa usa ka
bouquet of white roses

ang kamanghoran nga
nga taas ug buhok
gitabunan ang pahak
samtang ang tungatunga
nga balhiboon ug  kamot
nag-gloves nga morag
gikan nagbakasyon sa japan

di na ko masina sa kalipay
diha sa mga hulagway
kahibalo ang tawo magpaayom-ayom
sa kinabuhi
gani ang patay aron di na manimaho
dili na dugayon
kon mahimo ilubong na gayod
dayon

agwanta ra ang alagdon
hangtod na kini sa kinabuhing dayon

kitang duha

sa barotong buslot
misakay ko

wa koy gidala nga
kabo

wa koy gidalang
bugsay

wa koy gidalang
salbabida

bisag di ko kabalong
molangoy

misakay lang gyod
ko gihapon sa

sakayang buslot nga
imong gisakyan

didto sa lawod
mangalunod tang duha

samtang naghinawiray
sa atong katanga

diha sa hangin

ayaw na pangitaa ang
kinalamiang balak.
ayaw na pagpaabot sa
ugma, ug sa sunod gabii.
anaa ra ang nindot nga
balak sa imong tungod.
dili na kinahanglang
motindog ka pa aron
kini nimo makab-ot.
wala kini gibitay sa
atop, wala kini gisablay
sa sampayan.

kon buhi ka pa
kon mopitik pa ang
imong kasingkasing.
anaa ang balak.
sulod sa imong
kasingkasing.
litoka kini, ayaw na
pagpaabot sa kamot.
sa computer.
pakigsulti sa imong
kaugalingon.
litoka. mao lang kana.

gawasnon ka na.
nasulat mo na ang balak.
diha sa hangin.