ayaw ug salig

ayaw ug
salig
bisan kang
kinsa

ang pagbudhi
samad nga
walay pagkaulat

ang kalaog
alom sa
aping

ang kasinahan
ikaupat nga
tudlo

ang kauhaw
walay kaulaw
ang kagutom
irong itom

ayaw ug salig
kang bisan
kinsa


ang kaulag 
ikog sa baka

ang kaibog
daghan pas
abog

sulod sa imong
kasingkasing
paghabol didto
dalha ang ugnan
didto ka 
matulog

mora lang gihapon busa ayaw na ug pangutana

bation mo usahay
ang tumang kamingaw
unya gusto nimong
ilailahon ang imong
kaugalingon sama sa
imong amigo didto sa
saba ug hugaw nga 
merkado aron motubag
kini sa imong pangutana
kon unsa ba gayod ang
tinood nga hinungdan
niini unya wala kini
tubag, ug sama sa gihapon
giingnan ka niya, 
mahimo ba ayaw na
ug pangutana daladalaha
lang kini nga mora bag
walay nahitabo nga mora
bag unsa pa bay pulos
sa paghinumdom nga
maora man gihapon
walay tubag walay klaro
nga tubag kabahin sa
hinungdan, nga ug imong
sutaon mao ra man kini
gihapong kamatooran nga
dili mo masugilon kang 
bisan kinsa ug bisan
kanus-a pa.

ang bulan aduna nay
timon, adunay katig unya
mikahig na kini
sa baga nga panganod
sa usa ka bugnaw kaayo
nga kagabhion.

karon basin ug nasayod ka na kabahin sa maong pagbati

nasayod ka na seguro
kabahin sa sugilanon sa
usa ka mongo nga nahulog
didto sa gitay-an nga nga
lata sa milkmaid,

gansang gansang ang ngipon
sa tabon niini nga gisirado
sa bata human kini nagdula
og telepono telepono

dugay na ang maong mongo
didto hangtod nga mora kinig
nahigmata sayo sa buntag nga
morag bata nga bag-ong natawo

mitubo ang maong liso, nanahon
ug duha ka buok, unya mikulo
didto sa sulod sa lata, nga walay
gawsanan, unya sa tibuok niyang
kinabuhi gipangita niya ang
ginikanan sa kahayag nga gisala
sa gansang gansang nga ngipon
sa tabon sa maong lata nga
gisira sa bata human kini
napul-an ug dula sa iyang
telepono, telepono.

nakahibalo na ko dugay ra.

nakabalo ko nga
giilad ko nimo, 
wala ka kahibalo
nga nakahibalo
na ko, dugay ra.

dili ka gamhanan.
ako ang gamhanan.

nakabalo ko nga
giilad ko nimo, 
wala ka kahibalo
nga nakahibalo
na ko, dugay ra.

ako ang gamhanan.
dili ikaw. ako, ako.

kay nakabalo ko
nga giilad ko nimo
apan wala ka kahibalo
nga nakahibalo na 
ako bahin aning 
bahina. wa ko 
nagpahibalo nimo
bahin nimo.

sinahan

sinehan
sinehan
gilaayan
ko kay
dugay 
kaayo ang
imong
change 
program...

alang kang diez

tungod ba kunuhay
nga lahi ka
himoon kang
espesyal?

unya kami nga
ania sa kadaghanan
nagguot man gani sa
gamay nga dalan
nakiglantugi
nakigharong sa among
kinabuhi

nakita mo ang among
paglinya
nagpaabot sa sakto nga
panahon
sa pagbahig sa among
gamay nga kalan-on
gani ania namutang
man sa mga mohon
aron makaplastar na
pohon......

unya ikaw karon himoong
espesyal?
kaugalingong CR?

unsa ka dyosa?
unya kami, mga
cosa?

de lora

gibalikan ko
ang mihunas nga
dagat
migimaw
ang mga lintop

ang ilang mga dila
nagbitay

nga morag ako ang
gisaway....

