alang sa bag-o lang mipahawa sa balay sa mga pagbati nga napugngan sa gihapon

ang dili nako malimtan
mao ang pagmasahe mo sa akong
dughan

pagkalami diay bation ang pagbayaw
sa langit

gihapuhap mo ang gaul-ol  nga atngal
gidasok mo ang kainit libot sa pusod

sa tibuok nakong kinabuhi balonon
ko ang dakong pagbasol hangtod na
kini sa akong kamatayon

og nganong wala nako mabuhat ang
angayan unta nakong  buhaton

sa katalawan walay natilawan

didto sa among atabay
nagsag-ub si Ebing
gisalod ang tubig dapit
sa banyo ug naligo

ug nganong didto pod
ko sa punoan sa buongon
naghangad-hangad

duha ka laing-laing hinog
ang wala matagak

ang buang 
sa iyang katanga ug
katapulan
nagnganga ang tanlag
nagmatag buntag.

kaldero

ug nganong nusnusan
pa man ang lubot sa
atong mga kaldero nga
ugma puhon imo ra man
usab nga patilapan sa
gabagang dila sa  kalayo?

ang tighimo ug banig

ang tighimo ug
banig sa Bitoon
walay higdaanan

makayaka lang
sa silong sa Tipolog
gahagok ang katulog.

sa opisina human sa paniudto

ang gihilantan nga
si Untani
sa hinayhinay
gimaymayan ni
Mamalala nga
dili tanang moslem
mangawat ug
batang babaye

pagpili

kon magpadayon 
ka sa lalom
malumping ang
lata mong
dughan

kon mopadayon ka
sa taas
labaw sa kabukiran
moboto ka
sama sa balloon.

tabonan mo ang baboon
mong dughan
alibangbang ang likod
ikogan ang simod.

asa na ba ang mga kagwang
nga nagtuwadtuwad sa kagamhanan?

 

ayaw ug salom sa mala

naa koy ikahatag
naa sab kay tugbang.

mas malipayon ang
kinabuhi, kon sama
sa katig, naay timbang

kon kalayo ko tubig ka.
kon bato ko papel ka.

saba ang mga pulong
daghang bentana ang dunggan.

mga agianan nga nagsanga.
kinsay mamunit sa pulak?

ning sayaw sa tango
sunod lang, ayaw ug supak.

ayaw tumbi ang grasya.
ayaw ug salom sa mala.

sakit sa utok

nag-atubang ta sa adlaw
hapon na
sa hinay hinay nangapapas
tang duha

hilom kaayo ang dapit
morag menteryo
lahi diay lantawon kon
kita na ang mapapas
sakit sa utok.

daghang namatay ana

duna na untay
nasulat dihing dapita
dili baya pod kaayo
taas

tinood to
desente, pranka
apan sakit man

busa akong gipapas
di na ko ganahang
mopasakit 
natong duha...

galisod na kos
mga tanghaga
nahurot na ang
ang mga nindot
nagpasad na ang
mga maot

di na ta magpalabi
anang tinood
daghang namatay
ana.

gamitay lang diay....

kon nasayod ka lang
dili ka na gayod unta masakita

gamitay lang, ana ang higayon,
ang langit ug yuta diha sa tunga

mao ang hangin, ang wala, ang
pag-abot sa punto nga ikaw wala

nay gamit, busa sama sa usa ka
basong tigpod, karon ilabay.

pagbati sa usa ka nag-antos

sa usa ka puthaw nga
lingkoranan
sa hardin nga kabatohan
sa mga panganod 
sa akong hunahuna
sa nihit nga hangin
sa tubig nga pait
sa pagkaon nga dili na
matulon

si eufracio ug si epifania

si eufracio
gwapo, taliwtiw ug ilong
taas ug barog
dagko ug mga bukton
balod ug pilok
nahigugma kang

epifania nga
usab pagkagwapa
taas ug buhok
itom sinaw
humot nindot ug lawas
bus-ok ug dughan
taas ug tiil
humok ug kamot
porselanag pamanit
kalabanghang mangga
ang aping
ug ngabil

singkwenta ka tuig
silang malipayon sa
ilang panag-ipon
isip sa kanunay manag-uyab


