bluff

 sa dihang nangaon na kami

ang tiguwang nga babaye sa iyang

edad nga otsentay siete

nakabungat pa gayod diri kanako

pagkahuman niyag hungit sa 

lumpia sa iyang baba, 

"sa tinood lang, ayaw kasuko,

basin ug mauna ka pa diri kanako?"

giinom ko ang usa ka baso nga tubig

nga gikan pa sa atabay sa daplin sa 

maong balay, miginhawa kog kadyot,

mipahiyom ug mitubag, "basin pod

kaha.  Covid kaha? "

sa tinood lang, ang kamatayon

tinood gayod, dili kini bakak, 

dili sab kini matagna,  kay bisan

gani ang tigulang,

mo-bluff pa man sa mga

walay ugam

on record.....

 bisag nakabawo ka na 

nga gidunggab diay siya

desir namatay,

sa dihang gipangutana ka

kon unsa pa kaha ang angay buhaton

kabahin sa hustisya

alang kaniya mao kini ang imong

tubag: dili na ko, hasol na kaayo,

ang iyang kalag iampo nimo

ipahatag ang kahayag nga walay pagkapalong

ipadan-ag mo kaniya

unya asa ang hustisya? ingon ka 

kapoy na, kapoy na,  sakto na nga

nakapahulay na siya.

pangutana kabahin sa punoan sa bawno

 ang dako ug taas

ug karaan nga punoan sa

bawno didto sa  Dapitan

natumba

niadtong gabhiona nga

walay tawo didtong

dapita.

ang akong gikalibogan

nganong nangalipay ang

mga tawo didto,

si jose rizal kaha nga gipriso

didto sa iyang panahon

malipay kaha?

lanses

 ang gitago nga itlog sa

inaan didto sa salag sa

kasagbotan,

napusa, unya ang iyang

piso midagan, mitago balik

sa iyang duha ka pako.

dinhi ra kutob ang maong

sugilanon.

maraming salita apan wala sa gawa.

 nindot baya usab unta ang bukid sa marupay

bisag haskang kapoya nato niadtong mibisita 

ta, grabee, haskang haboga sa bukid, labang tas

galikoslikos nga suba, hawid sa kakugnan, hapit

pa nahulog sa danlog nga pangpang, hangtod nga

miabot kita sa atong paraiso didto sa marupay unya

sa unahan atua na ang bulawan, pito pa ka bungtod

ang atong adtoan.

patag na ang atong gipahulayan, daghang kahoy

unya sa silong niini mao ang payag sa atong

gipyalan, nga karon nausab na sa tumang kalimbongan.

dinhing lugara sa iyang kahabog makita ang tibuok

Ponot, sa ubos ang mga balay mora na lang ug mga

pignit sa asin, ang mga tawo mas gamay pa gani sa

sulom, unya ang karsada, mora na lang ug linya sa

imong imong mga gipautang.

with all honesty, gusto ko nga puhon dinhi ko mopuyo, magbalay kog ako, maghimo kog garden of flowers, fields and fields of uplang rice, and

some rows of corn, and some batongs and squashes.

gusto ko mag raise ug daghang chickens, bisaya nga manok, ug mga self-supporting pigs, and some

spotted cows, dalit nako kang Gerard Hopkins,

dugangan nako ang mga trees, dayon naa sab koy 

red horses, dayon dinhi maghubog ko, mosayaw ko,

mora kog si Tu Fo, (ay lang si Tulfo), makig estorya ko sa full moon, o blue moon, mangita kog

batan-on nga uyab, aron ko mahimong bag-ong 

Solomon, mag pray ko ni Lord, nga moabot kog

105 years, mag birthday ko, magpaluto kog 150 ka itlog, ipanghatag sa mga suban-on dinhi nga sige rang panglibak kanato, 

mao lagi, lisod ning magkatigulang ta, daghang gihunahuna, apan sa tinood lang, wala gyod sa gawa.

ikaw ug ako...

 ahh, gikalipay ko na ang akong naabtan.

