sipyat ka

"what do you want to
prove?"
nangutana si alice

ambot ba

"i have nothing
to prove"

maoy akong ingon

gusto nakong ipakita
nga wala ako
madutli
sa kapakyasan

mipahiyom ko
mitaghoy

tahor nga milakaw
pauli sa
balay

apan pag-abot didto
gitagbo ko sa pultahan
nga mibiaybiay
sa akong
barog

"sipyat ka!"

gipakapinan ug

"limpyo ka ra kaayo"

ang sikat karon sa
kapitolyo ug
munisipyo mao ang
mga bulingon

humot sila ug
halinon

"abi god nimo
lahi na karon"

maoy patapos
nga pahimangno
sa gubaong
hagdanan
paingon sa
langit

alang sa Balak

ayy balak

ayawg kabalaka
sa hungihong nga ikaw
akong biyaan

nga ako magbudhi
na kanimo sa
akong kuyog nga
mga katuigan sa
akong gitagik nga
mga panaw

ayy balak

ayawg kaguol
kay bisan asa ko
dili ko gayod ikaw
kalimtan

bisag asa ko ako
ka gihapong
ipatik

kon wala nay tinta
gamiton ko ang
akong dugo
kon wala nay papel
gamiton ko ang
akong unod

kon magduda ka pa
gayod
sa akong pagkamatinooron
diha kanimo
bali-balion ko kining akong
mga bukog
aron iuli ko kanimo
ang imong gihatag kanako
gikan pa
kaniadto

balak alang sa akong manghod nga si dodong

nindot gihapon lantawon
ang akong
kuspaw na kaayong
polo-shirt
nga itom
nga dunay gamayng gisi
dapit sa ilok

(nga dili baya pod
maklaro kon di lang
siya motugatuga ug
isa sa iyang kamot)

"paborito ko kana
pagkaswerte mo!"
ako siyang giingnan

apan dili maispiling
ang kalagot
sa iyang ngipon nga
gakagot
nganong
ang iyang kapalaran
mao man lang
ang pagsunod sa akong
mga
tinubuan

watsinanggo

bisag nagtuwad na ang
karomata sa bungtod

bisag mabali na ang sanga
sa gabok nga santol

bisag mosungag na ang
kabaw sa iyang dughan

ang tinood nga balakero
sa gihapon watsinanggo

kibir

ang tawong nagmalinawon
sa iyang kaugalingon
di magtagad sa pulang lamigas
sa iyang tiilan

mas pinangga pa ang mga plato ug ang iro

usa ka batang babaye
bangs ang buhok
pution

raddish ang akong
nahinumduman diha sa
ibabaw sa lamisa

mao kini ang iyang
gipakitang bahandi
kanako

giingnan niya ang bata
dinhi ka na nako ibilin
daghang tsokolit dinhi
lami ang sud-an
nga adobong manok
daghan ang de lata nga
gatas
og karne norte
mahupong ka unya
sa imong kagutom

mikusmod ang nawong
sa bata
kaiyakon ang iyang
mga mata

nakita ko ang hinog nga
kamatis
lata
gaduga sa banggera
nahumod
sa luha


mipahiyom ko dayon
nakog ingon
nga bantayi pag-ayo ang
bata
basin ug makabuak
ug pigyurin


pinangga sa akong asawa
ang mga platong porselana
mas pinangga niya
si bonbon ang iro namong
putot ug itom

kasikas diha sa kamingaw

pag-abot mo sa balay
walay tawo

wala sab ang mga iro
ang mga tanom nangalaya

wala na miulan sa
pipila ka adlaw

ang bintana nga kinurtinahan
giabugan na intawon

kon makasulti pa lang
ang mga salog

madungog mo unta ang
ilang pagbangutan sa kamingaw

apan sayod ka sa ilang
pagpakahilom

aduna kini mga katarungan
kinsa kadtong mibiya dinhi

ila lang gihapong gipangga
busa wala gayod silay gipanulti

ug ikaw nga naglantaw sa tanan
nakakita ug mga dag-om diha sa mga kisame

ang mga liki ug buslot sa bongbong
dili gustong mabasa sa imong mga luha

aron malimtan ang tanan
wala nimo gitangtang ang imong sapatos

misuroy ka sa kusina
misulod ka sa kwarto migawas sa pantawan

gadapakdapak ang tingog sa imong takong
aron lang paghimo ug kasikas

kining bugo kong kasingkasing

PAGKAYANO
mo gayod unta

(daghan pa unta
ako ug isulti bahin
kanimo

apan dili na nako
tas-on kining
sugilanon

sa pagkabugo gayod
sa di kamaong
mopili
ning kasingkasing
kong
siging supak
sa akong
utok)

