kon imong gihimong
pamahaw, paniudto
og panihapon ang
pag-iyak

ang dagat haskang
busuga na
gayod anang
iyang kaasgad

gihagwa sa nanay
ang batang gamay
samtang wala pa
ang labyog sa tatay

gihagwa una ang
gugma nga putli
samtang wala pa
ang gipaabot nga
kaulag sa buli

tunukon nga rosa

antoson niya
paghawid ang mga tunok
sa pula nga
rosa

makahalok lang
unta siya bisan
sa usa na
lang sa daghan
kaayo niya nga
gihay

(in short,
bisag tigulang na
torpe lang gihapon!)

(nganong mangita
man anang
tunukon
nga naa may
daghang
hamis og mga
sanga
og sinaw
nga mga
punoan)

(pagkabuang
mo nga nag-antos
nianang
makasamad!)

pagdakop sa pula nga alindanaw

sa dihang nakita na niya ang
pula nga alindanaw
nga mibatog sa sanga sa
kandingkanding
mihupo siya og sa hinay
kaayong mga tunob
midool siya og ang iyang
kamot iyang giisa
nga morag dupong
nga katukobon
ang iyang tudlo iyang
gisanga
nga morag dila
sa tinidor nga morag
tirador nga walay bala

ang iyang nahikapan
mao lang ang ikog
nga sapnot
dapit sa tumoy
og tungod sa iyang
kakulba
sagol sa kahinam
ang abtik nga pula nga
alindanaw
nakabantay og kini
nakaikyas
sa iyang binayot nga
paghawid

pagkawalwal gayod!

ako si unyok
ang tawong walay lingaw
intawon nagmingaw

ang balak mao ang tuba
nga karon
sa akong tilaok
akong iyarok

ang akong isumsom
kadtong tuyom

ang istorya sa duha ka buhi

Kung duna silay istorya ako aduna usab
kung adunay baboy si manoy nga wala pay ulag
ako adunay kanding nga kanunayng nibahihi
atua sa tagsa tagsa niini ka tangkal
silingan silang duha apan dili kini makalabang
sirado ang tagsa tagsa niini ka kural
gituyo haron dili maglambod ang duha ka pisi
basin unya mabugto, malisod na unyang
ulion sa ilang tagsa tagsa ka mga kaugalingon

sugdan nimo ang imong sugilanon sa usa ka lalaki nga ambongan
og sa babaye nga maoton

(mao kanay sugod sa sugilanon ang usa ka
kontrobersya, dili ba?)

ang babaye nga uhaw sa tanan
(gugma ba o kaulag lang)
mitan-aw sa lalaki nga ambongan

apan ang ambongan nga lalaki buta
og ang babaye amang


(laktoron ko na lang kini
kay wala na akoy panahon
anang paglikoliko sa akong tumong)

taposon nato ang atong sugilanon sa usa ka kaminyoon nga pagkamalipayon
nga milangtod sa kahingpit
lukop, visayas og mindanao

(ako lang gisabat ang
advertisement ni doktora abogada
rosaroso)

kay ang babaye hilomon
(amang god, di ba?)

og ang lalake walay nakita

(balika og basa, buta ang lalaki
sa atong sugilanon)

dili ba mao kana ang
perfect marriage?

ayaw og supak
ako ning balak.

silang mga putli kunuhay kaniadto
nagtoo nga kitang tanan dinhi magpakabutabungollang gihapon
gitabontabonanang tanannga sa ilangtan-aw kitadinhimaghangtod ngadiliandam
sapagdawatsailanggitagotagoan ngamgakamatoorandiha sa lubnganganilalomsa
pultahansamgasimbahan
gitabiltabilanangmgaotenogbilatsamgasantos.
pwe! masbastosbayaangmgabakakonognagpakaaroningnon
gasugodkanasa paraiso
angmgakinatawoniadanognieba
nahimongmgadahon.

watol *

bisan unsaon nimog pangusog
kon walay nabalhin
og misibog
wala kay agi o ikaw bisan sa
imong kakugi
wala lang gihapo'y maabtan
wala'y madawat
wala'y maani nga sa mubo pang
pagkasulti
wala kay pulos

mao kana ang balaod sa
physics

apan lahi ang sa pamalaod sa
mga ispirito
bisan og nagpuyo lang ang mag-uuma
nga nag-ampo sa ginoo
ang iyang mga daro midaro
og ang mga sagbot nangalata
lang sa ilang kabubut-on
og ang iyang mga kabaw
dili maigo sa linti
og pagkakusgan
bisan og wala'y kaon
og giinom

og ang iyang mga tanom bisan walay
tubig og abono
pagkatambok og pagkalig-on
og sa pag-abot sa ting-ani
pagkadaghan gayod sa bunga

ang ang iyang kamalig
pagkapuno sa humay nga bisan sa ting-ulan
miuga lang og ila

