busog

busog kaayo
og gusto matulog
ang tiyan
mohay-ad sa
D-bed dapit
sa balcony

apan hadlok
ko nga mohagok og
mamatay

ania
nagtindog tindog ko sa kilid
sa pultahan
lantaw sa mga trees
sa rain sa green kaayo nga hills
og bag-ong gitamnan nga
ricefields

kalami ra gyod diri
sa Pilipinas!

bikwang bikwang

nibikwang bikwang ang katig
sa paghampak sa balod
natay-og kini
ug mikurog
midahunog,
midaguok
ang pulong sa balak
nga nag-inusara

hain na diay ang kanhi?

nganong ang kalinaw
nga daklit
nawala na

ang kanhi kahayag sa adlaw
nga naghatag ug kamaya
karon gitabilan sa dag-um
nga pwerting bagaa

ang sayaw sa hangin
nahimong kasuko
daw nagtukmod
sa kaparutan
sa kahiaguman

mao na ba kining giingon
sa panudya?

ug ania...
mibikwang bikwang na usab
ang panumduman
sa akong gakahapon

nibalik
haron sa pagsudya
ug pagpahinuklog

reklamo sa usa ka suluguon sa iyang amo

kon makit-an na gani
niya ako nga maglingkod
sa hagdan
atubang sa naghaguros
nga mga sakyanan
paingon sa bukid
mangasaba siya dayon
nga mas ubos pa ako
sa iyang iro nga
si brownie

ay kanay! sala na ba
ang pagpahulay dinhing
dapita sa lungsod
sa mga asenso?

luag ang puti nga polo shirt ang gisul-ob sa usa lalaki
nga niwang nga naglakaw sa baybayon sa kaudtuhon

kusog ang hangin nga iyang gisugat og malakra ang
iyang mga bukog samtang ang iyang kamot naghawid

sa usa ka sungkod nga kawayan. Usa lang ang iyang
padulngan, apan wala siya masayod og kanus-a siya

moabot og asa gayodng dapita ang iyang pahulayan
kapoy na kaayo ang iyang lawas og inihap na niya ang

iyang gininhawa.

ang lalaki nga nagsakay sa iyang bisikleta
nagdala og tulo ka bundle nga tangkong
alang sa iyang binuhi nga baboy

nga sa kahaponon nagpunay og syagit
nganong ang iyang lawog nadugay

ang lalaki nagkapandol-pandol sa tangkal
aron makakaon ang pinalanggang baboy

nahilom ang baboy nga lingin kaayo og lawas
og ang lalaki nagtantiya na sa iyang timbang

usa na lang ka semana ang iyang pagpailob
og maihaw na kining baboy nga kapritsosa.

pagkalunsay sa usa ka gugma

adunay puti kaayo nga
alibangbang nga
milupad

og mitugpa kini
sa pungpong sa
puti nga mga rosas
alang sa
usa ka patay

nawala og karon
akong gisulayan og
pangita

akong bugawon aron
motugpa unta kini
sa akong
pula nga kasingkasing

gibiyaan ang puya nga nagsigig uha
tungod sa kauhaw og kagutom

nakalimtan ang gitak-ang nga nilung-ag
alang sa panihapon
napagod ang inun-unan nga palotpot
sa dapogan

ang kolon nagbaga sa sugnod nga walay
pagkapalong
og ang atop nga nipa maayong pagkauga
og undam na alang sa dako kaayo
nga sunog

tungod kay si nanay mibalak diha
sa silong sa bulan
mibuhos kuno ang makusog
kaayo nga ulan
og bisan sa hulga sa usa ka dako
kaayo nga baha
si nanay mibalak lang gihapon
miawit
sa dihang gibiyaan siya ni tatay

mao kana ang sugilon sa akong
lola nga misumpay sa
pag-ingon

nga kadtong puya nga durong iyagak
ako kuno kadto

nihit nga subayanan

bisbisan ko sa luha
ang mikubol nga liso
sa himaya.
hugasan ko og kasakit
ang mga lama'ng mitapot
sa akong pagkahimugso.
pintalan ko
og mabulokong dugo
ang matag gutling
sa akong palad
ug pangitaon ko
ang tinood nga mapa
sa akong pagpanaw.
kung ugaling
hingpit na ang
hinagiban,
pahilumon ko ang naandan
ug himamaton ko ang
kahibulongan...

