ang walay bunga

tuod man
wala'y bunga

imong gibiay
biay

ang iyang gahom
wa ka masayod

mao ang iyang
mga gamot

nga dili mo
makita kay

kini gipangga
man sa yuta

 

 

sa tunaan sa kabaw

dugay pa

dugay ko pang
matun-an kon unsaon ko paglabay

ang dyamante
sa tunaan sa kabaw

atua pa kini sa singko
brazas

sa kaban ni tatay
apan hapit na

hapit ko na magakos ang
tinood kong ikalipay

ang paglabay sa
sa mga sining
kahan

kadtong dyamanting
makamatay ang
gilak

ugma
basin ugma

ilabay ko na gayod
sa tunaan sa
kabaw.

ang tulay ug ang dagat

 

sa hinay gihimo nato ang tulay

aron unta masumpay ang atong panaglagyo

gisulayan ta kini sa mga pangutana

daghan

sa pagpangita mo sa mga saktong tubag

sa hinay-hinay usab nangaputol ang mga kable

ug kadtong upat na unta ka mga haligi

diin nato ipakatay ang maong agianan

nangatumpag

unya ang dagat nga naghangad kanato

gisakitan sa pagsalo sa mga

nangahulog

apan bisan pa niini sama sa iyang naandang

gibuhat

nagpabilin siyang morag wala matandog

sa pagsapupo sa iyang

mga balod

unta

ulitawog dalaga
dinayganay

uyab-uyab suroy
suroy, hikap-hikap

brochang papait
torjak galore

kaminyoon
mga salapati,
bagting
bugas, basong buak,
taginting sa tinidor
sa baba sa basong
samin

pipila ka tuig
gapatongpatong
uban sa buhok
ug sa bungot
sakit sa likod ug
tuhod
doktor, tambal,
pahulay,

kagabhion, kaadlawon
gakos
gakos lang

kutob na lang diha
sangpit sangpit sa
Ginoo

unta, unta,
unta.

ning kamingaw usahay

wa ko nangitag kalipay
maoy akong ingon sa bongbong

wa ko nangitag kapuslanan
maoy tubag sa bongbong kanako

ang akong nakaplagan
mao man ang kahaw-ang

misagbat ang bintana
puno ako niana.

bagtok nga gamay ug alibangbang nga itom

alas tres sa kaadlawon
gipasiga ang suga aron
makita ang nawong sa
orasan,

alas tres gayod, maoy
pag-abot sa mga sugilanon
bisag unsa lang, ang uban
gani nalimtan na man

adunay nindot ang
pag-abot kabahin ni
danteng mibungat sa
prayer meeting kagahapon

mas ganahan siyang
mobasa sa satanic verses
kaysa bibliya

ug natuk-an si walter
pagkahuman niyag kumpisal
nga siya nangabit ug katulo
ug karon
nagbag-o, nagbasol, ug
nahiuli na sa balay
sa atong Ginoo.

si emma kadtong
naghubad sa " ang mga nahiuna
maulahi, ug ang maulahi
mao na man hinoon ang
nahiuna"

adunay panglantaw si
cesar nga sukwahi niini
nga sa pagpamati ni Cely
mas nahiahum na man hinoon
sa iyang gihagkan nga
kamatooran

gisuginlan lang ko kay
wala ako didto
niadtong panahona
naglantaw kos itom nga
alibangbang
nga nakasulod sa akong
lawak
samtang nagmugna ko
ug mga balak.

adunay gamayng bagtok
nga natulog sa hunos sa
akong gibutangan ug
libreto

sa usa ka higayon
nagtinutukay ming duha
nagkasinabot nga
way hilabtanay kon
unsay gustong
ginagmayng kalipay.

mas dako mas haw-ang

sa pagsulod mo
sugaton ka sa usa ka
banga
nga sudlanan unta sa
tubig
nga akong gibutang
sa kilid
sa pultahan

dako kini
ang iyang mga kauban
hagbay
rang nangabuak

ang iro nga itom
kanunayng namanghag
sa gawas
sa balay

ang mga kaila ug
dili kaila
gihimong managsama
way gipili
ang banghag
sa bugnaw nga kabuntagon

matingala ka
unsay bay kalabotan sa banga
sa kilid
sa pultahan ug sa iro
nga nagsigig pamanghag
sa gawas
sa pultahan?