dinhi ning lugara, kita lang gihapong duha

apan pasagdan ta ka.

ka na bang, ok, i do my thing and you do your

thing. walay hilabtanay,

mao nga kon magluto ka ug lumpia shanghai

o veggie lumpia kada adlaw

aron ipanghatag sa tibuok barangay,

wa koy quiver, bahala ka sa imong kwarta.

o bisan bisan balikon mo pa pagluto ang

makaroons, sahay tam-is kaayo usahay

haska sang tab-anga, wa koy kiber,

imo sab na, bahala kas gasul, nga siging

kahurot inig ka tulo ka adlaw.

ako sab, as i told you, i will do my own thing,

sa butang nga dili ka interesado,

molaag ko, molantaw kog sine, (apan kaparat

wa nay sine sa covid) so,

ania, ania ako balik sa butang nga imong

gikasilagan, 

ang balak, yes, ang balak, bahin kanimo,

dili bahin kanako, unya magpunay kog tuslok

sa keys, walay lantaw lantaw

sa imong macaroons ug lumpia nga bisan sa

kalamian sa gilamog mong kainit sa lumpia

(kay lagi crispy man kon init pa kanang bag-o

pang gihaon sa init kaayong mantika) 

ug sa imong macaroon nga kagabii 

natikig diha sa freezer,

basin kaha no nga inig kaon ko sa init ug

crispy nga lumpiang shanghai, (nga lamian

kaayo) dayon nakog inom sa cocacola,

unya malipay ka nga dayon magsakit ang akong

ngipon human kini matigpod sa 

bugnaw-init nga panimolos nimo diri kanako.

ahh, bahala kang lumpiyaa ka, pasagdah ta ka.

unya kon malusyang ka na, ikaw ang akong isukad

sa akong mga balak, nga ania,

gutom, unya wala nay pili kon unsay kan-on.

ang balikwaot nga valediction ni romeo kang juliet.

 abi mo gusto ko nga candid ra ko

kanang straight straight lang wala

nay sabod sabod diha sa mga galas-ay

nga simile ug metaphor, (aw hinoon

basin seguro ug dili na gayod ako

makamao, o kaha ba basin seguro dili

na lang gayod ako kaayo sensitive sa

akong palibot, kay basin napul-an na ko

sa ilusyon o sa halusinasyon o kaha ba

naughan na ko sa magic of imagination.

naunsa kaha ko no? maayo segurong mag

lie low lang sa ko sa pagkasensitibo, o nianang

pagkaontoy og pagkabulastoy, (tiguwang na

ko, dapat wala na ang drama diha sa pagkapoetico

o magnifico, nga nakapiko baya usab kanako)

gusto ko nga candid ko, franca, lengua de vaca,

wad-on na ang flores de buca, kanang a spade

is a spade, kanang, sakto na, di na ko ganahan nimo,

o diha ba sa punto nga, i quit, i am leaving,

and i will not be coming back to you anymore.

oops, di ba drama man sab ka na? shit shit shit,

ibalik nako ang imong gipanulti kanako, 

you know naman, you talk ka pa, 

use ka na lang. Period.

brown butterfly

 sa nasaag nga alibangbang

ang una mong gilantaw mao

ang bulok niini, unya dayon

nimog ingon, brown ang

butterfly, dayon nimog kalipay

kay kon brown na gani

daghang kwarta nga wa mo

damha ang moabot puhon.

gikapoy ka na nianang nasaag

nga itom, kay sum-od na baya

usab ang gabaha nga mga lungon

nga miputos sa galusngag nga

kamatayon.

