kalipay

nagtindog ang taas nga tawo
nga nagbitbit og daro
sa kilid sa labat nga kawayan
sa ilang payag
tupad sa iyang puti nga iro

sa silong sa hanong nga kahoy
sa caimito
milabay ang bugnaw kaayo
nga hangin

magtiayon

ang usa gustong mahimong
pak-an
gustong molupad bisan asa

ang usa hagbay rang nahimong
bato
uga, bulad sa adlaw,
bisan sa kadugay sa panahon
wala maliki

haklop

ang pagdap-ig sa imong
paa sa akong
paa
morag haklop sa
handilob-on
sa akong hubag
nga gangotngot
dapit
sa akong sampot

bulanon

pagkadako gayod sa bulan
karong gabhiona

sa iyang tiilan anaa
ang payag
kilid sa kahoy nga
akasya

walay suga
apan adunay wala mangatulog didto

ang mga dahon
nangahulog
kuyog sa tayhop sa
hangin

padung na ang kagabhion
hinay nga mitabon
sa mga suga nga
nangapalong

ang mga dahon
walay mga pulong
ang kagabhion
walay kasamok

mga hagok og mga kanaas
ang mga damgo

kamatayon

sa pag-abot sa panahon
nga dili na mangita og antipara
ang akong mga mata,

kanang wala na ang mga balak
nga mitubos kanako

mokuyog ako kanimo
bisan pag
wala ka na'y gusto pa
kanako

PAGKAHANAW

hapon na kadto
ang bato tupad
sa iyang anino

ang anino gilamoy
sa kangitngit
apil ang bato nga

nagpakahilom lamang
sa dihang
gilubong nila ang
adlaw

Uyab Sa Higala

Sa Pughawng Langit, samtang gasayaw ta
Ug bisan duha ka dangaw ang atong gilay-on,

"Naa ba kay nabatyagan diha sa atong taliwala?"

"Oo", tubag nimo.

Mipadayon ta sa pakigduyog sa labyog sa tugtog
Mitagamtam sa init sa gimok niining panagkuyog

"Hinaot makakita ko og sama nimo ka gwapa
Sa Habagatang Panganod nga akong puy-an"

"Daghan lagi gwapa didto, makakita ra ka".

Taod-taod, nanghagad ka nga mopauli na,
(didto sa imong kaugalingong puloy-anan).
Ang imong kaanyag milingi, nanangpit diha
Sa pultahan nga abli na, gapaabot kanako.

Wala ko mikuyog nimo,
Uyab ka sa akong higala.

Akoy
2010.3.5

pagtoo

kon mitoo ka
kanako
palihog ayaw ko
dalhi og
lamparilya
aron lang unta nimo
makita ang
kasinaw sa akong
ilong

dili ba gihikap
mo naman kini
sa dihang
gigasahan ko ikaw
sa usa ka
halok?

ayaw palihog
pagdala og posporo
og kandila

kay kon imo kining
buhaton
mamatay ang
akong gugma

ang pagawas

gusto nako nga ang pagawas
sama sa usa ka
pultahan nga hinayhinay
nga nagpasulod og kahayag
padulong sa katre
nga kawayan,

dili dayon katunga,
kon mahimo
gamay lang kaayo nga
lat-ang
sama sa pagtangtang
nimo sa imong
sanina.

ting-ani

gisunog nila ang tanan nga uhot nga nabilin paghuman nilang giok,
palid, sukod, salod, og hipos sa sako sa tanang mga gihay sa humay.

ang aso, nga naghuot sa akong dughan, ang kalayo nga nagdilaab
sa daplin sa mga basakan, ang mga anino sa mga nagdaob niining kagabhion,

nagsulti kanako nga karon ting-ani na usab, daghan na usab ang magsamparay
sa kahubog, magsyagit sa kalipay sa tagay sa tuba og tanduay, mag-ilog sa sumsuman,

daghan na usab ang paa nga matandayan, baba nga magbula, buhok nga makalkag,
mga hunghong sa mga pasalig, daghan na usab ang maburos sa mga saad,

og ako nga naglikay niining tanan, gisapat, mipasibat sa akong sakyanan, pakusog
sa dalan nga napuno sa aso, pagawas, nagdali, magpahilayo aron makaginhawa

sa presko nga hangin didto sa unahan, kilid sa utlanan
sa pangandoy og katumanan.

