ang akong paglaom
baso nga nagpakahilom
imong gihulog
kay nahikatulog
nabuak
didto sa atong lawak

ang akong mga damgo
usa ka puti nga panyo
imong gitrapo
sa buling sa imong ulo
imong gimansahan
sa kapakyasan

ang akong ugma
usa ka tuba nga ilimnon
imong gitulon
sud sa imong dughan
og ako naughan

ang akong gugma
usa ka buwak nga pula
bisag wala pa kabukhad
akong gikutlo kay kanimo gihalad

ang akong kagahapon
mao ang akong mga tunob
gipapas na sa mga balod

ang akong pagkaako
wala'y nahibalo

kon moingon ako nga gihigugma ko ikaw
ayaw dayon og too
mahimong namakak lang ako
og moingon ako nga namakak lang ako
mahimong bakak usab kana
maglibog ka
kon asa na ang bakak og ang tinood
ang tanang bakak
sa pagkatinood lang nahimong
bakak tungod ka anaa man ang
mga kamatooran
mag-unsa man god ang kahaw-ang
kon wala usab ang kapuno
ang bulan unsaon mo pag-ila
kon wala ang kangitngit
ang adlaw unsaon mo paghimamat
kon ang tanan kahayag na lang
unsaon mo ang bili sa kamatooran
kon ang tanan kamatooran na lamang
mas nindot kining akong mga bakak
mas lamian
kay kini giyam-iran sa kamatooran
giyatakan gisipasipa gilayog
gisagpa giluba gilansang
gilumping gidaro gibuldos

di ba ikaw kadtong gaingon
nga ang gidaog-daog tabangan?
nga silang gipaubos ipataas?
dili ba mao man kana ang papel
sa mga bakak nga kon imong
makit-an imong layogon
og imong sagpaon?

og ikaw wala ka ba mamakak
masukad-sukad aron ibutang ka
nako isip hari/rayna sa trono sa
kamatooran?

ang bakak og kamatooran
usa ray ginikanan
kitang tanan kay og wala kita
wala usab kana sila

kon magkita ta puhon
ingna ko nga dili ko bakakon

laylay

kinsay gaingon
nga nagtug-an ako sa tinuod

hinay hinay lang
ayaw ako'g tuhui
kay usa ako
ka dakong bakakon

wala na koy gugma
gilubong ko na kini
sa kalimot

kung aduna kamay nadungog
ayaw nalang kini'g sabta

pasagdi kining muawit
ug maglaylay sa hingpit

kasing

gatuyok-tuyok
kahoy nga linansangan
'di masakitan

gahulat ako

bituon sa langit
hapuya kining dughan
kong naghapdos

sa kasakit sa pagkawala
ug sa pagpanamilit
sa usa ka gugma

nga unta giampong
mahimong ako sa hingpit
apan hain na

nahanaw daw idlas
nga alindahaw
dili masikop

mulupad kini
sa gamayng kasikas
ug manamilit

sa walay pagbalik
sa dughan nga karon
daw naalaot

sa nahimong salaod
sa pagdumili mo
hangtod kanus-a

ba ako maghulat
sa imong pasaylo

ulipon ako, angkunon ko

nagkatag nga mga butang
nahipalasay nga hunahuna
naglirawng mga mata
nihangad sa langit
nangita kung hain na

silang tanan nahangangha
ang bagyo nga wala damha
naabot ug nipatiwala sa ulan
nahimong unos
migakos sa yuta

ug miikos
sa panit nga huyang
karon namula, nihubag
ang pagbati, naabot ang hilanat
nagluha nga mga mata
sa kasakit

sa pagbiya
sa imong gugma kanako
nangagho, nangutana
nganong ikaw pa?
ang gipitik ning dughan nako
nganong dili pa sila

haron mukatawa lang unta unya
sa imong pagbiya kanako
ug nga dili mahimong
kawad-on sa usa ka kabos
nga naulipon sa gugma mo