paghandom

 sa paglantaw ko sa mga daang

larawan

morag natubag na ang mga

pangutana

atua ang gamay nga bata

gitaud ang ribbon  sa pagka first honor

sa grade one sa iyang mama

nga itom ug sanina

milingi ang bata sa camera

masulub-on ang iyang pahiyom

kay sunod tuig ibalhin na siya

didto sa balay sa iyang lola

layo sa iyang amahan

polka dots ang yang long sleeves nga green

sinaw nga itom nga karsones

nga makapalong ug suga

cute nga bata ingon silang tanan

(nga gikan pa kaniadto duda sa pagkamalipayon)

natubag ang pangutana

unya karong gabii makatulog na ug tarong

ang maong naghandom

mas ganahan ko nga wala koy pako

 gikapoy na kog

pamati anang nangandoy nga

adunay pako

anaa ang mga pangandoy

apan nagpabilin sa ilang

pagkaunggoy

hangtod karon naglibog

ko ngano

nganong bisag usa alang

kanila

dili maayong tawo

ang ania karon

ug kadtong atua kaniadto

ang gani ang moabot pa

napuros dili maayo

napuros walay pulos

gikapoy na ko

sa pangandoy anang mga pako

kay ang tanan

napuros man "nangapako"

didto kos jakarta

miabot kos africa

didto kos francia

apil na ang amerika

didto kos europa

labay sa malaysia 

hapit sa cambodia

mitira pa sa czechoslovakia

nakaihi pa gani sa

russia

wala koy pako

wala ko mangandoy ug pako

naningkamot lang kog

ako.

ang akong giusikan

 ang akong mga gipanglabay

gipamunit mo man

gidala sa imong balay

giayo, gitapakan, gihimong

bag-o

gikuyog mo

gihimong imo

nakita ko

mipahiyom ko

ang akong giusikan nga kinabuhi

gipunit mo

gihimong imo

nalipay ko

mipahiyom ko

milingolingo ko

kay bisan unsaon dili gyod

na mahimong imo....

untitled

 ang imong yuta

ang imong ngalan

walay titulo

ang mga....

 ang mga nanglabay

nanglabay na

ayaw na pabalika pa

basig mabukog ta

ang mga milalain

milalin na

ayaw na ambata 

basig matunok ta

ang mga gilabay

gilabay na

ayaw na saloa

kay sakit na ka na

ang imong gisuka 

gisuka na

ayaw na punita

 kay lood na kana.

mga hinayhay

 sama ra sa nga kon

manaway kas gobyerno

ang ngalan mo

rebelde,

sama ta nga kon modayeg

kas atong presidente

troll ka nga giswerte.

unta walay labelay

kay kitang tanan puros 

baya hinayhay.

ang paghapa ni Bathala

 paraiso

ang paghawid sa

imong kamot

langit ang akong

paghalok

sa akong pagsulod

sa imong tibod

si Bathala akong nakita

mihapa.

naalaang troll...

 dili baya pod lalim nga

modayeg mi sa among presidente

nga si rodrigo duterte

kay automatic baya nga ilang

tawag namo troll.

dili tanang troll duterte

dili pod tanang misuporta niya 

troll.

miabot lang gyod ang panahon

nga giganahan kog president

unya maayong pagkatunong nga

siya si duterte

dili ni balak, pahungaw lang.

naalaang troll.

unta dodoy

 unta dodoy

kanang imong kaalam

alang unta sa pag-alagad

sa daghang

katawhan

ihatag ko kanimo ang

dakong pikat

imo mang gigamit sa pagpangawat

wa kay pulos

dako kang musimos

kay ang imong kaalam

alang man lang

sa dunay kwartang giandam.

ang kagawasan sa uwagan nga tiguwang

 ingon siya

hormonal lang na

gisulayan sab nako

hormonal lang gyod 

mitoo ko

maong giluwa ko ang

nia sa sulod sa akong dughan

gipasiplit ko ang niya sa 

sulod sa akong

kaban

busa nawala na ang tanan

maong sa pag-abot mo 

ganihang buntag

mao say pag-abot sa midan-ag

nga kahayag

ug mihay-ad baya ang

kaharuhay

wala na mangambat sa

imong kagalot

ug kahakog

makita mo ang tiguwang

anaa

namati sa awit sa iyang

nakab-ot nga kagawasan

milantaw nimo

nga morag bag

wala ka nay lami

ah dili,

kumbinsido gyod ko

gisumpayan,

wala kay lami.