pagputol nimo sa ikog sa tiki

sa dihang giputol na nimo ang ikog sa
tiki nga dugay na kaayong nagsuroysuroy diha sa imong kisame
sa dihang nagpatubo kini siya sa iyang bag-ong ikog

wala ka ba kamatikod nga ang iyang bag-ong ikog
dunay mga mata nga nagtan-aw kanimo og naghandom
kon imo ba nga gihandom ang
kanhiay niyang ikog nga imong giputol
nga wala nimo usiki bisan usa na lamang ka pulong
nianang pagbasol?

wala ka ba ingna niya nga bisan og dugay na nga nawala ang daan nga ikog
ang bag-ong ikog
naghisgot gihapon sa sugilanon nga dili malimtan
sa tumoy sa dila sa bag-ong ikog?

aron ka makasabot niini, putla pag-usab ang ikog sa tiki nga dugay rang nagsuroy-suroy
diha sa nagusbat mong kisame

paghatag og kahulugan

sa imong pag-ingon nga
"dili ka ganahan moinom og Coke?"
sayod ko sa kahulugan niana
ikaw ang dili ganahan
manghatag ang tinood nga dili ganahan
magpainom,

sa imong pagdapit nga
"basin gahanan ka nga mokuyog niya?'
sayod ko nga ikaw ang ganahan
nga magpabilin, og ako morag imong gisugo
nga unta magpahilayo lang una
kay gusto kang mag-inusara

sahay mao sab kana ang akong gibuhat,
kanang tawong moingon nga
dili ka nako distorbohon
nagkahulugan kana, sa tinood lang,
nga dili usab magpadistorbo.

dili ba ingon man usab niana ang balak?
nagsulti kunuhay, apan wala diay.

sulayan

sulayan ug wad-on.
kulangi ang kawad-on.
dugangi ang nanghinobra.
lantawa,unsa unya ang
mahitabo niining
panghitabo, puros lang mga pulong, pulong sa pulong,
gipamulong, wala ang
kakatol kalami sa tungaw,
ang kalot sa hait nga kuko
diha sa kumagko nga
gilamlam,
nasulayan mo na ba ang pagwala
sa imong naandan?
sama anang kaon pagkahuman sa
tungang gabii?
sama anang pagdamgo nga ikaw kaihion
sa sayong kaadlawon?
nasulayan mo na ba ang wa nimo pagpugong?
lami handumon,
sakit usbon,
apan lami lang gayod nga siging handomon
hangtod nga kini usbon,
wala na ang sakit,
mipuli ang kagilok, ang kalami, ang pagkahupong,
maghimo og pahiyom
nga walay ngalan.

ang gihatag nga kaalam

kagabii gipangayo ko na lang
gayod ang kaalam

wa na ko kaantos
di na nako maantos ang mga
hunghong sa ngiwngiw
sa akong dunggan
ang agik-ik sa
kikik sa kilid sa
among bintana
ang hagok sa iwon
didtos sud sa
taro nga puno
og pasaw
ang kibkib nga tingog
sa tabili
sa ang-ang sa lubi
ang hishis sa halas
sa ilalom sa balay
nga gisalogan og
kawayan

karong buntag mimata
ko nanamin
og kita nako ang
akong mga mata
nga milalom
ang akong liog
nga daghan labhag
sa imong buhok
ang akong likod
nga daghang kawras
sa imong mga kuko

dunay laway ang akong
pus-on
nauga

gipangayo ko na ang kaalam
og biyaan ko na kining tanan
ayaw og iyak

karong buntag maglakaw
kong mag-inusara
padulong sa baga
kaayo nga kakahoyan
magpasilong ko
sa kabugnaw
sa akong utok

gakson nakog hugot
ang mga bukton
sa kalinaw

Mga Mata

Mitutok siya
(Mikidhat ko niya)
Mipahiyom, dayon
Milingiw ang mga mata.

