si Rose

ok kaayo si rose
kamaong motikbas
sa hangin
mosuntok sa buwan
maghimong
mga ilhanan
sa kasubaan

ok kaayo si rose
wala
mag-ilusyon
wala
mag-ambat
anang mga
nahimong
pakyas

ok kaayo si rose
walay address
walay balay

misalom siya sa
lawod
og hangtod karon
wala pa'y
tunga-tunga

itok

gihandom mo ang wala pa moabot
og silang tanan nangagubot

og sa dihang miabot na ang imong gipaabot
milingi ka sa layo
mihangad sa langit
og milingo-lingo
miiyak og misyagit og
miyaka sa yuta

lain na sab ang imong gusto.

porbida!
spoiled kang bataa ka!

huez de paz

gitimbang-timbang niya ang
ebedensya

og siya mipiyong
kay ang hustisya man god kaha
buta

apan sud sa ilalom sa iyang utok
gihunahuna niya ang
hulagway sa iyang
mga amigo og paryente og mga
hinigugma

bilanggotanan!

balaod sa tawo

ang mosabod
bulbog

ang makubit
diwit-diwit

ang mapukot
mao lang ang
mga palotpot

ila-ilaha ang
tag-iya sa
bangka

gibuhat man god kini
para lang
sa mga dato og
gamhanan

kadtong purdoy
og hoy-poloy


maoy makalolooy!

galot (tikalon)

akong gihandom og balik
ang akong mga pangandoy

daghan
dunay kabahin sa pagpadaghan sa
akong kwarta
og lahi pa kadtong
pagpadaghanay
og mga uyab
palami sa balay
og sakyanan

og busa ako
nag-antos, nagdaginot,
(miswapang)
miwais
nanisdis


og ang akong mga pangandoy
nangatuman

ulahi na ang tanan sa dihang
akong naamgohan
nga gamay ra diay kaayo ang
akong kinahanglan

hangin, tubig, alugnan
atop
bugas ra og sud-an

og gamay ra usab
nga kasaligang
mga higala

karon unsaon ko na man
lang ang sobra?

ang iyang Lola Pacita

bantog ra nga siya arte
og estrikta
dili mangambat sa mga pobre
og delikada

kay diay ang iyang
kagikan
mga mayomokmok man diay usab
sa katilingban

gikasilagan niya ang iyang kaugalingon
ang iyang gamot
iyang gipugos og lubong sa
dagkong kabatoan aron dili na unta
nato makita

apan ang kamatooran kamaong mogimaw
diha sa iyang mga dahon
og bunga

pait ang iyang mga dahon
og ang iyang mga bunga pagka-aslom

ang iyang mga gamot minggimaw
sa kataposan
morag mga ulod morag mga bitin

ang akong gibuhat mao ra usab ang inyong gibuhat

usa ka gabii
dili ka makatulog
og ikaw
usa ka
lalaki

gil-as ang imong
lawas
nanginit og
mikuot ka sa ilalom
sa imong
karsones

katol kaayo
gahi.

naunsa ba kadtong bataa?
malipayong miambak sa
suba og milangoy kuyog sa sulog
naunsa kaha kadto siya?
nagsakay-sakay sa gakit
nga punoan sa saging
namasol sa mga lam-aw
naligo kuyog sa mga kabaw
nagpadahilos sa danlog nga
mga bungtod
nagtampisaw sa ulan
og nagdagandagan
sa ilalom sa mga kakahoyan-
naunsa na kaha kadtong bataa?

nakalimtan ko na kaha nga kadtong
bataa og ako mao ra?
naunsa na kaha kining tawhana?
gimingaw man sa iyang pagkabata

ang kalipay hagbay rang nawala.

