sa dihang nahalin na ang balay sa ilang ginikanan

pito sab sila ka mga anak
tanan gaiya-iya na ug panginabuhi
pamilya, mas daghan ang
nagpuyo sa america
ang nahibilin mao ang kamanghoran
nga wala magminyo
apan dunay anak nga bag-o lang
sang namatay
kalit lang

ang tanan nakahukom nga ibaligya
na nila ang karaang balay sa ilang
ginikanan
unya bahinon ang halin sumala sa
ilang pagpanunod
isip mga anak

ang kamanghoran mobalhin na ug
laing balay
nga sa akong panglantaw makaayo usab
kini kaniya
tungod sa sakit kaayo nga panghitabo sa
dihang kalit namatay ang 
iyang bugtong anak nga babaye nga
gibiyaan sa inahan adtong puya pa 
siya

karong adlawa gikuhaan niya ug hulagway
ang balay nga ila na nga biyaan tungod
kay nahalin na man kini

sa hulagway makita mo ang ilang iring
sa kilid sa veranda nga nag-atubang sa
dako nga karsada

siya na lang seguro ang dunay katungod
nga magpabilin dinhing lugara
gawas lamang kon lapwahan kinig
ininit sa insik nga maoy nakapalit
nga kaniadto ang negosyo mao ang
pagluto sa siopao ug siomai.