alang kang Fr. Tony

managlahi na ang atong kalibotan

nasabtan ko kini sa kataposan natong
panagsulti
ang imong pag-inom og kape
og ang pagtrapo nimo sa nausik
nga pudpod sa mamon
sa sinaw kaayong lamesa
mao ang sumbingay
sa atong panagbulag
sa sanga nga dalan

diha ka sa too og ako
gikan pa kaniadto mopili gayod sa wala
ang tunga nga atong
gireserba unta damlag
ato nang gipapas

"ikaw ang nakakita sa kahayag
ug kami nga ania pa sa kangitngit
nagpabilin sulod ning
lawak nga trangkado
ang pultahan" panapos nga
tugon mo alang kanako

mipahawa ko
migawas, og misulod ko
sa lain na usab
nga pultahan,
trangkado usab kini
sama sa
inyong lawak.

tigmo sa moralidad

ang lami nga akong gibalik-balikan
akong gibalik-balikan
sa pangandoy nga unta
kining klaseha sa kalamian
dili ko na unta magustohan
kay gasakit na ang akong dughan

og aron unta makalimtan
akong gibalikbalikan
gipangita na nako ang kasum-ol
aron dili na ako
magdula nianing bagol-bagol

sa akong pagbalik karon didto
nabati ko ang ul-ol
ang kasumo
og adunay gamayng kalipay nga gibati nako sa akong dughan
kay basin og mahitabo nga kini
dili ko na gayod balikan

ang metafor og ang literal nagkuyog
ang usa nagpa-iring-iring morag dili iring

ang usa nagpaka-iring
kay gikan pa kaniadto, karon, ugma og hangtod sa kahangtoran
ang iyang lolo og lola og ang iyang amahan og inahan
og ang inahan og amahan sa iyang amahan og inahan

ayaw kalibog
iring gyong tinoora

ang metafor
mikatawa, miiyak, nangihi, nalibang
bisan walay baba, mata, (ikaw sulti) og lubot.

sa kadugay nakong tinuon
anang mga meanings, stories, memories,
voices, economy, links, og mga expectations
labi na ang mga metaphors

sa akong kadangag og pagkawalay
interest, aduna akoy dili gayod nako malimtan
kadtong akong tapad nga puti og paa
og bus-ok og dughan
nga og kon akong kuhiton mobalos sab
og kuhit
kay lagi
dili jud palupig

si Pacing.

eulogy sa asawa alang sa iyang bana

kon mamatay ka na unya
og ako pasultihon sa imong haya
dili ako magpanuko sa pagsugilon
sa mga daotan nimong nahimo
kadtong imong hagok
nga wala'y undang-undang
kadtong imong pagpangluwa
sa kilid sa alugnan
kadtong imong pagkapalaihi
kadtong imong
pagpanguyab og lain bisan ako
dako pang buhi
kadtong imong pagtan-aw nga ako
nagmata lang og buntag
ako silang suginlan, silang tanan
sa dili ka pa ilubong
nga ikaw bisan pa sa tanan
akong gimahal
ikaw lang gayod

nga ikaw bisan pa sa imong pagkamakasasala
nahimong hingpit sa
akong panumduman

ang asawa sa mangingisda nga pungot kaayo sa iyang bana

bogo nga kilat kadto

nganong ang Petromax man lang
nga gipatong sa ibabaw sakayan
ang maayong pagkaigo

mag-unsa man god ang imong
mahalon nga kahumot
kon imo lang akong duawon
makausa sa usa ka tuig lamang

ang imong katahom wala'y pulos!

samtang nagsulat ko aning balaka

samtang nagsulat ko aning balaka
nadungog nako ang iyagak sa iring sa ibabaw sa kisame
nanganak na pod
ang kuragan nga ang kinaham nga sungkabon mao ang usa ka kalderong
inun-unan nga tuloy sa among dirty kitchen

kaganiha sa among pagpamahaw sa akong Sweetie
nananghid ang among helper nga si cristita nga kutob lang siya karong petsa 28
kay magminyo na siya sa iyang uyab nga si crispin
buros na diay usab siya og upat ka bulan

kagahapon sa among pagpangaligo sa beach kuyog ang akong magulang nga si Leonora
samtang si cristita nagsugba sa pulag ikog nga isda sa ilalom sa kalubihan
nanglibak
nga kini si cristita buros gyod kay ang iyang nawong luspad og ang iyang pitik sa ugat dapit
sa tilaok kusog man kaayo og medyo milapad ang iyang baligkawang
mipahimangno pa gani nga kami dili lang magsaba
(apan gusto gyod nakong tinoon)

tinood gyod

alas dos singkwenta'y nuwebe sa hapon,
wala ko ganahing mo-report sa opisina
kay lagi dia nagsulat ko niining balaka
namati sa agulo sa iring nga nanganak sa ibabaw sa among kisame

og si crisitita misulod sa akong study room
mihilak
sa akong atubangan.

