alang sa tanan nga naapil sa class picture

kaniadto
pirming purdoy ang tanan
apil na kami sa ihap niana

mga pidyat ug ilong
nipis ug mga bukton
bulingon og kuko
baho og gininhawa
walay pamahaw
usahay
walay balon
sigi lang dula ug
dakpanay
para makalimtan
ang kagutom

upat lang ang
among mga kauban
nga anak ug dato
nga nagsapatos

kaming tanan
nalipay nga niadtong
higayona
napalitan ra jud og
tsinelas sa among
nanay

upat lang ang
wala katilaw og kusi
ni ms dalipi
nga imbis magtudlo og
musika
ang among kanunay
nga madungog
mao man hinoon
ang mga kasaba
ug pamintas

ang bulog ni Christian
siging makuritan ni
Mr. Abanza
ang maestro sa P.E.
nga bayot
hangtod nga sa kapungot
si Christian
nagpautog
ug nangihi sa tunga
sa klase


si Almira nga tikling
nakuyapan sa garden
nahagba sa
kapichayan

si Romy bungugon
si Carlo giagit-it
si Yulo baga og kiki
si Jack nakaigit

limpyo ang anak sa among
maestra nga si Cathy
nindot ang iyang bag
og kumpleto ang iyang mga
crayon, notebook, colored pens,
eraser, ug humot ang iyang
mga panyo

hapsay ang buhok ni brenda
bag-ong kulong ang kang luisa
dagkog butunes ang blouse ni cynthia

sa likod ni grace
tua si peter nga bulingon og karsones
walay hilam-os
walay panghimasa

sa kanunay siging katulgon si Sergio
bisan sa class picture nagpiyong ang karuho

kalimot na ko sa uban
agi sa kadaghan

sa tinood lang
wala ko didto
absent ko
kay si tatay og si nanay
nagtinakbasay

bisan pa ug bag-o kog tsinelas...

bastos apan tinood

(kon mahimo
ayaw lang og padayon og
basa
labi na kon relihiyoso
kunuhay ka
unya sa tanan nimong
kasuk-an mao
kanang pagbinastos

sama anang paglitok
sa mga pulong
kabahin sa ilok,
lapalapa
lubot kinot
bulbol


ok ra ka?
kay mopadayon unta ko
mahimong diri ka
na lang kutob
kay duna koy
importante untang
isulti alang kanimo
apan kay medyo
bastos lagi ni
gamay
pwede sab nga dili
ka na lang unta
mopadayon og basa

apan kining ako
isulti bisan og bastos
gamay
dunay kamatooran

ok pa ka?
ayaw na ug padayon og
basa
basin makuyapan
ka
wa ra ba koy dala
nga amonya
o paypay nga ikabkab
sa imong
palwa nga ilong

ok isulti ko na kini
ania

nga kining pagpamalak
og pagpautog
siging magkuyog

nga maundang lang ang
pagpamalak
aron sa makadyot
mopahulay
human magawsan

fact na...

adunay lainlaing panglantaw
ilang nakita wala nato makita
kita sab nahisama kanila
atong nakita ang wala nila makita

kon ang bebe nagmaskara sa nawong
sa iro diha sa iyang sungo
pwes ang iro usab nagmaskara
sa nawong sa bebe

kita maayo rang
pagkahimo sa ginoo
nagtupong ra
ang atong mga tiil
og ang atong mga
kamot

sagdi lang
ning atong mga mata
mga mas midako
pa kaysa
atong mga tiyan

sus sulti lang na

mao sab nay iyang gisulti
sa dihang nagbulag na mi

" i will keep you in my heart forever!"

patulo og luha
sa buaya

pabakho-bakho
nga morag kabayo

ako sad
pahid pahid sa akong panyo
sa iyang aping

" i will keep you in my heart forever"

ang kanahan
wa papiri
pila lang ka adlaw ang milabay
sud sa lima ko ka tudlo
gitaral na ug
lain

wa ko palupig
didto sad sa among lungsod
duna ko'y laing
gisaaran

" i will keep you in my heart forever"

da kabalos!

balak paghinumdum sa asawa ni Lotlot

sakto ka.
kon mabuak na gani ang kolon
unsa pa bay pulos niini?

makalung-ag ka pa ba sa iyang
mga tipak?

sakto ka
kon mabuak na gani ang baso
kausa ra
kon imong sulayan og balik
pinaagi sa pagtapak
sa mga tipak
lahi ra gayod intawon

sulayi daw og inom ang tubig
sa buak nga baso
kon lalim ba nga ikaw
maghunahuna sa
gagmayng mga bildo?

