sa tinood lang

 bisan kon patay ka na

wala ko gihapon abrihe ang

kaban ni Pandora, 

naa lang gihapon akoy kaikog

bahin kanimo, 

nakapangutana ko, para unsa

pa ba?

bisan kon patay ka na, gitak-om

ko gihapon ang akong baba, 

mora kog dag-om sa langit nga

naningkamot nga dili mahulog

sa yuta,

kay unsa pa man gayod?  gipakisama

ko nga ang tanan nahibalo na niini,

busa ang akong pangutana mao lang

gihapon, para unsa pa man?

gibantog ako sa akong pagkamatinod-anon

apan karon sa imong haya, gipili ko

ang pagpakahilom, nga sa pagpili niini

nahimo pa akong labaw nga bangiitan sa

karaang bakakon.

nadungog ko ang ilang pakighinabi

kanimo niadtong buhi ka pa, unya inig

lakaw na nimo, mangyam-id sila, 

dili mokatawa, gitakos ang ilang mga

kasakit diha nimo, duna pa gani miingon

nga maayo pa unta nga dili ka na mobalik,

nga unta, mas magmalinawon seguro ang

ilang kalibotan kon patay ka na, nga og

kon mahitabo kini, dili ka na novenahan,

ideretso ka na lamang ug lubong  kay

lagi, mas baho pa ang imong kinabuhi kaysa

patay nga lawas,

nagpamati lang ako, sama sa gihapon 

gitigom ko ang tanan bahin kanimo, wala

koy ikasulti, diha lamang ako sa pagpangambot

hangtod nga nabalita ang imong kamatayon

diri kanamo, nga kaming tanan naigmat nga mora

kamig nangahulog sa hagdan,

nagpakahilom lamang kaming tanan,

adunay nagpabati sa ilang kasubo, adunay

nagpadala sa ilang mga pag-ampo,

adunay miamot, adunay misugilon nga 

maayo kang tawo, (unya kaming tanan

miyangoyango nga unta ang tinood 

unta kami maglingolingo)

nahuman na ang tanan, napalgan  ka na,

gitabonan, gisirad-an, gibutang sa lungon,

giputos pag-usab, gidala sa funeraria,

gisapotan, gisudlayan, dayon ug dala namo

nimo didto sa imong pantyon,

gipili namo ang kahilom, miingon sila

nagbangutan kami, mipasalig sila nga

molabay ra ang kasakit, miyangoyango kami

mihikap sa among mga mata, daw kahilakon

apan sa tinood lang, kon utingkayon ang among

mga kasingkasing, sa among mga tinipigan,

wala kami modo nga miingon, nga ang imong

kamatayon, sa tinood lang, nakahatag ug 

kahupayan sa among mga kahimtang, 

kaming mga walay batasan, mga walay

utang kabubut-on, diha sa kahilom 

gikalipay ang imong kamatayon......