adunay mga butang
nga tapot na kaayo nimo

ang tattoo nga
krus sa imong
wala diha sa
dughan

ang uwat sa imong
bagtak
nga paslot kaniadto
sa tambutso sa
motorsiklo didto
sa camiguin

ang lama sa kaulag nga
mibuhagay sa imong
paa nga bisan og hagbay
rang nawala
maayong pagkatapot gihapon
diha sa imong hunahuna

ang samad sa imong kasingkasing
nga walay pagkapilot

kon magpahungaw siya

mora siyag nagdala og daghan kaayong bulingon paingon sa
Dicayo,
og didto sa suba manglaba siya
inigkahuman iyang iladlad ang mga
bag-ong nilabhan sa ibabaw sa mga bato
unya kadtong mga nanglabay
sakay sa bus sa ibabaw sa tulay
nagpunay og lantaw

ambot, ngano ba kini siya nga ganahan man
magyagyag sa iyang kaugalingong baho sa mga katawhan

wala baya makatabang kining tawhana
gawas lamang sa hisgot dayog ingon: pagkalooy sab nianang bayhana

sa laing bahin, unta, gihipos lang niya ang iyang mga bulingon
kay lood kaayong lantawon

i
kon makamao
lang unta siyang mosulat

makita mo unta ang
mga dugo nga nagtulo gikan
sa baba sa iyang
kasingkasing

ii

sa laing bahin mas makamao
kining tawhana mosulat
kay bisag gadugo ang iyang
kasingkasing
ang iyang mga pulong miawit
gihapon

ang imong makita mao ang
mga buwak diha sa iyang bintana
nga namuswak

unya ang iyang nawong sanag
morag adlaw nga bag-ong
mitumaw sa dughan sa bungtod

paabot lang
sa sunod nga mahitabo
kon moabot na
padulhog lang sakay
sa tabanog

kon unsay dangatan
pad ray alagdon

ning katuigan
nga imong giabtan
adunay mga
pangutana nga
dili na angayang
tubagon

bisan pag dili
ibungat
salabtonon na
ang tubag

inig abot sa unos
dili na
magpanghadlok

kon kinsa kadtong
mokuyog kanimo
sa kalisang man o
sa kapildihon
paabota

sila ang angayan
kanimo

moabot ang takna
nga ang imong pagbalak
magpahat sa
tanang matood

apan nianang higayona
guba na ang balay
gipamilo na ang imong mga sinina
unya andam na ang imong
hunahuna
sa imong padulngan

kon mangutana sila
moingon ka
walay nausik og
wala say nanobra

kon asa ka gayod
wa ka usab masayod
apan karon lahi na ang
imong mga tunob
makamao na kining motikang
unya wala na ang
kurog

kon maburos na pod
gani ang akong
iro

(bation na pod nako
ang dakong
kahiubos)

batia ang musika
ayaw lang diha kutob sa
usa ka pagpamati

sunod niaan mao
ang pagkiay sa imong
kasingkasing
ang pagsayaw sa imong
mga tiil
ang pagyugyog kanimo
diha sa duyan sa
kinabuhi

inig piyong nimo sa
imong mga mata
inig isa nimo sa imong
mga kamot

mabatian mo pag-usab
ang batang gihadla
ni nanay diha sa iyang
uway nga duyan

kabahin sa usa ka dakong parol

naghimo og parol
ang piniriso nga akong
nahusgahan sa salaod
nga tinood niyang
nabuhat

gipalit ko ang parol
gitaod nako sa bintana
og matag gabii
gihandom ko ang
usa ka tinood nga bitoon
sud sa akong hunahuna

ang among katabang nga mubo
og panglantaw

samtang nanghugas sa mga plato
human sa among panihapon

giingnan sa akong asawa nga
unya dapit magpahilot siya kay

miabot ang usa ka hilanat nga
kalit lamang og ang iyang pagkatabonon

miuyon, og ako nga naglagot miingon
nga moadto siya sa gawas karong gabii

mangutlo og mga buwak dayon
sud sa balay human kini ibutang sa

usa ka florera nga puno sa tubig
magkuha siya og posporo og usa ka

kandila. Wala siya kasabot.
og aron matabonan ang iyang pagkainosente

gihulma niya ang usa ka pahiyom sa
iyang ngabil. Samtang ang akong asawa

nagsugod na sa iyang hysteria.
Nagsalimuang ang iyang nasabtan.