pagkamaot mo man
unta
pagkabulingot
pagkahugawan
pagkawalay
angay


ang di nako masabtan
nganong
kining kasingkasing
ikaw man gihapon
ang siging
gipangandoy

matag gabii
gidamgo

matag adlaw
giatngan

nga ug kon makit-an
ibayaw man gyod
dayon

ang tanan ngadto
sa kalangitan.

ang iyang sugilanon

usa lamang ako
sa inyong
kadaghanon

ako ang miduol kaninyo
aron aduna
ako'y ikasulti aron puhon
kon adunay
mangutana sa akong
mga panaw
aduna ako'y ikapanugilon

bisan ug kabahin lamang kini
sa gagmayng mga kuhit
ug pahiyom

ihatag ko ang ania kanako
ang tanan gayod
aron ko matagamtaman
ang tagidyot nga
kalipay

usa lamang ako ka
alindanaw sa inyong mga sanga
ug dahon

wala kamo malooy kanako
gikuhaan ninyo ako ug pako
gilangkat ang akong mga tiil
gilugit ang akong mga mata

dayon ninyog biya ug
katawa

ang akong dakong sala mao ang
kamingaw
ang akong dakong sayop mao
ang pagpakilimos
sa inyong
mga kalipay

sa dihang miulan
nanulod kamo sa inyong balay
gisirad-an ninyo ang
pultahan ug
mga bintana

gipaibog ninyo ako sa inyong
gasiga nga suga
sa kusina

samtang ako nga
nahigmata
nakaiyak
basa kaayo sa ulan
ug gipangita ang
agianan
sa akong pagbalik

ang akong mga pasalig

diha lamang sud sa damgo
gitayhop ko
ang fluta

walay makabati sa
akong awit

pagkabuntag adunay
nagsuka sa
banggera

aduna na usa'y naburos
sa akong
mga pasalig

ang bahin kanako

gusto kong
molupad

isip usa ka balak

gusto kong
motugdong

sa akong dughan

gusto kong moawit
sud sa akong kasingkasing

gusto nakong pamation
ang wala nako masugid sukad pa kaniadto


gusto nakong
matugkad ang kalawmon sa akong dughan

basin
ug masabtan na unya nako ang kabahin kanako

pagsimang

sugdan ta ang pagpasimang

ayaw paghisgot ug
kabalaka

hisgotan ta ang pagkayab
sa kahayag

ang pungpong sa bayabas nga
nahinog sa punoan
sa kilid sa atong bintana

ang mga ligbos nga kalit lang mibutho
palibot sa punoan sa mga saging

pagkahuman sa kusog nga ulan
nga gisagulan sa mga linti ug dalugdog
kagabii

balikan nato ang mga bitoon
sa atong balkonahe

dili nato hilabtan ang mga yamog
sa mga dahon sa boganbilya

manglingkod kita
tupad sa pultahan

basin unya andam na kita
sa tinood

pagkahuman sa pagsimang
atubangon na usab nato ang
kagabhion

kitang mga nagpakatakos sa pagpakabuhi

ang anaa dinhi gatuagsa
uban natuali

pananglitan ang baso
natumba
sa kilid sa lamesa
dayon
nahulog ug nabuak

kasagaran gubot
ang atong maabtan
habol nga wala mapilo
ugnan sa salog

gusto nato ang hapsay
aron kita makatulog

ang mga buak sa baso
atong gitapok
ug gitagoan sa ilalom
sa hagdanan

ang alugnan atong
gisaka sa iyang
ulohan

ang habol atong gipilo
ug gihapnig

ang natumba atong gitindog
ang natuali
atong gikulob

ang mga nagtulo atong
gisalod
ang abli nga pultahan
atong gisirad-an

ang uga nga yuta atong
gibuboan
ang gilawalawaan atong
gipangsilhigan

ang kabo atong gitupad
sa banga
ang atong mga tsinelas
atong giandam
sa kilid sa
kataposang ang-ang
sa hagdan

