ganahan si
rosario kay
ang dughan ni
antonio
bagag balahibo

maghimo pod
siyag balak dula
dula sa
letra nga "o"


ang tumoy sa
ngan ni antonio
diha kuno
niya itahan ang
iyang garbo

way milubad
bisan sa paglabay sa
dose ka tuig
karon gikasal na
ang iyang
pag-umangkon
siya ang gasunod

iyang mata mora
ra gihapog
mata sa rami

gisulbad ko ang imong
suliran

tungod kay sa pagsugid mo
nanamin ko

nakita ko ikaw
kanako

og ikaw man gani
ang sulbad sab kanako

salamat, salamat
nanamin sab ko nimo.

gipildi
sa gunting ang
papel

dili tungod sa
gunting
kondili tungod
sa luha

kon mitaak ka pa unta sa yuta mabati mo unta ang kabugnaw sa mga luha

kusog na pod ang ulan
ning kabuntagon

kon wa ka pa unta makatulog
kagabii, mabati mo unta gihapon ang
kakusog gihapon sa ulan
nga wala'y undang

maayo man nimong hagok
nga mora ka mag giduyan pag-ayo
sa imong paghinanok

ingon ana ka man gayod
wala na mangilabot sa imong
palibot

sa imong tupad nga nanglagom
ang mga mata sa pagbilar
sa kahadlok kon unsay dangatan
ning kalibotan

kon mitaak ka pa unta sa yuta
mabati mo unta ang kabugnaw
sa mga luha

maygani kay wara ta maapil

kining bag-ong balita na usab kabahin sa
eroplanong nawala
makaguol. Lain na usab ang daghang
gikaon sa bakunawa
nga ang dagway wa pa gyod nato makita
sukad pa sa atong pagkabata,

apan sige lang gihapon kitang handom nga
makahawid nianang kamot sa langit nga kanunay
natong gipangita diha sa pako sa
eroplano,

tinood, makaguol, makalolooy ang bag-ong
naapil sa listahan sa mga dili na gayod igdungog,

galisod kog tulon sa pandesal nga gilukoan sa dakong
pinikas nga hamon,
higop sa init nga kape luang,
tuktok sa lamesang kahoy kining tulo ko ka tudlo
makaguol gayod kining gisugdan ang atong tuig sa
taas nga listahan sa mga patay

apan, sa laing bahin,
tuktok sa lamesang tugas
tulo ka tudlo, swerte lang gihapon

kay wa ta  maapil,
kitang mga latagaw og mga laagan
nga karon ania sa talad-kan-anan
namahulay usa
human sa usa ka pagbudlay

makamao na akong motuman sa akong mga saad.

ugma lain na usab nga adlaw

"it will be another happy day"

wa siya mitubag

"we'll make it a happy day"

miluhod na usab siya sa altar

nagsugod na usab sa iyang naandan

nga nobena, rosaryo, og mga pangamuyo

" it will always be a happy day"

nahuman ang iyang pangadye

mihigda sa katre, nakatulog

sa iyang gipiling kasakit

"tomorrow is a happy day"


ako kining kanunayng gilitok

gisulat, kanunay nakong gisuksok

sa akong utok, gisipitan sa akong

mga bukton, gitipigan sa akong

kasingkasing

"indeed, it is a happy day"

makamao na akong motuman sa

akong mga saad.

libro sa kinabuhi

kining tanan
kabahin lamang sa usa ka
pagpanugid

pakigsandurot sa kaugalingon
ila-ila
panaw padulong sa sulod
apan wala ang pagpanirado
sa pultahan

dalhon ang tanod sa kagahapon
subay sa mga lawak
nga pagkadaghan
hawid, aron kon mawala man
ugaling
makabalik lang gihapon kon
diin ka gikan

kining tanan kabahin sa usa
ka panaw
wa ka masayod kon asa ka
paingon
og kon kanus-a ka moabot

aron dili sakit kaayo
maghimo kag mga sugilanon
sa mga tawong dili kaayo nimo
sinati
sa mga panghitabo nga mora
pa gihapog mga panid sa usa ka
dakong libro
nga sigi nimong giukab
wa pod ka masayod kon unsa
gayod ang nilugdangan

dipolog cemetery, 5 p.m.