gugmang guba

ang nakaparat aning gugmang
naguba
kay wala'y makitang gisi
apang mabati ang
ngutngot

wala man pod unta'y makitang
dugo nga miagas
apan mabati nga ang
kasingkasing
nasamdan

hangin

wala'y tinaguan ang hangin
hayag kini'g wala'y gihambi'ng kahadlok
kay ang baho man o ang kahumot
andam kini niyang ipasimhot

trianggulo

lingi'ng kalibutan
kwadrado'ng kasing kasing
managlahi'ng kasinatian

kabag-uhan

sa akong pagpaabot kanimo
sa pipila ka gabii

nga wala ka moabot
sumala sa atong sabot

nahikatulog ko tupad sa
nauga kong mga luha

mihukom ko sama sa
pagsubang sa kataposang adlaw

sa akong pagpasakit
og usa ka adlaw niana nahigmata ako

og akong gikuha ang pipila ko ka mga butang
akong gipas-an og ako milalin

wala na ako maghandom pa
sa imong pag-abot kay ang tanang butang

og panghitabo aduna usab kini silay kinutuban
sama sa mga mata nga nangatulog

sila usab mangmata og usahay ang kasakit
ilang ilubong diha sa bonbon sa kalimot

aron magsugod na usab sa usa ka bag-ong
pagtubo, pag-usbong sa kinabuhi

diha ang wala nato mahiapsi
ang bag-ong awit sa mga tamsi

Duha Ka Buok

usahay ang ilang isulti lahi

usahay ang ilang isulti lahi
kay sa ilang buhaton

mao kana ang imong bantayan
ayaw og too dayon

kon moingon sila nga ang
adlaw mosiga
pangita og payong
og moingon sila nga moulan
og walay hunong-hunong
ayaw paghandom anang
arka ni Noah

iigmat lang ang imong mga mata
og ang imong mga kamot
kon unsa ang miabot
hawid
kon unsa ang mawala
ayaw og handoma

ang imong mga tiil
itunob pag-ayo sa yuta
ayaw diha sa mga panganod
og kon tubig ang imong
gipuy-an
pagtoon na lang nga
mahimo kang isda

misud ko's pultahan

misud ko's pultahan
apan ang ilang gitawag lahi man nga ngalan
ako untang isulti ang tinood
apan dili kana ang ilang gipangayo
dunay gibunalan didto
og nagpasad ang dugo
dunay gipatay
dunay hapit na mamatay
og busa ako
nga natalaw kay gusto
pang motilaw
kon unsa ang kinabuhi
nagsakaysakay na lamang
kon unsa ang ilang gustong
madungog
mao ang akong itingog
og unsa ang ilang gustong makita
mao ang akong ipasundayag

ingon ani diay dinhi
dunay magmando
og ako nga gustong
malipay
nagpasuraysuray

nagtindog-tindog

nagtindog-tindog
dayon milakaw kadyot
dayon og balik
sa iyang gitindogan
nagtan-aw tan-aw sa
mga nanglabay
og kon magtagbo ang
inyong mga tinan-awan
dili molihay
motutok og balos
og bisan og walay tingog
makita nimo ang iyang
mga hangyo nga
unta
mopalit ka sa iyang
baligya

ang iyang unod.

gidagat

gidagat ang akong mga damgo
nagsuka
sa salog sa gamay nga barko
nga ilang gisakyan

nanimaho ang ilang mga suka
og ang akong tupad
nakaingon
nga niining dagkong balod
sa hagit sa kapalaran

ang mga damgo wala'y pulos
mitubag ko

kon wala na ang mga damgo
wala ang barko
wala ang mga balod
og wala na usab siya

ang dagat ug ang mananagat

Didtong lugara
morag giam-am
ang matag gutling
samtang nagsukod
og dagayday
ang agay sa tubig.

Wala ko kalimot
giunsa pagtakos
ang palibot.

Gisampit mo
ang ngalan ko.

Gianod ang palibot,
gipahuwam sa yuta ang bas.

Gianod pod og apil
ang akong ngalan.

Sagdi lang, kay bisan
kaning lugara
gibadlisan sa kadagatan.
Di ko magpabilin
sa baybayon.

Managat ko.

Pangitaon nako
ang mga titik ug silaba
nga gisampit mo.