Akoy
2010.2.13

Hiyas

Ang kahumot,
Hiyas niya.

Akoy
2010.2.13

Sud-an

Pipila ka balak
Na-'save as draft'
Wa kita'g kagawsan
Kay ang magbabalak
Naikog sa paggaray sa
Imong ngabil nga daw sud-an
Daw isdang gipabukalan, gilamasan,
Gipalamian og mga utan nga parat-parat
Ug aslom-aslom. 'Unya unsa man?' (Imong
Pahiyom.) 'Lami lagi kaayo. (Milami og samot
Tungod sa imong ngabil nga daw isdang pulaho'g
Hasang, gipabukalan, gilamasan, gipalamian, sama
Ning ginasud-an karon ug ginasud-ong sa atubangan.)

Akoy
2010.2.28

ang pangutana

ang usa ka gamay nga langaw
mitugdong sa usa ka undok sa tae sa kabaw

milupad pagkahuman

nag-suroy suroy kini sa hangin
nagliboglibot sa wanang

hangtod nga sa kakapoy
mitugdong kini sa imong ilong
og aping

imong gidagpi apan
abtik kadto nga langaw nga
daling milupad
og nawala

...

pahalokon mo pa kaha ako sa imong
ilong og aping?

naglawig ang barkong gubaon

naglawig ang barkong gubaon
didto tang duha sa sulod
sa cabin
nga baratohon

naghisgot tag mga kabahin
sa panghitabo nga dili nila
angay nga maduggan

ikaw ang daghang ikaestorya
bahin niini
og ako nagpamati lamang

naglantaw ko sa lingin nga
bintana
lapos sa linya sa kagabhion
wala ang bulan
og mga bitoon dinhing dapita

nagpamati ko
wala nagpitokpitok ang akong mga mata
sahi sa akong naandan

miiyak ka
migakos ko

mipiyong ka og ang akong mga hunahuna
milawig kuyog niining barkong gubaon
nga ugma pa moabot
sa atong kapaingnan

dako ang gabii, lapad
tugnaw, gusto unta nakong gakson
apan duna'y mga pulong
nga dili ko na matulon

dako ang gabii, bugnaw
ang akong mga braso
gibikogan

daghan ako'g mga butang nga akong
gitago
dili ko kini ikasulti sa uban
bisan kanimo

gihigugma ko ikaw
apan dili ko ikasaad ang kahangtoran

nakatulog

sa pagpangita sa mga pulong
nga angay nga ibutang sa iyang balak
nahikatulog si pepe

wala nako kini sugod mahimo
wala ako sugod
patuluga sa pulong

wala ako nakahimo og balak
nga katulgon

hait nga kutsilyo kini nga
miad-ad sa sibuyas

nga nakapahilak kanako
og sa nagbasa

ang kaanyag kuno

ang kaanyag kuno nga matood
anaa sa sulod sa kasingkasing

ikaw nga maoton og dagway
ang mitoo niana

og sila nga mga maoton og kasingkasing
anaa
nagpakaanyag lang gihapon sa ilang mga lawas
og baga
nga nawong

walay kisaw

i
gitunton sa bata ang pasol
sa sapa
nga walay kisaw


ii

walay isda ang
sapa nga malinawon
ayaw ka na og
kalimti

iii

mibiya ang bata
isda lang gihapon ang
iyang gipangita

wa mahigugma

gihagkan ko niya
mibawos sad ko
gihalog ko niya
mihalog sab ko
sa kagilok
mi-fly-away ang
akong buhok
gisuyop niya akong
laway
misuyop sab ko
dayon namog
tunlanay
nagawsan ko
dungan mi
na-flat-tire ming duha
didto sa kama

wa ko kahimo og balak
para niya

bungi

dili ganahan nga taghoyan
kay siya mismo dili kataghoy

kon mokatawa
tabonan ang iyang baba

mahilig sa
"s"

dili ka "pssst"
pormal, dili garagaraon

hilomon,
hinhin, puti kaayo og ngipon
pula sag wait
kiat og kandiis
abtik og mata
taas og ilong
daling kasimhot
dili palautot
di sab dali malimot
di kamaong
mokuot sa lubot
og dayon og
simhot


sapyot
dili labyog ang lubot.

