Balaki ko

dili pa paigo ang kalawom
sa tubig sa sapa
lumsan ko unta
ang akong mga kasubo

sweet ginams

dunay tahas ang
sweet ginams nga giparisan
sa inadlip nga hilaw nga
mangga

sa silong sa punoan sa
starapple

nagpatulo ta
sa atong mga laway

rayna rayna sa barangay Ogay

nadungog na nako
kon unsa ang rayna rayna
sa barangay Ogay,

gilok ingon siya
kay medyo hilas

apan miingon baya pod ko
og "sagdi lang
moabot ra puhon ang
iyang tingog"

kanang tingog gikan
sa lalom nga
atabay

tibuok, tul-id,
og dili hagawhaw
kanang awit sa kagabhion
nga gilamdagan sa
usa ka bitoon

kanang walay banda
kanang giduyugan lang sa usa
ka taghoy gikan sa
nagkurog nga
ngabil

Pasaylo ug Pagsalig

Pasaylo ug Pagsalig
by Genamos_US of Washington, DC USA

Ikaw ang nagtukmod kanako
Nga tukoron pagbalik ang haligi ning atong gugma
Sa nangagusbat kung kalibutan
Nga napuno sa kamingaw
Nga andam gam-on pag-usab
Kadtong atop sa atong pagsalig
Ning nagduhiraw tang kasingkasing
Nga puno sa kahigwa-os ug kasakit

Kining atop ning pagsalig
Maoy kini andam molandung kanato
Sa matag bundak sa uwan og taligsik
Sa kalisdanan ning kinabuhi
Buhi-i kanang mga kabalaka ug kahigwa-os
Sa imong kasingkasing ug hunahuna
Aron mo ako masabtan ning akong dughan

Bisan pa kini nahunlak ang pondasyon
Sa atong gugma sa niaging panahon
Tugoti kining akong dughan sa tumang kahidlaw
Sa pagsangyaw pag-usab
Sa gugma ko kanimo
Nga walay pagkapalong
Paminawa kining mga tinagoktok
Sa akong kasingkasing sa kanimo gihidlaw
Abilihi ug dawata kining akong dughan
Sa walay pagduha-duha akong pinili

Akong ikulit kining tim-os kung gugma
Sa dagway sa langit
Ug andam ko kini banhawon
Ang nahikatulog nga pagbati
Nibalik ako aron sa pagtuman
Ni-adtong pakyas nga mga saad ug panumpa
Nga dugay nang imong gikalimtan

Dili ko itogot kining higayon
Nga buhi-an ang kamot sa gugma ning akong dughan
Sa pagkalagas ug pagkahanaw
Dawata kining akong pasaylo
Sa nabuhat kung kasaypanan
Bisan pag imo kung lumsan
Sa imong mga hilak og danguyngoy
Andam ko kini pagkabasulan
Ug dawaton sa walay pagmahay
Kay mao kini ang bugti sa lingla
Ning masalaypon ug nahisal-ag kung pagbati

ikaw kini
pagkabalod sa imong mga pilok
morag duyanan sa akong
mga damgo

sa nanghinambid mo nga paa
ako maluya
sa puti mo nga panit
ako moinit
mora akog iro nga
nagpatulo sa akong laway
diha sa akong mga tiil
samtang naglantaw
kanimo
O kaanyag

ang imong mga ngabil
naghatag kanako og mga kauhaw
nga dili matambalan sa
tubig sa mga katuigan

ang imong dughan
nahimo kong sumbanan sa
akong mga balak
og ako nahimong bata nga
gustong mosalom
sa tin-aw kaayong dagat
sa kabuntagon

ayaw pagsalig nga ako
naibog kanimo
ayaw kataw-i ang akong
kahigwaos nga
unta ako makadulog kanimo
aron akong maangkon
ang tanan kanimo
bisan sa hamubong panahon
lamang

ibutang ta nga ang tanan
nahimong irong buang tungod kanimo
og maapil mo ako
sa ihap sa kitoy sa imong mga tudlo


apan adunay dili mo makuha kanako
usa ka butang nga dili mo
gayod mahangyo

pangutan-a ako
kon nahigugma ba ako kanimo?

nagdamgo ko
sa udtong tutok
nagdamgo ko
nga sulirat ang akong
mga mata
sa akong kahaponon
nagdamgo ko
sud sa akong damgo
nga ako
nagdamgo lamang
nagdamgo ko
bahin nimo
nagdamgo ko kabahin
kanato
nagdamgo ko nga nagdamgo
ako bahin kanako

pagkapait kay bisan og asa
niini
wala gayoy bisag usa nga
nahimong tinood.

nagdamgo ko og hangin
nagdamgo ko sa dili makita
sama sa hangin
nagdamgo ko sa dili mahikap
og ang mga mahikap
nahimo pa man ganing mga damgo
nagdamgo ko sa mga walay
katumanan
sa mga walay kamatooran
og kining tanan
sama sa panahon nga gipalid
sa hangin
nanglabay lamang

miingon ka nga ako
bakakon
nga ako ang miingon nga bisan
asa niining tanan
wala gayoy natuman

ikaw ang nagdamgo.