gihapit ka namo
Ging
pagkahilom gayod
dungog na kaayo
ang hagawhaw sa
hangin
nagmalinawon ka
na gayod

wala gihapon natuman
ang imong
gipanagna bahin
kanamo

nagyoga ko usa ka adlaw niana.

balika, nagyoga ko.
silong sa kahoy nga baliti
mora kog si buddha nga
gipandongan sa dakong liog
sa cobra

wa ko maulani.
sakto pa gihapon ang akong
kwentada, wa ko

nag-flu, piyong ang mata
gipangita nako ang akong
kaugalingon

unya miingon ang tingog,
kon makit-an mo,
ay, sayop ka, dapat dili mo
na makit-an kini

unta misagol na kini sa
hangin
sa dagat sa mga panganod

wala ka na.
kon wala ka na.
pwes,
hingpit ka na

mantra. mantra.
kigwa.

poetry is
reality.

kahoy nga mosiga
nga makaluto og
kan-on

baga sa oling nga
magamit sa pagsugba og bangus

suka nga makapaaslom sa
kinilaw

giatay. sahay sipyat ko,
gipalamian nako imong kasingkasing
nga di ra ba pod
nako masuwa
sa dinaliang panihapon

poetry should be experimentation.
kanang mora lang kag nakigkukabildo sa
dalugdog

kurog ang tuhod, tago sa likod sa samin
aron dili maigo sa kilat

kanang mora lang kag namati sa dinagayday sa ulan
subay sa sandayong
unya you close your eyes
to see

and situate yourself to check if
at the end of this tunnel

ikaw ang kahayag
o dili.

drAmatic
a thousand stars
above you

di ba god ng
bug-at ra keyo?

gusto ko kanang tinood,
do not tell me about stars daw bi

unsa kaha kabug-at
sa daro nga giguyod sa kabaw?

escape na pod ka
tinuy-an falls, tinago,
enchanted river

samtang siging bugno imong mama og papa
wa ka malooy sa imong manghod nga nagpunayg tago sa saya sa imong mama

sus simbakog maoy maigo sa takbas sa imong papa
laagan!
 

coded ni tanan
there is no metaphor for all
these
realities

nasabtan na sa katuigan
ang mga katuigan
there is no need to explain
obvious baya

kanang mga pahiyom
kon tutukan hilaw
sahay
kon di masabtan ning tanan
bation kag kasina

if you only have that wisdom
simple ra baya ang kinabuhi
it is just a matter of
live and let live

kakita bitaw kas duha ka kids
didto's atong resort
way mga saktong kaon
naligo sa dagat nga luspad ang mga wait

gitunulan nimog maja blanca
pakipinan sa pancit canton
puno ang plato sa rice
usa ka coke

that is happiness for them
which should have been our happiness too
but look

we have never learned
kulang gihapon tas panabot
bisan sa kaabundancia
nagpabilin tang tanga
asking for more

God the Father, the son and the Holy Spirit
with the Help pa jud of the Virgin Mary
di kong kasabot nganong naa ta nagtangag
sa lechon
unya, how dare, subo lang gihapon

tsk tsk, something's wrong with our lives

i beg, see your psychiatrist.

abi ko may
mao na
ah dili pa diay
try na pod
otro
basin sa sunod
tinood na

abi ko may
mao na jud
gatupad man god mo

no comment ko
maoy imong tugon
after this

hala
project jud
happy faces
strong family ties kuno

do not explain
kasabot ra mi ana
kon sa insik pa

paleho la.

