red cross

makahiubos baya hunahunaon
nga si Lolo Enggoy
nagtugon nga kon makauli ko
sa among balay sa bukid
ingnon kuno nako si Nanay
nga pabayaran
ang iyang giamot sa Red Cross
sa akong ngalan

1976

morag naulaw akong mama sa dihang
miiyak si dahlia
kay dili kuno siya makalibang sa among
kasilyas nga
ang tubol moderetso sa
buho

....

karon namawi ko
lima ka kasilyas nga water cell
akong gihimo alang kaniya

....

dili na hinoon siya kalibang
kay patay na

unang hapwag

unang hapwag
sa katreng uway nga kabilin
sa akong apohan nga
gilook sa iyang ikaduhang
asawa nga pagkabatan-on

makaulaw kay
sa ako mang "ig-agaw"...

si tonio

si tonio nakit-an nako
nga misaka sa punoan sa
among kaimito

nangawat

apan wala na lang ko
misumbong sa akong nanay
kay gihadlok sab ko niya
nga itug-an ko
nga nakit-an ko niya
nga nagbatil
silong sa maong punoan

hamber

tungod sa among panaghigala ni
hamber
nga akong silingan
gidapit ko niya og
paniudto sa ilang balay

siya og ang iyang nanay
lang ang nagpuyo

humot ang mais nga nilung-ag
og tagsa mi og
palotpot nga inon-unan

wala nay dugang

gawas na lamang
sa usa ka baso nga bugnaw kaayo
nga tubig nga gikan pa sa ilang
banga nga karaan

kape

kape nga dragon
singko nga bakya

diha ra mi kutob
kaniadto kay si nanay

maestra ra man unya si
tatay palahubog.

sa babayeng nagbirigbirig

'yaw ka
kay kining akoa
dili baya kay para ihi ra ni.

bilib sab ko nimo Bay
usa na ka gatos ang akoa

wala may nahitabo
ang imo usa lang

apan mikurog jud ang
kalibotan

p.s.
'sensya na 'to
kay kining ako ulan

ang imo
kilat man

ang maulahi kuno
maoy makahugas sa mga plato

tinood ka Tay?

sa bag-o pa

sa bag-o pa
dili na kinahanglan nga hagiton pa ko

kay atua
bisan way pa naga-plastar
naga-fire na

apan karon
(way komedya)
kitang duha manghagit pa
kon kinsa ang mouna

kon kinsa ang ibabaw
og kon kinsa ang magpailalom

og kon dili magkasinabot
matug nga way bagotbot

sa kadugayan

sa kadugayang ipon
diha sa katre ang maghalok mao
na lamang ang
mga kinot sa atong mga sampot

silang nahiuna
basin nalooy kanako kay ilang gipakita kanako ang dako
kaayong hawan na nga agianan
aron unta nga sa akong paglakaw
dili na ako maglisod
og wala na akoy hunahunaon kon dili
ang paglakaw na lamang
kana bang dili na magubot
ang akong hunahuna
kana bang
dili na magusbat ang akong
pinahapay
o mapandol ang akong mga tiil

tuod limpyo og hawan na kaayo ang
dalan alang kanako
apan pasayloa ko kay dili kana mao ang akong
gipangandoy sa akong panaw

unsa kaha kataas kining kilay sa akong garbo
nga mas gusto man nako nga magsugod na pod ako sa mga sinugdanan?

ang pagpuyo sa kalibotan
ang pagpakabuhi ang
pagpakatawo
sama kana sa
pagsigig hawan sa
kakugnan

morag gahimo ka
og dalan aron ka
makaagi makalapos
sa unahan

dampas, siging dampas
dili na gani
makapahulay kay sa
paglingi nimo sa likod
puros lang gihapon
kakugnan

sige kang gahawan
apan sagbot man lang gihapon

sulat alang sa iyang bana

gimahal ko nga Intoy,

kumusta ka na? dugay ka na mang milayas sa ato, wa na gyod ko kabawo kon asa ka nagpuyo. Kon wa ko ingni ni Junjun nga anaa ka na diay sa davao, wa ko kasayod. Si junjun ang naghatag sa imong adres, busa nagsulat dayon ko nimo, kay gimingaw na ko kaayo nimo.Namaylo ko og kwarta ni Emang aron lang mapadala nako ning akong sulat para nimo.
sayod ko nga dako kaayo kag kahiubos nako tungod kay sa dihang gigukod ka ni tatay og sundang
wala man gyod ko nagpakita nga milaban ko nimo. Kadtong giyab-an ka ni nanay og usa ka arinola nga ihi, gisulayan lang ka niya kon asa kutob ang imong pailob. bisan gani si tatay, iya ka lang usab
nga gisulayan kon asa jud kutob ang imong gugma kanako.
maayo unta og magbalik tang duha, kay dako baya kaayo ang akong gugma nimo.

