akong nahinumduman sa akong iyaan nga bag-ong nadato sa barra

tiaw bag
gipangutana ka kon
nganong miabot ka
man sa iyang
halangdong panimalay

mahalon nga muebles
ah, tugas ang kan-anan
yakal ang higdaanan

bugnaw nga mga suga
sa lawak
presko nga buwak
sa mga bisita

busog silang tanan
wala nagmahay
ug sa tumang kagalot
gipangutana ka

"manghulam ka ba ug
kwarta?'

bulahan nga tipaka. diha sa kalag nga nagduhaduha,

ang tsinelas ni nene
nabitas.

putol ang tiil ni ninang
giputol sa diabetes.

apan bisan pa niini
nangasaba siya nganong
wala kabayad si 
tiya noning sa
iyang prenda.

wala nay laing tiil
nga putlon pa.

ang lungon niya mahalon.
ang mga bulak mahalon.

bulahan nga tipaka.
diha sa kalag nga nagduhaduha,

ang pag-angkon

ang kalig-on
dili ako. Ang kaalam
dili ako.

ang dalan sa kalig-on
dili ato.
ang balayan sa kaalam
maulanan kon moingon kita
nga ato kini
nga ato pod kadto.

agianan lang kita.
kabo. butay. sandayong
lamang.

ang ulan nga midagan didto
gikan sa langit.
ang dahon nga nahulog gikan
sa kahoy.

ang nagkamang nga hulmigas
nga gatangag sa usa ka mumho
dili na atoa.

lumalabay lang sila. ang hulmigas
ang alibangbang.

ang lansang nga mitaop sa salog
arong pugngan ang paghugno
sa balay,
walay nasayod kinsa ang ulo
niini.

busa, paglipay.
sa pag-angkon nga walay imo
bisag usa niini
nadato ka.
nahimo kang hari.

labaw sa tanan.
usa ka na ka
gawasnon.

ang akong ngalan

ang ewon
ang omang, ang
kinhason,
ang imbao nga
milabaw
diha sa atong ibabaw....

nangutana ka man god
kon kinsa ko.

ang bao. ang kaban,
ang hawanan pa nga
dalan gikan sa bukid
paingon sa
laing bukid.

ang pangpang
ang lawod
ang salag nga hangin
sa tumoy sa kahoy
nga bulawan.

mao kana ang
akong ngalan

ang labad

ang seksing alonso nga kaila
nato kaniadto, natiguwang na
intawon, milarga sa america nga
siya lang, aron magakos ang iyang
mga anak nga durong pangitag 
kwarta sa tanang panahon.

nagpahibalo lang siya nga
nabaligya na niya ang ilang balay,
apil na ang didto sa bukid nga
daghang marang ug mangga,
nga siya nakautang ug dako kaayo
sa iyang mga amiga, apil na kadtong
rural bank of mahayahay, nga
karon daghan siyag kasong giatubang,
nga duna siyay nasagpaan, nga
siya karon gipangita  na sa mga
pulis,

ang iyang mga anak nagduda
nga basin duna kini uyab nga
batan-on maong nahutdan na intawon
ug kwarta, kabtangan, ug uban pa.

"na tan-awa", matod pa niya sa iyang
kaugalingon, "ako ang inyong labad"

nga dili gayod ninyo maambat.

hmmm

ugma damlag
mobaga na gayod
ang putos
sa kamingaw ning
balaya

mangaminyo na
ang mga katabang
dunay gitaban
lain ang mitaban

ang mabilin duha na
lang ka dahon sa
sanga

puros laya.

sa gamay nga haguros
sa hangin
mapapas ang balay
mapapas tang duha

hmm, walay
pagmahay, ha?

tulo ka haligi

dinhi sa atoa
tulo lang ka sug-ang
ang nagpatindog
sa atong
balay

ang haligi nga gikan
sa kamalig sa
humay, laing haligi
nga gikan sa
karaaang kapilya
sa barangay,
ug ang kataposang
haligi nga gikuhaan
sa baston sa
natigbak na nga
mayor.