hangin

kon ikaw
balaan

makita mo
masimhot mo
magakos mo
magakos mo
sa imong mga
bukton

ang mga dili
makita

kining hangin
pananglitan

kining imong
napasagdan

poet talk

abi mo, sultihan ta ka,
nagsulat siya dili tungod kanimo

mayong buntag diha, inom sag kape,
undanga sa ning basabasa ug mugna
sa sayo sa kabuntagon,

kon madungog mo lamang ang
gipanulti kaganihang kaadlawon,
nga nadungog sa dingding
sa naghilak nga kisame nga ang mga
luha mga anay nga pak-an
kay lagi kusog baya ang ulan
tibuok gabii, ambot ning langit
kon makahilak
wagas man sab,
kon madungog mo pa unta ang
bakho sa tuko, ang syagit sa kasakit
sa tiki,

makaingon jud kag,
kaswerte ko, dili ako manunulat,
kaswerte ko, dili ko makamaong mohimo og
balak,

kaswerte ko gayod nga wala ko mabati
ang kasakit,
ang kahigwaos sa usa ka
wakwak nga wa na pamatia sa
sigbin,

pagkaswerte mo nga
wala ka niini,
kon makita mo lang unta kami
makaingon ka gayod,

palaran ako, palaran ako
ug daghang salamat.

beer talk sa usa ka reunion

ang taas ug suwang og
giuban na og bungot miingon: nabunalan gayod og payong si tiyo gorio

mibalos ang hilang ug ngipon nga medyo sihag na usab og buhok:
si ricky jud kay gadungan og panganak ang lima ka uyab

mibat-in ang lingog nga pag-umangkon ng bag-o lang gipalayas sa
amahan kay nagtaban og uyab sa sinaman: tinood kol nga naa kay anak sa gawas?

mibulhot og sigarilyo ang hingtungdan, miginhawa og lalom: mayntag tinood.

gikalimtan mo ang
unta nasulat mo na kaganiha

ambot og gituyo mo ba ang
paghikalimot niini

dili na ambaton ang sakit
sa imong bukton

kon nakalimtan ang sakit sa
dughan, kamot pa kaha?

gikalimtan mo ang unta
gisulat mo na kagahina

mas maayo, kon ikaw
mahibalo pag-usab

unsa may pulos? matabangan
mo ba ang imong kaugalingon?

imbitasyon sa langit

gikan sa suba
nalibog
presko kaayo ang
nawong ni
tatay

sa kilid sa bintana
atua si nanay
nanulsi sa mga gisi
sa imong
karsones

nagpahiyom sila
kanimo
nangamay
"dali na diri"

naglibog ka
kon asa ba ang
ilang giingon
nga "diri"

ang kobra

ang akong hunahuna
naghimo og kobra
nga taas
unya mitindog sa akong
tupad
miloko
ug dayog katulog
dapit sa akong aping
samtang ako
natulog

kon maglihoklihok
ako
ingon sa akong damgo
paakon ako sa maong
halas

wala pay nabuhi
sa iyang napaakan
ug sa akong kahadlok
wa ako milihok

kadako sa akong
sayop
sa dihang gimugna ko
kining kobra
sa akong hunahuna nga
mao ra usay
mopatay kanako

natikig ako sa akong
kabuang

paglaum

1

unang ang-ang
palang kining atong
gisaka
kapoy apan naay
ikaduha, ikatulo,
kapoy na, apan naay
ikaupat

ang kataposang ang-ang
makita ang pultahan
nga moabri
dayon makita na kuno
nato ang langit

2

maot ang gidangatan
apan anaa pa man ang ugma
nagpaabot sa
unahan
nangamay
adunay kahayag sa bulan
nga nagsaad
nga ugma puhon mag-ulan
kuno ug grasya
ang tibook langit
unya magpasad ang
grasya para kanimo
diha
maghabol sa karsada