Ang Baki

laksot ang ilang tan-aw
sa baki ni Basho
apan alang kanako
halawom ang iyang kaanyag
kay nakakutil sa kahilom
sa walay-timik nga lim-aw

alang sa usa ka gugma kanhiay

(intro, gitara)

kaniadto adunay gugma
mas lalom sa pa sa mga lawod
kaniadto adunay gugma
nga puno sa katam-is
ato kadtong gugma
gihawiran giamuma
gisaloan gitagayan
sa tibook natong kinabuhi
unta

apan usa ka adlaw niana
mipahawa ka
karon dili na ako kabalong
mabuhi
nag-inosara na lang ako
og wala na kahibawo kon
asa padulong

karon dili na masayon
unsaon pagpadayon
karon naghunahuna ako
kon unsa ang sayop
nga akong nahimo diha kanimo

kaniadto adunay usa ka gugma
og ako nasakitan
kaniadto adunay usa ka gugma
nga ato unta
dili na kita magpakaaron-ingnon

kaniadto lang kadto
kaniadto lang og ako ang nasakitan pag-ayo

(ending: tumba lata)

kanunay (balak alang sa mga badoy sa tibook kalibotan)

ikaw lang
ikaw lang gayod kanunay ang akong gihigugma
og higugmaon
ikaw lang gayod kanunay og hangtod sa kahangtoran
kita lang gayod kanunay
hangtod sa kahangtoran
kita lang gayong duha sa kanunay
gusto nakong hutdon ang akong tibook kinabuhi
diha lang gayod tupad kanimo
kanunay
ihatag kanimo hangtod sa kahangtoran
ang tanan kanako
alang kanimo
kanunay

kon moawas na gani ang gantangan

sa hinay hinay gibiyaan
ko silang tanan
kay miawas na ang akong
gantangan

kadtong mikitkit
sa akong dila
kadtong mipanit kanako
kadtong mihubo kanako
kadtong mihulam
sa akong sapatos nga
wala nay uli-uli
kadtong miukab sa
akong pitaka
kadtong miabre sa akong
zipper
kadtong nagsigig
padungogdungog kon pila
gayod ang akong
deposito sa bangko
kadtong mihurot og kaon
sa akong macaroni salad
kadtong nanungkab sa
akong kaldero og
gibirahan ang akong bahaw
og inun-onan nga diwitdiwit
kadtong misulod sa akong
kwarto nga dili na manuktok
og dayog abri sa tv
og haw-as sa akong refrigerator
kadtong mikapyot sa
punoan sa bayabas og mibali
sa mga sanga niini
kadtong namupo sa akong
mga mangga nga walay
pananghid og gipuno
ang ilang mga bukag
kadtong magsigig sakay
sa akong Dmax
nga magpakuha pa sa iyang
balay og
unya pag-abot nako didto
patagdon pa ko
kay kuno naligo pa siya
kadtong magsigig pamahaw
paniudto og apil pa ang panihapon
sa among balay unya
puyokpuyokan ka lang
og mga mabaw nga estorya
og libak sa mga silingan
kadtong nakahurot sa akong
snack nga potato chips
og kiss me chocolates
og hot green tea
kadtong nagsigig suyop
sa akong kape nga folgers
kadtong nagsigig katulog
sa akong sofa nga italian leather
kadtong sigig hulam sa akong
laptop
gamit sa internet nga
chargeable sa akong account
kadtong sigig palibre og
buffet sa Kusina ni Manay


nahurot na ang akong pagpaubos
sila nga mga walay pulos
mga mabaw og panghunahuna
mga walay utang kabubut-on
mga bastos
mga mapahimuslanon kanako
mga walay delicadeza
mga users
mga abusers
mga abno
mga para gasto lamang
mga dili kamaong mobalos sa akong
kaayo

sa hinay-hinay akong putlon
ang akong kaikog
akong minos-minosan ang
akong pagkaulog-ulogan
panahon na
nga ako na silang biyaan
ipabati ko na kanila ang
akong tingog nga mitagam
ipakita ko na kanila ang akong
tinood nga bulok
consumatum est
para sa akong mga pests
ang mga parasites
ang mga leeches
ang mga lamok
ang mga alligators
dili ko na sila buhion
kadtong gituboan na og sungay
sa kanding og kabaw
putlon ko na ang nanglabaw
nahutdan na ako sa pailob
og ang akong paya ako na nga gikulob

kay kon dili gihapon sila kasabot
pamusilon ko sila kon akoy maglagot

maayo na lang gani
kuno
kon ang molabay bagyo
kay mabinlan pa ka

kay kon ang abogado
na gani ang
molabay
makuha pati imong
balay

miingon si Bahala
og
Ambot!

og sumala sa ilang
naandan

namahala si Bahala
og si Ambot
Nangambot

misambat ang
segurista

Dios ko Dios ko
Wala ba kamo'y mga plano?

ang Sugarol nga
milabay
mikuha sa iyang burador
og mikuha sa iyang
dakong bato
og lapad kaayo

"kon wala kamo
magdali
ako usang antogon"
maoy iyang pulong

milabay ang kusog nga
hangin
og nanago silang tanan

migawas sila
pagkahuman
og adunay tawo nga
milabay

silang tanan
nangahanaw
pati ang ilang mga
purol
og silang tanan
napolpol

kadtong maong tawo
abogado

Asa Padulong?

