Baybayon

4/20/2010

sa tumang kaanindot

doldol nga panganod
asul nga langit

tin-aw nga dagat
mga bato nga
nagkahibat

patay nga kahoy
pagkamakalolooy!

usahay malibog ko ngano nga
ganahan ko nianang mga bato sa baybayon

sa akong paglakat dili kaagwanta nga duna gyo'y bato nga
puniton, lantawon, hikapon,

og unya pagkahuman ilabay og balik sa lalom nga parte sa dagat.

gusto lang gayod nakong iuli
ang dili ako.

borda sa dagat

wala hagoi ang mga borda sa dagat
apan pagkaanindot gayod

sa makadyot lang
usob na usab ang desinyo

ganiha morag putong sa simbahan
ni mama

karon morag mantil sa among
lamesa

pagkaunya morag balahibo
sa langgam nga nakagawas sa
hawla.

ang kabilin ni Lola Paypeps

kon dunay mamisita sa balay
hilom lang si Lola Pepay
pero kwidaw kay
kusog kaayong mamantay

kay inig lakaw nimo
balikan niyang hikutar
ang imong mga tunob
diha sa salog

og ayha siya moingon kon
kinsa ka.

pagbahin sa katigayonan ning kalibotan

ang atong manghod nga bagtok
mokuha gayod sa iyang bahin
pinaagi sa mga potot,

ang atong ig-agaw nga maya
mag-una pa gani og ani sa
mga lugas sa humay,

ato ang kopra, ang humay, ang
mais, atong gibaylo sa kwarta,

ang ulod nga anaa nagtago sa ilalom
sa yuta nga atong gitindigon
mangayo usab og bahin,

apan sa kataposan lang sila

kita na ang kitkiton samtang
natug kita sa lawak nga wala
na'y bintana og pultahan.

Wa Damha

Riiiiiiiingggg

"Hi, Akoy"

"Kinsa ni?"

"Si Cheng Chunhao. Paunsa ka nakabalo sa akong numero?"

"Wala man ko mitawag nimo. Ikaw may mitawag."

"Ha? Mi-ring man akong phone....imong ngalan man ang migawas. Motuo ba
ka'g 'yuanfen'(fate/serendipity)?"

"O."

"Naa man ko ron sa Xiamen, first year college gaeskwela ko'g International Trade."

"Komosta ang tiempo diha, ganahan ra ka?'

"Init. Init pa sa Kunming."

"Nakadula pa kag Weiqi?(Go)"

"Mangita pa kog sideline, magtudlo og Weiqi, pero wala pa daw ko
experience. Sulayan nako'g kuhag experience sa."

"Last time, di ba miuli ko,gitudlo nako sa among lungsod ang Weiqi, OK
biya, ganahan sila, pero di gyod kaayo sama sa chess."

"Ana gyod. I-record akong number ha? Mag-tawganay ta puhon."

"Unsa gani to imong ngalan? Pasensiya ha kay dugay na ta way contact,
nalimot ko?"

"Cheng Chunhao.... Maayo imohang ngalan kay sayon ra hinumdoman."

"O, nakuha na nako. Maayo ra ka diha?"

"Oo, tanan maayo."

"O, sige, ayo-ayo, hangtod sunod. Salamat sa pagtawag."

"Sige, hangtod sunod."

sa kataposan

mahibaw-an ra nimo mahal ko
nga ang akong ngalan
lahi sa akong binuhatan

although,

aduna'y mga binuhatan
nga mitahod gamay sa akong ngalan

at any rate

ang akong mga tunob naningkamot pa
nga makaluhaan ang akong mga lapalapa
ang akong mga gipanulat nga
nagdala og mga tanghaga
nga magpasabot unta sa kahulugan
saakong gipanulti sa mga orasan
sa matag labay sa panahon
labi na sa kaadlawon
nga kita na lang duha og
wala na ang pag-aron-aron

amidst

sa atong mga di pagsinabtanay usahay
gitulon ko ang akong mga
paniwala sa buhay

akong mga prinsipyo
og usahay akong malabay ang akong
edukasyon sa gawas sa bintana
aron ko lang ikaw magakos og hugot
sama sa kahugot sa bagon nga
mikatay sa balite

about

sa tanang butang nga wala magtugma ang atong mga utok
ang atong mga panglantaw nga nagsuhi