sakto ka
kausa ra mabuak ang atong
relasyon
ug ato kining pasagdan
diha ra sa iyang
kinutuban

kay kon molingi ka
balik sa agianan
sa kaniadto
dili kaha ka mahimong asin?

tudloi daw ko
bi unsaon nga kon ang ulan
mahulog gikan sa langit
unya mobasa sa akong mga buhok unya
modagayday sa akong
liog paingon sa akong
balhiboon nga dughan
subay sa tungatunga sa akong
tiyan unya mosubay sa
tungatunga sa akong paa
hangtod moabot kini
sa kinatumyan sa akong
kiting

unsaon ko ba nga kining tanan
mabati ko
labaw pa sa akong pagkabasa
sa iyang kabugnaw?

ang akong amigo nga ilang ginganlag bulok

natunong lang seguro nga
ganahan kong mobasa
ug kay siging gabasa
mibilib si mam
sa akong kahait,

natunong lang nga ang akong
gibasa mao usab ang ilang
ginabasa
busa kon magestoryahay mi
saktog
sinukliay nga morag gadungan
mig tan-aw sa parehong
salida og
busa sadya ang among
panag-ambit

mihilom ka
ingon sila salawayon ka
wa kay ikasumpay
o ikasulti
sa kahilom gidawat mo
ang ilang biaybiay
nga ikaw
bugo
bulok
walay ikatampo
way sulod
kalabasa
nangamote sa klase
way matubag
sa pasulit
ni mam og sir

apan wa ko kana tuhui
lahi sab ka

sa dihang mibalak ka
nakahinuklog ko
duna kay lalom nga
natiglom nga wa
nako maadtoi bisan
sa makausa lamang

sa dihang
milangoy ka
wa kong kaapas
sa imong kahanas
sa dihang
nakigsulti ka sa langgam
og sa bulan
ug mihunghong ka sa
kagabhion
dako ang akong
kahingangha

nagkasinabot mo sa
lamigas
wa ka paaka
gikahinabi mo ang
bitin
sinati mo ang
halo
ang mga kwaknit
misaludo kanimo
didto sa langob
nga mamingaw

wa sila masayod niini
ug busa hangtod karon
misaludo ako
kanimo

amigo ko...

para sa akong amigo nga nangamaw na sa amerika

kulong imong buhok
gitabunan mo sa kalo
maulaw kang ingnon nga
kitang duha parehong
kulungon og buhok
bungotun tang duha
apan kining akong bungot
akong gikurtihan ang imo
wa....
bangason ka
gikan na sab ko diha
gikan ko sa
bangas
apan tungod kay
gusto sa akong uyab
nga walay sabal
sa iyang ngabil
ang mga bangas nako
sa iyang halok
akong gitangtang
ang akong bangas
mao nga karon
morag hamis ang
akong aping...

good boy ko
bad boy ka

daot akong mata
busa gaantiyohos ko
daot sab nang imong
mata apan
giantos lang nimo
gusto nimong
bation nga
dili ka ganahang
moawat nako
nga nagpakasayon...

itom ko
puti ka....

pareho tang
walay lingaw
walay modawat
kanato
sa trabaho

busa, patas ta
patas ta
mao kana ang akong
siging gisulti nimo
siging gisulti nako
sa akong kaugalingon

ayaw pamati
naghaw-as lang ko
sa akong
gibati

dawata
weird tang duha....

aduna ka ba'y
nadungog kanako bay?

kabahin nako

elepante sa thailand
ang naa sa akong sapot
sa akong likod ang
dakong bukid sa
kinabalu
ang akong short
gikan sa cebu
ang akong relo sa amerika
apan sud sa akong ulo
latagaw ang hunahuna ko
walay nasud
nga gipuy-an walay nasud
nga gipadulngan
ug kon asa gikan
gustong makalimtan

kon ikaw pa unta ako

ikasuko mo ba
ang akong pagpahibalo kanimo
nga didto sa dagat
sa Katsubong
wala ako'y laing gihimo
kondili mao lamang
ang pagpanday
og usa ka balak

samtang ang babayeng
naghubo na sa iyang sapot
og nanghumot
ug chanel 5
napuno sa kalagot
nga naghay-ad sa iyang
duha ka puti na paa
ibabaw sa ugnan
nga doldol

nagpanakla ka sa dihang
giingna ko ikaw
nga walay nahitabo kanamo
tungod kay ang balak
nga akong gipanday
sig mang kapusgay

miingon ka
kon ikaw pa unta ako
wala untay
maglagot

ug ako kang gitubag
kon ikaw pa unta ako
unsa na kaha ang
balak?