Bisan unsa pa
ang ilang kilawmon.
Ug bisan pa mokirig
ang akong mga tudlo
sa kabugnaw sa balud.

Ug bisan pa,
ikaw ang dagat
ug ako ang mananagat.

atong kapalaran

nagsugilon ka kanako
nagmahay maka-usa sa imong kaugalingon
nakapangutana nganong karon pa naabot ang mga tawo
nga andam mubuhis sa ilang mga kaugalingon

ug nganong kaniadto nga nangita ikaw kanila
naghulat sa ilang pagpugong sa imong paglangyaw
apan sa unsang rason
walay nihawid
ug bisan man lang sa pagpatim-aw

pagkasakit ba sa dula sa kapalaran

apan ingnon ko ikaw
dili lang ikaw ang may pangutana
dili lang ikaw ang adunay samang kasinatian
daghan kita, kay usa na akong nangutana sa kahitas-an
nganong karon ka lang naabot sa akong pantalan
nganong karon, nga nakalarga na
ang akong barutong gisakyan

ang patulon sa imong gugma

kamatuoran ang gugma
usahay sakit,
makalipong ang hagit

usahay ang tinuod lisod tunlon
tungod sa bulok niining paet

apan dili mahitabong muatras
gusto gihapon kini
bisan sakit ang pagpikas

labi na kung ikaw
ang anaa dinha
nagpatampi,
nagpa-antaw,
nagpadistansya

kanunay'ng nag-uban
bisan sa kahilom
sa akong kangitngit
ug sa pag-agay sa mga luha

paglakaw sa dalan sa gugma

maglakaw sa dalan nga tul-id
sementado, aspaltado apan danlog

maghinay hinay sa mga lakang
ipahimutang ang pagsulti sa kamatuoran

kay masakit ang madakdak
mahimong mabun-og ang imong dughan

mga pangos ang imong pagsalig
ug mauwat ang gugma sa walay pagbalik
sa kanhi hitsura niini ug dagway

ang tiil sa usa ka saop
walay hugas
wala pa niya gitaktak
ang iyang mga pagmahay
ang abog sa kalisod
ang mga hugaw sa
walay katarungan
nagpabilin sa iyang
lapa-lapa
gitan-aw
gitutukan niya ang
tanan
miduko siya
hangtod sa kahangtoran
wala na siya mangita
sa mga bintana
kay wala na ang kahayag
wala na niya pangitaa
ang pultahan
paingon sa iyang kagawasan
walay pulos ang iyang paninguha
buta bungol buktot piang
ang iya untang gisaligan

sa mindanao

kon nagtoo ka nga ang lamano sa mga kamot
mao'y mitapos sa tanang kasamok
dinhing lugara,

sayop ka

sumala sa pagbakho sa nanglabay nga panahon
ang lamano mao lamang ang pagpahulay
pagbabugnaw sa gabaga nga kasilag

pagkahuman sa usa og katloan ka adlaw
sugdan na usab ang naandan
gubat diri, patay didto, wala na gani
ang paghunahuna og paglubong sa mga naangin
kay dinhing dapita
wala'y lubnganan ang kasilag og ang
pagdumot kanunay nga nangudlot

ang mga tiil sa awit
miramparampa
nagtunobtunob
sa akong mga damgo

bug-at kaayong gidawat
sa mga kamot sa
akong kasingkasing
ang pagbakho
sa mga mata sa awit
nangahulog ang mga lusok
sa luha
og sa kaasgad nga misubay
sa aping og misulod sa
baba sa akong atay
natastas ang ngabil
nangatarog ang mga ngipon
og dayog kahulog sa
nangliki nga salog sa akong
lawas

lahi ang milutaw nga kaanyag
sa mga bulak
sa dihang nakita ko sila
nga giayog bulhot sa hangin