...

makita nimo og madungog
ang matag adlaw nga awit sa usa ka tamsi
atbang sa imong bintana nga samin
sa usa ka punoan sa balimbing
nga karaan
tupad sa dakong kahoy nga lumboy
sa kilid sa bungtod
tupad sa bag-ong mitumaw nga adlaw

adlaw adlaw kini
walay sumo pawala sa kalaay
dili kaayo nindot apan tinood
dili kaayo halandomon
apan kanunay

mao kana ang akong balak alang kanimo

bahalag hinay

bahalag hinay
basta kanunay

hinay nga kanunay
bahalag basta

mag-unsa man
ang lami og nindot
kon wala na?

mag-unsa man ang
paspas
kon dili maapas?

walay makahulip
anang naa na

ang usa ka milyon
sa imong hunahuna
lupigon ka na
sa piso sa akong
palad

sa usa ka singko
nga ania sa akong
ilok

basta sa akong
panumduman
kon wala ka

kami na lang
kon wala siya
ako na lang

kon wala na ako
kamo na lang
kon wala siya
ikaw na lang

og kon wala na ikaw
pasensya ang mga santos
kay wala na ang
mag-antos

walay sakit

walay sakit
kay kalit

apan wala gyoy
lami

matod pa sa
among pari

mamahimong
nagkinahanglan ka og dili ingon kanato
aron ka malipay

ang gilak
sa fairy
ang magic
sa wand

dili na kinahanglan ang masusing pagtoon
og ang paghago
ang paghumol sa imong mga tiil
sa usa ka palanggana nga tubig
sa kaadlawon

kay sa usa ka pamilok lamang
sumala sa imong gusto
mahimong tinood ang tanan

apan dili ingon ana
ang dagan sa kinabuhi

pila pa kaha ka bakid nga bugas
ang imong kan-on?

3:25 sa kaadlawon

manira na usab
ang bintana sa
akong kalag

makita ko na ang
katas-on sa akong
pilok

ang akong mga tudlo
nanagan
apan wala na kahibalo
kon asa paingon

hanap na
dili na kaayo maaninaw
ang mga pulong

nanghuy-ab ang baba
nanirado
gitagoan ang mga puti
nga ngipon

doble na ang mga nawong
sa mga pulong
og ang gipangita
mao na lamang
ang usa
ka tuldok

dunay duha ka bungtod sud sa iyang tilaok

si william
nagpunay og tulon sa iyang laway

gibati niya ang kahasol sa duha ka
bungtod sud sa iyang tilaok

morag itlog
gibati niya ang usa ka lama
sud sa iyang baba

morag iti
morag langto-langto
morag iyang gidamgo
kaniadto

si william
wala gyod manugulon
sa mansanas nga iyang giingkib
nga karon
nagbara sud sa iyang tilaok

sakit kuno
bation apan lami lang gayod gihapon

iyang gihikap sa iyang mga kumagko
gilok
makatagbaw ang sabaw

ang iyang tiyan nangandoy
kanus-a pa kaha
kini matagak
sa iyang sabakan

bidli
apan lami
gidili
apan gayod ah, pagkalami

dunay duha ka bungtod
dunay usa ka kanyon
sud sa iyang tilaok

og si william
nga dili balaan

nahimong tawong karaan.