D-56 Katsubong

Dinhing payaga nakaplagan

nato ang usat-usa

Diin gisawhan nato ang kalipay

Sama sa hulagway sa tawo

Nga nag tama sa marijuana..

Makighinabi sa ako, sa imo, ug sa iya

Storyang wala diri, wala didto-a

Mga katawang dili mabayran ug kwarta

Mga dughang masulob-on tungod sa Gugma

Bulsang naghilak kay wala nay kwarta

Sa dihang nag malipayun sa tubang gepa utang

ug siga na pulutan, unya gesawhan sa

tapoy sa gitara ug kantang hastang yabaga.

Pero apan kining tanan natapos na

Asa? kanus-a? ang mga pangutana!

Nagpahiyom sa ngit ngit nga dapit

Nghinaot nga ma balik ang gi

Ingon nilang kalipay nga abot langit..

                                                                          

dagaton

misulat ka sa balak bahin sa dagat.
diha sa dagat naapil ang tanang naa sa imong lawas
ang mga kumagko
etcetera.... busa ang pagsulat sa dagat nahimong sulat
sa lawas
nga unta kabahin sa panaglambigit og
kalambigitan
sa kamot sa laing kamot sa dagat sa laing dagat
og sa mga balod nga sa katapusan
miabot sa lapyahan sa baybayon
aron
maghalok pag-usab

wala manglimbawot ang akong mga balahibo
(hinonoa
nga morag dunay ganovena)
naaghat usab ako pagsulat sa laing dagat nga midagsa
sa akong agtang
kanang dagat nga walay balod
nga walay baybayon
nga walay mga kamot, kumagko, ngabil, aping, panit, kilay, dalunggan, kuko, tuhod, ilong, mata,
pilok, bat-ang, bag-ang,

etcetera,

nakahinumdom noon ko dihang sayo ming nangmata aron manglarga sa akong uyab kaniadto
paingon sa ozamis aron malayo mi sa mga supakador og
mga tigtaho unya ang pasangil
managkot kuno mi og kandila nga tulo ka buok
didto sa birhen
sa kota,

nga ug sutaon nangyam-id ang nakadungog kay walay mitoo
ug tuod man
miabot ang tanan sa akong tatay nga
nagtago sa ikog sa pagi
aron ibunal kanako kon moabot na ko
og nangurog ang akong mga ngabil, ang akong mga tuhod, kumagko, aping, agtang, batikolon,
tiil, kamot,

(ang akong itlog) nga nasikaran ni tatay


motoo ka ug dili
milupad ang akong ispiritu sa pito ka lawod

ug kadtong gidagat ko nga misakay sa rural transit
kadali rang
nawagtang....


tan-awa ning ulat sa akong apapangig
tungod kini sa sampalong ni tatay

tungod kay niadtong panahon sa akong kabatan-on ako usab nahigugma man...

Dagat

Ang akong tibuok lawas sama sa dagat, daghang mga balod nga gianod ka papalayo. Maong gihatag nako kini og tagsa-tagsa kanimo. Una, ang akong abaga, dalunggan, bisan ang kurbada sa akong hawak. Apil na pod ang akong bagtak ug bat-ang. Labihan na ang akong kamot, tudlo, kumagko, ug ang akong kumingking nga mibandlas og kaparat tungod kay singtanon man ko. Apan imong gidawat. Gipaambit ko ang akong mga nagbaha nga mga pahiyom ug kahadlok. Bisan ang akong mga gitipigang kahilom, gihatag ko. Apan ikaw wala gyod nagkinto. Wala na pod ka nangayo. Ug imong gihatag ang imong bukton, agtang, pilok, aping, ngabill, ug ang akong paborito: ang imong buko-buko. Tuod, gihatag pod nimo ang imong tabon-tabon, ang imong palad ug pulso. Bisan ang imong mga sekreto ug damgo gipaambit mo kanako samtang ang akong kamot gikuptan mo sama sa usa ka mananagat nga nagkupot pag-ayo sa iyang bugsay padulong sa baybayon tunga-tunga sa bagyo. Apan mao pod nang kamota ang nagtudlo nako kung unsaon pagkupot sa kamot, unsaon paghapuhap sa tigulang, pagkugos sa bata, pagtulod sa kamatuoran, pagbira sa kalipay, pagsuwat sa kasakit, paglapay sa kasubo, ug pag-ampo. Dinhing taknaa gitigom nato ang atong mga gipang-ambit sa isig usa. Gitagaan og lahing nga mga ngalan. Giihap ang mga higayon diin ikaw nakaginhawa uban sa akong kadagatan tungod sa imong mga halok. Apan sa kadugayan wala ka kakita sa kaanyag sa akong mga balod, usahay di nimo masabtan ang akong pagtando sa buwan, nakit-an nako ang imong kalisang. Gianod kita padulong sa baybayon, didto sa mga balas aron sa unsa panahon, ikaw mahalokan gihapon nako.

