gipangita nimo ang kalinaw

gipangita nimo ang kalinaw
mao kana ang akong nadungog sa imong mga hunghong didto sa hangin
matag gabii matag kaadlawon

gihandom mo ang baroto nga nagpaabot kanimo
unsa ba gayod ang iyang gisaad?
wala niya gisaad ang mga pako sa kalanggaman
wala niya gihalad ang kahomot sa kabulakan
apan misugilon ka
nga andam na ang tanan og wala na'y makapugong pa kanimo

mobiya ka na dinhi og kaming nahibilin nagpakahilom lamang
kay kinsa ba gayod ang makabuot kanimo?
panahon na ang pagtugyan kanimo sa imong gipangita
dili ka namo pugngan kay ang mga bukog sa imong mga tiil
haskang lig-ona na

lakat sa dalan sa kinabuhi
og kon unsa man ang imong dangatan
ayaw kalimot
ang atong balay adunay mga kamot nga andam gayod sa pagdawat kanimo
kon ugaling mobalik ka man nga pakyas
kon ugaling mobalik ka man nga buhi.

ang pagdawat sa kamot sa usa ka puya

ang pagdawat sa kamot sa usa ka puya
diha sa imong mga kamot nga kunot na

ang pagbati sa gagmayng mga tudlo
diha sa dagko og lalom nga mga linya sa imong palad

ang panagtakbo sa humot og sa gahi
ang pagkabaga sa kubal og sa katig-a na sa kasingkasing

mao kana ang akong giingon kanimo nga wala nimo makita
mao kana ang hulagway sa usa ka paglaom

tutuki pag-ayo og kon mahimo hikapa pag-usab
pangitaa ang mga butang nga hagbay ra nimong gikalimtan

panamilit sa usa ka tigulang na nga rebelde kaniadto

sa una sa akong kabatan-on
sa nag-eskwela pa ako sa kolehiyo
kon aduna ako'y makita nga sayop
dili gayod nako katulgan
kay ako gayod nga korehian

panahon kadto sa idealismo
ang pagtug-an sa tinood
og ang pag-usob sa angay gayod nga usbon

miabot gayod ang panahon
sa pagsaka sa mga bungtod
og pagtago sa mga kabukiran
aron lang makuha ang saktong kausaban
anaa didto ang pagsupak
og ang pagsukol

miabot ang pagkahinog og ang pagkaluya
ang kalayo sa akong dughan napalong na
og ang tanang gusto na nga mopasilong
motidlom
og magpuyo na lang nga malinawon
og mismo sa sulod sa atong panimalay

makita na usab nato
ang mga sayop nga angay usbon
apan miabot na ang panahon sa katapol
og nabuntog kita nianang pagpasagad na lamang

gipasagdan ko na ikaw
bisag unsay imong buhaton
og dili na ako mangilabot pa

moingon ka nga kini ang mahitabo
tungod kay wala na kanako ang gahom

sa ginaingon ko gipasagdan ko na ang mga umaabot
og ang mamahawa

mokatawa ka nga naghawid sa gapos og sa timbangan
samtang ako naglingkod sa akong bangko
mipatong sa akong tiil sa lamesa
og mipiyong sa akong mga mata

kuhaa ang tanan kanako
kay andam na ako sa usa ka pagpanaw
magpahilayo ako kaninyong tanan

maayo unta og duyugan na kamo sa maayong kapalaran

Ang Maglalangyaw

Bug-at nga desisyon ang gipili
Aron maharuhay ang kinabuhi
Bisan kamingaw ang maong bugti
Molampos lang sa gilatayang pisi.

Ang mga gibati sa kaugalingon
Kini dili nimo panumbalingon
Alang sa imong mga biniyaan
Antoson mo nalang kining tanan.

Nahisama ka sa usa ka piniriso
Didto sa dakong hawla nagpuyo
Uhaw sa duaw sa mga mahal mo
Mainit nga pagbati nga daw kalayo.

Sa pag-inusara mo sa kagabhion
Ikaw nag-ihap sa mga bitoon
Dungan sa pagkislap ikaw miingon
Usa kaninyo ako rang maangkon.

Dili gayod sayon ang imong pagbiya
Apan kalisdanan ato lang ibaliwala
Pag-ampo og ang Diyos ang bahala
Inubanan sa kakugi og mga paninguha.

