isdang gugma

ang isdang-gugma  kuno 
mao ang paghatag dili pagdawat

kiwa man.

kon sigi kong hatag unya walay
dawat
unsa man puhon ang akong
mahatag?

ang gugma ba pawalaay?

milupad ang kagwang giithan ang bato

karong adlawa akong
gilabay ug bato ang 
kagwang dayon nakog
shagit, " Kabawo nakong
mokawhat ug
kalipay!"

wala na ang Juan Tapulan
nga nagpaabot lang sa
pagkahulog sa hinog nga
bayabas sa iyang ilong

milupad ang kagwang
giithan ang bato

ang dili mabyaan

kabalo kang
dili ka nako mabyaan
dili ka nako
maantos
dili ka nako maiingnan
nga sakto na
natapos na ang tanan
maong ania na usab
ako nagsulat
bahin kanimo

balak nga gustong
mosugid
apan tinago
bulak nga gustong
mobuswak
apan sa kagabhion
sakayan nga gusto
na nga molawig
kon putlon lang ang
iyang mga katig

alang kang Kang

ang kataposang pulong
mao gyod ang imoha
bisag unsaon, bisan asa
ang kataposang pulong 
gayod, mao ang imoha.

kabahin sa imong kinabuhi, (alang kang atty. O)

pagkamahalon man
unta sa klase nga papel
pagkaanindot 
apan nganong imo
mang gikumot

ang gugma usa ka lawak nga sirado ang pultahan kunuhay

ang hunahuna
nasayod
kon unsa ang
gisangpotan sa
imong gugma
diha kaniya

sahay magpabutabuta
ka sa pamasin
nga dunay molimos
sa gugma

magpabungolbungol
sa pagsaway sa nakakita
sa tinood
sa mikatawa sa 
kusog nga libak sa
mga gipanglood ug
nalooy kanimo

ang gugma usa ka
lawak nga sirado
ang pultahan kunuhay
apan kanunay abri ang
mga bentana
nga nagpangaway sa
mga milabay
namasin kanunay basin
ug mobalik
bahala na ug tuyo dili
ikaw kondili
ang pamahaw

ang nabyaan sa atong panahon

kinsa pa gani
kadtong maghisgot
sa mga bitoon, sa bulan
sa dagat, sa ngabil 
sa kasingkasing,

atong batoon,
dayag lang nga kini
nabyaan na sa
atong panahon.

kita ang maghisgot
sa mga mahikap,
sa init sa palad,
sa kagilok sa kiting,
sa mga sugilanon
sa kakiat sa atngal
sa hagwa sa hangin
diha sa gabok nga
bungbong
sa tuktok usab sa
kumo nga mihagtok
diha sa
naniradong pultahan

ang tuyom

naanad na ang
mabubhion, ang
iyang mata, maayo
na nga mopasiatab
nga siya 
matinud-anon,

pangutan-a kon 
giunsa o unsa ang
rason, 

"panginahanglan
lang kini sa
kaugalingon"

dili hilaw ang
iyang pahiyom
makatunok lang
morag tuyom

"panginahanglan lang
kini sa unod
walay labot ang bukog"

mao gani nga ang
balay daghang
dibisyon
lahi ang kusina sa
sala
lahi ang lawak
sa veranda

" lahi ang drama sa
kalag ug
kasingkasing
lahi sab ang lawas nga
nadam-ag ug
mikariling"

pasayloa......

pasayloa apan
gilubong ko na ang
imong kamatayon

gipangita ko ang
sarang makapabuhi
kanako, ako, nga
ug buot kwentahon
hagbay na usab nga
patay, kay dinhing
dapita, taliwala 
kanato, nihit na kaayo
ang bidlisiw sa 
gugma, o kon duna
man ugaling ang
nagpakagugma, hikapa,
humok pas guma.

balak alang sa kasakit

wala mipiyong ang
imong hunahuna sa
akong paghalok sa
imong ngabil,

misulod ang akong didto
ang akong dila
 unya akong nakita
ang imong gipangita
dili ako kadto, lain..

