2010/07/08

nasulayan mo na ba higala
ang pagtan-aw sa kalibotan
gamit ang usa ka mata
lamang?

nasulayan mo na ba ang paghigda
sa alas nyube sa buntag
bisag dili ka katulgon
tungod kay nabati nimo
ang imong pagkawalay pulos?

kadtong gipatong mo ang imong
tuo nga kamot sa alugnan
nga mora kag papel
ka gaan?

kadtong gitabonan mo ang pikas
mata tungod kay hapdos
ra kaayo ang usa ka
talan-awon?

kadtong gitak-om mo ang imong
baba kay samok na kaayo ang mga pulong?
kadtong naghuot ang sip-on og luha
diha sa imong ilong?

pagkahilom sa lawak
ang mga haligi gibati og kahadlok
mikurog ang mga bongbong
og ang salog dili gustong moangkon
sa imong gibuhat sa pisi
walay makaako og tan-aw
sa umaabot

nasulayan mo na ang sunod nga nahitabo
apan naluwas ka niini

kinahanglan ko pa ba kini nga isulti dinhi?

2 comments :

  1. makatandog, ang sulod makatugaw. maayo pagkahimo

    ReplyDelete
  2. Anonymous7/12/2010

    nindot. makahuloganon. makakurog ang mga imahen :-)

    ReplyDelete

Nindot ba? Unsay imong maikasulti?

Panginhas dire