ang nahibilin

dungan kitang miabot dinhi
apan ako na lang ang nahibilin

sama sa mga tamsi kamong tanan
nagdungan og pagpanglupad
mora bag nagsabot nga inyo akong
biyaan og sa unsang katarungan

hangtod karon ako wala gayod masayod.

sa daplin sa baybayon hubo ang akong
mga tiil nga nagpabilin sa akong mga tunob
sa puti nga balas og ang mga dila sa balod
nagsunod aron kining tanan mapapas

nagpadayon ako sa akong lakaw og wala
maghuna nianang pagpahulay

sa unahan adunay mga anino nga buot
usab nga papason sa pag-abot sa kabuntagon

mibiya ang tanan kanako og ang hangin miawit
og ang mga bato sa kiliran sa pangpang mitutok kanako

wala ako'y laing kasugiran sa akong mga sugilanon
ang mga kahoy nakigsandurot sa mga panganod
ang mga suba nakigsabot nga makigkita sa dagat
sa baba sa mga bukana og ako karon ang nahibilin

sa kataposan gisuginlan ko ang akong kasingkasing
sa nahitabo kanako og ang akong dunggan namati

usa ako ka bulan nga karon nanag-iya na sa akong
kaugalingong kahayag

dili mo na ako mapalong og dili na ako motingog.

Punuan sa Kinabuhi

Punuan sa Kinabuhi

Sa nanlabay na katuigan
Ang punuan nagpabiling kusgan
Bisan pa sa bul-og sa ulan
Nagibuligan sa huros sa unos
Ang mga dahun na natapot sa mga sanga
Nag-ayum ayum kung asa dad-a
Apan ang mga lunhaw nawad-an na sa kusog
Naigo na mosagubang sa kakusgon sa bul-og
Na sa iyaha makapakurog
Naghulat na lang na mapalid
Ug mapadpad sa hangin
Maabot sa yuta dayun madugta
Pipila lang ka mga adlaw ang nangagi
Berding dahun nisalingsing
Hulip sa mga laya nga nangawala
Bisan pa sa pangidaron
Ang punuan nagpabilin lang gihapon
Bisan ang kakapoy sa pagpas-an
Sa mga sanga og mga bunga wala taligam-a
Baha, bagyo, linog og uban pa
Kainit sa adlaw og kabugnaw sa gabii
Tanang mga kalisdanan gisagubang
Magpabilin lang ang puluy-anan
Sa mga ungoy og langgam og uban pang mananap
Apan ang tawo nga dayo wala gyud kapasaylo
Gipamutol ang sanga, gipangaun ang mga bunga
Wala pa gyud na kuntento
Ang punuan gigapod og giuling
Gibaligya para naay kwartang makuha
Ang tuod nga nahabilin wala na gyud igbaling
Mga langgam og ubang mananap
Wala na gyud nakatalinga
Gipistahan pa gyud sa anay na nagpasanay
Ang punuan na dugta og nahisama sa yuta.
-sakagawasan

sabaw sa tinunuang utan

Sugyot sa dila dailos

Sa tiyan nga tilawan ko

Kadtong atong kagahapon
Tagamtamon ko gihapon

Kadtong atong panagdulog
Buot ko unta ang laing putahi
Tinagsip sa udlot sa kawayan
Linubiang langit sa kahidlaw
Timplang nilaputay daw laway

Apan ang kaluod wa ko batia
Bisan pa man sa kahalang

Gikan sa luy-ang bag-ong

inibot gikan sa uma.
Sabaw nga sarang

Makatagbaw.

katakos sa kawayan

Hilabihan gyod bitaw kakuyaw
Ang gihuptan sa kawayan
Nga gapaling-paling bisan pa
Sa unos nga nilampurnas kaniya.
Wala kini niya panumbalinga.
Hinunoa nanglimbasog pagbatok
Sa madaogdaogong hangin
Nga buot kaniya mopukan sa dayon.
Gibalibaran ang tulod sa maagnihong