ako naglakaw
sa puting balas sa
baybayon

ayaw katingala nga
wala ako'y mga
tunob nga imong makita

apan kon mangutana ka
sultihan ko ikaw nga ingon ana gayod ang mahitabo kanako

kanamo, kami nga dili sama kaninyo,
nga kon ikaw molakat, duha ang imong tunob og kuyog sa imong
asawa og tulo ka anak, makita mo gayod ang ilang mga tunob og ikalipay mo kini
kay duna gayo'y mahibilin sa inyong pagbiya nga basahon sa sunod nga moabot
ning puting balas sa baybayon

apan kami
wala nay mahibalo kon nakataak ba kami dinhi
walay balod nga mopapas

kami ang mga walay tunob
kami ang mga walay ibilin
kami ang mga walay kabilin
kami ang dili sama ninyo

mangutana ka kon nagmalipayon ba kami
tubagon ko ikaw sa usa usab ka pangutana:

nagmalipayon ba usab kamo diha sa
inyong gibilin nga mga tunob?

pagkadaghan, pagkadagko sa mga balod
nga mipapas
mahinumduman pa kaha nila ang tanan?

balik balik lang ang
tanan

kinaadman
o kapalpakan

balik balik lang
unya ikaw pagkabuang mong

moingon nga
pinalangga ka

nga lahi ka
usa ka man baya sa mga balik balik

di ka lang kaatik
wa ka man god milantaw pag-ayo

sa mga milabay og sa
mga umaabot

nagduko ka lang
unya imong nakita ang imong mga tiil lamang

mihagunos ang
motor sa karsada sa
tungang gabii

wa na ko
makurat

bisag unsa pa'y
moabot
bisag unsa pa'y
mobiya

di nako madutlan

dili malalim
ang imong bation

kon ang tanan
nimong mahikap
mamatay

kon ang tanang
pulon nga imong mabungat
dili mo madungog

kon ang tanan nimong
gibuhat
dili makita

kon ikaw mismo
nga imong kuyog sa
tibook mong kinabuhi
wa mo maila

ikaw ang
tanan nga akong
gidamgo

ikaw ang tanan
nga sukad-sukad
wa gayod
nako mahikap

ikaw ang tanan
nga akong gihunahuna
diha sa
tanang kahago

apan ikaw ang
kahayag nga igo lang
mikiblat
dayon og kahanaw

ang pagtukod
sa balay
ang pagpalit og
bag-ong
sakyanan


ang pagpaanindot
sa hardin
ang pagtaod sa
wind chime

ang pagkaligo sa
iro
ang pagtugway
sa kabayo

gikalimtan ko
na kini
sa bag-ong panaw
wala na kanang
tanan
kanako

pasayloa, kon
moingon ako
ang kabayo, ang hardin,
ang wind chime, ang iro,
ang kabayo

puros na lang hangin
diha sa pagsalop sa adlaw
diha sa paghubas sa
pagbati
sa kangitngit diha ang
akong mga bitoon

ang tanan
kanako
anaa na kanimo

apan bisan pa
niini
ania pa gihapon
kanako
ang akong pagkaako
nga bisan ako
wa pa gihapon
kabalo

kon unsa
og ngano

milabay ang
manuroyay og
ice drop

sunod ang sa
chicharon

ang banana cue
og puto

gilabat kini sa usa
ka samin

milantaw kita
naghunahuna ko

padayon kita pagkaon
sa pizza
inom sa coke
tupad ang dakong plato
sa caesar's salad

upat ka wings sa
fried chicken
og halang kaayo
nga chili sauce


ngano ba?
wa ka mangambat

napadpad kita sa kalibotan
nga puno sa mangga

swerte ka
kinaham mo ang mangga
diha ka sa mangga
nabuhi
nahimong tawo
misanay

dimalas ko
sa usa lamang ka baho sa
mangga
ikamatay ko na kini

busa, unsa pay pulos
nako sa kalibotan ning atong gipadparan?