Gapangutana
Si Ambot kay Bahala
Asa padulong?

Akoy
2009.5.25

sa pag-abot sa bulan
naaninag nako ang animo sa mga kahoy
sa silong mipahulay ang usa ka babaye
miawit og nangasubo kaayo ang mga sagbot
nga nangatulog
og ako sa akong pagsugod midap-ig
sa mga likod sa kagabhion
nga bisan og unsaon nakog piyong
ang akong mga mata
dili man gayod manira
ang akong mga pilok
walay trangka
ang mga bato sa daplin nanampiling
mitutok sa akong mga wala masulti
ugma sa sayo sa kaadlawon
mag-iyahay ta
og kumkom sa tumang kahilom
managlahi na ang
atong mga pulong

pila ba gayod ka tuig
ka nga
nag-wonder

nganong siya nag-pretend
nga love ka niya
unya diay

gihilasan diay siya nimo
noh?
sus sayang lang ang pag
close close sa imong eyes
kay diay

unsa to? siya kasukaon?

sakit pod gayod
uyamot
my dear

ka relate ko kong hangtod
karon
dili ka ka forgive ang forget
kay kon ako usay
buhatan sa ingon
suma sa mga pung ni bambi girl
na
dila ra gyod niya ang dili
molabod

)shit never
makalood period(

psst ayaw kasuko
kay kini para ra nako

pagpasaylo

ang paghikalimot
igo na kana nga mahimong pasaylo
nga kon og magkita mo
wala nay hisgotan
pa nga bisan og gamay
nga paghinumdom

magsaylo ang inyong
dalan
mapidpid ang iyang abaga
sa imong abaga
dayon wala ka nay
gibati

nakita nimo ang gamayng
abog sa imong bukton
dayon nimog tayhop
kay gihugawan
ka na

nga og tawgon niya ang imong
ngalan
hilasan ka

kon unsa ang romantic nga gihulagway sa akong amigo nga si ariel

ipatukar ang
Always nga giawit ni Marco Sison
og kini pamation

diha daplin sa sapa
ka maglingkod

dayon og kuha nimo sa
gagmayng mga bato
dayon og labaylabay didto

dayon pagkahuman
isunod ang
I Go Crazy
ni Jose Feliciano

undangan usa
ang paglabaylabay
sa gagmayng mga bato

akong gisugyot
ang paglikitlikit
sa kugmo

pagkawala sa maong inspirasyon

nahuman na ang mga misteryo
nga bisan unsaon wa gyod nato matugkad
ang kalalom og
ang kalapad

mopahulay usa ako
maglingkod ko sa hagdan
aron akong tan-awon ang mga dayag

akong hikapon una
ang mga maanyag
akong kan-on ang mga lamian
akong dulgan ang mga
wala makatulog

Way Kalabotan

Iyang kalipay
Sa atong kalibotan
Way kalabotan

Akoy
2009.5.24

Mapa

Mapa sa yuta.
Sa akong handurawan
Dili tinuod.

Akoy
2009.5.25

ayaw kahadlok

ayaw kahadlok
kay ang kahadlok baya wala gayo'y kalooy

ang kangitngit nga akong
higala
ako kanunay nga gigunitan
ang iyang kabugnaw
akong
gialugnan
ang iyang mga sugilanon
akong gibasa
og akong gipahaluna sa
kasagbotan sa akong kasingkasing
ang iyang mga kahingawa

ayaw kahadlok nga imo akong makita
ayaw kabalaka nga ako modayon sa imong panimalay
kon unsa man ugaling ang akong makita
dili ako matingala
og kon magtagbo man ang atong panan-aw
og maghawid ang atong mga kamot
ayaw kahadlok
ayaw katingala
kay ang akong nawong og ang imong nawong
mao ra