sa hapit na gayod
mangapalid ang ilang
mga gihay

menos na ang kalipay
sa akong dughan

Alang sa Akong Regla

Ningkupos ang akong mga tudlo sa imong pagtuktok.
Sa pagkakaron, giam-aman nako akong kaugalingon.
Kalit gidat-ogan ko nimo og mga pulang gihay nga nanusok.
Gipadayon ko ikaw, gisabot nako ang imong pagdayon.
Gipabuswak ko ang mga buwak ilawom sa akong pusod.
Dayon, adunay nanurok nga puwa sa akong dagway.
Pagkakatol apan tak-om ko sa imong pagbagnod
Sa gabadlis nga kahapdos sa akong kaunoran. Naukay,
Nakubkob ang akong tagoangkan sa imong pag-ungad
Hangtod ningkulikot ang akong lawas sa imong hapuhap.
Pasagdan ko ikaw kay basin wala lang ko naanad.
Hinaot sa kangutngot adunay kaisog kanako motaklap.

Ug sa imong pagbalik, ipiyong ko daan ang akong mata.
Maminaw ko, magtimaan ug mangandam ning taknaa.

dugo sa among dugo

unsay sayop namong nahimo
unsay among mga pagkuwang
nga mga tambag namo kanimo
gipangsalikway mo man lang

sayod ka man unta
ikaw gimahal ug gipangga
inampingan kanunayng inatiman
bugtong tinguha kaayohan mo lang

dugo ka sa among dugo
unod sa among unod
bunga ka sa among gugma
bulawan sa among mga mata

Timan-i kini kanunay
di ka gyod namo isalikway
bisan unsa pa may dangatan
ikaw among anak kami imong ginikanan

pagpanghimakak

wa ko mahigugma
(akong gihunghong
kana sa akong kasingkasing)
kapoy na ang mahigugma
mas molabad ang akong ulo
kay sa malipay ko
og busa akong gibalikbalik og silsil
sa akong utok
nga wala ako mahigugma kanimo
gipatik nga morag
lalik sa kahoy
nga yakal

wala ko magduka karong gabhiona
og sa dihang mi-ring ang akong cellfone
akong gitubag dayon
imong call gikan sa London
kadyot lang
pangumusta ang usual nga
regards
walay kalainan

pagkahuman akong gibutang ang cell phone
tupad sa akong alugnan
naghinuktok ko
namalandong nangitag mga kahulugan
sa hamubo kaayong higayon
nga kita nagsinukliay sa
pulong

wala na ako mahigugma kanimo
akong gibalikbalik kana sa akong utok og kasingkasing

(sakit ipanghimakak ang
dili tinood)

kinahanglan nga makatulog na ako karong gabhiona
gusto ko pa gihapon

(nga makita ko ikaw og
mahagkan sud sa akong mga damgo)

(kabakakon sa akong baba,
lahi ang dila sa diwa sa akong kasingkasing)

Sa Ngalan sa Inahan

Palihog tuploka ang imahe aron mabasa og klaro...salamat

sa pagkamatay ni nanay

didto ko sa iyang kilid
samtang siya
nangayam og dagkong
gininhawa

nalooy kong nagtan-aw
sa iyang mga mata
nga gilawa-lawaan na
mihunghong siya
nga kapoy na kaayo ang
iyang lawas og gusto
na niyang mopahulay
sa dayon

akong gihawiran ang iyang
mga kamot
og ako siyang giingnan
nga wad-on na ang kabalaka
kay sa iyang padulngan
aduna na'y anghel
nga nagpaabot kaniya
sa sakayan nga
mohatod kaniya sa pikas
tampi

gihisgotan ko ang lawak sa paraiso
nga giandam alang kaniya
ang laing kalibotan nga mas
nindot pa dinhi
ang hingpit nga kalipay
og himaya didto
sumala sa atong pagtoo

hugot akong migakos kaniya
og ako miingon
"Nay, maayong pagpanaw"

mipiyong ang iyang mga mata
og nagpabilin siya
sa usa ka gamay kaayo
nga pahiyom
nga dili ko gayod
hikalimtan
sayod ako nga siya
wala na magmasulub-on