diin

sa laing bahin
aduna koy nakita nga
lain

sa laing laing kabahin
adto ta diin?

lantaw diri, balhin didto
maong nasulat ko kadto
maong ania na kini
putol nga bikini

injustice

miingon ang
bata

wa man nako
hikapa
ako lang gilantaw

nasuko ang dako
mipaghot nga morag
iro

nakasala ka
nakasala ka
nakasala ka
gihaponng
bataa ka!

naglibog ang bata
kay sulod sa iyang
kasingkasing
ug sumala sa kamatooran
sa gimbut-an
sa iyang konsensya

"gihikap ko lang ang
akong mga kamot
gisumbag ko man lang
gani ang akong dughan"

tambag sa misulay pagbalak

ayaw kabalaka
padayon lang sa
imong panaw
subaya lang ang
kilid sa bungtod
pamatia ang awit
sa sapa
ang haganas sa
sakayan
ibabaw sa mga 
bato
kon mahimo
pamatia pag-ayo
ang awit sa mga
isda
batiang kalipay
ang paglupad sa
mga langgam
gikan sa habog nga
pangpang
lantawa subaya ang
kahabog sa mga
bungtod
tutuki ang unahan
nga walay kataposan.

ang harsh ra kaayo nga critiko

WALA ka man unta
mibuga ug lava
gisugilon mo lamang
ang kabahin sa pakyas
nga gugma
miantog kas pangpang
misulay kang kunsad sa
langit
miawit ka sa hangin
gikariling mo ang mga
lingin
gihandom mo ang mga buwak
sa dalan sa kasub-anan
wala kay gikutlo bisag 
gumamela man lamang
mibalak ka lang 
sulay sulay sa buwan nga
magul-anon
mga luha nga nauga sa
alugnan
habol nga bilar sa imong
kagahapon
walay kalooy nga himantayon
mibasa ug  miingon
'undangi, mas maayo pang
maggansilyo ka o dili
ba sa mga bulingon mo
manglaba"

balak sa usa ka bag-ong kagawasan

awit sa kalanggaman
mibuswak nga kabulakan
miundang na ang ulan
mihunob na ang basa nga yuta
miabot na ang adlaw
sa akong kagawasan...

mabuhi lang gihapon ang
mga gamot bisag wala na
ang mga dahon ug sanga....

kahayag nga mahinangpon
sa kasingkasing nga magul-anon
kainit nga hapohap 
sa usa ka mananap.

kaplag

nawala man 
gani ako apan
mao kini ang
akong saad,
makaplagan
ko lang gihapon
ikaw, ang ako
nga ikaw, 
nga nausab,
bag-o, humot,
lig-on.

anggid anggid

anggid
anggid
ka kani
ya, maong
gibati ko
ang pag
higugma.
pasayloa
apan mao
kana ang
kama
tuoran.

sunod sunod lang

gisunod ang
tradisyon
sama sa pagsunod
sa prosesyon
gisunod ang
naandan
giawat ang tanan
walay kalainan
sa ulod, sa hulmigas
sa lapinig
sa anay, sa
tungaw, sa 
pulgas.

samin

samin ang
akong tanang gipanulti
bahin kaninyo
busa
litokon ko ang pulong
aron makita ko
usab ang akong
kaugalingon
unya miabot ako
sa punto nga dili
ko na gani usab
madawat ang akong
kaugalingon
sama usab ninyo 
sama niya nga miambak
sa tulay
aron manamin sa dagat
didto sa habog nga
langit nga iyang
gipuy-an.....