ayaw kahadlok
kay ang akong mga tunob
dili nimo makita
og ang akong tingog dili mo gayod madungog
ang akong pag-abot
usa lamang ka paglalin

nakita ko ang duha ka mga bata
nga naghubo og misalom sa dagat

ang mga balod mihapohap kanila
mitunga sila
aron pagsarap sa hangin

ang lima ka punoan sa lubi
nga bahi
mihatag sa ilang pagpasilong

ang ilang mga dahon misayaw
sa paglabay sa hangin
ang ilang mga bunga
wala pa mangahulog sa kalibotan

adunay mga langgam nga maya
nga mitugpa sa sanga sa nangka

milupad og mibatog sa daplin
sa akong bintana

dili nila ako makita
dili nila ako masimhot
adunay salamin ang among
tungatunga

ania ako sa sulod sa akong naandan
sa paglantaw sa mga nanglupad
mingbatog og mipahawa

sa mga nanagdula sa daplin sa baybayon
sa mga butang nga dili nako mahawiran
kadtong mga gawasnon
nga dili sama kanako

sila ang akong gilantaw
og kon unsa man ang ilang gibati nga ( kasubo ba kaha?)
og kalipay

mao kana ang akong gisusisusi
og kon unsa pa man dili na kana nako masulti

diri sa akong nahimutangan
akong gilantaw ang mga balod sa dagat
nga kanunay nga nagpaingon kanako

bisan gani sila
nasayod sa ilang mga utlanan
diha lamang sila
sa daplin sa baybayon
nga sa paghawid nila sa
mga balas
wala na sila mopadayon

mitan-aw sila kanako
og dayon og panamilit
balik sa ilang
gigikanan

abi nimo nga og moabot na ang
kahayag
nga dayon makita na nimo ang tanan?

pagkasayop mo

dili tanang makita anaa sa kahayag
kay ang mas hayag pa
dili mo na kini maaninaw

kanus-a pa

kanus-a pa kaha
magtakdo pagbalik
ang atong mga dalan

aduna pa kahay kahigayunang
makita pagbalik
ang mga lunhawng kasagbutan

mahagkan ang mga bulak sa rosas
nga sa kanunay mibila kanako
sa akong atubangan

gihigugma ko ikaw akong pinalangga
walay bili ang adlaw
kung dili ikaw makita

alang kang sir eng

ang katam-is sa asukal
anaa sa usa ka bandihado

kanang baston
kadtong morag itlog
sa pato
ang naandan nga lollipop
halinon lang gihapon
naay gipormang morag
budbod,tiratira
gipapili ka



mga kalipay sa dila
nga ang hilig
mao ang pagtila
og pagtam-os
sa gagmayng mga bata
nga kaniadto
nag-inambitay
nag-ilis-ilis
og tam-os
sa walay paghunahuna
kon sayop ba
kana

wala sa ilang buot
nga sila mahimong sumsuman
sa katilingban
kon sila matawag ba
nga hugawan

nakita ko ikaw nga
nagtam-os sa lollipop
ang imong bungot
walay pul-ong
wala nangilabot ang
imong mga mata
kon unsa ang nahisulat
diha sa pultahan
sa katoliko nga simbahan

ang mga hardin sa akong galamhan
namulak
nanghumot
og ikaw nga nagmingaw mipasiyo
naghandom
nanimhot
adunay mga bulak nga imong gikutlo
dili kadto alang kanimo

unod

sa kilid sa kangitngit
adunay duha ka anino
ang usa uhaw sa gugma
ang usa uhaw sa kwarta
nagkasabot sila
sa usa ka buhaton
nga ang anino paundon

ginapos sa handurawan

sa hamubong panahon
nahimong usa kita
didto sa altar
sa atong kaminyuon

nahimong mga kalipay
nahimong mga awit
nahimong mga balak
ang atong mga adlaw

gisugid kanimo ang kalipay
gisugid kong mga pagmahay
gisugid ang kanhi mga kasakit
mga pagbakhong imong gihupay

pastilan kita kaniadto
nganong adunay panagsabot
ug nganong sa niabot kadtong
atong panagtakdo isip usa sa altar

gibugkos na unta sa langit
nganong naabot ang mga hagit
nitumaw ang mga ping-it
nitubod ang gabusay nga luha sa kasakit

ingon ba gyud diay niini ang gugma
mahimong mahanaw ugma
ug ang nalalin mahimong magubot
ug mabugto ang gisumpay

pagkawala ko makasabot
hangtod karon namunga ug pangutana
kining nahipalasay nga dughan
aduna naba akoy kagawasan?

tingale ginapos gihapon
sa imong handurawan....