ang mga ginikanan

 sa gipamutol mong mga kahoy

nga wala makabalos kanimo

anaa ang tubig ug ang hangin

miabot aron pagsubay sa ilang

mga ginikanan....

kahoy

 unsa kaha ang kahoy nga

naghitik sa bunga

mangutana pa kaha kon

kinsay angayan

hatagan?

kon gibuno kini sa mga

bata

aron makuha ang iyang

mga bunga

masuko kaha kini?

sayod kita sa iyang

kahimtang

mitubo man ugaling

manahon

mamunga

apan kini sa kanunay

anaa

nagpondo lang gayod

di kadagan, di katingog

di kabuno dili kabalos

dili kapili, dili ka lingi.

ang awit sa mga tamsi

 ang mga tamsi

nanagbatog sa among

kahoy

diri sa tunga sa among

nataran

ning among balangay

kami lang ang

adunay gamay nga

nataran nga alang sa

mga tamsi

kining usa ka punoan

ilang kagwangan.

kanaway, bitin, agila, ikaw

 kon asa naglupad lupad

ang mga kanaway

atua ang baga nga panon

sa mga isda.

nindot palandongon

ang ilang panaghiusa

kay makakaon man tanan

sa mga isda nga

nagdinangag diha sa 

panagtapok.

lahi sab ka, mora kag

agila nga nag-inosara

diha sa kahilom

kon asa ang kwarta tua

ka nag-inosara walay sabasaba

sa imong kahakog sa bahandi

diha sa pagpangilad

mora kag bitin nga itom nga

pula ug ikog

nga nagpahipi sa kasagbotan

dayog tukob sa bagtok nga

nagdinangag diha sa

dalan

human sa imong pagtukob

dayon nimog sirit sa imong

lungag, dili na katingog sa

tumang kabusog.

abi mog unsa...

 ang gisaad

ko kanimo nga tulo 

sa matag adlaw

ihatag ko,

tulo ka buwak

tulo ka pulong

tulo ka bato

siyam  tanan

wala pay labot

ang 

wa giyamyam.

alang sa akong buang nga kaila

 ikaw lang ang naghunahuna

ana,

wala siya naghunahuna ana,

lain ang iyang 

gihunahuna

lain ang iyang hunahuna

lain siya

lain,

ug nganong ikaw lang ang buang

dinhing dapita?

buang, buang ka,

nga naghunahuna niya....

ang kamatayon

 kon mamatay na ang gimahal

dili gayod unta kini ikaguol

ingnon mo lang ang imong tupad

nga mipahulay lamang siya 

nga mibalhin lang siya sa iyang

bag-ong panimalay nga igo lang

niyang giwakli ang tabon sa iyang

bentana aron lantawon ang iyang

bag-o ug nindot nga  pantawan....

walay nada....

 kon naunsa nga nawala naman

ang nindot nga langgam

ang iyang nindot nga tingog

ang iyang nindot nga awit

wala nay nadungog ang kalibotan

apan wala sab kini nagsubo

wala sab kini nalipay bisan

sa makausa pa bisan sa niadtong

buhi pa ang maong langgam bisan

kadtong miawit pa siya bisan

ug nindot pa ang iyang tingog

bisan pa....

ang kaniadto

 human sa paglabay

sa usa ka panahon

makatawa ka sa imong

kaugalingon

dili ka gani makatoo

nga mao diay siya kadto

ang imong gihigugma

kaniadto

makaingon ka

pagkabuang ko ba

pagkatanga

pagkabugo nganong dili

makamaong 

mopili

hangtond karon kon madungog

mo pa lamang ako

nakatawa ko nga nanamin sa

akong kaugalingon

migawas sa balay

midagan 

mihunong sa ngitngit

kasukaon....

ang balikwaot

 sa una lisod sabton

nganong balikwaot ang mga

panghitabo

pananglitan kinsa tong imong

gihigugma

nahigugma man sa uban

unya kinsa tong nahigugma nimo

dili man sab ka ganahan

sa paglabay sa panahon

masabtan ra kini

kining balikwaot nga kahimtang

kining paghitabo nga 

kawang

masabtan pag-ayo tungod

kay sige na kining mahitabo kanimo

nadawat kay sa pagkatinood lang

wala ka man gayod usay mahimo...