sa suba nga bugnaw

gusto nila nga kita maghubo
sa tanang tang sapot
aron maligo kuyog kanila diha
sa sulod sa suba nga
bugnaw,

daghan ang gustong motan-aw
dunay uban nga namugos og ikaw nga
wala na mogamit sa imong hunahuna
gawas lamang sa kaubos sa imong
kasingkasing
mihatag kanila sa ilang gusto og imong
gihubo ang imong sapot

og nakita ka nila
sa imong tinood nga panit
ang imong balahibo ang imong
pusod ang imong ilok
ang tanan tanan gayod
nga kasagaran ikaw lang og ang imong
samin ang suod

morag naulaw ka gamay
apan imong gitulon ang nagpahipi mo
nga garbo
tungod og alang kanila
nga misaad nga ikaw og sila
usa ra

pagkabugnaw sa kagabhion
niadtong higayona og sila nga
mitutok kanimo
nanag-inom sa ilang mga init
nga kape
og nanagtapis sa ilang mga habol
og nagputos sa ilang ulo
og mga tiil

ikaw lang ang nag-inosara sa
imong pagkahubo
nahisama ka sa usa ka Kristo
paingon sa imong kalbaryo
aron kaha ilansang sa krus

apan mipasalig sila
nga sa kataposan sa pagkakita sa kamatooran
wala kay kabilinggan
og wala kay angay nga kalisangan
kay anaa ra sila sa imong tungod
og andam nga motabang

og miingon ang ilang hawod nga
panahon na aron maligo ka
sa bugnaw kaayo nga suba

og mitoo ka
kay nahadlok ka sa imong pag-inosara
sa pipila ka tuig

og miambak ka
naligo sa bugnaw kaayong tubig
didto sa lapad kaayo nga suba
diha sa kangitngit sa imong kagabhion
nga walay bisag usa man lamang
ka bitoon didto sa langit

og mikurog ka
og giduaw ka sa nawong sa kamatayon
og milingi ka sa tampi
og sila nangatawa
o nadungog mo lang kaha
nagduda ka
kay sa tinood wala na silang tanan
nahibilin na lamang ang ilang mga tasa sa kape
og ang ilang mga habol nga bulingon
og ang ilang mga putos sa ilang ulo og mga tiil
nga mga laya na kaayong mga dahon

pagkabuang mo gayod
karon mag-unsa ka?
natambalan ba ang imong pag-inosara?
ikaw lang baya gihapon
og hangtod na kini sa kahangtoran
nagpabilin sila nga walay labot kanimo
og ang ilang gipiyal kanimo
mao lamang ang ilang
pagbiya

kon ugaling
aduna pa man gani nahibilin nga panahon
pahawa diha
sa bugnaw kaayong suba
og tagboa ang imong
kabuntagon
isuot pagbalik ang imong sapot
paugha ang imong mga buhok
og balik sa imong balay
lingkod sa kilid sa bintana
og pamatia ang kaanindot sa kaugalingon
nimong taghoy.

Panahon Sa Rosas

Panahon Sa Rosas
By Genamos_US of Washington DC, USA

Dili kini panahon sa tingtugnaw
Ang mga tinanom kung rosas nahanaw
Kay didto ko sa yuta gibutang
Basin naay nagbalhin sa ka-ang

Panahon karon sa pagpamulak sa mga rosas
Nagkadaiya ang ilang mga kolor sa walay kupas
Nindot nga mga talan-awon
Sa halayo buot kining duawon

Ang mga idlas nga mga bulak
Ning turok nga nagsubwak
Kay didto sa bungtod nagpauraray
Aron ang tanan walay magmahay

Ang mga managhigugmaay nikuray
Kay sa hinatag nga rosas sila nalipay
Bulak nga talagsaon
Sa mga estorya may sugilanon

Huni sa gugma gipabati
Aron ang tanan mamati
Kay adlaw karon sa kasingkasing
Ang uban walay nangulitawo nga nanampiling

nindot

sakto ka
nindot
saktos bulok
og barog

kabalong moabre
ang mga bintana
og kamaong manira
ang pultahan
sa saktong panahon

daghang mohangad
aron molantaw
apan sa kadugayon
sa higayon
diin nabati ang mga
pung

hingpit na unta
apan kuwang
sa unod

nindot apan
huyang
saktog barog
apan
hungaw

ayaw paghandom
sa hingpit
kay diha ka
mapilit

ang worrier

matag adlaw
nanampiling
nagproblema sa
mahitabo sa iyang
kwarta
nagduda nga
gilimbongan siya
nagplano nga
magpataas sa iyang
pader
padugangan ang
security
og makigkita
sa iyang mga abogado
kay duna na usay
paylan og kaso

sa tinood lang
di ko ganahan
aning tawhana

kapoy
ikaestorya!

ang akaong bag-ong avatar

sulayi kuno og pangita
kon unsa ang naa sa likod sa bangas
ang sud sa baba
ang gitabonan sa
sunglass
ang unahan sa gadangas
nga agtang
ang gitabonan sa itom
kaayong buhok
ang sulod sa akong
utok....

dili pa hinog ang panahon

mahibaw-an mo kana
sa dagan sa panahon
walay dala alang kanimo
bisag usa lamang ka buwak
sa aswete

apan ayaw kabalaka
hangad lang gihapon sa langit
og diha sa panganod makita mo
ang iyang mga larawan
nga naghandon gihapon
kanimo

hangad lang
og kon ugaling ang ihatod kanimo
mao lamang ang ulan
ayaw lang gihanpon kabalaka
hunahunaa nga
pinaagi niini
nawala ang mga dag-om

nga oran-oran mopuli
ang kahayag sa adlaw
og ang maanindot nga bangaw
nga nagsumpay sa
duha ka lagyong mga bungtod

hangad lang
laomi ang langit
ayaw og tan-aw sa lapok nga dalan
og diha sa tumang kangitngit
sa langit
sa imong kagabhion
pangitaa lang gayod gihapon
ang matood mong
bitoon....

si bart nakat-on og binisaya

og ang iyang
unang nahibaw-an nga
expression mao kini:

"nawong mo
lubot ko ra!"


nanaghan na sab
ang mga barts sa pilipinas
di papiri
duna'y dignity
di palupig
kay og si nora aunor
pa:

"my brother is not
a pig!"

ang brayt nga iring

kamaong motago
ang kabrayt sa iring diha
sa iyang
pagpakahilom

nagtindog lang
unya ang mata
nga sipat
morag plaslayt diha
sa kahayag

pagkdaghang pinocchios didto sa party

nagpatas-anay og mga
ilong ang
mga nagsosyalan didto
sa party ni Sarah

abi nako og
usa ray pinocchio
haskang daghana man diay...