(giawat kang nong inting nga walay pananghid)

ang akong uyoan

nanghambog sa iyang
pagkaningpon sa iyang
kabatan-on

ang iyang uyab kuno nga
si Rina
iyang gipalingkod sa ilang
sala
gipahubo, gipabilangkad
og gihalokan
ang iyang tunga

og uban pa....

(namati ra ko wa ko mikomentaryo)

ingon ana kuno ang
tinood nga
pagkahinangpon

ang among silingan nga maldita

kining sabat sabat sa patay,
nakit-an na noon nako ang among maldita nga silingan,
kulungon og buhok, taas, nga sahay matabonan ang usa niya ka mata

namaypay, misiplat nako, mikihat sab ko,
gisirad-an ang paypay, mipahiyom, og dayon mimug-ot
gibalhin nako ang akong lantaw
sa unahan,
namaypay og paspas nga morag gigil-asan
sa kagabhion,
samtang nagsugod na og novena,
misimag ang iyang mata,
morag suko, gisirad-an ang paypay, mipahiyom,
migawas sa balay

wa ko matawo gahapon,
mipasumangil kong kaihion
kabalo kog
unsay sunod buhaton.

ang akong hunahuna

ang akong hunahuna gusto untang mosulay
og hikap sa imong paa

nga nagbilangkad atubangan nako
ambot og imo ba usang gituyo

apan nagduda sab kos imong plano
basin og

imong gub-on ang balay kong dako nga dugay
nakong gitukod sa akong
kinabuhi

gusto nakong matilawan ang wala pa nako matilawi
sukadsukad sa akong kinabuhi diha sa imong
paa

dapit pa gani sa ubos
didtos tungatunga sa langitnong himaya

hapit ko malipong sa akong mga pangandoy
apan ako na lang gipiyong ang akong mga mata og akong

gihunahuna ang akong mga karaang utang
akong gipalalom

sa korona nga tunok ni kristo diha sa iyang ulo
nga samdan

og uban pang mga butang nga makalilisang
nga nakalaglag sa mga
kalag didto sa
hwerto

nawa ang gana
mibalik ko sa realidad nga ikaw dili angay kanako

akong gikumkom ang akong mga kamot
akong gisulod sa bulsa
akong giwakli ang gahi nga gabara diha sa akong
karsones

akong gikusi, dayon gipahaluna, og dayon ako kang
giingnan og

"sa pay ato? kinsa diay imong ngalan?
asa ka paingon? kinsay imong tuyo?
taga-dis-a diay ka?
naa kay manghod nga babaye?
kinsay imong tatay?
unsay trabaho sa imong nanay?

gusto ka og trabaho?"

hay, hay, hay,
usahay, lagi, buta usab akong matood.

ang akong mga master og mga idolo sa pagbinalakay

makahiubos baya hunahunaon nga kining akong
mga master og idolo sa pagbinalakay
yano lang kaayog mga pulong

bilib ko kay sa usa ka panghayhay
naplastar ang balak

(nga dugay ko na untang isulat)

og sa usa ka ginhawa
mitubo ang usa ka nindot kaayong
gihay sa silaba

(wa kini nako mabuhat sukad)

kanang mora kog
Ginoo.

morning walk

diha sa morning walk
ingna ko nga dili ko ganahan og tawo
nga taas ang akong simod
akusahe ko nga recto
wa koy labot ana

paspas ang akong lakaw
daghan kog mga kuyog nga bug-at
kining mga hunahuna
nga lab-as
nanang-at sa abaga
sa akong
utok.

bisan pa sa kahumot ni pretty

bisan pa sa kahumot ni pretty
wa jud nako gidulog
kutob ra kos halok, gakos, og hikaphikap

kay hangtod karon
hadlok gihapon kog pulgas.