Sa Sinugdan

Sa sinugdan, miliki ang kawayan. Sa lantay naghigda ang babaye ug lalaki
. Lawom ang gabii. Mihapuhap ang hangin sa kaadlawon. Nahigmata si
Kusgan, gitugnaw. Si Matahom sa iyang kiliran, mitanday sa iyang batiis.
Miinit ang ilang panit. Midilaab ang ilang dughan. Mihiusa ang ilang
kusog. Mitukmod-miduot sa pus'on ug pusod. Milawom ang ginhawa . Mihaom
sa gilaum. Miagay ang dugo. Ang singot mitulo. Ang lantay miuyog. Ang
langit miduyog. Militi. Midalogdog. Ang hangin mihuros. Ang punoan
milabyog. Ang kawayan miliki. Ug mibaganaw ang tubig, mitumaw ang
Yuta-----Yutang Tabunon.

Akoy
2004.5.17

kon gusto nimo nga molungtad kita
ayaw ako og tinuora
ipakisama lamang ako nga usa ka bakak nga lumalabay
kanang bisita lamang sa imong mga kamatooran
sama nianang atong pagtinan-away bisan og makadyot
lamang sa talad-kan-anan
ihatag ang pahiyom og ilailaha ako sa usa ka katawa
kadtong nagkita kita sa atong kabatan-on
diin ang kahinam sama sa usa ka bandihado
nga puno kaayo og init nga luto
ang kahumot misaka didto sa kisame
ang kalami misuotsuot sa atong mga tilaok
atong gitulon og wala'y bisan usa ka mumho nga nausik

panahon

sa magtiayon
wala nay bayad ang kalami
nianang hagwahagwa
sa katreng naandan
gani aduna pa'y daghan
kaayong sukli niaang
hamubo lang kaayong
panahon nga nagasto

ang dili makalimtan
hangtod sa kamatayon

pag-abot sa halok sa usa ka gugmang tiunay

ipabatog mo ang imong mga ngabil
sa iyang hamis og humot nga liog
og siya mohangad
motalidhay mohay-ad
aron mosimhot sa
langit og ang iyang
mga mata mopiyong
aron molantaw sa
nawong sa Dios og ang iyang
mga dalunggan mamati
sa mga awit sa daghan
kaayong mga anghel

ang naandan

bisag unsang halas
nga makit-an
atong bunalan sa kagingking
nga kawayan

ang ang mga halas usab
mogamit usab sa
naandan na nila nga
pagpamaak

bisag kinsang tawhana
sa bisag kinsang halasa

walay gipili ang naandan
morag kadena nga walay putlanan

sa walay igong katarungan
sa walay pangutana kon unsa og asa
ang kinutuban ang nilugdangan
ang dangatan ang kapaingnan

mga pulang bulak

ang imong debuho sa mga bulak
sa saya kaayo nga mga bulok
nahisama sa pahiyom og katawa
sa mga bata nga nanagdula diha
sa among nataran
nga nagtakyan og nagbagolbagol
sa tumang kamaya og kalipay

ang akong kasingkasing morag
alibangbang nga nagkapaykapay
nga buot untang mobatog
sa ilang mga dahon og gihay
og mohalok aron simsimon
ang ilang kahumot
apan kalit nga gihawiran
ang akong mga pako
sa kaamgo
nga wala ako'y katungod
sa pag-angkon sa bisag usa kanila
nga sumpay pa sa pusod
sa ilang mga inahan

gihikap ko ang imong debuho
sa akong mga tudlo
og namati ako sa maymay
sa akong kapakyasan
gigakos ko ang mga bukton
sa akong kasubo
isip suod ko kaayong higala
og didto sa silong sa mga anino
sa kahoy
nagtagay kami sa
kahaw-ang og kamingaw

Tultoli Ko

Buot kong mosakay
Sa mga pako sa imong awit
Ibayaw sa imong langit

Tultoli ko sa imong sekreto
Kon dili man, tudloi na lang sa
Agianan sa imong dughan.

Akoy
2009.5.24

Higayon

Matag Karon
Higayon
Kay wa ta masayod
Kon mamatay na
Pohon.