alang kang Jun

mipakatawa ka
sa text kabahin ni pacquiao og hatton

"dili tanang matulog,
naa sa katre"

mibawos kog "ha ha ha"
apan sa pagkatinood wala nako handoma ang katawa

pait ang kahimtang namo dinhi
wala'y katre

wala'y katulganay
og kon maigo ka sa kumo
modugo
kay diri walay glabs

ang bala dinhi dili ma-stop, pause, play,
ang maigo
seguradong patay

ang pagpatootoo

toto ang nagpatootoo
paingon sa too og ikaw, babaye, nga nagputong
kay hadlok makita ang imong nawong, miduol og mikuhit kanako,
nangutana, og unsaon ba nga ikaw motoo, og ikaw nagsugod nianang kahadlok
nga moantog niaanang birador diha sa bato sa balaanong hantak,
nagkurog ang imong mga kamot, og sa tinood lang, wala ako'y nakita nga kunot
(laming kan-on ang imong mga tudlo, tam-osan, supsupon)
miluhod ka kanako
nangayo og tabang, kon unsaon nimo pagpagawas ang tanang
pulong diha sa imong baba og dughan

akong gihawiran ang imong buhok, gikuha ang tabon sa imong nawong,
gihagkan nako ang imong mga ngabil, og ikaw miiyak sa usa ka lamian kaayong kamatooran

"ingon ana"

mao kana ang pagpatootoo, ihatag lang ang gugma og kalooy,
ihatag lang ang alang kaniya

og palihog lang ayaw ibilin ang imong kasingkasing diri sa akong tunga-tunga
dili mao kana.

paghandom sa akong puppy love

sayong miawit ang akong kasingkasing
alang nimo
og namati ko
sa tambol nga bag-o

sapirot pa ang akong huna-huna
nga gusto nang modako og molupad
mas gustong mahimong alibangbang
ora-ora dayon

akong nahinumduman didto sa
tindahan ni paloma
atbang sa plaza ni rizal
nasina ko sa mga tag-as og barog og dagko na og mga bukton
miorder ko og usa ka botelyang beer
miawat ko nila
namati sa juke box
samtang mitukar ang
three lovely flowers ni eddie peregrina

pait kaayo sa akong dila ang san mig
kadyot ra kong nahubog
og kay hapit na mabuyong mibiya ko

nalimtan pa gani nako ang bayad

ako kang gisuginlan sa dihang nagkita ta sa pier
didto sa dumaguete
og mikatawa ka
miingon nga nagabaan ko
kay wa ko mibalos sa imong suwat

(paagia ang pumpboat sa panahon)

sakit palandongon.

naminyo ko, naminyo ka.
sa lain.

alang sa akong hinigugma

palihog og batia ang akong mga balak alang kanimo
karong buntaga
kay mobasa ka man kaha sa akong mga mugna

isipa nga kini mga daffodils
sama nianing hulagway

hikapa, lunhaw
bugnaw.

humot pa ba?

sa kadugay nimong suroy-suroy sa
mga kalsada sa dakong syudad
kada gabii
og tutok nianang tag-as kaayong
mga poste
miabot ra gayod gihapon ang
kapool

usa ka gabii miabot ang duha ka
bitoon nga
mipatong sa kataposang poste
nga imong gihikap

mihangad ka
apan dili na sama kaniadto
wala ka na'y gana

mibalik ka sa lasang sa kilid sa bungtod
didto ang imong gamay nga payag
og sa imong pag-abot didto
gitagbo ka sa lunhaw nga hangin
nga migakos kanimo

nanghumot ang mga rosas
og miawit ang mga sapa

sumbingay nga gasgas na kaayo

mga buhok nga uhot
butones nga ilong
mansanitas nga ngabil
mga aping nga rosas
mga tipaka sa imbaw nga dalunggan
duha ka sapiring nga kilay
mga mata nga holen
palo-palo nga nawong

wala pa'y labot ang
imong gikasuk-an
kadtong miingon si Loty
nga ang imong ilong morag
palwa sa lubi