finally

kon mamatay ko og unya ilubong na human sa imong
testimonya nga ako buotan nga bana
maayong amigo
dili palupig sa remedyo sa kutson tang katre
kon unya mangutingkay ka na sa akong kabilin
sa akong journal nga imong basahon
sa akong mga balak nga akong gi-stock sa kaban nga karaan
nga kabilin pa sa Lolo ni Lolo
kon mabasa mo na ang mga files sa akong computer
(ang access code tua sa akong diary nga itom og cover)
kon makita mo na ang tanang mga tinood
og mabungkag muna ang
mga lapinig sa akong mga bakak
(nga aduna baya usa'y rason kon ngano
sama sa pag-preserve sa atong relasyon)

ayaw baya og kapungot kanako
kasilagi ako ayaw
kay mao kini ang tinood, nga bisan pa og ako dili na ako
bisan nga og sa buhi pa ako
aduna ako'y mga gitago sa imong mga mata
taliwala sa atong mga pahiyom
og sa atong pag-unot-unot didto sa kusina
kasilagi ako ayaw

gimahal ko ikaw
gihigugma ko ikaw
og sayod ako nga dili ako mabuhi
kon wala ikaw sa akong kiliran

kon makita mo na ang uban pang larawan
sunuga kini og pasayloa na lang
kining gamayng kayabag nga duyog sa nindot kong awit
ipalid ang mga abo sa hangin
didto sa baybayon
kalimti ang tanan

kalimti ako, pangita og lain
kay didto sa akong padulngan
papason ko na usab ikaw sa akong
panumduman.

kausbanan sa baybayon

miabot ang amerkanong naminyo sa
silingan namong bulag sa bana og dunay duha ka anak.
sa kadaghan sa iyang kwarta
mipalit siyag luna sa baybayon nga gibutang sa ngalan
sa iyang asawa.
nagpatukod siyag balay nga balor og walo ka milyon
dos undanas nga ang hagdan hinimo sa yakal
gipalabat kini niya og semento og puthaw
nga habog kay lagi hadlok nga masudlan
og kawatan og tulisan

daghang mga iro ang sud
og ang gate hinimo sa aluminum aron dili matay-an
sa asgad nga hangin
wala na'y makasulod sa iyang balay samtang siya
nanigarilyo, nag-inom og tanduay, nagharayharay
sa iyang lingkoranan, naghay-ad, nag-sunbathing
tupad sa iyang asawang pinay

sa kilid daghang aso ang pork barbecue nga giluto sa oling,
humot sab ang iyang beef roast
og kusog ang music nga gikan sa iyang sound system.

sa tupad niini mao ang beachfront nga gilabat og kawayan
labong ang punoan sa pitogo
og adunay mga bata kuyog sa ilang mga amahan og inahan
nga nagpasilong didto
picnic kini sa Domingo.

nausob na ang baybayon sa pag-abot sa mga amerkanong kwartahan.
napuros na labat ang mga baybayon
namingaw agi anang exclusive-exclusive,
" private property no tresspassing"

ang wala mausob mao lamang ang hangin
ang mga balas
ang mga awit sa balod
ang mga bato
ang mga balagon nga wala'y undang og kamang
ang mga umang

pagkagamay

ang atong uniberso
usa lang ka grano sa balas
sa baybayon

ako nga mibalak
unsa ako sa nahisama?

wala'y makadungog kanako
wala'y makaila wala'y makahibalo
nga ania ako dinhi

naglingkod atubangan sa computer
sud sa balay sud ning kalibotan
nga akong gipuy-an

ako nga mas gamay pa sa grano sa usa ka balas
unsa ako sa nahisama?

wala ako, wala ako sa mapa sa mga uniberso
og busa mibalak lang ko
kay wala gayod ako, wala gayod, wala.

nindot tan-awon

ang simod sa akong iro
nga iyang gipatong sa
iyang gagmay nga mga
tudlo.

nindot tan-awon ang
lantipay nga milabong
sa kilid sa hakhak sa
lubi nga layog,

nindot tan-awon ang
mga bata nga naghawiray
sa ilang kamot gikan
sa simbahan human
sa misa sa Domingo,

bisan ang hangin nga
dili ko makita
pagkalami gayod nga
hanggabon

pamalandong sa sayo sa kabuntagon

sa verandah
sa ubos mao ang mga lantipay
og ang mga bato nga nagpasad
atua na ang sunoy
nagbirigbirig sa himungaan
labong ang lubi nga daghang butong
sa kilid sa atop sa balay
ang upat ka iro nagdakpanay
unot-unot sa balilihan
hinay ang hangin nga gikan
sa dagat
ang anahaw nga akong gitanom
milabong
nakatigom og kahabog
ang punoan sa nangka
kusog ang pagpangudlot
bisan sa hulaw
duro sang pangalimyon ang
sampaguita og
kamuning
nagtindog ko sa kilid sa
puthaw nga abatanan
gipatong ang akong duha
ka siko og ako
namalandong:

ang tanan
gikan sa kalibotan
ang kahoy
ang hangin ang tubig
ang mga hulmigas
ang mga alibangbang
ako
ang mga iro ang mga
lantipay
ang punoan sa nangka
ang hangin nga gikan sa
dagat
ang tabili nga nagkamang
sa sanga sa anahaw
ang lubi nga layog
ang mga bato nga nagpasad
sa dalan
ang mga iro nga nanggiunot
kapamilya nato ni
choy!
sagrado ang kinabuhi
kinabuhi sa iro, sa lantipay, sa lubi,
sa hangin, sa dagat, sa mga bato
sagrado
balaan
tahoron ta kining tanan
tahoron pod nako
ang akong kaugalingon
balaan ang tanan
kapamilya
kauban
ang hangin nga gikan sa dagat
ang ginhawa sa kahoy
akong giginhawa
ang akong mga pangagho
ginhawa sa kahoy

wala gani akoy katungod sa pagkutlo
sa dahon sa nangka
sa walay pagtugot sa iyang punoan
wala ako'y katungod sa pagbadlong sa
pag-unot sa akong mga iro
dinha sa balilihan

Lahi Og Kalibotan

Akong kadula ron tagalagyo na

Kay way tagadug-ol nga mosukol.

Ang kaestorya taga-laing suok sa atong

Planeta, kay ang akong kaatbang karon

Lahi pod nga kalibotan ang gipuy-an.

Akoy

2010.4.19

4/19/2010

Hilig

Gasunod sa ginhawa, ug daw
Gihangin nga buyog ang akong hilig karon
Gabalhin-balhin.

Akoy
2010.4.19

Unsay Nakapahabog Sa Imong Garbo Karon?

Nahimamat ang mga tawo, usa ka hugpong

Nga tag-as og kahimatngonan, sumala nila,

Agi sa pagbasa sa usa ka mahinungdanong libro

Nga nabasahan pod nako.

Nabatyagan sulod sa lawak ang ilang kaikag
Sa paghisgot bahin sa gahom sa bag-ong
Kahimatngonan nga naangkon.
Natakdan pod ko sa ilang garbo.

Akoy
2010.4.19

Unsay Nakapalipay Nimo Karon?

Samtang gahulagway ko sa bougainvilla

Nga midikit sa pader nga gabawog hangtod sa unahan

Kilid sa habog nga bilding sa eskwelahan

Gusto nakong makita sa layo ang mga panganod sa pughawng langit.

Unya, kalit mihikap sa akong likod ang akong amigo'g amiga.

"Nag-unsa ka diha?"

"Ga-estudyo unsaon paghulagway niini", tubag nako.

(Nagka-estoryahay mi, kuyog sa paglakaw.)

"Mipalit ko'g libro ganiha gikan sa "The Book Exchange"

(Nga siya god ang tag-iya, nga gibilin sa usa ka lawak sa Cafe Bar

Nga ginapanag-iya sa akong higala nga gipaila-ila kaniya.)

"Nindotan ko sa bookshelf...dark color".

(Mikatawa ra siya.)

"Kadtong tagbayntehon imong gipalit?"

"Treynta.", tubag nako.

"Asa diay mo adto ron?"

Didto sa ..."(Ngalan sa usa ka dulaan, nga wa ko kaila.").

"Dili diay ko katambong sa inyong kasal".

"Tuod nakapalit na ka'g ticket.", sumpay niya.

("Wala pa biya," sa akong hunahuna, gihilom lang.)

"Naa koy lakaw, nakaplano na sa una pa.

Unsay akong madalit, hulip sa akong presensiya?"

"Imong hulagway, ipalingkod sa silya.", tubag niya.

"Pula na lang nga enbelop?"

(Miuyon ang amiga.)

Nagsanga among dalan, padayon ko sa unahan.

Akong naamgohan, pipila na lang kaadlaw, kaslon na sila.

Akoy

2010.4.19

Unsay Gipasalamatan Nimo Karon?