3

ugma puhon
kanunay kana
mausob ang plastada
sa imong
dimalas

ugma puhon
moabot ra ang imong
gihandom

ugma puhon
kanunay kana
ugma puhon
adunay moabot
wa ka lang masayod
kon unsa

4

hangtod sa imong
kamatayon

moabri ang pultahan
sa kataposang
ang-ang
og diha makita mo
na kuno
ang langit

pagpanday sa kalipay

aron mahapsay ang tanan,
sugdi sa bukog, kinahanglan walay suhi
walay supak sa paghapnig
subay sa abtanan sa unod,
lantawa pag-ayo nga walay mapiit
nga ugat, hinay-hinay lang ang
paghapnig, subay sa liog ug tiil,
hangtod sa kinatumyan sa buhok
padulong sa kinataposang kiting
ug napulo ka tudlo ug mga
kuyamoy

ingon ana ang kalipay,
hagniga pag-ayo
sumala sa panahon og
iphiuyon diha sa saktong
pagsibo, sulod, haom.

kahaw-ang

ang kahaw-ang usahay
kon magpakuha tag hulagway
bisag dili nato iapil
naa ay,
bisag kita mag-agbay
nagpatunga
miabay

noche buena sa rizal avenue

ibalhin ang mga lingkoranan
sa gawas
itaod ang mga bombilya sa
punoan sa kahoy
padak-an ta ang hawanan
silhigan, kinahanglan walay
layang dahon sa
atong agianan
ibutang ang mga ilimnon
sa mga lamesa
ang hamonada, ang sinugbang bangus
daghana ang kan-on,
magtampuog ang lechon kawali
tupad sa adobong manok

sa noche buena, manayaw ta,
mangatawa, magsadya,
walay tulugay
sumpay-sumpay ang tagay!

praktikal ang balak

para nako
dili na importante kon ang
balak
walay kahulugan

kay ngano kahulugan ba
ang atong gipangita karon?

sa pagkahulog sa mga bitoon
ato na lang kining pamuniton

sa pagkauga sa sapa
ato na lang kining tamnan

isugba na ang patay nga isda
kalimtan na ang mga lumot

padayon lamang kita sa paglakaw
sa kagabhion hangad sa langit

kadtong nahibilin kon ganahan sila
sila ang mangitag kahulugan

sa atong mga tunob
sa atong mga abog

sex life

duha ka palpak
sa kama
puros nakarma

bisita

ning akong lawak
usa lang ang lingkoranan

ang katre nga uway
igo lang sa akong lawas

gamay lang ang balay
usa lang ang kaldero

ang dapogan usa lang
usab ang sug-ang

duha lang ka bintana
ug duha lang usab ang

pultahan nga maghatag
kanako ug duha ka kapaingnan

una ang pagsulod ug ang
ikaduha ang paggawas

namisita lang ako dinhi
og dili ko ganahan nga magdugay

alang kang M

ayaw hikalimti ang mga
makita
samtang ikaw nag-inosara
diha sa gamayng balay
sa kilid sa bungtod
sa Bitoon

kadtong kalaw nga
nagtug-an kanimo sa oras
sa kahaponon

ang aw-aw sa iro sa pikas
bungtod
nga naghisgot kabahin sa
kagutom

ang kaligotgot sa mga unggoy
nga nagpaulit sa mag-uuma
nga kanunayng nagbantay sa
iyang kamaisan

ang kanunayng pagsulod guwa
sa hangin
nga mihagit sa imong aping
ug sa imong ngabil

ayaw palabya ang mga makita
mo sa bukid
ang awit sa tamsi
ang tingog sa gangis
ang hagawhaw sa kagwangan
ang kanaas sa ginit sa kilid sa
lubi nga gibisitahan na usab
sa dakong bakokang

unta anaa ako diha
aron makigtupad kanimo
dayon mohawid sa imong
kamot
mohapohap sa imong buhok
motubay sa imong
pagpulaw
ning mingaw nga kalibotan

libog

gihunahuna ko na
karon ang akong pag-abot
sa isla diin

kuno ikaw mosunod
aron makighangop kanako

nangliki na ang akong ngabil
sa kauhaw
kon makasyagit lang ang akong
mga tiil

sa kamingaw molanog kini hangtod
na sa ikapitong bungtod
ning dapita

paaboton ko ikaw sa baybayon
kita lang duha
iphon ko ang mga kutay sa imong
buhok
haployon ko ang kalapoy sa imong
paa