wala na gyoy
lain pa.

balak sa lingla sa lawas

gilingla lamang kita
sa lawas, 
nga nangitag pako,
nga nangitag
kasuginlan sa iyang
kahigwaos, unya
sa dihang 
gitagaan ug pako,
unya human
pamatia ang 
pagpahungaw, wala
baya 
milupad.
anaa, sikit lang
gihapon ang
mga bukton sa
bukton,
bilbil sa bilbil.

ang kalibotang gabaha sa gugma

ang tanan
uhaw sa gugma

ang gugma
sa suba sa kalibotan
kanunay nga
nagbaha

ang dakong lawod
sa dagat gugma

ang ulan gugma
ang yamog gugma

ang kalibotan
giuhaw gihapon sa
gugma

ikaw nganong
ang tubig man
nga anaa sa baso
ang imong gipaabot
nga itunol kanimo?

langoy sa dagat
kaligo sa suba
kaligo silong
sa ulan
sayaw didtong
dapita
ibuhakhak
ang kalipay
padungga ang
kalibotan
sa imong katawa

alang sa usa ka fiscal nga na-broken hearted

hapon na kadto
pauli na sab ko
nagkadungan tag
gawas
sa bulwagan

wa na seguro koy
laing masulti gawas na
lamang sa
"happy valentines"

medyo nanambok ka
diha sa imong pahiyom
unya oran-oran
mikusmod ang imong
nawong
padung sa bag-o mong
kotse
nga ikaw lang ang
maka-drive.

kalubog

sa atong bahin
usa lang ang tinood
ug kana mao lamang
ang karon

kon hunahunaon ang
ugma mahinumdoman
hinoon nato ang
pagkatkat sa pangpang
nga mora kitag gisuyop
sa baba sa
yuta didto sa patag
unya nagkatawa ang
mga bato
nga gustong mopasakit
kanato

kon ang kagahapon usab
ang atong paglion
mabati nato kadtong
nanakay kita sa daang
kangga nga gibira
sa kabaw
unya nagabhian ta gikan
sa usa ka pista
sa layong balangay

ang karon hinoon
linaw nga sapa
unya sa atong kahilom
nabatyagan nato
ang milukso nga isda
dayog tiglom
sa lalom
sugod sa katin-aw nga
gitapos sa kisaw
dayon kalubog.

kon unsa ang tinood

gusto mo nimong hagkan ka nako
dapit sa imong dalunggan
ang kalami morag kadtong karaang
kugang nga akong gitangtang

kapoy pamation nganong kutob ra
kita dinhing bahina.
dinhing dapita walay kahumanan
ang kahinam.
walay kataposan ang kagilok.
mas daghan ang mga sugilanon kaysa
mga bata nga mamati.
ang tiguwang nga ginganlag basyang
mitaliwan na nga sa kadugay
wala na gani makahinumdom kon
unsa ang tinood.

ang byuda niadtong milabay nga valentine's

humag lawog niya sa iyang
anayan nakita kini niyang miungad
sa kalapokan

nabuhian niya ang kabo sa tahop
morag nawad-an sa iyang panimuot

ang butakal nagtabisay ang laway
nagpakita sa iyang barena sa nataran

mihabal sa anayan nga wala misupak
sa kalami sa dihang siya nasudlan

dili ko gustog trahedya

nabasa ko ang imong balak kabahin sa babaye ug lalake nga nagpahungaw sa ilang kainit didto sa balay nga biniyaan sa ibabaw sa bungtod sa silong sa dakong punoan sa mangga.
nindot kadtong silang duha naghagwa, hinay hinay nga gikuha ang ilang mga sapot, samtang ang ilang mga ngabil nagduladula apil ang dila. 
dakong daub diha sa dughan ang naghatag ug kainit sa ilang kagabhion.
gihakop sa babaye ang init ug gahi nga pagkalalaki 
 samtang ang lalake usab mihaploy sa nagbasa ug naghinamhinam na usab nga pagkababaye.
nindot paminawon ang ilang awit, diha sa mga utong ug panaghoy, 
unya ikaw atua nanilip mikalit ug sulod sa maong lawak dayog handos sa imong gidalang sundang.
laing kamatayon ang nahitabo didtong dapita.
mikuyos ang akoa, unya nakaingon kog ngano ba nga ang gugma usahay moabot man sa usa ka trahedya?