Nakakaon og sinugbang isda,
Napakapinan pag sinugbang karne
Duha ka pinaksan nga kan-on
Ug rice wine nga morag butong ang katam-is.
Akoy
2010.4.19

aron santaon ang kabangis sa hulaw

nagtapok ang napulo
ka dahon
sa usa ka bagon
sa ibabaw sa
mga balas sa
baybayon

tupad usab ang
mga espada sa
iyang silingan

itlog sa salag nga hulaw

lingin nga bato
sa ibabaw sa
nag-uga nga mga
sampinit.

orasyon

ning alas otso sa gabii
sugdan na ang orasyon

Dios ko, Ginoo ko,
Amahan, Inahan, Anak

pangoros og katulo
human sa makatulo mong pagpangadye
sa maghimaya ka hari
maghimaya ka maria
og amahan namo og
kapinan pa sa gloria patri

kay ugma sa dili pa
mogawas ang adlaw

mogikan na ang kuhaon
(ay kog ingna nga ikaw?)

sa mga iya sa mga butang (things-in-themselves)

isulti ko lang ang akong nakita
dili ko maghusga
wala ko'y ihatag nga bulok sa pagbati
kasubo sa itom, himaya sa ube, selos sa amarillo,
dili ko kini hataga sa iyang anino
kon sungo lang nan sungo ra usab
dili na nako kini ngalan og suwang
ang katig sa sakayan nga mibugaw sa mga balod
ang layag sa sakayan nga mikayab sa hangin
ang tigbugsay nga dagkog bukton
og ako nga nagsakay nga
wala na'y antipara

baybayon ang atong kalibotan
wala na ang yuta og ang mga kahoy
ang mga isda haguros na lamang
ang mga bukid
panimhot na lang sa atong mga
ilong

sabta ayaw, lantawa lang
ayaw og sulti, hilom lang

karon nga hubo na kita
magbulag ta og pangita sa utlanan.

sa kamatayon ni Jay M.

i

ANG inahan
sa wala pa makahibalo sa panghitabo
nakatulog sa iyang katre nga kawayan
atubang sa kasadpan

nakita niya ang usa ka maya nga mibatog sa iyang bintana
wala kini molihok samtang iyang gidakop

migawas siya sa iyang lawak
naog sa balay nga wala pa mahuman
og iyang gibuhian
ang maong langgam
sa kawanangan

nahilis ang adlaw sa usa ka
kagabhion

ii

sa dihang miabot na ang lungon sa namatay
niyang anak
wala siya moiyak
udto kadto
giloum niya ang tanan

ang iyaan nga mananambal
naghuwad sa duha ka piso
nga nagsigig tuhak sa
pipila ka lusok sa humay
nga gisabwag
sa samin nga
tabon

iii

sa kaadlawon
sa nahikatulog na ang mga nagdula og madyong og tong-its
ang inahan
mibakho, misyagit,
miyaka sa salog
gidakdak ang iyang ulo sa tiil sa iyang katre nga kawayan

iv

nakuyapan ang kabuntagon
mihugot ang dughan sa adlaw nga mao pa'y pagsubang
gihilap ang tiyan sa mga katuigan.

tikaw tikaw

kapoy pod baya og tikaw tikaw niining
disyertong mamingaw
pila ka libo ka tuig nga walay ulan
bisan gani anino sa dag-om
wa.

ang bulak dinhi mora kadak-a og
tamstak ang iyang sanga mora lamang
kanipis sa dagom

pulos lang adlaw dinhi
busa ang mga wala ka antos
nanguli balik sa ilang
agi.

nagdahom ko nga dunay mga saad
nga matuman dinhi
sama sa saad sa usa ka prutas nga morag
totoy sa babaye nga ang duga morag
gatas sa inahan

apan pila na ba ka tuig ang milabay
wala'y gidugog nga naburos dinhi
wala gani tawag sa usa ka kasal
dinha sa kapilya
sa mga bonbon

pipila lang ba ang ania dinhi nagtikawtikaw
ako ra man seguro
(og ikaw nga nagpahipi diha sa likod sa mga
bungtod nga balason)

ambot nganong nagdugay ko dinhi
basin, basin, basin pod diay og

gilamian
naanad na sa init nga adlaw
basin pod diay og
nawili sa gilok sa balas nga nausik sa tungatunga
sa akong mga tudlo

basin pod og
duna lang gyo'y katarungan nga hangtod karon
wala pa naaninaw
apan
nindot og sinaw
morag perlas nga nalubong sa
lapok sa lanao.

PAMILOSOPIYA SA USA KA ULAGAN

sa pamilosopiya ang tanan kuno dinhi dili baya tinood.
ania kuno kita sud sa langob og unya ang atong nakita mao lamang ang mga anino.
kitang tanan mga ilusyon lamang hinimo lamang sa atong mga hunahuna
(og gumunhap).