mas nindot sa layo

 kon sa akong pagpalayo

makita ko ang tinood, pwes

magpalayo ako,

hinoon sa laing bahin

mas nindot baya pod lantawon

ang mga bitoon

bisag dili kini tinood

mas nindot sila isip mga bitoon

kaysa ilang pagkatinood nga

mga adlaw

nga kon imong duolon

sa way katingala dili ba nga

masunog ka? sa way paglipodlipod

sunugon ka baya

nila.

KADAUGAN NI BIDEN, MAKATINGKAG SA DUNGGAN???

 

KADAUGAN NI BIDEN, MAKATINGKAG SA DUNGGAN???

 

Ginapos sa kahadlok, kakulba ug kalibog,

Ang piniliay sa  Amerika daw bomba,  makabungog,

 

Padakuay sa baba, sinigahay’s mata ug yagayaga,

Kini ang gipasiugdahan sa hambogero’ng nagdumala,

 

Walay giliatan, Si Trump puwerte’ng nakasalida,  nakapakiat,

Sa kaulahian, resulta sa piniliay mibalit-ad, siya napugwat,

 

Batok sa mas tigulang ug kalmadong mamumulong,

Biden, nagmadaugon, mata sa kalibotan karon nag-alirong,

 

Kadako ra ba sa buluhaton, pahiuli sa sumpaki,

Pahiuyon sa hiniusang kawsa, ayom-ayom sa nangabali,

 

Ang pagdiskubre sa sumpa sa virus nga nagkorona,

Biden, ikaw na, kining tanan pabug-at sa imong abaga,

 

Amerika, dako’ng nasod nga gamhanan, apan,

Atong panid-an kuno kon  mga  ganghaan  mabuksan,

 

Bag-ong panan-aw tutukan,  bag-ong paglaum nuntan,

Tubag sa problema, hinaut pa kini  madiskubrehan,

 

Sa makausa pa, atong nasaksihan, ang tingog sa katawhan,

Kon magkahiusa, makatumpag, makapatingkag sa dunggan..

ang kangitngit

 makamao sang mopapas ang
kangitngit

gipapas ang kahayag

milalom ang kagabhion

unya ang tanan naunlod

sa kahilom

diha sa gahom sa hinanok

sa katulugon

maayong pagkatulog sa 

kahayag

nga gitapokoan sa mga bitoon

diha sa bulan

nga hangtod karon nagpabiling

manggiulawon

K A H A P O N O N

 

KAHAPONON

 

ang kahaponon mohangop,

nagkaawop nga  kahayag, manuhutsuhot,

 

mga gapnod ug kasikas sa baybayon,

nagpungasi sugat sa pag-abot sa kilomkilom,

 

sa layong unahan, may magpaantaw,

magpaabot,  magngisi, ug mapahiyomon,

 

human sa kahaponon, mga banig bukharon,

musunod ang kagabhion aron tukbilon,

 

sutaon ang nangalimyon, hiusahon,

ang  halok sa   mabugnawong kagabhion..

blanko

 hulip lang kini 

sa kalaay

gisi nga buling

banig

nga gihulipan ni

tatay

samtang si nanay

magul-anon nga 

nanambo sa bentana

nagpaabot sab sa

wala....

gamayng kasakit

 kadtong sa iyang

panggigigil

wa kaantos

naanod sa kalami

napaakan

ang kinatumyan sa kalipay

gamayng kasakit

nga dili mo ipanugilon 

ginagmayng kalipay

 KUHAON Mo

ang kugmo sa sulod sa

imong ilong

likitlikiton.