Buhata ang tinood

Buhata ang tinood
By Genamos_US of Washington DC, USA

Buhata ang tinood
Ang gibati ko nag-aginod
Sa akong ngabil
Mga pulong daghang pasangil

Dili ko makahukom
Sa hunahuna dili haum
Bisag unsay isulti
Dughan ko nasikwati

Nagkadaiya nga hunahuna
Sa mga panglantaw nagpakabana
Dili unta kini dugayon
Ang taak dali nga subayon

Ang maayong higala
Tinarong ang kawsa
Aron sa pagtabang
Sa tim-os nga hinabang

Busa paminawa
Karong panahona
Ang adlaw nagkatawa
Kay sa gugma nagkahiusa

Dili Ko Masabtan

Dili ko Masabtan
By Genamos_US of Washington DC, USA

Ang tanan napugos sa pagpakisayod
Sa mga kalisdanan nga akong giguyod
Dili ko buot unta hilabtan ang pag-ugkat
Sa mga panghitabo nga ako nakurat

Kon dakong buhi pa gyud tong pagbati
Ang pagbuot sa akong dughan nagpamati
Lisud tubagon kining kahimtang
Kay ang gugma nikalit man lang pagka-amang

Wala ko masayod kung asa ako mosulod
Kay sa kalibug ako gibanlas sa mga balud
Kung asa kini idunggo
Kining kasingkasing ko nagsubo

Wala koy laing dalan nga paingnan
Kung dili lamang sa langit akong kadangpan
Ang kahayag sa akong pangutana ako nang nakaplagan
Kay ang gugma sa Diyos maoy diay tubag sa kahangturan

Ug dinhi nikunsad ang kamatuoran
Ang tinood nga tumong sa kalibutan
Ang gahum sa hunahuna may utlanan
Kung ang suliran dili ko masabtan

Ikaw

Ikaw
By Genamos_US of Washington DC, USA

Ikaw ang makahatag kanako og kalipay
Kung ang akong kalibutan naputos sa biay-biay
Ikaw ang tingog sa sayong kabuntagon
Nga nagpukaw sa akong katulogon

Sa matag tam-is nimong nga pahiyum
Ang kalibutan ko naputos sa katahum
Ikaw ang tingog sa kahilum
Nga naghatag og kosug sa akong paglaum

Ikaw ang nag-inusara kung pagbati
Nga kining gugma sama kalid-on sa bahi
Nga may bili nga handumon
Sa kalipay nindot tagamtamon

Pasaylo-a ko usahay malitok ang kagahapon
Nga kining dughan ko usahay naulipon
Sa mga suliran ug pagsuway gihagit
Nga kanimo dili unta idalit

Kining tanan akong gibuhat
Sa pagpanalipod sa gugma naghulat
Ikaw ang akong kasingkasing
Sa kalibutan ko nagtuyok murag kasing

gihunahuna ko ang balak nga akong sulaton

sa dihang gisulayan ko ug han-ay ang balak
nahingangha ko
kay wala na kini nako makita
hanap na
naglibog ko kon asa ko sugdan ang tanan
mora bag nahimong singsing ang pulong
og dili ko na makita ang
sinugdanan og ang
kataposan
gipangita ko ang entrada sa pultahan
apan wala na kini
giputos ako sa kangitngit
nahisama ako sa usa ka lawak
nga gipalongan og suga
og sa dihang wala na ang mga tingog
sa tunob og sa mga agik-ik
mao na lamang ang akong nabati ang
mga gagmayng tiil sa mga uk-ok
nga mikamang
sa akong utok
gilok, medyo baho
apan buhi

unsa kaha?

unsa kaha
ang mahitabo ning blanko nga
papel nga akong gisulayan og sulat
sa mga pulong nga bisan ako
naglisod kon unsa ang akong ipasabot
ning akong
kawanangan?
unsa kaha ang posibilidad sa mga hunahuna
nga wala nato gihan-ay
kay sila ang miabot og
mohan-ay kanato?
unsa kaha kon ako mamahimong usa na lamang ka pulong
wala'y gihimo kondili mao na lamang ang pagtagad
sa dangatan kanako?
unsa na lang kaha kon ako usa na lamang ka blanko nga papel
nga imong kuhaon og imong
sulatan sa bisan unsa na lamang?

aduna pa bay dignidad ang pagpaabot?
aduna pa bay kahulugan ang
wala?

unsa ba ang mahitabo sa pulong
kon ikaw na ang mosulat niini?

kon ako wala na
og kon ikaw magtikaw-tikaw pa sa tungang gabii
sa imong kabalaka

Niadtong nilabay nga Pasko

Niadtong nilabay nga Pasko
By Genamos_US of Washington DC, USA

Niadtong nilabay nga Pasko
Akong gihatag ang kasingkasing ko kanimo
Pero sa pipila ka mga adlaw
Ang gugma mo nilupad ug nahanaw
Kay imong gibilin sa imong paglakaw

Karong tuiga, ako kining tapigan
Aron ihulat sa moabot nga katuigan
Ang nanga uga kung mga luha
Ako nga kining gikalimtan sa imong pagduwaduwa

Makadaghan nga higayon nga ikaw akong gihawiran
Nga kalimtan nalang ang mga nangagi nga suliran
Aron ang gugma bangunon pag-usab
Kining pagbati tang walay paglubad

Ayaw ihikaw kining higayon
Aron sa pagtul-id ning atong bulohaton
Kay pasko karon sa pagsaulog
Nga kanimo kini ipamalihog

Nanghinaot nalang ko kanimo
Nga sa higayon magkita atong mga anino
Dili mo ako talikdan pag-usab
Aron kining akong dughan dili manghuy-ab

Kay andam ko kini ihatag
Ang kasingkasing ko sa laing palad
Aron kini iyang dawaton
Ang gugma ko nga dili salawayon

Ang Gugma sa Pasko

Ang Gugma sa Pasko
By Genamos_US of Washington DC, USA

Sa Paskohanon yugto sa akong pagkabata
Nagsiabot nga gani ang pasko
Ang akong dughan nagpanikad naglagubo
Kay naputos ang akong hunahuna sa mga gasa og sinsiyo