*watol = walay taytol

usa ka lusok sa tipasi
sa ibabaw sa lamesa
nga puti kaayo og mantil
tapad sa abohon nga
tasa sa kape
nga nag-aso aso pa sa kainit

nangita ka og sumpay
niadtong usa ka lugas sa buhok
nga nahulog didto
sud sa tasa sa kape

nag-unsa ba ang buhok?
og ang tipasi?

walay katin-awan
apan atua ang duha sa puti kaayo
nga mantil

og ikaw nagpangutana sa
kutsara og tinidor nga
kanunay gayong magtapad

usahay ang mga butang
wala'y koneksyon
kay sa tinood wala gayod silay
konekson
apan atong gipasanginlan sa ingon

og ang mga butang mismo
natingala
naghunahuna nga basin
kita nga nagbuhat sa koneksyon
wala na sa koneksyon

nagkita ang kasili og ang luwag
og kitang duha
nangatawa

nganong magsugod man
sa 1 hangtod sa
10

o a hangtod
sa ta o wa ya

ganahan gayod kita
nianang sunod-sunod
sa numero og
letra

nga mora bag og wala na kini sila magsunod
sa atong pagbungat
mora bag kitang tanan mangawala
sa pagtunob ta
ning atong kalibotan

nakalimot ta nga nagsugod baya
ang tanan sa kasamok
dayon miabot ang kunuhay
paghan-ay sa tanan

gusto kong mobalik kita
sa atong sinugdan
kanang wala kitay gisundan

kanang wala ang uno dos tres
og abakada

kanang magsugod ta sa
kasamok sa
wala

basin og dinhi
mas tinood tang tanan

basin lang

pagkahuman sa ilang hamubong
panagtakbo

didto sa payag nga hapit na madugta
didto sa kilid sa bungtod

gibiyaan niya siya
og wala na mobalik bisan kanus-a

ang iyang mga singot misurop
pag-ayo sa iyang panit

ang iyang pahumot dili gayod
matangtang sa iyang dughan

ang iyang mga luha
wala makabawnas sa iyang kahinam

ang iyang mga kalipay
usa na lamang ka hisgot-hisgot sa nagsalimoang

ayaw kasina sa mga bulak sa iyang hardin

ayaw kasina sa mga bulak
sa iyang hardin

ang bulok sa iyang mga rosas
lab-as nga dugo

ang mga dahon
luspad ang pagkalunhaw

ang mga tunok
nakasamad sa mga bata

og ang mga gamot
mga kadalanan sa kasubo

Usa Ka Bata

Usa ka bata
Nagtungko sa daplin
Sa ganghaan sa sinehan
Nagpaluoyluoy intawon
Aron siya pasudlon.

Akoy
2009.5.10

kon unta molihok lang ang mga butang
bisan dili tandogon
kon unta ang mga patay sa atong palibot
mabuhi
kon unta ang mga wala na dinhi
mamalik
kon unta ang mga humay mobalik
nga og dagan sulod
sa atong mga kamalig
kon unta ang mga balak
mosulat na lang og ila
kon unta ang akong kasingkasing
mahigugma pag-usab
alang kanimo

pagkaanindot unta sa atong
kalibotan

kon ngano nga walay kalinaw

ang puti nga salapati
nagbitbit sa sanga nga adunay dahon
gilantaw mo nga gibugtaw nila

walay hunong nga paglupad
gikapoy na intawon

kay walay bisag usa kaninyo
ang nangabre sa inyong mga bintana
diin unta siya
makatugdong og makahigda

pagpanigarilyo

maghimo ka og mga panganod
gikan sa imong mga ngabil
mobulhot ka og hangin
gikan sa sulod sa imong kasingkasing
og imo kining ipaabot kaniya

ikaw nga wala gayod mahigugma kaniya
bisan kagamay sa tungaw lamang
og bisan kanus-a
bisag kadyot lang sama sa pagtundog
sa alindahaw diha sa dahon sa anahaw

gipangandoy niya ang imong
kaparotan og sa matag hanggab
nimo sa ayang mga pangagho
pasayloa lang siya
kay sa iyang kapildihon
gidamgo niya ang imong hinanaling kamatayon