kon namati ka pa lang
unta ug maayo
puros sila
namanghag

gani mas kusog pa
ang banga nga
walay sulod nga tubig

lantawa ra god ang
iyang baba
ug ang iyang tiyan
mas dako pa kana
kaysa
irong buang

alang sa mga uhong ug mga balilihan

ang mga tai sa mga kabaw
nagpasad sa balilihan

nga sa ka dakong hulaw
nangabuang sa ilang kauhaw

ang mga gagmayng  uhong
nga dili nato makaon

anaa nanagpatong sa gabasa pa
nga tai sa mga kanding

nanaghan, nagsupa sa duga
sa ilang mga wa kapugnging biga.

ang itom nga langgam nga nagsalag sa akong atop

adunay itomon nga langgam
nga pula ug ikog ug taas ug sungo
nga nagsalag sa kilid sa atop sa
akong balay

kon mosyagit ko mosyagit sab siya
bisag unsay akong isulti iyang awaton

usahay aron kunuhay
dili nako siya tawgon nga awatan
ang akong mga pulong
iyang balibalihon

sa akong kalagot akong gibuno ug bato
ug akong gikawat ang iyang salag
nga walay itlog

sa kaulahian gibati kog kalooy
samdan man diay ang iyang dughan
ug bali ang usa ka pako
maong dili na siya makalupad.

ang gugma sa kaugalingon

humot ang  baho
sa akong ilok

tam-is asgad pod
ang akong singot

kanunay gikamingawan ko
ang  baho sa akong purol

ang kugang sa akong samad
nga akong gitangtang

sa ibabaw sa akong palad
lami lang gihapon lantawon.

magdepende lang

naulahi ko sa misa
karong buntaga
kay sayo ra sab kaayong
nagsugod ang
paring itomon

tupad kanako ang
tambok nga lalaki
busa niwang kong
lantawon

layo ra sab ko kaayo
sa altar
busa gamay lang ko

ang simbahan hilom
sab kaayo busa ang
akong kahilom morag
saba ra kaayo.

mubo nga balak

sukda daw
sa imong ginhawa
kon
matugkad mo ba.

sa lasang

si tatay karpo, hilomon. Siya lang ang maglawog sa among baboy ug magtugway sa among kabayo, baka ug
kabaw nga walay tingog. Kabalo ang tanang silingan namo ana.

lahi baya ang hilomon, lalom ug dulot. Mopatay sab nga way tingog-tingog.
Mohapwag sab nga walay tingog. Mas madungog mo pa ang tunob sa mga hulmigas.
Mas madungog mo pa ang pagpaypay sa mga pako sa alibangbang, nunka ang tingog ni tatay.

ang kabilin ni lolo insong mao ang pusil nga hinatag sa hapon nga iyang gitagoan sa dihang nahibalik na
ang mga amerkano sa among lungsod. Gipatay ang tanang hapon, gawas lamang kang chiune.

matag adlaw, gitrapohan gayod ang maong pusil. Gipabuto sa bukid aron dili matay-an.
gihipos kini pag-ayo ni tatay karpo sud sa iyang lawak sa ilalom sa iyang higdaanan.
magabii panington siyag hagkot. Nadamgohan niya nga ang iyang pusil gikawat.

nawala gayod ang maong handomanan sa hapon, si mosoy ang gakawat. Giapas ni tatay ug nadakpan si mosoy apan ang pusil wala na kay kuno hagbay ra niyang gibaligya sa zamboanga.

gitikbas ni tatay si mosoy. walay nakakita, gawas nako. Gilubong kini ni tatay karpo sa dakong buho nga iyang gikalot sulod sa among balay didto sa bukid sa antulanga nga haskang haboga nga kon motindog ka ug iisa mo ang imong kamot, mahikapan mo na gayod ang aping sa langit.

gitamnan ni papa ug kawayan ang maong lubnganan.  walay nasayod niini, gawas nako nga maoy gibilinan ni
tatay sa iyang kasilag ni mosoy ngano nga ang kabilin sa hapon sa akong lolo iya mang gikawat ug wala gayod mauli.

milabay ang panahon. wala ko magminyo. Gidumtan ko sa mga sundalo. Miapil ko sa kalihokan sa mga pulag panyo sa kabukiran.

wala na ko masayod kon kinsa ko sa daghan nga among gipatay. Nagpasad sa suba, mga patayng lawas sa mga sundalo, mga bata, mga babaye, ug mga lalaki.