isulti unya kon unsa nga gidangatan didto sa mga isda

sa matag adlaw
gilawgan ang mga
iro nga napulo ka
buok

gipabutangan ug tubig
ang kabo alang
sa mga nasaag nga
mga langgam dinhing
dapita sa
usa ka tinghulaw

gisaburan sa mga humay
ang nataran
gitapok ang mga mumho
ug nilabay na nga mga
bukog
alang sa tanan gutom ning
semana sa ting-init

nakapangutana siya kon
ngano

gitubag siya nga kon
mahimo
lantawon niya ang
uga nga sapa ug
isulti unya kon unsa
nga gidangatan didto
sa mga isda

balak sa hinamhinam

humana siyag
kaligo
naghunghong
sa imong dunggan
nga magpaabot
siya hangtod sa
kaadlawon
unya ang kahumot
sa iyang buhok
mikatay sa imong
liog lapos na gani
sa imong bukog

walay hinungdan

ang akong kalipay dili mo kalipay, apan
ngano ba nga ania ka pa man sa akong palad
nagtuyoktuyok?

gusto mo bang kan-on ang akong palad
unya pagkahuman niini apilon mo pa ang akong
bukton?

ang kalipay lisod sabton, dili gani matagna diha
sa paglantaw lamang, sahay kalit, sahay 
wala damha, mikalit lang ug pitokpitok ang mata
sa kahingangha diha sa pagpitik sa kasingkasing

bisag walay hinungdan, bisag wala gayoy makita bisag usa na lang ka pudyot nga  hinungdan.

panaghap

kadtong miingon ka
nga dili na kaayo nindot
ang palawan
samtang nagkaonkaon
mog saang
sa cowrie island
kon hunahunaon lang
gyod kaayo
tungod kay sa laing
bahin wala mo baya
nalukop pagsuroy ang
tibuok isla morag ang
buot nimong ipasabot mao
lang seguro ang kahimtang
sa inyong panagpuyo sumala
sa kalaay nga ana sulod sa
inyong duha ka dughan......

wala nay gihandom kon mausab pa ba ang mga adlaw

anaay sa kanunay
mangayo kanimo ug
pasaylo

moingon siya
kalimtan na nato ang
tanan

sa matag adlaw 
anaa nag-atong siya kanimo
naghangad
kon kanus-a mo na usab
siya antosan

anaa ka naglantaw kaniya
sa hilom lamang
wala nay gihandom kon
mausab pa ba ang
mga adlaw

nangutana ang babaye
nganong usahay ang kalipay
sa uban
mao man ang iyang kasakit?

ang tanga

unsaon mo kaha
pag-ingon nga unta
dili na mamaak ang
tanga?

kapila ka kaha tubagon
niya nga dili baya lalim kon
ang imong kamot mismo
mao ang mga paak?

nganong hugaw man gihapon siya sa iyang pamati

nanamin ang usa ka
tawo nga
haskang nindota ang
iyang nawong

gitutukan niya ang
iyang kaugalingon
dugay kaayo sa 
paningkamot nga
unta makita niya
ang iyang kalag

apan wala siyay
nakita, bisan gani
diha sa pagbati 

walay mantsa diha
sa iyang nawong
walay abog ang iyang
buhok apan nganong
hugaw man gihapon
siya sa iyang pamati?

miingon siya nga 
puno siya sa paghigugma
apan nganong haw-ang
mga gihapon ang iyang
kasingkasing?

pangutana sa usa ka tadpole

tuwabong
tuwabong
hangtod asa kutob
ang pagduko sa
imong ulo
aron ka lang
makakaon
ug kalipay?

tuwabong
tuwabong
hangtod kanus-a
ka ba motuwad
aron lamang
mabati ang
kahayahay?

mao kana ang ilang gipanugilon

ug nganong
gibuhat mo pa man
ang dili mo na
ganahan pang
buhaton?

nakat-onan mo na
ba ang
kahimtang sa
paghatag sa kalipay
bisag wala
ka na malipay niini?

lamano sa samin
pahiyom sa atubangan
halok sa bugnaw
idapion ang ngabil
diha sa kalamdag
sa imong kaugalingon

sayaw sa musika nga
hagbay na nga mikagiw
awiton ang way samang
pagkahupas
sa mga nangahulog

ang mga sapa gasangasanga
ang sulog misungsong
ang pukot napuno sa mga
nasabod 
diha sa pagkabusdik mao
ang hinungdan sa pagkabuslot

mao kana ang ilang
gipanugilon kon giunsa nila
pagkab-ot ang kagawasan
kon nganong daghang 
nadala sa dakong sulog
kon nganong daghang baho
nga patay nga nagpasad
sa kabatoan tupad sa mga
nasaag nga patay nga kahoy

anaa pa ba ang salampati nga nag-inosara

ngang ba
kaha nga
dili ko naman
maluwa
bisag unsaon
ang halok nimo
kanako
ganihang kaadlawon?

