2013/11/12

kabahin ni Pidot nga para gasto lang...

naay ubang
kinabuhi nga para gasto lang

si Pidot pananglitan
walay pulos kay walay nakamaohan
kon paeskwelahon
mamayabas
kon padarohon
mamotong
madaro man og malapis
ang tanan
bug-at gayod alang
kaniya

pagkahuman nimog
lung-ag, prito sa isdang
palotpot
atua si Pidot
hapit na mag-abot ang
tuhod ug
suwang
nagbudlat ang mata
sa kakusog mokaon

bug-at siya
apan saon taman
igsoon man siya
ug maoy tugon sa imong
nanay
disir siya namatay

"ikaw na bahala kang
Pidot
kay para gasto lang
gayod kini siya"

sa laing bahin
ikaw ang magbuot
sa upat ka ektarya
nga basakan
ug unom ka ektarya
nga kalubian

wa pay labot ang
lapad nga punong
diin ang mga
bangus kanunayng
nag-ung-ong.

No comments :

Post a Comment

Nindot ba? Unsay imong maikasulti?

Panginhas dire