ang gilikayan

nagkita mo
human sa pipila
ka tuig

baga ang iyang
buhok
nga itom kaayo

hamis ang iyang
pamanit
lahi na kaniadto

migakos siya nimo
morag ga-debut

nausob na ang
plastada 
sa iyang nipis
nga palda

hayy ang mga
katuigan
mipakita na gayod
sa kinaiyahan

takuri

gaaso ang 
ilong sa
takuri
gahingos
gahangos

hinungaw lang
wala lang
inig kahuman
wala lang

walay nabilin
walay natago
walay natigom
walay giluom

lawas

pagkadaghan sa drama
sahay madugo
sahay maguba ang
tanan
daghang sugilong
makabungog

lawas lang ang
hinungdan
lawas lang
walay labot ang
kalag

ug nganong kini
lantogian? awayan?
kasohan?

kinse minutos
lang ang
lawas
dayon ang
tibuok kinabuhi 
gilutos.

deskripsyon

miabot kita
sa divine mercy
tumoy sa bungtod,
kusog ang ulan,
baga ang gabon
sa unahan, ang
dagat linaw,
sa ubos, walay
lihok ang mga
kahoy, baga ang
mga cogon, ang
estatwa ni jesus
ug ni birhen maria,
nag-atubang sa
dagat gitagbo
sa adlaw nga morag
nabanhaw

ikaw, perfect nga kalami

dihang gibati mo nga
mora kag relyenong bangus,
gikuhaan kag tunok, gitapok
ang unod, gipalamian sa
lamas, dayon gibalik ang
tanan diha sa panit mong
gihimong putos, dayon
giluto ka sa init nga mantika,
dayon nilag ingon, perfect
ang maong kalami, ikaw.
relyening bangus
perfect kay wala nay 
tunok
unod nga gikompleto
recados
nga sa imong kaugalingong
panit pinutos

suyod

hagki ang
putyokan

apila pa gyod
ang ligwan

karon nanghubag
ka sa ilang
pinaakan.

medea

na karon
gihigugma mo man
ang dili mao

swerte ka
nga magsulat ug laing
medea
unya ikaw kunuhay ang
bag-ong
banggiitan nga si
euripides

laog

ang karaan mong
aparador nga hinimo
ug tugas
naghatag ug kalibog
kanimo 
nganong nagduga

dili maabri 
nanimaho, abi namog
unsa, ang imo
man diayng mangga
nga nalata
tungod sa imong
kalaog

ang mga pulong mo kaniadto

ang imong
gipanulti kaniadto
nahibalik na karon
nga morag mga
classmates sa high
school, 
garaon, kiat, nga
kon mobahakhak
ug katawa
morag walay
kamatayon.

dahon, ulan, yamog

giangkon sa dahon sa gabi
ang wala niya paghawid sa ulan
nga sa kanunay miagi lamang
sa iyang aping dayog kahulog
niining tanan didto sa lapokan.

ang ulan nasina sa yamog nga
mitago sulod sa iyang sinina.

nakubit

ang isdang
akong nakubit
sa pasol
maoy naghimo
sa kinakusgan
og katapusang
kisaw.

lutaw

lutaw.
ang makita mo lamang
ang milutaw
kadtong milugdang
nasagol sa mga
lubog.

aron mabuhi
nindot ang magpalutawlutaw.

kon mosalom ka sa lalom
tantyaha baya ang katas-on
sa imong utong.

bason kon dili mo 
makaya ang kalalom.

molutaw man ugaling
ka apan patay na. 

tumong

sagdan
ta ang lakat
sa atong kinabuhi
kon unsa man ugaling
pahinuntan ta 
kon asa man kutob
sabton ta.

lantaw lang
ayaw nang
yawyaw
hunong ayaw
ug tingog
lakat ayaw na
ug lingi
balik makalangan
lamang kana
sa atong usa ka tumong.

mas milambo

wa ko gipangayo
ang hunob sa kahayag
gamay lang
gamay lang nga 
landong sa kaadlawon
ang akong gikinahanglan
dili na ang kadaghan
hadlok kong masunog
kini kini lamang
gamay lamang nga siplat
sa kahayag
sa akong pamati mas
milambo ako sa kangitngit.

