sa suba nga bugnaw

gusto nila nga kita maghubo
sa tanang tang sapot
aron maligo kuyog kanila diha
sa sulod sa suba nga
bugnaw,

daghan ang gustong motan-aw
dunay uban nga namugos og ikaw nga
wala na mogamit sa imong hunahuna
gawas lamang sa kaubos sa imong
kasingkasing
mihatag kanila sa ilang gusto og imong
gihubo ang imong sapot

og nakita ka nila
sa imong tinood nga panit
ang imong balahibo ang imong
pusod ang imong ilok
ang tanan tanan gayod
nga kasagaran ikaw lang og ang imong
samin ang suod

morag naulaw ka gamay
apan imong gitulon ang nagpahipi mo
nga garbo
tungod og alang kanila
nga misaad nga ikaw og sila
usa ra

pagkabugnaw sa kagabhion
niadtong higayona og sila nga
mitutok kanimo
nanag-inom sa ilang mga init
nga kape
og nanagtapis sa ilang mga habol
og nagputos sa ilang ulo
og mga tiil

ikaw lang ang nag-inosara sa
imong pagkahubo
nahisama ka sa usa ka Kristo
paingon sa imong kalbaryo
aron kaha ilansang sa krus

apan mipasalig sila
nga sa kataposan sa pagkakita sa kamatooran
wala kay kabilinggan
og wala kay angay nga kalisangan
kay anaa ra sila sa imong tungod
og andam nga motabang

og miingon ang ilang hawod nga
panahon na aron maligo ka
sa bugnaw kaayo nga suba

og mitoo ka
kay nahadlok ka sa imong pag-inosara
sa pipila ka tuig

og miambak ka
naligo sa bugnaw kaayong tubig
didto sa lapad kaayo nga suba
diha sa kangitngit sa imong kagabhion
nga walay bisag usa man lamang
ka bitoon didto sa langit

og mikurog ka
og giduaw ka sa nawong sa kamatayon
og milingi ka sa tampi
og sila nangatawa
o nadungog mo lang kaha
nagduda ka
kay sa tinood wala na silang tanan
nahibilin na lamang ang ilang mga tasa sa kape
og ang ilang mga habol nga bulingon
og ang ilang mga putos sa ilang ulo og mga tiil
nga mga laya na kaayong mga dahon

pagkabuang mo gayod
karon mag-unsa ka?
natambalan ba ang imong pag-inosara?
ikaw lang baya gihapon
og hangtod na kini sa kahangtoran
nagpabilin sila nga walay labot kanimo
og ang ilang gipiyal kanimo
mao lamang ang ilang
pagbiya

kon ugaling
aduna pa man gani nahibilin nga panahon
pahawa diha
sa bugnaw kaayong suba
og tagboa ang imong
kabuntagon
isuot pagbalik ang imong sapot
paugha ang imong mga buhok
og balik sa imong balay
lingkod sa kilid sa bintana
og pamatia ang kaanindot sa kaugalingon
nimong taghoy.