ang pakighilawas unta didto lang kutob sa kalami.
kon adunay nay mga gibayaw sa langit nganong imo pa man gayong guruyon paingon sa init nga kalayo sa gipuy-an mong ispedno?
 
kon mahimo ayaw kog yab-i anang   init kaayo nga sabaw nga
makapaslot among  panit diha sa among paningkamot nga kami dinhing kalibotana nalipay bisag sa makausa lamang sa mubo kaayong higayon?

ug nganong di ka na lang usab mangitag imong kalipay? ug nganong ang maong sugilanon sa kibuhi taposon man nimo sa kamatayon?

tungaw

mat-an ang kabuntagan
morag pinya nga 
nagsuot sa iyang korona


gani ang balak sa tungaw
alang sa itlog
nakalotan pa man gayod.

ang mga tudlo sa adlaw
mihapuhap sa buhok sa
usa ka batang babaye
nga naglingkod sa hagdanan
lantaw sa dalan.

walay kahumanan nga gugma gikan pa kagabii

pahalipay nga hapuhap
hunghong nga gadalag 
kahinam
dula sa dila diha sa init
nga halok
sa bugnaw nga kaadlawon.

mangatulog pagbalik ang
mga tamsi 
sa kasingkasing atoa ang
salag sa pagbati

ang mga paglaom migitib
sa yuta nga uga ug sumo.
ang mga saad gibuklad sama
sa mga payong nga 
gipangtak-op.

ang panahon morag tiguwang
nga anaa nanahi sa mga gisi
gitapakan ug gihulipan ang
mga buslot sa kagahapon.

sa tumang kakapoy

diha ang higayon nga
wala ka nay gustong buhaton

mihigda sa kasagbotan
sa bungtod sa kamingaw
ug didto sa mga bitoon
nagpunaw ug lantaw

gipangutana ang bulan
kon unsa ba gayod ang
sa kinabuhi puslan

gibati mo ang paglabay 
sa hangin
ang tingog sa mga hoyohoy
sa tumang kakapoy

sa imong pagbudhi

sa sulod sa lawak
didto ang dakong daub
sa kaulag

sa gawas sa balay
mibunok ang ulan
sa nag-iyak nga
kalibotan

sa laing bahin

hisgotan ta
ang salag sa kaminyoon
kita ang mga langgam

pila na ba ka salag
ang nahimo sa mga kalanggaman
diha sa kasangahan didto sa
kakahoyan sa mga kalasangan?

dili lang ubay-ubay
kondili daghan.

hisgotan pa ba usab nato kining
salag sa kaminyoon?
ang salag sa tamsi nga salag sa it-it
ang salag sa agila nga salag sa ngiwngiw
ang salag sa kwaknit
nga salag usab sa pungak.

ayaw ug kalain
sa laing bahin.....

wala

wa nako
makita ang gugma
wa nako
makuyog
apan human 
sa tumang
kahingawa
wala ko na
kini
ambata.

ako sab
gugma man.
ako sab diay
gugma man.

kini mao
ang unang
adlaw
nako sa
gugma
karon.

ang turista

alang niadtong gikapoy na
sa kinabuhi
ang kaasgad sa dagat sa
Israel
walay kalainan sa kaasgad
sa dagat sa
Ponot

ang canal sa Venice o ang
suba sa Yugoslavia
o kaha ba sa Nile mao rang
canala sa
Miputak

nganong mogasto pa ba ug dako
aron lang makita ang
sunset sa Mongolia
nga mao ra man kanang sanseta 
sa Galas?