abortion

 nindot ang imong nawong

angayan ka sa imong buhok

ganahan ko nimo, mihunghong

ko sa akong kaugalingon apan

dili ko kaingon nimo, lig-on ang

akong baroganan

dili ko angay nimo ug dili ka

usab angay nako

anaa ang gugma giburos sa

kasingkasing

apan anaa usab ang mga regla

nga mokuha niini.....

giunsa mo ba pagbiya ang kagabhion

 nagbalibali ang imong lawas 

sa kataas sa kagabhion

wala malooy kanimo ang katulogon

milagom ang imong mga mata

nahuyhoy ang imong abaga

nagsakit ang likod

namoypoy ang mga kamot ug tiil

giablihan ang kabuntagon sa tugtugaok

sa sunoy

dayog panglupad sa mga bakiki gikan

sa punoan sa nangka

aron manuktok sa gisabod nga tahop

sa nataran sa baryo sa Olingan

mibakod ka, miadto sa kusina

nanglimogmog sa tubig

nangluwa sa banggera

nanghilam-os sa nawong

nanudlay sa buhok

migawas sa balay

miatubang sa bag-ong adlaw

gipakita ang hilaw nga pahiyom

sa buwak sa paleya nga miusbong

sa labat nga kawayan sa balay ni Maria.

nahuman na ang kagabhion

gibiyaan mo kini sa laing hugna sa

pagpakaaron-ingnon.....

lingla

 walay bukog nga gikuha 

lamang sa kilid sa hangin

bisan kon ang gabii walay

makita nga inibtan

bisan kon ang halok sa tubig

walay makita nga ilhanan

ang kamatooran makamaong

magpabilin sa humot nga lama

sa atong kagahapon, sa duga,

sa tagok, sa atong gihandom nga

ugma, bisan pag ilingiw mo ang

atong karon, ako motutok lang gayod

gihapon, ning gugma kong tapot 

nga morag tsinggam nga gitipigan

sa ilalom sa lamesa diin sa ibabaw

niini gisulat ko sa papel ang ngalan

sa akong asawa, ang among larawan

niadtong among kaminyoon bente

singko na katuig ang milabay 

wala matarog sa kaabtik sa lingla

sa bakak, sa gidala nga pagtoo nga

kini bato, unya gikulit kami didto.

tungod sa imong kahabog

 ang mga mata mga bentana 

sa atong kasingkasing

nganong molingiw ka man

sa akong pagtutok kanimo?

wala ko migamit ug pulong 

human sa atong panagtagbo

ang atong pakighinabi mora 

lamang ang paglabay sa panganod

sa tumoy sa taas kaayo nga kahoy

gihangop pag-ayo ang imong anino

tungod sa imong kahabog nga dili

mahikap, dili magakos, mahagkan.

kamot ug dila

 gisukod ang kalipay sa duha ka 

mga utlanan: sa kamot ug sa dila.

samtang milikos ang dila nga morag

bitin, dayon misulod sa bangag nga 

morag kasag, nga sa paglantaw lamang

diha sa ganghaan, mabati mo ang mga

pangutana, sa pulo ka mga tudlo ug

sa iyang dughan nga morag palad, 

ang mga kamot morag mga batang

nangita sa pulak nga mangga didto

sa kasagbotan, nagbasa sa lapok 

misinaw sa nahagdaw nga kahayag

sa bugnaw nga kaadlawon didto atbang

sa balay sa nag-inosarang si Neneng.

kabahin sa lima ka magsoon

 sa lima ka magsoon

si betyang ang mas 

matinod-anon nga miingon

kang koray, ayaw sag

kamatay, malooy ka namo

upat na lang kaming 

magbahin

sa kabilin ni nanay.

