kinilaw

 gihinayhinay ako ug

pagpasabot sa akong

kapalaran

kabahin sa mga walay

hinungdan 

nga nakahatag kanako 

ug kahadlok (bisag dili

baya gayod

unta kahadlokan)

kana bang mouli ka

na unta

apan nakalimot ka 

asa

unya bisan unsaon

nimog hinumdom sa

lugar

wala gyod kay 

mahinumdoman

ang imong palibot

karon mo pa lang

gayod nakita (bisag

dili baya gayod unta)

naa kay natagboan

abi mog nakaila ka

apan wala (nga unta 

naa ka may nakita sa

iyang aping 

sa katas-on sa iyang 

buhok)

nalisang ka sa 

panghitabo, apan dili

ka kadagan

nagpaabot ka apan

walay paaboton

misulod ka sa usa

ka balay nga walay

tawo

unya ang dakong hawan

madungog mo ang

bakho ( apan dili kadto

bakho

hangin lamang kadto

nga galibot libot

sa piot nga bentana

sa  salog nga sinaw

sa buslot nga atop 

nga gilutsan sa kahayag

nga naghimo ug usa

ka mapa

diha sa nag-inosarang

linkoranan

(unsa ba ang ngalan

sa maong isla? bisag

unsaon dili mo 

mahinumduman) ah,

makalisang, makahadlok

ang matag-adlaw

unya sa imong kakapoy

imong gikilaw.