kon unsa ka

kon unsa ka, wala ka nay mahimo niana,
kon ang imong ilong morag palwa
hinoon, pwedeng mausob
niaanang retoke
o injection sa botox,
dunay mga butang nga dili na mausob
kay dili angayan nga usbon
sama nianang
baga nga kilay sa nawong sa usa ka lalaki

dunay mga pagbati nga anaa na sud sa dughan
wala nimo kana gihimo
o giagda nga mosulod dinha
naa na kana
dili na kana mausob
apan pwede kang mopili kon unsay imong buhaton niini

mahimong dili kini nimo pamation
bisan sakit

sama sa akong gugma kanimo
dugay ko rang
gipul-ongan, dugay ko rang gilukat
ang mga gamot
gipauga og gidauban

gihipos nako sa makadyot ang mga abo
apan sa kadugayan
akong gipapalid sa hangin

walay nada kadtong gugmaha
gusto ko niyang patyon.

hisgot sa nangagi

si burnay nga nakaapil sa Miss Philippines
sa 1978 nga anak sa insik nga nagcarenderia
sa among balay
patay na diay, na stroke,

ang iyang igsoon nga si dante, nga engineer
pagkahuman sa usa ka tuig
misunod,

malas daw, ingon sa iyang papa nga si Paquito
hilaw nga insik nga gikan pa sa Amoy, China
nanimpalad sa Pilipinas
nga maayong moluto og siopao
og pancit miki

si Benda nga gitaban sa ilang katabang
nagbasol nganong wala mopatoo sa iyang amahan
nagdaot sa kunsomisyon
sa banang kusog managmal
kaniya,

si engkay, milyonarya na sa manila
nakabana og insik nga tigulang
nga tigpayuhot og mga
smuggle sa hongkong


si nang Diosa (Gaudiosa ang tinood niyang ngalan)
maayo lang gihapong molaba
og mga karsones nga maong

si Malou, nga Miss High School, napaangkan
ni Congressman
miagig hikog sa kaulaw, naghilo, apan maayo na lang
gani kay natabang ra
karon atua na sa Washington, nakabana
og amerkano

si Jocelyn na lang ang nabilin sa ilang karenderya
kay si Paquito
namatay sa sakit nga TB
nagkalibang og dugo

ang di nako malimtan niadtong naa pa ko
sa elementarya
nga si Paquito naninghag kanako sa dihang
mihangyo ko nga
mangutang og pansit nga usa ka
orderan para unta
pamahaw

sayo pa kuno kaayo sa buntag
og malas
kon masugdan og utang

tuod man, dimalas jud ang gidangatan

nabungol ang Ginoo

ang iyang gipangadye sa matag gabii
disir siya matulog mao nga unta
kuhaon na siya
sa Ginoo, kay sa iyang lantaw sa iyang
kaugalingon
wala na siya'y pulos
mora siyag kutsara sa kusina
sa mga tawong
ganahan magkinamot

apan nabungol na ang ginoo
naglagot siya ngano nga pagkaugma
nakamata siya
nga buhi pa, nga lig-on pa gihapon ang
iyang lawas
naglibog siya ngano nga
makahinumdom pa gihapon siya
sa tanang panghitabo

nganong ang Ginoo, kon gusto ka nang mamatay
saad saaran ka man hinoog
kalipay

naglingkod siya sa daplin sa ilang hagdanan
atubangan sa karsada
daghang milabay
wala na niya mailhi apan silang tanan
nakaila kaniya

"lahi kining tawhana, gustong mamatay
apan nganong dili na man lang kini
siya maghikog?"

nganong pakasad-on pa man niya ang
Ginoo
natong tanan?

si tenido

limpyo ang iyang alingagngag
walay misupak
sinaw kaayo ang iyang mga ngipon
walay daot
kay kuno sa gagmay pa sila
wala'y usa ka dako ang
iyang inahan
aron ipalit og dulce

nagpa-prophylaxis
ang retired nga maestro
og high school sa australia
nga gibiyaan og asawa

ang iya kunong dila
daghang gamit
dili lang pagtilaw sa
sinugbang baboy

wala siya magool
sa dihang iyang gihatod ang iyang
asawang australiana
sa airport

nanghambog pa
nga siya at last
gawasnon na!