Akoy
2009.5.24

ang atong nakita
mao ang mga anino
ang mga ulohan nga
sementado
nga nagpakita
sa ilang mga nahisulat nga
ngalan
kanus-a natawo
og kanus-a
namatay

hilom kaayo
ang mga sagbot nga miusbong dinhi
talagtag ang mga tunob
og ang hangin bugnaw nga
makapanglimbawot
sa akong balahibo
ang mga alibangbang
mahisalaag usahay
mobatog sa mga
kabulakan dinhi nga layaw

ang mga bulak nga ilang gihalad
gibiyaan nga nangalaya
gipalid sa hangin ang mga gihay
ang uban gisunog nianang usa ka palina

ang mga nangaupos og nangalanay nga kandila
gilanay pag-usab aron ibaligya
isip bag-ong kandila

usahay

(ingna ko kon kulang kog pagtoo
balikan nako ang akong tumong)

sa sud sa akong dughan
adunay dakong pangutana
kon anaa pa ba diha si mama og papa nanaghigda?

(gamayng kahilom alang sa paghandom)

morag wala baya
kay wala man nanglupad nga mga plato, luwag og kaldero
wala na may sinipaay og binulanay sa mga baston
wala na man ang sinaygitay og tinomboyay
wala na may nilambahay og mga pultahan
wala na may mga sanggot nga nangagibang


o basin kaha og nagbag-o
na sila diha sa ilang pagpakabuhi human sa ilang kamatayon
sa ilang bag-ong panag-ipon og panagpuyo diha sa sulod
sa gamay kaayong lawak nga igo lang usab sa gamay kaayong ganghaan
nga gitrangkahan

maayo unta

(dili lang matandog
ang ilang mga
kalag)

nga sila magsabot nga magkasinabot na diha
sa ilang hilom kaayong
lungsod

makalagot!

nganong og naa man unta nganong dili na man magpakita
nganong dili na lang man magsulti sama kaniadto sa dihang

magkinawrasay
magsinumbagay
sila sud
sa ilang kwarto

bisan sa akong pagkagamay nga bata kaniadto
nakapanglingolingo ko sa akong palito nga ulo
gisayangan ko sa mga kamot sa orasan nga nangalabhag
og sa mga kuko
nga nangaukal

ambot kon nakabantay pa ba sila
sa ilang nausik nga kabatan-on
sayang gayod hunahunaon
nga ang mga higayon milabay lang
apan wala mipahiyom

pagpamati sa mga awit ni sarah brighman

gidala ang akong handurawan
sa disyerto nga mamingaw
abog og hangin nagtagawtaw
milupad ang akong kalag
paingon sa usa ka lunhaw
diin nagpaabot ang nanayaw
nga mga harem

pagkahumok sa ilang mga lawas
nga mikiay og mikiyodkiyod
pastilan wala man gyod
silay mga bukog

nalibog ko niya
na kuno sa kadaghan
sa akong mga balak
nalipong kuno
siya

magduda unta
ko basin
napasmo
kay nakalimot
og kaon

apan miingon siya
nga kuno
siya naburos
sa akong
mga pasalig
nga siya
naglihi
kay nasudlan
sa akong
mga pasaringsaring
nga mga damgo

naghinuktok ko
makaburos
diay ang mga damgo
makapaanak
diay ang
mga gipanamkon?

karong gabii
maghunahuna kog sulat
anang mga balak
nga makapakuha
kanang makalaglag
kanang maot
kaayo nga balak
kanang

dili sama sa akong
panagway
nga nakailad og
mga maayong
moulog-ulog
sama usab
sa akong mga
talidhay

moingon ka nga kini mao ang nindot
imong giisa ang usa ka lila nga bulak
nga imong gihinganlan
og buladot

wala magpakabana ang akong
dunggan
ang akong baba mihunghong
nga ang imong giingon nga nindot
sagbot man kana
diri sa among
patag

og akong gikutlo ang among pinakanindot
nga bulak nga asul
ang bulok sa iyang mga gihay
nga ang kahomot
mosurop sa kinalawman
sa unod
lapos pa gani sa bukog
nga sukadsukad wala gayod mitubo
sa inyong bungtod

og ang imong mga mata mibuhakhak og katawa
kay ang akong gipanghambog
kan-onon man lang diay
sa inyong kanding

wala magkasinabot ang atong gusto

og diha nagsugod ang arte
sa kritisismo
nga hangtod karon
nawad-an na akog pagtoo

sa dihang nahubog na ako

sa dihang nahubog na ako ang akong mga pulong morag piniriso
nga nakagawas sa ilang mga selda
og sila nanagan paingon sa ilang kagawasan
nga walay bisag usa ka pulis nga naggukod kanila

