ulan ang langit

mahimo nga ang kini
sa tinood
kita

ang kadto mahimong
imo
ang kaniadto alang
kanato

ang ila lang unta
mahimong mausob
aron
saluan natong tanan

ang ako, kita unya
ang ikaw, ako lamang

sa imong pag-iyak
ulan ang langit

...ikaw

damgo nako nga
ako usa ka lusok nga
ulan sa
nauga mo nga ngabil

usa ka hunghong diha
sa kilid sa imong dunggan
usa ka hapyod sa akong
kamot
diha sa ubos sa imong
pus-on

damgohon ko ikaw
sa akong kagabhion nga
nag-antos sa tumang
kamingaw

diha sa imong pagsayaw

ang akong giablihan
giwakli mo sa akong kamot
dunay pamaagi ang
pagbati
molahos kini ug mosisi
akong gigunitan ang imong
tinagoan nga sa kaulahian
ikaw sab giganahan

nahisama ako sa ulan nga
sa una imong gilikayan
hangtod nga ikaw nabasa
diha sa paglikay kunuhay
unya sa dihang naabtan na
ang imong liog 
ang imong dughan sa diha
diha anaa ikaw misayaw silong
sa kusog nga ulan

ang mga buwak ang mga kahoy
ang mga bungtod
wala na nakasaksi sa imong
kalipay

..didto sa gawas

nagpasalamat kini 
sa mga gidili

ang mga gidid-an
sa kanunay
mapasalamaton sa
mga gidili nga ilang
natiti

sayod ka 
nga ang gidili mao man
gayod ang
mas lami

ginamos nga asgad
humba nga tambok
ilimnon nga makahubog
segarilyong 
mopatay kanimong buhi

paghigugma sa dili imo
pagtaral niini sa lawak 
nga sa kanunay
manirado

hagkan mo ang iyang mga
ngabil
hapuhapon  mo ang iyang
dughan
lahos sa usa ka ganghaan
diin ka mosulod dayog
kawala sa tumang
kagaan

sa gawas nga dili mo na
makita
atua nagbaha ang iyang
mga luha

miulan ang kalangitan
aron papason ang dugo
sa laing patay nga gibiyaan
lang sa usa ka  dalan

wad-on ang labad

didto sa sulod
gisabotan nato ang usa ka
tinagoan

sakto sa bayad ang
pagtak-om sa imong mga ngabil

ayaw na patuhoa ang gugma
naanad na kini diha sa
pagkailad

nasayod kini nga sa matag halok
mo anaa ang pagbudhi
apan wala na kini niya giambat

ang karon lamang
oo ang karon lamang mao ang
bililhon
ang pagtakuban sa ugma
lain na usab kana

sa laing bahin
sakto na nga nawala ang labad
diha sa atong pagbakabadbad

didto sa gawas...

didto sa gawas
mora kag malumos sa
kangitngit

ang kalibotan lapad
dako
unya ikaw rang usa

madungog mo ang
pagbangutan sa imong
kasingkasing

ang imong pulso 
nagluksolukso nga
morag mga baki
sa pag-abot sa ting-ulan

apan lahi
dili kini sa kalipay
mahitungod kini sa
kasakit
nga wala pa nagpaila
sa iyang 
tinood nga ngalan

ang paghigugma

ang paghigugma
sa wala nahigugma kanimo
balaanon
dili mo matawag nga
paghikog ang
sama sa ingon

ang paghigugma sa
dili angayan nga higugmaon
usa ka pagsukod
sa kalawmon sa gugma

higugmaon mo ang
nahigugma nimo
kasagaran maoy makalumos
nimo sa kahaw-ang
kay mao man god kini ang
kasagarang naandan

usa ka gamayng kalibotan
napuno sa kabulakan
bug-at, makalanag na ang
pangalimyon
pagkadaghan sa mga buyog
nga mamaak
naglibotlibot kamong duha
dayog kalilong

chewing gum

ang akong gugma diha kanimo
mitapot sa akong dila
bisan unsaon nakong pangluwa
dili man gyod mawala

miadto ko sa merkado
mikaon kog barbecue
ang akong gugma kanimo
dili gyod ikabaylo

gitangag ko kini bisan asa
mora kog iro nga nagtangag
sa iyang  itoy
unya sakit pamation nga
ikaw atua durong katawa
nganong naunsa ko

makat-onan ko ra kining tanan
sa hamubong higayon lamang
kining gugmang walay ugam
mora ra diayg chewing gum

usapon, ihulom, ipatapot sa
bongbong
kuhaon, pagkaugma,usapon 
na usab
hangtod nga wala na ang tam-is
iluwa ilabay didto sa bentana

usa ka bugkos nga pahiyom

miabot lang kini
nga wala damha
wala nako kini
gipangayo
wala usab ako
miampo

kini ang kamatooran
ug ako ang hinungdan
ang gibati ko mao ang
pagbuto sa bulkan

unta kon nakita mo
ang ang akong mga mata
dili ka na gayod unta
mangutana pa.