kanimo magmahal sa hangtod,

gina


P.s.

nakadaog man kuno ka og lotto. tinood?

re: musta

from: valiente_72@yahoo.com.ph

to: diegosalvador@gmail.com

date: may 11, 2007 3:32 pm

subject: musta

_ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _

bai jigs: matsalam sa “waray-english phrase book” nga imong gipadala. bisag 3 ra ko ka adlaw diha sa tacloban, pwerte gyud nakong lingawa. ang bahalina sa barugo nga gilaklak nato kay hangtod karon gisigehan lang gihapon nakog dug-ab. haha! morag usa man siguro to ka swimming pool ang atong nahurot, no? oi, kahinumdom ka atong tisay nga lawm kaayog kandiis ug budlot kaayog ngabil nga lami gani tusdikon og alpirel? kato bang gianggaan ni elvis og “bakukang nga naka-t-back” -- kay ako bitaw hinuong nakasakay sa fast craft pag-uli na nako. ang animal kay padulong pud og oroqueta! ang akong ka-groggy kalit nawala dihang nakit-an nako siyang gakaon og noodles sa canteen sa terminal. nagpabuang-buang pud kog kaon og noodles ug milingkod tupad niya. arti ug istrikta siyag nawng, pero ok ra man diay kung imo nang istoryahon. ug gitabangan nako siyag bitbit sa iyang bagahe. ang iya diayng ngalan kay angie. tawn, nagkamuritsing gyud kog sabot niya kay waray-waray man -- di motubay sa akong binisay-an. ug bagsikon sad gyung bayhana tungod kusog manigarilyo, itom ang manicure sa kuko, kahibaw motukar og sista, ug di bitaw motuo og ginuo. ang ako diayng gikabiliban -- fan sab siya sa “ramones” ug “the clash”. kamatikod kong ang iyang ringtone kay “blitzkrieg bop”. sa gamay nakong pasiaw, mobungisngis pag-ayo -- morag retarded nga ga-orgasm. ug karon gaminghoy ko kay: “ginmingaw ako han iya.”

hey ho,
baludoy

sa pagpangita nimo og kalipay
sa bisan asa na lang og sa bisan unsa
sa kilid sa kangitngit og sa
dayag nga kahayag diha sa mga pultahan
sa mga simbahan
sa plaza og sa diskohan
sa kon asa ang pista og kasal og bunyag
hangtod nga miabot ka sa haya sa usa ka patay
na nimo nga higala
bag-o lang morag nanglimbayot ang imong balahibo
og mikurog ang imong tuhod
og nawagtang ang mga kasamok sud sa imong dughan

unsa na lang kaha og miabot na siya dayon ikaw
anaa nagpangita pa gihapon?
pagkalooy gayod kon mahitabo na kini
dayon ikaw
walay sapot walay kalo
walay singsing
walay tungkod walay haligi nga sarang imong
kasandigan walay rehas sa hagdan nga imong kahawiran
og dayon ikaw nahulog
nga wala makalitok bisan og usa na lamang ka pulong?

nagfragment
ko sa kaadlawon
na-infected akong files
nangita ko
og remedyo
wala gyod busa aron malingaw nako
ang akong
kapungot, dia nagpakaaron-ingnon
nga wala ma
affected
nagbalakbalak,

tan-awa daghan kaayo
palihog ayaw lang basaha kay basin madamay ka sa mga nagpahipi
nga kasuko,
nagdala na ko og maso
aron pulpugon nako ang tanan nga pundasyon
niining
dakong pader sa akong kagahapon.

daghanapanwalaylami
sorry
apangikininahanglan

ayawlanggodogbasa
nganongimomangyodkongsundonnga
walakamaymakuhakanako
niiningakongmgamugna
ngamaounyayimongikalibogsaimongkinabuhi
walanaangkatahomsamgaalibangbangdinhi
angmgabulakdugayrangnangalaya
angmgapanganod
itomnakaayoogmangutanakokonandamkanabasamakusogkaayonga

ulan.