(ibalhin ang hisgotan)

mitan-aw ako kanimo nga nag-igwad
nga mibiya sa talad kan-anan

nakapangutana ako kon gihigugma ko ba gayod ikaw
kon malitok ko ba ang pulong nga gugma kon ako hubog

(kay lagi ang tawong hubog magsulti man lagi sa tinood)

milingkod ka sa sofa
misunod ang akong mga mata
mihay-ad ka
gipatong nimo ang imong paa sa samin
nga center table
nahulog ang imong sandal
nakita ko ang imong lapa-lapa
ang imong mga tudlo nga mikitoy
paingon sa katulogon
nga morag ikog sa atong iro
nga bag-ong naburos

mitakilid ka
kuyog ang imong ulo
og mipiyong sa imong mga mata

ang imong kilay morag mga bangaw
og ang imong mga pilok morag mga bagon nga namulak
ang imong dughan
ugdo lang gihapon nga morag puy-anan sa mga hulmigas
ang imong ngabil morag tambis nga laming pang-iton

mibalik sa akong panumduman
kaniadtong una akong namisita sa inyong balay
mitutok ka sa akong pondeo
milakra ang akong
utin nga haskang utoga

naulaw ka
apan mibungat ko sa akong gugma
og didto nagsugod ang tanan
wala na'y kataposan

ang akong mga barkada nakapangutana
ngano nga ikaw man
ang akong tubag

maoy mando sa akong
utog nga
kinaiyahan og wala na nila ako
gikan didto
panumbalinga

unsa kahang salaa ang nabuhat nako
sa akong mga santos og ginoo?

ah, basta,
ang akong gisunod mao lamang
ang agianan sa akong utog
period.

sa pista sa santo rosaryo

sa pista sa santo rosaryo akong gibungkag ang akong gibalaybalay nga mga saad
mitagay ko sa inom sa mga tawong dugay ko rang ginganlan nga mga walay pulos
nagtagay mi og wala nako panumbalinga nga ako mahubog
gituyoan ko ang akong pagpaubos
gihangyo ko ang ilang mga tiil nga moyatak kanako
ang ilang mga baba moluwa kanako
ang ilang mga kamot mosagpa kanako
ang ilang mga tudlo magtudlotudlo kanako isip usa ka makasasala
nga wala makaila sa tinood nga nawong anang pagbasol
gihigop ko ang ilang mga pagbiaybiay
og sila nga mihangad kanako isip usa ka tore didto sa babel
mibuhakhak og katawa
misayaw nga morag taga russia
mitambol
mitaghoy
miambak-ambak og midagandagan diha sa baga sa kalayo
karon miingon sila
ikaw gayod ang among igsoon
wala kay kalainan sa among bulok og baho
ang imong mga braso sama sa among mga braso
og ang imong mga tiil sama sa kadak-on sa among mga tiil
ang among kabudlay imo usab nga kabudlay
ang among kaubos imo usab nga kaubos
nakapasar ka sa among pagsulay

og sila nagpasalamat og sa kataposan sila miiiyak
nga migakos kanako

nahingangha ako, og wala ako makasabot
apan bisan pa niining akong pagkabogo sa pista sa santo rosaryo
migakos usab ako kanila
karon, ako na silang mga igsoon
sa kahubog og sa pagsuka sa akong nainom og nakaon

paghimo og bag-o

higala paghimo og bag-o nga baroto
kanang makakutaw sa mga balod sa akong pagtoo

paghimo og panglantaw kanang tilaptilapan sa
dila sa kaalam
kanang wala'y mga niwang nga kamot sa kabogo
nga mouswat sa gaan kaayong
bukag nga gibudhian na nianang kabug-at

himoo akog balay nga bisag walay atop apan
naghatag og kalandong sa init kaayo nako nga
panaghap

kanang hagdan nga bisag walay ang-ang modala
kanako sa kinatumyan sa akong mga pangandoy

