nasayop ako sa pagpili
sa ania kanako
dili ako mangayo og pasaylo
dili ako mobiya
atubangon ko kining tanan
hangtod sa pagkamatay
sa iro
nga gasiging paghot sa ilalom
sa kahoy

wala na ang kapilian
gilubong na kini sa kalimot
wala na ang tiglaban
gitagoan na kini sa
kangitngit

mitago ako sa mga lawak
sa kahilom
giugom ko ang mutya
sa gahom
makita mo ako nga usa
lamang ka ulod
nga nagkamang sa lapok
tagoon ko ang akong mga mata
og sampongan ko ang akong ilong
ilubong ko ang akong
kaugalingon sa
humok nga bahin sa yuta
pamation ko ang imong mga katawa
antoson ko ang imong
pagbiaybiay
paaboton ko ang panahon
sa pagtak-op sa payong
sa pagpangahulog sa mga dahon
sa paghunas sa taob

walay dili ako nga moabot
og kon moabot na kini
papason na ang imong ngalan
sa balod sa kapalaran

ang nagpabilin nga kahiubos
mao ang
imong pagkahakog
sa bahandi
nagpunay ka og panaway
sa tawong wala yamo
kay kini siya mao kana
og kadto siya mao kini
apan sakit nga palandungon
nga ang tanan
anaa na kanimo
imong gihapnig sa salog
imong gihakop og
gihipos sa
aparador nimong wala
na gani kasudlan
hugaw na ang imong mga
kamot
sa baho sa bahandi
sa mga buling niini
apan nagpasulabi ka gihapon
sa imong pagkabandihanon

dili ko masulti ang akong kasuko
sumala sa maayong
pamatasan
apan sud sa akong kasingkasing
hangin ka na lamang
dili ka man gani matawag
nakong hungihong
patay ka na
hagbay ra sa akong
panumduman

ihatag ko ang unod
kanimo
ang mga bukog ang
akong angkonon
mas gusto mo ang
lamian
mas gipalabi ko
ang molungtad
apan pag-abot sa
unahan
patas tang tanan
kay abog
lang gihapon ang
atong
masakpan

kining balaka dili ni para imo
kay sa dihang gihimo pa kini siya
gidudahan na nimo
nga kini walay ayo
og sa dihang nahuman na
naplastar na ang mga tanghaga
gibiyaan mo
kining balaka
og busa kining balaka nag-inosara
apan kamaong molipay
sa iyang kaugalingon
gibasa sa uban
giangkon
apan ang balak mibalibas
mikagiw
milayat sa labat
midagan sa kalsada
misakay sa tartanilla
minaog
mitindog sa highway
misakay sa bus
milingkod ang balak
og giilaila sa usa ka pasahero
nagustuhan ang balak
og gikarinyo
nagkagustuhay ang balak
og ang pasahero
nag-uban
nag-ipon


nangitag privacy
nanirado sa kwarto
namalong og suga

og dinhi na lang kining
balaka kutob

ayaw na pangutana
biyaan sa nato sila kadyot
sa ilang paningkamot
nga makab-ot
ang kalipay sa balak.

abi nimo
lami baya ang pagbiya
labi na og mosakay ka na sa
bus paingon sa layong lugar
makita mo ang
mga kahoy nga paspas
kaayong milabay
morag sinesine
ang kalsada galikoliko
morag sawa
lingkod ka sud sa bus
nga samin ang bintana
makita mo ang mga bungtod
og mga kakugnan
ang mga panganod og mga
dagat
hapit sa mga lungsod
og palit sa mga sinuroy
nga mais, itlog,
mangga, nangka
shakoy
balik na pod lingkod
sa bus
inspeksyon sa tiket
layo pa ang imong adtoan
migabii, mikadlawon
nabuntagan
miabot ka sa lugar nga
wa nimo planoha
kay milayas ka
sa mga samokan og
mga hilabtanon
karon dinhi mag-inosara
ka sa usa ka lodging house
mamahaw sa carendiria
maligo magilis
dayon simba
human suroy ka usab
sa mga lugar nga wala pa
sukad nimo maabti

ikaw na lang usa karon
pagkamalipayon.