dakong basakan
galawod ang kalubihan
daghang bulawan ang
kaban

wala lang gyoy

anak

si cora

si cora kadtong pinakaputi sa atong
balangay
nga nagpuyo sa balayng karaan sa
iyang lola Intay
nga mikatkat sa dakong punoan sa
manggang bisaya
nga walay tabon ang bogan nga gikagubtan sa
mga bugoy nga iro nga nagnganga
naglaway
sa silong sa mangga sa kilid sa lapokan
nga tunaan sa tulo ka kabaw
nga niadtong panahona wala padaroha
kay kusog ang ulan ug hangin samtang
ang mga hinog nga mangga naglagitik ug
pagpangahulog didto sa
labong nga balilihin diin ang 
baga nga kanahan
nanagan, nag-ilog sa mga pulak
nga alang sa tanang
nagpakabalaan

hagawhaw

ang matag pulong ang matag silaba
dunay ginikanan

wala lang kini kalit nga mitumaw nga
gikan sa hangin
sama sa usa ka gapnod nga karon ania
unya nawala 
nga walay hinungdan

hisgotan kini
pangitaon ang ngano, ang unsa
ang kanus-a

usahay makahilak ka sa imong 
naaninaw
dili lalim ang pagpanamin
diha sa pulong nga imong nalitok
sa lihok nga akong nasuntok
sa bulan sa kagabhion
sa balilihan

diha sa lamesa gisaloan ta ang mga
nahitabo
didto sa higdaanan didto sa dalan
didto sa lalom nga kagabhion
gilitok ko ang hagawhaw 
gibuhian mo ang kamingaw 
gibuak ta ang kahilom
nagliraw liraw ang sawomsom

kanus-a pa kaha nato hangpon ang 
kamatooran,
dili ko mahakop sa imong palad
dili ka nako mahanggab sa akong
ginhawaan

pagkanindot ang mga layo nga makita
di mo madungog ang subo nga tingog
di mo mahikap ang bugnaw nga patay...

diha sa sulod

anaay naa pa sa sulod
buhi pa
dili pa patay
gustong motug-an sa tinood
apan
adunay pagbanabana
adunay pagpatunga
ang kasabotan kon asa ang
mga utlanan
kon asa ang akoa kon asa ang
imoa
busa dili pa sakto ang panahon
diha ka una
sa sulod
gianinaw pa ang imong tingog
sa akong tingog
kon asa gayod ang sakto ug
tinood.

pagbati

didtong dapita
bitay ang adlaw
sa kahayag
sa sidsid sa akong
kalibotan

ako naglutaw
namalihog sa hangin
hangtod sa pag-abot
sa akong utlanan

ning panahona
dili ako dili ikaw ang
gihaunahuna

mas habog pas
naandan
di ko masulti
kay wa pa kini
sugod
wa pa nasugdi

ambot ngano nga
ania na man kini
sulod sa akong dughan
oo, tuod man,
wala pa ako didto
apan sayod ako
kon unsa gayod
kadto....

mosayaw ang manamkon

pareho man god 
ug katas-an ang atong
duha ka pantalon

hapit sab nagpareho
ang desenyo ug kolor
ingon sila mora
daw tag banda

ganahan na unta nakong
sugdan ang atong
kanta apan wala na lang
nako dayona
makaulaw baya


mahimong sa layo nga
lugar diin walay makaila
o kaha ba mokatawa
mahimong didto tang duha
manganta

dunggon sa mga kahoy ang
atong mga pangaleya
moduyog ang mga gangis
maminaw ang kabukiran
mosayaw ang manamkon
sa saktong panahon

ayaw ako ug dalidalia

kon maabot ko ang
bulan
nganong dili god?

kon masalom ko
ang pusod
nganong di god?

sayod ka nga buhaton
ko ang tanan alang kanimo

apan kon mahimo lang
ayaw kog dalidalia

lisod baya patyon ang
konsensya

oo, usa lang ang nawong
apan pagkadaghan sa liog

oo,usa ra ang kasingkasing
apan pagkadaghan sa gamot

naglibog gani ko kon asa 
gayod ako magsugod...

bisita

nindot pamation
kanana naapil ka nila

mora bag panimalay
mo ang kalibotan

usa ka sa tanan
dili ka kinumot nga putos
sa bulad

kon adunay panagkita
apil kas gitawag

apil kas inihap nga botelya
sa coke

pangutan-on ka pa kon
red o white wine ba

lami hunahunaon apan
usahay sakit sa  ngipon

mahikapan mo gihapon
ang tinagoang hubak

unya ang baho asa
nana

diha sa pagpanira sa
pultahan

unya tua sa gawas ang
wala pa kakaon

ako

karong wala na 
kanako ang tanan
salamat

wala na ang manuktok
wala na ang kakapoy sa
pag-abri ug sira
sa mga walay nada

karong wala na kanako
ang tanan
salamat usab

wala na ang mga agianan
paingon bisag asa
wala na ang kalangitan
walay kahumanan

ang nabilin kanako mao
na lamang ako
kini ang akong puluy-anan
kalipay nga gamay 
nahibilin
ako.