himoo akog arka nga walay arka nga bisan og wala pa
ang baha sa kataposan sa atong pagkabuhi
daghan ang mosalig nga kini molutaw og luwason
ang tanang binhi

higala himoa ang dili katoohan
ang wala nila damha

og kon mahimo na nimo kini nan moluhod ako kanimo
og ang imong mga samad akong tilapan
aron kini mamaayo

patuhoa ako higala kanimo
kay ako ania naglutaw sa dakong lawod sa kalibog
nagbahad nga ang tanan nakong matagboan akong supakan
og ang tanan nakong mahikapan
mamahimong bato
nga ang tanan nakong makita mamahimong hangin lamang

ikaw nga nakakita sa kahayag
padayon pagdan-ag
kami nga imong gilandagan
mohunong og maghandom

kon asa ka paingon
para lang kana sa mga halangdon
og kaming mga mayokmok
motago lang sa hagok

3:29, sa kangitngit sa akong kalibotan

on the record
nakamata kog
ala una 45

mibangon ko
og miinom og
tubig nga
bugnaw kaayo

aron mahupay
kining kainit
sa akong lawas

milingkod ko
og mi-open sa
akong computer

nag-surf
(bold)

nag-surf pa gihapon

gibalikan ang emails
gi-delete
ang mga walay lami
ang mga dili
na angay nga basahon
nga balikbalik
nga mga
sus wala gyoy lami
ang gipadala nako
ni lucy, ni precy
ni mercy
ni dotty

tan-aw sa YM
invisible ko
walay tawo
nga nagkutawkutaw
sa alas
tres sa kaadlawon

siging putakputak
ang inaan sa among
silingan

duna na pod seguroy
naburos
nga walay klaro kon
kinsay amahan

midalugdog
basin mag-ulan

ang sunoy mituktugaok

miabot na kaha
ang puti nga pungak
nga ganahang
motambay sa punoan
sa chicos?

que ver!

milanog ang dalugdog
miulan na
og kusog

kusog na usab ang hangin
sa gawas
nga nagdumboldumbol
sa bintana
niining balay nga gabok
nga morag
gitukod pa
human sa pagpahawa
sa mga hapon

bisan unsa na lang
kay laay kaayo ang
akong paminaw

on the record
Ginoo ko

alas 3:37 na sa
kaadlawon

matug kog balik
basin
magdamgo kog
kahinanok

ok ra ko
ikaw, nagbasa man ka
ok ra pod ka?

da! ka balak lagi ka!
3:4l na

sumala sa mga pulong ni Loloy

suma sa pung ni
loloy
kanang babayeng
charming

kon imong
(eyoton)
mora kunog
irong buang

(ayaw kasuko
ha
kay tinood baya
na nga
gisulti ni
Loloy
ang
akong ig-agaw
nga callboy

mor pa
peks man
mamatay pa unta ang tanang
dili kaayo gwapa

pagkalooy
patay na intawon
si Loloy

busa

(gozos)

karon atong
pangadyeon
ang tulo ka amahan namo
tulo ka maghimaya ka maria
og tulo
ka gloria patri

alang sa iyang kalag
kon asa na kaha nahisalaag

ihatag na unta
kaniya
O ginoo!
ang pahulay sa dayon
dan-agan unta siya
nianang
kahayag nga walay pagkapalong

amen

sabat

mitoo ako......
padayon sa pangadye

kalimti sa ang
tariki)

ang sulbad nianang
sakit sa pus-on
kon makuha mo
ang saktong koneksyon

mao ra baya
ang pagpagawas anang
imong natingob
nga sip-on

gung-gong! dili sa imong ilong!

FRACTALS

inigsumpay anang mga gubang
tyurka

sama sa paglikitlikit nimo
anang mga karaang
nota sa
imong umaabot nga
kanta

kansyon de mazurka
kiyod sa mallorca
guso sa zamboanga
konyo konyo
de nana

tanday sa tandayonon
kuot sa kuotonon
malas sa kotoon

ipagawas ang dila
hunong sa manila

kon makuha na ang saktong
kumbinasyon
sa kaha de unodes

nan, modagan na ang makina
motugsoy mopaturatoy

kon magawsan na ka
wala na wala na

pagkahumod sa
tulos
wala ka nay pulos

ang mopuli mao na ang
magtutudlo

nga tudlo

og ang magwali mao na
ang taas nimo nga
dila

adios adios
loslos nga tabilos