nga ang imong agtang
morag lapad nga basakan

nailad ko sa usa ka pultahan
nga miabri alang kanako
kay sa akong pagsulod
namatay ang akong kalipay
kay didto aduna na usay laing pultahan
nga akong abrihon
og lain na usab ang bayad

nagasto gayod pag-ayo ang akong dughan

kaagi

ang akong iro nga itom
nahadlok kanimo
og ako nga hubo sa akong dughan
mihawid sa akong pula nga purol
bitbit ang akong surfing board
gisubay ko ang balas nga dalan paingon
sa imong puti nga kotse sa
daplin sa linaw kaayong asul nga dagat
nga abri nang daan ang too nga pultahan

trabaho lang ning ako
walang personalan

paghikalimot ni sarah

kinsa ba si sarah sa imong kinabuhi?
nganong nagsubo ka man karon?
unsa bang halok ang gihatag niya sa imong mga ngabil?
hapwag ba sa pawikan ang iyang gihatag kanimo?
undangi na ang paghubog sa imong kasingkasing
kalimti na ang maot nga mga damgo
si sarah halas, ang iyang paak makalanag.

pagkataas sa akong mga pahimangno og ikaw nga
siging gayarok sa beer, og naharag na sa kahubog nga morag
barkong kalunuron diha sa tunga-tunga
sa lawod sa kusog nga pagkusokuso sa bagyong Berong
mitubag:

"Sarah, who?"

ikaw, isip, magbabalak

ang magbabalak gipanday, wala matawo.kadaghanan kanila sila ra'y naghimo. ikaw ang imong magtutudlo, ikaw ang imong tigbansay sa pagpangayam nianang mga sumbingay.wala'y libro, walay laing tawo ang makahaw-as kanimo sa panahon sa kahiubos, og ikaw ang maghimo sa imong dalan paingon sa pagkaplag og sa pagpalapad sa imong papel.

wala ra bay katagbawan.

wala pa'y pako ang imong buko-buko. antos lang sa sa pag-ambak-ambak diha sa ubos tupad sa mga gagmayng bato.

hay-ad sa kasagbotan. luko diha sa kaadlawon. gamita ang kainit sud sa imong dughan. haita ang pagbati sa imong lapa-lapa. ayaw kalimti ang gahom sa imong mga kuko

ang sumbingay mao ang katakos nga ikaw mahinumdom sa mga butang ng kanhiay ra nimong gibiyaan, apan namalik,

nga kanhiay ra nimong gilubong, apan nabanhaw.

mao kana ang nakapasaag nimo apan mao kana ang makapahinumdom kanimo nga ikaw lahi kanila.

ang sumbingay mao ang universo mekanismo sa pagmugna og kabag-ohan sa imong panglantaw sa wala nila makita.

hagit kini sa tibook nimong kinabuhi, og samtang miulbo ang kalayo nga imong gipasiga diha sa imong dughan,

usa ka adlaw niana mopahiyom ka sa imong kaugalingon og mangutana

"nganong karon lang kini miabot kanako?"

paghinguto sa balak

sukad kaniadto
wala na jud ko magpahinguto sa akong ulo

kotoon
daghang lusa
kalkag
ang akong mga buhok

apan akong ulo ni George..

ako ni.
akong ulo ni, kwadrado.
dili lingin.kwadrado. apapangigon.
redford.

ambot ba,
basta, ganado lang jud,
pwes. shoooooot.

shaaaaaaaatong!
utong lang.

kros,
imbaw,
labaw.

dula-dula ra man
god ning ako,

psst, ayaw lang god kog
seryosoha,

wala koy sulod.
bisan hangin.

kon kasag pa ko,
gaan.
tipaka lang.

apan saon ta man.
hala bira ra ni tanan.

kabahin sa pagpamalak

morag mitapot ang pulong
ni Bay Butch
gikan kang Horace,

nga kon mogamit man lang kuno
tag pahumot
dili na lang pod tong baratohon....

hala ka!