Misulod ako sa lasang, ug nawagtang.

kulitog kulitog, abot na ba?

katol ang akong dunggan.
akong gikulkog ug tukog.
sa tumoy mao ang gapas
nga akong gibasa sa lana
alang sa mga hiluanan.
gikulitog ko pag-ayo ang
akong dunggan. gituyok
tuyok nako ang tukog
sud sa akong dunggan.
palalom, palalom, ug sa
kalami, nangihat ang akong
mata, nikurog ang akong
liog, mikulo ang akong itlog.

lami ang katol katol nga
duhigan sa lana nga isog.
ang gapas, danlog, ang
dunggan lalom, unya nindot
ang kahilom nga madungog
mo sa pagkulitogkulitog.

naglamog ang katol, ang danlog,
ang hapdos, ang kurog, diha
sa pagsigig kulitog sa dunggan
nga lalom, ngitngit ug bawog.

ikaw nga nagbasa niini,
kabawo ko, mokulitog ka
sab sa imong katol diha sud
sa imong uga nga dunggan.

ania ang tukog, ang gapas ug
ang lana. Ayaw ug kaulaw.
Tawo lang ang makamao
kon unsa ang kulitog.

ang malditong bata nga mipatay sa tanang african daisies sa iyang inahan

adunay batang lalaki nga nangibot sa african daisies sa iyang mama.
dyes anyos pa lang siya, apan makamao na siya motudlo kon unsay gihigugma pag-ayo sa
iyang inahan.
ang mga african daisies. matag adlaw, african daisies lang gayod. Gihabukan, gibubuan
giabonohan sa iyang mama.
iya kining gilantaw sa bintana, diin ang iyang dulaan nga taraktarak nabuak na.
ang iyang kote, daghang talo. Ang goma sa iyang tirador, putol. Iyang gihipos ang iyang tamsi nga
nadakpan. Patay na kini ug iyang gitangtangan ug mga balhibo.

ganahan siyang moadto sa lungsod, aron mangita ug bag-ong dulaan. Sa dihang ilubong na ang iyang
uyoan nga si Miguel, didto kini sa lungsod ilubong, sa sementeryo alang sa mga naghikog.

Gustong mokuyog ang batang lalaki, apan dili ganahan ang iyang inahan nga kuyugon siya. Hasol ang
bata. Hinay kining molakaw, unya init kaayo ang adlaw.

ang batang lalaki walay nahimo. Mikagot ang iyang ngipon. ang iyang luha, mga gahing bato busa dili makagawas sa iyang mga mata.


namintana ang bata.Mikanaog sa balay. Ug mikatawang naglantaw sa african daisies. Gipang-ibot niya ang tanan. Gilatag sa kalsada, gipaligsan sa mga sakyanan nga nanglabay.

pag-abot sa iyang inahan, nga gikapoy sa iyang lakaw, ug namula ang mga mata kay miapil sa pag-iyak sa
kataposang panaw ni Miguel nga iyang igsoon, nataranta ang maong babaye kon asa na ang iyang african daisies.

ang nahibilin mao lamang ang yuta nga adunay lama sa tunob sa maong bata. Gipangita niya ang maong bata aron iyang bunalan. Aron kini makakat-on.

Apan wala na ang maong bata. Nahitabo kini niadtong buwan sa Marso, petsa trese, sa tuig mil nyube sintos setentay sais.

mangutana unta ko ko kon nakakita na ba kamo niining bataa?

alang sa gugma

unsa kaha kalay-a ang maabot ning samin
nga nagtangag sa akong pahiyom?

mas maayo segurong akong buk-on kining
samina aron managhan sab ang akong pahiyom

unya ako kining iisa sa adlaw karong udto aron
kining tanan kong pahiyom nga wa nimo makita

mahiabot ra gayod kanimo bisag silang nalooy
kanako dili moingon nga ikaw hagbay rang gipatay.

dulom

sa layo pa ang bagang dag-om
batia pag-ayo kon unsa ang dulom

sama sa usa ka dulom nga kaugmaon
sa wala ka human

unya samtang gamaneho ka sa imong sakyanan
paingon sa dulom

giseguro mo nga serado ang tanang mga bintana
unya mopadayon ka

silong sa kusog kaayo nga ulan unya sama sa imong
sakyanan

bisag unsa kabugnaw sa gawas bisag unsa ka kusog ang hangin
ug ulan
bisag unsa ka daghan sa dahon nga mangahulog ug sanga nga
mangabali sa mga kahoy sa kilid sa bungtod
ug daplin sa imong agianan

wa ka nay bation.