paghandom

ang wala mangaharag
maoy magdasig
sa mga nahibilin

ang mga wala na diha
maoy handomon
sa mga kahaw-ang

mabati ang kabantug
sa wala nangahulog

Baybayon

Ka tin-aw, linaw sa dagat

Sa dihang atong ge lantaw.

Na nag pailalom tug-aw sa kagabion.

Ug samtang nag lingkod tang duha

sa bon-bon aning baybayon. 

Ako ng hinauton na unta mag malampuson.

Kay sa sige natong pag-uban-uban

kining akong dughan sa imo na buang. 

Sa imong katam-is sa pahiyom.

Ako nahibong ngano sa imo dili ka ingon.

Kabalo ba kang gusto kong mugunit

sa imong kamot, mugakos, muhalok,

Apan ako rang gibalakan ang akong

dughan na diha sa imo ge kulbaan.

Pag ka ulaw lang sa kaugalingon.

Sige lang ko ug katol sa

 akong ulo na bisan tuod walay kuto.

Ng hoy-hoy ng imong bukton sa

paghuwat sa akong isulti kanimo.

Ug nakurat sa ka kusog sa takla

sa imong dila kalit lang kag ingon

 bayot ka?

                                                                          

pangutana lang

oi
nganong gipangita mo man
ang akong
larawan nga
ania na man ang
akong nawong?

oi
wa ka ba mosalig
sa kainit sa akong palad
nga midap-ig sa
imong aping?

dili pa ba
kamatuoran ang akong
ngabil nga
midapat sa imong
liog?

oi
naunsa ka ba?
gusto mo bang hikapon
pag-usab
kining akoa?

duha ka damgo....

duna kay gidamgo
nindot
paghuman sa damgo
gusto mo na usab
nga damgohon
bisag dili na lang
sa katulugon kanang
damgo nga
nagmata ka kanang
nagsimag ang imong mga
mata sa kaudtohon
dumot sa tibugol sa damgo
nga tam-is kaayo
ug unya sa kadagayon sa
paghandom mo sa maong damgo
matugkad nimo ang dili mao
ang pagkahimo nimong
kiko sa basakan
tawotawo
sa balay nga dako kaayo ug
unya karaan
mabal-an nimo nga
dili kini angay kanimo kay
lahi ka
matuod ka
ligdong
dili puti og itlog
dili gabok og kasingkasing
dili buslot ang palad
ug busa gipiyong mo ang imong
mga mata
og gidahik ang damgo
sa kilid sa imong higdaanan
giirok sama sa
pulgas
og sa kataposan
giwala sa imong panumduman

adunay laing damgo kabahin sa
dakong kahoy diin ang mga dahon labong kaayo
bugnaw ang hangin
humot
og didto ka
mipahulay og balik
diha sa usa ka lamian kaayong
paghikatulog....

pag-abot nianang wa....

unsay angayan
nga isulti?

wa.

unsay wa?

wa.

nganong wa?

basta wa.

bugnaw man?

o. bugnaw
blanko.

wa.

unsay wa?

kabalo ka na ana.
wa.

sahay ingon ana
ta. wa

way masulti.
way gibati.
way gidamgo.

maglingkod lamang
sa bangko
atubang sa dagat
walay sulod ang
ulo
walay sud ang dughan
morag dahon
nga naglupad
morag pako sa langgam
nga putol
morag abog
morag tubig nga gatulo
gikan sa sandayong
morag dahon sa saging
nga nagisi
morag sagbot nga
gitumban
sa mga kabaw
human gisabsab....