sa kamingaw....asa ba ang para kanako lamang?

sabton ko
nga sa pito ka libo ug
kawaloan
bisag usa walay
ako.....

pagkadaghan sa hulmigas
mamaak,

pagkadaghan sa alibangbang
nga namatog
walay bisag usa ka pako
para ako

pagkadaghan sa mga tulabong
puros puti
sa basakan
pagkalayo ug kon duolon
bisag dili hilabtan
manglupad dayog
palayo

pagkadaghan sa mga adlaw ug
mga gabii
puros lang kini manglabay
asa ba ang para kanako lamang?

pahulay

mao kana ang
nahitabo, buhaton mo
kini sa matag adlaw
aron ka mabuhi

wala kay
giundangan
sumala sa 
kasulatan

hadlok ka
sa nag-ung-ong nga
ulo sa kamatayon

hinoon, inig abot na
sa pag-undang
kon buot lang gayod 
hunahunaon 
anaa naman usab ang
pagpahulay

anaa ra ang yabe
sa ilalom sa buwak
tupad sa gamot
pyuos sa
imong pagsabot

anaa ang pultahan
abli ang katunga
diha sa kangitngit ug
kahayag

ang wala nato maabti

ang kataposan sa atong
duha ka sugilanon mao ang
kahoy nga nahutdan na sa
ilang mga dahon

palabyon ta una kini
paaboton nato ang usa ka talithi
dili na magdugay
moabot na usab ang panahon
sa pagpanggitib
nga wala nato maabti.....

hikapa ang imong
tiyan
hikapon ko ang
akong
bangkiyoran

hapuhapa ang akong buhok
hapuhapa ang akong dughan
ayoha
aron mahopay ang
kahapdos
sa atong duha ka
krus.

ang imong kalipay

gikalipay mo
ang pagtalikod ko kanimo
unya imong
nakita ang akong mga
mata nga nag-agulo 
 sa kasakit

kon aduna may luha
sa akong higdaanan
ayaw akog pangutan-a
kon unsa ang kalami
diha sa kaasgad

buwak sa bogan

ikaw ang
bag-ong buwak
sa akong
bogan...

unsaon ko kaha
pagbangon ug
sayo ugma
aron dili ka dali
malaya?

alang kang M

Dili ka gani makabasa nako.
usa ako ka papel nga dili mo
masulatan
dili mo ako mabasa, usa ako
ka lisod nga sugilanon.

kon lantawon ka nako sa layo,
mahimo akong makalolooy, 
usa ka dagat nga dili nako unta
langoyon, dili tungod sa kalalom
kondili tungod sa tumang kamabaw.


kon magpalayo ko, mosamot ang
akong kasakit, molukot ang akong
kaguol, malumos kos kapait sa akong
dangatan.

nagmata ako sa akong kagabhion.
wala akoy kaadtoan, gawas lamang
niining upat ka lipak sa akong
lawak nga mga amang.

ania ako sa tungatunga sa sunog sa
akong kalibotan. wala ako nanawag
ug tubig. ang kalayo midako, ang
baga misamot ug siga.

dili ako modagan. kay sayod ako nga
sa pipila ka higayon, sa dugay na nga
kini nahitabo, wala ako masunog.
dili ako madutlan. sa tinood lang, 
mora lang gyod ug wala lang.

kining tagay sa kasakit, ayayay, dili
mo maatikan. ako ang tig-ipis ako
ra usab ang tig-inom. sa akong pag
simsim, pati ang ngabil sa baso,
walay mabati. ang mga dunggan sa
kabo nga gibutangan sa sumsuman,
puros putol.

gihigugma ko ba kaha ikaw?
dili ko pa gihapon kana matubag.
gisulayan ko paghikap ang akong
dughan,  walay bukog ang kamatooran.

mas makamao pa kos tapaytapay

kon sa tinood
dili ka maankong
dili ka maako
nganong motug-an
man ako
kabahin niini?

kon sa bakak 
mobalik ka kanako
matulog sa akong
higdaanan
kon sa bakak ako
kang maangkon

makamao ko, mas
makamao ko, 
mas makaamo pa
kos tapay-tapay
nga sa matag adlaw
naghimog nindot nga
kalibotan sa iyang
kaugalingong laway....