nga og kon wala na ang atong mga hunahuna, wala na usab kita.
makalibog usahay labi na kon ayohon pa nato kini og kutikuti o tuki-tuki.
makalumos man gani seguro kon mosalom pa kita didto sa lalom nga parte.
ang uban nakat-on sa paglabang sa mga utlanan
og sila (kuno) nakakab-ot sa mga prutas sa kamatooran
(wa lang ko kabalo kon balimbing ba o kaymito)

mao kana ang ilang sulti, og namati lamang ako, og nagbasa lang usab ako.
hagiton usahay ako sa layog sa pagduda, usahay mora ako og giluba sa mga linti.
sud sa akong dughan mibuhagay ang mga duga og tagok sa kalibog
og bisan og dili gani
bugnaw kaayo ang kagabhion magkurog baya ang akong bag-ang og morag
mabali ang akong suwang kay wala'y kasandigan ning akong liog nga nagloay
kay gimingaw na nianang pahuway og kahayahay
(kanang maglingkod sa rocking chair sa boracay didto sa Regency: sosyal!)

misulay ako nianang mga pagpamensar, kanang imong giingon nga paghubo sa mga sapot
sa hunahuna, nga mora ko'g usa ka tawong milabay sa akong polo shi(r)t , kamisin,
karsonsilyo og brief, og kumkom-palad ang akong lagay og itlog,
misungsong ako sa dakong
suba sa lalom nga pamilosopiya,
dugay ko didto, tugnaw, kisaw, langoy, sikad, kaway

(dive, butterfly stroke, iniro, initoy,
alligator, og uban pa)

apan sa akong kamingaw didto nga mora na man hinoon ako'g mamatay
mikawas ko oi.
og mihay-ad ko sa daplin
(ihap sa akong halhag nga bolbol)

og nakita ko ikaw, og mitutok ako kanimo ,
og nag-ilis ko

(paspas og kuha sa akong brief
nga bulingon, polo shirt nga baratohon,
pantalon nga gisi ang pondeyo)

gisul-ob og balik ang akong sapot
tungod sa akong kauwaw

mitutok ka og balos kanako,
mipitik ang akong kasingkasing,
(uplot, uplot, blag, blag, pitik, tik tik tik tok tik tok tik tok
as in morag relo sa akong ulohan)

nautgan ko, nagtubod ang akong
laway, migilok ang akong mga paa,
og mikitiw ang akong mga kuyamoy,
mituybo ang akong mga balahibo
migilok ang akong ayoyok

(morag washing machine ang sound)

og akong gilabay ang
akong mga kalibog,
akong gihunong ang akong mga pamensar
kon unsa ang kinabuhi
og kon kinsa ako og tinood ba ang akong nakita,

gigakos ko ikaw,
gihagkan ang imong mga ngabil,
og ga-fencing ang atong mga dila,
hawid sa hawiranan,
hikap sa hikaponon,
bira sa birahonon,
sulod sa sudlonon,
pansak, sampak, huso, duso,

hangtod nga
migawas ang tanang nga angay nga manggawas
ang mga singot sa hwerto
ang nga singgit sa purgatoryo
ang mga agolo sa napulo ka sugo....

pastilan, unsaon na lang,
nawala ang akong kalibog
kon ako tinood ba og ikaw tinood ba usab,

basta ang akong nahibaw-an malipayon ko
(ambot og malipayon ka ba usab)
og nakabungat ko
sa akong kaugalingon,

kini mao ang tinood, og kini ra gayod:
ako,

(ambot og ikaw ba pod?)

ang tinood

basta, segurado na ko, tinood jud ko!

kugita
irga
sam!

eurokong!

inato

kanang taas og itom nga sudlanan
nga taas og liog
og dunay kalo-kalo
mao na'y atong kutiran:

usa ka bol nga tuba nga dili pa bahal
sagolan sa duha ka itlog sa manok nga bisaya
ikutir sa lima ka tableyang ispisoyal

kanang morag pan
bingka ka na nga wala magkulang sa tono
nga saktog liki og saktog kasinaw
humok usapon
dili sapnot sa ngipon og tutunlan

kanang gamay'ng lingin
biasong kana nga atong ipidyat sa ginamos nga mawos
og atong tusnoan sa tibugol
nga bahaw

ang atong isumsom pwede pod
kinilaw nga bulinaw
nga hinagbuan ni Peryong sa
baybay sa Olingan

mas lami baya usab ang kusahos
sa kabaw ni Gorio
nga sobra pa sa karne niya
niadtong pista
sa Santa Felomina

kon mag-inarte ta usahay
mantilan pa gyod ang lamesang-polding
sa malong ni Bering

mora'g tinood

ang akong iro nga pulahon
nga gibunyagan nako'g Bonbon
kon motutok na gani kanako
human nakog pakaon
sa humba og kan-on
mora ba'g siya ra gayod ang
tinood dinhi sa kalibotan.