Juice ko! (tan-aw sa akong pahumot)

Baratohon...Ah, bahala na
Pahomot lang jud ko gihapon...

panaghigala?

nagtukod ka ug balay
nagtukod sad ko ug ako
balay nanagtagbo nga way tawo

nagtoo ka nga ikaw ang pinili
kay sa dihang bata ka pa
mipatong ang usa ka salampati
diha sa imong kawo

nagsalig ang imong duha ka ayuyok
og ang imong pusod mipasiatab
nga ikaw dili madutlan niaanang
mga kasakit

nagdako ka nga harohay
ang tanan nga imong gipangandoy
kanimo nakighugoyhugoy

naningil ka sa bendisyon sa
mga salampati
sa imong trono isip hari
ikaw karon molingkod
sa imong pagkahingkod

dugay nang nabuak ang mga salamin
og busa ikaw wala gayo'y nakita

og sama sa dahon sa saging
kalit ka kaayong nalaya

wati

siya ang kataposang mopirma
sa imong mga papeles

magpasensya ka
kay ang iyang lawas usa ra

danlog, og humod, basa,
og kon mosigulon na gani siya sa iyang mga regla
dili kamaong motutok

dili galot ang iyang dating
apan gikan pa kaniadto og hangtod karon

kon siya na gani ang mosulti
nga imo nang panahon

wala sugod nga ang ulod
namakak

ulod siya kon imong tan-awon
apan ang iyang tinood nga
pagkatawo mao gayod ang wati

kadtong miawit sa pagbaha sa luha
diha sa walog sa luhaan
kadtong miduyog nimo
sa imong gibiyaan

og kon gusto pa gayod nimong madungog og otro
akong balikon paglitok

"siya ang kataposang mopirma
sa imong mga papeles"

dili diha sa paggamit sa iyang mga tudlo
kay wala siya'y lapis

Tuaw

Luwasa ako ning akong kahimtang,
Hatagi'g luna intawon ipahimutang.


Mugnaa ako.
Ihimugso sama kanimo.
Ipintal, ikulit, isinggit,
I-awit ug ipaambit,
Haw-asa ako sa kangitngit.

Sa imo unyang paglalang kanako,
Daghang kakulian imong mahinagbo.
Ayaw sila isipang babag,
Hinunoa sila imong kaabag.

Ipatuki ako sa kadaghanan.
Pisa-pisaha, dugmoka, sangaga,
Lahogaya, tumpi-a, hapniga, tumpaga,
Gub-a ug unya ayoha.

Pakadak-i ako,
Pakagubti ug palalisi.
Himoa akong suliran
Ug pangitaig kasulbaran.

Mugnaa ako
Sa way utlanan nga kaamgohan.

Ug unya,
Dihang mahigayon na ug mahimutang,
Mobarog akong gawasnon,
Sa katawhan tahuron...
Pagadayegon !

sa pilosopiya nga ang atong kinabuhi dinhi
usa ka dakong pader
gibangga ni Albert ang iyang kotse niadtong gabhiona
(dili man unta siya hubog kay siya dili man gani
moinom bisag beer man lang)

sa usa ka dakong pader, nabuak ang iyang bagolbagol
og sa pagpiyong sa iyang mga mata makita nga
wala kini bisag gamay na lang nga kahadlok
gani ang pagpahaluna sa iyang mga pilok diha sa iyang mga mata
nag-asoy man sa usa ka dakong pasalamat

usa ka pahulay
(sa dayon, nianang kahayag nga walay pagkapalong
mao kana ang orasyon)

mao ra usab ang nahitabo kang Ernesto
maingon nga pareho ang ilang gipili nga kapalaran
ang pagbangga nianang dili matarog
kanang segurado gyod nga siya ang mapungil

mao lang sa gihapon
nakab-ot ang gipangita nila nga sulbad
sa kagubot sulod sa ilang mga hunahuna

mora bag ang nylon sa ilang pasol maayong pagkalukot
og dili na makit-an asa ang sinugdanan og ang kataposan

busa ila na lang giputol aron mahuman ang tanan
og ang isda sa kahangtoran
dili na mabingwit

nangutana ko ni Fr. Moreno, kon ngano nga ang mga pader
og ang mga haligi
og poste sa atong mga kalsada
nahimo na mang mga ginoo

mikibit-balikat ang pari nga akong classmate kaniadto sa ateneo
" I don't know" maoy iyang ingon
og dayon niyag higop sa iyang kape nga init kaayo

sulod sa akong kasing-kasing naa ko'y nakita nga kahayag
kaniadto misulod ako nianang maong langob
wala ko miiyak
wala ako mitoo sa mga anino

migawas ko og nangagho, og karon takos na usab akong moingon
wala usab ako masayod
ako usab, naglutaw-lutaw lamang

ang pagpanimun sa sakayan

Ang nakaparat niining tanan
mao nga bisan unsaon pa natog hawid
sa timon ning sakayan sa atong kinabuhi
dili gihapon kita maoy agdon sa dagan niini.