yawyaw

sa akong yawyaw
sa kaadlawon
sa akong paghimata og
sa akong wala na pagbalik
sa isla sa katulugon
nangandoy ang akong
panumduman nga unta
mamati ka sa akong
yawyaw

mga salingsing sa
simag nga panglantaw

wala na ang pasiaw nga
sayaw sa sayawsayaw
pangagho
pangagho
pangagho
ngano ba? ngano ba?
unsa ba? unsa na ba gayod?

wala ako mangandoy sa
pagsabot
nagyawyaw lang ako
nagsalimuang ang akong
mga pangagho
pangagho nga pangag
niining akong kalag

ayaw pangandoy nga imong
masabtan ang mga pulong
dili mo kini matukib
kay sila mga pulong lamang
og ang imong tudlo molagbas
sa ilang mga kilid

dili ba? nga mao kini ang imong
pangandoy?
o pangagho usab sa hangin
nga mingaw
nga hagawhaw
molakaw ako sa ibabaw
sa tubig
nga dulaw

ah, ang sunod mao ang paglansang
diha sa krus nga gansang-gansang

syagit ayaw, diha sa tumang kasakit!

mga tigmo
nga adunay mga tubag apan
wala ka kasayod
sa akong kiyod

nagpasabod ka man god
busa tan-awa
daghang mga inaan
og sunoy sa atong silong

dili ba nimo kini makita
sa mga giwang sa atong
salog nga kawayan?

bisan nasayod ka
nga mais lang ang ilang
gianangayan kanimo

kanang imong ugdo nga
bulsa sa imong
puno nga pitaka

gipakibalewala nimo kini
ang utog sa imong adlaw
imong gitubayan

hangtod nga ikaw
nagawsan sa tumang
siplit sa kalipay

walay pagbasol nga
makadulot niini

sa imong mga ugat
nabuhi ka
og dili na nimo kini
ikapanugid

og ikapanangpit
kay imo nang gisulsi
ang imong mga ngabil

wala ko malibog
dili ko lang gayod mabuhat
ang ingon

nagpondo ako
sa akong isla
og wala akoy laraw
nga molangoy didto
sa pikas

mao lang kini og
igo na kini kanako

pensa, depensa
kawayan nga bangkaw
ang nag-alirong kanamo
niining gamay nga
balay nga gustong
maglain

dako ang katilingban
og kita dinhi
walay nada sa atong
pagtakuban

sama sa usa ka sundang
nga hait
apan nagpunay og tago
sulod sa
iyang sakuban
nga guban

lantaw ko sa unahan
dunay nagdula og volleyball
ang akong iro nga
si samsam mikiwil ang ikog
gustong moambak
paingon sa pikas

mora ko og malipong
sa ilalom sa itom
nakong payong

ekis

milambi ang pula niya
nga ngabil
ang lagom kaniadto
nawala

lahi na ang iyang kiay
lamba sa iyang sampot
dili na kaibgan
gani kahadlokan

mitindog siya sa kilid
sa tindahan ni Pasing
og nagpaabot
sa iyang sunod nga
tukbon

ginganlan man god siya
og halas

unang ritual alang kang inday lilia

miluhod siya nga walay putong
mipiyong sa iyang mga mata
og daghan siyag nakita nga wala pa
sukad sukad niya
damha

daghan siyag nasimhot
og natilaan
sud sa pipila ka gutlo lamang
nga gipadayag kaniya

ang dinalian nga hagwa
sa kapalaran sa usa
ka dili gugma
apan dili usab kasilag
usa ka pagbati
nga gihinayhinayan
niya og sabot
sa pagdili una
niaanang halok

si inday lilia nahinanok na
sa kakapoy
og sa lahi kaayo
nga kalami
sud sa iyang baba

og sa iyang
paghimata diha sa dugay
na nga katulugon

dili na angayan
ang usa ka
pahinumdum

ang imong palad nahasulat na
gitimbang timbang na ang imong
matawag nga
swerte og dimalas

kon unsa ang kabug-aton sa imong
mga kapakyasan
mao usab kana ang kagaan sa imong
mga kalampusan