gitapad nato ang
lapis sa papel nga
wala pay
gisulat

dayon nagpakatakos
kita
sa pagmugna

hapsay nga pagsulat
gipagawas nato ang gitagoan
nga kaanyag
diha sa kasapnot

gipakita nato nga
kita angayan pa gihapon
nga mamuyong
malipayon ning
hagip-ot tang kalibotan

nga bisan pa ug
nagminaot na ang tanan
andam pa gihapon
kita sa usa
ka kasanag

bisan pa sa pagkulismaot
sa mga ngabil
nakapalusot gihapon kita
sa kinuripot nga
pahiyom

respeto sa mga katuigang panagkuyog

ako lang kini.
hunghong nako sa akong kaugalingon
samtang
gilantaw ko ikaw
nga nagduko
sa salog
ug sa imong paghangad
gibalhin ko ang
akong mga mata sa mga
kahoy sa palibot

mahimo diayng mabag-o
ang panglantaw
unya sa kabag-ohan niini
dili na kini malitok
sa kusog nga pulong
sa usa ka pagbundak
sa ka hukom

ako lang kini
hunghong ko sa kaugalingong
kasingkasing
dili na kini kinahanglan pang
mahibaw-an nimo

maghatag lang kinig
kasakit
makabuak ug kalibotan
nga atong gilingin
sa pipila ka
katuigan

dili ko motoo nga wala ka
masayod
dili ko motoo nga wala mo
usab mabati
ang hunghong ko sa akong
kaugalingon

nadungog ko usab ang
imong hunghong sa imong
kaugalingon
sama sa akong hunghong
miingon ka usab

"ako lang kini"
ug dili lang usab ako
mangilabot

gihapnig nato pag-ayo ang
atong mga tinipigan

kay bisan ug nawa na ang gugma
anaa gihapon ang
kalooy
sa atong giagian

ug bisan man ug unsay
mahitabo
sa umaabot nga oras
mas maayo gihapon nga
"ako lang kini"


walay mopasakit
aron walay masakitan
sa taliwala sa usa ka
respeto nga usahay ilang anggaan

nga usa ka
pagpakaaron-ignon

paghikalimot sa kahiubos

sa kaanindot sa kabuntagon


pagkalunhaw sa palibot
nanghambog pa ang mga dahon sa kahoy
sa iyang mga yamog

pagkabugnaw sa hangin
nga miawit diha sa pagsayaw sa kakugnan

pagkahapsay sa dagat
morag buhok nga maayong pagkasudlay

pagkalinaw ning panahon
walay mantsa ang kalangitan

unsa ba kadtong akong isulti unta kanimo?
gikalimtan ko na lang.

kapoyg tagad

kapoyg tagad
ning gugmang guba
ning kasingkasing nga
tugas

gahig ulo
suhi

balikog, hiwi,
maypag makigharong kog
buta
makigtabi sa
bungol

kalimot pa
way sakit ang
hagba

mga tanghaga kabahin sa tubig ug hangin

dili ko katagkos anang tubig
ang hangin dili sab nako magaid

ang pulong
pulong lang
kasagaran dili
magdayon

wa nako mahikap ang gugma
gisulayan ko
haskang danloga

gilit-ag nako
ako man hinoon ang
nasud sa
halwa

walay sulod ang tadjaw
apan dili ko kini buk-on

karon basahon ko ang nahisulat sa hangin
sulayan nako ug tultol ang dulunan sa tubig

ang pipila ka tuig wala'y gihimo kanato
kondili mao lamang ang pagpapas sa atong mga timailhan

gipatik ko kining tanan sa bairan
ug busa andam na kaayo kining hait kong sundang

mahimong mas abtik na ako sa hangin
mahimong mas danlog na ako sa tubig

ang kalipay ug kasubo
dili na makadulot kanako

tanghaga sa kalipay

aron makalatas sa pikas
tampi
mikalatkat ka sa tulay

sa imong kalagot sa kinabuhi
gihagit nimo ang suba
sa usa ka
pag-ambak

nalisang ang lilo kay di
kang kamao nga
molangoy

naulaw ang tulay
nagusbat ang iyang dagway

nangahulog ang iyang
mga kuyamoy

nga sa pagdapat sa dughan
sa suba
nangahimong dahon sa
kamunggay

ang kagaan sama sa
kasagaran
manglutaw

sama kanimo ug sa
imong mga damgo

nanglutaw
ang mga pangagpas
diha
sa imong lalom
na kaayong kalimutaw

asa ba paingon kining
mga panghitabo?
unsa ba unya ang
lugdangan sa imong
mga tigmo?