Dili kitay magbuot sa mga panghitabo.
Di mapapas ang nangahitabo na,
wa ta kahibawo sa umaabot.
Di gani ta kaseguro unsay mobutho
sa atong huna-huna karon gyod dayon.

Sa matag segundo. mahimong mausab diha-diha
ang dagan sa atong panghuna-huna,
depende sa bisan unsa.

Ilusyon ang atong buot.
Dili kitay timunil.

Wa ta kahibawo unsay mahitabo sa unahan,
bisan sa kasamtangan.
Kinsay makapugong sa ilang kaugalingon
kon sa kalit mawad-an sila sa maayng pangisip
ug makahukom nga moambak na lang
sa halawom nga lawod atubangan
sa nagpungasi nga mga balud,
aron matibway ang tanan?

kinsa man say makatag-an
nga sa dihang mag-ungaw
na siya sa kamatayon
mokalit pag-ilog ang kaamgohan
nga dili pa diay angayan nga moundang
siya niining maong panaw?

Ang mga nagpabilin nga naglaom
nga kinng panaw adunay padulngan,
kanus-a man sad kaha sila makaamgo
nga wala diay kahulogan kining tanan.
ug mahimong putlon o padayonon
diha sa pagkawalay pagpakabana,
diha sa pag-angkon nga dili sila maoy timunil,
ug busa buhi-an na lang ang timun
ug magpa-ubay na lang sa sug sa panahon?

makaseguro ba sad kaha sila
nga ang ilang gibuhat mao gayod ang angayan?
Di kaha sila malunod?

domingo

Domingo
ang ngalan sa akong lolo
Paciencia
ang ngalan sa akong lola
Caridad ang ngalan sa akong iyaan
Prosperidad usab ang
ngalan sa among kamagwangan nga babaye
Kay si lolo bilib lagi sa kaisog ni Gregorio del Pilar
Si Papa ang ginganlag Gregorio
Og si Mama nga kamanghoran
Gihinganlan og Francisca
Isip awat-awat sa santos nga si San Francisco Javier

Ang doktor ni Mama, ang ngalan Ricardo
Mao usab ang akong ngalan

Didto nagsugod ang dakong lantugi
Kabahin sa akong kinabuhi

Ang nga Domingo dili na sagrado
Ang Caridad nawad-an og kaluoy
Misamot kaputong si Gregorio
Og si Francisca sumala sa iyang ngalan
Nag-antos sa tibook niyang kinabuhi

Ako nga ginganlan og Ric
Wala gayod moamin sa ginganlan og Ricardo

Wala milukso ang akong dugo
Og sama sa bitin, nahimo akong isog og idlas.

kadtong mga putong nga milalin

kadtong mga putong nga milalin paingon sa layo og lain nga kalibotan
kadtong nakakita sa kahayag sa tumoy sa agianan sa langob
og nakahukom nga kining tanan
dinhi mga ilusyon lamang

kadtong mga miutong og nangatikig
kadtong atong giiyakan og gibilaran
kadtong naghatag kanato og kasal-anan
(nga wala baya pod unta nato nahimo)
kadtong naligo sa ilang kaugalingong dugo kadtong nagpabilin og sulat sa ibabaw sa ilang katre
kadtong mas nakahibalo kanato nga ang kinabuhi anaa ra diay ang utlanan sa tumoy sa pisi

ila lang unta kadto,
mangilabot lang kita nianang pag-ampo
nianang pagluto,
nianang pasalamat
nga kita buta lang gihapon,
nga kita nagtoo lang gihapon
nga aduna gihapoy kahulugan
ang mga tibogol sa kamay
diha sa ilalom
sa dakong bildo nga garapon

dyotayng pangagho, dyotayng pangamuyo dyotayng kahilom, dyotaynga pagpamati,
dyotayng pagpaabot,

bisag dyotay lang gayod kaayo.

ang nagpabilin

ang nagpabilin didto mihawid
sa lig-on nga kamot sa relihiyon

apan sa dihang wala na
ang bisan unsang pagbati

mihawid na lang sa bisan unsa
sa sinsilyo, sa sipilyo, sa martilyo

sa sabon bisan og danlog na kaayo
sa pader sa syensya misandig sila

kadaghan pa silang mamatay
luba-lubaon, lusak-lusakon

sa sakit og ngotngot sa kawras
sa adlaw-adlaw nga kapalaran

ang uban nagpakog na sa ilang ulo
ang uban nagdagandagan na sa dalan

kay lagi wala na'y kapaingnan
ang uban miambak sa suba

mipaundaray sa sulog, mikuyog
sa mga balod, tak-om na ang mga baba

nangita og mga buaya, mga halas,
alimatok, ok-ok, tungaw,

ang uban nangita sa tumoy sa bangaw
gihandom ang kolon nga bulawan

adunay uban, nanudlay, ang mga buhok gihapsay
nanghawid sa tagsa-tagsa nila ka mga kamot

miawit, midayeg, nagpasalamat,
bisan pa sa unsang pag-antos,

nagpakahilom
misimba.