ang uban nga ania dinhi
nagsulat sa gitago
kadtong dili gayod ikapanulti
sa daghan kaayong
mga katarungan

apan lagi kay alimuot man ang
sud sa dughan
miabli kini aron mosud ang
hangin
aron mabugnawan ang galibog
nga alimpatakan

huot kaayo ang dughan
busa kinahanglang mopahungaw
kon unsaon
mao kini ang mahimo sa balak

sulayan og sulti
pahungaw
apan gihapon bisan diha sa pulong
gitago lang gihapon

gisulat og gihan-ay ang mga hunahuna
naningkamot nga dili
hisabtan

kabahin sa itom nga langgam
sa alibangbang nga usa ray pako
sa sapa nga naughan og tubig
sa isda nga bukog na lang
ang nagpabilin

pagkadaghan sa mga tanghaga
nga gibuhian sa mga tagkos sa kasingkasing
nga gipalupad sa mga kumagko

kabahin sa mga bato og mga balas
sa kahoy nga walay dahon
sa suba nga nawad-an og gana sa pag-awit
sa buktot nga gitagoan sa likod
sa bagtok nga kusog manukob og piso
sa agila nga mitugsoy sa kawanangan
sa hulmigas nga wa na kasaka sa lubi
sa panyo nga binordahan og ngalan
sa minahal

daghan pa
mga tanghaga nga nangapyot
sa langob nga morag
mga kwaknit
nga nagsud-ong og binali
sa subo nga
kalibotan

kabahin sa malipayon nga
sayawsaywa nga durong ukit sa binakid
nga humay sa kamalig
kabahin sa mga hubonhubon
nga gihikap sa kahidlaw
kabahin kining tanang kanako
apan nalibog ka
og nalipay ko nga ikaw hangtod karon
wala pa gayoy nasabtan kay
balikon ko
kining akong mga balak pahungaw
hinungaw og gani
sama sa taghoy sa bungi
aron pagpahibalo sa mga kawatan
hungaw-hungaw
hanggaw, hugaw, kagaw, nilugaw
aw-aw, kuyaw, dulaw, awaaw,
kutaw, siaw, tungaw, bugaw,
lingaw, kisaw, mabaw,
bung-aw, ulaw, bus-aw
kilaw, tiaw,

kros imbaw labaw.

ang kasakit
kamaong manuotsuot sa bukog
morag tanga nga
kabalo kon asa
paingon ang matag agianan
sa ugat

nidighay siya
halad ang kataposang ginhawa
pagkahuman mipahiyom
ang baba sa
tumang kalinaw

dinhi sa mabaw nga bahin
sa suba
magtampisaw ka
ingnan ko ikaw nga ang
mga bato dinhi og ang
mga balas nahisama lamang
sa mga balas og bato
sa karaang tampi
nga kini walay
ipasabot kanato

motoo ka
kay walay baba ang mga bato
og ang mga balas
walay mga mata

apan dili ka mohunong og
pangutana
wala mo ako lung-i pagtan-aw
pagpamati sa taod-taod nga
panahon

og busa gihanyagan ko ikaw
sa lalom nga bahin
dapit sa baba sa dagat
diin ang mga balod
kusog ang mga tingog daw
sa adunay gitago nga mga
kasuko

misalom ko
misunod ka
kamao ka man usab diay nga
molangoy
wala ka nako sultihi nga ang kalalom
sa dagat adunay
daghang sugilanon
nga ang mga sisi sa kilid sa
mga bato
bisan og walay mga dalunggan
nagpamati kanato
bisan gani og wala ako
mitingog
bisan gani og ikaw wala na
mangutana

wala ako misulay pagtubag
sa imong mga pangutana
kanhi
kabahin sa kamatayon
ang salog sa dagat bisan
og wala kini ni bisan unsang
bulok sa hunahuna
naghatag na kini nimo
sa tanang mga tubag

og busa nakat-on ka na
sa pagpakahilom
sama kanako
nahisama ka sa usa ka
bato nga wala gayoy
baba.