Dili tiaw-tiaw ang paglangyaw
Hataas nga dalan imong ginalakaw
Madag-umon man ang imong nahagdaw
Malantaw mo ra ang bidlisiw sa adlaw!

sa pagpanglaya sa mga sagbot

miabot na ang pagpanglaya sa mga sagbot
nianing panahon sa tumang kainit
ang mga pyuos dili na mamahimong mga bulak
kipot ang ilang mga ngabil
og mangamatay sila nga dili na makabungat
sa ilang mga pulong nianang pagpamusyak

ang akong gikahadlokan basin moabot na usab
masirad-an ang pultahan og wala na'y mangabri
dili na ako mangutana pa
dili ako manuktok
dili sab ko motingog.

tungod kay naghandom og Tanduay

kagahapon didto mi sa beach sa Olingan sa usa ka imbitasyon birthday man god sa akong pag-umangkon
tua didto si Manong Boy ang among silingan
nga maestro sa bungsod
og tua usab si Manang Gloria nga iyang asawa
nga negosyante og bugas

nagsugod ang mga sugilanon
kabahin sa panag-away sa pagbahinbahin sa katigayonan
sa mga ginikanan nga nangamatay na

ang akong manghod nga si Dodong Awo
wala na magtingganay sa akong magulang nga si Betty
kabahin lagi sa abot sa basakan

og kining among mga silingan nagtoo
nga natawo ako karong buntaga lang
nagsugod ang sugnod nianang ulog-ulog
nga morag dili ako masayod

mihirit si Manong Boy
nga ako swerte nga nahimong abogado
kay gigasahan sa kaabtik sa hunahuna
sa Ginoo

nga ako labaw nga giswerte sa akong napangasawa
nga hilabihang datoa
nga ako ambongan
og adunahan
nga ako ligdong
nga ako buotan
nga ako manggiloy-on
nga ako hilomon
nga ako na kuno ang mamahimong sunod
nga mayor dinhing lungsora

nagpaabot ako nga mahuman siya
kay si Manang Gloria morag mohirit pa
apan akong gihimong mubo ang estorya

"Palit dugang og Tanduay pulo ka par"
alang kang Manong Boy og Manang Gloria
nga karon haskang huboga na baya
og dayon nakog lakaw pauli sa amoa.

Usahay ang ulog-ulog atong pauyonan
dayon atong tugbangan nianang pagbiya,
tubag sa ilang mga sala.

didto sa daplin sa baybayon

usa ka hapon niana napadpad siya sa iyang kasubo
didto sa daplin sa baybayon
nag-inosara lang siya didto
og siya lang ang nasayod
sa tinood nga hinungdan
sailang panagbulag

milingkod siya sa dakong bato
nga kanunay nga gisagpa sa dagkong mga balod
nakita niya ang tumang kasuko sa dagat
og ang kalig-on og katig-a sa mga bato didto

gisugid niya ang tanan sa miabot nga hangin
og dayon sa pagkahuman na
milakaw siya pauli sa ila

nangiyak ang mga kinason
og miundang sa pagdagan-dagan
ang mga omang
ang mga dahon nangahulog
og ang mga balas nangahilom.

Mikalit og kalinaw ang baybayon
og ang mga dagkong bato naghinuktok

sa dihang miabot na ang kahayag sa kabuntagon

sa dihang miabot na ang kahayag sa kabuntagon
naulaw baya ang kangitngit og kini mipahawa
daghan ang nahibilin nga sugilanon
apan wala na kini gipamati sa mga dunggan sa kahayag

ang kayayag nagdala usab sa iyang mga gasa
ang awit sa mga kalanggaman
ang taghoy sa mga kakahoyan
ang mga sitsit sa mga balod sa dagat

anaa ang mga agik-ik sa mga batang
nagdakpanay sa daplin sa baybayon
anaa ang mga hunghong sa naghinigugmaay
anaa ang serbato sa barko nga miabot sa pantalan
anaa ang haguros sa eroplano nga milupad padulong sa langit

naglingkod ako silong sa punoan sa pitogo
nagharayharay sa kabugnaw sa hangin gikan sa baybayon gituman ko lang ang saad sa akong kaugalingon
nga hikalimtan ko na ikaw og ang tanan bahin kanato

