DOMINGO SA BUNTAG

mikanaog kitang duha
paingon sa suba sa
Kantara

linaw ang panahon
walay kisaw ang hangin
madungog nato ang
awit sa tukmo
duyog sa sulog sa
suba
paingon sa bukana

gihubo nato ang atong mga
sapot unya kay lagi
kita man lang duha dinhing
dapita

mipauraray ka sa dakong 
bato
unya ako miduyog kanimo

duyog sa awit sa suba
sa awit sa mga tukmo og
tikarol
gisugdan usab nato
ang awit sa atong
gugma.

alang kang J.

akong gihinumdoman karon
ang atong pagpadiditi didtos 
bungtod sa Bandera
gamit ang sinaw nga palwa

dunggon nato pagbalik ang atong
mga katawa samtang kitang duha
natuali, naligid, nga morag si
jess lapid paingon sa ubos hangtod
nga kitang duha napaingon didto
sa mga kabaw nga nagpabugnaw
sa ilang kaudtohon didtos ilang
gitugwayan nga tunaan

atong balikon ang atong pagpanagan
paingon sa sapa dayon natog ambak
gikan sa habog nga bato tiglom ngadto
sa laom nga suba diin kita nahupong
sa pagkaligo sa bugnaw kaayong
sulog sa tubig nga haskang tin-awa

sa paghinumdom lamang mamahimong
tin-aw ang tanan.
ayaw palihog, lubga ang kagahapon.
duyugi ako ning akong awit sa kamingaw
halad sa nagkahanap na nato nga mga adlaw.

ang demonyo sa akong likod

nakuryentehan ang akong liog
sa dihang
gihagkan niya ang akong
tangkugo

wa ko kasabot sa gisugid 
kanako sa akong mga
pagbati

kon molingi ako og molantaw
sa iyang mga mata
hadlok ako kon unsa ang
sunod nga mahitabo

basin mawala ako sa akong
kaugalingon basin mahimo akong
kabaw nga milunang sa 
lapok sa usa ka
tunaan

gipatong niya ang iyang kamot sa
akong abaga nga misulay og
haploy sa akong bukton paingon
sa akong dughan

giwakli ko ang iyang kamot og sa
walay lingi-lingi og walay daghang
sugilon
ako siyang gibiyaan 

ang kahumot sa iyang gininhawa
ang kainit sa iyang kamot
unsaon ko kaha kini pagwakli sa
akong hunahuna?

samtang......

samtang dili mo pa makita ang
hangin
samtang dili  mo pa makumkom
ang dagat
samtang dili mo pa mapupo ang
mga bitoon diha sa 
langit
samtang dili ka pa makahibalo
unsaon paghimo ang buwak
nga antuwanga diha sa iyang
sanga

nan, dili mo pa gayod masulat ang pinakaanindot
nga balak sa imong
kinabuhi

kabahin sa mga dayag

kana bang
kahibalo ka niya
unya kabalo siya
nga kabalo ka
niya unya labaw
sab siyang kabalo
siya nimo unya
kabalo ka bahin
ini kaayo nga unya
magkita mo
ang hisgotan wala
diri og wala didto
unya magtagbo ang
inyong mga mata
nga naglirawliraw
ug dili gayod maghisgot
bahin ani og ato
kay dayag na lagi
kaayo unya kon
hisgotan
wala say
sangpotanan
maong mas maayo
pag
magpakahilom na
lang

gitapulan

p499 Cebu
pacific promo
gisulayan nakog
click ang
select a flight
cebu to davao
hmm
wa man koy
friends na didto
hmm
cebu boracay
kapoy na pod
polluted na kuno
kaayo
coron kaha?
ako ra?
mingaw man
tagum? hmm
self-centered ra
kaayo
puerto? balik balik
na
batanes? di man tinood
nga honest ang
tindero
malaysia? mao ra
gihapon asia

vietnam? di kasabot
iningles ang 
vietcong

phuket? ulag-ulag 
lang ang
nahibaw-an

bali? haskang 
mahala mabali man
sab ang atong
bulsa

jakarta? mora rag
manila
ang kahugaw sa ilaha

kota kinabalu? 
way deja vu.

maypag magpuyo
sa balay 
sa ilalom sa kakahoyan
bugnaw pa
ang akong katulgan

isog

karon nga
nakita na kita
nahikap
nahimamat pag-ayo
gikan sa imong
buhok ngadto sa
imong kuko
mobiya ako nga
wala nay kahadlokan
wala na usay
kawilihan
wala nay makatintal
pa kanako
og dili na usab ako
malisang
nianang kaanyag

dili ikatingala

duha lang silang
gasugod dinhing
balaya
ang babaye og
lalaki

ang babaye nahimong
inahan
busa ang lalaki
naay anak

sa paglabay sa
panahon
ang anak gihabalan
sa amahan

busa ang amahan
duhay dala: amahan
og apohan

ang inahan gihabalan
sa apo
busa duha say iyang
dala: lola og inahan

dili ikatingala kay
puros iro
kini sila.