nganong gusto
ko nga mangluwa?

unsa ba kining
kalood kabahin
sa kinabuhi?

nganong ang
kagabhion wala namay
kahulugan?

mao na ba kini
ang akong giampo nga
mahitabo na
kanako?

lantawa palihog kon
abli na ba ang
halwa?

anaa pa ba ang salampati
nga nag-inosara
nga dili na ganahan pa
sa usa ka
kagawasan?

unsa pa bay pulos
sa lig-on nga mga
pako
nga dili na ganahan
sa hangin?

kahiwi

ang imong
gipakabathala
sayong mipanaw

wala gani sila
kahibalo
unsay hinungdan

akong hangyo
unta mausob ka unta

dili mo na ako
basolon nganong 

managsama ang atong
kahiwi
ang atong kapiang
ang atong
kahilom

ang bag-ong kalahian

karon
siya ang mangutana
kon naligo ba
siya kon
nakapanglimogmog
ba siya
sa tubig

lahi kaniadto

siya mismo ang
mosulti kanimo nga
siya naligo na
nga nakapanglimogmog
na siya sa
tubig

unya pakapinan pa
niya ug ingon nga
siya gigutom nga siya
giuhaw na
pag-ayo

dayog sulod sa lawak
unya dili sirad-an ang 
pultahan
dayog higda sa katre
piyong sa mata gustong
magdamgo

gihandom na usab ninyo ang pag-abot sa daghang mga bitoon

lahi sab ni siya
dili pa kaayo dugay
sukad sa iyang
pagbalhin dinhi

ang tanang buntag
managsama
kon unsa ang giluto
kagahapon mao
lang usab karon o
kaha ba sa kahangtoran

dili niya gusto ang
bisag unsang kabag-ohan
dili gani niya gusto
nga limpyohan ang
imong gihugawan
gusto niya nga magpabilin
ang tanan sumala sa
nangagi

nangutana ang babaye
mahimo ba nga dugangan
ang asin
ug suka? mahimo bang 
padak-an mo ang adlip
sa kamatis?

wala siya miyango
nagpabilin sa samang buluhaton
walay tingog-tingog
gibalik-balik niya ang
naandan
sumala sa imong
gitudlo kaniya niadtong
bata pa siya
niadtong wala pay 
kubal ang iyang kamot

ikaw ang iyang
bathala
siya ang imong sulugoon
nakat-unan niya
ang pagsunod kon unsay
dili niya gustong
buhaton

miingon ka
dili tanan binuhat sa gugma
dili tungod kay
gibuhat anaa ang gugma

dunay mga manghitabo
lamang
sama sa mga panghitabo
dili na hunahunaon kon 
ngano kon unsa
gibuhat na lamang
unya wala nay usikan
pa nga pulong

gilubong ang kaadlawon
gitago sa mga init pa nga
habol 
didto sa usa ka lawak
sa usa ka
kabuntagon

usahay magkahinagbo ang
mga tutok
magkasinabot sa usa
ka pagtipig gamay na
lamang nga
nahibilin nga pagpakahilom

karong gabii
sama niadtong miaging
gabii
gihandom na usab ninyo
ang pag-abot sa
daghang mga bitoon
sa dakong wanang sa
kangitngit sa matag
kaugalingon

unya ang plastada sa kutsara layo na usab sa usa ka tinidor.

dinhing lugara
wala nila gihunahuna
kon unsay gamit
sa usa ka butang
kon unsay tumong
sa hunahuna
kon asang dapita
ang pagkulang
kon kanus-a
ang paghulip ang
pagtapak sa
gisi nga panumduman

magkita, maglamanuhay
manugilon, mamati sa
sugilon
sahay anaa ang halok
ang gakos
ang hawid sa usa ka
panamilit

dinhing lugara 
andam ang tanan sa
pag-abot sa 
kataposan

kanang molarga ka
unya nanglantaw sila
unya wala kay gidala
bisag usa na lang
ka laing sapot gawas
sa imong gisuot

dinhing lugara namubo
ka sa mga tanom nga
patay na
gitikad mo ang dili na
imoha
gibiyaan mo ang 
pinuy-anan nga hangtod
karon matawag
pa nga imoha

wala na mahurot pag-inom
ang init nga kape
wala na matunga pa ang
pandesal

unya ang plastada sa kutsara
layo na usab sa usa ka tinidor.