kabahin sa damgo

tungod kay wa man nako sila mahikap
o maambat
sa kasanag sa adlaw
nga paspas kaayong milabay
sama sa mga
paghandom

ania
mitungha silang tanan sa akong
damgo

sud sa mga nataran
sa akong katulugon
ania sila nag-ambak
ambak
morag mga baki nga
mao pay
pag-ila-ila sa usa ka
ulan

gusto nakong
mabuhi dinhi
sa dugay nga
panahon

mao kini ang akong
tahas: ang paglantaw
ang pagpamati
sa awit sa mga baki
diha sa ulan
ang pagbati sa kabugnaw
sa tubig
sa akong mga bukton
ug abaga

ang ilang mga mata
mao na ang sapa
sa akong kahaponon
og ako mosalom
motiglum didto
palayo sa nanirado na
nga mga pultahan
sa kalibotan

ania na sila
ang gugma ang
bendisyon ang
akong gipangandoy
nga langit

DAGAT

matag tunob
ko imong gipapas

daghang salamat.

Marlboro

SIGARILYO O KINABUHI?

Sa matag duslit kadlit aning

akong pusporo aron ikaw mo aso.

Ako nakabalo wala ko'y makuha nimo.

Kundili ubo.

 Nilikay na ko sa imo,

Pero nganong idunul ka man.

Ug nganong gedawat ko man.

Lisod jud diay talikdan sama

sa ge ingon sa uban.

 Sa matag taktak sa imong agiw

dinhi sa botelyang ge imnan.

Hisama ra sa pag taktak sa adlaw

aning akong kinabuhi.

Pero nalipay na,

 Kay naagwanta ko ra,

Sa pag human ug kaon wala ka.

Ge higugma ta ka sa una.

Pero karun, mag buwag na ta!

                                                        

Gitara Sa Gugma

Kanindot ba paminawon ang
tokar sa gitarang nag inusara

Sama sa taghoy sa hangin na
nag hung-hung sa kamingaw
sa na priso nga dughan..

Kay kita wala may pasalig
Mao ako nag hulat matunulan
sa yabi sa imong kasing-kasing

Na walay laing taming kundili
ang paglaum ug gugma na sa
akong pag balik iatubang teka
sa altar natong kaminyo-on..

Ug unta dili ka mag duha-duha
arun kita mahimo ug usa..

Kay walay laing nitapoy sa
kwerdas ning akong dughan
Kundili ikaw Ra   ♥♥♥

ang nakat-unan

molingkod ko sa kilid sa bintana
molantaw og balik sa kabukiran
matag buntag
pangitaon ang kahayag sa usa ka bag-ong adlaw
tanang pagsugod
adunay gamot
tanang kataposan

magpabilin og mga dahon
adunay mga sugilanon ang

kaayo
ang kakugi ilang hisgotan
sa imong pagpanaw
unyang hapon
lantugian unya nila ang

kabahin sa kakapoy
og sa pagtinapulan


unta natakdan na sila
sa kainit
sa siga sa nasunog nga mga

sagbot....

mabaw nga kalipay

MABAW lang ang kalipay

kaniadto gihandom niya ang kalalom niini
diha sa tinud-anay
kanang makapiyong siya sa iyang mata
og makatidlom siya sa laing kalibotan
kadtong nakaingon siya
nga kini mao ang langit og niadtong higayona
nakita niya ang
nawong ni bathala

ang kalalom niini wala gayod niya matugkad
hapit siya malumos niini og
gidungog nga mao kini
ang iyang ikamatay

tungod kay gisalom kini niya
og hapit niya gikalimtan ang hangin
og ang kahayag
kay kuno ang kalipay atua sa kangitngit
diin ang kahayag dili
motubo

gahatag lamang kini niya og sakit sa dughan
naghuot
ang mga kaligotgot
kay bisan kanus-a wala gayod kini niya matugkad
nga og natugkad man
diha lamang sa hunahuna
og pag-inosara

Mabaw lang ang kalipay nga iyang gipangita karon
dili na kinahanglan nga mosalom og
molangoy

gilantaw lang niya
og sama sa mga nanagan nga mga kabayo
mao ang panahon

mabaw lang ang tanan
kay makamatay ang lalom og aron lang mabuhi
bisan sa hamubong panahon
gilantaw lamang niya ang kalipay
nga sama sa alibangbang
mibatog sa sanga
mibalhin sa bulag
og dayon
nabalian sa pako
tungod sa kusog nga hangin

mabaw lang ang kalipay
og kon kinsa pa ang mangita niini
dili na niya tawgon og
buang....