Manuroy kami sa mga kasilinganan
Aron manaygon sa mga kabalayan
Apan walay makahulip sa kalipay ning kalibutan
Ang tingog sa pasko akong nadunggan

Kung atong aninawon ang mga panagway sa tanan
Napuno sa kilipay nga walay suliran
Kung atong sundan ang tunob sa Pasko
Ang kahulogan niini limpyo

Ang pag-atiman sa mga nanginahanglan
Maoy tinood nga mithi ning atong dughan
Bisag gamay atong pagpa-ambit
Walay igsapayan kay kini nalangbigit
Kay mao kini ang pasko nga hagit

Imong gugma, imong katawa, imong kaluoy
Nindot kini nga atong gipangandoy
Kay pasko karon ang tanan maghinatagay
Kinasingkasing mga gasa maoy itagay

Mainitong Pasko

Mainitong Pasko
By Genamos_US of Washington DC, USA

Dinhi ning among dapit
Ang matag tuig sa panahon sa Pasko
Amo gayud kining gipangandoy nga uwanon og snow
Bisan kini lisod matuman
Kay gipugngan man sa kapanahunan
Magsaulog mi sa adlaw sa kapaskohan puno sa kasadya
Inubanan sa giandam nga mga lami-an nga sud-an ug hudyaka

Bisag ang among mga singot nagbaha
Kay gipasilungan intawon sa kainit sa himaya
Walay igsapayan kung ang pasko init ang kahimtang
Bisan ang mga kaldero natulimbang
Kami Padayon sa pagpamaypay among mga silingan
Nga nagpunsisok ngadto sa mga simbahan

Bisan ang among kalipay gitapin-an sa mga panghupaw
Kay ang haring adlaw dili among ikaulaw
Aduna mi mga hawod nga paskohanong mga butang
Mga hayag nga suga, mga gasa, lantaka ug mga luthang
Amo kining giandam sa pagsugat ning kapaskohan

Pagkaanidot nga palandungon
Kining mga nindot nga mithi atong subayon
Ang mga nindot nga talan-awon
Ning dapit nga among gipuy-an bulawanon
Ang mga kalanggaman nagsiabot sa daplin baybayon
Aron pun-on sa katahum ang among pasko
Binuligan sa maayong mga sa sugilanon

Pagkaanindot gayud ning among pasko
Talagsaon ug simple nga pagpangandam
Dinuyogan sa maayong pagpamalandong
Ning mainitong Pasko among saulogon ang paghandom
Bisag pa ang idlas nga adlaw muabot ang pagkisdom
Padayon kaming tanan magpahiyom

Christmas Tree

Christmas Tree
By Genamos_US of Washington DC, USA

Christmas Tree, nagpangidlap sa kahayag
Naputos sa mga gagmayng bumbelya, init-init ug may dan-ag
Bililhon nga simbolo sa atong gugma
Alang sa panahon sa pasko ug kahingpitan
Magpakita sa matag kagabhion ang iyang kaanindot nga masiga

Sa matag mata makadayeg sa iyang katahum
Christmas tree, ayaw ako pakyasa
Ipakita ang imong tinuyo nga kaanyag ug korona
Ang anghel, bituon ug mga piraso nga masiga
Aron ang pangilin sa Pasko puno sa kamaya ug gasa

Kini ang imahen, dalisay, mithi ug hingpit
Alang sa paghanduraw sa Pasko mahigugmaon ug tam-is
Kay banaag sa dagway ni Kristo Hesus ang tinood nga tinubdan sa Pasko
Simbolo sa kaulay ug inosente
Nga walay mansa sa mga sala
Oh Christmas Tree, gihigugma ko ikaw
Ayaw intawon ko ikaulaw

Palad ba?

motu-o ka ba di-ay
nga ang kapalaran
sama sa tul-id nga badlis
nga daw udyong
nga moigo sa kinauyukan
sa nagtuyok nga kinabuhi?

anaa pa ang naghut-ong
nga mga bato nga usa-usahon
pag pas-an aron moabot
sa kinatumyan sa himaya

padayon

bisan pa og ang balas
mangita og kang-a
sa tiniklop
mong palad

ang gugma
magpabilin samtang
halapad pa
ang baybayon

kay nganong mingawon ba ako sa gugma?

daghan ang misalig sa gugma
midayeg nga kini
makapasibog man gani sa bungtod
makabanhaw sa patay
makapalakat sa ibabaw sa tubig
makausob sa bulok sa
kalibotan
makapatubo sa patay nga
kahoy
makapamunga sa
mga sanga nga gabok na

natagboan ko ang gugma
gidapit ko siya
apan unsang hitaboa
wala'y nahitabo sa akong kinabuhi
gawas lamang sa pagpamati sa iyang pagmahay
og mga pag-antos
og gani
pagkahuman sa among paghinabi
milakaw man kini
nga wala mananghid kanako
samtang nag-andam ako
og mainom alang kaniya

wala ako makaila kaniya
og siya wala usab kaayo makaila kanako
og kon magpaila ako kaniya
sayod ako nga siya
mobalibad gayod sa akong mga hangyo
bisan sa usa ka halok lamang
diha sa iyang agtang

ayaw pangutana
kay dili ka makasabot bahin niini

og kon makasabot ka man
basin og imo lang akong kataw-an
o panghimaraoton
sa pag-abot sa saktong panahon

lahi ang akong kinabuhi
wala kini mahisama sa mga tanaman
og sa mga panganod

lakaw na
kay nanaad na ako nga dili gayod ako
mingawon kanimo

ning sud sa kangitngit sa lawak sa akong
kasingkasing
naandan ko na ang
paglakat sa akong
panahon

milabay lang

ahh, milabay lang ang gugma
igo rang mipahiyom kanako
og dayong lakaw sa unahan
hangtod nga bisan og
anino na lamang
wa ko na gayod siya
nakita,

gihawiran ko ang kaulag
og nagpabilin siya
giayo niya og libak ang
gugma

og ako namati
mikatawa og ang kaulag
nagtoo
nga kaming duha usa ra.