molangyaw na ako
salamat sa pagsabot
usa ako ka estranghero dinhi
ayaw ako pugngi

adto ako didto
basin, basin, atoa ang akong mga kinaham

ako lamang og ako lamang
ang nasayod niini

pagdibuho

milantaw
kos samin
gidibuho nako
ang akong
nawong
sa papel

wa ko pa gihapon
masabti ang akong
kaugalingon

adunay kunot sa
kagahapon diha sa
akong agtang
nga gusto nakong
papaon

baga ra kaayo ang
kilay
tangkag ang akong
dunggan

kulang pa gihapon
sa halok ang akong
ngabil

angst

kanang
human niya nakuha
ang tanan
unya ikaw rang usa
nabilin
diha sa bartohong
inn

pagkawaypuangod
maoy akong nabungat

pagkahuman nahulma
ang balak nga dugay

kaayong gisulayan
pagyubit

anaa gibilin sa tokador
gibyaan

gusto unta nakong puniton
aron amumahon

apan ang akong mga kamot
samdan

kon ako kining kuhaon
basin ako matunok niini

sa dugay nga kalaay
nahait man ang tunok

sa balak nga punyal.

ang grasya adunay tulo ka mga
anak

sa iyang maayong pag-amuma
nakaangkon na kinig tagsa-tagsa
ka gahom

nga nakahatag kanilag kagawasan
og kaugAlingong mga paghukom og

ang grasya kuyog sa katigulangon
nagpuyo sa balay nga karaan

naglingkod sa gitay-an nga lingkoranang
puthaw

nagtimpla og kape, hawid sa libretto
sa usa ka Opera, miawit nga nag-inosara

pagkahuman, gihambin na usab ang
kahilom

atubangan sa iyang Myna nga karon
gibalikbalik ang iyang mga pulong.

nangliki ang ngabil
sa tiguwang
nga dakog kasuko
sa kalibotan

kadtong wa imbitaha
sa among salo-salo
kay lagi adlawan man
sa akong asawa
iyang gipangkasab-an
"nganong ania man
kamo dinhi? dili kini
pista!"

iyang gibugaw sama sa
mga maya nga gustong
moukit sa among mga
gihay, gitudlo niya sila
og giingnan "pamahawa
kamong tanan!"

pagkahuman, bisag sakit
ang iyang kabukugan
gisirad-an niya ang balay,
gisirad-an niya ang labat
og mibalik siya sa sulod
gipangita niya ang
kahulugan kon unsa ba
kining kalipay

usa kini ka salampati nga
miabot, mitugdong sa
altar nga puno sa prutas
giithan niya ang tanan
didto ug dawog lupad
gawas sa mingaw nga
bintana.

miutong si samson
morag misyagit og syatong
namati ang tanan
naalingogngogan

ang syagit diay sa
dihang mitag-aw kos
iyang nawong
usa ka pagtabon sa
dili niya angay unta
makita nako

namati ko, mitutok ko
sa iyang pag-utong
sa dugay, naamgohan ko
nga siya buot diay magpadayag
kon unsa siya

pamation diay pag-ayo
ang kalanog sa iyang
pagmahay
apan ang pulong nga iyang
gigamit
abi mo og unsa?
puros kalipay

gibati mo ba ang
pagpadulong didto unya
wa ka masayod kon
unsay dangatan?

kasagaran ka na
unya aron ka moabot
pabalonan ka og
paglaum, apan nasayod

ka ba, niadtong nagpadulong
ka, kuyog ka nako, unya
gisultihan ta ka nga ang
pag-abot didto mao ang
kamatayon? unya dali

dali kag simang sa dalan,
kay hadlok kas usa ka
panagna, unya miabot ko
didto, nakita mo  nga  ako
buhi pa gihapon, unya
imong kong gitawag nga
bakakon, unya layo kaayo
tang duha, nakita mo ang
akong anino nga taas kaayo
unya ang akong tingog
milanog kay nagbanda
banda kini sa mga bungtod,

kon miabot ka pa unta dinhi
makita mo ang tinood,
anaa ang mga buhi nga
patay, anaa ang nagsugilon
nga wala sa ilang kaugalingon,
anaa ang mga mata nga
naglantaw sa unahan apan
wala na mogikan, anaa ang
mitutok kanimo apan wala
mamati.

kon magkita kita pag-usab
puhon, kon makalakaw pa
man gani ako ugaling,
ingnon ko ikaw nga ako
nagsulti og magsulti gayod
sa tinood, apan dili mo lang
gayod kini matukib, pasayloa
apan dili mo usab gayod kini
masabtan, tungod

kay gikan pa sa una , managlahi
na ang atong kalibotan.