ah, pagdali
abta ang kamingaw
sa pikas tampi

itunol ang tanang mong
kasubo
patakdi siya sa imong
mga bakho

ingon ana ang
tanghaga sa kalipay.

bagang kubal ang kamot sa paglaom

hangtod dili pa moabot
ang iyang
gipaabot

dili ka gayod moatras
walay kamot nga moisa
dayog ingon nga
mobiya na lang ako

gilantaw ko ang
kasanag sa kangitngit
sa imong
lagom nga wait

nakaingon ko
nga naa diay panahon
nga ang mobaga pag-ayo
ang kubal sa mga kamot
sa paglaom

nga sa kabaga niini
dili mo na mabati ang
kasagarang ngotngot
diha sa pagbangutan
sa usa ka kapildihon

subong kapildihon sa kahayag

pag-abot sa oras sa panag-ilog
sa kahayag ug kangitngit

gisaka ko ang habog nga kahoy
gusto lang nakong lantawon

ang kasagarang pag-daog sa
kangitngit samtang ang kahayag

hinayhinay nga miatras sa
kinatumyan sa dagat

subo baya ang kapildihon sa
kahayag apan ayaw ka
pagkatahom gayod diay niya

kaming duha nga di ganahang maniudto

nagdula mig
tikig-tikig

tingpaniudto
hangtod

paghuman sa
paniudto

maoy oras sa
pagkatulog sa
iyang lolo
nga isog kaayo

yama-yama sa kangotngot sa kahaponon

ang akong dughan mas ilaronon pa's
babayeng miadto's manila
ug nanugid nga ang iyang padulngan mao
kadtong balay nga wala
masunog sa Pasay

ang mga kasakit sa akong ngipon
lalom ug dulot
sama sa usa ka hilomon nga
kawatan

ang akong mga tudlo laherong
mokilutog anang mga sakit kaayo
sa akong pusod

ang lungsod nga among gipuy-an
mas lata pa sa abokadong nalimtan
sa laton nga giistakan ug
bugas

kining akong kiting
kanunayng nagbagting
nagpalanong sa iyang
mga tunob.

ang dalan sa akong kasingkasing

usa lang ang akong ikatambag
subaya lang ang dalan sa imong kasingkasing

mawala ka

dayon mahadlok ka kay dili hawan ang dalang dinhi
usahay wa gani kay kahayag nga makita

gilawalawaan na ang mga dahon sa kahoy
giabugan na ang mga sanga

wa pa miaabot ang gisaad nga ulan

usahay maglibotlibot ka lang
ang imong giagian
maagian mo na usab karaan

gimino ka

dugay ka na nga galakat ning dalan sa kasingkasing
apan

dili ka gayod kapoyon
imo kining dalana ug imo da gayod

mahimong walay laing nasaag dinhi
apan

wala ang kamingaw
ang kalipay gaapaw-apaw

balak sa mananap

"tsk, tsk,
tsk!' maoy
ingon sa
taluto

"wa,
wa,
wa"
maoy
pamakak
sa uwak
nga gatangag
ug bakbak

"to-mor-row,
to-mo-rrow"
maoy
pasalig sa iring nga baye
sa ibabaw sa iyang
laki

"break,
break,
break"
maoy
balak sa baktin nga
gadagan
sa kalipay
sa pag-abot ni
tennyson

makamaong nilalang (alang kang manoling)

makamao kang
mohan-ay sa imong kahuyangon

lahi ka sa uban
nga nagligidligid
miyaka sa karsada
ug mihilak mikatawa
gisuntok and pader




lahi ka
ang imong kauhaw ug kagutom
imong gihimong mga buwak nga halad mo
ni Bathala

ang imong kasakit gihimo mong
mga awit
ang imong mga kahiubos
morag panyong
binurdahan