ang irong itom ug puting iring didto sa pader

ang iring nga puti
anaa lang gihapon sa
ibabaw sa ibabaw
sa pader
sa silong sa
suga sa garahe nga
nalimtan ug palong

 ubos sa puti nga iring
mao ang iro nga itom
nga hiniktan nga nagpunay
ug paghot sa iring nga nga puti
nga wala mangambat kaniya

nangandoy ug kagawasan
wala mabati ang pagmahal
dako ug kaibog sa iring
nga puting gawasnon

nga miambak sa pader
paingon sa harden sa
 mga rosas dayog katkat
latay sa punoan sa santol
nga gahirig paingon sa
balay tungod sa miaging
kusog nga hangin

ang hiniktan nga itom nga
iro anaa nagpunay ug
paghot sa pader bisag
wala na ang iring nga puti
nga atua sa sanga sa
punoan sa santol nga
gahirig paingon sa balay
diin ang tigulang nga
babaye nagpaabot sa
mestisa nga anak nga
atua na nagpuyo sa
Manila.

sunflower

ako ang
sunflower
ikaw ang
adlaw
matag gabii
ako 
patay.

punyal

duda mi nga
sya ra ang nagpatay
sa iyang bana

lisod dawaton apan
siya mismo ang
nagpasiatab

mas sakit ang
punyal nga mitusok
sa iyang likod

kaysa sa kaguol
nga bation sa asawa
diha sa haya sa
iyang bana.

halok sa langit

kaming duha
nanganta 

we are young
and we shall set
this world on 
fire

sulod  sa sakyanan
nga mikatkat sa
habog nga bukid

we are young and
we set this world on
fire

nga milatay sa 
hagip-ot nga dalan
likos sa bukid hangtod
sa kinatasyan

we set the world on
fire 
on fire on fire

didto sa tumoy
hawid sa panganod
gihagkan ang
langit

altar nga hangin

aNAa ka sa 
sitwasyon nga dili ka
kaingon ug

i love you

dili gani ka
hunghong

ipaagi mo na lang
sa buhat

sa simbolismo
sa arte

busa gikutlo mo ang
pula nga buwak
ug imong gihalad
sa altar nga hangin.

yabag

wala ka 
mituno sa awit sa kinabuhi
wala magkatunong
ang imong
awit sa kasagaran 
supak ka sa
kwerdas
yabag ka sa 
namati
wala ka nauyunan
sa bagang
katawhan
mismo ang gitarista
naglagot nimo.

duha ka pangutana kabahin sa kahilom sa paghigugma

hangtod kanus-a
magpadayon ang kahilom
diha sa mga bukton
sa gugma?

hangtod kanus-a kini
molungtad sa dihang
miluag ang
gakos sa dihang
nabuak ang samin sa
pagtoo sa maong
gugma?

kinatumyan

ANG kinatumyan
ning atong gugma nga
nagsalo sa tumang
kalipay
sa dihang ang tanang
pangagho sama sa 
salampati nanglupad
na sa di nato magakos
nga langit
mao kining pagpamusyak
sa dili matukib nga kalipay
diha sa kahilom

buwak nga namuswak
sa kabuntagon nga misabwag
sa iyang kahumot

walay bisag usa man lang
ka gilitok nga pulong.

ang mga wala damha

gusto man god unta nako
nga ideretso na lang kadtong
walay dikidiki apan dili pod
diay mahimo, gani ang tubig
sa suba nga gustong moadto
sa dagat agi sa bukana aron
dili madagma mamaybay man
sa kilidkilid sa bungtod.

busa ania kita sa atong kalibotan
mitunhay nianang padungogdungog
milambo sa mga pangagpas
migamot sa pagduhaduha unya
mamupo sa bunga sa wala damha.

ayaw lang kaayo pagpadala sa imong pagbati

dili sab mahimo nga ako
ang patay nga panit sa kahoy
unya ikaw ang walingwaling
sa kilid sa akong kamatayon

ayaw kaayo pagpadala sa
imong pagbati, tungod kay
bisan maanyag ka sa tanang
panglantaw, nagkulang ka
usab baya sa kahumot.

