2015/06/01

walay nausik niining tanan

ang mga giwang
nga gihimo sa kagabhion
ang mga nangliki
sa kangitngit
ang mga kahaw-ang nga 
milanab sa habol ngadto
pa sa salog
ang mga wangwang sa
pulong nga nagpasad
sa ilalom sa katre
matag gabii nga ako
magsalimuang sa tumang
kamingaw

walay nausik niining tanan
kay diha sa giwang
inig abot sa kabuntagon
mopahulay ang kahayag
diha sa mga nangliki
mosurop ang awit sa kangitngit
diha sa kahaw-ang
ang mga bentana migunit
sa ilang kahulugan
ang mga pulong nanugilon
kabahin sa mga galay nga
karon nagpakita na sa ilang
mga dagway
ang kamingaw anaa nay
kalamboan
ang salimuang nahimong
samin sa laing hugna
sa sayaw sa kamatooran

walay nausik niining tanan
akong gisalod, giinom, og
gihipos sa puno kong dughan

Panginhas dire