ang akong amigo nga potot

kining akong amigo nga potot
itomon
(apil na diha ang iyang dagkong
bagtak
og lapad kaayo nga lapa-lapa
nga sindanganon)

hay, pagkahawod gayod
apan ok lang
kay bisan og unsaon niyag
pataas taas og barog sa akong
atubangan
ang iyang lapad nga likod
dili gyod makasalipod

frost/nixon

aron dili siya gukdon sa kamatooran nga nagdalag
hait kaayo nga bangkaw
hangtod sa kahangtoran sa iyang kinabuhi

gitubag na lang gayod niya ang pangutana
kon duna ba siya'y kasayoran sa pagpangilad og pagpamakak
kon ang katawhan iya bang gibudhian
kon iya bang gibarato ang kinatas-ang katungdanan
nga morag nahimong ukay-ukay na lang

wala kaayo nako madungog ang tubag kay morag
guba na ang speaker sa akong dvd
apan ang tumang kahilom mas nagsulti sa ayuyok sa kamatooran

mihiyong ang iyang mata nga gustong mopagula og mga luha
nanghubag ang iyang nawong
milingin, mitaas ang iyang ilong
og milingi siya sa wala didto dapita diin wala na ang mga tawo
gipaningot siyag bugnaw
og mibalik og tan-aw kang frost nga morag iring nga gibidli
nga andam na nga mamatay
bisag siyam pa ang iyang kinabuhi

bisan unsaon og balitok og tuok og tuis ang kamatooran
mosombalik og miingon
ang sad-an nga wala mahukmi nga sad-an
sa usa ka buruka sa korte

oo, tinood, og akong gibasolan ang tanan
mapasaylo mo pa kaha ninyo ako?

nadam-ag

nadam-ag ra ang komedyanteng babaye
nga bisan unsaon niyag hilak og pangayog pasaylo
ang mga bungtod sa banaue
mitutok lang kaniya og dayon og hangad sa langit
og tan-aw balik kaniya
nga morag wala na siya dinha

ang mga ginoo sa gabon og sa mga kakahoyan
naglantugi sa iyang pangutana

kon ang igorot dili ba tawo?

nawarik

nawarik na usab ni heide
ang iyang mid-year bonus
alang sa iyang bugtong nga anak nga babaye
nga drop-out sa silliman
nga wala kasugakod sa iyang nursing

ang mga silingan naghisgot og babayeng
nakuhaan
nga ang anak wala pa'y klaro kon kinsa ang amahan
ang fetus gibitay didto sa kampanaryo sa
simbahan sa santo rosaryo katoliko

pagkawalay puangod sa pari nga gipasumanginlan
nga maoy hinungdan sa tanan

ang inahan sa kanunayng panabang atua na sa siquijor
sa pagkuha sa iyang anak nga nadisgrasya

miingon ang among janitor nga dili ra kaayong tsismoso
nga dili siya motoo anang daot-daot
kay para kaniya kon modako na gani ang tiyan

segurado siya nga kanang bayhana buros na usab

pakighiusa sa bathala

ang panan-aw sa hulmigas
mihaom sa mata sa dagom.
ang nakitang kahayag way
pagkapalong sa agas
sa buhi nga pulong

apan ang lantip mong dila
makapukan og galamhan.
sa kahilom, nakita mo unta
ang damgong gi-anod...

huyang ang hinanginang trono
nga sa lang-at nag utaw-utaw,
sa usa ka tusak mahisama lang
sa abog nga napupos
daw mga pat-ak
nga gilamoy sa bung-aw.

naglikos ang mga sunanoy,
himan sa nag-ikis nga dalan
nga naglit-ag sa atong garbo

unta ipadpad na lang kita
sa huyuhoy og tugotan
nga sa taliwala,
mahilis ang panahon

og sa pagkatagak sa maskara,
kita magkatipon...