aida

nahubsan na
ang atabay

nahuman na
ang lamay

nipis nga atay
sa maong patay

CCTV

ALA una ka 
alas tres siya
kaadlawon
nangitag sebo.

pasalig

daghang panghitabo
saong kabuntagon
hangtod sa kagabhion
apan morag walay
nahitabo lang gihapon.

ang kahimtang karon...

kutsarang walay tinidor
platito nga walay tasa
balde nga walay kabo
kaldero nga walay taklob
sundang nga walay sakob
balay nga walay hagdanan
dagat nga walay lapyahan

balak #26

walay pinugsanay ang dama
didto sa nataran sa gugma

kon kaha aduna man
shatong ang dangatan

padugayay sa utong
agig handom  sa datong.

balak #27

magkadugay
magkalami

molami ang pait
mawala ang aslom
mabati ang asgad
sa nihit nga katam-is.

poem #25

ang kwadrado mo
nga debuho
akong gilansang
didto sa
kilid sa bongbong
sa among balay
nga gianay.

ang imong debuho sa
nagtalikod nga tawo
nga walay sapot
nga gamay ug ulo
akong gilansang didto
sa kilid sa bongbong
sa among balay nga
gikaon sa anay.

walay buhok ang maong
tawo
walay kuko ang iyang
tiil
puros lansang ang iyang
gitumban

ang imong debuho wala
nagpakita sa kasakit sa
tawo nga imong gipatalikod
kanako nga naglansang 
kaniya diha sa bongbong
sa among balay nga
hapit na mahurot sa anay


mitindog ako atubangan
ning tawo nga walay buhok
nga nagtalikod kanako
ug nangutana " unsa kaha kon
makita ko ang imong mga
mata? makita ko kaha ang
sulod sa akong balay?"

balak #24

sayran ko ikaw
sa akong mga 
panghupaw

samtang gihigop
ko 
ang dakong wanang
sa imong
sabaw

balak #23

gipangutana
ka 
miingon ka
nga
oo
busa gibuhat
ang 
hagbay rang
gihandom nga
buhaton

sa mga mata
nga piyong 
sa mga kamot
nga labong
sa lawas nga
nag-aso diha
sa kalayo nga
wala 
mapalong

(nabantayan ko
ang pagkusmod
sa imong nawong
apan 
wala ko na kini
tagai ug
panahon)

gipangutana ka man
god
unsa miingon ka man
nga
oo
busa gibuhat
ang
nabuhat

(dunay gamay
nga nahibat
apan wala ko na
kini 
giambat)

ang imong
oo
maoy hagdanan
sa usa
ka pagtoo

ang imong laing
oo
maoy kahayag
nga imong
gidan-ag
sa akong mga
hanyag.

ang mga balak nato

kitang
nangitlog sa
salag sa 
ibabaw sa pangpang
wala sa atong
hunahuna ang
pagpamusa.

mabaw nga kalipay

MABAW nga kalipay

sa umang nga nagbitbit
sa iyang balay,

sa alibangbang diha
sa iyang bag-o nga pako

sa bata nga nagpaanod
sa iyang sakayan nga papel
sa hugaw nga kanal

sa akong kihat diha nimo
samtang nagsukad kas 
pamahaw....

french kiss

pagkamalipayon
sa akong kabuntagon

init pa gihapon ang kape
nga  diha sa imong
ngabil ug dila.

"good luck na lang sa mga nangabilin!"

KAGABII
wala kaayo ako
makatulog 

adunay naghasol
kanako

sa dihang nangutana
ka kabahin sa naghasol
kanako
mitug-an ko sa tinood

kabahin kini sa kamatayon
nga sa akong
tantiya hapit na moduaw
ug maningil kanato

naglagot ka nga miingon
nga kining mga butanga
dili na angay nga hisgotan
pa kay kon moabot 
moabot gayod

wala ka mangutana kon
nahadlok ba ako
apan kon nangutana ka
pa unta
andam na ako sa akong
tubag

"good luck na lang
sa mga nangabilin!"