kadakong tinonto kining
turisturista, maoy ingon niya.

pizza sa Italy, puto sa Punta,
bread sa New York o nutribun sa Olingan,
mao rang busuga.

gilumutan ang iyang kwarta
ug sa dihang namatay na siya
wala baya niya madala
bisag usa, bisag usa.

alang kang T., 79

ang tiguwang
kanunayng naghisgot sa iyang
duha ka anak
nga babaye nga wala na
kaniya
gidala sa inahan palayo kaniya
tungod lamang
sa panagbangi sa relihiyon

ang pamilya ang panagdait
lahi man sa relihiyon
labi na ang gugma
labi na ang pagsinabtanay

nalupig sa relihiyon ang
bugkos sa panagsoon
nahisama kini sa sundang
nga mitikbas sa usa ka hukot
dayon ang gihuktan anaa sa
yuta nagkatuagsa

ang mga diyos nimo

kon maglaray
man ugaling ang 
daghang mga
diyos

usa lang ang akong
ikasulti
unsaon kaha kini
pag-igo sa imong
gamay ra kaayo nga
baba?

gawas lamang
kon daghan ka usab
ug mga pangag

tubag sa imong pangutana nganong dili kini angay mahadlok sa bisag unsang hulga nila

yuna pa
kapila ba diay nimo
gustong mamatay?

kapila ba mamatay
ang tawo?

mao kini ang
mga pangutanang
tubag sa imong
mga pangutana
nga gustong mohambin
ug daghang
kabalaka

kay ikaw kuno bakakon

nagdamgo kog
kabayo nga walay hikot
nga pisi
ug walay montora nga
akong gisakyan didto 
sa plaza
unya ikaw nanawag
mihangyo nga pasakyon
sa akong kabayo
nga maoy nagmando
kanako nga dili ka pasakyon
kay ikaw kuno
bakakon

bugno

sa tuman nimog
pamati  sa imong pastor
nawad-an kag bana

ang imong bana
nawad-an sag mga anak

kamong duha
nawad-an ug pamilya

pagkawalay pulos anang
inyong mga tinuhuan
pagkabalasubas ba usab
sa inyong 
gipangtuhuan

wala kunoy sala ang
mga nagpatootoo sa mga
dali ra kaayong motoo

ang inyong mga anak usab
nangasaag sa dalan
samtang kamo nagbugno
kon unsa ang
kamatooran

nato

kon kinsa ang
diyos
anaa ra kini sa
atong samin

kon unsa ang sakto
anaa ra kini
sulod sa kasingkasing

kon unsa ba gayod ang
kinabuhi
anaa ra kini
sa pagpakabuhi

kon unsa ka 
ug unsa ko
anaa ra kini sa atong
kahilom

wakong kasabot

wa koy nasabtan
apan lami man
paminawon

wa kong kasabot
apan lami man gihapon
hangtod ko
nagawsan

di na diay kinahanglang
sabton
ang kinabuhing
gawasnon

si manong mando

sa sayong kahaponon
ni manong mando
mahimong dili pa oo ang
tubag sa nangabot nga
pangutana sa iyang kinabuhi
samtang madungog pa
niya ang pagtuko
sa tuko sa kilid sa bongbong
sa iyang balay nga
kawayan

sa pag-abot na unya sa
kagabhion sa dihang dili na
kini niya matubag ug tarong
tungod kay ang iyang mahimo
mao na man lamang ang
pagyango ug pag-ando
mohinayhinay ug biya ang
mga pangutana
tagsatagsag dala sa pagmahay
nganong karon pa man
si mando miando
nga dili naman siya kamando
sa bisag usa kanila

kadtong babayeng gibyaan na sa kaulag

nagsugod na
ang pagpamuti sa
iyang pipila ka
lugas nga
buhok

sa tungang gabii
nanudlay siya atubangan
sa altar sa
iyang mga santos

usa ka tasa nga gatas
ang gidalit nga tagay
aron unta hatagan siyag
maayong katulogon

mga busa

walay hingpit
walay sakto
walay sayop
unsa man diay?
saksak sinagol
ang tanan.
busa salaa.
busa paminawa.
busa sabta.
busa padayon
busa paglig-on.