kapit-os

gum-os ang panabot
sa pulong nga misubay
sa unos

hatagi og butang nga
makaalim 
sa balati-an

sama sa kainit sa tubig
nga mohupay sa sagalsal
nga igham

sama sa imong palad
nga mohanoy sa mahagiton
nga katimawa

Ang Kasadya sa Pasko

Ang Kasadya sa Pasko
By Genamos_US of Washington DC, USA

Ang mga parol gipangsab-it nga sa mga kabalayan
Inubanan ang paskohanong mga huni ug awit
Ang mga kasingkasing gipuno sa mga paghigugma
Kay mao man kini ang diwa sa pasko mga higala

Ang paghinatagay, ang pagbinayluay og mga regalo,
simba sa gabii, mga pagpanaygon ug mga kumbira sa pasko
Mao kini ang mga talan-awon ug kinaiya ning taliabot nga ang pasko

Ang tanan nangandam sa usag-usa
Aron sa paghatag og katahuran
Sa paghinumdom sa pagkatawo sa balaang bata

Mao sab kini ang panahon ang tanan magkahiusa
Malagyo o duol ang tanan malipayon
Puno sa kadasig ug kalinaw
Ang panagdait, kahusay ug pagsinabtanay maoy pagbati sa tanan
Pag-anindot kaha kung ang tanang adlaw kay pasko
Ang palibot walay kagubot og kaguliyang

Ang mga panagway sa mga tawo
Mapahiyumon ang tanan
Puno sa paglaum ug kahidlaw sa umaabot
Ang paghatag og pasalamat sa tanang grasya
Sa mga nanglabay nga mga adlaw

Dili man tanan gipalad sa kahigayonan
Ang tanan may kinutuban ug utlanan
Sa kinabuhi kita gitiaw-tiawan
Pero ang kasadya sa pasko maoy gibantayan sa tanan

Ang Risipi sa Pasko

Ang Risipi sa Pasko
By Genamos_US of Washington DC, USA

Nagtipon-og ang binata nga mga hunahuna
Aron ablihon kining layaw nga mga mata
Niabot sa wala damha nga mga gasa sa kinabuhi
Sa mga matag-adlaw tam-is nga sopresa niagi

Sagolan sa mahigugmaon nga pagdayeg
Sa mga katawhan kini atong ipaambit panagdait
Sama sa mga paskohanong kandila
Nga sa isig-usa kanila may talagsaon nga dan-ag

Atong dungagan og agik-ik ug talidhay
Uban sa lami-an nga mga pagkaon sa Pasko nagpangamay
Ang hiwa sa adobo makapausbaw sa atong panghunahuna
Isawsaw sa halang nga suka nga taytayan sa tawhanon kaluoy

Bahugan sa dugodugo puno sa gugma ug pagsabot
Gidekorahan uban sa pansit sa paglaum ug kadasig
Aron ang kalipay sa walay puas mopilit
Atong gamiton ang himsog nga risipi sa Pasko uban sa awit

Aron kitang tanan atong madumduman
Ang tinood nga espirito sa Pasko
Dili lang sa buwan sa Desimbre
Kon dili sa tibuok natong kinabuhi

Maayong Pasko, Pinangga

Maayong Pasko, Pinangga
By Genamos_US of Washinton DC, USA

Mga Greeting cards ako nang gipadala
Kay ang pasko taliabot na
Pero aduna koy usa ka gitungoha
Espesyal alang kanimo akong gipangga

Maayong Pasko, akong pinili
Bisag tinood ikaw nahilayo dili ako magdumili
Damgohon ko nalang ikaw
Bisag ang dughan ko giuhaw
Nga nagpaabot kanimo nakapanghupaw

Kining pangilin sa pasko
Puno sa kalipay ug panagdait
Ang tanan magsaulog masadyaon
Aron sa paghinomdom sa atong Manunubos

Pero alang kanako ang pagsaulog sa pasko
Dili lang sa pipila ka mga adlaw
Kon dili sa tigbuok tuig akong gilantaw

Nahinomdom ko sa niadtong nilabyng tuig
Ang atong panag-uban kita sa kalipay gibulig
Ang mga suga sa Christmas Tree
Nga atong gisab-itan sa mga adorno
Uban sa atong mga giputos tang mga regalo

Karon paskoha, ang kahilom maoy nagpasulabe
Kay ang kamingaw ko kanimo giduble
Ang matag kidlap sa akong gisugnod nga mga kahoy
Nagtimaan sa dughan ko napuno sa dangoyngoy

Kung hain man ka karon gugma gidagsa
Malipayong Pasko akong gipanghinaot, akong pinangga
Uban sa paskohanong mensahe ko gipadangat
Kining ipabati kung balak sinulat nga kanimo gipahat

Hilom nga kagabhion

Hilom nga kagabhion
By Genamos_US of Washington, DC, USA

Hilom nga kagabhion, balaan nga kagabhion
Malinawon ang tanan, masanagun ang tanan
Sa layo ang batan-on nga Birhen, Ang inahan ug anak
Ang balaang bata hinay ug malumo
Nakatulog sa langitnong panagdait

Hilom nga Kagabhion , Balaan nga kagabhion
Ang nagsiabot nga mga pastol sa halayo
Aron sa paghimaya sa agos sa langitnon tawag
Ang langitnong Hostiya, sa pagkanta og Aleluya
Kay natawo Si Kristo Hesus ang atong manunubos

Hilom nga Kagabhion , Balaan nga kagabhion
Ang Anak sa Diyos ang dan-ag sa kahayag
Masilak nga silaw nidan-ag sa balan-anong dagway
Daw usa ka basibas uban sa grasya nga maoy maglukat kanato
Si Hesus ang atong Ginoo ang iyang pagkatawo