pagpangita sa Ginoo

nasuko na ang akong mga katigwangan
nangyam-id ang mga kaparian
mikatawa ang gamay nga bata
nabalaka ang akong mga igsoon
kon ngano nga sa akong pangidaron karon
nga kwarentay nuwebe
wala pa gihapon nako mahikaplagi ang
Ginoo.

nagsulti lang ako sa tinood
gipangita ko pa ang akong dalan paingon kaniya
wala ako motoo sa dalan nga gihimo na nilang daan

anaa diha ang pagpakasayon
pagkalapad, pagkataas, pagkalimpyo, pagkahapsay

nagduda ko
kay miingon ang ginoo
nga daghan ang molakaw paingon didto
nga mahasulod sa pultahan sa impyerno.

daghang nangutana

daghang naintriga nganong nagsulat ako
og mga balak,
nakaingon ang uban nga basin og
lahi ang katarungan,
dili kaha nga lalom kaayo ang akong
mga gibating kahinawaing
og walay kasumbungan
mao nga sa mga balak na lang gipahungaw?
nganong wala kaayo ako maghisgot anang
kabahin sa gugma,
kalipay og kamaya? naglibog ang akong mga
higala,
misamot ka intigero ang akong mga kontra
nga nangitag lugar diin ako
atakihon pohon, daoton og pildihon niining
nataran sa gubat,
sa buno sa kadungganan,

ngano bang mibalak ko?
ah, daghang rason, apan basaha lang
dili nako isulti
naa ra sa mga balak ang mga hinungdan
mao kana, naa diha ang misteryo,
naa diha ang tubag,

morag hubag, nga mahibaw-an na lang nimong
naa
sa dihang kini mibuto na.

oo, naputol na ang kahoy

kabahin sa sugilanon sa kahoy
og sa bata
kadtong imong nakita sa
video
o dili ba kaha kadtong imong
nadungog
nga gibasa ni shel,

oo,naputol na ang kahoy
siya ang gaputol

dili ako kadtong bata
labi na nga dili ako kadtong tigulang
nga gusto na nga
mopahulay

ako kadtong kahoy
nga iyang giputol
ang kahoy nga iyang gilingkoran
ako kadtong
mihatag

dili ako kadtong nagsigig pangayo
nga walay puangod

pagpangita sa kulang

hangtod karon
wala pa makita ang kulang

kabalo ko
kon unsay kulang

nangita ko ani
kanang sibo sa akong

kakulangon
kanang makakompleto unta kanako

kabalo ko kon unsa
asa og kanus-a

kabalo sab ko
nga dili mahimo

dili angayan
dili ako.

kagabii

wala ka man seguro nasayod
nga sa dihang imong
gisulod ang lawak sa
akong kasingkasing
wala na ang gugma didto
apan aron lang
dili matay-og ang atong gisabutan
sa atubangan
sa altar sa Kinabuhi
og sa daghang mga santos
gipaningkamotan nako
nga matago ang
kamatooran,

sa dihang misulod ka na
giablihan ko ang bintana
giwakli ko ang itom nga kurtina
gipasulod nako ang duha ka
tamsi
ang duha ka salampati
gipasulod nako ang hangin
aron lang dili nimo
mabati ang kahaw-ang
miawit ang mga langgam

og tuod man
nalipay ka diha sa akong
paghawid sa imong mga bukton
diha sa pagyukbo nako
sa imong dughan

gipaak nako ang akong
mga wait
nga wala mahadlok
kuyog sa dila
nga unta mosulti na sila
sa matood

ang akong katalawan
mao ang magpalig-on kanimo

ang politiko

hangin lang siyang lumalabay
ang politiko
kaniadto naka-amerikana
daghang mga alalay
gamhanan