usa ka lamang ka bato sa akong agianan....

makalibog
nganong higugmaon mo
man ang wala ug dili
gayod mahigugma
kanimo

kahinumdom ka ba
sa imong gihigugma nga
mikagiw, unya sa dihang
nahibalik mihisgot sa
iyang tinagoang gugma
diha kanimo?

mikagiw ka usab
misulat nga wala mo siya
higugmaa

ngano bang ganahan ka
mang magpasakit
sa tawong nahigugma na
kanimo?

nganong higugmaon mo
man ang walay gugma nimo?

unsang sakita kini nga
nagpabilin diha sa imong
kasingkasing?
unsa ba ang imong kasuko
sa kagahapon?

gisabot ko ikaw. aron mo
ako higugmaon, sugdan ko
gayod kini
sa dili ko pag-ambat kanimo,
wala ka sa akong kasingkasing
tagoan ko ikaw sa akong
bahag,
wala ka sa akong panglantaw
usa ka lamang ka bato
sa akong mga adlaw

ayg kasina

pyuos, sad-an ka
nganong wala ka
mibuswak

ayaw basola ang
adlaw nga hagbay
rang naloay

oo, sige, kasinahi
ang mga saktog 
buswak, humot ug
mabulukon 

ahh, pyuos man o
buwak, ayg kasina,
madali'g madugay
malaya, tanan malata.

walay buot

dako kaayo ang
akong kalooy
nganong ako nahigugma
pa man gihapon 
kanimo,

wala pa gayod
nakat-uni sa akong
kasingkasing
ang arte sa paghikalimot

ug ako usab
ania, ngano kaha nga dili
sab ako
makapasaylo nimo?

buta gayod gihapon ang
gugma
unya kining nahigugma
anaa
nagpabilin sa iyang pagka
walay buot.

usa siya ka panday

gibunalan niyag kahoy
ang iyang magulang nga
naigod sa ulo, natumba,
mikirig, dayog kamatay.

"salbahis kadtong igsoona,
giatangan ako niya, gadalag
tigib, aron iya akong lubaon,

duna na siyay gipatay kaniadto
nga gitabangan namog bayad
ni nanay ug tatay, maong wala
siya mapriso, 

matag adlaw ang iyang gipangita
mao ang away, ang sumbagay,
ang tagay, 

niadtong adlawa iya kong
gisampalong, dayon iya kong
gigukod kay ako midagan,
dayog lipot niya sa ngitngit
ug gitagbo niya ako
aron lubaon sa iyang 
tigib,

maong wa na akoy
nahimo, nakapunit akog
dako ug taas nga kahoy
ug ako siyang giigo 
sa iyang agtang, maong
siya natumba, mikirig
dayog kamatay"

usa siya ka panday.
gikan siya namanday.

dugangan kaha?

lisod ang kahimtang
sa imong away.
wala ka kaila sa imong
mga kontra
apan ikaw nailhan
kaayo nila.

pagpalit ug dugang mata.
dugang nga dunggan.
ug kon mahimo pagpalit
ug laing duha ka kinabuhi.


apilig saktod sukod nga
lungon.

palina

kinsa bay magdahom
nga siya sa nag-edad pag
lima
nagtrauma na

wa masayod ang iyang
inahan
hadlok sab siya nga
motug-an
kay basig siya bunalan

kinsa kaha ang iyang
gisultihan nga siya 
gi-rape didto sa balay nga
karaan
sa iya ra usab nga ig-agaw


kinsa bay motoo kon
iya kining isugilon nga siya
ila na mang gihusgahan
nga bakakon?

buta ang inahan.
bungol ang amahan.
ang mga bulingon nga
habol
dili ibulad sa 
peryahan

nagkatawa ang ig-agaw
nangihat, nagpaabot 
sa laing
higayon.

padayon. padayon, padayon.
sakit nga handomon.
kagot sa ngipon.kagot sa ngipon,
kagot sa ngipon

hait nga tutok.
katawa sa ig-agaw.
hait nga tutok
wala kadulot.

kinsa pa ba kaha ang
motoo kabahin niini?
kinsa kaha ang maghatag
sa hustisya?

ang kamatayon. ang panahon.
ang lubong. ang sagbot.
ang kalayo. ang palina.