unyang hapon mobanos na usab ang kangitngit
dalhon niya ang mga bulok sa pagsalop sa adlaw
mangahilom ang mga kakahoyan og kalanggaman
mawala ang mga asul nga panganod
og ang mga agik-ik sa mga bata nga nagtampisaw
sa daplin sa baybayon motapig na diha sa ilang paghinanok

sa katulugon duyugan ko ang salumsom,
ipiyong ko ang akong mga mata
og tagboon ko ang akong mga damgo
og didto sa usa ka hinanok

maningkamot ako nga mabuhing malipayon nga mag-inosara
dili ikaw alang kanako, og dili ako mamugos nga morag bata.

BIR

ang bir dong di sama sa babaye
nga imong iyarok ug dayon
imong isuka kon di na nimo kaya
di lang molami tungod anang
chicharon nga gikan sa Carcar
ug bisag apilan pa nimo
og barbikyo nga gikan sa larsian

di lang ni pagaan sa imong mga suliran
di ni makapahinay sa imong kaunoran
di makapadasig aron ikaw matabian
di makapatay sa imong atay
di makahubog hangtud sa kahangturan

kay ang babaye di paliton
kini gigama aron higugmaon

sa atong mga mata kita mag-ila

daghan kitang ania dinhi
nagpuyo sa lain laing lawas
nga usahay wala nato mahimong panimalay

og ang atong pagpuyo
dili mabati nga harohay,

gibati ko ang kalooy sa akong nakit-an
og nahikapan
og gusto nakong ihatag unta kaniya

ang angay kaniya
ang iyang katahom
ang iyang mga pilok nga morag mga balod sa dagat
nga nagmalinawon

gusto nakong ihatag kaniya ang mga katarungan
nga ako dili angayan
nga magpabilin diha kaniya

gusto nakong biyaan
ang akong gipuy-an
aron masulod diha ang mas makapalambo kaniya

apan lisod sabton
ang atong kahimtang

usa ka lawas lamang
apan morag daghan kaayong mga tingog
mga hunahuna usahay
nga dili magtukma
nga mora ba'g

ako dili ako
nga nakigsandurot kanako,

naglakaw kong nag-inosara
nangita usab kaninyo
nagtinan-away ta
gustong makighawid sa atong mga kamot
og maggakos
isip mga igsoon

apan lahi ang atong gibuhat
nagtagbo lang kita
miando ka og miando usab ako

og dayon nato'g lakaw
paingon sa managlahing dalan

ako diri, ikaw diha,
adunay kahilom
wala ang pag-undang

adunay nagtakbo
apan wala ang pakighinabi

migakos ako sa akong asawa
sa mga kamingaw sa akong kagabhion
aduna ako'y nahinumduman
gusto nako untang isulti

apan hapit na mahuman ang tanan
gamay na lang ang daganon sa mga takna
misalop na ang adlaw
og wala nay kapuslanan ang mga pulong

miabot ang mga kabuntagon
apan wala na nako higugmaa ang iyang kahayag

ang nahibilin

dungan kitang miabot dinhi
apan ako na lang ang nahibilin

sama sa mga tamsi kamong tanan
nagdungan og pagpanglupad
mora bag nagsabot nga inyo akong
biyaan og sa unsang katarungan

hangtod karon ako wala gayod masayod.

sa daplin sa baybayon hubo ang akong
mga tiil nga nagpabilin sa akong mga tunob
sa puti nga balas og ang mga dila sa balod
nagsunod aron kining tanan mapapas

nagpadayon ako sa akong lakaw og wala
maghuna nianang pagpahulay

sa unahan adunay mga anino nga buot
usab nga papason sa pag-abot sa kabuntagon

mibiya ang tanan kanako og ang hangin miawit
og ang mga bato sa kiliran sa pangpang mitutok kanako

wala ako'y laing kasugiran sa akong mga sugilanon
ang mga kahoy nakigsandurot sa mga panganod
ang mga suba nakigsabot nga makigkita sa dagat
sa baba sa mga bukana og ako karon ang nahibilin

sa kataposan gisuginlan ko ang akong kasingkasing
sa nahitabo kanako og ang akong dunggan namati

usa ako ka bulan nga karon nanag-iya na sa akong
kaugalingong kahayag

dili mo na ako mapalong og dili na ako motingog.