kon mahulog ka sa punoan sa grasya
og mabanlog ka sa
prisohan sa gaba
dili ako mopunit kanimo sama sa usa
ka bulak nga nahulog gikan
sa iyang punga
nga giiyakan sa mga dahon

nahisulat na og ang tanan
nagtuman lang sa mga linya sa imong
kapalaran

gisubay lang nila ang mapa
paingon sa tumoy sa bangaw sa
bung-aw sa imong himaya

ang akong gugma sama
sa usa ka dagat

wala kay masulat sa iyang
mga balod
wala kay mabutang nga timailhan
nga ikaw ang
tag-iya kanako

ang imong mabati mao lamang
ang paglawig sa akong sulog
nga misuot sa mga ngilit nga dapit
sa imong kasingkasing

usa ka hapon niana

gilantaw sa
kahayag ang kangitngit
gianinaw
kon unsa ang anaa niya
nga gihigugma
sa usa ka kaanyag

ang tanan anaa na kaniya
gawas lamang
sa kahilom sa mga bitoon

nakasabot siya

Ang Sugok

Sa paglutaw-lutaw
sa ihalas nga gangsa
natukaw ang
gagmay'ng balod
ug gilunod
ang iyang anino
ngadto
sa kinailawman
nga dulom sa
tubig
kauban sa
mga batong
wa nabahiri
ug kahayag


...

ikaw

sa imong panan-aw
nga binali
malupig na nimo ang
mga kwaknit

sa imong paghigugma
sa lapok
masuod mo na ang mga kabaw

sa imong pagpunay og paghot
nakapangutana ko
kon basin kaliwat
nimo ang mga iro

wala ako'y nakitang hiyas
nganong ikaw higugmaon apan

ikaw gayod ang iyang tinood nga gihigugma
og gidawat ko ang akong kapakyasan
sama sa pag-asdang ko sa usa ka kusog
nga ulan

sa baha, sa lunop.

paglakat sa sayo sa kabuntagon

mga tulabong
nanglupad palayo kanako
sa dihang ako
miabot
duol na sa mga kabaw
nga naglunang sa
kabugnaw sa
tunaan
tupad sa bag-ong
gidaro
nga basakan

mikalit og ulan
wala na ako nangita og akong
kapasilongan

isimang kuno ang imong panan-aw ngadto sa angay tan-awon

miingon ka
nga molangoy gyod ka
matag pauli mo kada semana

miingon ka
nga wa na kay mahimo ana
kay naa na man gyod

miingon ka
nga wa na gyod kay pagbati
ngadto kaniya

suwayi kuno
sa paghimo ug balak
nga alang gyod niya

kanang balak
sa gugma
nga inyong gipanumpaan

sa palasyo
nga inyo nang natukod
ug pagaugmaron kay damgong palambuon

suwayi ra
ug pamati kon unsay itug-an
sa kaugalingon nimong kalag

ug ayaw ko sultihi
nga human na kini nimo buhata kaniadto
karon ang akong gipasabot

buhata kini sa duha ka semana
balitai nya ko unsay imong gibati
human niini

balik unyag suwat ug mga balak para nako
kon matuman mo kini
aninawa unsay kalainan

kon wala gani alibyo imong sakit
ilisan natog laing tambal.

dia ra, dawata kining imong resita...

mga bersyon sa haiku ni candice

"bato'ng nahagsa
mipusgay sa kahayag~
bulan sa sapa" - candice

i
kahayag sa bulan
sa sapa
mipusgay sa
sa batong nahagsa

ii

nahagsa nga bulan
mipusgay sa sapang
nahagsa sa bato

iii

nawala ang kahayag
napusgay ang bato
sapa nahagsa


and so on and so forth....

daghang mahimo ang usa ka
tuldok nga dili mahimo sa usa ka comma
apan mas daghang mahimo
ang usa ka
blanko

hayag lapad og walay
limit ang bationg kalipay nga
misagol sa tumang kahaw ang

Haiku

bato'ng nahagsa
mipusgay sa kahayag~
bulan sa sapa

...