lig-on

sabta nga lig-on sab ako,
bisan sa tubig, bisan sa tunga ug
lalom, bisag naa pa ang lilo,
sabta nga makamao akong makat-on.

ang mga maanod, naanod.
ang mga nasuyok sa lilo, nawagtang.
sabta nga ako nakat-on na usab,
nawagtang ko, nasuyop man gani,
naanod, apan ania bisag wala mo na
makita, bisag gipakisama na nimong
dahon, abog, balas, bato o
abo, ania lang gihapon ako

naghandom nimo.
mao na lang kini ang nagpabilin
nakong kalig-on
ang giisip nga patay apan
dakong buhi gihapon sa
akong kaugalingon.

tinooray nga paghinabi.

kumusta ka na?
ok lang.
ikaw? ok lang pod.
musta ka na ba
gayod? dili ko ok.
ako pod.

adto na ako

sa kadugay na sa panahon
panahon nga akong gikalimtan
na unta sa dayon naunsa ba
kining hitaboa nga miabot
ka man sa akong kagabhion
dinha sa usa ka damgo
naunsa bang hitaboa nga ikaw
nagmasulub-on man
nag-iyak nagpatulo sa mga luha
diri sa akong dughan unya ako
nga usa ka buang ania namati
kanimo gibatig kalooy hangtod
nga gidapion ko ang akong mga
ngabil sa imong ngabil
dugay,
aron lamang sa lain na usang
higayon yubitin lang gihapon ang
siging giusik- usikan nga
panamilit.

"adto na ako sa akong kalibotan
didto sa atong kagahapon...."

ang lamat

niadtong panahona
nanira ko sa akong lawak
walay bisag usa nga
akong gipasulod bisan
unsa pa ang hangyo 
bisan unsa pa ang
mga tintal

gipangtago ni tatay
ang tanang kutsilyo sa
balay
si nanay usab nagsugod
diha sa iyang
kahilom

mipanaw ang akong hunahuna
misaksi sa dakong linog
diin didto nahugno ang palasyo
natabunan ang hari ug rayna
samtang naghawiray sa ilang
duha ka kamot

natabunan ang tanan
napuli ang baga nga abog
diha sa kapaspas sa
panahon
migitib ang mga sagbot
ang kabag-ohan

sa dihang giablihan ko na
ang lawak
nakita nila ang kalahian
dili na kuno ako
ang mibutho
gikan sa lubnganan

nanamin ko sa tumang
kahadlok
samtang ang bag-ong
dayo sa maong dapit
mikihat, mitanyag sa iyang
kamot sa usa ka
pasalamat

itoy

alas tres sa kaadlawon
dili idlas ang mga balak

nahisama kini sa 
bag-ong itoy nga gipangayo
sa imong asawa
didto sa inyong silingan

nahilom samtang imong
gihaploy
sa imong kamot
gipainitan nimo sa
imong dughan 

samtang ang hangin ug
ulan sa gawas sa 
balay nagbugno kanunay

palagaylay

nagpalagaylay ka lang
sa imong kapalaran
daw balahibo sa usa ka
lovebird
nga nalanding sa palad
sa imong nanay.

samtang naghinayhinay
na ug panira ang pilok sa
usa ka adlaw

wala na ang mga pangutanang
gisulayan ug tubag
sa kanding didto sa mga
naghibi nga dahon

dili ko hingpit kon wala ka.

ang panag-uban nga mas lig-on
pas tugas nga kahoy,
mahimong walay gamot, 
walay kinabuhi.
mahimo man gani nga walay
bunga.
walay lugas.