kaminyoon

ingon si Tibor gikan na siya diha
kita niya ang bukog sa diwit ang ikog sa pagi
og nasimhotan na niya ang patayng bagtok nga wa makit-i sa
upat ka adlaw

ingon siya gahikog daw siya
 wa niya damha
ug dugang pa niya ang bag-ong mosulod mahimong gyong
kataw-anan sa mga nanggawas

ako, dia pa sa sulod
nanglampaso sa sapnot nga salog.

ang atubangan

ang atubangan sa iyang nawong
usa ka taas nga pahiyom

nga sa kainit sa gawas misulod
sa ilang balay ngadto sa iyang

lawak nga ngitngit gamay ug
pagkahumag panirado sa pultahan

ug bintanang gabandiwag sa
daghang katawhang nanglabay

humag lingi sa wala ug sa too
gialsa ang sayal paingon sa iyang

mga mata ug dayog bakho
durong pabaha sa iyang morag

lusok sa mais nga mga luha.

ang kasubo sa uban

sa tinood lang di kaayo ko kasulat
kabahin sa kasubo sa ubang sipat

basin kaha og ang akong kasubo
mora rag kumingking ka mubo

wala pa diri kanako ang gahom
aron matugkad ang ilang kalawom

'king akong dughan nga nagpalutaw-lutaw
morag dakong kabaw sa tunaang mabaw

si Antonio

mahimong tuhuan ko ikaw nga undangan ko na ang pagtagik ug mga balak
kabahin sa gugma ug
(ahh di gyod ka kuno ganahan)
kaulag, pirmi ko nimong ginganglag bigatlon,
kuragan,
(morag gikan ni nimo) palautog,

karong buntaga nahinumduman ko unta kadtong nanglakaw mi sa akong bag-on naila-ila
dapit sa junquera,
gahiwaray mig kamot, wa mi gadali, gainom-inom pa mig san mig lite sa kilid sa
Pension house, disir mi misulod ug didto nagpalabay sa kabugnaw
sa kagabhion,
apan, giputol ko kining maong sugilanon nga ug ikaw pa
dili na angayan nga ipanugilon

busa karon, mitindog ko, mibalhin ug lingkod sa likod sa among balay
diin makita ko ang balay sa among silingan
(kay habog man lagi ang among balay ug usa ka undana)
nga dugay ng panahon nga wa magmalipayon
kay gibiyaan na lagi ug asawa kay ang baba pagkawitwitan
labaw pas babayeng nalapsan

sa ilang away, nadungog pa gani nako:  

kaligo pod didto oi,
nanimaho ka nang kanding,

di ko ganahang maligo, kon ganahan kag bag-ong ligo, pahawa dinhi
ug pangita og bag-ong ligo

ug intawon namutos ang asawa
balik sa balay sa iyang mama didto
sa ilaha

karon nakita ko si Antonio nga naglung-ag sa iyang kusina
nag-aso, morag nangamoyo sa langit nga unta mobalik na ang iyang
batan-ong asawa

morag nalooy ko gamay
sa usa ka tawong
gilayasa'g kalipay

sa laing bahin, naglibog ko kon unsa kanang morag mga dahon nga
nagpasad sa among sin nga atop,
 duol sa balay ni antonio,
akong gipunit,

susko! pagkadaghan sa gamit na nga mga
condom
ginoo ko!

pwerte gyod nis antonio,
 human ug pangulag
ang iyang mga basura sa among atop
man manglupad.

alang sa usa ka bata nga buta nga miawit

masayran mo na unta
nga ang paghikap mao ang pagbasa ug mao usab kini ang pagkanta
sa usa ka awit nga unta dili mo talikdan ang
dili kakita sa imong gitulisok nga
kalibotan

sumo

mas maayo na lang tong ila,
bulad sa buntag, ginamos sa udto,
asin sa gabii,
sa tanang hugna, puros
kamote, sahay
kamoteng kahoy, sahay
kanaka, sahay
kamoteng bagon.

daghan sila sa talad kan-anan
lima ka anak, inahan nga nagpasuso
sa kamanghoran,
kamagwangang sayo pa kaayong
gipaangkan
himabdos sa amahan ug
ang amahan
nga walay klarong
trabaho nga mahimong panday,
mananagat, mananggiti,
mamunglayay,
ug uban pa

kita tuod, gisumhan sab
dili niadtong mga butanga
og pagkaona, o pagkalaay
sa walay klarong buhaton

ang ilang mga kakulangon
og kapobrehoon
matambalan ra gyod og
kwarta

kining ato lahi,
wa pay tambal nga
makaayo

kining akong kasumo
wa pa mahibaw-i
gayod kon unsa ug ngano.