nindot usab tan-awon ang
lingog-lingog
oo, ang kinabuhi dili
moundang aron sa hangtod
mag-iyak, mobakho

anaa, gilung-ag ang saging
aron lubkon, butangan sa 
kinagod nga lubi, 

matag alas tres sa hapon
atubang sa karsada
lantaw sa imong ig-agaw
nga mikatawa
diha sa iyang sakyanan
nga naghaguros sa 
dalan paingon sa laing
lungsod nga
usab bakakon.

wa ka lang masayod

kasagaran sa usa ka larawan
lamang
moingon ta
malipayon sila

si nanay si tatay
duha ka anak
laki ug baye

hingpit, moingon ka
wala ka nay laing pangitaon pa

sa laing hulagway
anaa si lolo tupad ni lola
gahawid sa buwak 
unya ang usa gahawid sa
baston
nanglingkod sila sa
tugas nga
lingkoranan sa ilang tiilan
ang duha ka apo

hingpit, hingpit nga
kinabuhi
wala ka nay laing pangitaon
pa, maoy sigi nimong
mayubit

apan dili gayod kana ang tinood.
daghang bakak ang gitagoan sa
maong hulagway.

wa ka lang gayod masayod.

alang kang fred....

karon
akong nahinumduman si
prof. fred

tigsulat ug balak
tigbasa sa iyang mga balak

kadtong balak niya bahin
sa ulan
nakapatingkag sa akong
kalag

ang tingog sa ulan
subo
subo gayod kanunay
unya
walay undang....

aron ugma sa duro pangitaon

gikalipay sa uban nga
ikaw mailad

tungod kaha nga 
ang kalipay usahay
lisod
pangitaon maong

gihatag mo usab 
ang ilang pangandoy

karong adlawa buta ka
bungol, buang,

mangatawa ang mga
kulangkulang

misayaw ka sa ilang
kuskos
mikatawa ka sa ilang
katawa

sayop, gihunahuna mo
apan pila na lang kaha
ka adlaw ang
nahibilin kanila?

pukawon ang nagpatulog
tulog
pasagdan ang mga bililhon
nga ikatag sa
dalan
nga paliron sa hangin
aron ugma
sa duro pangitaon

alibangbang

para asa ba ang
alibangbang?

dili mo maprito
o masugba sa
kagutom

unsay pulos sa
iyang pako nga
gagmay?

pahulay usa
buhat anang wala
lantaw lang
batia ang kaanindot
sa mga
walay pulos diha
kanimo

mogaan ka
nga maglupad
sa talagsaong
kalipay

pila na lang kaha ka adlaw?

sahay
dili kinahanglan ipakita nimo
nga nakasabot ka

dili na kinahanglan

kon kalipay niya nga
bogo ka
pauyonan

ihatag ang iyang kalipay

pila na lang kaha
ka adlaw?

ang pagbiya

ang pagbiya
nga tiunay mao ang
dili na gayod pagbalik
sa gigikanan

wa ko mibiya nimo

ipha ang mga katuigan
apay ayaw
laktawi ang usa ka adlaw
nga ako mibalik
diha sa imong mga bukton
mitago pag-usab
diha sa imong dughan

ang bildo diha kaniya

kon dugangan ko pa
ang dili mo masabtan
mosamot kabug-at ang
diha sa imong agtang

dili tanang gipanugilon
nagdalag kahayag, sama
sa kalibotan, sahay ang
gidala usa ka kagabhion
nga tumang kangitngit

dunay mas abtik pa nato
nga mas makakita sa 
kangitngit, moagik-ik
manglabtik, hagtik, 

apan dunay apan, kay
kon didto na usab siya
sa atong kahayag, siya
sama sa bildo, mabuak.

palihog pangitaa kon asa ko diri

nag-atubang
ming duha didtos lamesa
wala siya sa kabisera

tigulang na sab siya
puti na ang iyang buhok
nalusno na ang lawas
hapla na ang aping 
nagpasabot nga siya
usab napangag dapit
sa iyang aping

dunay bikil ang iyang 
wala nga mata
dunay gamayng unod nga
mitubo

dako na ang iyang tiyan
migamay ang iyang mga bukton
halhag na sab ang bungot
tangkag lang gihapon ang dunggan
ingnon ta nga taas pa ang
iyang kinabuhi

dugay na sila
wala sab silay anak
naguol ko
human niining tuiga
o ingnon tang bisag
unom pa ka tuig gikan karon
mapapas na sila

morag mga balas sa baybayon
diin ang mga tunob
mawala

gawas lamang sa umang
nga nagsigig dala sa iyang
balayan

sa makadyot lamang
naghulma sa iyang paak
diha sa balas sa dagat.