natandog ang imong kasingkasing unya wala kay mabuhat.

usahay makita mo
ang pulos sa kagubot

ang gamit sa hait nga punyal
ang kahaw-ang sa palanggana

ang hardin nga walay buwak
ang dalan nga batoon

ang baybayon nga walay tawo
ang payag nga buslot ang atop

usahay makita mo ang gamit
sa pagkagun-ob

natandog ang imong kasingkasing
unya wala kay mabuhat.

panudya

miabot ang adlaw
sa pagpanudya

kahayag nga wala
lang, hangin nga 

amang, balas nga
sabaan, dahon nga 

galutaw-lutaw sa 
sapa nga uga.

walay hunahuna ang
pagsulat sa papel.

ang akong gilantaw

gilantaw nako ang
wala nimo mahibaw-i
sa kilid sa lamesa
samtang hinay natong
gihigop ang kape samtang
namati kita sa mga balita
karong buntaga
kabahin sa mga patay
kabahin sa wala pa nasakpi
kabahin sa mga layo kanato
kabahin sa 
makakutaw sa atong mga
kahingaw, kahadlok, kabalaka,
samtang gipapalong na nato
ang suga sa kusina
kay hayag na ang adlaw
sa gawas sa bentana

ang karon lamang

daghan ka
ug gikahadlokan
bisag unsa na 
lang
nalisang ka sa wala
pa diha
sa mga unta ug sa mga
basin

kapila ko ba ikaw ingnon
nga mas nindot ang
karon
tagamtama diha sa imong
dila
ipabilin diha sa imong
alingagngag
hiposo diha sa sulod
sa imong baba

ayaw ug litok bisag usa ka
pulong lamang
idapion ko ang akong duha ka
tudlo
diha sa imong ngabil

katulugon

diha sa mata
nga katulgon nangahulog
ang mga laya nga
dahon 
sa mansanitas didto
sa sulog sa tubig sa
sapa sa
katunggan sa sitio
sa olingan

SA IMONG KATONTO

walay pakyas ang
pag-awit sa mga kalanggaman
matag buntag
bisag wala ka pa mimata
sa tumang kabilar
sa atong gugma

walay pakyas ang adlaw
sa paghatag sa iyang kahayag
bisag naglunang na silang duha
sa sala sa lapokon nilang
gugma

(o gugma ba kaha kining
klaseha sa pagpangga diha sa
pagtago-tago sa paglantaw kon
aduna bay miabot
unya mitulod sa pultahan nga
walay trangka?)

walay pakyas ang paghulog sa
ulan
sa dihang bug-at na kaayo ang
dag-om
nga gihambin sa mga bukton
sa mga panganod

walay panahon nga mosulti kanimo
nga silang tanan
puros gipangkapoy
sa imong katonto.

tanghaga sa usa ka pagbudhi

ang mga kato sa iro
nangambak sa iyang lawas
paingon sa salog

ug nabibo kitag pamisat
tagsa-tagsa sa mga busdik sa
dugo

nagpasad ang kapula
sama sa atong giaanggaan ug
gugma

dunay nagmatag buntag
duna say durong tak-om
sa iyang baba
nag-ugom sa iyang dakong
sala

bisag sa usa ka gamay nga awit man lamang

ania ang paypay sa gugma
ang tungang kamot niini mao ang gugma

ikaw ang naa sa dapit sa tumoy sa walang
bahin, ayaw kog hisgoti ug gugma
kay wala kini didto

batia lamang ang hangin nga milabay
mihunghong gamay sa akong dunggan
wala na gani nako nasabtan
mihalok kadyot sa akong aping dayog
lupad palayo kanako

nahinumdom ka ba sa tamsi usa ka buntag
niana nga mibatog sa sanga sa bayabas atbang
gayod sa atong lawak?