ang langgam nga maya

langgam nga kalkag na og balahibo
mihay-ad sa dalan
nagtikongkong
tak-om ang iyang sungo
piyong ang iyang mga mata
hait ang iyang mga kuko
wala na'y kukahadlok sa
bahad sa mga hulmigas

wala na'y nangambat
ang mga bata mibiya na
wala na nila usiki pa ang mga
bala sa ilang mga tirador

ang hawla wala na'y pulos
ang mga sabod wala na maghimpos
ang mga pispis wala manawag
sa gibiyaan na niya nga salag

mao kini ang patay nga langgam
dili na gani kinahanglan pa
nga tawgon nato siya'g maya.

didto ko sa layo na kamo nakita

miulan.

ang ulan nga nahulog sama sa
sa awit
sa pinitik sa akong kasingkasing
gibati ko ang
kahaw-ang sa ulan nga nahulog sa akong
kasingkasing
wala masalod sa akong dughan
lapos sa bulsa sa akong
panit

nakita nako

ang pagkabasa sa uga nga yuta sama sa
natig-a kong mga pagbati
sa namad-an nga sapa sa akong mga hunahuna
kamo nga nanag-una nalingaw
nalamat sa mga sugilanon paingon sa usa ka lungsod
nga bibo
diin ang mga bata nagdakpanay
nagsaka kanaog sa mga hagdan
sa mga kabayo nga ilang gisakyan
gabantay ang ilang mga ginikanan samtang
mituyok ang mga hapuhap sa kahayag

layo na kamo og ako bitbit ang bug-at nga kalag
nagduda, adunay kahadlok kon unsa ang dangatan
niining akong hukom
sa pagpabilin

ang kawili usahay bug-at og lapalapa
tapot ang mga tunob sa lapok sa kalibog
nagtalikod ako sa kangitngit
apan wala usab ako miasdang sa kahayag
ang ulan mao ang nahimong
bongbong nining akong
balayan sa kahingawa.

ANG ATONG MGA KAMOT

KON mag-ampo na gani ang atong mga kamot,
kon mohakop na kini sa tubig nga atong ilimnon
sa wala pa ang baso

kon modawat kini sa usa ka gugma
og kon mosukli kini sa mao ra usab nga gugma
diha sa paghapuhap sa aping
kon mohalad kini sa mga bulak
alang sa usa ka gikamingawan

hulmahon niya ang usa ka kasingkasing.

sa akong katabian usahay

ma-miss na hinoon
nako ang
kahilom.....

....................................................................................................... ...................................... ................................................... ....................... ............... . . . . . . . . . . .. . ........ . . . . .............. .

........., ,, .........................////.....>>>> ....<<<<<.... >>>>

ambot oi,
bisag hilom na akong baba

motabi man jud gihapon
ning akong hunahuna....... l l l l ,,, ll l wl l lw l 2 l2 l 2.. l 2 l .2 2l l. 5 . 4l 2.
20 ) ) ld ;; ado ;k;o 3ljjh;aklk podk p3 4l4 l;q'qem ldopd ;wqww ' -[-a'a',d,pmnekia,d..

mikitoy na pod akong mga tudlo
kay lagi
gustong mobagdok
moantog... lk ksn lskjw'; 303080q7q ekjoa7oad;a nzoa;kaw4emd;auda;e[a'adojam

d;akd;aokwma ucca;douz''a[-aerka'saoela'ml uiekahiwamd;amW;E;;aeaka'o[e0';a;a../d//a/d/.,//// PDOIAEK';LDKA;K;AK;LKAD;LK';AK

HAyyyyyy,
kakap\oy ba...

z z z z z z z z z z z z z z z

bisan matulog
naa pa gihapon ang mga
silaba sa
z z z zz z z z z z z z z z z z z
hhhhh asshhhhh

mahimo bang magsulat nga dili gamiton ang hunahuna?

sulayan nako ni karon:

kadtong akong nakita nga
langgam nga itom nga misulod
sa itom nga dag-om
nawala baya,

ang mitunga og balik mao ang puti
nga lampin
nga nabasa sa ihi sa usa ka bata
nga palaiyak,

ang inahan wala diha
naninda og puto maya didto sa merkado
og hangtod karon wala pa intawon makabalik
kay wala lagi ipalit og gatas

ambot nganong de lata man saba ang iyang gamiton
nga daghan mang gatas sa iyang totoy

kini sang amahan nga walay ugam atua
na sab sa iyang bag-ong kulakadidang

(balik chat sa Lubi)

wow, internal medicine ka diay karon?
inner exploration ba?
nindot baya ang awareness
labi na didto sa Yello Mountain nga imong giingon
pareho sab na diri sa bukid sa Bulawan
nga walay bulawan
nga ang mas daghan mao ang tae sa mga suban-on
og sa mga unggoy nga gisip-on