higopon ko ang sabaw sa kalibotan
tilaan ko ang iyang bilahan

tagnatagna

nindot ang
kagahapon
sunodsunod
sa kaalimyon

ang karon
 lingkod lingkod
sa balkon

unta di moabot
ang ugma
pinutlanay daw
og dila

gugmang way paglubad

bisag unsa
kon balikbalikon
wala nay lami

ang kantang
gibalikbalik sa
radyo sakit
na kaayo sa
dalunggan

ang lechon nga
sigign gisukad
sa kusina
makasuka na

pero ang atong
katre nga sigi
natong gikatulgan
lami lang gihapon

pag-inosara

naglingkod kos
uway nga duyan
namati ko sa
tingog sa ulan

alang kang maymay

ning paskoha
nagkita na jud si trining
og si peping
sa chicago

kami puros
mga Bantay
nga nagkiwil ang
mga ikog
sa ka excited
kon unsay mahitabo
sunod ugma

nagdulog silang
duha

matag gabii
managlahi na ang
ilang mga damgo

ang usa
america
ang usa
pinas ra

demonyo

ciento trenta ka
mga bata ang
gipatay kagahapon

sa  Pakistan

diri sa atoa
bentedos ka mga
estudyante ang
naigo sa bomba
nga gitagoan sa
ibabaw sa bus

paingon sa unibersidad
sa Maramag

sahay makaingon kog

letseng yawa
wa kamatay ning
mga demonyoha!

hunahuna ko lang

dinhing dapita
giputlan og ulo ang maong
pari

dugay na kadto
daghan na kaayo ang mga
sugilanon

mao kini, mao kadto
gikasinahan ang maong
misyonaryo
ug busa giputlan sa iyang
ulo

kon moari ka dinhi
og imong isulti ang imong
mga gibati
(bisag dili mo na iyagyag
ang mga sakit)
kon modagkot kas imong
kandila
nan, pag-uli mo
kalit gayod ang pagkaayo

ingon sila ang maong
pari
ania lang gihapon dinhi

unsa kaha?
naglatagaw? wala pa kaha
kini pasudla
sa langit?

usa ako sa nasalaag dinhi
aduna ako'y gibati
apan dili kana mao ang akong
isugid kaniya

gusto nakong ipadayag
nga unta mopahulay na siya
kalimtan na lang ang tanan
aron makapadayon siya
sa tinood nga kinabuhi

patas lang

kon bout kwentahon
patas ra baya ang tanan

oo, tinood
nasaktoan kas gugma
nahuwasan kas
romansa

apan gaduka ka man
usab sa kalisod
nagnganga ka man
usab sa kagutom

oo, tinood
gihatagan kag mga gasa
sa imong mga anak

apan gialingogngogan
ka man usab sa ilang mga
pag-iyak
gibahoan ka man usab
sa ilang mga ihi

oo, tinood man
bation kamig kasina kaninyo
apan, anaa lang gihapon ang
mga apan

kami mihangad sa langit
miduko sa yuta
milantaw sa kahayag
og nagpasalamat lang
gihapon sa among
mga nadawat

labi na sa hangin
og sa tubig
og sa mga kakahoyan
og sa mga kabukiran

sakto na kanamo ang
mga panganod
nga kagahapon
nagpabati kanamo
sa ilang mga ulan

sa mga isla sa iyang mga damgo

sa laing bahin
kon asa siya mitubo
milambo og namunga
sa daghan

didto siya nagdugay
kuyog sa iyang abuhon nga iro
sa iyang bisikletang
karaan

silong sa adlaw
pahulay sa duyan
tabyog sa hangin
lantaw sa layo

kita pa gani ang
mga anino sa mga
isla sa iyang mga
damgo

nga ambot hangtod
karon
mga damgo lang
gihapon

dimalas sa gugma

pagkaswerte mo
gihagkan mo siya og
mihawid ang iyang kamot
sa imong hawak
og iyang gigakos sa hugot
ang imong lawas

ania kining duha
nag-inom og tanduay
naglantaw lang kaninyo
sa dakong kasina

ang ilang dimalas sa
gugma
maoy ilang gitagay
karong gabhiona

tungod kay kulang ang gugma

ang gugma
mangita gayog
kahalaran

sama ning mga buwak
nga puti

nangutana kon para
asa sila

sama ning kwarta
nga natigom

nangutana kon para
kang kinsa ba sila?