walakoylabot

walakoylabotkonunsaysaktong
spellingogunsaonpagsulatangmgapulong
ogkonkinibalakbaodili
walakoylabot
labadangakonguloogdilikokatulog
dianagmatatibookgabiinagtikawtikaw
walakasabotkonunsayangayanngabuhaton
moraggikalagkilagsaakongamahan
ngagimingawkunokanakosumalasaakong
mananambalngatubaraybayagoggamitangputikaayongitlogsamanokngabisaya
didtosbaybayonsairasan

ginhawa
basinmamatayka.

pagpaabot

sud ning kan-anan
moorderkougkape
sip
sip
sip
sip
hangtodnganahurotnaangkape
bayadsabill
lingkodlingkod
tanawtanawsagawas
tutoktutoksaposte
sazaneco
walalanggihaponmiabotangakong
bagongkabit.
shit
shit
shit
shit
kapoyogpaabot.
txtxtxtxtx
walaytubag
call
missed.
walaytubag.
kapoykaayoogpaabot
laminaunta
biyaanapandiligyodmahimo
sakitnakaayoangakongpuson.

3:27

daghan pa unta ako og isugilon kanimo
apan gisaknit ka na
sa mga kamot sa katulugon

dili ako makigbugno
sa imong mga kahuyang
wala akoy dungog niana
wala akoy gahom

aron buntugon ang mga katingala
magpabilin ako sa dughan sa pailob
magpaabot

dayon sama sa naandan mobiya na usab ako
aron imo akong
himamaton sa imong panumduman

miawit na ang usa ka hinanok
og ako
usa na lamang ka kahayag nga nag-atong diha
sa pagpukan sa kangitngit.

gisabod ko kini
pagkahuman niini andam na usab ako sa paglakaw
wala ko kini gibilin
og wala akoy gipiyalan niini
gilabay ko lang ang tanan
aron dili na kaayo bug-at ang akong dalhon
sa akong panaw

ikaw nga mopunit niini
pagbantay
dili angayan nga ikaw
magpabilin
sa iyang mga lingla

ang kinabuhi panaw kini
dili kini usa ka panimalay og panimuyo
sayop ka
nga magdaro og mananom nianang imong
mga hunahuna

ang hunahuna usa ka kargada
ilabay kini
hawani kini sa mga pulong
pangitaa ang pagpaluag
ang kahaw-ang

kay unya mora ka na dayon og panganod
gaan og layo kaayo og maabtan

nagsulat ako
dili alang kanimo

labi na
nga dili usab alang kanako

ang akong mga pulong
wala magsubay sa mga dalan nga ila
nang gilimpyohan
aron unta sayon na lamang ang
pagpauli

og ang paggikan

apan wala ako magsunod niini
nagsulat ako
dili tungod nga maghimo usab ako og akong
kaugalingon nga agianan

nagdampas ako sa baga og taas na kaayo nga
mga sagbot
gihawanan ko lang
wala na akoy laraw pa sa pagdaro og pagtanom
kadyot lang ako dinhi
og gusto ko lang ang paggawas
ang paghingkalawas
sa ilang gihatdan kanako

ngiob gihapon, hanap gihapon og busa ayaw ako og sultihi
kon unsa ang sakto og unsa ang saktong dalan

kada oras, mao lamang ang paglakat
wala nay lain

kasilag og kasuko

kon magkita kitang duha
dili na ako makaila kanimo
og ikaw dili na usab makaila
pa kanako

kitang duha wala na sa atong
usag-usa
ang anaa lamang diha sa lawak
mao ang usa ka masulub-on nga
awit sa hangin
nga nahisalaag og dili
makagawas kay
nasirad-an ang
mga bintana og pultahan

si genaro

wala magmahay si genaro
nga siya karon
namaot na pag-ayo: namyahok
ang mga aping
nga kanhiay mas bus-ok pas kasoy
ang iyang mga pilok nga balod
nahimo nang linaw kaayo
nga sapa nga walay kisaw
(kay wala na ang mga rami
og mga haw-an)

ang iyang dughan wala nay
sulod og ang iyang kasingkasing
morag pasas nga haskang ugaha
nabayod

ang iyang mga kamot morag
mga kabilya nga nagbitay og natay-an
mora na siya og usa ka
biseklita nga gubaon

wala siya magmahay nga kining
tanan iya nang nabalhin
sa iyang pinalanggang anak
nga lalaki

nindot kaayo ang iyang pahiyom
sa nangliki na niya nga mga ngabil

dili na itom ang itom diha sa kangitngit
sama nga ang puti dili na usab puti diha sa kahayag

sa tumang kahayag hanap na ang tanan
og sa tumang kangitngit wala ka na usay makita

managsama silang duha
og bisan unsa ang imong pilion
walay kalainan

unsa ba ang tinood nga bulok sa kalooy?
mao kana ang pangitaa kay mao kana ang kalainan nilang duha.