nauwat mo na usab kami
sa imong gipanulti
nadalahig ming duha
sa imong pagpakaaron-ingnon
nga ikaw nahiubos
nga ikaw gisalikway og
gidaogdaog
nakasumpay mi
og di mao
sama sa pagpanaway sa
imong kaatbang
sama sa pagpasalig nga
tabangan ka namo
sa usa ka panimalos

nalit-ag mi nimo
nasulod mi sa imong bulsa
misakay mi sa imong sakayan
nga buslot og
imo kaming gihulog sa lawod
gituklod og kalit
og wala kami makabantay

pagkabuang gyod namo nga mitoo kanimo
(sayod kami nga duro nimong agik-ik
og katawa karon nga ikaw na lang usa
sa imong gitagoan)

apan ok lang gihapon
kabalo pa ming duha nga molangoy
balik sa tampi
sa usa ka bag-ong pagtoo
kamao pa kaming mobangon
gikan sa dagkong balod

ayaw kabalaka
bisan pa sa tanan
wala kanamo ang pagpanimalos
bisan gani ang pagsukmat
kay amo ka gihapon nga
gitahod.

nindot pamation ang kusog
nga pagbulusok sa ulan
ning bulan sa Hulyo
hagtok ang pagkahulog
sa mga lusok sa tubig
nga gikan sa langit
sa ibabaw sa atop nga
sin nga gitay-an na sa
dugay nga panahon

nindot mamati sa kagahapon
lanog gihapon ang tingog
mas tibuok ang mga pulong
apan dili sab maayo nga dugayon
basin og mabuak ang samin-samin
sa akong dunggan

sama sa ulan kadyot lang ang pagtulo
sa atop
saloron sa palanggana nga lapad
dayon og mapuno na kini
ilabay lang pod dayon didto
sa daghang mga tanom nga
dama de noche sa likod sa
pantawan

pagkahabog mo
inahan nga bitoon
dili ka maabot sa imong
anak nga babaye
nga nag-antos sa
latos sa hangin
og tuslok sa kahoy

pagkahabog mo
wala ka man gani milingi
sa dihang midugo ang
kahayag sa anak mong
bitoon nga babaye

nakigsandurot ka sa bulan
og halapad kaayo nga
kawanangan
pagkamalipayon mo
inahan nga bitoon
nga nakig-unot sa
mga planet og
adlaw

ang imong anak
wala na makaila kanimo
mikuyog kini sa
kusog nga sulog sa tubig
og miipon na kini
sa kinalawman
nga dagat

pagkamalipayon na
sa duha ka bitoon nga
nagpuyo sa dagat
bisan og wala na kini
migilak

nadungog ko na
nga ang Bakunawa
maoy motulon sa Bulan
kada
Eklipse,

Kinsa ba'y nakakita
sa nawong sa Bakunawa?
Unsa kadak-a
ang iyang baba?
Aduna ba kini
baba og mga ngipon?
Unsa kaha kataas
ang iyang dila
og kalalom
sa iyang tilaok
o kadako sa iyang tiyan
nga ang bulan
iya mang matulon?


Ang kapit-os
mabati dili kini
ikapanghimakak
sa gutom og uhaw

Ang kahaw-ang
sa kinabuhi ang pagkawalaykahulugan
nagpabilin
bisan sa baga na kaayong nobenahan
nga imong mabasa
bisan og pila na ka lingin og
linya ang imong
gisulat diha sa mga
panid sa imong
bibliya og mga
almanaki

Usahay sulayan ang mga lihi
og mga panaad
gidili ang pagpanilhig kon
anaa pa ang haya
sayaw sa atubangan sa
San Vicente matag
pista aron
matuman ang mga pangandoy
aron ihatag ang mga
gipangayo
aron mapapas ang mga
kahigwaos og mga
kahaw-ang nga
gihatag sa mga kamot
sa kinabuhi ning
atong panaw nga
walay petsa kon
kanus-a moabot
sa adtoan

taas na kaayo ang giabot
sa mga tudlo diha
sa rosaryohan sa
matag kaadlawon
apil pa gani ang hapon
daghan ng dugo sa manok
ang nahidhid sa mga agtang
sa bata
apan mao lang gihapon ang
kinabuhi
dili gayod matukib
dili masabtan
ang mga baba nagpunaw lang gihapon
og yawyaw
naghingilin kuno sa mga yawa
og mga demonyo
apan ang mga tiil
misayaw sa kuskos sa gitara
sa sala.