Angkas Sa Gugma

Bisikleta ilang gisakyan

Gaangkas ang babaye sa luyo,

Gisandig niya iyang aping sa likod sa lalaki,

Nga iyang uyab? Nga maoy gamaneho sa bisikleta daplin sa dalan,

Kay katagbo nila ang mga sakyanan?

Hapit na tungang gabii.

Gikapoy kaha siya? O silang duha? Gikan kaha siya sa hago nga trabaho?

Maayong paghalog niya sa hawak, sa iyang uyab?

Hinaot dili siya makabuhi, kay delikado ang katulogon angkas sa bisikleta.

Apan, mora siyag natulog diha sa tumang pagsalig kaniya.

Nagkugi og sikad ang lalaki ug hilom nga milalin ang ilang bisikleta

Padulong sa pahulayan sa ilang gisakyan nga gugma.

Akoy

2011.8.21

sa Orlando's cafe

sa pikas lamisa
pution ang inahan og ang amahan itomon
samtang ang duha nila ka bata
nga lalaki og babaye
nagpunay og iningles
ug hungit usab
sa pizza og higop sa baso
nga puno sa
coke,

malipayon sila,
usa ka pamilya
hingpit,


sa pikas lamisa
adunay tambok nga babaye nga
kuyog sa iyang
uyab nga niwang nga lalaki
nagbasa sa menu
og miorder
og lasagna
orange juice ang sa lalaki
nestea ang sa babaye

ako lang usa
ang akong siko gipatong nako sa lamisa
ang pinintalan og itom
gibutang nako ang akong antipara og
cellphone
ang akong usa ka kamot
nagsilbing tukon sa akong
nawong nga gikapoy
mata nga katulgon
og baba nga
gutom nagpaabot sa akong
order nga spaghetti
ug pepsi

nag-atubang ako sa painting ni
Romano
usa ka mag-uuma nga nagdala og
bag-ong ani nga
humay
bulingon tan-awon
morag lapokon ang
nawong og ang palibot mismo
mugna sa hunahuna
sa usa ka pintor
nga dili pa kaayo inila
sa gamayng
katilingban

madungog ko ang mga hunghong
og mga panagsultianay
sa palibot apan
dili ko interesado

ako lang usa
karon ug ang tambok nga babaye
sa akong kilid morag
gustong mangutana kon
nganong ako lang usa
ra ning lamisang
pinintalan og itom

lami unta ingnon nga
mas gamingaw ang iyang
uyab nga niwang

apan wala na ako
mag-ambat niini
mahimong mapasumanginlan
nga ako
usa ka mingaw nga lugar
nga gibiyaan sa mga
lumulopyo niini
tungod sa kapit-os

gipiyong ko ang akong mata
og gitagbo ko na usab
ang mga hagbay
ko nang
ginadamgo
gidalitan sa usa ka
pahiyom

layo pa baya pod unta
ang gisalagan sa
kagabhion

apan, unsa na lang kaha ang mahitabo kanako pagkahuman niining tanan?

mahimong ako mag-awat-awat lamang
sa usa ka lingaw-lingaw kay mahimong ako wa na ganahi pagbuhat
sa wala pa nako mabuhat
mahimong undangon ko una ang akong pagkaako
sama sa paghunong sa usa ka
huni sa awit sa kawayanan didto sa halayong sapa nga wa pa nimo sukad maadto
mahimong motago ako sud sa imong hunahuna
og litokon ko lamang ang imong pulong
sama sa usa ka myana
mahimong motalikod una ako aron dili nimo makita ang akong mga mata
mahimong dugayon ko kini hangtod hikalimtan mo ako nga mikuyog kanimo sa imong mga panaw
kaniadto
mahimong moambak ako sa lalom nga suba og dayon linlangon ko ikaw
ug dili mo na ako makita

experimento sa usa ka morag balak

kon moabot na gani ako sa balay
matag alas nwebe sa gabii gikan sa pagtudlo og pamalaod didto sa unibersidad sa syudad
motagbo dayon kanako didto sa garahian sa
akong sakyanan
nga Dmax kining akong irong pinangga
nga morag karnero ang
balahibo ug ang nawong morag
stuffed bear
ug dayon kinig ambak-ambak ug
kitoy kitoy sa iyang mubo nga ikog nga morag
dulaang itoy nga
hinimo sa mga negosyanting insik
nga gibaligya didto sa
SM mall....

