si elvis, si Michael og si Joel og si Eduard

sa pagpakanaog sa hukom batok
kang Elvis
(dili Presley ang iyang apelyedo)
akong nadumduman si Kuting
nga nanganak og unom ka
itoy nga lain laig balahibo
nga kon moduol na gani si Pretpret
og si Samsam
haskang isuga jud
mopagawas dayon sa iyang hait nga
mga bangkil og moulbo ang tanang
balahibo sa iyang lawas

mao kana si Elvis sa dihang
nasamdan lang sa botelya sa Sting
ang wait sa iyang anak nga
si Michael (dili Jackson ang apelyedo
og labaw na nga dili Jordan)

iyang gibunalan og bato ang ulo ni
Eduard nga nakuyapan sa daplin sa
dalan og bisan og wala nay panimuot
sige lang gihapon siyag sipa og labay
sa iyang hagtok nga kinumo
nga og kon wala siya bitara ni Joel
(dili Torre ang apelyedo)
nan segurado jud untang maundang
ang kalendaryo sa
hubog usab nga si Eduard

sus kapaskong dako sa Barangay Uno
ambot og ngano nga walay kalinaw ang mga tawo
ambot og ngano nga ang unahon mao man
ang inom og
paghuboghubog
dayog pangulata sa mga milabay
bisan gani og dili kaila

nindot ba gayod ang bation nianang mga paregla?
daghan ba jug yawa kining atong balangay?

naglisod kog sabot
niining bagang sagbot sa atong katilingban.