ang atong nakita
mao ang mga anino
ang mga ulohan nga
sementado
nga nagpakita
sa ilang mga nahisulat nga
ngalan
kanus-a natawo
og kanus-a
namatay

hilom kaayo
ang mga sagbot nga miusbong dinhi
talagtag ang mga tunob
og ang hangin bugnaw nga
makapanglimbawot
sa akong balahibo
ang mga alibangbang
mahisalaag usahay
mobatog sa mga
kabulakan dinhi nga layaw

ang mga bulak nga ilang gihalad
gibiyaan nga nangalaya
gipalid sa hangin ang mga gihay
ang uban gisunog nianang usa ka palina

ang mga nangaupos og nangalanay nga kandila
gilanay pag-usab aron ibaligya
isip bag-ong kandila

usahay

(ingna ko kon kulang kog pagtoo
balikan nako ang akong tumong)

sa sud sa akong dughan
adunay dakong pangutana
kon anaa pa ba diha si mama og papa nanaghigda?

(gamayng kahilom alang sa paghandom)

morag wala baya
kay wala man nanglupad nga mga plato, luwag og kaldero
wala na may sinipaay og binulanay sa mga baston
wala na man ang sinaygitay og tinomboyay
wala na may nilambahay og mga pultahan
wala na may mga sanggot nga nangagibang


o basin kaha og nagbag-o
na sila diha sa ilang pagpakabuhi human sa ilang kamatayon
sa ilang bag-ong panag-ipon og panagpuyo diha sa sulod
sa gamay kaayong lawak nga igo lang usab sa gamay kaayong ganghaan
nga gitrangkahan

maayo unta

(dili lang matandog
ang ilang mga
kalag)

nga sila magsabot nga magkasinabot na diha
sa ilang hilom kaayong
lungsod

makalagot!

nganong og naa man unta nganong dili na man magpakita
nganong dili na lang man magsulti sama kaniadto sa dihang

magkinawrasay
magsinumbagay
sila sud
sa ilang kwarto

bisan sa akong pagkagamay nga bata kaniadto
nakapanglingolingo ko sa akong palito nga ulo
gisayangan ko sa mga kamot sa orasan nga nangalabhag
og sa mga kuko
nga nangaukal

ambot kon nakabantay pa ba sila
sa ilang nausik nga kabatan-on
sayang gayod hunahunaon
nga ang mga higayon milabay lang
apan wala mipahiyom