Ang Paglaum sa akong mga Damgo

Ang Paglaum sa akong mga Damgo
By Genamos_US of Washington, DC, USA

Kitang tanan adunay tagsa-tagsa ka mga damgo
Masayon man o lisod kab-oton ning atong kinabuhi
Adunay gyud kitay tumong ning atong pagpakabuhi
Nga padayon gihanduraw ning atong hunahuna nagkapuliki

Ang atong mga damgo sama sa usa ka bulawan
Nga dili puwede kini ibaligya sa laing handurawan
Mahinungdanon kining atong mga damgo sa atong panahon
Kay mao kini ang naghatag kanato ug kadasig sa naghulat nga paglaum

Sama sa kalangitan nga gikoloran sa mga asul nga panagway
Kay dinhi sa kalibutan nabuak ang tinuod kung pagbati
Nga kadtong mga nindot kung mga damgo gipangsalikway
Sa naghulat nga kalisdanan ug pagsulay

May igong panahon kining akong hunahuna sigun sa akong pagtoo
Kay ang gibati kung kinabuhi may igong ritmo sa sugilanon
Inubanan sa pagkisdum sa langit nga gipulbusan sa abohon nga mga panganod
Ug didto nahanaw ang mga damgo nga dugay ko nang gihawiran
Nibiya kay gikataw-an sa naglibog nga kapalaran

Ang kinabuhi kung gibati padayong sa pagkahinog
Ug ang matag huyatid sa bag-ong adlaw nga nagdala og dan-ag nagsaulog
Ang suga sa akong dughan nagpadayon sa iyang kahayag ug kahidlaw
Aron kab-oton kadtong nahisalaag nga mga panglantaw
Nga dugay kunang giplano nga gilaraw

Tingali kung sa oras nga hunongon ko ang pagsulat
Kining balak kung padayong nga naglurat
Basin ang tubag sa paglaum ko naghulat
Kay ang panaw sa akong mga pag-ampo
Nga ang kahayag sa akong ugma aron ako molambo

Karon, Ani-a naman ko sa adlaw sa pagpamalandong
Aron sukdon kadtong natuman tang mga damgo atong gilumpong
Uban sa pagpasalamat ngadto sa kamot sa Langit
Ug kadtong mga pakyas nga mga damgo nitidlum sa kahilum
Kay pagboot kadto sa atong mahal nga Makagagahum

Ang Suwat ni Nanay

Ang Suwat ni Nanay
By Genamos_US of Washington DC, USA

Anak, kung maabot nagani ko sa takna sa akong pagkatigulang
Sabta intawon ko sa akong kaugalingon basi sa akong pangidaron
Nanghinaot ko nga taga-a mo ako og dako-dako nga pagsabot

Kung sa higayon nga ako maka buak og plato, baso
O kaha makayabo og sabaw sa talad sa atong pagpanga-on
Ayaw intawon ko kasab-i kay nagkahanap nga gyud ang akong panan-aw

Kahibalo ka Anak, kung magkatiguwang nga gani ang usa ka tawo
Luoran ug dali nga kaayo masakitan bisag sa mga pulong lamang
Ako nalang giduko akong ulo ug magpatulo sa akong mga luha
Sa higayon nga ikaw masuk-anon dinhi kanako

Dili ko gusto motubag sa akong panig
Kay basin masayop ang imong pagsabot dinhi kanako
Anak, kung naa ka may isulti kanako nga dili ko masabtan ang imong mga pulong
Ayaw kadali kasuko ug palihug ayaw intawon ko tawga og bungol
Kay nagkahinay nga ang akong kaugalingon sa pangdungog
Kung mahimo imong nalang isulat ang imong isulti aron unya akong basahon

Pasensiya nga anak kay tigulang nga gyud ko
Kay hinay-hinay nga gyud ning akong mga tuhod
Nga maglisod gani ko sa pagbarog
Nanghinahanglan ko sa imong ayuda
Aron imo kung agakon sa pagtindog sa insakto

Bisan nga gikapoy kana sa imong pagsilbi kanako
Hatagi lang ko gamay-gamay nga higayon ug pagsabot
Ug mangayo ko daan og dakong despensa
Sa imong nasugatan nga kalisod

Sama niadtong sa gamay pa ka nga nagsugod palang pagkat-on og lakaw
Diha ko permi sa imong kiliran nga nahimoot ug nagbantay kanimo
Nga dili ka matumba sa imong matag lakang
Mao sab unta anak kining akong hangyo kanimo
Nga dili ko nimo biyaan bisag sa akong katapusan yugto sa akong kinabuhi

Nahadlok ko anak nga mag-inusara nagpaabot sa takna sa akong pagpanaw
Nga walay koy masampit lain sa akong mga tugon
Pasinsiyahi lang gyud ko anak, kung mang galing
Magbalik balik nako og paglitok ang mga pulong
Murag plaka nga nagarasan sa iyang pagtukar

Paminawa lang gyud anak, aron imo kung masabtan
Ayaw lang ko kataw-i o kaha mapul-an sa pagpaminaw dinhi kanako
Anak, nahinumdum ka pa ba sa gamay ka pa?
Kanang naa kay gustong pangayo-on, imong ibalik-ibalik og sulti
Bahalag magkayuring nga ang imong mga sinulti-an
Dili mo ako lung-an sa paghangyo hangtod ihatag ko kanimo ang imong gusto
Kay dili ko kaako nga ikaw akong mabalibaran

Nahinumdom ka pa ba kadtong buhi pa si Tatay nimo
Nga abunda ang atong kinabuhi sa nagtubo pa mo
Kasagaran mauwahi siya pag-uli kay nangita pa og kaayohan
Aron ta makakaun sa insakto og makapalit sa atong gusto
Gimingaw nako sa imong Tatay, Anak.