taghoy sa hapon

 dili baya lalim

sa gagmay pa kita

taas ang sanga sa

bayabas, latos diri

hapak didto, sakit

baya pod ang silhig

nga tikog, naa pay

bakos, naa pay mongos,

sa among mga tuhod,

ug sili sa among dila,

dili malalim ang among

mga pag-antos aron lang

kuno kami masantos, ug

tuod man, walay tingogay,

manihapon, samtang

nagtulo ang luha,

makatulog sa kakapoy,

ug kahiubos sa dughan,

apan sa laing bahin,

sa nangamatay na sila

nagpasalamat gihapon kami

sa ilang mga kabilin,

basakan, kalubian, balay,

baybayon, bungtod, kahoy,

duna say bahin sa ginagmay

nga kalipay, kadtong dongdong,

kadtong shatong, tagoanay,

sakaysakay sa kabaw,

ligo sa suba, pagpanagbo

sa dagat, taksi, gukod gukod,

balabala, saka saka sa bayabas,

tabako ug dahon sa lumboy,

baklidbaklid, kabit, hantak, 

istip istip, tirador, kote ug

luthang, gubat gubat, ambak

ambak, kros imbaw labaw.

gikalimtan na namo ang

mga kasakit, gidaginot namo

ang mga hinagdaw nga kalipay

sama sa pag-ani sa uma, 

giok sa humay, tahop sa tipasi,

higda sa uhot, taghoy sa hapon.

hilahila

 misulod ko

sa tiyan sa baka

gibasa nako

ang iyang libro

haskang paita

wa ko kaginhawa

nalaan baya ko nga

hilahila

maong ila kong

gilangkat

dayon gipidyat....

lahi man diay ka

 simpli ra ang kinabuhi

sayon ra baya, ambot kon

nakasabot ka ba niini,

sama sa pagluto, simpli 

ra ang pagabuhaton,

kon tab-ang asinan,

kon gahi, pahumokon,

kon asgad, butangan

sa dugang nga tubig,

kon pait, butangan gamayg

asukar,

kon baga ra kaayo ang

sebo, pwes haw-asi,

kon luspad, kolorkoloran

usab, sa aswete ba o sa

toyo, o mahimo sang

sa ketsap, 

sa dihang kita nang duha,

abi kog mao ra gihapon,

lisod man diay,

kon tab-ang akong 

giasinan, tab-ang man

lang gihapon,

kon luspad, akong 

gikoloran, maketsap man

o mapatis, 

luspad man lang 

gihapon,

naglibog ko pag-ayo,

dayon nakaingon kog

dili ka man diay karneng

baka, (walay sebo)

dili man usab diay 

karneng baboy, ( walay

tambok)

tinaw ka sa manok 

haskang sapida, 

nakasulod man gani 

ko apan dili na man

hinoon ako

makagawas.....

tungaw

 tungaw nga

misingit sa kum-ot nga

panit 

sa akong itlog,

sakit sakit, ngotngot

pod gamay,

katol katol , apan

lami lami sab,

sa pipila ka gutlo

akong gipasagdan

gikalot kalot

apan dili ko pa una

lukaton.

sa tinood lang

 bisan kon patay ka na

wala ko gihapon abrihe ang

kaban ni Pandora, 

naa lang gihapon akoy kaikog

bahin kanimo, 

nakapangutana ko, para unsa

pa ba?

bisan kon patay ka na, gitak-om

ko gihapon ang akong baba, 

mora kog dag-om sa langit nga

naningkamot nga dili mahulog

sa yuta,

kay unsa pa man gayod?  gipakisama

ko nga ang tanan nahibalo na niini,

busa ang akong pangutana mao lang

gihapon, para unsa pa man?

gibantog ako sa akong pagkamatinod-anon

apan karon sa imong haya, gipili ko

ang pagpakahilom, nga sa pagpili niini

nahimo pa akong labaw nga bangiitan sa

karaang bakakon.