lumo

namumo si
magdalena sa
salog
kay lagi
nangita sa mga
mumho
nga nausik gikan
sa kan-anan
ni kristo

ug busa nalooy
ang ginoo
sa nagpakairo
sa iyang
kalumo

gahig ulo

sama kas

tingog sa

aircon diris atong

balay

siging haguros

di kamaong

mamati

gib en tik

dili
nindot ang himno
kon wala
sab ang
responsorio.

kalag

gigamit niya ang
utok sa lawas sa
dihang siya gahunahuna
pagkahuman
gigamit niya ang
iyang kasingkasing
nga iyang
gitawag nga 
pagbati sa kalag

ang lawas og ang
lawas lamang
nga puhon madugta
mahimong abog

paaboton ko ang
kalag kon unsa ang
iyang ikasulti puhon
bahin niini.

ang tawong nahigugma

ang tawong
nahigugma
kinaham ang
pagkatkat
sa punoan 
sa kapayas

ang pagsulod
sa langob ang
pagsakay sa
mga balod sa
gugma ang 
pagsalom sa
dagat nga ug
mahimo wala
nay tungatunga

ang langgam sa katulugon

pagkagamhanan gayod
sa kakapoy
giwala sa akong panumduman
ang mga damgo
sa akong kagabhion
ang katulugon iyang gihuktan
diha sa akong
atubangan.

wa kaipsot
nagapos intawon hangtod
sa alas nuybe
sa kabuntagon

habol nga sundang

ang mga awit sa kalanggaman
ang mga naglutaw lutaw nga panganod
ang mga panghupaw sa kadagatan
ang mga orasan sa tuko
ang mga pagpakahilom sa kabatoan
ang mga pagsubang sa adlaw
ang pagkatkat sa mga kabukiran
ang kalinaw sa kapatagan
ang mga pagbawogbawog sa mga
kakugnan

way undangay
way hutdanay

makalolooy ang miundang
diha sa habol nga sundang.

alang kang M.

nakapangutana ko
nga unta kada adlaw ka man
mosimba
magluhod sa simbahan
mangalawat

apan nganong kadtong babayeng
buros ug upat ka bulan imo mang gipadaub
sa basurahan hangtod na gani
sa alas otso na sa kagabhion

wala mo kaha mabati ang iyang
kagutom
ang iyang kahadlok nga basin
naay dili ingon nato nga
mokaon sa iyang
gisabak?

pagmahay

mas malipayon ang
sapa sa iyang
pag-inosara

mas nindot ang
bulan sa iyang
kahayag siya nga
usa ra sa itom nga
langit

nganong duha man
ang akong mga mata?

nganong duha man
kamo sa akong 
kinabuhi?

usa lang ang akong
sakayan
og ang suba nga
akong agianan

mas nindot ang akong
tingog kon ako usa lang
ang moawit sa sapa nga
nag-inosara sa iyang
pagkamalipayon

faCebook

ang iyang
layasanan

facebok 

ang iyang
tagoanan

facebook

didto sab
siya nadakpan

facebook

iyang gibilaran
dili lang pod

pakamatyan
mao ganing
tagoanan mao
ganing
layasanan

dili pa
gustong 
mamatay

ganahan pang
mokatay
mokitiw
ang intiw

balak

walay

gasugo nako

apan ako

nahimo

ayaw ako

basaha

dili ako

para nimo

mahimong

dako ang

akong kahiubos

niadtong 

natapad ako sa

ibos

gipili mo ang

ibos

mabuhi ako

bisan wala ka

kon mamatay

man ako

sama sa tanan

tungod kana

sa mando sa

kapalaran

ang nawala nga plok

wala na

ang tigtagik

sa balak

busa ang

dakong 

baki wala na

usab

miambak

kalooy

malooy ka usahay
sa iyang mga mata nga
nagpalimos sa
atong mga pag-ambat

wala na ang iyang
tinood nga inahan
naa nay bag-ong
gitangag ang iyang
amahan unya sunod
bulan moabot ang 
iyang manghod nga
wala niya gihandom

sa akong adlaw nga natawhan

sa akong adlaw
nga natawhan
wala ang akong
minahal

walay sapayan

ang buyog nga
kusgan og pako
makamaong
magbalhin balhi
sa kadaghang
kabuwakan sa
lain laing hardin
sa kalibotan.