Bul-og sa baha nga buot molumos

Sa iyang katimawa. Ug ang mahait

Nga liti usahay motay-og sa iyang

Katakos inubanan sa katawa
Sa dugdog. Kining tanan wala

Mahimong kabalaka. Hinunoa

Nituybo sa iyang galamhan
Ang mga tunok sa iyang kagingking
Nga andam motulisok sa buot

Mangahas pagpukling. Ug bisan pa

Sa pagkatagak sa iyang dahon
Iyang gipakita sa mata nga may

Dila nga siya gihapon mobarog
Nga tibuok bisan pa'g matarog.

ang kasugiran kon ikaw mahigugma sa sigbin sa amoa

Sumala sa estorya, ang sigbin makadala
og bahandi sa katawhan sa amoa.
Apan dili sa kinabuhi ni Inday.
Kay mao ni ang sinugdanan kon nganong naay
mga abat ug impakto dinhi sa punoan sa Talisay.

Kay sumala ni lola, mag-amping ka
anang mga nawong nga sama sa yawa.
Labihan na kon kini naay dako nga pangil,
kay kini wa nag-apas sa imong paghuwas
apan sa imong bulahan nga lawas.

Kini siya way giila basta babaye na.
Siya mosupsop og dugo samtang ibuhagay niya
ang iyang makalipong nga baho.
Iyang ikog, modunggab sa imong pusod,
hangtod kini moluba sa imong unod.

Kuoton niya ang imong kasinkasing.
Dayon, gision aron himoong anting-anting.
Ayaw kalimti nga alang niya lami ang bata.
Iyang mga biktima kanang tam-is og kalag.
Unta luwason ka aning kasugiran una ni molayag.

Ang Paghimatngon

balak ni Candice Salazar daklit nga kadasig mialisngaw, sama sa uphag nga hangin, gisuyop ang yamog sa akong kaugatan ang kahigwaos miduslak niini, nanglimbasog sa pag-alisbo  ngadto sa lang-at nga way kinutuban.. makalipong ang pagtuyok sa kalibutan, gipangita ko ang ulo ug punu-an niini... ang iyang kagahapon ug ang ugma dili ko mahikap, way panumbaling sa gasa sa adlaw nga mibukhad dinhi sa hataas nga patag ako nag inusara, nangindahay, nga makit-an ko ang kinatibuk-an...

Giagak Mo Ako

Giagak Mo Ako
ni: adbent

Sa akong paghilatagaw
Imabaw sa habog nga bangaw
Didto wala akoy nalantaw
Gawas sa kahayag nga masilaw.

Giagak mo ako sa’kong kasubo
Gihupay mo ako gikan sa pagbakho
Sa kalibog og pagkahisalaag ko
Sa matuod nga dalan gigiyahan mo.

Didto taliwala sa kawad-on
Nagkamang nalang ako intawon
Asa naman ako mopaingon?
Kinsa ang akong pagasangpiton?

Giagak mo ako sa’kong kasubo
Gihupay mo ako gikan sa pagbakho
Sa kalibog og pagkahisalaag ko
Sa matuod nga dalan gigiyahan mo.

Karon hapit na ako malubong
Niining nagpangamay nga luyong
Dinhi unya sa akong pagtigdong
Kinsa man ang gustong mosud-ong?

Giagak mo ako sa’kong kasubo
Gihupay mo ako gikan sa pagbakho
Sa kalibog og pagkahisalaag ko
Sa matuod nga dalan gigiyahan mo.

Kining lumba nga akong giapilan
Maangkon ko ba ang kadaugan?
Kon kapakyasan mahiagoman?
Kinsa’y magpabilin sa’kong kiliran?

Giagak mo ako sa’kong kasubo
Gihupay mo ako gikan sa pagbakho
Sa kalibog og pagkahisalaag ko
Sa matuod nga dalan gigiyahan mo.