kadyot ra kining mibatog sa sanga
wala gani kita kahinumdom kon milantaw kini kanato
nga hubos sa gugma

kadyot lang kini
morag tamsi nga mobatog dayog lupad palayo kanato
walay pananghid
bisag sa usa ka gamay nga awit man lamang

irong buang nga andam mamaak

sabaw sa akong
yahong ang
imong kabatan-on

unod sa baka 
ang imong katahom

saktos timpla ang
atong
panagsalo diha sa
usa ka kutsara

adunay nagtan-aw
nga gatabisay ang
laway

irong buang nga
andam mamaak 
sa tumang kasina

laag-laag lang sa kalag nga nangitag timbang

nakaadto sab
kos caminguin
didtos mga ang-ang
sa stations of 
the cross

kuyog nako ang
lakin-on nga pag-umangkon
sa akong 
masamong

pag-abot sa 14th station
hapit ko madakin-as
sa gilumutan nga ang-ang
dapit sa langob diin
kuno gilubong ang
atong Kristo

kon nadakin-as kaha
kog nahulog sa pangpang
dayog kamatay
daghan kahang malipay?

hinoon, sa laing bahin
dili to panahon sa semana santa
laag-laag lang
sa kalag nga 
nangitag timbang

diha sa kaguol nga paaron-aron

daghan kamo
sa sulod sa lawak

adunay
maayong moawit
adunay 
maayong mosayaw
adunay
mas labaw pas
labaw

apan walay bisag
usa kaninyo
ang mipasar

dayon ninyog
panggiaway
nagpatay sa kasina
gipanghaya
diha sa lungon nga
walay mga buwak
walay kandila
walay nangiyak
wala say nagdugay
diha sa
kaguol nga
paaron-aron

halad sa tanang kabuang

habog ang
bunga sa kahoy nga
nag-ambong sa
pangpang

dunay misulay ug
kuha
unya nadakin-as
sa danlog nga
sanga
nahug sa pangpang
patay

ikaw ang
nahagit busa sa
sayong buntag
gikatkat mo
ug gikuha ang
bunga
sa tumang kasayon

miingon ka
"ania na kanako
ang nakapatay
kanimo"

dayon nimog labay
niini
sa pangpang
isip halad
sa tanang
kabuang

kanus-a kaha?

kon walay nahitabo tali
kanato
wala ang balak karong
buntaga

hinoon sa akong
pagkahinumdom mas
daghan ang balak
kaniadto samtang wala
ka pa
samtang usa ka lamang
ka damgo

samtang anaa ka pa lamang
sa hunahuna
samtang usa ka pa lamang
ka hangin nga
misulay pagpalid sa akong
buhok 
nga nagsugod na ug
pakaulaw sa iyang
mga uban

ang nahitabo hinoon gusto
natong hikalimtan
diha sa makalibog nga mga
higayon

ang pagsulat mao ang pagbalik
sa mga nahitabo 
tali kanato
nga bisan dili na nato gustong
usbon
apan ang kagilok anaa 
nagpabilin gihapon
sa kanunay nagdamgo kon
kanus-a usbon

diha ta magkasinabot

lahi ang kalipay sa
kabaw
lahi sab ang sa langaw

palihog ayaw ug
katawa
palihog ayaw siya
suraha

lahi ang kalipay sa
tamsi
ug sa uwak
bisan pareho silang
pak-an

bisan gani ang itom
nga uwak aduna may
tinagoan nga
kaanyag nga wala
sa uban
diha sa gibantog nga
salampati

lahi ang kalipay diha
sa kahilom
lahi sab ang kalipay diha
sa tumang paghudyaka

adunay dili ikapanugid
adunay iligid-ligid

lahi ka lahi ko 
diha ta magkasinabot

ang mga palad sa paypay

daghan ang mga palad
sa paypay sa babayeng 
nangalimyon sa 
hinulaman nga ilang-ilang

ganahan ko ani ganahan
sab ko ato
nganong mangutana pa
kon ngano

ang gugma sa asawa 
gugma gihapon kana apan
lahi usab ang gugma ko
kanimo

sama sa mga palad sa
paypay
silang tanan baya puros
man kalipay

unsaon ba pagkasayop
nimo sa gibating kaanindot
diha sa pagbayaw mo sa
kinatas-ang pangpang sa
langit


dili ba god ikaw man
 ang miingon nga
didto nakita mo ang nawong
sa Diyos

ang uwak ug ang ulod sa nahinggan nga saging

miawit ang uwak
sa kahinog sa saging

gitusak sa iyang hait
nga sungo ang panit

gikulinitan ang 
tam-is nga unod

ang ulod sa kilid sa
dahon

nag-antos sa iyang
kayabag

mikurog sa kahadlok
mitago sa kahilom

ang mga kamaong maningkamot

unsa ba ang anaa kanimo
o, patay nga kahoy?