kumpisal

Buntag sayo
sa akong pagmata
midiretso kog atubang sa computer
ug misud sa internet
mibasa mahitungod
sa mga magbabalak
nga mikumpisal sa hingpit
sa ilang pagkawalay mahimo
pinaagi sa pagpakamatay

Domingo man diay ron
maligo sa ko
mag-ilis
mosimba
.

i

pila ba gayod ka
nawong ang atong iatubang
sa atong isig-ka-tawo?

usa, stupido ka
duha, medyo pwede na
tulo, wow garapal ka!

ii
(let's have another version)

sugod na pod.

pila ba ka nawong ang atong
iatubang sa atong mga higala?
usa ra ba?
usa ra ba gyod?
hmm, bakakon ka.


duha, medyo honest ka
tulo, upat, lima, unom, pito, walo,
siyam
napulo

oi! kabalo na diay ka nga moihap
og binisaya?

iii

pila ba gayod ka nawong ang akong
iatubang sa akong asawa?

duha. duha ra.
ang atubangan
og ang likod sa akong nawong.

apan usa lang ang iyang
gitan-aw
kadtong nawong nga nahigugma
kaniya

kadtong namakak
iyang gipapas
daw sayop nako kaniadto
nga iyang gikalimtan
sa dayon

iv

pila ba ka nawong ang iatubang
nato sa atong mga kaaway?

usa ka gatos.
duha ka libo.
tulo ka milyon.

puros suko.

v

ug pila ba ka nawong ang akong ikaatubang
sa akong Diyos?

naa pa kaha?
o wala na?

ang tubag anaa sa gadagan pa nga panahon.
(shit!)

para nako to.Dili para nimo.

nanghuy-ab na pod ko

(that means
walay tulog gabii)

giisa nako ang akong
duha ka bukton
morag mokab-ot
og mga bitoon
sa langit
dapit sa kisame
diin ang kahayag
wala mapalong
gikan pa ganihang
kaadlawon

oops, nanimaho na ang akong
ilok
(which means
it is time to quit)

sayang, gusto pa unta nako

sa mingaw nga payag
palihog kog tugtog sa gitara

kon mahimo
kanang electric guitar

aron ko makoryentehan
kanang dili lang pod mamatay...

(walay picture ha?)

lami sab baya ang
pinakurat

kon nakahinumdom
ka unsaon
pagluto ang lumayagan
sa tuba

dili ba pinakurat?

siya og ikaw
panamin

panamini kining akong
isulti kanimo

siya og ikaw
mao ra

gahi ang ulo
bagtok ang kasingkasing
samdan
wala pa maalim

apan kanunayng
kusgan

ang inyong
mga kalag

ang kamatooran
hubo
nga naglingkod sa
habog nga lingkoranan

sa wala makasabot
anaa ang
dako kaayong katawa
samtang ang
kamatooran
misulay og talidhay
kay morag
naulaw

hubo ang kamatooran
nga nagpaulan
og iyang gibati ang
katugnaw
ang kainit mipahawa
hagbay
rang mipahawa

mitunob ang tiil
sa kamatooran
og imong gilantaw
nadungog nimo
ang iyang mga
tunob
nga pagkamingaw
og pagkahapsay
ang iyang
kaaghop makita
nimo sa iyang
mga tutok
diha kanimo

nawala ang pagbiaybiay
og midool ka kaniya
migakos siya kanimo

og nabati nimo ang tumang
kalami
diha sa kalinaw

pagkabantogan
gayod niya!

kon wala'y mobalak ning dapita
pwes ako ang mobalak
kon nahutdan na kamo og pulong
og mga sumbingay
nan ako ang magmugna niaanang daghan kaayo nga mga pulong

bata, baka, iro, isda,
gugma, kasilag, kahaw-ang, kalimot, kasadya
kasubo, kamatayon, pagkabanhaw,
pamahaw, paniudto, panit, udto, unto, hawhaw, pamahawa,
og uban pa...