sama sa balay nga imong
gipatukod

nangutana sab kon kinsa
ba ang mopuyo niini

pagkadaghan unta
sa imong hatagan

apan lagi kay
nagkulang ka man sa gugma

nalaya ang buwak
nahurot ang kwarta
gianay ang balay

sa mga walay hinungdan.

tingog sa tuko

karong gabhiona
nabati ko na usab ang
tuko
og matag patingog
niya sa iyang tilaok
diha sa iyang pagtuko
gisulayan ko na usab
pagtino kon unsa
ang kapalaran
sa akong mga damgo
nga wala
matuman

tambag sa higalang depressed

ang matag
adlaw interesante

ayaw palabya
ang bata nga dili mo kaila
ayaw palabya ang
iyang pahiyom
tutuki
sa iyang kabulingon
nagpahipi ang
santo ninyo
sa iyang
kasipat

ayaw palabya ang
panahon

kon sa imong kasubo
gusto mo lamang nga ang
adlaw og gabii
molabay diha sa pagpunay
mog katulog
hangtod nga ikaw malimtan
sa kinabuhi

pamatia ang hunghong sa
bongbong
lantawa ang kihat sa kisame
ang pagpamilok sa
bombilya
ang pagsayaw sa kahayag
diha sa kurtina
ang paghapit niini sa salog
diha sa kiblat
nga kalit

kon nasayod ka lang
kon unsa ka ka bililhon
matugkad mo unta kon unsa
ang pagpasagad

ayaw palabya
hawid, hapit, duol,
pakisusi
iapil ang imong mga
kakulba, kasuko, kahiubos
diha sa
pagkawala sa yabe sa pultahan
sa pagkaligid sa sakyanan
didto sa pangpang diin
napulo ang namatay
ang pag-ambush sa bus diin
baynte dos ka mga estudyante
ang napudpod sa bomba
pakisusi kon asa na ang ilang
mga tiil
ang ilang ulo ug mga tudlo

pakiglambigit sa dakong kaguol
sa kalibotan
ayaw kini palabya
kulang pa ang syagit
kulang pa ang pagbakho
pag-iyak
aron unta kita madungod
sa dunggan sa
kinabuhi

ayaw pagpakahilom sa
imong lawak
ablihi ang bintana
ug pultahan
pamatia ang paglabay
sa panahon
langoy sa iyang unos
hangtod sa kamatayon

kon ngano nga ang ulan nayabag

sa una
sa bag-o pa ang ulan
nindot ang
iyang sonata
morag sulog sa tubig
nga nagpatihulog
sa paa
sa pangpang

apan sa kadugayan
dihang nagbulag na
siya sa iyang
pinalangga nga nakakita
na og lain
nga mas adunahan

nausob na ang iyang
panglantaw sa ulan
mora na kinig
yabag nga babayeng
buang nga nagsigig
syagit sa daplin sa
dalan

unya ang
mga bata nagsigig
sunod kaniya
nga nanora

unya ang mga tawong
matagboan
naglikay kaniya

yabag ang ulan

bugnaw ang panahon
baho ang mga kanal
nagpasad ang mga
basura
unya ang mga iro nga
walay
tag-iya
naglatagaw