pamalandong sa usa ka kabuntagon

ang mga tamsi sa among silingan
nga namutol sa ilang
kawayanan og mga punoan sa
manggang karaan
namakwit sa among tugkaran
diin labong ang mga
palmera og mga kaimito og
mga kabulihan ug ang mga maya
nga gipangkawatan sa ilang mga salag
sa mga bata sa barangay uno
karon nagpunay og hakot og mga lanot
sa gubang silhig didto sa basurahan
og mga layang dahon sa ipil-ipil og
kamuning didto sa likod sa among
balay nga bihuhat ni
Enggoy

nagsugod na usab sila ug himo sa
ilang bag-ong pinuy-anan samtang ang
baying maya nga kaitlogon na
nagpaabot diha sa sanga sa
bayabas diin naghihitik ang mga hinog
nga pungpong nga gihinahinayan na og
ingkib sa usa ka puti nga ulod

ania ako nagtindog sa kilid sa bintana sa
kwarto ni nanay nga kanhiay rang
namatay

halayo na kaayo ang akong nakita ug busa
mora na man hinoon og dili ako taga-dinhi.

maayong adlaw

ang mga inaan og mga sunoy nga
nakabuhi sa ilang kurungan
nga kawayan nga
gabok na og unya gisungag
sa nguso sa
anayan nga wa pa
malawgi og pasaw ni
dodoy
bibong nanuroy sa
nataran
unya durong
pangiti didto sa among
pantawan

AD COELUM

magkutkot ka sa ilalom
akoa lang kana gihapon
mokunsad ka sa langit
aron ko ikaw mahagit

mananom ako sa ibabaw
mohigop ka sa sabaw
makigsayaw ka sa tubig
asa man ako motapig?

sagbot

nagpatunga ka
sa dagat og bukid

wa mo makab-ot
ang langit kay
migamot ka man
pag-ayo sa
naandang yuta

pagkasentimental
sa karaang rocking chair
ni manong Pael

gahi nga tugas
naputol ang
ngipon sa gabas

di palingkuran
hangtod sa
lain na usab nga katapusan

paghadlok sa wakwak

verba legis
naligsan kuno ang prutas nga berba
est non-recedendum
didto sa east namerisi si dendum
ut magis
si magi mautis
valeat quam
nabali ang kuwam
pereat
da napidyat!

ratio legis
est anima
naunsa si sima?
nahoratio ba?

di kaya ni
leo ang law
busa miuli
sa Darak
gihadlok ang
mga wakwak!

Hayahay

Gisingot ang panuhot

Migawas sa lawas

Tawhay ang gininhawa 

Hayahay ang hangin.

Akoy

2011.8.18

Singot Sa Alimuot

Gisingot pag-ayo, buntag sayo

Alimuot ang kwarto, pultahan nasirado

Wa milahos sa bintana ang hangin

Kay ang pultahan gitrangkahan.

Akoy

2011.8.18

Bunabuna Kun Bagulbagol

'Bagulbagol' diay ang 'skull'?

Abi kog 'bunabuna' ang upaw sa ibabaw

Kuan kuno, ang bunabuna ubos sa tiyan

Ibabaw gamay sa kuan nga bunal-bunalan.

Akoy

2011.8.17

ang mga dayag og harag

didto sa ilalom
sa balay mikanta ka
misayaw siya
mikatawa ang
mga nahubog

sahay diha sa lalom
nga lugar sa bay
diha sa gawasnong
pahiyom og
buhakhak

nakita nako ang
gitabonan nga kamatooran
nga bisan og kita
dili ganahang
hisgotan

mga dayag
ang mga nanglabaw
molingiw
ang taliwtiw

ginalot

simple lang
ang equation

you must be
an intellectual

because you
are reading me.

Alas 12:12

Sa kaadlawon gibati kog kaihion

Giutong...

Mibarog, miadto sa banyo

Gipasirit na lang dayon.

Alas 12:12 sa kaadlawon

Di pa pod ko katulgon.

Mobarog, mohigda sa kama

Matulog na lang dayon.

Akoy

2011.8.14

Inom

Hangin sa gawas

Misulod sa bintana

Misunod ang kainit.

Miabot ang kaalimuot.

Hinoon bisan dili mag-aircon

Pwede moinom og bugnaw nga beer.

Pero, alas kwatro y media pa intawon karon.