(chat na pod)

korek, mas nindot ang internalization
as in kulkogization

ah, wa baya ko gayaga-yaga ang akong main point
on the other hand....
(palalom kunohay ta ani)
sus, ang Life temporary lang, lumalabay, dili angayan nga
tagaan og
serious attitude, kay ngano serious ba god ang life sa ato?
ngekk, dili jud noon, sige lang gani tang kadasmag sa iyang masip-ot og batohon nga dalan
quiver, que ver!
conyo conana, cervenguenza, tango criminal, brocha penal,

(balik chat na pod, shift, paradigm )

ok, ania ako sa rsb style, hiedeggerian, husserlian de phenomenology de chardin
apil na sa vick vaporub vickgenstein,
what can i do? unsa man god ang akong mahimo? wa jamo
sulat que sulat, dili na gamiton ang utak, morag ulan, mibaha, midagan, paingon sa dagat
apan on the other hand,

mao ra ni atong hilig, sulat sa agtang, sulat sa pader, apil na ang sampot sa atong mga uyab
sulatan og
(fuck you) erase, delete, copy, paste i luv you, honey.

kanus-a na sab ta mag-suduko?
kanang walay panty og walay brief, kanus-a ba?

shit, (oi bad na ha?) oh my god! (that's better)
can i have a glass of watah please? drink, drink,

bugoy jud ning bisaya, ka distinguish unsa ang tinood og unsa ang naa sa libro
ka-remember ka, nga ingon ang bata, mommy mommy unsay germs?
ingon ang mader, kadtong naa sa book ba?

kadto si pacquiao, bookish ba?
nganong daghang ganahan nga fans?

'makita nako ni kay 'Pacquiao' sa iyang 'awareness, presence' samtang gaaway...iyang kalaban , bookish....stick to one style, one ideya, or form....Si Pacquiao, daw formless, bisang unsa lang at the moment

kay makita sa iyang body movements ang iyang 'freedom of movement', iyang high awareness...

resulta, iyang kontra, morag mga bulag...atubangan sa iyang presensiya...

mao ba kini ang tinood nga imong gipangita?

true to life, qoutation gikan sa usa ka conversation, sa usa ka chat?

ug tungod tingali kay grade 3 ra siya, wala na daot iyang natural brightness,sa 'yes, maam, nga education', keep quiet class, don't ask

blind

Pacquiao, sama ni Bruce Lee, iyang idol.

(idol pod nko))\thirteen years. the line at the blackcat box office is two blocks long. the punk in front of me has pink hair fashioned in liberty spikes, his get-up complete with pocket chains and converse all-stars. thirteen years. i didn’t bring enough whiskey for this line, the flask is dry and i’ve still got one more block. the girl behind me is chatting on her cell phone, relaying the play by play of the line’s progress. her voice is candy enough to warrant a choking death right here on fourteenth street. thirteen years. the blackcat is a nondescript building boasting turn of the century brickwork and boarded windows. with each step closer my adrenaline and anticipation rises. for thirteen years and the albums that span, my self-awareness has been constructed through questioning authority and partying until daybreak. for me, this show is the equivalent of a christian meeting jesus, without the disappointment. the clerk at the box office has lobe plugs the size of golf balls and a monroe piercing on the left side of her face. sweaty money in hand, ms. monroe beats me to the punch. sold out. thirteen years. walking the four blocks to my car, a punker is bootlegging an extra ticket. fifty bucks he tells me. the show cost twelve at the door. i tell him to fuck off and die slow. back at the house i pour a double and grab the bottle. out back i finish half. with the remaining half, and my cigarette cherry still burning, i turn my vinyl collection into a trash can hobo fire.

'be like water my friend, formless...if you put water in the cup, it becomes a cup....if you put it in the tea pot, it becomes the tea pot....Be water my friend'

puree one
libertine libel
limerick

mince three
sestina steamed
soliloquies

peel six
modal missive
meters

combine
vowels in
sauce pan
to simmer

bring
consonants
to a boil

add vowels to
consonants

samtang ginantang

ang magbasa ani

mavuang....

you see? did you get the foint?

madlang fefol, this is it.

sulat nga walay hunahuna.

tagam!

unsay gi enter?

pagbukhad

i

ang kinaiyahan anaa na diha
nagtubo
sa matag adlaw mibukhad
siya
ang atong nindot nga mahimo
mao lamang ang
paglantaw

diha moambak ang atong
kasingkasing
sa kalipay

nganong imo mang gikutlo?
ayaw nianang pagputol
wala kana sa atong sabot

ii

ang kinaiyahan mibilangkad
sa imong atubangan
ayaw og asdang
paabota ang iyang pagkahamtong
siya mismo ang
mohangop kanimo
motanday
mohapwag
mogakos
mohalok

ayaw pagdali
dili kini lumba.