nganong nag-inosara ka man
sa imong kamingaw?

dali diri, pagkamananap
paduol kanamo

kami ang mga ginganlag
mga hayop, mga mananap

dinhing dapita sa tumang 
kalipay, nanagshagit sa

gibating kasakit, nabibo diha
sa among kadaghan

dali, pagdali, tipon kanamo
nga nagmugna ug mga tiil

nga nanahon sa mga kamot
nanaghalok sa among binuhat


nga mga ngabil, nagpalami sa
among bag-ong mga dila 

nanginit ang among mga dughan
sa giimbinto namong mga atngal

alang sa mga wa na ganahing mabuhi

sa nahanaw nga damgo
sa mga wala makab-ot

sa tanang wala natilawi
sa mga panahon nga laay

sa naguba nga pagkalambigit
sa natipak nga mga pagbati

anaa ang mga naghangad
ang mga nag-ampo nangaliya

sa hagbay rang mga patay
sa mga matang nagsulirat

sa mga tuod sa sapa sa mga
naglutaw ug gianod nga kahoy

karon manabat kami sa laing haya.

ania ka karon
dinhi
magdugay ka ba?

dili.

sama kanila
miabot ka
unya pagkaugma 
wala na

magdugay ka ba?
dili

sama ka sa alibangbang
karon lig-on ang 
pako

milupad sa makadyot lamang
dayog kahulog

mikatawa ang hangin
kay kulang ka sa pagsalig
sa madungog
ug sa dili makita

ang mga talagsaon
kaniadto
kasamtangan na lang karon

ang mga dili mo
katuhoan
natuhog na pag-ayo
karon

nahisama sa mga barbekyu
nga halin kaayo


nagdugay ka ba?
wala

karon manabat kami
sa laing haya.

samin sa samin

ang tabon sa nawong sa kangitngit
mao man usab ang kangitngit

nga sa hinay hinay imong gitangtang
sama sa pag-abot sa kahayag sa usa ka
kaadlawon

nagpaabot ako ug miabot kini
sa usa ka kahingangha nganong nawong
ko man kini nga nagpakaita kanako

daw samin sa samin
daw samin nga nanamin
ug nahimong usa kini ka panon sa
mga tamsi
diha sa sanga sa kagabhion

mao kini ang kasakit sa pipila ka kalipay
nga giihap sa imong mga tudlo
mao kini ang balay sa imong balayan
nga imong giabtan nga imong gibiyaan
nga imong gipuy-an dayog 
damgo nga unta kini mahanaw

gisabot sa adlaw ang wala mo pagkakabana sa iyang kahayag

ngano bang
ang gipakita mo kanako
mao man ang
kasuko nga mitago sa
imong kagabhion
diri kanako?

usa ako ka buntag nga
walay mata
dili ko na makita ang
tinood bahin
kanimo

ngano ba nga gihikaw mo
ang kalipay sa
aibangbang?

unsa bay anaa sa pako
nga imo man kining
gikasilagan?

usa ka bata nga nagdula
sa balas sa
baybayon

gisabot sa adlaw ang
wala mo pagkakabana sa
iyang kahayag

misabot ang mga bitoon
sa wala mo pag-ambat sa ilang
kaanyag

misabot ang tubig sa kagagmay
sa imong lapa-lapa nga
nagtampisaw sa iyang
kabugnaw

dili na magpaabot ang 
kalibotan kon anus-a mo
masabtan ang kaanindot
sa iyang gugma diha
kanimo

molabay na ang mga 
panahon
nalaya na ang buwak
nalata na ang mga dahon
nahugno na ang balay
nga gilamoy sa bansagon
sa mga balod sa
baybayon

