sa pikas tampi sa kalipay

 unta mahinumduman pa nato

ang atong gibuhat

didtos bulgaria

kaniadtong gauros-uros

pa ang gugma

Kinsa ba ang

nasayod nga uyab tang

duha?

wala say nangutana

sa atong katam-is

walay nagduda sa atong

kahigal

sukwahi kita sa

tradisyon katoliko

gisupakan ta ang

regla sa Ginoo

wala usab nato

hunahunaa ang gugma

basta lang, basta lang

gyod

diha sa pamahala

gipiyal nato ang tanan

kang Bathala

nahingangha kita sa pabuto

sa mga milagro

sulod sa kwarto

karon gipangita na usab

nato kini

ang Hulyo katorse

ang disyembre 25

ang kabibo sa ibabaw

sa tulay

ang pagpamilok sa 

kalangitan

ang atong paglabang

sa dalag nga suba

paingon sa pikas tampi

sa kalipay

ngano kaha nga mas

malipayon man kita didto sa Bulgaria

kaniadto sa wala pa kita gibugkos sa latos

sa kaminyoon