sa umaabot nga Marso

 maghimo tag mga tigmo

lingawon ta ang atong 

tagsa-tagsa

sa kalalom sa kangitngit

sa atong kagabhion

asa na kaha ang wakwak

nga atong kilawon?

asa na ang yawa nga atong

puyukon?

ang mga anghel nga katuhuan

dili sa

ilang mga gipakita

aninaw sa anino nga gimugna

sa kahayag sa 

gamayng bentana

sayaw sa kalag nga wala pa

kabulag sa lawas

ania na ang akong mga tigmo

nga akong gikalimtan ang mga

tubag

ania dinhi ang tanang kalipay

sa misteryo sa mga tigmo

sa mga tubag nga wala na diri

sa imong mga pagtoo nga ako

maalamon unya

ang mga tubag niini

ania ra sa akong dila apan

dili ko pa una

malitok diha kanimo

tagayon ta ang mga kamingaw

sa baso

nga puno sa bino

mangatawa ta sa mga wala

pa nato hisabti pag-ayo

matulog ta nga buskad ang

mga mata

magdamgo ta sa dili

nato gustong

handumon pagkahuman

sa dugay nga katulugon

unsa ba kadtong akong damgo

sa kaadlawon

nganong nagkubakuba man

ang akong dughan

gipahibawo ka nang daan

sa mahitabo ugma puhon

dagkotan mo ang mga kandila

sa mga lubnganan

sa imong amahan ug inahan

sa imong mga katigulangan

ang mga sanga sa inyong

mga kaliwatan

mangabali man god kuno

sa kataposang adlaw karong

Marso.