gubot nga pamuyo

duha ang iyang bana
lain lain og amahan ang iyang unom ka mga anak
nabuang ang usa ka bana
sa kaguol og ang ikaduhang bana nalipay

misamot og kapuok ang iyang maong nga short
mora na og bayot ang iyang nawong
gihimong tattoo ang iyang kilay
og ang iyang kulong nga buhok iyang gipatul-id

bisan unsa ang isulti iya kining gipalapos sa pikas dunggan
gikaon na niya ang kalayo
og wala na siya mahadlok anang impyerno

ang boatman sa boracay

ang boatman sa boracay nagpaabot
sa iyang customer nga iya unyang ihatod
paingon didto

sa isla sa kalipay

mababaye man o lalake
walay pili
basta sakto lang ang bayad

kanindot sa view

kaanindot sa view
sa dagat karon

adunay asul nga banca midunggo
og gihuktan tupad sa taas nga punoan
sa lubi nga daghan kaayog bunga
mipahulay ang lalaki
nga bus-ok kaayog lawas
sa daplin sa baybayon
mihay-ad sa puti nga balas
dayon dunay babaye
nga puti kaayo og paa
nakabikini og itom
nga igo lang pod nga milabay

ang asul nga dagat migilakgilak
morag mga mata nga nagpasiplat

gipanita'ng balak sa katam-is

didto sa akong damgo
nag-uban ikaw kanako

didto kita sa usa ka bangko
naglingkod, naghawid niadtong
usa ka ukban sa kalami

mipundok kadtong mga laway
sa suok sa atong mga baba

ug sa kahinam naalimyon
kadtong katam-is sa balak
nga atong gipangita

apan usa ka dakong katingalahan

ang lunhaw nga panit
mipahayag sa usa ka kahayag
nga daw adlaw ang hulagway

lingin, pinutos kini sa mga gamot
nga naghawid sa mga kwarto-kwartong
katam-is ug kaaslom sa kalipay

andam nga mubuhagay
sa atong pagpang-it abri kanila

hasta gyung tam-isa
wala kita manglingi'g nanumbaling
niadtong mga kaaway

nga sa kaibog ug kasina
nanagdiyong ang mga dagway

apan igo na kanato ang higayon
wala na kita nag-ambat
sa lain pang balak nga maangkon

Mga Talidhay

Bisan tuod gisungog ko
sa mga gutling tungod
sa paghandum sa atong
kulokabildo didto sa Elena Tower.

Kaanindot gihapon balikan niadtong
panahon nga kita gabanos-banos
og pagsubli sa atong mga nasinati,
ug kini gipaambit nato sa isig usa.

Kalit lang, nangatawa ta nianang
kinataw-an sa usa ka bata,
ug nahibulong ta nganong adunay
mga agik-ik nga sama niini.

Ang nakaapan lang, wala gihapon ko
naanad nga sa akong pagpiyong,
kining mga talidhay nibukhad
nga sama sa sa usa ka papel.

Apan kini gipilo-pilo dayon
tungod sa atong gilay-on.

HAIKU

langgam nagkalayo
sa kapunawpunawan,
hinay'ng napapas

...

HAIKU

tungang gabii
mga bitoon giagaw ~
suga sa syudad

...

HAIKU

bantay sa lakang
subay sa katilingban~
hulmigas sa da'n

...

HAIKU

sa kaadlawon
napukaw ko sa unos ~
damgo naanod

...

Haiku; paglaom

batong mikidlap
gabunon nga bidlisiw ~
human sa ulan

...