Dugay-dugay nga gyud nga wala mi magkita
Bisan sa damgo lang, iya kung pakit-on sa iyang mga pahiyom
Tibook nga ang akong adlaw alang kaniya
Pero Anak, akong nalantawan nga dili naman siguro ko magdugay
Ning kalibutan ug maangkon kona ang akong buhing pangandoy
Nga magka-uban nasab mi ni Tatay nimo ngadto sa laing kalibutan
Ug ayaw kalimot kanamo sa pagdu-aw sa among lubnganan
Aron sa paghalad og buwak og kandila inubanan sa mga pag-ampo

Anak, pasinsiya nga dali nga kaayo ko sapoton
Panagsa nga dili ko nimo masabtan sa akong kaugalingon
Bunga siguro ni sa akong pagkatigulang
Siguro nakadungog ka nako nga magdanguyngoy sa kasakit
Sa akong kabukogan ug kalawasan nga akong gi-antos nga daan

Kung naa kay gamay panahon, Anak
Dalikyat unya diri sa pagdu-aw kanako
Aron imo kung panihumdoman sa mga nangaging panahon
Kadtong mga tam-is nga higayon nga buot handumon pag-usab
Ayaw kalimot, Anak. Sa kanunay ko ikaw gihandum ning akong dughan
Uban sa akong gugma ug pagsalig dinha kanimo

Gilaay nga gyud ko Anak nga nag-inusara ni ining balay
Sa kaniadto nga napuno sa hudyaka, katawa og kalipay
Karon, ang matag sook napuno sa kahilom ug kangitngit
Samtang naghulat ko sa adlaw nga mulabay

Anak, sa higayon nga dili nga gyud ko kasugakod sa akong gipamati
Ug naglubog nga ko sa banig naghangad nalang sa imong mga ayuda
Nanghinaot ko nga imo kung atimanon nga walay pagkalaay
Tutal, inihap naman ang akong mga adlaw ning kalibutan

Kung moabot nga gani ang adlaw sa akong paglakaw
Akong pangayo-on ang imong mga kamot
Aron maghatag kanako og kaisog sa pag-atubang
Sa naghulat nga kamatayon
Ayaw sabta Anak, nga nahi-ubos ko kanimo
O kaha naay gamayng gitapigan nga pagsaway

Ug Ako mapasalamaton dinha kanimo sa imong tanang kaayo
Kung ako nga gani maatubang si Bathala
Akong ihunghung kaniya ang imong ngalan
Magarbohon nga isugilon ang imong gibuhat
Ug Ako, masaligon nga iya sab nakita ang imong gugma
Nga tiunay ug walay mansa sa pagmahay

Ug sa katapusan Anak, pag-amping mong tanan
Ug ayaw kalimot sa pag-ampo sa kanunay ngadto sa manggiloy-ong langit
Ug ayaw sa pagkalimot sa pagpasalamat kanunay sa tanang mga kaayo,sa kalipay
Ug kasakit nga iyang gihatag dinhi ning atong kinabuhi sa matag adlaw
Ang iyang pagbo-ot maoy bugtong matuman kay Siya man ang kahibalo sa atong padulngan
Dinhi nalang kutob Anak, kay mopahulay nako

Ang Handurawan Sa Akong Mahal Nga Inahan

Ang Handurawan Sa Akong Mahal Nga Inahan
By Genamos_US of Washington DC, USA

Sigun sa sugilanon sa akong mahal nga inahan
Sa niadtong nagsugod pa lang akong kalibutan
Aron pagtul-id sa akong layaw nga hunahuna
Bunga sa akong pagkabata

Matud pa ni Nanay
Ako ra kuno ang iyang kalipay
Sa nagsugod palang pagkat-on
Sa mga adlaw-adlaw nga bulohaton

Iya kung gitudlo-an sa maayong pamatasan
Sigun sa tugon sa iyang mga ginikanan
Lab-as pa sa iyang panumduman
kantong nindot nga handumanan

Siya nahimoot sa una kung pagkat-on og pagtikang
Sa akong nagkindang-kindang nga mga lakang
Iya kung gigunitan sa akong matag lihok
Nga wala ko niya buhi-i bisan sa iyang pagpamilok

Walay makasakbang sa iyang mga paningkamot
Dinuyogan sa iyang mga sakripisyo ug singot
Bisan sa iyang pagkalapoy
Wala niya igsapayan ang mga kakapoy

Nilabay ang mga nag-aginod nga katuigan
Ug ang bata nga iyang gialagaran
Nidako nga nagsubay sa iyang kapalaran
Aron sa pagtuman sa iyang mga tugon
Nga padayon nga iyang gihalaran

Dili sayon ang dalan sa akong kalampusan
Sa mga ta-ak nga akong gisudlan
Pag-ampo ug kakugi nga akong gipahimuslan
Sa matag hagtok sa mga orasan

Dili ko kini makalimtan
Ang mga tugon sa akong inahan
Kay kining tanan akong inuslan
Ang Handurawan sa akong mahal nga inahan

creme de la creme

nanayaw ang mga chorus girls
hollywood ang motif
sa party ni Ipyon

tua ang byuda sa ex-governor
nakaitom
regal nga tan-awon apan hinay
na intawon

tua ang ugangan ni cecile
maayo pang mosayaw og chacha
apan malilong na

puti na kaayo ang buhok sa
karaang supervisor nga sinaligan
sa butler's club
sa dipolog

si ipyon mismo cancer survivor og
iyang tupad ang mangkay niyang
igsoon nga
dunay cancer sa throat

bongga ang party
sa creme de la creme ning gamayng syudad
nalimtan ni tiyo absie
nga ang iyang kaestorya sa
table no. 5
mao man diay ang iyang
kanhiay kaniadto

tua sab diay ang kanhiayng
executive secretary sa gobernador
upaw sab
(nag chemo pod kaha?)

niadtong nag-iyak ang gitara

gabii kadto
nga miiyak ang
gitara
og ang ngalan
niya
kaniadto
nadungog
apan layo na
kaayo
ang maong
tingog
og ang tuko
nga mibutho
wala na'y
sumpay
sa pusod sa
kisame