ang imong mga kapakyasan
gihimo mong
mga ang-ang

ang imong pagkagamay
gihimo mong
pak-an

ang halas imong gihaploy sa imong mga tudlo
ang sungayang kabaw imong gipabugnaw sa tunaan
ang balikog nga tiil gitabonan mo sa dahon
ang imong samad gihimo mong
imnanan

pagkamalinawon sa imong mga mata
pagkabugnaw sa imong mga kamot
morag hampol ning hapdos nga hubag
nga mibuto

sa usa ka kinabuhi

pagtungkad sa kamatayon

puno ang sapa sa tubig
puno sa isda ang tubig sa sapa
lalom ang sapa nga puno sa isda

limasan mo kini
sa saktong panahon
gusto mong lantawon

ang mga isdang mahutdan ug tubig
ang sapa nga ilang gipuy-an


lantawon mo ang ilang kisikisi
ang ilang pagpaningkamot nga
makahanggab ug hangin
diha sa mad-an nga sapa

gusto nimong tugkaron
kon unsa ang kamatayon

ang dili ko makalimtang tambag ni lola Oris

kon dili ka gustong
mapaso

pwes ayaw ug duol
sa dapog

sa punoan sa sibuyas

ang mga goryon
namatog sa mga layos nga sanga
sa mga amor seco


nanaglipay sa pagbukhad
ug panira sa ilang mga pako
nga lapoy

gipasinaw nila ang ilang mga
balahibo sa init nga adlaw

pagkahuman nanglupad kini dungan
mga morag abog sa
kadaghan

paingon sa sapa tupad sa mga
bebe nga puti nga nagpalutaw lutaw
sa ibabaw

kon imo lang unta kining nakita
karong buntaga
dili ka unta kahunahuna ug hikog
sa punoan sa
sibuyas

usa ka pangutana alang kanimo

mikatkat ko sa dakong
punoan sa manga
milatay sa iyang dakong sanga
nga sa akong kabug-at
naputol

nahulog ko gikan sa
usa ka panganod
ngadto sa usa ka tunaan
sa kabaw

ang imong makita mao na
lamang ang akong
mga mata

misakay ko sa bukobuko sa
kabaw
gihawarin ko ang iyang ikog
ug akong gipatiran ang
iyang kilid

mikaratil ug dagan ang maong
kabaw nga
balikog ug sungay
paingon sa dakong sapa

miambak ko sa tubig
gihugasan ko ang akong lawas
nga nagsuot sa
baga kaayong lapok

karong limpyo na ko
mibalik ako kanimo

miingon ka
"makalingaw!"


ako ba ang buot mong ipasabot
o ang
akong pagkahulog didto sa
lapok?

ang di kamaong mobasa

daghang di kamao mobasa
apan nagpabiling buhi

bisan ug ang gikaon
buntag udto gabii mao
ra gihaponkadtong
kamoteng kahoy nga
kausa lang gisukad
ni nanay nga nabuhi
sa pagpamunglay

dili man god dagway
madaug ang kinabuhi diha
sa pagbasa

o pag-ispel sa kinabuhi

mas bulahan gani kadtong
walay igkabaagan

nagpabiling buhi diha sa
pagkatkat sa bukid
diha sa pagtabok sa
mga suba
likay likay
taymingtayming sa dakong
baha....

ang relasyon sa init nga panahon sa duha ka sikadsikad drivers

duha ka driver sa sikadsikad

ang usa tiguwang na
orange ang t-shirt
blue ang pantalon
naglingkod sa kilid sa
pader dapit sa merkadong
daan sa katipunan

nag-atubang kaniya ang
batan-on nga nagsul-ob
ug puting kamisen
upaw ang alot sa buhok
maong ang karsones

init ang panahon apan
kusog ang hangin gikan sa
dagat

daghang basura ang nagpasad
sa kilid sa dalan

pagkaoran-oran
kalit nga gisuntok sa batan-on
nga driver ang tigulang nga
iyang kaestorya

amahan batok anak
maoy akong nahibaw-an

alang kanimo

ikaw ang dili ko maangkon
ikaw ang akong salampati nga dili nako masulod sa akong hawla
sa akong pangagho gipalupad ko ikaw sa kalangitan
dili ako ang mamahimong manag-iya kanimo
ikaw ang akong kagawasan
sa akong kasubo ikaw ang magmalipayon
wala ka masayod niana
wala kay madungog
ning amang kong
kasingkasing