pagbuswak

buntag
samtang namati
kong
mozart
mora kog
pyous
mibuswak
sa 
adlaw

langit nga itom

walay kahumanan
ang mga balak

antosan mo ang
pagbasa niini

hangyoon ko ikaw
nga aron dili ikaw madamay

sa akong kaparotan
unta undangan mo na ang pagbasa

ayaw ako hangyoa sa
pag-undang og pagsulat kay

ang akong mga balak
walay kataposan

walay kahumanan sama
sa pagtuyok sa kalibotan

sa pagpunay og balik balik
sa mga adlaw og bulan

walay kataposan sama
sa pagpunay og pasiplat

sa mga bitoon diha sa
akong langit nga itom

paglingla

makamao akong
mohatag sa mga sayop
nga senyales
alang kanimo

nagdahom man god
ako nga nakaila ka na
kanako

pananglitan kon
mokatawa ko dili kana
nagpasabot nga
giganahan ko

kon mangyam-id
usab wala nako kini
hatagi og
laing kahulugan

kon mikuyog man ako
kanimo
wala ka na nagpasabot
nga giganahan ko

minunot lang ako sa
imong kamingaw
gisulayan ko og hatag
kanimo ang 
imong anino

pananglitan kon natulog
ka na
unya mitupad ako kanimo
dili buot ipasabot nga
usa na ang atong mga damgo

kon gilantaw ko ang kisame
tungod kana  kay anaa
ang tuko
misulay paglipay kanako

dili mo ako dulaan
ikaw ang kote nga gipatuyok ko
sa akong palad

dili tanang kalinaw kalipay

nasipyat kos
kinabuhi kay
sayop ang
akong gipili

unta kadto


mag-unsa man
ang kaharohay

kon wala kay
kalipay

unta kana

dili tanang
kalinaw kalipay

tulo ka iro

wala nako
sunda ang mando
sa kasingkasing

malinawon ang
panahon

sa dihang gipangutana
mo kon ang akong
tulo ka iro malipayon

mao ra gihapon ang
akong tubag

malinawon ang panahon
malinawon

sa dihang miulan unya
ikaw mibalik sa balay
aron mopasilong

wala ako mikuyog kanimo
gikamingawan ko ang ulan

nga gawasnong mipatihulog
gikan sa mga panganod

og karon nga nahuman na
ang ilang pagpangatagak

hapsay na ang langit
malinawon na usab pagbalik
ang panahon

unya ang akong tulo ka mga iro
kalit lang nga nangamatay

speechless

sa dihang gitikbas
ang iyang igsoon sa iyang
atubangan

sa dihang wa siyay
nahimo

sa dihang milakaw na
silang tanan

sa dihang nawala na ang
ilang mga katawa

sa dihang nalisoan siya
sa iyang pangutok

unta magkita kita dinhi unsa kaha ang imong ngalan?

nahisama sa ako milawig
palayo sa kaniadto akong
gipuy-an: dakong balay,
hawan ang dulaanan sa
mga bata
daghang mga buwak ang
hardin
lunsay ang hangin
walay singot ang akong
agtang
unya hamis ang akong
pamanit

apan anaa akoy gipangita
nga wala didto

ang pagbati sa paglupad
ang damgo sa mga panganod
ang pagkuyog sa mga bitoon
ang paghalok sa bulan

busa miabot ako dinhi:
kabatoan, abog,
sigi ang ulan nga morag
walay hunong
ang kabalaka sa dakong
baha
ang umaabot nga 
unos,
walay sakayan dinhing
lugara
walay agianan
ang molakaw maghimo
sa iyang kaugalingon
nga mapa

kini ang lugar sa pagkawala
ang miabot dinhi walay kasayoran
kon unsa ang dangatan
ugma damlag

wala nahuman nia dinhi ang
kanunay nga pagsugod
ang walay kataposan nga
paghunahuna kon asa kaha
ang tinood nga padulngan

unta magkita kita dinhi
unsa kaha ang imong ngalan?

ang mga hilomon nga mapahiyomon

ang mga nagbilar
nganong nindot man lagi gihapon
ang mga panglantaw?
ang mga nagtikaw nganong
anaa man gihapoy panahon
sa pakigsandurot sa mga 
alibangbang?
nganong sila nagpabilin man
nga malipayon?
nangutana ako kabahin niini
apan silang tanan mipahiyom
lamang
milantaw sila kanako
unya nagpista silang tanang
sa ilang kamaya
sa tumang kahilom.

wala ako mahutdi og paglaum

kita sa kanunay
nagpangita sa mga pako nga
mobayaw kanato
paingon sa langit

niadtong bata pa kita
dali ra kaayo nato kining
nakit-an sa kilid sa habol
inig mata nato sa
kabuntagon

duol ra usab abton ang
mga panganod
nga sa kadugayan natong
lupad-lupad nahimo
na usab kining langit

mahikap ang mga bitoon
sakayan pa gani ang bulan
unya ang kagabhion
tagoanan sa atong mga
pagkasipat

karon lisod na balikan
ang mga pako
kasagaran kon makita man
sa ilalom sa hagdan
mga bali na usab kini
busa wala na gayod kita
kalupad paingon sa mga
panganod.

apan sa akong katigulang
wala ako mahutdi og paglaum
nagpatabang ko sa mga pulong
sa akong mga damgo
sa mga pasalig sa akong mga
kagabhion nga puhon 
bisag walay mga pako
ibayaw gihapon ako paingon
sa akong langit.