wala kini sa panumpa.
o panagsabot.
anaa kini sa atong kakulangon.
ang taklob ug ang
baba sa kaldero.

mangatawa kita nga ang 
sabon
dili mobula kon walay
tubig.

apan mao baya gayod kana
ang tinuod.

dili ko hingpit kon wala ka.
usahay ako ang ulan 
sa imong hulaw.

ang kasakit nga walay ngalan.

init pa kaayo ang cafe sa rio hondo
nagkita ra gyod kita karong adlawa
human sa pipila ka tuig nga milabay.
morag nagdaot ka, medyo minipis,
natalagtag na ang buhok, unya hinay
ka lang gihapon sa imong mga lihok.

miingon ka bulahan ako nga migawas
dayon nakita ang kahayag. Wala koy
gitubag. Init pa ang kape ato kining
hinayhinayan sa pag-inom. Dili na
kita magabhian dinhi, lahi kining 
lugara. Daghan ang gidagit dinhi dayon
wala na mauli. 

sa laing bahin,  niadtong migawas na 
ako, tuod man, morag ako ang tanang 
hangin, ang dagat, kauban ko ang mga
bungtod ug kakahoyan sa akong panaw.
nabati ko ang pagmahal sa kasagbotan.
nabati ko ang mga pako sa kalanggaman.
dako ug lapag gayod ang kalibotan nga
dili nako mahurot bisan na lang gani sa
paglbay ug paglantaw.

ang ako lang katingala, bisan unsa pa ang
akong gipanghambog kanimo, samtang
init pa ang kape nga midapat sa akong ngabil,
nganong ikaw wala pa man migawas sa maong
pultahan, sa maong langob matod mo pa,
nganong ikaw pa man gani ang naghipos sa
uban nga matod pa nato wala makakita sa 
tinood nga kahayag.

wala ko gipugos ang maong pangutana. 
init pa ang kape, unya hapit na moabot ang
tumang kangitngit sa kagabhion ning dapita.
daghan ang gipatay dinhi nga walay hustisya.
maingon ta nga walay panagsoonay ang 
maong dapit. Sa walay pay alas sais, manirado
na ang tanang mga tindahan. Wala nay tawo ang
mga dalan. Wala nay tingog nga madungog sa
mga bata nga magdula sa natad sa kabalayan.

hinoon, wala ko na kini gisulti, bisan pag ania
na ako sa nataran sa kahayag, bisan pag moingon
ko nga higala ko na ang dagat, ang hangin, ang 
adlaw. Bisan pag moingon ko nga ako na ang
morag tag-iya sa mga kabuntoran ug kapatagan.

apan sa tinood lang, ug kini mao lamang ang 
akong gitago sa akong kasingkasing, ania ako 
gibati pa gihapon nga ako usa ka piniriso sa usa 
ka langob nga dili ko makita, nga wala mo usab
makita. mora kog aso nga nakagawas sa bentana
didto sa kusina, nalipay kunuhay, apan sa kadako
sa kawanangan, nawala usab, wala na kabalo kon
naunsa, wala na kabalo kon asa na: ania gihapon
ang kamingaw, ang kasakit nga walay ngalan.

nahibaw-an ko na lang nga giingnan mo ang imong laing higala, nga human niadtong higayona
wala ka na usab makaila kanako. Dili ko ikaw 
mabasol. Mahimong mao gayod kana ang gusto
ko usab nga mahitabo. Sama sa hangin, walay
nawong, walay ngalan, apan anaa lang gihapon.