ang gugma mohatag lamang

ang gugma dili
manugilon
kon giunsa

ang kalami nga
natagamtanaman
dili mo
mapanabi

ang dughan wala
nay kasudlan sa
kalipay

ang gugma dili
maningil

sigi lang kining
panghatag

bisag sa sulod sa
dughan

wala nay nahibilin
kondi ulat na lamang

ang atong karon

walay makatubag sa tigmo
ikaw lang
ayaw kini ipanghambog
kay gitudluan ka lamang

nako usa ka gabii niana
samtang ang bulan gidaman
samtang kadtong gilubong
pila na ka tuig nga milabay
mibangon

ikaw lamang ang nahibalo
sa tubag niini
palihog ayaw kini litoka
usa ka pulong lamang
magun-ob ang tanan kanako

ang akong kagahapon ang
akong ugma
ang atong karon

B U T B O T

BUTBOT

pagahikit-an kini’s binuhat nga dili mahutdan, pagpanghambog,  kanunay niyang iuran-uran,

sa tubaan, kadalanan ug pundok sa mga mat-an, 

pamutbot, madayag sa pamaba nga pasubraan,

 butbot makapauknol ug makapadpad sa nakasabot,

may ngipong magpangagot, may magbagutbot,

timaan kini sa kaespeso sa  daghang butbot,

sa lawas, ang butbot magdala'g kahapdos ug singot...

likay-likay

nagtalikod ang gugma
nangamuyo ang usa
mihalok sa liog unya
ang usa wala milihok

miatubang ang gugma
nagpiyong sa mata
mihalok ang usa sa
ngabil nga dili monganga

mao kana ang nahitabo
tali kanato, pila may sugilon
mubo lang ang kalipay
diha sa likay-likay

simang nga lawas

nabanhaw ka man
sa akong damgo kaganihang
kaadlawon

gihawiran mo ang akong kamot
mipahiyom ko
gihagkan nako ang imong
ngabil
dayon nimog katawa dayon
nimog kawala nga morag
gapnod sa kilid sa bungtod

dunay wala mahuman
dunay kadena nga naputol nga 
wala pa gayod hangtod karon
nasumpay

dunay buwak sa tunga sa hardin
sa akong kasingkasing nga
wala gihapon malaya

kon magkita kita pag-usab
duna koy isugilon kanimo nga
maoy maghatag ug dayong pahulay
sa atong duha ka kalag

simang ang akong lawas
morag agianan nga miadto sa pangpang
unya nanambo sa mga panganod
wala na mibalik

alang sa usa ka pagdili

unsaon ba nimo
paghimo nga ang humba
mahimong usa
ka maanindot nga 
balak?

una  patyon mo ang
baboy
hiwahiwaon mo kini

sunod imo kining
adobohon
kanang tikig na gayod
nga mora bag
nawala na ang tanang
mantika sa iyang
tambok ug unod

pabukalan mo kini sa
tubig, sagol na ang asin,
gamayng asukar,
mga panakot
ug uban pa sumala sa
imong panglasa

pagkaitos na niini
ibutang mo ang humba
diha sa yahong
dayog sukad nimo niini
sa lamesa

ayaw ug kan-a ang 
imong giluto nga humba
bisan pag maglaway ka
bisan pag gutom ka na
kaayo
bisan pag imo kining gasto
bisan pag imo kining
hinagoan

ipakaon nimo nila ang
tanan
unya dili ka gayod binlan
bisag usa ka got
lamang

manghugas kas ilang
kinan-an

mosulod ka sa imong lawak
nga gutom
nga mora kag gidaug-daog

kay diha sa pagdili sa imong
kaugalingon
nahimong balak ang humba

makapangutana ka sa imong
kaugalingon
naunsa ba ako? 
nganong gipili ko man
nga ako
dili mabusog

dili magmalipayon?

ang bag-ong unggoy

ang unggoy sa lasang
nangayog usa ka kalipay

ikaw nga maalamon 
mikutlo sa usa ka hinog nga
saging

ang maldito nga unggoy
wala miyango

kon imong lantawon 
anaa nagdukoduko

dili motingog 
kon kuhiton dili molihok

unsang unggoya kini 
nga nakat-on 

dili tanang unggoy baya
matod niya

dili tanang unggoy baya
gibalik  niya

sa saging malipay.....

lahi sab ka

i

gihatagan ka niya
ug usa ka bakid nga
bugas

ii

kadako sa imong ngisi
kadaghan sa imong
pasalamat

iii

adunay nasaag nga
buang nga nangayog
bahaw
imo man laging
gibugaw?