sa kadugay nimong suroy-suroy sa
mga kalsada sa dakong syudad
kada gabii
og tutok nianang tag-as kaayong
mga poste
miabot ra gayod gihapon ang
kapool

usa ka gabii miabot ang duha ka
bitoon nga
mipatong sa kataposang poste
nga imong gihikap

mihangad ka
apan dili na sama kaniadto
wala ka na'y gana

mibalik ka sa lasang sa kilid sa bungtod
didto ang imong gamay nga payag
og sa imong pag-abot didto
gitagbo ka sa lunhaw nga hangin
nga migakos kanimo

nanghumot ang mga rosas
og miawit ang mga sapa