anaa na usab ang kahaw-ang
nga mipuli sa kahakog
nagtagad sa kilid sa pultahan
gipaulit ka
og durong buhakhak og
katawa

nagpaisog-isog ka
nagkuryom kuryom og nilatin
apan sa kataposan
naglakaw nga nagluhod
nangamuyo gihapon
sa iyang kalooy
nga unta dili iapil
sa paglaglag.

tinuyoan kuno ang tanan
kinsay nag-ingon niana?
ang wala kasabot sa sinugdan
maoy mag-ingon niana
kinsa bay ganahan nga kabos
og unya naa rag pakilimos?
kinsa bay ganahan anang
maot nga dagway? nianang
pagkabogo og pagka-ubos?
gidawat lang kining tanan
kay wala nay kapilian
palad sa kabos
palad sa unggoy
ang mga bitoon sa langit
og mga planeta
mao ang naghimo sa mga
balaod
mao ang naghimo kanimo
nga ikaw

kay kinsa bay nagbuot nga
ikaw matawo dinhang lugara?
kay ngano nananghid ba sila
nga ikaw dalhon dinhi?

kon ugaling man,
ako mismo ang mibalibad.

langiob

bug-at kaayo ang mga tiil
og ang nawong
nagbitay sa katambok
naupaw na
nangahulog wala damha
ang mga buhok
didto sa salog
ipon sa mga abog

kasakit og kabalaka lang
ang gihatag sa samin
didto sa bungbong

ang kahadlok mismo
naigking sa tumang
kahadlok sa iyang
nakita

layo ra kini kaniadto
karon
pagkalisod na gayod
dawaton

ang langiob midagan
sa kusina
nagsukad sa luto nga
usa ka bandihado
nagkuha sa usa ka yahong
nga humba
dayog ipis sa bugnaw kaayong
coke sa dako kaayong
baso
misubad sa humot og init
nga luto
milamoy sa danlog og humok
kaayong humba
misuyop sa coke
ug pagkahuman sa lad-ok
nanghuyab og
dayog higda sa katreng kawayan
sa balkon
og nabati ang kusog kaayong
hagok

dugay kong sunod nimo
Kalipay
apan pagkawala moy puangod
ang imong gidalit
hinoon kanako mao ang
pagkadaghan sa
Kasakit og
Kasubo

idlas ka pa sa
kasili
mas mas halas ka
pa og batasan
kapila mo na
ako gipaak?

karon dili na ako
mogukod kanimo
magpaabot na lamang
ako kon kanus-a
ka mobalik kanako

sukdon ko usab kon
ikaw ugaling nahigugma
ba usab kanako

human mabuntog ang
madaugdaugon
mopuli na usab ang
bag-ong magdaugdaog
kanatong katawhan

apan bisan pa ana
dili ko gihapon ikaulaw
ang akong pagkaako

Human nimo og
Ungad sa tambok
Mabilin ang mantika
Bantay ka lang
Antoson mo unya

tsismis

nahungihong
nga ang nasunugan
kaniadto nakaligis
og bata sa usa ka
kaabag nga nag-ampo
sa hustisya nga
wala niya makab-ot
og busa
bata usab ang
gikaon sa kalayo

ang puti nga yahong
nga nag-atubang sa langit
nga gibiyaan didto
sa nataran
nga giimnan og tubig
sa usa ka tamsi
usa ka nindot kaayo
kana nga balak
bahin sa paghalad

dili man
hilas
ayaw lang
papaa

si cheesy
og si meaty
nagtagbo
sa plato
naghimo og
spaghetti

ang mga pahumot
sa kahinam
nangalimyon

wala na maambat
ang nanglood
nga kahaponon

Misalop na ( tubag sa balak ni lubi)

nanambo ang panas

nga bulan

sa talisalop nga adlaw,

ang kangitngit

mihinay-hinay ug pamidpid

sa baybayon

kansang mga balod

gihilam sa bulawanong

mga tudlo sa

dan-ag sa kahapunon

diin ako nag-utaw-utaw

uban sa pinakling

mga panid sa lawod

sa kagahapon

ikaw og ako

bato ako
nga imong itugpo
sa balayan
sa lapinig

bungkag
lapinig!