ang arte ni sammy

lahi ang
art ni sammy
kay ang lawas ni
kristo
iyang gibutangan ug
dako kaayong
O
sa tunga-tunga sa
iyang duha ka
paa nga
puno sa bun-og
ug samad

gikan sa ulo
hangtod sa dughan
hangtod sa dakong
O
midagayday
ang daghang
dugo

gibutang kini
niya sa kilid sa iyang
pultahan
paingon sa iyang
balay

ug kutob sa bisitang
mosulod
mababaye man o
lalaki
makapanlad-ok
gayod

basin kaha
sa kalood?

o basin kaha
sa kapungot?

pagklaro

pagklaro, ayoha,

kon imo kong hikapon
pagtarong, ug kon dunay
duha-duha, ayaw na lang
kay basig inig hikap nimo
ug unya
mahinaykan ko,
unya, mabag-ohan ka,
mokurog ka, ug
mokurog sab ko,
basig, pareho tang
mangabuak, nga morag
basong
nagpasad diha sa
sementadong salog.

LUPAD, ang pung ni nanay sa dihang nag-away ming tatay

paabota ang panahon
nga ang imong panit makamao nang
magpadaghan ug balahibo
sama sa tamsing gikan sa iyang
pagkapispis
katulog lang sa
palabya ang hangin diha sa imong
mga damgo
kon moabot na ang kabuntagon
ug kon pagkikap  mo sa imong kilid
nga aduna ka nay pako
himoa ang angay sa mga langgam
o dili ba kaha sa mga
anghel

hala, lupad!

pagpaabot sa paglarga sa bus gikan sa zamboanga paingon sa dipolog

kita nga
dayo,

o mga estranghero
nga karon
nagsakay sa bus

paingon sa way
kasiguroan nga
dapit

kadtong gitawag natong
mga damgo

o mga pangandoy
nga kasagaran wa gyod
matuman

o natinood
nagsultianay sud sa bus
samtang nagpaabot
sa paglarga niini

palabay lang sa panahon
ang tanan

kitang tanan
wa nay gituhuan

dunay mga pulong
misulod sa bintana
ato lang
gitan-aw

nagpunay ug panugilon
ang dili pa kaayo tigulang nga
babaye
bahin sa iyang bana nga
iyang gibulagan
dala ang usa ka bag nga
puno sa iyang
sinina

sa tinood lang
way ganahang mamati

sa dihang milarga na
ang bus
naluag ang dughan
sa preskong hangin
nga misugat
sa tanang aping

dinhing dapita

giputol nila
ang kinadak-an ug
kinaraanan nga
kahoy

gihimong sakayan
dayon nilag
kawala

adunay mitubo
tupad sa kahoy nga
giputol

adunay bata nga
naglantaw ug iya kining
gihabokan

gipaabot ang panahon
kay siya na usab ang gustong
mawagtang

ang tawong way kibir sa rooftop

sa rooftop
lingkod sa bangko nga
panapton
gipaabot ang pagsubang
sa adlaw
ning sayong kabuntagon

higop sa kape
hinay hinay
unya ang iyang tiil
gitilapan sa iyang irong
puti nga podol

sa silong sa maong
habog nga building
baga ang katawhang
busy kaayog
hakop sa ilang daghan
sab kaayong
mga sayop.

kaligutgot sa kalibotan

oo, wa ko nasayop sa pagpili
anang
paglaum, kadtong imong
giingon nga,

salig lang
apan ayaw ug laum

lalom sab to, ug agi sa
kalalom

ako na lang gilantaw ang
kaitom sa tubig

kay kon akong tugkaron
basin ug

magkatawa ka nganong
ania na usab

ang laing ugok nagpakamatay
aron tagaan ug mas

lapad nga luna ang mga
mipili sa

walay babil  ug walay
labad nga

luna ning atong kaligutgot
sa kalibotan

sa pakighilawas ko sa akong mga balak

matag gabii
dako kaayo ang akong sala
sa mata sa Dios ug sa mga tawo
nga ikaw nga
akong giingon nga minahal ug
gisaaran nga akong
mahalon hangtod sa akong kamatayon
gipasagdan lamang
nga natulog nga nag-inosara sa atong
salag sa kaminyoon