candice salazar

dili pa man unta kalagkalag
apan ang imong lugar nga gipuy-an
giputos na man sa baga kaayong gabon
ang ang alisngaw sa kabugnaw
nakapakurog sa akong mga bukog

palihog lang
ayaw og tago diha sa lubnganan
hikapa ang imong pupolan
ang imong dugo nagdagandagan

pag-ampo

daaghan matang ang pag-ampo
adunay pag-ampo sa pagbasol sa imong mga gibuhat
nga unta ikaw mapasaylo
lain sab tong pag-ampo nga unta mabuhat nimo
ang gusto nimong mahitabo sa imong kinabuhi
naay pag-ampo nga ang buhat na mismo ang pag-ampo
diha sa pagbuhat sa angayang buhaton
sumala sa lamdag sa kahayag sa Diyos

adunay pag-ampo nga dili gayod madungog
og adunay madungog apan gipalapos lamang sa dunggan
adunay mag-ampo nga anaa lamang sa pagpamati
pagtindog, paglingkod, pagpatihaya, pagluhod, pagpangurus
pagpaanod-anod lamang
bisan asa ka dalhon
sa kusog kaayong sulog sa gugma
og kalooy

usahay lantawa
pagkalayo pa gayod kaayo ang anod ning atong suba sa kinabuhi
wala na gani ako masayod kon asa na ako

ikaw lang
dapit didto sa imong kahaponon
silong sa kahoy nga nanganipis ang dahon
ang mga bato wala mangilabot kanimo og ang mga balod sa dagat
nagbuhat lang sa angay nilang buhaton
ang mga bungtod sa unahan nanaglaray
andam na sila sa usa ka prusisyon
ang adlaw mitago na
dili ganahan nga moduyog
sa umaabot nga dakong kasubo
ang mga panganod
nangamuyo sa pagkamaaghop
sa bulan

pagkahuman

pagkahuman
nalusyang tang duha nga wala nay mga umoy
nahikatulog
og sa tumang kahilom miabot ang kalanggaman
sa mga damgo
og sa ilang mga kuko og mga pako gidagit kita
didto sa gingharian sa fantasia
mora kitag mga balahibo sa manok didtong dapita
naglutaw-lutaw sa mga panganod

pagkahuman mibalik ta sa atong mga tinan-away
mitindog naligo nag-ilis og atong giabrihan ang
mga bintana og pultahan
migawas ta
og atong giatubang ang matag-adlaw
nga lumalabay

pagkahuman ang atong mga buhok nangaputi
og ang atong mga unod nangaluag
og ang atong mga bukog
nangahilos
nagkilingkiling nga morag dunay nanuroy og
ice cream

pagkahuman naglingkod ta sa daplin sa dalan
nanginit ang atong mga bangko
sa pagpinaabot
sa langgam nga itom nga dagko kaayog mga pako
og hait kaayo og mga kuko
gusto natong dagiton na kita
sa kamatayon

wala na kitay masulat
pagkahuman unya sa tanan....

dili ikaw ra

kon mawala ka gani
ayaw kahadlok
kay sa pagkatinood kon ikaw nawala
og kon ikaw dili na kahibalo sa dalan kon asa ka paingon
og dili na usab makabalik
kay nasirad-an
o dili ba kaha
natikig ka na sa kahadlok og ang kalimot
migapos kanimo
ayaw og kapanic
lingi sa imong likod
lingi sa imong kilid
og padayon lang og lakaw sa unahan
kay matagboan basin
nimo kami didto
kay sa pagkatinood
haskang daghana baya nato
og kon magkatapok na ta
magtagay ta
maglipay ta
kay daghan na ta
wala ka mag-inosara higala

tunok

ang pagpakahilom daw nahisama
sa tunok sa akong
totunlan
og busa wala nako mabungat
ang imong
balaanon nga ngalan
dili bukog sa isda
ang naa dinhi
dili hait
wala'y bulok
kanunay ko kining gitulon sa matag adlaw
og busa
midaghan ang samad
dili sa akong kalawasan
dili sa tinai
o akong tiyan

kon dili
sa akong kalag

drama sa duha ka kamot

gibutang mo ang imong duha ka kamot sa lamesa
gipundo og miduko ka mora bag
gustong makigsulti sa salog
ang lamesa bugnaw
sa sayong kabuntagon
ang akong mga kamot sud sa akong bulsa
apan sa kadogayang pangaliya
sa puti nga panyo
migawas kini og mipaatbang sa imong
mga tudlo
gipatong ko ang akong mga kamot sa imong mga kamot
nagpabilin ang kahilom
tumang kahilom
gawas lamang sa mga hunghong sa hangin gikan
sa guba nga bintana
nga dili na matrangkahan og lansang
mitulo ang luha sa imong mga mata
nahulog sa lamesa
gisuyop sa kahoy og nauga
wala magpabanban ang akong kasingkasing
wala nay gahom ang pasaylo diri sa akong dughan
gihaploy ko ang imong mga kamot og akong gisulod pagbalik
sa bulsa sa akong karsones
nasayod tang duha nga kini na ang kataposan sa tanan
sa tanan gayod