nadungog ko ang ilang pakighinabi

kanimo niadtong buhi ka pa, unya inig

lakaw na nimo, mangyam-id sila, 

dili mokatawa, gitakos ang ilang mga

kasakit diha nimo, duna pa gani miingon

nga maayo pa unta nga dili ka na mobalik,

nga unta, mas magmalinawon seguro ang

ilang kalibotan kon patay ka na, nga og

kon mahitabo kini, dili ka na novenahan,

ideretso ka na lamang ug lubong  kay

lagi, mas baho pa ang imong kinabuhi kaysa

patay nga lawas,

nagpamati lang ako, sama sa gihapon 

gitigom ko ang tanan bahin kanimo, wala

koy ikasulti, diha lamang ako sa pagpangambot

hangtod nga nabalita ang imong kamatayon

diri kanamo, nga kaming tanan naigmat nga mora

kamig nangahulog sa hagdan,

nagpakahilom lamang kaming tanan,

adunay nagpabati sa ilang kasubo, adunay

nagpadala sa ilang mga pag-ampo,

adunay miamot, adunay misugilon nga 

maayo kang tawo, (unya kaming tanan

miyangoyango nga unta ang tinood 

unta kami maglingolingo)

nahuman na ang tanan, napalgan  ka na,

gitabonan, gisirad-an, gibutang sa lungon,

giputos pag-usab, gidala sa funeraria,

gisapotan, gisudlayan, dayon ug dala namo

nimo didto sa imong pantyon,

gipili namo ang kahilom, miingon sila

nagbangutan kami, mipasalig sila nga

molabay ra ang kasakit, miyangoyango kami

mihikap sa among mga mata, daw kahilakon

apan sa tinood lang, kon utingkayon ang among

mga kasingkasing, sa among mga tinipigan,

wala kami modo nga miingon, nga ang imong

kamatayon, sa tinood lang, nakahatag ug 

kahupayan sa among mga kahimtang, 

kaming mga walay batasan, mga walay

utang kabubut-on, diha sa kahilom 

gikalipay ang imong kamatayon......

a la zephaniah

 langan kita sa pagsulat

sa balak

mas paspas ang nagyamayama

sa dalan

sa iyang kagutom ug kamingaw

sa iyang kauhaw ug

katugnaw

sa iyang mga ngabil ug ngipon

gilitok niya ang balak

diha sa ritmo sa ulan, sa bagyo,

sa ritmo sa dugdog ug kilat

sa ritmo sa nabalintong nga kaldero

sa nabuak nga baso

sa gipalid nga dahon 

sa haguros sa habal-habal sa bungtod

nga mitungas sa bukid 

sakay ang katabang nga karon mibisita

sa ilang mga patay

didto sa bukid

sa ritmo sa balod sa dagat

sa ritmo sa nabuthan nga sakyanan

sa pagbulkit sa interior 

sa kadugay nga pagpaabot sa kuryente

nga kalit lang nga nawala

sa pagkapalong sa mga suga

sa pagkahilaw sa nilung-ag

sa pagkapagod sa sinugbang isda

sa ritmo sa rosaryohan

sa himaya nga wala miabot

sa grasyang gipangadye

sa pipila ka tuig sa kadugay sa panahon

diha sa pagpakahilom sa ritmo sa imong giluom

hangtod na sa pagsyagit mo puhon.

benjamin zaphaniah

 giusab mo ang pagpamalak

gikuha mo kini sa imong itom nga ngabil

sa imong halhag nga ngipon

sa imong nagsalapid nga buhok

sa imong itom nga pamanit

oling ka lamang kon buot kwentahon

sa among panultion

libot-suroy, nga kon sa bisaya pa

tupuwan

apan ikaw ang nakapausab sa dalan sa

pagmalak

ikaw ang gilitok nga pulong sa katawhan

ug diha kanimo ang balak nahimong tawo

ang unod ug dugo

sa balak gikalawat sa tawo giinom sa tawo

unya ang balak

nawad-an man galing sa trono apan

nahimong tren, nahimong barko, nahimong

eroplano

nahimong sikad, nahimong sakayan

nahimong habal-habal

sakyanan sa tanang mga ordinaryong tawo

unya ikaw na ang bag-ong santo kon dili man

gani ang bag-ong kristo...

the path of least resistance

 matag adlaw 

isulat ko ang sulog sa suba

subayon ang agianan nga

gitawag mong

path of least resistance

sahay magtuyok-tuyok

busa gilabyan mo kini maskig

ikawalo

matod mo, mao rang subaa kini

ang atong giyatakan

sa usa ka tumong lamang....