HAIKU; Pagkatuy-od

sa udtong tutok
hayag taop sa ulo ~
aninong kuyos


...

magpabiling magsulat

sa imong pagbalhin unya
sa laing dapit
ayaw unta kalimti ang pagsulat
og mga balak

ayaw pagluib sa pulong
ayaw kalimti ang iyang tingog
ang iyang kahumot
og ang iyang katam-is

isalikway unta nimo
ang mga garay sa iyang pagtago
sa mga kamatooran
nga dili na angayan nimong
mahibaw-an

kay kini pait
kay kini aslom og dili na kini
makahatag pa nimo og kalipay

unta magpabilin ka sa iyang
balaanong mando
nga unta ikaw magsulat
bisan dili alang kanako
bisan og alang na lang unta kaniya

ayaw undangi pag-amuma
sa mga pulong diha sa
nataran sa gugma

hatagi og bili ang paglaom
og pagpadayon

karon sa imong pagpanamilit
dili ta ka pabalunan
og mga luha

ang imong gilabay nga
pula nga rosa
nga imong tan-aw laya na

iyang gipunit og gidala
sa iyang balay og iyang
giampoan

karon imo siyang gisumbong
nga nangawat kanimo

pagbantay higala
kay dako ang silot niana

ang kawat kuno sa pipila ka milyon
mao rang kawata kon mangawat kag
usa ka rosa
sa hardin ni mama

pareho ra usab kuno kini
sa imong pagkawat sa usa ka gugma

pareho ra usab kuno kini
sa imong pagkawat nianang usa ka pan de sal
tungod sa imong kagutom

pareho ra usab kuno kini
sa imong pagkuot sa totoy ni mila
didto sa baylehan

pareho ra usab kuno kini
sa imong pagkawat sa usa ka halok

pareho ra usab kuno kini sa
imong pagpanapaw

pareho ra usab kuno kini sa
imong pagkawat og lemonsito aron ilimpyo
sa imong kuko

pareho ra usab kuno kini
sa imong pagkawat sa imong kalag gikan sa ginoo

pareho ra usab kuno kini
sa imong pagkawat og ice candy gikan sa usa
ka batang nalingat sa iyang pagtinda

og sa balot og sa chicharon og sa
panty og sa brief

og sa ilo og sa tissue og sa
bukog sa manok nga barbecue

apan dili gayod ako motoo.

mipaghot ang itoy sa iro
og ang iro nga dako nagpabungolbungol
miarangkada ang itoy
og miambak sa iyang likod
og gipaak ang iyang ikog
og dayon og dagandagan nga
morag gustong magpagukod

milakaw palayo ang dakong iro
og gibiyaan ang itoy nga morag miingon

"sus itoy, ayaw kog uwata kay
gikan na ko diha"

ok sulaton ko ang kabahin sa kaanyag

nagbagotbot ka nganong may pagka
lewd ang akong mga balak nga bunga sa ka-fertile sa
akong hunahuna
misaka ang imong eyelashes nga morag cobra
nga katugbunon kanako
kaluwaon ka kay kunuhay gilood ka
makes you vomit
pangitaan tikag comfort bag
kon magsuka ka na pero on the other hand
ako kang sultihan
naglawig lang man god ko sa akong mga pulong
misakay lang ko sa akong stream of consciousness
kay nangita lang ko sa tinood nakong kaugalingon
kay sa pipila ka tuig nga nanglabay
kanang mga leaves nga nag-fall
each leaf usa ka tuig
usa ka bukag nga dahong laya
nga nangalata
natabonan na ang akong self sa akong pagka
pretentious tungod ra usab sa inyong gitunol kanako
nga mga norms and rules
of morality.

usahay ( abused word to use) di na ko kabalo kon unsay
akong buhaton
daghang hunghong nga makalibog
daghang sulti og daghang sayop

so, mosalig na lang ko sa kahayag sa lampara sa akong agtang
akong hayagan ang akong dalan
and honestly, i do not give a damn to what will you say
ako lang buhaton ang angayang buhaton
og akong tubagon ang angayan nakong tubagon

for the meantime, nia ko, nagpaabot sa sunod nga hugna
og hulga og hagwa sa akong kinabuhi.