KAHILOM

gihambin ko ikaw
sa akong dughan sama
sa usa ka tinood
nga hinigugma

ang akong baba nga
dunay pagkabastos
wala kaako ug pagtamas
tamas kanimo

aron ako nga hingpit 
wala ko gayog gilitok ang
imong ngalan.

tigmo nga giusob pagsulat apan mao ra gihapon ang tubag

sa kinailawman
sa maong balay daghang
mga batang itomon
ang nalubong
didto

gahi ang green nga atop
gisundan sa kisame nga
puti
dayon ang pula nga lawak
diing daghang mga batang
itomon ang gilubong
didto

damgo niadtong gabhiona

wala na kaantos
ang tubo sa kakusgon
sa tubig
maong naliso kini
dayog kaputol sa iyang
gikaw-itan

ang tubig misiplit
mituyok
milibotlibot sa maong
harden

sa katugnaw nanghilam-os
ang akong nawong
kitang duha nanimahong
taya.

bangaw

ang kahadlok nga
kon tudloon mo ang
bangaw
maputol kuno ang
imong tudlo wala nay
epekto kanato

alang lamang kana
sa mga bata
nga ilang hadlokon

kitang mga hamtong
hinoon
gimingaw na anang
bangaw nga
atong tudlotudloon. 

ligid

si jerry dili na
kahunat
tungod sa sakit
sa iyang kasingkasing.

maayong pagka-timing
sa iyang asawa nga
si Delilah
nga karon maayong
pagpanambok.

manan-aw silag sine
nakahilak si Jerry
samtang si Delilah
maayong 
paghinanok.

sa ilang suroy suroy
si Jerry ang mag-drive
sa ilang motorcycle
samtang si Delilah
nagpauraray sa iyang
abaga.

wala na ang hunat
apan ang ligid wala
ma-flat

ang nagpadaplin

sa sayaw sa
 kinabuhi
ang mapildi
 dili baya
pod ang uban nga
nagpadaplin.
lamang.

pag-inosara

ang  kaminyoon molungtad
diha sa pagkatulog dungan sa usa
ka higdaanan
bisag ang mga sampot na lamang
ang maghimamat

anad na ang tanan dinhing dapita
anang walay pagtinagdanay
ang katarungan mao nga daghan
pa kaayo kita ug atimanon nga bisag
unsaon dili gayod mahuman

kon ikaw na lamang usa sa balay
tungod kay ang imong mga kauban
atua na milakaw sa tag-sa tagsa ka mga
tuyo miabot ang panahon diha sa paglingkod
lamang lantaw sa gawas samtang
nagtuyatuya ka sa imong gilingkoran

nakita mo ang pagpanghulog sa mga dahon
ang paglabay sa mga abog
ang mga sanga nga hapit na mahutdan ug
mga dahon

sa imong kabahin samtang gisulayan mo
paghambin ang gamayng kalipay nga 
nahibilin nakahukom ka nga dili na mangilabot
sa bisag unsang silhigonon dinhing dapita.

hangtod karon gihunahuna pa gihapon nimo kon
asa na kaha ang kalay-on ang panaw sa mga abog
nga milabay sa imong tugkaran
ang kabugnaw sa hangin wala nay gahom sa
pagpukaw sa imong tingkoy.

pasalamat

sa mga butang nga dili unta
angay gihatag apan imong gihatag
sa mga buluhaton nga dili
unta angay buhaton apan atong
nabuhat
sa kamatayon nga unta miabot
na alang kanako apan wala kini
mahinayon tungod kanimo
sa bag-ong kinabuhi nga imong
gigasa kanako
sa pahiyom nga sayod ako nga
dili gayod molungtad.

kalipay

dugay nakong gipaabot
ang paggawas sa ulod
gikan sa iyang cocoon.