sa saktong takna

lisod kang biyaan

inig tikang nako palayo kanimo
adunay makulang kanako

pati gani ang akong anino
nalisang

ang akong panglantaw nanipis
unya mga balod nga luha

mibanlas kanako
sa baybayon sa kahaw-ang

apan bisan pa niini
moabot lang gihapon ang

takna ang hinog nga higayon
nga ako mobiya kanimo

bisan pa ug mahimo akong
hangin

bisan pa ug ang tanan kanako
matunaw

hangtod nga ang imong madungog
mao na lamang ang

hagawhaw sa usa ka agipo
sa nasunog kong kalag

ug ang imong makita mao na
lamang ang aso


nga midali ug lutaw
paingon sa ngitngit nga wanang

ang unod, ang himbis ug ang bukog sa akong tilaok

daghan ta ako ug isulti
apan adunay bukog ang akong tilaok

ang akong bout isulti dili na mao
kon ako na kining litokon kanimo

imbis unod ang mogawas
pagkadaghan ba hinoon sa mga himbis

ikaw nga nakakita niini
wala na mitoo kanako

ang imong nadungog hinimbisan na man god
unya ang unod maayong pagkapodpod.

bisan pa sa makadaghan

hapit nahikalimtan ang
buot  kong
isugid kanimo

dugay na kini
nagpahipi sa akong
likod

duro nakong pangita
sa akong pakamatyan

apan wala na kini dinhi
wa ko gayod makaplagi

ugma mogikan ako
paingon sa halayong dagat
sakay sa
walay kataposang balod

apan bisan pag
maguba ko ang mga balaod
bisan pag tumpagon
nako ang mga
tinuhoan
ang mga dili mo
masulti

mobalik gihapon ako dinhi
aron matuman
ang akong gipangandoy
kadtong
ako gayod nga
pakamatyan

bisan pag mausob
ang tanan kanako
bisan pag
dili ko na mahinumduman
ang unsa kanako

balikan ko gihapon
kining balaya
kay wala matuman
ang hitabo
wala mahagki ang
ngabil sa
tinood kong
gugma

kadtong ako gayong
pakamatyan
bisan pa
sa makadaghan

gugmang matuod

nanghambog ang maong babaye
nga nagluto ug itom
pahinungod sa banang nahanaw
duha na ka tuig ang
milabay

"ang kaulag mahimo man diay
usab nga limot-limotan"-
dayog pakita sa iyang kamot
nga wala na magkurog

misambat ang tigulang
"bisan gani ang gugma
mapapas man
sa kagamhanan sa
kalimot"-
gipakita sab niya ang
kunot na kaayo nga
pahiyom

ako nga namati
wala gayoy angay nga
 ikapanghambog
wala man gani ako'y
ganang mosumpay
sa ilang mga tingog

gibali-bali  man god sa
kaulag ang akong tuhod

unya ang akong
dughan maayo man gong
pagkalumping diha sa
gamhanang alho
sa gugmang
wa mahadlok sa gahom
sa kalimot

wa sila masayod nga ikaw dili na tawo

balikan mo ang
kaniadto

tawgon ka sa
kagikan

pagkadaghan
ba
dili na maihap

ang kalipay
gaguot nga mga
anino
sa usa ka hardin
sa ilalom
sa bulan

unya adunay
mitumaw nga gamay
nga kahilom

giuli ang kaniadto
gipuli ang karon

maguba ang imong
nawong
naasloman ka
sa imong
natilawan

namakak kadtong
mihalok kanimo

sabton tang
sakit usab pamation
ang kakusog
sa ilang mga katawa

apan sipyat ang
hunahuna
hagbay rang
dili ka na
tawo

ang imong mga kamot
dili na gani kamot

dakong baha ang
imong kasingkasing
ang imong lawas
kusog nga bagyo
 sa hangin

usa ka balay nga syagit

sakit paminawon
nga ang katarungan sa gugma
mao nga kini
anggid anggid lang sa
tinood

usahay
mas nindot man diay
ang larawan
kaysa
mahikap

ang hagkan mao
lamang ang anino

sakit mabati
ang hunghong sa
tinood

mao nga aron
matambalan ang
kasakit
pinaagi sa paghikalimot
sa kahapdos
gipuy-an mo
ang gubot nga balay diha sa usa
ka syagit