kabahin nianang mga sumbingay
nga wala diri og wala usab didto
mahimo nakong balikbalikon kini sama sa usa ka mino
(baliha dayon ang imong bisti
basin og minoon nya ka
niining akong
mga koryomkoryom)


og kon imong pasayloon
maghimo akog dakong orom alang kanimo
kay sa walay pagdikidiki
daghan kaayo akog mga orasyon sa
kagabhion
sa dili pa matulog ang mga
tamsi og
tabili

kay sa akong kamingaw
sa akong pag-inosara sa dugay na kaayong higayon
o panahon
anad na ako nianang pagmugna-mugna
og mga sugilanon

(you fabricate stories, huh?)

alang sa akong kaugalingon
aron nako mapatay ang
oras nga buhi
apan
laay
las-ay

walay tagay

nga walay puas nga milabay-labay
sa nataran sa akong balay
nga misibay sa akong
kasubo

(anong drama na naman yan, ha?)

daghang mga tingog ang
akong madungog
basin og daghan kaayong baba sa
akong nawong?

kon wala'y mobalak kay hadlok sa ilang mga balak
ako ang mobalak
alang kanimo og alang kanako
dinhi sa akong balay sa kasubo og kamingaw
daghan ako og mga pulong
og mga sumbingay
aron lang ako
malingaw

kay kon ikaw ang akong paaboton
og saligan
pagkaalaot ko kaha
nga kalit lang nga madugta
kay ikaw
dili na mobalak alang kanako
alang kanamo

apan
kwidaw, higala ko
(nga gamingaw usab
sama kanako

sorry, but that is the sad truth
and nothing but the bitter truth
so help yourself )

paningkamoti nga dili ka masuko
mag-aso sa kapungot
kay kining akong mga pulong og mga sumbingay

sorry, but this is the truth and nothing but the truth so help me God,

wala na po'y lami.

baga nga ngabil
lisngag nga ilong
bungot nga wala'y pul-ong
tiil nga gatikongkong
pangag nga ngipon
bawog nga liog
pormag yugo
sa kabaw
mata nga misulirat
sa kagutom
balubog nga singot

nangita sa kinaadman
sa kasulbaran

asa?

"sa langit, 'nyor!"

sa human nianang panagbulag
sa kahayag og sa kangitngit
mosumbalik kanimo
ang imong gipili kaniadto

magbagotbot kanimo ang palibot
ang mga dahon manilhig sa ilang kaugalingon
kay sila nagkatuagsa
wala magpabilin ang uban sa silong sa kahoy
sa gugma

gusto unta nakong tul-iron ang mga hiwi
apan balikog usab ang akong mga kamot
og ila akong gikataw-an

mihangad ako sa langit
nangita og katin-awan sa mga panganod
aron lang unta ako nimo masabtan
apan ako usab naanod
og wala'y mitabang kanako
bisan og ako
misyagit

wala kapug-ngi ang baha sa kapungot
sa kakusog sa ulan sa imong mga luha
mipasilong ko sa payong sa akong kaligdong
apan nabuslot na kini sa akong mga pasalig
nga wala
diha kanimo
nako matuman

dili nako mabasol ang mga bato sa akong tiilan
nagpabilin silang tig-a
sama kanako
mataranta ang mga rason og ang mga
kahubitan magsamparay
nahubog ako sa tuba sa iyang kaanyag
og nakalimtan ko ang mga utlanan
sa dagat og yuta
ang langit misamot kahabog
sa akong
mga kamot

niining panagbulag, palihog lang ayaw ako
pangitai nianang mga tubig sa
katin-awan

lubog kaayo ang akong mga pagbati
og kon malumos ako
sa lilo sa akong kalibog
sa akong tingog
sa akong kataposan
intawon ayaw og pamati

sa usa ka pamalandong
ni Narcissus

gitutukan niya ang
mga balahibo sa iyang
bus-ok nga dughan

og nakita niya ang usa ka
kagwagan
og siya misulod didto og
nawala

giablihan niya ang iyang
mga palad
og gisulayan niya paghambin
ang kahaw-ang

og didto nakita niya
ang ngitngit nga kawanangan
og siya milupad paingon didto
sama sa usa ka uwak
og siya nawagtang

(itom nga misolod sa itom
unsa pa ba ang imong
makita bahin
kaniya?

