kitang tanan ako ra diay.

tagboon ko ang mga hungihong
bahin kanako
daghan kini sila ug ngalan
magkita ming tanan
nga morag wala lang
kadtong akong gisulayan
ug lipay kagahapon
mahimong maghatag ug pahiyom
kadtong wala madayon
diha sa saad-saad sa mga ugmang
walay kahumanan
hatagan ko usab ug tam-is
nga pahiyom tugbang sa
kapait sa ilang pagpangyam-id
niining among panagtigom
kuyog sa gidayandayan nga gamayng
salu-salo
mahimong puro kami mga
higala bisan ug adunay gitago
nga mga panagbingkil
kay kon mag-inom na ug mahubog
ug mawala sa among mga
gipangkubtan
makalisang hunahunaon nga
sa kataposan
kitang tanan
ako ra diay.