pagbuntog sa kasakit

ang mga makahadlok
og kadtong makapabalaka
nato ato usahayng 
ipaagi na lamang sa mga
tanghaga

sahay ipaagi sa iring nga
itom
nga usa ray mata
apan pulo ug kinabuhi
nga abtik gihapong mosirkosirko
gikan sa habog nga
balkon
paingon sa sementadong
agianan

kadtong kuting nga nakigharong
sa irong kusog mamaak
og mga bata nga intawon
wa kadayon og sulod sa
eskwelahan
kay dakog samad ang naa
sa iyang tiil

mga alibangbang nga
nabalian og pako
nga aninipot nga nakig-indigay
sa ilang kahayag
sa mga bitoon sa langit

mga ligbos nga kalit nga nanubo
sa kilid sa kasagingan human sa
linti og kilat kagabii
diin midagkot si nanay sa kandila
dayog sunog sa krus nga lukay
aron pag-abog sa mga
yawa

habol nga gamhanan nga gisulayan
natog suot
aron kita mawala
aron ang tanan mawala
aron ang kasakit unta mabuntog
o dili ba bisan sa gamayng
kutsilyong hait
maadlipan.