Giingnan nako ang gihabogon sa bukid,
ang gilapdon sa dagat sa unahan nga misangkad
sa tibuok kalibotan, ug ang pangpang
nga gihaplaan sa hangin:

"Wa ko mahadlok!
Dako akong buhi!"

ang mga kabulakan sa kiliran sa bungtod
wala mananghid kanimo diha sa ilang pagbukhad
wala pod magpahibalo sa ilang pagkalaya
gusto lang nilang masayran nga gawasnon sila
og wala maghandom nga ila kang ilhon

Ferris Wheel

wa sukad namo madungog
gikan nimo
nga kami imong gihigugma

kon ikaw pod seguro ang pasulaton
kabahin niini
mao ra gihapon ang imong isulat:
wa sukad namo madungog
gikan kanila
nga kami ilang gihigugma

ang tinood
lamog, bakak, tinood, bakak,
binignit, kinilaw, fruit salad,

kitang namati, namati lamang,
apan kita nasayod
kon unsa ang tinood og ang
bakak
pananglitan ang atop sa simbahan
tinood
apan ang mga bongbong og apil na
ang mga tawong
misulod, gawas sa iyang pultahan
dili tinood
lamog man god, bakak, tinood, bakak,
kon lantawon nimo sa layo
nindot baya.

ang duha ka karaang
pultahan
nagtupad sa pipila ka
tuig

miabot ang paring
nanulis nimo
ang amerkanong
miuwat nimo
ang imong kaliwat
nga midugang sab
sa pagpangilad
nimo
morag nawad-an kag
paglaum
apan misulod ka pa
gihapon sa
karaang pultahan
unya ang mga pultahan
nanaghan
og nanaghan pa gayod
sulod gawas ang hangin
abli lang gihapon
hangtod sa atong mga
kamatayon

mas tinood ang
anino nga wa na nimo makita sa kangitngit

way tingog baya ang kamatooran
hilom lang kini dayon ug kawagtang

samtang miabot ang lawas nga
nagpatabang sa kahayag

nanugilon sama sa tanom sa hardin
nga mitabon sa botohon nga yuta

ang mga gipanulti naghimo og maskara
nagpakita og pahiyom, gani mibuhakhak man

magpatihulog ka na sama sa dahon
sama sa ulan subay sa atop hangtod sa dagat

mas tinood ang anino kay sama kanimo
mas ganahan kining matulog sa dughan sa kangitngit

salamat uyamot"

milantaw ko sa langit
sanag man ang adlaw

"wa man lagi miabot
ang ilang gipanagna?"

nasuko ka, "ayaw pag-ana!"
walay imik ang mga dahon sa kahoy

"kon ang gitagna wa miabot
salamat uyamot"

lima ka buwak

lima ka buwak
upat ka pula
usa ka puti, para nimo ang upat ka pula nga buwak
kay matod mo gihigugma taka,

gikalipay mo kini, apan duda ka sa puti nga nabilin
sa florera,

pagkabii, gikuha ko kini ug gihalad ko kini alang kanako,
og ang Ginoo nahiubos,

ang alang kaniya mao ang tubig nga nabilin nga
giitlogan na man gani sa lamok nga
mikaon sa kasamok

pagkamingaw

ang balayan
nga sihi
gibiyaan sa umang
nga
miikyas paingon
sa baybayon
nga nangitag laing
kinhason

ang balayan gilabyan
sa hangin
miawit
mitaghoy

pagkamingaw
pagkamingaw gayod

gahapon
manag-amiga tang
duha

miabot ang atong
panag-uyab
suod kaayo tang duha
sikit
pilit-pilit
lisod malangkat
ang pagkalambigit

abi natog dili
mausob

mora diay ug prosesyon
sa simbahan
mibalik man god ang
kagahapon

manag-amiga na usab
kita

dili na katol ang sagbot
dili na basa ang dalan
dili na gahi ang agianan
nagkalapok na man

balik tas balay
maghinumdom sa usa
ka sugilanon

ok-ok

ang ok-ok nga mipasiyo
didto sa imong
banyo
nga milupad sa dihang
imong gipasiga ang
suga
og dayon mitugdong
sa salog
nga imong gitumban
og nalata
namatay
nakabalos gihapon diha
sa baho nga iyang
gibilin diha
kanimo

kinsay makatoo

sa usa ka
segundo
dako kaayo ang
nahitabo
napagya ang
kalibotan

wala'y mitoo
gahi nilang
masabtan

naghikog ka
man god.