ang inahan

sama sa usa ka inaan
ang tanang mga piso
gihipos niya sud sa iyang mga pako
sa dihang ang
ngiwngiw
naglupad lupad sa mga panganod
aron kitaon
ang iyang tukbon

sama sa usa ka isda
nga dako og baba
gihipos niya ang iyang mga
gagmay
sa kilid sa iyang ngipon
sud sa iyang
alingagngag

sama sa tanga
ang iyang mga gagmayng liwat
iyang gipas-an sa
iyang likod
aron kini silang tanan
dili mangawala

mao usab kana ang atong mga inahan
og kitang masupilon nga nahisalaag
wala gayod niya undangi
og pangita
hangtod kita iyang
makaplagan

og samtang siya naghawid
sa atong mga kamot
ang iyang mga mata
miawit sa usa
ka pasalamat

kita lang duha mama

unsaon ko man paghikalimot
nimo nga ako ra man ang imong dalhon
sa Lenie's aron mangaon kita og
halo-halo
og dagko kaayong torta?

kadtong imong gipalit kanako
nga spartan shoes
dugay kaayong naguba

imong giaway si papa sa dihang
misupak siya nga panahon na nga ako
magsakay-sakay na sa akong
kaugalingong biseklita

midako gayod ang imong utang sa insik
sa dihang nagpursigi ka
nga kaming tanan
mag-eskwela sa sikat nga
tulunghaan

ikaw ang nakig-ila-ila sa akong
unang uyab
ikaw ang misalig kanako
bisan og sila nagduda na
sa akong kasipat

kitang duha ang naghipos sa atong
daghang mga tinagoan
kita lang duha
Mama

dili na kinahanglan nga ako magpakaisog

wala ko na kinahanglana nga ako isog nga tan-awon
nianang dayan-dayan sa mga pagbati
sama sa arios nga bulawan nga naghatag og
usa ka bitoon sa imong dunggan
ang naa sa ilalom sa akong dughan
mao lamang ang adlaw
nga mosanag alang kanako

ako lang ang nasayod niini
ako lang ang magbitbit niini
sama sa usa ka sako nga mga dagkong bato
ang akong abaga
wala na'y reklamo
ang akong lawas wala na'y gibati nga kahago
og kon ugaling aduna man ako'y kalag
tinood seguro nga kini mas gaan pa sa hangin
wala na nako mabati
ang iyang mga pagkampay sa iyang mga pako
sa dihang siya milupad og mibatog
sa dahon sa sibuyas

sa kadugay na nga pagbansay-bansay

dugay na ang pagbansay-bansay
sa akong mga pagbati nianang
kataposan

ang mga luha miagas na og ang
pagkurog sa mga unod nahuman na
ang mga bukog nahiapil niadtong linog
nga makabungog

nadungog nako ang mga kampana
sa iyang pagbagting
dili alang sa usa ka kasal

nagpaabot lang ako gihapon
apan lahi na ang pagkakaron
andam na ang tanan
sama sa angayan nakong isul-ob
og sa lugar nga akong pagaadtoon
wala ko na batia ang mga kahadlok og kabalaka
og kinsa kadtong mohatod unya kanako
dili na kinahanglan nga sila masayod
kon masangit man
wala na ako'y labot.

nakita ko ang usa ka lingkoranan
nga naghambin sa mga bulak
ang iyang mga kamot
migakos sa maong kaanyag

pagkaanindot gayod nga lantawon
ang akong mga mata nagmalipayon

kamong mga bulak nga maanyag
mamahimo bang ako kamong gakson
og sama sa mga pungpong ako kamong hugpongon?

pagkaanindot gayod kahang tugkaron
ako kining bation og inyo akong lantawon
inyo akong lingkoran og ako kamong hagkan-hagkan

nganong nasuko ka man hinoon kanako?

Sa lila nga bulak sa kanding-kanding
didto sa omahan sa akong amahan
mikapyot ang usa ka itom nga alibangbang

Mihunong kini morag natulog
sa tumang kakapoy kaha?
O sa hilabihang gibating himaya?