Hellen Keller

Sa kangitngit
nakita niya ang adlaw
nga mas dan-ag pa sa ilang panan-aw

Sulod sa iyang kaugalingon,
puno ang paghigugma,
agi sa kaisog sa iyang kalag

Karon, buka ang palad
sa kalibutan nga midawat
sa iyang grasya:
ang mensahe sa kalig-on
sa kaugalingon

-Langston Hughes
hinubad ni T. Monique

Kinumkom Nga Kalag

Bisan gani sa kahapunon,
nawala na kitang duha
wala nay nakakita kanato
nga nagkuptanay og kamot
samtang ang bughaw
nga kagabhion
natagak sa kalibutan

Nakita ko sa tamboanan
sa layong bukid
ang nag pista nga sawumsom

Sa kinumkom kong kalag,
nahinumduman ko ikaw
sa akong kasakit

Asa ka man kaniadto?
Kinsa ang tu-a didto
nga nag-ingon, ngano nga ang
kinatibuk-an sa gugma
moabot man sa hinanali
dihang bati-on ko ang kagu-ol
kon ikaw layo kanako?

Nahulog ang libro nga
kanunay'ng tak-op sa kahapunon
ug ang akong sapot
naglukot nga mura og iro
sa akong tiilan

Sa makanunay, misibog
ka sa kagabhion paingon sa
sawumsom ug gipanas mo
ang mga estatuwa.

--Pablo Neruda
hinubad ni T. Monique

dili ka smart

mahadlok daw ang mga lalaki
sa mga babayeng smart, eh?
mao daw nga daghang smart women
nga wala maminyo, pero kon akong
ma-meet si ms. smart, i will ask
this question, if you're smart then
why ain't you married?

ay kog ingna nga nalupig ka na
hinoon sa kiat, sa kiat nga kiat jud,
nga morag black sambo nga haskang
tam-isa, apan walay unod walay
bukog, 

lawas nga walay bitok,
paa nga haskang putia,
apan kon pangutan-on dili
man gani motingog
no comment, sa mga issues,
apolitical, apan sus tan-awa

nakabit man hinoon sa imong
mister nga sa imong ka smart
wala na hinoon ganahi miuli
sa inyoha.

if you are that really smart,
unta kabawo kas ins and outs
sa mind sa imong bana
unta kamao kang modala
niya paingon sa imong
kasingkasing
unta sayon na lang nimo
ang pagsulod sa iyang
hunahuna

ay kanay, kon kini mao
ang nahitabo, nan, dili ka smart.

gitaral siya sa kamatayon

nahinumduman mo
kon giunsa pagyawayawa
sa imong lolo
ang kanser sa prostate
diha kaniya

wala kadulot ang yawa

ambot basig nalitok lang
kini niya
tungod sa kasuko ug 
kahiubos

apan nalipay na siya sa
daghang katuigan

gitaral siya sa kamatayon
unya ang tanang nag-alirong
kaniya
nga nagmahal ug nag-amoma
haskang hiloma....

paningkamot

gipaningkamotan
sa kamot nga mahikap ang
dakong bukol sa
likod dapit sa wala
ubos-ubos gamay
sa abaga

ang buta nga manghihilot
dali ra kaayo niya kining
nakaplagan

lawom matod pa niya
dili mosibog
dako, gahi.

nabilar kang naghunahuna
kon unsay buhaton
kon imo pa ba kining
daginoton
dugang sa mga kasakit
sa imong henerasyon

nakaingon ka
swerte pa gihapon ang
mga buta....

kaadlawon

sa dihang
gisulat ko kini

dungog kaayo
nako ang 
awit sa usa ka
langgam
nga wala nako
makita 
diha sa putong
sa kaadlawon

selosa ang
hunghong sa aircon
unya ang
higdaanan
nanintal pa gihapon

ang langgam
layo sa bentana
apan ang kaanindot
sa iyang
awit
ania nagbalikbalik
sa akong
kasingkasing

aduna akoy gihigugma
nga layo kanako
nga wala nako makita
apan akong gibati.

anaa mitak-om na ang imong baba.....

ang pagpili sa
mas gamay nga sala
sala lang
gihapon

kanunay mo kanang
giukit

didto sa pista 
diin nagkahibalag na
usab kamo
sa mga karaan

didto sa kalagkalag
kauban sa mga
bag-ong tubo sa imong
mga kaliwat

ayaw pilia ang
daotan
likayi ang sala
ayaw paduol sa
dapog
aron dili ka
mapaso
o
masunog

mao lagi
unya karon
naunsa ka man?