ayaw kawala sa passing Bay.

padayon lang

abi nimo og nawala ko? wala.
unsaon ba god pagkawala sa tawong
nawala na daan.

padayon lang. Pangitaa ang imong kaugalingon
diri sa akong kaugalingon
basin og makit-an ra nimo unya
puhon ang imong dagway
sa akong dagway
nga hagbay rang nawala
og sa kaanad na niining mawala
wala na niya batia ang
pagkawala.

ayaw kawala. kay ang pagkawala usa lamang
kana sa natural nga mahitabo sa atong tagsa-tagsa
ka kinabuhi.
ayaw kahadlok kon mawala ka. ang kahadlok bunga lang usab
kana sa kahadlok, og kon mahadlok ka
managhan silag samot tungod ra usab kanimo.
kon mawala ka, lingkod lang.
basaha ang nangagi.
lantawa ang umaabot.
painiti sa imong sampot ang imong karon.

dili kita angay nga magdali nga masakpan dayon
ang atong mga gipangita
kay mao kana ang dakong

aha!

sa atong kinabuhi. mao kana ang kahulugan sa kalipay.

ang Dios ko! Dios ko!
nganong gibiyaan mo ako!

karon, sugdi na ang pangaliya.
unsaon? pagpuyo.

sa lalom nga kagabhion

sa lalom nga kagabhion
nga dili na matugkad bisan gani
sa iyang kaugalingon nga
kangitngit

pangitaon ko gihapon
ang mga saad kanako sa Ginoo

ang Ginoo, ang Dios, ang Magbalantay
kanako

dili na sa iyang mga Pulong
kon dili sa iyang Buhat diri kanako.

para kang R.

alas 2:31 sa kaadlawon
maoy akong pag-open sa computer
invisible akong YM

mao poy pag-out nimo
nagkabalios ang atong mga damgo

nagpabilin ko
sa pagmata, pagtikaw, pagpakabuhi

magpabilin ko
nga agalon sa akong mga kamot og mga mata
og walay makabuot kanako
kon unsay akong buhaton kanila

wala nay pulos ang katulugon kanako karong orasa.

sa kaadlawon migawas ako sa akong
lawak
dili tungod ka giuhaw ako
aron moabre sa ref og moinum anang
bugnaw kaayong tubig

sahi sa naandan
mogawas ako niining lawak aron
silipin ko ang bulan

og sa walay kahadlok akong abrihan ang
mga bintana og ang pultahan
aron lang unta mosulod ang
iyang kahayag

dili ko na ikahadlok nga imo akong tawgon
nga usa ka mambabalak


(nga nabuang)

dako ang warning nga kini makadaot
apan wala gayod ikaw nagpatoo
gisulod mo ang lawak bisan pa
sa usa ka risgo

wala nimo kini gipanumbaling
migawas ka
nga nanaghoy

malipayon kaayo, wala na ang kahadlok

kon dili na maduga ang
panit sa imong punoan sa nangka
og kon wala na ang kahumot sa mantsa niini
pasayloa nga ako mobiya na
kay sayod ka
nga wala na akoy laing puti nga kamisen
nga ikapanghambog nga
ihalad diha kanimo

kabahin nimo

sud sa akong damgo
mga ala una na sa kaadlawon
nakita ko ikaw
og duol kita kaayo
nag-atubang ka kanako
og mipahiyom
apan ako wala mobalos
nagmug-ot og dayon
nakog biya
palayo nga nagmalipayon
og wala na molingi pa

abi nako og napasaylo na
kita
hangtod karon
wala pa gayod diay

wala ko masayod sa tuyo sa
akong kanhiay nga classmate sa
ateneo

nag-chat mi kagabii
og bisan unsa na lang ang among
gihisgotan
sama sa among mga sex life
nga wala nay klaro
kon kapila na lang gayod
sa usa ka bulan

