wala ka gayod manugilon.

dali ra makita
nga kini balikwaot
gani ang lansang lisod
mga maatikan kon unsa
ang iyang relasyon
sa tinuhuan
kon unsa ba ang ginoo
sa bato diha sa imong
kiliran

ang hunahuna kapoyon
busa dili mangambat
kon nganong natuali
ang lingkoranan ug
nganong ang hubog 
nabuntagan man sa
tunga sa karsada nga 
maoy gilikayan sa mga
sakyanan

aron pagyagyag sa
tanan bisan unsa na 
lang ang ipakita ug
ibutang diha sa lamesa
anaa ang tyorka sa 
bisikleta nga gibitay
sa kilid sa kamalig 
aron dili maulanan
unya walay ganahan nga
mogasto aron kini
modagan pag-usab

anaa ang ihi sa iring
sa kilid sa pultahan nga
nagsigig syagit aron 
mabantayan sa kasuko
apan mingaw kining
balaya diin ang tanan
gustong mobiya aron
makita ang kalipay sa
laing pultahan

gusto man gud nimo nga
ang tanan dunay hinungdan
nga kon buhaton ang usa
ka laraw kinahanglang adunay
igong katarungan

wa ka ba nasayod nga ang
mga dahon mangahulog lang
bisag walay nanguhit sama
sa mga hinog nga mangga
nga bisag wala tandoga sa
hangin anaa nangaatak lang
ug ila?

ang kasubo sa tawo hangin
lang usab sama sa kalipay
nga milabay lang diha sa aping
ang tanan lumalabay
ang tanan mawala
unya ikaw sa ilang tan-aw
anaa nagnganga nagtanga

sulod sa imong dughan 
wala kay  kiber, walay
mapa, walay adtoan, apan
puno sa kalipay, unya tungod
niini, wala ka gayod manugilon.