ang gipuy-an

ang mga banggiitang Pilosopo
nagpuyo sa mga Panganod

ang mga baki nagpunay og
Remedyohay sa mga sapa

ang mga pulong usahay lahi
ang gipuy-an sa binuhatan

wala'y mga mata ang dunay kaalam
og ang wala'y kaalam puros tiil ang lawas

ang mga balak nagwarakwarak
natingala ang bata nganong wala'y nawong ang mga pulong

sa akong pag-inosara
nawala ang tanang kabilin sa akong katigulangan

ang akong gipuy-an
puro's umaabot

ang balay nga gitukod sa akong kagahapon
hagbay ko rang gisunog

mangutana ka kon asa ang lagkaw sa akong karon?
akong tubag mao ang ilang tubag: gibanlas na sa mga balod sa gibagyong baybayon

dinhi sa isla sa kamingaw
ang nilung-ag pirming mabahaw.

Hugyaw ni Aristophanes

Ang mga baki ni Aristophanes
Namalhin na sa Panganod
Diin nagpuyo ang mga disipulo
Ni Plato
Nahugyaw ang Philosophy Department
Og sa Pagkahibalo ni Lysistrata niini
Nangalipay ang tanang mga Lalaki
Nga dagkog Itlog
Karon
Miingon sila
Maundang na gayod ang Pagwalaytingganay
Magsugod na ang laing Gubat
Mabagtok ang mga Pilosopo
Mapak-an ang mga Baki nga Makalimot
Na pag-ambak og pagkokak
Og ang mga Pilosopo makat-on na
Usab unsaon Pag-usap ang mga Pagbati
Magkalibanga ang mga Rason
Mogitib ang mga Emosyon.

Ang kataposan nimong madungog
Nga si Lysistrata naburos naman hinoon
Dili sa iyang Bana.
Ang kuyog-kuyog niyang Tomboy
Namaligya na lang og chicharon
Didto sa Carbon.

4/18/2010

Mother Tongue

Sa parat-parat ug lami-lami sa kinabuhi,

Kaugalingong dila ang itila.

-Lubi Kalubihan

STILL LIFE

WALAY TIMIK,
MGA BULAK SA ADLAW
nga gipriso diha sa pintal.

ang estorya niini
sakit. wala gayod mosikat ang
pintor

hangtod nga siya namatay
pipila ka gatos ka tuig
ayha pa nakita ang iyang
pagkamakinaadmanon

daghang tsismis nga kuno
iyang giabis ang iyang
too nga dunggan

nga kuno ang dugo
miagas paingon sa iyang liog
pasiuna
sa pagkutlo niya sa iyang
kinabuhi

wala siya migamit nianang
pisi,
o sanggot.

sa matematikong calculo

adunay pamaagi sa mga numero
nga dili na nimo makita ang
pasulod og pagawas,

nga kon maabli mo ang usa ka pultahan
og dayon makasulod ka nga ikaw rang usa
maglibog ka kon asa na ang
pultahan para sa gawas

apan ang mahitabo mao nga wala ka nay
gana sa gawas
mas nakita nimo ang katahom sa sud
sa calculo
si X og si Y og bisan gani si Z
wala na kinahanglana aron makita nimo
ang tinood nga balor sa
usa ka kahaw-ang,

niaanang bag-ong matrix ang ekwasyon
gawasnon na sa mga fixed variables
hypnotic ang effect
mahunong ka og mahilom og didto makita mo
ang Tres
ang Uno

og moingon ka nga mao na kini Siya
ang Dios nga Gamhanan
ang gikalisangan sa mga numero
ang gikahadlokan sa mga zero.

sa silong sa punoan sa pitogo

tupad sa mga dahong laya
sa pitogo
mao ang mga bag-ong
tubo niini

mogitib ang mga gitlib
samtang ang mga nangahulog
mangadugta
hinay hinay nga gilubong
sa mga balas
sa baybayon

apil ang hangin
og ang kangitngit sa kagabhion

sa daplin sa baybayon

sa daplin sa baybayon
maghukas ta
Love,
init ang hangin sa kaudtohon

init sab ang akong lawas
tupad nimo
Love.

magdilaab tang duha
Love,
ning akong
Kaulag
Love.

Puslan man
Love,
Mas maayo pang
mahimo na lang tang abo
Love,

sa atong agipo
Love
ato silang pailhon
kon unsa ang
Gugmang matood
Love.