ugma mao na ang pagpahawa
sa tanang kasakit
aswaton na sa akong mga kamot
ang bug-at nga paghikalimot

ang akong nadungog nga awit

sa bag-o pa ang kalibotan
nabati ko ang awit sa kaligdong
puti ang iyang mga nota og ang iyang mga liriko lunhaw

mitunob ko sa yuta nga humod sa yamog
og nabati ko ang sinugdanan sa kabugnaw
ang kainit sa akong lapalapa
sa hinay hinay milukapa

gipuy-an nako ang payag sa kalipay
og nagdugay ko didto samtang ang akong mga kamot
nagsalimuang sa paghawid
sa mga paa sa kaanyag

ang awit sa hangin nindot kaayong pamation
gikan sa dagat paingon sa bukid
og balik balik sama sa usa ka taginting sa
bag-id sa mga kawayan

apan sa kadugayan
nianang tagay sa kalaw-ay
samtang ako nagpauraray sa dughan sa tumang kalipay
sa bus-ok og humok
ako nalupaypay og wala damha nga ako nasarasay
sa kakusog sa busay

miabot ako sa tumoy sa akong pagpaturatoy
sa subong panagway
naghinuktok sa kilid sa balay
namati sa awit sa hangin
kabahin sa nagpabilin

lahi ang awit karon
kay nagpabilin og kamingaw
morag kataposang bagting
sa kampana sa kiting

mibalik ang akong kagahapon
nga akong gisulod sa kaban sa kahaponon
nabanhaw ang kasakit sa kapakyas
wala ako makaikyas

ang hagit sa adlaw

nganong daw sa katumanan ang tanan
nihaploy na usab ang hangin sa sayong kabuntagon
sa akong kasing kasing nga naughan

mikitiw na usab ang akong hunahuna
sa imong mga pasaring nga gugma
ug mitambol ang akong kasing kasing
sa imong nagdahunog nga mga pangagho

pagkalisod gyud hagiton sa langit
hilabi na ang adlaw sa iyang tumang kainit
makahilos, makalapnos,
daw sa kapeng init ning sayong kabuntagon
nanggunit sa akong naghaw-ang nga ginhawaan.

sa dili pa ikaw mosalom sa dagat

sa dili pa ikaw mosalom sa dagat
giandam mo na ang imong kaugalingon
nianang pagkahumod sa asgad
nianang nga balod nga umaabot
niaanang pag-usab-usab sa
panahon
sa hangin og sa kangitngit

gani sa pipila ka gabii sa imong kinabuhi
gihandom mo kini
sa imong mga damgo
gibati mo na ang dagat nga mogakos
usab kanimo
sa imong mga pangandoy
wala kay sapot nga gipabilin
kay ang dagat bisan kanus-a pa
walay gisuot nga mga dahon og kakahoyan
gikan pa kaniadto
og hangtod karon
ang dakong dagat dakong hubo
og sumala sa imong ginadamgo
hubo ka usab nga mosalom
paingon sa iyang kasingkasing

naa dinha sa lawod sa dughan ang kalami
nga walay katagbawan
wala sa pusod
wala sa pus-on
og sa ginaingon mo
tumbas usab didto
ang dili maihap nga mga pagsulay
kay sa kalipay
kuyog usab ang pagbudlay

dagat sa pagsulay

misakay kita niadtong baruto
kuyog ug uban sa atong mga pagtuong
ikasinabot ta ang usa'g usa

gibitbit tang katig sa atong duha ka gugma
nga gusto natong mahimong lig-on
sa paghasmag-ag unya sa mga balud
sa atong kaminyuon

mapasalamaton akong ikaw
ang nahimo kong kapikas sa akong paglayag
sa halapad nga dagat sa pagsuway

nasayod akong mahimong dili kini sayon
apan mitahan kita sa atong duha ka kaugalingon
isip mga paon sa mga tentasyong gutom

ngano basang nikatap sila sa atong palibot
ngano basang nanghagwa sila sa atong kahuyang
pastilan unsaon nalang ug matulon kita ug mataban
sa usa kanila nga naghakang, nagpanilap sa atong kaparutan?