pagdapit sa orasan

milabay ang kinse minutos
paglantaw ko sa orasan
morag kusog kaayong
midagana ng iyang mga
kamot
libot-libot sa iyang
nataran

gisulat nako ang tanan
akong gisulayan nga ang
tanan gayod

diha sa pipila ka pulong lamang
bahalag dili mo kini masabtan

apan salig ko nga sa dugay natong
panagtipon
ang mga kamot sa orasan
sa kalit lamang mohunong
nga mora bag sakyanan
nga tinuyuang kita gayod
ang gipaabot
gidapit sa sulod niini
aron kita dalhon balik sa
kaniadto

aron sa makausa pa
mopahiyom na usab kitang duha
sama sa mga bata
didto sa bonbon nga nataran

maabogan sa tumang kainit
magkalapok sa kusog nga ulan
sa tanang higayon
kanunayng malipayon

balik-balik

ang kasagaran
mawala man
dayon mabag-ohan
tang duha
aron dili mahitabo
mobisita ka sa
imong higala
ako sab
managlahi na
kaayo ta
ang imong mga
higala
akong kaaway
kon mopauli ka
dili ka na manugilon
ako sab
inig-abot sa katugnaw
hawiran mo ang akong
kamot
dayon motanday sab
kos imong paa
dayon mahitabo na
pod ang
kasagaran
diha sa paghikalimot
sa tanan
aron sugdan na usab
ang naandan

taas ang imong sugilanon
sumpay sumpay ang kutay kutay

abi mo, duna sab koy sugilanon
gikan sa ilalom nako

maong, wa ko namati nimo
apan wa sab ka nanumbaling bahin niini

nindot kining atong kahimtang
ikaw diha, ako diri, tunga nato ang kahaw-ang

ulan
kusog kaayong ulan
ang akong payong
itom
gamay nga payong
nga ako lang
ang maigo
gani nabasa pa man
ang akong abaga
og kamot

misulod na unta ako
sa dakong lawak
apan nakita ko ang mga
karaan kong amigo

upaw, dagko na ug tiyan
sama kadako sa ako
taas, apan hoyhoy na usab
ang abaga

daghan kog mahinumduman
bahin nila
lami silang duolon, dayon
hunong, dayong ugkat sa
kagahapon

apan natiurok ko
layo pa gihapon sila
mibalik ko sa akong agi
bukhad ang gamay nga
payong nga ako lang ang
maigo

balik sa sakyanan
nanirado ko
samtang mikusog ang ulan


sa sud sa sakyanan
pagkamalinawon
gusto na akong mopauli
sa balay
apan wala ko dayon kini
gibuhat

naglingkod, mitutok sa unahan
wala koy gihikap
aron unta mawala ang
kalubog sa samin

aduna kay nakita
hagbay ra kining nagbalikbalik kanimo
gani matag-adlaw man
ila sab kining nakita
gani tanan man nakakita niini
apan

karong adlawa bisag mao lang
gihapon kini
aduna kay nakita sa iyang kasihag
nga nakasiga sa imong mata
hagbay ra man kini
apan naunsa ba nga karon pa man
nimo kini
nakita sa usa ka lahi nga panglantaw

gusto nimong isulti apan dili mo
masulti

ingon ani seguro ang nakita sa usa
ka buta
nga nakapahimo sab niyang
usa ka amang

dili ko usab malitok kanimo

miabot ra gayod ang panahon
nga di ka ganahan motingog
di gani sab ka ganahan manghilam-os
di ganahan molakaw sa gawas
bisan gani manumbalay
mangumusta sa mga silingan
sandurot sa amigo
di na sab ka ganahan mosuroy
sa baybayon
o balik sa bungtod lantaw sa
mga buwak nga bag-ong mibuswak
nga mora bag di na ka ganahan sa
pagbuhat sa imong naandan
unya nabalaka na silang tanan kon
naunsa ka unya maglisod kag ingon nila
nga miabot na ang saktong adlaw sa
kalipay

unsaon mo kaha pag-ingon nila
nga ang imong kalipay karon anaa
na sa pagpakahilom og sa
pagpalayo?