i will just do it. Kay shit, wala kay labot noh?

simpol lang ang kinabuhi my fren

sus simpol lang ang kinabuhi my fren
do not bother
kon walay nay ikahatag pwes
nganong maghatag
kon wala nay ikasulti nganong
man pong magyamayama
kon walay ikagasto nganong man
pong mangimbitar
kon kapoyon pwes mopahulay
kon wala na gyoy moduga
pwes nganong pugson man
pagpuga
usahay my fren
mas maayong magpakahilom na lang
magpuyo og dayon
maglolo....

nakita ko ikaw sa daplin sa baybayon

ang imong taas nga buhok gihuyop sa hangin
og imong gigakos ang imong kaugalingon
niining tungatunga sa kabugnaw sa kaadlawon
dinhi sa pantalan diin ang katapusang barko
mipahawa na

dili ko madungog ang bakho
og dili ko makita ang mga luha
wala ko na usab gianinaw ang
imong panagway


midag-om ang langit og dayon
miulan og ikaw midagan nangita og
kapasilongan

ako usab ania sa dakong lawod sa akong kasakit
sakay sa akong sakayan nga gamay

walay layag
walay bugsay
walay suga diha sa kangitngit

wala ako mangita og kadunggoan
nagpautaw utaw lamang ako sa mga balod sa akong kapalaran

wala na ang gugma kay namatay na kini
gikapoy na ako og subay sa mga mapa sa pagpangita sa gugma
og sa kalipay

kon tinood nga adunay mga agianan ang mga bitoon
kon tinood nga adunay palad og kita walay gahom sa pag-usab sa mga linya niini
nan ania ako
nagaagad na sa palad og sa mga agianan sa mga bitoon sa ilang mga lamdag

kapoy na
mas nindot na ang pagpalutawlutaw na lamang
mas nindot na lamang ang pagpaabot

kon kanus-a og asa
ipiyal ko na kana sa mga kamot sa kapalaran

kon mamatay na ang gugma

kon mamatay na ang gugma
dili mokuyog ang akong kinabuhi
kay kini mopadayon sa paglawig
sa lawod sa pakigbisog
nga kini mabuhi
nga malipayon og busa kon
mamatay na ang gugma og kini
gilubong na sa kalimot
ako, ang buhi nga nabilin
maningkamot sa pagbugsay
diha sa mga bukton sa kalipay

magpakaisog ako diha sa
pagkawala sa gugma
og kuyog sa init nga mga lawas
hapuhapon ko ang mga gasa
sa paghikalimot na kanimo

dugay na akong nabuhi sa kaulag
pasayloa ako, apan kini na lang ang
nahibiling pasalig sa kinabuhi kanako

kon wala ka, dili ko na kana ikamatay
daghan og saad kanako ang kalipay.

sa kalipay
usahay dili na kinahanglan
ang gugma
gugma

og sa gugmang tiunay
usahay
wala ang kalipay

anaa lamang ang mga kabalaka
og kahadlok

dili magkuyog sa kataposan
ang duha

sa gugma anaa
usab ang gaung-ong nga
sanggot sa kamatayon

sa tungatunga sa lawod
sa kasubo
ipadayon ang
paglawig sa sakayan
sa kalipay
bisan og sa tumang
kangitngit

ang gugma sud sa
imong dughan
mahimong usa ka
handumanan na lamang

ako nga nabiling buhi
mogakos sa mga bukton sa kalipay
bisan og ang iyang ngalan
dili na gugma

buhi ako
og ikaw patay na.

mituntong

mituntong siya sa
ibabaw
miawas ang sabaw
sa kalipay
miapaw og nausik
gikan sa iyang sabakan
sakit sakit
apan nakahatag kaniya
sa tumang kalipay

nahikatulog siya
og usab midamgo

buhong
og malipayon
wala na ang pagbasol