panghitabo

sakay ko sa kabayo
kilid sa lasang
nag-una ang akong amahan
init ang adlaw
og layo pa ang among panaw

mipahulay ko sa silong
sa punoan sa kahoy nga dum-on
sa ibabaw nagpista
ang langgam nga manatad
sa katam-is sa hinog nga mga bunga

sa unahan pagkadanghan sa mga bungtod
pagkalabong sa kakugnan

sa akong kilid mao ang lasang nga
gipuy-an sa mga unggoy nga nagbitaybitay sa bagon
siging syagit og "kiha! kiha! kiha!"
nagbitbit sa usa ka sipi nga hinog nga saging

nindot dinhi
ang kaadlawon gitugaw
sa awit sa mga
kalanggaman

ang kabuntagon
gihapuhap sa bugnaw pa kaayo
nga hangin

ang mga adlaw dinhi wala magdali
ang dalan luag
dili pa gihapon mapiit ang kabaw

ang mga isda dinhi
kanunayng gamingaw sa lapyahan
sa baybayon

ang mga alimango dili anad
sa pagpamaak
ang kanding dili manungag
ang mga totoy sa baka
puno sa gatas

ang mga bungtod berde ang kapa
ang mga kahoy walay mga alot
ang mga sapa samin sa mga panganod
ang mga halas idlas

kabug-aton

magsul-ob ka sa imong
medyas pinaagi sa pagbira
og pag-alsa sa imong tiil
samtang ipahaluna mo
ang imong sampot
sa lingkoranan nga tugas
kanang dili gayod
matay-og

namunga og daghan ang
punoan sa mangga nga akong
gitanom sa akong
pagkaulitawo

ambot og unsa ang imong
gihunahuna
nga ikaw man ang miingon
nga mao kini ang mangga
nga tinanom ni Papa

ang panahon kamaong
mokwenta sa mga sinsilyo sa
adlaw

giihap kini niya og sayod ka
nga adunay daghang kulang

pagsabod

gipanglabay
na ang mga uhay
sa lapokon nga dalan

wala damha
nanubo ang mga sagbot
kay ang mga uhay
pagkahinay

talan-awon

pagkakalma sa
panahon

nanambo ko
sa bintana

puti ang langit
hinay ang hangin

asul ang dagat
morag seda nga panapton

sa unahan
adunay tulo ka mananagat
sakay sa sakayan

nagturong og
pula nga panapton
samtang nagbira
sa pukot

sa daplin sa baybayon
nakigdula ang bata nga lalaki

nakig-unot sa iyang iro nga pution
nga putol og ikog ug tangkag og dunggan

pagkahapsay sa mga balas sa baybayon!
pagkaanindot pagkalami sa kinabuhi!

baroto
nasanglad
guba ang katig
bali ang timon
buslot ang kilid
giayo.

haiku

tingog sa uwak ~
bulok sa kagabhi-on
puno kaniya

haiku

bildo'ng bentana ~
gibadlis ko ang dag-om
sa iyang yamog

hukom

kon mobalik ako
sa imong dughan
diin atua ang hinog
pula og sinaw kaayong
mansanas
pugngi ako ayaw
sa akong buhaton
inkiton ko
ang kilid
kan-on ko ang tanan
ang panit ang liso
og ang punga

pangutan-a ako ayaw
kon anaa pa ba ang
anino sa gugma
dinhi sa panahon sa
tumang kangitngit

haiku

hilom ang hangin ~
kalinaw nabati ko
nga mihagawhaw

gilanganlangan ako sa
balak
sa akong panaw sa
pagtagik sa balaod

nahisalaag ako
kadyot sa iyang mga
tanghaga

gikahinabi ko ang
usa ka panahon
gihagkan ko ang
ngabil sa kalipay

walay nausik
diha sa ilang ginganlag
walay pulos

dili kahasol ang pagtagik
sa pulong
dili kalangan ang pagkulit
sa lawas
alampat

gihuman ko kini
og busa andam na akong
mosakay
sa mga pako sa akong
kalag