wala)

nanamin siya
dugay
og nakita niya ang tumang gugma

og gihagkan niya ang iyang
mga ngabil
og gigakos niya ang iyang mga
bukton

og siya nawala
wala na gayod ni bisan kinsa
ang makakaplag kaniya
bisan gani ang
iyang mama

nahilis siya sama sa usa
ka yamog nga gidagit
sa hoyohoy sa hangin

ayaw og kalooy kaniya
mao kana siya mao kana ang iyang gusto
nga siya mawala og dili mo na gayod makita.

tagaan ko ikaw og
kahulugan kon

unsa ang igsoon?
og unsa ang balay?

og unsa ang nasod?
og unsa ang kalisod?

tan-awon mo kini
sa usa ka hulagway
lamang

og dayon imo akong
sultihan sa tanan
nimong nakat-unan

og dayon mosalom
ka dungan kanako
sa usa ka
lalom kaayo
nga kahilom

ang paglaum ni Amanda
naa sa siyam ka silaba
bug-at niyang gidawat
ang kalingin nga morag
pakwan
usa ra'y liso
nagtubo nga morag
pan nga gibutangan
og tuba
puhon mao'y iyang
kasuginlan sa
iyang mga pagmahay

nakigbisog ka nga
matimbang ang tanan
ang likod og atubangan
ang kilid ang
mga utlanan

nanglimbasog nga
ang kamot makab-ot
ang katol sa likod

usahay mokiay
aron lang mahapsay

usahay mokinto
aron lang malimpyo

ang pakigbisog aron
matukma ang panginahanglanon
sa yuta
og ang kaistrikto sa langit
matag-adlaw
imong gibalanse

lipayon ang tawo
kanang dili masuko ang Diyos
kitikon ang dapit
diin malipay ang tanan
kanang wala'y magmahay

ulod man o
mauhipan

itaas ang mga kamot
mohural ka
sa bisan unsa
lantaw sa unahan
tutuki ang umaabot
higala mo ang kabugnaw
kauban mo ang kangitngit
mao kana ang saktong
pagpangandam

Silang

John Berryman (1914-1972),Hart Crane (1899-1932),

Sergei Esenin (1895-1925),

Adam L. Gordon (1833-1870),

Randall Jarrell (1914-1965),

Vladimir Mayakovsky (1893-1930),

Sylvia Plath (1932-1963),

Sarah Teasdale (1884-1933) og

Anne Sexton (1928-1974)

Mikaratil og dalagan,

Nangita sa ilang kaugalingon

Nagpahilayo sa kang bisan kinsa

Wala na sila’y koneksyon

Kanato

Og ang ilang priming gigamit

Sa ilang mga balak

Mao lamang ang

Ako,

Ako,

Ako

Ako

Nawala na ang

Talk, share, og listen

Tungod kay ginadili

Man ang pagpatay sa laing tawo

Mao

Nga gipatay na lang nila ang

Ilang kaugalingon.

Mga HAIKU ko

puno sa pangindahay

asa man kita mangabot sa atong mga pangandoy
ug nga bisan pa gani maabot ang bagyo sa atong mga damgo
ikalipay ko sa kanunay nga ikaw ang ikauban ko
sa akong mga ginagmay nga kalipay sa matag-adlaw

ikaw ang himuon kong himaya
ikaw nga adunay dakong luna sa akong pagpangga

dili lang unta mahuman kining tanan
ato lang unta sa gihapong saw-an ang kalipay
nga kanhiay na natong gisapnay-sapnay
dinhi sa atong dughang puno sa pangindahay

busog nga kahilom

nanguhit ang kahidlaw
diha sa kalaay

dunay gigigkan
dunay mikamang

mikulitog ang kaging
(didto paingon sa

buho sa dalunggan
nadungog ang usa ka

hagikhik og
usa ka pag-ungto
dayon mipuli og tulog

ang busog nga
kahilom

touch go

lahi sab ning atong
gisabutan

kon masayop walay
korehiay

kon sakto walay
dayganay

kon ganahan
walay pananghiray

kon wala na
wala na

touch go
kiss lang
walay tell.

wala'y molungtad

ang pintal ning balay ta
nakuspaw

ang atop nga color roof daw
wala na magsinaw

ang maong mong karsones
nawad-ag butones

ang akong bakos nga leather
mora nag paper

wala'y molungtad
bisan ang gugma molubad

ang nanghambog nga puthaw
nataw-an natunaw

ang kahoy nga tugas
sa dagat gibanlas

pati gani ang Titanic
di ba na-sink?

ako pa kaha
nga wala'y nada gikan pa sa una

di ba wala ka na daa'y kumpyansa
nan, ikaw na lang ang magpasyensa.