karon milabay na siya
mas baho pa sa utot
mas maambat pa ang tae
nahuman na

kita ania lang gihapon
andam nga mopakpak sa mopuli kaniya
nangpanghadlok

sa akong kabahin
duladula na lang ang tanan
ning nasud ng nawad-an na'g
paglaom
nawad-an na'g pagsalig
sa mga pulong sa politiko
ning politika
nga maayong modala nianang
dula sa
pagpakaaron-ingnon

ako og ang akong mga hunahuna

gisulayan ko og kahibalag ang akong
mga hunahuna
naatikan nako nga sila lahi usab kanako
kay gani
bisan og unsay ilang mga tambag
usahay dili baya nako
tumanon

nagtuman ko sa akong gibuhat
wala didto ang mga hunahuna og busa
ako nabalintong
napiang

gisulayan nako og pangamigo ang akong hunahuna
nahiubos kini
midalagan og wala na nako hiapsi

kon imo akong basahon niining mga pulong nga akong gisulat
sabta nga kini dili na gikan kanila
gikan na lamang kini sa akong mga pagbati

ah, lahi usab kini sila sa mga hunahuna
sapoton, taas og garbo, apan
mosandurot, molaban, bisan dili molungtad
kay lagi mag-usab-usab kini sila
apan
kuyog kini sila kanako
sa kalipay, sa kasakit, sa pagbangutan
sa pag-iyak
sa pagdumot, sa pagpanimalos,
sa gugma.

kanus-a ba ako nagsugod og sulat?

ah, kadtong akong naamgo
nga bisan og mosulti ko sa tinood
wa gyod gihapo'y motoo
kadtong akong nadesisyonan
nga magsugod na lang
ako sa bakak
aron ako mahimong mahalon niya

ah, kadtong wala na ako misalig sa
akong mga pulong
sa dihang ang akong dila morag
naputol kay bisan og unsaon nakog
singgit wala nay mogawas nga
tingog

ah, kadtong wala na akoy kasuginlan
sa akong gibati
tungod kay silang tanan nagtoo nga
ako
nagkomedya lamang

ah, kadtong wala na ako'y kapaingnan
kay ang tanan pultahan paingon sa kasingkasing
nasirad-an na
og ang mga bintana sa ilang mga pagsabot
natrangkahan na

ah, kadtong adunay mibasa kanako
og nangutana kon kinsa ang akong ngalan

ah, kadtong wala na ako makasabot kon unsay akong buhaton,
didto, nagsugod kog pangutana og didto
gisugdan ko na ug sulat ang mga posibilidad
nga basin og walay sakto nga tubag.

kumusta na ba ang human rights?

nagtinga, nagkulismaot
nagduka, katulgon,
nadakpan, napriso,
gikulata, gipugos,
giyatakan, gihadlok
gigaid, giduslak, gisuntok
ang kutokuto

daghang gisakit
samtang ang babayeng dunay alom sa
iyang aping

nagsiging kawaykaway sa iyang kamot
og ang iyang mga kaalyado
walay puhat sa pagpakpak

sa adlaw sa kasingkasing

nangadto mi sa baybayon
kuyog si bonbon, pretty, kuting, og samsam
og emma
ang among mga alalay nga si gina, ricky, tatang
og marinel
gipakuyog usab

mikatkat si ricky og lubi nanguha og botong
mihigda si emma sa katre nga kawayan
didto sa among lagkaw

milakaw ko dala ang usa ka monobloc nga beach bench
kuyog ang loyal nga si pretty, ang poodle

si bonbon, ang dachshund nga hilaw
mitupad ni emma nga gihilot ni tatang
si kuting, ang japanese spitz og samsam, ang askal
nagdagandagan dapit sa balilihan
siging paghot

marinel nagsugba sa isda nga balarite
samtang si gina naglung-ag og kamote

pagkabugnaw sa hangin karon
dili kaayo init ang panahon
pagkatin-aw sa dagat

miawit ang akong kasingkasing sa iyang adlaw karon
pagkalami sa kinabuhi

nahinanok na si emma, ang akong asawa
misalom ko sa dagat
nga ako rang usa

Kanus-a ko nagsugod sa akong pagkabalakero?