ang kalipay sa paglantaw
sa pagbukhad sa iyang 
duha ka pako
ug ang imong pagkayab
gikan kanako

gahom

ang gahom nga imong
gitulon
mitubo sulod sa
imong tiyan

midako pag-ayo
ang imong tiyan hangtod
miabot sa iyang
gimbuthan.

mga bakukang

pipila lamang ka pulong
ang migawas sa imong baba
samtang ang imong mga mata
ug mga kamot atua sa laing
bahin, sa laing lugar, 

misabot mi kanimo ikaw nga
nawala sa gamay lamang nga
kalibotan

sip-ot na ang atong kalibotan
init nga kahimtang, bugnaw nga
pagtagad busa mipahawa kami 
usab sa walay pagpananghid

pagkaugma nagpadala kami ug
pipila usab ka pulong pahinungod
sa imong pag-abi-abi nga 
napakatawa kanimo,

gisabot ka namo, sulod sa imong
dughan atua ang mga bakukang sa
kasuko nga nagpunay ug kutkot
sa imong kasingkasing.

aninipot

kagabii
nagapaila ila ako kaninyo
kay dili ko na
maantos ang
akong pagkapapas

gamay akong kahayag
sama sa usa lamang ka
aninipot

wala kamo masayod 
sa akong gihulugan ug
sa akong
gisak-an sa akong
gilupad
ug gikamang

duha ka kahayag
usa gikan sa tipal-o
apan ang akong
giingon kaninyo mao
ang gikan
sa aninipot nga mihunong
diha sa dahon 
sa kamatyonon na nga
kahoy.

transcending

dunay mga butang nga
atong ambakan
dili lamang ang mga
labat
o ang sapa, 

kon wala ako miambak
hayan wala na unta kitang
duha karon....

dili

dili mo mabuak ang
akong kahilom dinhi
sa ngitngit kong 
kagabhion bisan gani
kon magsugod na ug
hunghong ang mga
bitoon.

palad

nahulog ang
hinog nga bayabas
sa imong baba
samtang
natulog ka diha
sa higdaanan

ang higdaanan mismo
ang milatag sa habol
ug sa alugnan 
aron imo siyang
katulgan

walay walay sa hanoi

unta hanoy ang among
Hanoi karon

bag-ong lugar, laing
sunrise,

laing balay, layo sa
among balay

layo sa among mga
iro, layo sa among garden

bilin ang mga daang
sapatos ug ang bag-ong
baston

mao ra gihapong
dramaha ug sabon panglaba

nagpaabot sa 
deux ex machina sa pamasin

nga mausab ang tanan
dawat limpyo lang

walay hago walay bago
walay dugo.

kabahin sa akong gimugna

inig palayo nako gikan nimo
lahi ang akong makita
mas lahi ang akong
mahinumduman ug mabati

wala akoy katungod nga
masuko nimo
kay ako ang nagmugna kanimo

gikan ka sa kahoy
nahimo kang bato
ang akong kamot ug
ang akong tigib
nagkulit sa imong lawas

gipiyong ko ang akong mga
mata
gitagna-tagna kon basin
nahulma ba usab ang imong
kalag

gisukna ko ang akong kaugalingon
ako nga nabuhi ako nga nabanhaw
gikan sa kangitngit paingon sa kangitngit.

mapailobon

Inig hangad mo sa langit
sa panahon nga nawad-an ka na
ug pagtoo sa mga pultahan
makita mo ang daghaw sugilanon
sa mga porma niini

naglutaw ang mga amang nga
doldol kuyog sa gahaguros nga
hangin

ang langit dili subo sa kahayag
nga iyang gihulman sa adlaw 
giawit ang iyang kahaw-ang

inig duko mo sa yuta modawat
ka sa nahitabo kanimo
ang huyang mong mga kamot
nga mihawid sa lapok

gilantaw mo na karon ang imong
palibot nga nanghagad ug mga tubag
ug mga pasalig

ang mga ugma lahi baya
ang karon kuyog sa iyang mga takna
nagpabiling mapailobon

nagkulang lang gyod dagway ko

nagkulang lang
gyod ko
nganong wala nako
makita ang
mata sa dagom
ang kasingkasing
sa toyom
ang ikog sa tanod
nganong wala nako
mahikap ang
imong batikolon.