adunay kigwa
ang imong kunot
maong
makasayaw ka
kadyot

sa dihang napilian
mo na ang gamay
kaayong sala
anaa mitak-om na
ang imong 
baba.....

ngano kaha nga bisan pa sa tanan anaa nabuang nagpakatinood man?

siya ang kanunay
nga makalimpyo
sa mga hugaw nga
nabilin
bisag unsa pay tambag
bisag unsa pang pulong
tam-is man o asgad
siya lang gayod gihapon
ang kataposang 
nabilin aron limpyohon
ang tanan
aron mapahiluna ang
natuagsa

bisan pa sa tanan
atua
mibiya ang kalipay
nangita sa ukay-ukay

sahay unta pilion na
ang kasilag
ang pagputol
ang paghiwa
apan ngano kaha?

ngano kaha
nga ang gugma
anaa
di man mopili
sa lain?

ngano kaha nga bisan
pa sa tanan
anaa nabuang
nagpakatinood man?

wala baya kini
gatagad sa korona
ug kapa.

nagputol sa iyang kaugalingong buhok.

ang barberong
nagsalimuang
dunay tinaguang
kasuko samtang
nagputol sa buhok
sa lalaking katulgon.

ang iyang gugma
wala masuklii ug
gugma.
ang iyang gihigugma
samtang gihagkan
niya
wala nagpiyong
sa iyang mata.

sagol kasuko sagol
kaguol
ang timpla sa iyang
mga pagbati
nga lukot sa iyang
kasingkasing

midagan sa samin
milantaw sa iyang
kaugalingon
mikuha sa gunting
ug karon
nagputol sa iyang
kaugalingong buhok.

timbang timbang

mihangad kos langit
giamgo nako ang akong
mubo nga kuhit
sa kamatooran
nagpalaban kos mas
gamhanan
kadtong  nahibalo 
sa tanan
sa dihang gitimbang
timbang ko kon ikaw 
ba ang sal-an.

handom

ang mga habol nga
wala mapilo kuyog sa
init pang mga alugnan
ibabaw sa higdaanan
nga sarang kahumok 
nga morag cake nga
chiffon

mikatulog ug balik
sa nindot nga mga gihandom

antos

ang gitagoan
nimong love letter


kuyog sa black and white
picture
sa babayeng mubog 
buhok
dayon balod kaayog
pilok unya
baga ug kilay

ang kandiis sa aping
ug pulang ngabil

imong gigisi.

gipinopino gisunog
dayog lantaw nimo
sa kataposang aso
paingon sa langit

halad sa tanang mga
gugmang nangaguba
nga nakapay-ag kanimo

kaantos man gani ka
sa una nga
batan-on ka pa

unsa na kaha karon
nga tiguwang ka na?

hilom ang mga kumagko
nga nanako sa
luag nga tsinelas 

ang kalahian

lahi sab ka
sa dihang mibunok 
ang ulan

ang tanan
nanagan nangitag
kapasilongan

samtang ikaw anaa
nagpiyong sa imong
mga mata
mihangad sa langit
milad-ok sa lusok
sa ulan
gibati ang tanang
grasya
diha sa imong
pagkabasa ug
pag-inosara.

kabahin sa mga bagtok

ang tanang bagtok
ning dapita
nalit-ag

silang tanan
anaa sulod sa hawla
nagpaabot
sa ilang kamatayon

ang asawa sa nanglit-ag
gibatig kalooy
nagpaabot sa saktong
higayon
nga silang tanan buhian

anaa ang dakong sawa
naglantaw
nag-andam usab sa iyang
pagabohaton

nagmingaw ang kisame
haw-ang ang kasagbotan
ang iring sa kilid sa bentana
gibatig kalaay