imo pa kaha akong itakin pagbalik sa imong hawakan?
ang dagat nalang tingali ang andam ug taganang mudawat kanako
siya nalang tingale ang nasayod nga gihigugma ko usab siya
sa iyang mga balud bisan pa sa katugnaw niini

talithi

pagkahuman sa kusog nga ulan
nalimpyo baya ang tanan
mikislap ang mga dahon sa kahumayan
daw bag-ong sapatos
nga nashaynan
ang mga gihay sa pula nga rosas
sa kilid sa dalan
nakasakmit og mga yamog
nga daw mahalon nga perlas
nga nangumpayot sa liog
sa maanyag nga dalaga
ang dalan nagbasa
ang mga bato nangahumod
sama sa pagkahumod sa duha
ka nagkahinigugmaay nga nagkita
usa ka gabii niana
didto sa gamayng payag nga walay tawong nagpuyo
sa daplin sa bungtod

nagpabilin ang mga talithi
bisag miaabot na ang adlaw
ang mga bungtod nagpakahikom lamang

ang mga sagbot nagpakita sa usa ka paglambo
mibaga og ang mga kabaw nga nagsabsab
busog, bus-ok og walay tingog-tingog
sama sa mga puti nga tulabong
nga kanunay nilang mitupad

miundang na ang talithi og mipuli ang kahayag
naglingkod ako
sa dako nga bato
silong sa kahoy sa mabolo
wala ko kapugong sa akong gibati oroy
ako nakataghoy.

markado

kon ikaw ang ilang gihisgotan
sa matag hugpong
og kon ang ilang mga ngabil
ilang gipaak
sa matag hisgot sa imong ngalan

kon ikaw ilang gikasilagan
gidumtan og giplanohan nga
panimaslan

kon sa umaabot nga adlaw ilang
gidamgo nga moundang na ang imong
kalendaryo

kon ikaw ilang gipaninguha nga dili
makasaka
nga ikaw diha ra gayod sa ubos kuyog
sa mga mayukmok

kon ang tanang mga buho nga imong
gipanghimo
ilang gipangtabonan

kon ikaw wala na'y lutsanan
kay ang tanang mga bintana og pultahan
ilang gipangsirad-an

nan, ikaw ang gitawag nilang markado

ayaw og kaguol
ayaw og kahadlok
ayaw og kadismaya
pakusgi hinoon ang imong paningkamot

kon ang mga buho nga imong gihimo ilang gipantabonan
ayaw og balhin
pagboho lang gihapon hangtod silang tanan kapoyon

kon gisirad-an ang mga pultahan og bintana
ablihi ang salog
kon gialihan nila ang imong agianan
pagbuhat og laing agianan
hangtod silang tanan kapoyon

kon mahimong moambak ka
ambak
kon mahimong molupad ka
lupad
kay daghan gayong pamaagi
ang tawong markado

og kon sa kataposan ila ka na gayong patyon

ayaw kahadlok
ayaw kabalaka
ayaw kadismaya

ang mawala kanimo ang ilang gipatay
mao lamang ang imong lawas
kay ang imong kalag adunay duha ka pako
og kini kahibalo lang gihapong
molupad

palayo na sa hangtod diha kanila
ayaw na og balik
kay sila walay mga pulos
kay sila dili mo isigkaingon
kay usab
mas nindot ang imong paingnan

ang nahitabo

ang nahitabo nga naghatag nako
og dakong kasubo
mao nga ang akong pitaka nawala
dili na bale ang
kwarta og ang akong cedula
og ang akong ID
og ang akong driver's license
og ang akong credit card
og ATM card
og ang akong novenahan
sa sacred heart

ang akong gikasub-an mao
ang imong larawan
unsaon na lang ang akong
mga kagabhion?

Ang Pagkatagak

nagpatihulog ang langgam
lahos sa hangin
ug milihay sa humok
nga gabon

labay sa bukid nga
gibukotan sa batunaw
ug sa mga oras nga daw
mikaging sa katugnaw

ang kahoy nga pat-ak
karon higanti
na alang sa langgam
nga gikan sa langit

unta, giputlan na lang
og pako sa mga bathala
ang dili sarang
nga dulotan sa grasya

ngadto sa haw-ang,
nga giladmon sa kalibutan
way trompetang miugong...

ang pak-an nga bathala
nga gihikawan sa gugma
napukan.