[tubag ko kang nyor mel sa among kulukabildo sa turtle's nest]
...02.09.10.martes...
gihimugso ako
sa bulawanong hunghong ni mama
nga suwayan kog tunob
ang gangising dalan sa kapanulatan.
pagkakita nako sa hamugawayng dalan,
sa walay pagduha-duha,
labihan ka kusog kong midagan
—dagan, lukso, dagan—
apan wala koy nasimhot nga tinta,
puros ra mga abog sa basurahan.
natibuok ug miitom ang abog,
nawala akong panan-aw
ug ako nadagma:
samdan ang duha ko ka dunggan
nga giariyosan sa bulawanong hunghong ni mama.
gitrapohan ko kini dayon
sa akong ligdong plano:
mamahimo akong gitara
nga moduyog sa mingawng kagabhion.
ang mga hunghong ni mama
pabiling nagkumpayot sa akong dunggan
ug dili ko kini mamahimong huboon sa akong hunahuna
kay ang iyang giariyos nako
ako na usab nga gisingsing.
dili man makamaong moagak si mama nako
apan ang padayon niyang mga hunghong
matag adlawng molabay
maoy molamas sa akong gilutong sud-an.
si sir ritchel ang miagak sa duha ko ka kamot
aron maantigo akong molakaw.
sa pipila ka buwang milabay,
padayon kong nagkat-og dagan.
bitbit ang langitnong tambag ni mama
nga tabokon ko ang nagkayong impiyerno,
gisubay ko ang taytayan sa carcar,
balikan na usab kon matabok na nako ang pikas tampi
kay sa tunga-tunga, ako pirme madagma.
hangtod karon
pabiling nagbitay sa akong dunggan
ang bulawanong hunghong ni mama
nga nahimong usa ka dakong tahas:
"nick, mamahimo kang magsusulat."
ug karon sugdan ko pagduyog sa musika sa akong gitara
ang nag-inusarang dag-om sa kagabhion
nga gibiyaan sa buwan ug mga bitoon.
ug pabilin kong magmugnag kanta
nga akong awiton
matag pangharana nako
sa akong kahilakong higala.
--romeo nicolas bonsocan
lungsod sa carcar, sugbo

ang wala pagbuhat sa gugma sa angay nga buhaton

natagboan nako ang gugma
didto sa kasagbotan
og sa kakugnan
nagkatuiris ang mga karwas
sa akong dughan
nga nasamdan sa mga kuko
sa gugma
nga haskang haita
morag kutsilyo nga panghiwa
ni Celia
sa isda nga ang ikog pula.

mga timailhan sa usa ka bakakon

kon imong pangutan-on
masuko dayon,
kon dili nimo ambaton
mamuyok
mangablit mangutana
kon nganong
hilom ra kaayo ang
panahon

sa usa nimo ka pulong
pulo na ang iya
kon imong tan-awon
molingiw
kon imong hikapon ang
iyang dughan
wala na ang kainit
ang iyang kamot bugnaw
sama sa kahaponon

manghagad pa
nga dili siya sama sa uban diha
nga bakakon

sa kadaghan sa iyang gipamulong
sa onse ka mga pasalig
dose ang dili tinood.

After continuous appeals from writers won
his release from the hospital in 1958,
Pound returned to Italy
and settled in Venice,
where he died,
a semi-recluse,
in 1972.

gisugdan ko na
ang pagtago
dili kay
sa duna koy
gikaulawan
wala
lang gyod
ko ganihi
sa tanan.

mas maayo na lang nga ako ra usa kuyog sa akong anino, makiglantugi sa akong kalag, makigbuno sa akong lawas, dinhing dapita diin wala nay tawo.
mas maayo
pa ang gangis.

"The apparition of these faces in the crowd;
Petals on a wet, black bough."(Ezra Pound)

unsa kaha'y kahulugan
anang mga gihay nga nagbasa
sa kilid sa itom nga dakong sanga? 

kang kinsang mga nawong kaha
kanang nagpakita kanato?