usahay gani kuno
mabuntagan siyag pinaabot
apan wala gayoy
nahitabo

usahay sa pag-gtg na
og pakita anang emoticon
nga bye bye

makapangutana ko kon
unsa gayod ang iyang
tuyo sa pagpunay og
balik sa among
mga nangagi

nga hagbay rang
gilimutan sa daplin
sa sapa nga
wala nay mga isda

migilak ang mga bato sa dalan
nga akong agian matag buntag

mora bag nagbagotbot
nganong dugay kaayo ako nga miabot

kay mawala na ang mga
hamog sa ilang mga nawong

nga walay mata og walay ilong.

nindot kaayong tan-awon ang
bag-ong pagsilang sa adlaw diha sa lunhaw kaayong kahumayan

morag naulit ang dulom nga inanay nga gipapas sa kahayag.

namulak nga bulahan

si nong rudy og ang iyang asawa nga si lily
nga mga walay anak
og bag-o lang nga nakauli gikan sa chicago
kuyog sa iyang ugangan nga biyuda
pito na ka tuig nga milabay
nalipay nga naghangad
sa habog nga punoan sa bulahan
nga bag-o lang nagpakita sa daghan
kaayong naggitib nga mga
bulak

mihunong ako makadyot
aron molantaw pag-ayo sa paglupad

sa usa ka tulabong


sa iyang pagkayab
wala gani niya patinguga ang hangin.

mga puti nga payong

pagkahuman sa kilat og dalugdog
sa kilid sa mga kasagingan

namukhad ang mga puti
nga mga payong sa daghan kaayong

mga ligbos.

kaniadto

kaniadto
nadungog mo ang akong tingog
diha sa kamingaw
mipahipi ka og nagpakaaron-ingnon
nga bungol

wala mo madungog ang tingog
sa akong budyong
og sa akong kakapoy akong
gigakos ang kahilom og sa silong
sa kahiubos ako mipasilong

kaniadto kadto...

karon wala ka nay madungog sa akong
mga pangagho
wala na ang agulo sa akong pagbangutan

nasayod na ako sa agianan
sa kalipay
ania na kanako ang mga pulong
nga makapaabri sa iyang tinaguan
nga pultahan
ania na kanako ang yabe sa
kinabuhi

ako lamang og ako lang gayod lamang
ang nasayod niini

busa sa dihang ikaw na usab ang gihadla
sa mga anak sa kasakit
og sa ilang tigulang na nga inahan
sa kapakyasan
sa dihang imong gisangpit ang akong ngalan
karon nga ikaw nagpangayo og panabang
wala na usab ako nga makadungog kanimo

gisirad-an ko na ang akong kasingkasing.

sayon ang pagsulod

ang akong nahinumduman
mao nga sayon lang gayod ang
pagsulod

daghang panghitabo sud
sa dughan
daghang buhagay ang wala
mapug-ngi
daghang miawas nga
wala na gani masalod
daghang mga dugos
og mga tunok og ako nasamdan

ang dili gayod nako mahikalimtan
mao ang paggawas

bisan

bisan gani kuno kadtong
nangatulog

og nahikatulog
og ang nagpatulog-tulog

adunay dakong kalambigitan
sa pagtuyok sa kalibotan

bisan ikaw nga
miundang
og mipahilayo
aduna gihapoy dako
kaayong kalambigitan
kanako

wala ka masayod

unsaon mo ba pagkasayod
nga layo ka naman kaayo kanako

pasitib epek

pasitibe epek
akong komint

da, nanulat lagi
og kalit

( kataw-onon ko
pero

ipakit


(kon sa ROTC pa

pocket your smile ba)

lang nako akong
pahiyom

actually,
nagsugod kini sa kamingaw sa baybayon
og nakapangutana mi sa akong
suod nga higala

ngano?

wala ko'y ikatubag
kay kining ako baya
sulat que sulat lang

kanang walang paki (alam)
then
nakapangutana siya nga
morag adunay usa ka batikang
manunulat man
sa baybayon nga
nag-pack-up

so mi-comment ko basin og
gibaduyan
kay siya ugod banggiitan man
dili pareho nako (nato) namo
nga mga

totoy bato pa man
mga nukaon pa man og mga bitiis
og mga barikoson
og mga bagtak

hayy, nasaypan lang tawon ta ani da

kitang walang klas
dia nagpakitang gilas.

maanindot ang baybayon
hangin
puti ang balas
gani nagbalikbalik ako dinhi

makalipay ang palibot
og ako nahimout
wala ko kapugong sa akong gibati

gihubo ko ang akong sapot
midagan ako paingon sa dagat
og ako naligo

wala na akoy labot kon ang
nakakita sa akong sampot
og sa akong igot-igot
naglagot

milangoy ako
paingon kanimo
apan unsa bay imong gihimo?

nasaypan mo ako nga ako
dili nimo amigo.

kaluhang balak ( bunga sa atong chat.)

