balik sa kinaiyahan

gakutabkutab
si Loloy Kolokoy
sa radyo
sayong buntag

daotang balita na
usab, lain na usab nga
daotang balita

ang matag adlaw
sa kanunay puros
daotang balita na lang
gayod lamang

nangalap kog
kalipay
gisalikway ko usa
ang mga pulong
ang mga madungog
og mahunahunaan

haw-asa una ang tanan
ilabay ang bisan unsa
gawas na diha

lingkod diri sa dakong
bato
lantaw sa dagat
pamatia ang awit
nga gidala kanimo
sa mga balod

sa tamsi nga anaa
mibatog sa sanga sa
bayabas

mibuswak na usab
ang dama de noche
ayaw ibungat ang
kahumot  niini
matag gabii

ang puya nga dragon

matag buntag
gihaploy sa akong tudlo ang
gasinaw nga lubot sa
puya nga dragon

unya moabot na ang
gipaabot
nga kon buot kwentahon
dili baya gayod unta
kinahanglan

apan unsa pa ba ang
kahulugan ning imong
kinabuhi?

wala mangudlot ang
imong gitanom nga
lomboy

wala miliki ang luna
sa yuta nga imong gilubngan
sa liso sa nangka

matag tawo mangita gayod
sa bisag unsa na lang
aron magamit ang umaabot
nga adlaw

ang puya nga dragon
nga sinaw og sampot
nga walay busganan
apan dili kamaong
malibang

giampoan mo siya
O! bahandi
Lipaya siya
wa na siyay busganan

di kamaong musuka
di sab kamaong malibang

sa akong nakita diha kanimo

nagpabiling kulang ang panahon
wala pa gihapon mapuno ang puko
wala pa gihapon mitindog ang nagpungko
ang karomata gihaw-angan pa
dili pa andam ang kabaw sa usa ka pagbira

kon unsa ang buhaton, buhata na
kulang ang panahon alang sa angayng buhaton

sa laing lawak atua ka nagwaldas sa panahon
subay sa lahing dalan sa hiwi nga hunahuna
ikaw ang gitaral bisan asa
gigapos mo ang imong mga kamot
gitabonan mo ang imong mga mata
og ang nagtaral kanimo usa ka maligno

ang moabot sa imong kinabuhi

usahay makapangutana gihapon ka,
"aduna bay moabot karong adlawa?"
sayod ka nga wala, apan nanimpalad
ka sa usa ka pangutana, basin anaay
laing tubag, nga alayon sa imong
mga pangandoy,

usahay, bakakan mo ang imong kaugalingon,
"adunay moabot karon-- karong buntag,
aw, karong hapon",
kadtong taga ozamis, aw, kadtong taga
Loon,

dili nimo matulon nga ikaw usahay
nalooy sa imong kaugalingon, kabahin
sa wala miabot, nga imong kanunay nga
gihandom,

gitipigan mo ang mga luha diha sa kilid
sa imong aping, dayon nimog lantaw sa
bintana, ngadto sa layo, sa unahan, "adunay
moabot karong gabhiona' gimahal ko siya"

nakatulog ka, og bisan sa imong damgo,
nagpabilin ang hangyo nga unta ugma sa
buntag moabot na gayod ang maghatag og
kausbanan ning balaya, kadtong maghatag
og suga, kadtong mag-abli sa pultahan,
kadtong maghabok sa imong gitanom nga
punoan sa sili, usa ka kahalang sa imong
dila, unta

sa kaudtohon, adunay miabot, usa ka sulat,
dili para imo, nasayop lang ang gahatod,
dunay miabot nga buwak, apan laya na
kini,

dunay nanuktok sa imong pultahan,
apan igo lang siyang nangayo og tubig
nga iyang imnon, wa gani ka kaila sa
iyang ngalan,

gadali og sul-ob sa iyang tsinelas,
bitbit sa putos sa iyang abaga,
 kay layo pa ang iyang panaw.