ang mas molungtad

ang atong gisulayan og tangtang
mao ang mga hikot sa kalimot
gusto natong hinumduman og
giunsa kita didto sa halayong lugar
(kadtong ang atong makita mao na lang
ang gilak sa gamay kaayong bitoon)
kadtong gidungog nga atong gigikanan

og ngano og naunsa
ikaw lang man tingali ang mas nasayod

ang akong dakong sayop anaa
diha sa pagtoo nga ang matag sugilanon
adunay kataposan
nga ang mga sad-an pagasilotan
og ang mga gidaog-daog
magmadaogon sa kaulahian

gibasa ko pag-usab ang mga sugilanon nga gibilin
ni anton chechov
akong gibalikbalik matag gabii nga dili ako mahikatulog
bisan og tupad kanimo

og didto sa tumoy sa iyang mga panudya
akong nakita
nga mas nindot ang mga butang
nga nagpabilin sa atong dili pagkaila kanila
mas bililhon sila kon dili nato butangan
og ngalan ang ilang mga kubtanan

mas maanyag ang mga wala'y kapaingnan
ang wala'y kasulbaran
mas humot, mas pait, mas molungtad
labing makaikag

Pahisulod sa Galamhan

...angay lang ilabay
ang bato sa lim-aw
aron mabalik ang iyang gilaw.
og ugaling ang adlaw
nga nanamin madugmok sa
iyang pagkatagak,
ipiyong ko lang ang akong
mga mata aron ilimod
ang kangitngit ug motugsaw
sa iyang handuraw

hay...mga balibato'ng
miangkon kanato,
mibilin ug timaan
nga nag-awhag
pagpuno sa bung-aw

sa gihapon nag-alipasa
ang kagabhi-on...

ang wala nato mahuman

ang wala nato mahuman
maoy atong pasumangil
nganong dili pa kita
mobiya dinhing dapita

og siya nga atong gisanghiran
motoo nga ang wala mahuman
kinahanglan gayod nga humanon
kay basin mao ra usab kini
ang hinungdan nganong
kita dinhi pabalikon

og busa daghan ang wala mahuman
og busa daghan ang mitapot
dinhing dapita
mikapyot morag mga
hubog gikan sa pista sa lungsod
diha sa lubot
sa jeep nga haskang
punoa na kaayo

gustong mopauli
apan gihandom gihapon ang pagbalikbalik
kay wala pa mahuman ang tagay
ang tigi
sa atong pakighinabi
sa atong mga pamalibad

ang tawo nga nagpayong og itom sa daplin sa baybayon

ang tawo
nga nagpayong og itom sa daplin sa baybayon
naglakaw
pauli sa iyang balay
usa ka ka gabii niana
nag-inosara
og kon imong matagboan
dili motingog

(wala pa ko mahuman)

ang tawo
nga nagpayong og itom sa daplin sa baybayon
naglakaw
pauli sa iyang balay
usa ka ka gabii niana
nag-inosara
og kon imong matagboan
dili motingog
dili gani molingi
kay wala kaniya ang
pamatasan
nianang pagpangambat
sa iyang kaatbang
og silingan og ni bisan kinsa man

(magpadayon ko)

ang tawo
nga nagpayong og itom sa daplin sa baybayon
naglakaw
pauli sa iyang balay
usa ka ka gabii niana
nag-inosara
og kon imong matagboan
dili motingog
dili gani molingi
kay wala kaniya ang
pamatasan
nianang pagpangambat
sa iyang kaatbang
og silingan og ni bisan kinsa man
og busa siya
gikatahapan nga adunay
daghang tinagoan
og busa siya
sa mga tanod
gipapaniiran

(gusto nimong modadayon ko?)

ang tawo
nga nagpayong og itom sa daplin sa baybayon
naglakaw
pauli sa iyang balay
usa ka ka gabii niana
nag-inosara
og kon imong matagboan
dili motingog
dili gani molingi
kay wala kaniya ang
pamatasan
nianang pagpangambat
sa iyang kaatbang
og silingan og ni bisan kinsa man
og busa siya
gikatahapan nga adunay
daghang tinagoan
og busa siya
sa mga tanod
gipapaniiran
apan sa paglabay sa pipila
ka adlaw
wala gayo'y nakita
nga kalainan
nianang tawong
nagpayong og itom sa daplin
sa baybayon

(time sa, dunay miabot,
mobalik ra ko)

kahulugan sa kaisog

ambot
og nakadungog ka na ba
kabahin sa usa ka bagtok
nga miiyot sa iring?

ayaw og katawa ha?