Kahinumdum noon ko nimo da
Ikaw ang bulak og ako ang itomon nga alibangbang
Nga mikapyot, nahikatulog sa tungatunga
Sa imong dughan.

SA mga asul nga dagat
og mga puting gapas nga mga panganod
sa mga lunhaw nga mga bukid
sa mga puti nga paa sa baybayon
sa mga anino sa mga dahon sa lubi nga nanayaw nga malipayon

WALA gihapo'y makalabaw sa akong gibating kalipay
diha tupad kanimo

SA daplin sa suba
sa taas sa may rehas
nga puthaw
mipatong ko og
mihalok kanimo
mibalos ka usab
og halok kanako
nagtusiktusik tang
duha nga morag
mga lovebirds

SILA nga nagtan-aw
kanato ang nahadlok
kon basin unya og
ako mahulog

Ang balas sa imong palad

Pwedeng mahigugma ka sa makadaghan
Pwedeng kumkumon nimo silang tanan
Pwedeng magpa-ulipon ka sa imong pagkahakog

Apan ingnon ko ikaw daan
Dili maangkon ang tanan sa pagdali-dali
Adunay butang nga nalatid nang mahitabo
Sa insaktong higayon ug rason

Sama nianang balas nga imong gigunitan karon
Dili tanan magpabilin sa imong palad
Bisan pa gani sa pagpanglimbasog mo'g hawid
Ug bisan pa sa kagustuhon niining magpabilin
Mahimong mulugnot ang uban ug mga tagak

Ug mga palid kini sa tayhop sa hangin
Maong pagmata na ug pilia ang angayan
Kay sama sa balas kadto lang naa taliwala
Ang mupabilin ug muhangtod sa imong palad.

Dan-ag sa akong pagkadangag

dan-ag, dan-ag ka kanako
dan-ag ka sa akong pagkadanghag

wala ako'y gitago
kay ulipon ako sa kahayag

bisan gani sa akong pagkatulog
ikaw ang naumol kong mga damgo

apan usahay buot nga mahigmata
sa urom nga buot mubira kanako

didto sa akong kamatayon

ang akong gusto

gusto ko anang dan-ag
gusto ko anang gamayng kahayag
nga bisan dili nimo kagustuhan
anaa nagpahipi gihapon taliwala sa kadaghanan

ambot bitaw ug ngano?
nganong dili igo ang mahimong liso
nganong gusto pang mahimong landong
kanang unya imong duolon haron ka magpasilong

kanang mahimo nimong duyanan
unya kung ikaw na laayan
sa katapusan sa imo unyang pagbaklay-baklay
taliwala sa mga pagmahay

kung may lain pa akong gusto
kana unyang hikapon mo ang punuan
sa akong paka magahing kahoy
taliwala sa akong pagpaabot sa kamingawan

masanagon nga adlaw

gipiyong ko ang akong mga mata
dili
sa dili nga ako makalantaw sa pagbuswak sa usa
ka masanagon nga adlaw
alang kanako
sa pagtak-om sa akong baba og sa pagtago sa akong dila
misulod ang hangin nga bugnaw sa akong ilong
padulong sa mga lawak sa akong kasingkasing
og ako
sa langit gibayaw

ang sabwag sa mga liso sa kahilom

gisabwag ko na ang akong tinipigang mga liso
sa kahilom
miulan ang akong mga luha
og sa huni sa akong mga pangagho
silang tanan nanubo

magpaabot ako sa mga bulak puhon sa kaalam
og sa dugay nga panahon
wala kay madungog bisan usa ka pulong
gikan kanamo

sunglass

gusto nako nga ako motan-aw kanimo
samtang nagtindog ka
tupad sa adlaw sa bag-ong kabuntagon

mitan-aw ka usab kanako samtang nagpasilong
ko sa ilalom sa kahoy
magpakaaron-ingnon ko nga wala ako
magtan-aw kanimo

