2016/10/19

bahin kanako

i


gitabonan ko ang
akong mga ngabil

apil na ang akong
dughan

gitagoan ko pag-ayo
ang akong kasingkasing

kay kining tanan
dili kini alang kanimo

ii

pait palandongon nga
kining tanan
akong giandam
akong ihalad
alang sa mga wala
makakita kanako

ang akong kasingkasing
alang sa
walay pagbati

ang akong kamot alang
sa gihapdosan sa
akong paghawid

ang akong mga ngabil
dili nila hagkan

ang tanan kanako
ang imong gihigugma
anaa 
nangausik lamang
nga kon gihalad man
ila lamang
gilakangan

iii

anaa ang maldisyon
mitapot sa akong panit
dulot sa akong bukog
tagkos sa akong pusod

nahinumdom ka ba
sa tawong ang iyang
mahawiran mahimong
bato

sa babayeng ang iyang
malantaw
mahimong abo

sa tiguwang nga kon
molingi ug balik
mahimong asin?

iv

atoa ako didtong bahina
natawo sa usa ka tunglo
giamoma sa mga gaba

ang akong higugmaon
mao ang dili mahigugma
kanako unya
kadtong hugot nga nahigugma
kanako
dili ko usab
mahatagan sa saktong panahon


init ako nga kape sa kaudtuhon
bugnaw ako nga bahaw diha 
sa ting-ulan

v

ang akong kaugalingon
nagpabilin nga sayop diha
sa tingkatulog
maglutok ang akong mga mata
diha sa kadaghanon

makighangop ako sa mga
dili mo mailhan
manghatag ako sa mga walay
nahibaw-an kon unsa ang
pasalamat

magpabiling guot ug luag
ang akong mga sapatos
naghimo ako ug mga balay nga
dili nako maako
nagtukod ako ug mga labat didto
sa baybayon

vi

wala ako makaila sa kalipay
gihigala ko ang mga kasubo....



Panginhas dire