kabahin sa nagpunay ug away bahin sa katigayonan

sa monyeka pa
lang kaniadto sa
gagmay pa sila
nag-away nang
daan

kay lagi kuno
mas bawod ang pilok
sa iyaha 
kay lagi mas nindot
ang sapot sa
iyang monyeka
kaysa iyaha

si nanay nga
nagsakripisyo sa pagpalit
sa ilang duha ka
monyeka
gikapoy 
nakatulog sa lamesa
sa kilid sa
bongbong dapit sa
pantawan

x x x 

karon lahi na
ang ilang giawayan
kabahin na sa yuta
nga kabilin ni 
nanay ug ni
tatay

kay lagi naa sa suok
ang iyaha
kay lagi mas daghan
ug tanom ang
iyaha unya ang iyaha
batoon 
unya wala kaayoy
lubi

x x x

nagpakahilom lang
gihapon ako sama
ni nanay ug tatay
gikapoy kog pamati
apan dili ko matulog

x x x

unta magpatay ni
silang duha
aron ako ray mabilin
unya akoa na
ang tanan apil ang
ilang giawayan

sa tumang kahilom

makalipay baya hunahunaon
nga ania kita buhi pa gihapon

ania kita sa usa ka lamesa
nag-atubang sa makaon ug mainom

sa dihang gisugdan na ang
pakighinabi, nanggawas na ang
mga estorya

bahin nila, bahin sab nato, 
lamog ang kalipay ug kasubo

nabibo na kita sa atong ilimnon
ug mga sumsuman

nga mora bag wala nay utlanan
ang atong mga sugilanon

bahin nato, bahin nila, 
bahin sa kinabuhi ug sa 

kamatayon, dayon nahilom 
tag kadyot, morag mihalad ug

pangaleya niadtong wala na
dinhi: atong gikalimtan

o kaha nahimduman man
ugaling, apan gusto na gayod

natong hikalimtan, sa dayon,
sa tumang kahilom.

tubag sa balak sa tinagoan

mas gipangita nako
ang pagtaob sa dagat

bibo ang mga balod
igat na usab ang hangin

kadtong bildo nga dako
ug hait sa kasamtangan

wa koy kahadlok kay
wa koy makita.

sayop ka

human nimog
tug-an sa tinood

midalogdog ug
kusog ang langit

mibunok ang
dakong ulan 

nabuslot ang dakong
dag-om nga panganod

mibaha, mikusog
ang sulog

nangalisang ang
mga tawo

giawasan ang tulay
nadalahig ang mga balay

gikahig ang sakyanan
gilunod ang mga baroto

sayop ka, 
nganong mitug-an ka
man sa tinood?

tan-awa daghan ang
naangin

duna pa gani
namatay.

ato ato lang

gusto nako ang
atong kolokomedya

nakahugyaw kanato
nakapukaw sa kasubo

kining kolokomedya
nga gusto nakong 
matinood

unta kon mahimo 
ato ato na lang ning duha.

andes andes

ang andes andes
morag maingon ingon
sumala sa pulong
ni tatay nga giganahan
kaayo sa init nga sabaw
sa iyang panihapon 
samtang mibunok ang
ulan sa nauga nga 
kalibotan.

dagat

ang dagat usa
ka stripteaser

morag marilyn 
monroe nga siging
wagwag sa iyang
saya nga 
balod

abre, sira, abre,
unya wala bayay
panty.

ang kalipay sa mga hubo nga mga bata

nangalipay ang mga
bata nga hubo sa sitio
wakwak inig taob sa 
dagat 

nindot na usab nga 
isalom sa suba

tin-aw, lalom, unya
haw-as ang tanang hugaw
sa kusog nga sulog
daplin sa kanipaan.