Ang Imahe

nakakita ka na ba ug
kaanyag nga way anino?
sama sa panan-aw
sa unang pagbuka
sa mga mata sa masuso?

nasaksihan mo na ba ang adlaw
sa way paghinumdom
nga sa pagkahuman sa paggahin
sa iyang dan-ag motidlom kini ug balik
sa dagat sa kagabhion?

nahiayunan mo ba ang rosas
nga way bisan usa ka lugas nga buhok
sa imong paghusga
nga  luyo sa iyang kaanyag
anaay hait nga mga tunok?

kon ikaw motangho,
tingali nahiusa ka na
sa akong bathala,
wa siyay panumduman
sa akong kasal-anan

ang niwang nga babayeng mi-posing dapit sa amihanan

morag iguana nga
ang kolor lunhaw sama sa dahon
sa akasya
nagpaabot sa sunod niyang
tukbon
og hakpon sa taas kaayo
niyang dila
nga gitagoan una niya sa
iyang kwadradong
apapangig

panag-amigo

kay gisugdan na man god
sa panag-amigo
bisan asa pa paingon
kon ihatod og
molapos man kini sa gugma
sama sa usa ka
prusisyon
nga gihangin og giulan
mobalik gihapon kini
sa simbahan
diha sa hagdanan sa
panag-amigo
og ang tanang mga hugyaw
ginagmayng bingkil
sa dayon
mahikalimtan lang gihapon

alang kang NIkki

way makapugong sa mga bulak
adunay adlaw og wala
moulan man
mobagyo man
mohulaw man
mubukhad gayod kini sila
sama usab sa
ilang paglaya og pagkahulog
sa pag-abot sa panahon
silang tanan gayod
moduyog.

alang kang A.

SA dihang gipangutana siya ni
J. kon asa na siya karon
iyang tubag, dia ra ko diri,

og unsay ilang buot ipasabot
ning ilang mga tanghaga
dili ko na kini tugkaron,

kapoy na, mas maayo pag
itunol nako ang usa ka baso
nga red horse
og usa ka yahong nga balbacuang
panit sa kabaw

aron silang duha mangatagbaw
og dili na mag-estoki og
mag-away hangtod sa kalinaw
sa ilang
ikamatay.

alang kang T.

nagtoo si T. nga ang
langit naa sa ibabaw sa iyang dughan
og naa sa sud sa iyang
mga ngabil
og naa usab sa kilid sa
iyang mga atngal
sa ubos sa iyang pus-on
sa tunga sa iyang
duha ka paa

og ang impyerno kuno
naa dapit sa ubos sa iyang mga
tiil
naa sa singit sa iyang mga
kumagko
naa sa patay niyang mga kuko
sa gikubalan niyang
lapa-lapa
sa galutok niyang mga
mata.

pagbungat sa kredo sa pagtoo

ngano ba nga ang
pikas nga nataran mas lunhaw man?

ngano ba nga ang ubang mga tawo
mas kusog man ang katawa?

gusto nimong lantawon ta ka
og ingnon nga ikaw
usa ka lata nga mangga?

og gauga nga sapa
diin ang tanang mga isda patay na?

ngano ba nga ingon ka man niana?
unsa ba gayod ang nahitabo niadtong mga bata pa kita?

kinsa ba ang nagtudlo kanimo nga ikaw
ubos lang kanila?

kinsa ba ang nagsulti kanimo nga sila mas labaw
pa kanila?

naunsang hitaboa nga nawala man ang
pagsalig nimo sa imong kahayag nga anaa kanunay nga nagsiga sa tunga-tunga sa imong agtang?

nganong napalong man ang daob diha
sa imong kasingkasing?

nganong gipatay man nimo ang mga pulong?
nganong gipiyong mo man ang imong mga mata sa tanang kaanyag
nga nag-alirong diha sa imong lawas?

nganong dili naman ikaw ang ikaw?
og nganong ako nagpabilin man nga ako sa pipila ka paglawig sa katuigan?

pagtarong ba, panalipdi ang imong kaugalingon,
panamin, og litoka ang mga pulong:

"ako ang ako nga matuod
maanyag ako,
matarong ako,
og

ako ang manggialamon
ako ang imong igsoon
ako ang anak ni Bathala
dili ako buta og
dili ako bungol
ako ang manununod
sa kalibotan
ako ang gipaabot sa
langit
ako ang tubig sa kasapaan
ako ang lunhaw sa kabukiran
ako ang mga prutas sa kahoy
ako ang mga bulak sa tanaman
ako ang kalipay
ako ang himaya
ako ang walay kataposan"

Pak-an

nagbiya ug badlis
sa panganod ang agi
sa sutoy mong
paglupad

di katuhoan nga
ang imong pako
naani gumikan sa
alilang

ayaw palingla
sa kahayag
sa  hinulamang
abilidad

baliki ang haw-ang,
nag-abay sa manulunda
nga way kinutuban

sud sa apo view hotel
sa dihang milakaw ka na
gibati ko ang kahaw-ang sama sa
kadako ning lawak
nga ang tingog mao lamang ang
hunghong sa
aircon nga morag baba nga misuyop
kanako
paingon sa iyang dakong langob
mora ba og dunay gilubong dinhing
dapita nga sa kaulahian
dugay nakong nahibaw-an nga
ako kadto

busa migawas ko og naningkamot
nga makahanggab og tinood nga hangin
gikan sa kahoy
nga gitanow tupad sa
swimming pool

ning akong edad
makamatay ang hulga sa
usa ka
kamingaw nga daghan pa gihapon
og gustong
isugid kanako

kay unsa ba gayod ang nahimo sa
hunahuna?
misuroy lang kini
mihapit apan wala magdugay
mikuhit lang kini sa imong kilid
og wala mananghid
migawas kini milakat
milupad
kay sama sa gihapon og karon
dili mo kini mahuktan
magapos
dili mo kini mahakop
masabtan man ugaling
apan dili mo kini
maangkon