pagkalayo ra sa mga balak nga akong nasulat

ang liog sa kabayong puti
samtang imong gihapuhap

ang ulo sa imong itoy nga itom
nagdapat sa imong tiil natulog

ang asul nga alibangbang nga
milupad human nimo buhii sa imong palad

ang gapnod nga misandig sa kilid
sa abaga sa lunhaw nga bungtod

ang paglangoy sa haluan diha
sa lim-aw dayog hanggab sa hangin

nakita ko kini sa walay tingog
pagkalayo ra sa mga balak nga akong nasulat

ang mga pagbati pagkaanindot
wala nako kini mabati sa mga pulong

wa ako nagpahibalo kon asa na ako

apan kagahapon sa alas singko sa hapon
gamay na lang ang mianha sa menteryo
miercoles man god

nihit ang mga kandila sa kilid sa mga pantyon
gilabyan ko si Jingjing
kadtong namatay sa kanser sa matres (nga ingon ka
basig nagabaan kay ang iyang uyab
kadto mang tambok nga pari nga gisumpayan pa nimong
ginganlag monster sa imong maestro kaniadto sa
koleheyo)

ania ako nagtindog sa lubnganan sa akong
mga ginikanan

gisulayan ko pagsumpay-sumpay ang mga petsa
sa ilang kamatayon og pagkatawo
diha sa ilang mga krus og mga bitoon

hangtod karon wala pa gihapon nako
makita ang mga nangawala kanako

usa pa gihapon ako ka buak nga baso
hait nga mga buak nga kon matumban sa wala magbantay
segurado gayod nga makasamad

gisulayan ko baya upod pagtugkad
ang tanghaga
sa atong duha ka kinabuhi

kay ikaw lagi nagpunay man lang og
lutaw-lutaw diha nga morag dunay lain nga gipaabot
og ako nga giinitan na kaayo sa adlaw
og sa dihang wala kasabot

unya gustong sabton ang tanan kon unsa gayod
ang naa sa ilalom

mitiglom ko
gisulayan ko ang tanghaga kon unsa gayod ang
mabati diha sa pag-utong

kanang gusto kang mabuhi apan
wala na nimo ang paglaban sa hangin
kanang gusto nimo ang ilang kalibotan kay
nakita mo ang mga anindot diha kanila

apan wala ka nagpadayon kay lagi
ako nabalaka man kanimo kon asa ka na kaha
gipadpad sa unos
didto sa ibabaw

adunay milungtad
ah, akong giihap dili pinaagi sa akong mga tudlo
dugay, dugay-dugay usab kon ato gayong tinud-on pagsumatotal
labaw sa kawhaan og lima na ka  tuig

apan sayod ka ba nga kini milungtad
nga kini wala gayod milubad sama sa de kolor mong sanina
nga nahumol sa akong puti nga purol

ah, tungod kini sa usa ka paagi
nga wala nimo kaayo maaninaw kanako

kanang wala pag-ambat sa mga lamigas sa ulan og init
kanang ilang pagpunay ug paak, tulod, aswat nianang tiki nga hagbay rang patay
nga gani nanimaho naman diha sa kilid sa pultahan
napiit sa dihang imo kining
kalit nga gisirad-an

kadtong punoan nga
nawalis sa milabay nga kusog kaayong hangin
nga mihay-ad sa daplin sa dalan
paingon sa Situbo
kon gidapit mo unta ako human sa usa ka semana
aron makita nako ang
iyang wa damha nga pagpangudlot
human nangatagak ang tanan niyang
mga dahon

kon nakita ko pa unta kini kuyog kanimo
mas mitoo unta ako kabahin sa gugma og
kinabuhi

apan nganong ikaw
nganong ang numero 33 ra man lagi ang imong
gipili?