nakatulog ka na
sa pagpaabot kanako
ug kon modulog na ako kanimo
ang imong hagok sa pagmahay
mao na man lamang
ang akong
mabati

dako ang akong sala
sa pagbudhi kanimo
tungod ug alang lamang
sa pakighilawas ko
sa akong
mga balak

pa-class

puhon kon magkita ta
sa eskinita sa usa ka kan-anan
sa Bankerohan

( dependa lang
sa atong time, ug sa atong
pagpa class kunuhay
sama sa lobby sa
marco polo kaha

tagay sa sanmig pale
or a glass of red wine
sa Pearl Farm)

or sa usa ka botelyang
Red Horse
bisan gani ug wa nay pulutan
nga

beer steak or
chicken barbecue
or chiz curls lang
kaha

magbinalakay tang duha

impromptu

share nato ang mga kahigwaos
sa atong
mga kinabuhi

kay morag
sa akong panahon karon

i do not know how to live
life anymore.

ang pispis mong pulong

sa paglitok mo sa pulong
tungod sa akong pagduda nga basin
ug dili kini tinood
akong gikutlo sa hangin
gikan sa sanga sa imong dila
ug akong gihawiran pag-ayo
nga morag pispis

dili kaayo hugot ug dili sad kaayo
luag
igo-igo lang
aron kini makapiyok ug
makatawag ug tabang
aron kini makanganga
ug akong lawgan.

ang tinubdan sa balak

ang tinubdan
sa balak mao ang
atong
pakigharong

pakigsulti sa
pipila ka gutlo lamang

mahimo kining
molambo
sama sa tanom nga
mokamang

mokatkat
kay gustong awaton
ang kahoy

mamulak kay awaton
ang bulan
diha sa aping sa
kawanangan

ang tinubdan sa balak
mao
ako ug ikaw
diha sa atong
mga panalagsang
sugilanon

balak sa gugmang kurat

aron maako
ka akong kang imnon
morag sabaw ka sa
akong butong

aron maangkon
ta ka
ako kang kan-on
bisan ug ila pa kong
kahadlokan
sa akong pagkaon
ug unod nga sama
sab sa akong
unod

dili ka nako
iihi
dili sab ka nako
ikalibang

ako kang
pakamatyan

pagpangabri

kon ablihon mo ang usa
ka pultahan
moabli na usab ang
laing pultahan
sa atubangan

manirado kanunay
ang likod
ug kon imong balikan
magmug-ot
dili motingog

maong magpunay ka
na lang gayod ug
pangabli
ug ang pultahan managhan

mugna lang kining
tanan
sa mga handurawan

pagpuyo, pangisog,
pakigbisog
supaki, litki,
sikari, sunuga ang
mga gabok nga
kahoy
buk-a ang mga
tig-a
ug lumpinga ang
mga bisagra

kon abton ka na sa
kakapoy
ipiyong ang imong mga
mata

sa damgo mangabli
na usab ang laing
mga pultahan

ablihi.

wagas

ug miingon kanako ang
Tingog

"gisilotan ko ikaw sa
pagsulat
ug dili mo kini mabuhat
mamatay ka"

"ang magbasa nimo
mahimong mga adik-adik
walay busganan
ang ilang pagyupyop"

"magpabiling
walay tumong ang
inyong mga kinabuhi
mora kamog
mga patayng dahon
diha sa lilo
sa kusog nga
hangin"

gipaabot ko ang
paghuman sa
silot

samtang ginantang
ang akong mga
tudlo
gipasagdan

sila ang akong
manluluwas
kon makawiris-wiris
wagas.

hubag nga walay buthanan

adunay hubag nga walay
buthanan
sa akong kalag nga bisag
unsaon nakog
kumot di gyod matandog

ang iyang kangutngot lapos
sa bukog sa akong
lawas

ang unod naanad
ang kasakit pamahaw paniudto
ug panihapon

kalooy ba sab

sa iyang ika bentesingkong
adlawan
gipili niya ang pag-inosara
kuno

sakay sa cebu pacific
pacebu, posing sa stewardess
nga hamis ug aping ug gamayg
mata,

iyang gihandom nga unta
uyab silang duha

ngano ba? panahon na gayod
sa engkwentro
diha sa pagtugkad nga bisan
sa kaharuhay
magsubo lang gihapon ang
dughan

walay ulo nga midap-ig
sa mga bukton
ug mga kamot nga
 walay buhok nga hapohapon