ulan sa gugma

sa wala pa miabot ang
kilom-kilom
giduyan ko ang akong
kaugalingon
sa veranda, usa ka mata
nga nagtukaw sa unahan
diin dagko ang mga kahoy
unya nagpasad ang mga bato
sa dalan, apan bation gihapon
ang kalapok, ang kabasa sa
yuta, ang pagdakop sa mga
abog, dayog balhog niini
ngadto sa sapa, kay

karong gabhiona miabot
ang ulan, mibanaw ang tubig
layat sa kabukiran,

ingon ani ang pag-abot sa
ulan, adunay nadungog nga
dahonog, sama sa usa ka
nindot nga balita,

unya sama sa mga bata
gisul-ob sa mga dahon ang
ulan, sama sa mga pajama,
dayog hunghong sa nanay,
"anak, katulog na" hawid
sa alugnan, o teddy bear
or monyeka ba kaha,

wala ang pusil sa ilalom
sa higdaanan, o ang shotgun
sa kilid sa pultahan,

"anak, katulog na" dayon
ang usa ka awit, oyayi sa
kagabhion,

hinay nga ulan, bugnaw,
ang kalibotan, malinawon,
walaang kabug-at
ang mga dahon
sa kahoy,
naghambin sa hamog
 ulan sa gugma.

dili ko molihok

usa ka baybayon nga
mingaw, ang kasingkasing,
dili ganahang mosalom
sa dagat, usa ka naghinuktok
nga lutok, ang panglantaw,
dili ganahan moduaw sa
panganod, sa langit dili ganahang
mopasiplat,

usa ka walay hugas ang
hunahuna, usa ka garapon nga
nahutdan sa tuba, ang
mga pangandoy, didto sa unahan
usa ka aninag sa usa ka kahayag
layo sa akong mga tudlo, ang
gaungaw nga kabuntagon,
gihawiran ko ang yahong
akong gipatong sa akong ulo,
dili ko molihok, ihuwad na
O Ginoo, ang akong kapalaran.

usa ka bol ang akong kasingkasing
ihuwad na Ginoo, ang usa ka hungot
nga tuba, dili ko molihok,
dili ko hubog, usa lamang ako
ka tawong unta gustong
matikig, ipalayo sa karigkig

puros amang

wa ko na damha
ang imong pag-abot, ikaw,
nga akong
kanunayng gihangyo
isip akong kagabhion, dili
usa ka kahadlok sa
kangitngit, kondili usa ka
init nga gakos, ikaw ako,
ikaw unta ang maghatag
kanako og bulan og mga
bitoon, ang magpatam-is
sa aslom nga pag-inosara,
bisan sa hamubong panahon
lang, bisan kon ako mahimong
usa ka dakong bakak
sa katilingban, kon moabot ka
ang baso dili na baso,
ang katre dili na katre alang
kanako, ang yahong sa
talad-kan-anan
mahimo na nga laing
kalibotan alang kanako.

wa ka man miabot sa akong
kinabuhi. salamat.
gihipos ko ang yahong, nga karon
yanong yahong lang gihapon,
ang baso giputos ko sa akong
panyo, ang katre akong
gihabolan,
og ako, nagyawyaw,
apan sa hamubong oras
lamang.

salamat. nakatulog ako.
ugma inig mata nako,
ang tingog sa ulan
mao gihapon ang akong tingog.

walay nausob sa plastada
sa akong balay.
ang mga tanom, nanubo,
namuswak, namulak nga
puros amang.

inahan sa kalibotan

nga ang panit lunhaw nga mga bungtod

gisaninaan sa mga kahoy

gisabsaban sa mga kanding

ulan

lahi ang ulan,
mahimong alingongog sa kadugay
sa walay hunong
nga bagotbot
apan sagdi lang kay wala may
pulong

ang imong masabtan
kabahin sa ulan
anaa ras imong mga pagbati

di na kinahanglan ang mga pulong
miawas na ang mga
punong
nakaikyas na ang mga isda
atua na na lawod sa dagat

gaan na ang dughan
morag tyobibo ang dagan
lutaw sa langit
morag usa ka pignit
sa usa ka
sampinit

sa haya sa usa ka igsoon...

didto sa iyang haya
miiyak ang igsoon
siempre kay daghang
nakakita

apan sud sa iyang kasingkasing
mas maayong
nawa na kadtong nagsunog
sa ilang
kaugmaon

namuwak ang mga kapatagan
namuswak usab ang mga panganod
pagkaasul sa langit
dinhi
manukad na usab ang akong
kinabuhi