emcee: aduna ba'y kahulugan sa gidak-on sa slice sa cake nga itunol sa groom ngadto sa bride?
ninong: ah, ayaw palabii og kadako nga siya matuk-an, ayaw pod palabii og kagamay nga siya mabitin.mas maayo gayod kanang igo-igo lang....
(mipakpak ang namati)
emcee: well, wa jud nay significance. cake lang na oi.
(pweee! nawa na hinoon ang metaphor)

mensahe sa tatay sa iyang babayeng anak nga gikasal

mae og fredie
nakita nako sa inyong mga mata
nga nagminahalay kamo
busa wala ako misupak

ipadayon ang inyong
pagminahalay
ang kalayo sa gugma
ipadayon diha
sa pagdilaab
ipadayon kana hangtod
sa kahangtoran

kon unsa man ang suliran
ayaw ninyo paugmai
sa dili pa mosalop ang adlaw
human sa pagatubang
niini
ibugkos pagbali ang
nahilos nga hukot diha sa
inyong pagsalig sa
inyong gugma sa usag-usa

freddie, kon ugaling puhon
mahitabo nga ikaw dili na makaangay
kang mae
ayaw lang intawon siya pasakiti
mahimo mo siyang iuli
kay andaw gihapon kaming
modawat kaniya

kasal

babaye nga kaniadto
hilomon
karon tig-ibot na
sa ngipon

ang iyang naparis
nga lalaki ang kaniadto
kusog modangoyngoy
matag gikan niya
biya sa iyang nanay nga
magtago na intawon
aron dili na mobaha pa
ang mga luha
karon maayong moluto
og pancit canton og siya
ang tigtimon sa barko
paingon sa
ulohan

kasal nila karon
og ang akong tambag
aron magdugay sila
sa ilang kaminyoon
kon mokusog na ugaling
ang balod
mahimong tulogtulogan
lang usa
dayon inig abot sa pantalan
sa kaadlawon
bitbiton nila ang ilang
tagsatagsa ka mga
pinutos
sa ilang mga abaga

pagbalik sa boarding house sa gomez street

gomez street, davao, gibalikan nako
ang lawak
lahi na ang balay, dili na kini
paplitehan, hagbay ra kining nahalin
lain na usab nga kamot ang naghawid
sa rehas sa hagdanan

adunay samin dinhing dapita sa bongbong
sa unahan ang bintana nga akong pagaabrihan
mabuntag
makita  ko ang gamayng balay tupad sa
atabay
diin siya maligo

gikalipay ko kadtong mga bahina sa akong
kinabuhi
sa kilid atua ang samin diin ang akong
lawas sa kabatan-on
bus-ok, taas, lig-on
diha sa mata nga mapahiyomon

sa tiilan daghang binhi nga akong giusikan
ginadili pa ang pagpakatawo kaniadto
mora pa kami og mga kanding nga
nagbaid sa ilang mga sungay diha sa
punoan sa kahoy ug sa kakusog niini

nangahulog ang mga dahon
sama sa mga panid sa panahon nga
wala magamit
nausik lamang walay pulos
nalata
miipon balik sa yuta.

ang hukom

kabalo kang
kabalo na siya
apan wala'y usa
kaninyo ang
mangutana o

bisan sa paghisgot
lamang sa usa ka
pulong

likayan gani ang
usa ka pagtan-aw
kay kon magtagbo
ang mga mata

bation mo ang
kaulaw unya
mora bag anaa ang
pagsinabtanay nga

dili ta gun-ubon ang
usa ka balay
nindot ang hardin
og ang veranda
humot pa gihapon
ang kape
sa matag tasa
maglisod kita sa
paghikalimot unya
sa pagpangalisbo
sa bag-ong
giluto nga lana
gikan sa
lubing gibahi
na sa kadugay

busa gipabuwak
ta ang kahilom
walay matipak dinhi
walay mabungkag

estado

miulan
alas dies sa buntag
mabati
ang tinagaktak
gikan sa sandayong
sa kiliran sa
dakong punoan
sa ilang-ilang

sirado pa gihapon
ang bintana
naglutok ang mata
sa bongbong
nagpunay og
kwenta kon
unsay sunod
buhaton