49 na ko.
daghan na ug uban ang akong ulo.
dili na kaayo kakita sa layo ang akong mga mata.
hanap na
luya na
pati ang mga damgo nga haskang daghana
hanaphanap na usab
morag mga gabon nga mitabon sa mga kahoy
morag mga kabaw nga niwang og walay tunaan
ang mga gugma sud sa akong dughan
morag mga gagmayng balay sa daplin sa dagat
uban gabok na kaayo
uban nangahirig na ang mga haligi
ang mga bintana nanglupad na
ang akong gipuy-an mao na lamang
ang akong gikalingawan
og palig-on
dokdok sa martilyo, gabas sa gabsonon
sipilya dinhing dapita
lansang sa mga naputol
dinhi na lang ko
kay wala na'y lain pang kapaingnan
asa pa man diay ko?
gikan na ko sa bungtod
nag-ampo
nangaliya tupad sa kahoy nga tugas
nakigsandurot sa bulan nga bag-o
pang misubang
kinsa ba ang akong lain nga duolon?
kadtong kabayo nga gustong manipa
kadtong bitin nga andam mopaak
kadtong kabaw nga manungag
sunoy nga manuhik
mga langaw nga samokan?
ugma daghan ang moanhi sa balay
mokaon sa akong giandam
moinom sa bino
mokitkit sa panit sa lechon
mokalos sa akong kan-on
pagkahuman unya sa gamay nga salo-salo
manulod na sab ta sa kwarto
manutbras ko, manghilam-os
maghubo
49 na ko
daghan pa ko og ipamatood diha kanimo
mga saad nga wala matuman
mga bag-ong damgo
magsaad na usab ako og ikaw nga namati sa
akong yamayama
mopahiyom na lamang
imo kong hagkan og dayon motoo sab ko
nga ang kinabuhi diay lami pa gihapon.