Akoy

2011.8.13

karong gabhiona...

giduyugan sa
sa salampati
nga nagsalag sa among kisame
ang ulan nga hinay
kaayong nagpatihulog
sa atop
ning dili pa kaayo lalom
nga kagabhion

morag babaye nga
naghilak nagbakho
samtang nagtabyog
sa duyan nga gibutangan
sa iyang
kamanghorang anak
nga lalaki

kabahin sa sumusunod...

nakapangutana siya
unsay kapuslanan sa pagpananom
pa nianang
mga katumsan
sa daplin sa sapa?

kinsa pa ba ang mamupo unya
sa mangahinog nga
nangka?

kinsa ba ang mag-ani sa
mga mais
nga imong gisabwag sa
kaumahan?

wala kay gitubag
ang imo lang
daghan kaayong kahaw-ang
sa panahon
nga imong gihulipan
sa bisan unsang motubo
og mamunga

ang imo lang
gibuhat mo lang ang angayng buhaton
kon kinsa ang mosunod
og mopuli
og mohulip
wa ka nay labot niana

sa pag-abot sa saktong panahon
ilang kaugalingong
labad na usab kana

lumalabay lang ang tanan
walay gipihig ang pagsalop sa adlaw

pagmata mo ugma
wala kay laing gipangita
anak ba o inahan

mipadayon ka sa pagsabwag
sa angay
sa kalibotan

walay bisag usa nga alang kanimo
niini
wala mo na usab hunahunaa kon
kinsa ang moabot
og manuktok sa imong
pultahan
pag-abot sa hapon

diha sa pagpamati

kon mamati ka lang
nagkadaiya ang ilang
mga danguyngoy
haskang daghana
morag dangan
sa basakan nga midagsa
og gihurot paghabhab
ang tanan

pamatia lang
ayaw og sagbat
(kay wa na say panahon
sa pagsagbat
kay sila usab
di ganahan mamati
sa imong
isulti)

human nimog pamati
lakaw
palayo kanila

batia ang tanan
dayon papasa

ambot ug mabati mo
ba ang ako
sang gibati

di ba
swerte lang gihapon ta
nga walay
nasulti bisag usa ka
pulong?

wala na gyoy madawdaw

batia ang
umaabot diin wala nay
mahibilin bisan usa
kanimo

lantawa ang kataposang linya
sa unahan
ang tua didto pangpang
unya dili ka
ganahang moambak
didto ka lang
kutob
molantaw sa layo kaayong dapit
dili ka kasibog
kay wa nay kasibogan
ang imong gipaabot mao na
lamang ang
pagpaabot sa
wala

kitang mga samdan

kung gusto kuno nakong
mabati ang sagbot
tangtangon ko ang akong
sapatos

sa pagpadayon og lakaw
dili kalikayan nga mabati ko
ang kagahi sa mga bato
og sa kahait sa panalagsang bildo

samdan ang akong lapalapa
nga nagbilin og dugo sa
mga dahon

wala mo makita ang mga bato
og ang bildo
apan ikaw
nakasabot sa tanan
nga panghitabo

kay samdan ka man lagi
usab kaniadto
kay ikaw usa man usab sa
nadam-ag

kay ikaw usa usab sa nagtangtang
sa imong sapatos
sa imong sapot
naghanyag sa imong kasingkasing
nga sama usab kanako

samdan
ug busa kitang duha
nakiglambigit sa mga sagbot
nga nalaya sa
kaasgad sa atong mga dugo
sa kabug-at sa atong
mga tiil
sa kabaga sa atong
lapalapa
ning pagbati tang
karon nakubalan na

kitang duha

ang uban mao pay pagminyo
giplano pa ang bag-ong balay

kon asa itukod kon unsay lihi
aron ipalayo kini sa dimalas

ang uban mao pay pagpangita
og itanom sa ilang nataran

nangutana pa kon unsay ngan
ana, kadto, kini,

kita naglingkod sa bangko
milantaw lamang

wa na kita mangutana kon
unsay kinutuban og unsay

pasikaran anang
mga pagpanglimbasog

unsa bay nilugdangan sa
kakugi og katapol

nganong ang ulod nagkamang
paingon sa tumoy sa kahoy?

humana ang pagpananom
hagbay rang nasumhan anang

pagpuril, pagpamutol anang
pagsunog sa mga dahon

anang pagtapok sa mga bato
anang paglaba sa mga pahiran

bisan og wala pa kita miabot didto
sayod na kita kon unsay atong itubag.

sa pagpanghatag

ang ako kutob lang
sa paghatag

pagkahuman niini
wala na ako mangutana

kon naunsa
kon unsay gidangatan

sakit na sa akong buot
ang pagpanghipos

una sa tanan
misalop na baya usab ang adlaw