ang mananabang
nga ulay
sa dihang migawas
si Jonas
sa bilahan sa iyang mama
nagkomedya
sa usa ka pangutana
kon kinsay gayoy
makaangkon
sa suntoy ning bataa

ayaw og katawa ha?
kay siya ra ba

og kabahin usab
kanako
sa dihang nagpatuli ko
sa klinika ni
dr. (tagoon lang nato
ang ngalan ha?)
ang nag-asister
mao ang iyang
asawa og usab
nagkomedya kon
kinsa kaha
ang unang makatilaw
niining suntoya

ayaw og katawa ha?
kay siya ra ba

ang akong mga bakak

ikaw nga nagbasa kanako sa matag adlaw
mas nasayod ka
kabahin kanako
kaysa akong
mama pati na sa akong
asawa

puros mga bakak ang akong mga balak

kining napulo nako ka bakak
labaw pa kini
sa usa ka gatos nga kamatooran

moabot ang takna nga ikaw hadlokon
patyon ka
sama sa iring sa imong kaugalingong look
nianang imong pagkamapakisayron
dili ka unya makaginhawa
kay mahutdan ka unya og hangin
diha sa imong pagkakuryoso
mahilo ka sa kusog kaayo nga aso
mahimo kang tonto
mawad-an kag trabaho
ang tanang malas maanha unya kanimo
og kanang tanan

ikasubo ko pag-ayo

patas-anay og ilong

kon pagpatas-anay lang og ilong
ako og si pinocchio
mas taas kining akoa

mas tinood pa
kay dili kahoy

ulan

kaniadto
ang ulan
ulan lamang
nga atong giduladulaan
naligo kita sa ilalom sa ulan
wala nato kini
gihimong dait
nianang luha niaanang kasakit
wala nato kini
gitakdo nianang pagbakho

kinsa ba ang nasayod nga ikaw
nag-iyak diay sa silong sa kusog nga bunok sa ulan?
ikaw nga nagtudlo kanako og kalipay

adunay kagabhion nga sa kakusog sa ulan
mikanaog ako sa hagdan
og sa walay pagkahadlok nga mabasa
mitampisaw ako sa ulan
sa among nataran
gialirongan sa habog kaayo
nga utlanan

naglingkod ako sa bangko
sa among hardin
og miinom ako sa
mga lusok sa ulan
gihigop ko pag-apil
ang akong mga luha

tig lang

tig lang
ang tan-aw nimo sa imong kaugalingon
tigsag-ob og tubig sa banga nga naughan
tig-trapo sa mga lama sa banggera
tig-labay sa mga basura
tig-hulip sa mga nangagisi nga buyot
tig-tapak sa mga pagkulang
tig lang

gikan pa kaniadto
tig lang ang tan-aw nila kanimo
hangtod nga miabot ang tig nga dili na kapugngan

tigulang ka na
unsa pa'y imong gipaabot?
biyai sila,
lipaya na ang imong kaugalingon

nosibalasi

alas otso kinse pa sa buntag
martes, ang among silingan nga gikan
sa chicago
nga bisag unsa na lay trabaho didto
hardinero, tubero, serbidor,
kubrador, driver,
(lover pod kuno)
mikanta nianang
nosibalasi

wala na usab sa tuno
yabag
kay ning sayo sa kabuntagon
hubog na kaayo

ang iyang asawa og duha ka anak
mibiya na kaniya
kay wala na siya'y kwarta

ugma patas-an nako og duha ka
hollow block nga dugang patong ang
among pader

basin unta og makuha niya ang
akong sumbingay

gimingaw ang yuta

miunos na usab kagabii
taud taud ko usab nga nabati ang taghoy sa hangin
nga nipahayag sa iyang kasuko
nagpadayag sa iyang gibati sa yuta

kinahanglang bang manghagis
kinahanglan bang magwala, mupasakit
haron kini makabalos?

milunop ang yuta sa Mabolo
ug sa wala damha'ng
ang luha midagayday daw busay
daw sapang nangita sa iyang dalan
haron lang kini makapahulay

pagkapait gayod kung muabot na ang ulan
pagkahapdos sa kasing kasing nga samaran
sa matag hapyod niini sa luha
nga gustong mualim sa kaparutan
pagkahapdos sa iyang mga talidhay

aduna pa ba kaha'y kahigayunang mupahiyom ang adlaw?

muhalok pa ba kaha siya sa mga tanaman ug bulak
nga dia nag-atang kanunay sa iyang pag-abot

hain ka na adlaw?
hain na ang kanhiay mong pahiyom?

gimingaw ang yuta sa imong mga bukton...

ang balak sa matag adlaw

kini ang akong balak
sa matag adlaw
dawata

kini ang entry sa akong journal
sa matag adlaw
dili mahanaw

kini ang diary sa usa ka kalag
nga nangalisngaw
sa matag adlaw
walay kaulaw

kini ang katarungan sa akong pagpulaw
sa kalayo
nga walay pagkaugdaw