ikaw usab magpakaaron-ingnon nga wala
ka kahibalo

sunflower

sa sambingay sa sunflower
molutaw ang paghikog sa usa ka pintor
sa wala pa putla ang iyang dunggan
tungod kay ikaw nagbasa man

apan alang kaniya
nga usa lamang ka mag-uuma
ang usa ka sunflower
usa lamang ka yano nga sunflower
wala nay lain

damgo

sa unahan
sa naghayang nga babayeng walay sapot
nga kita ang lubot
dunay naghalok
sa tunga-tunga sa mga lunhaw nga tanom
gamay lang nga dan-ag
sa pagbating nagdilaab

walay kahadlokan

ang balay nga gabok
hadlok sa kalayo
ang balay nga salamin
hadlok sa bato

ang walay balayan
bisag gamay walay kahadlokan

usa ray kinabuhi

nagbuwa ang baba
og nag-ungot ang apapangig
ni manoy Pedro sa dihang gi-atake
sa kalala sa kagaw sa tetanus

wa dangtig usa ka adlaw
sukad misugod pagtakboy
ang sakit nga dala sa kagaw
mihalin siya sa laing kalibotan

maayong pagkatunggab
sa pinuting bag-ong linimbasan
ang tiyan niya dihang nadakin-as
siya sa nagbanaw nga dugo
sa iring nga iyang gitigbas

human kini mokatkat
sa iyang buko-buko saka paingon
sa punoan sa tambis aron pag-eskapo .
sa irong itom nga naggukod niini.

labihang sukoa ni noy Pedro
busa mikuha ug pinuti ug gihapsan
ang iring nga nagkabyon pa
sa punoan sa tambis.

mituagsik ug nagsirit-sirit ang dugo nini.
naminti ug namalikas si noy Pedro
"peste kang yawa iringa ka, siyam imong kinabuhi?.
patay ka man laging panuwaya ka !".

natunga ang lawas sa iring
nagsiyagit si noy pedro sa kasakit
sa iyang tiyan nga maaayong
pagkatuhog sa pinuti

mipaghot ang iro
nagtuyok-tuyok ingon
sa wa mahimutang
miyaka kinig miuwang

karon, nagsugod nag kadunot
ang patayng lawas sa iring
didto sa mabaw niya
nga lubnganan

Patay ang iring
patay si noy Pedro
samtang ang iro
nagpabiling buhi

ambot nasayod ba
kaha siya nga usa
ray kinabuhi
natong tanan?

..

sa daplin sa kalsada

sa daplin sa kalsada
si lola metring
naglingkod
sa iyang
tumba-tumba nga karaan

karong sunod bulan
nobentay-singko na
ang iyang
pangedaron

milabay ang panon
sa mga tawo nga naglubong
sa usa ka patay
paingon sa simbahan
alang sa
kataposang misa
og bendisyon

nagduda si
lola metring kon basin
og nakalimtan na siya
sa Ginoo

samtang nagtindog ka atubangan sa dagat

sa bag-ong kabuntagon
miabot ang bidlisiw sa adlaw
og ang imong lawas
nga walay sapot
hayag kaayo sa akong
panumduman

pagkaanindot

gusto ko na nga mopauli
sa akong dalan
balik sa akong balay
og nangita ako og
rason

hiwi ang imong ilong
og baga ang imong ngabil
og ang imong
agtang morag lapad ra

apan bisan unsaon kog
pangita sa mga rason
aron maundang na ang
akong kahidlaw

mipiyong ko sa akong
mga mata
og miginhawa og lalom

lami man lang gayod
gihapon tam-oson ang
imong mga ngabil

samtang nagtindog ka
atubangan sa dagat
og ako naglantaw kanimo
wala gayod gihapon
miabot kanako
ang paghuna-huna nianang
giingon nilang
ulahi nga pagbasol

ambot og unsaon na lang
lami man gayod gihapong
tilaan og osap-osapon
ang imong dila

pagkatam-is
pagkaanindot
pagkalami

bahala na si bathala.