 






nagpuyo

tres pension

pagkadako sa akong
lawak

apan
pagkahuot ba ning
akong
kalibotan

dos palmas

nag-inosara akong
nagkaon
sa dakong pizza
sa dos palmas

naglantaw kanako
ang usa ka
pitpit

nagbilin kog momho
sa kilid sa
lamesa

dakong kalipay niini
ang akong
pagpahawa

patong

akong
gipatong ang akong duha
ka tiil
sa duyan

ug sa tunga nilang duha
akong
gilantaw ang pagsalop
sa adlaw

ning akong panaw

 

wala ako'y pangayoon kanimo
bisan ug mohatag ka sa usa ka pungpong nga mga bulak
sa kalooy
dili ako modawat niana

ning akong panaw
kahilom ang akong gikawo
kuyog kanako ang
pagpaubos nga
tiguwang na kaayo

mas hinay pa kining molakaw
kaysa iwon
ug bisan sa kataposang adlaw
wala kini magpalaban
sa tingog

ang gidangatan

 
dili makita ang kahaponon
diha sa kahayag
wala kini nagpuyo dinha
ang agianan paingon didto
mingaw
sa imong pag-abot
mangahulog ang
mga dahon
unya kadtong nahigugma kanimo
dili na
motingog

ayaw kasubo
kay mao kini ang gidangatan
sa kadaghanan

ang gibuhat sa kamanghoran

 

mikuha siya
sa dakong bato
ug gibuno niya
kini
sa iyang tatay

naigo ang walang
bahin sa
abaga
sa iyang nagsamparay
nga
amahan

ambot
hangtod karon
wala gayod siya
nasayod
sa iyang
gibuhat

ang gisulti sa kamagwangan

"unsa
tukuran mo silag
bag-ong balay?

tigulang na kana
silang duha

mangamatay na na!"

ang pag-antos sa usa ka inahan sa lima niya ka mga anak

tungod kay daghan kaming
nangiskwela
naning kaayo si nanay

sa wala, ice candy
sa too, piniritong kamote
sa atubangan, budbud nga kamanting
sa likod, ang bukayo

pagkahapon
ihap sa sinsilyo

pagkagabii
himo sa lesson plan

pagkakadlawon
sugod na sa hikay
sa mga ibaligya
sideline sa
eskwelahan

moonlighting
ingon sa principal

tungod sa daghan
kaayong gihawiran
nahug si nanay
sa sakyanan

nawad-an ug
bagol-bagol ang
tuhod

unsaon ko kaha
pagkalimot niining
tanan?

paghinumdom kang nanay

 

daghan ang mga sugilanon ni nanay
kahinumdom ka ba kabahin ni
Flora del Cielo?

ah, mas nindot ang kabahin ni
Saturno

wala pay kuryente kaniadto
dili kaayo hayag ang lampara
unya sayo kaayo kitang
matulog tupad ni Nanay

unya sugdan dayon niya ang iyang
mga sugilanon
usahay hadlok ug busa kitang
tanan
moluklok sa iyang kiliran
nga morag mga itoy
sa irong bag-ong nanganak

dayon motingog ang kikik sa
kilid sa bintana unya mangahadlok kitang tanan
apan sa kilid ni nanay
mawala ang tanang kahadlok

ug kitang tanan
sa katulog nahinanok

unsaon kuno pagpasar sa pasulit

aron dili kuno mahadlok
miingon si nanay nga disir mosulod sa lawak
magsulod ug gamayng bato sa bulsa
dayon
kumkumon kini
dayon sa ikatulong lakang
pangadyeon
ang usa ka amahan namo

ang gisulti ni nanay kanako kabahin sa gaba

 

ang gaba
dili kini sili nga mohalang dayon

dili usab gayod kini
magsaba

kabahin sa iyang nanay

 
gimudmod ni Nidas
ang nawong ni Kunsay
sa salog sa banyo

dako ang iyang tingog
nga milanog sa
balangay

nganong ang iyang inahan
nangihi na usab sa
maong salog

nangahadlok ang tanang
tawo
kabahin unya sa
moabot nga
gaba