Kita ang kaluhang balak;
kita nga ania ilawom sa walay balas nga baybayon.

Kita nga naghigda dinhi sa mga pulong,
Nagpahapuhap sa mga halok sa hangin

Ug nagsayaw uban sa mga balod;

Kita nga nagpaanod uban sa mga samu,
Nisalom sa kalalom sa atong kalipay
Ug nanghilam-os sa bugnawng tubig sa lapyahan -

Kita, Oo kita, ang kaluhang balak;

Kita nga ania ilawom sa walay balas nga baybayon.

.

Gaksa ako ug hugot sa mainiton mong gakos.

Gipanugnaw ako sa tubig, busa gaksa ug hagki ako.

Ubanan tang duha ang baybayon sa iyang pag-inusara.

Duyogan ta sa matam-is nga inagulo ang awit sa mga balud

Mag-awit,magsayaw ug maglipay kita.

Kita ang kaluhang balak;

Kita nga ania sa ilawom sa walay balas nga baybayon

kausaban sa baybayon

nagpasad ang hugaw
sa lapyahan nga kanhi limpyo ug malinawon

natabunan ang mananoy nga
huni sa hangin ug mga balud sa paghot sa mga iro
nga midagsang sa baybayon

nanghasi sila sa tibuok hunasan
gitugaw ang mga isda ug kinhason sa takut

nagsugod kini dihang mipabuhagay si inday
sa alimyon sa madanihon niyang kahumot
ug nasubay ni manoy ang gigikanan niini

walay imik ang tanang nagpuyo sa baybayon
wala silay mahimo sa kahugawan nga dala ni manoy

nausab na karon ang templa sa ilang mga balak
uban sa pagkahanaw sa kaputli ni inday

ang hinungdan

dili hangin
ang nakapatikwang sa atong sakayan
wala gani labot ang mga balud niini

nayabo kita dihang mibalhin ka ug lingkod
gikan sa akong atbang ug misabak sa akong paa

ug dili sab tungod kay sa unsa lang hinungdan
nga naingon ka niadto

dili gugma
ang nag-aghat kanimo nga mo-uban kanako
wala gani labot ang kaayohan natong duha niini

kaikag sa paghimo ug balak
balak nga makahubog sama sa alak
maoy nagtukmod kanimo

kaulag sa paggaray ang hinungdan
way laing kapasanginlan.

balak sa lasang

sulod ning lasang
nagpasad binhi sa kinabuhi
kinabuhing limbatianon

sagbot kahoy
dagko gagmay
mamunga di mamunga
mamuwak di mamuwak
tunukun di tunukon
humok gahi

mananap gagmay
hayop dagko
magkamang molupad
mobarog molangoy
bangis malumo
mamaak di mamaak
huyang kusgan

balakon ko silang tanan
ug balakan nila ako

balak nga bug-os
tiunay
putli

di bakakon

balak sa baybayon

dodong:
wa na kay angayan balakan

inday:
naa gihapon... ikaw

dodong:
nagmingaw na ang baybayon

inday:
daghang balak apan...
dili nako ganahan isulat pa

dodong:
matuod kana,
sama sa ilawom sa mga bato,
sa balas,
diha sa mga lim-aw

inday:
gani

dodong:
apan walay balak alang kanako...
wala na

inday:
aduna pa...
sama sa
hubui ang akong kalag
didto unya sa atong pagdamgo

dodong:
hain naman diay
ang kinabuhi sa hunasan?

inday:
ani pa ako...
ania nagpaatbang
nianang hunasan nga giingon mo...
buhi ug mapahiyumon gihapon

dodong:
nakahukom baya unta ko
nga dili na mobalik pa sa baybayon...
kay moadto na ang sa lasang ang bukid...
mangayam