nganong nahimo mo kini?
lad-ok lamang sa laway
ang gitubag sa kapalaran
dayon ug halad sa usa
ka bugkos nga pahiyom
didto sa kalangitan

mihukom ang kahitas-an
sa usa ka katawa nga dili
nimo masabtan

ang nakabuak ug ang nabuak

karon
adunay nabuak nga
banga
ang nakabuak
morag iring nga hilom
kaayong
misibat sa bentana

ang nabuak
wala nikay-ag
mora kinig
babaye nga mibilangkad
dayog kahinanok

sa kasal mo Danilo

sa imong kasal karon
daghan tag mapupo.

ang gugma usahay
ulahi moabot. 

unya bisag ingnon
tang kataw-anan lang
ang makita

ang uban mahimo ganing
sa simbahan manaway man

apan miabot gayod ang
gugma unya kamong duha
wala nay labot bisag kinsa
kanila
ug bisag unsa pa sila.

kalayo sa kalayo ning balay nga walay pagkaugdaw

naglagiti ang akong
kasingkasing
ania ang dakong sunog
sa gugma
ang mga aligato anaa
sa langit
nanayaw
nagpadayon ang sunog
apan wala may
bombero

anaa ka naglantaw
kanako
mahimo bang ikaw
una ang magpakabombero
alang kanako?

ang kanahan
kalayo ka man diay usab
nga sama kanako
misamot ang sunog
walay naugdaw
nanayaw ang mas
daghang aligato didto
sa langit

kalayo, sa laing kalayo
apan dili mo mabati ang
impyerno
mabati mo ang langit
ang kabugnaw sa kalayo
ang awit sa mga aligato

sa hardin nga malinawon

nawala ang kakulba ug kabalaka
gikan sa tungang gabii
hangtod na sa kaadlawon
sa dihang nasayran
nga ikaw ang balaanon 
nga makamaong motipig
sa atong kamatooran.

sa dihang nabuak na ang
kahayag sa kabuntagon
nanambo ang kasingkasing
didto sa hardin nga malinawon

ang nagpabilin mao na usab
ang kahinam sa laing kagabhion
silong unya sa bugnaw nga
kahayag sa bulan tupad sa
kahumot mo nga nangalimyon

BADOY

ang bag-ong kagawasan
miabot na diha kanimo
bulahan ka
anaa na ang kabag-ohan
ang panglantaw nga
ang mga simbahan, ang mga hukmanan,
ang mga bahandianon
ang mga makinaadmanon
daghan sab diayg mga
kasaypanan

magsugod na ang imong
kagawasan
diha sa pagbatbat sa kaniadto
nga atua lang sa kilid sa balay
sa likod sa simbahan
nagbagutbot sulod sa ilang
alingagngag
unya wala gayoy nahimo
bisan na lang paghawid sa sidsid
sa saya sa obispo
aron pagpahibalo lang unta 
kabahin sa gilaid mo nga kalisod

karon makamao kanang
mobalibad sa pag-abli sa pultahan
sa ilang gasinaw nga
sakyanan

diha sa paggakos sa kamatooran

sa dihang gigakos mo
na ang tinood
nga migakos usab
kanimo
didto sa lawak diin
hubo kamong duha
sa mga tabon sa mga
panit
sa dihang mipiyong ka
nakita mo diha sa 
kangitngit ang sulaw
sa puti nga alibangbang
nga mibatog sa imong
buhok nga morag dahon
nga miamp sa
yuta diha sa iyang 
pagkahulog
usa ka awit gikan sa
inahan nga nagbudlay
sa tibuok adlaw
unya ang kasingkasing
murog bata nga
nahinanok dayon paingon
sa katulugon

ang omang

makalolooy gayod kaayong
tan-awon ang 
tiguwang sa kilid sa lungsod
nagpalimos
sa gugma

miduko
mibawog ang likod
kaganiha lang
miluhod diha
sa pagpakaulaw

apan moabot ra ang 
panahon sa
pagtapok sa mga tipaka
sa kaugalingon
aron sa makausa pa
hulmahon ang kaugalingong
dignidad

bisan pa man ug
kini nagpasabot diha sa
pagbalik sa usa ka balay
nga kinhason
unya ang atua sa sulod
ang omang
nanamin sa kahaw-ang
lantawon ang
nawong nga ambongan

wala na kanako ang gugma

wala na kanako ang gugma
sultihan ko unta ikaw nako kabahin niini

apan daghan ka pa man ug lutoon sa imong
dako nga kusina
unya kusog pa ang kalayo nga dili nimo
kabiyaan
samtang nagbukal ang ininit nga tubig
diha sa takuri unya mitaghoy kini sa tumang
kalisang
diha sa pag-awas paingon sa salog sa
lamesa diin ang ok-ok mitago ug nanambo aron
kaha lantawon ang bag-ong
panghitabo tali kanato

wala na kanako ang gugma
hagbay ra akong gibiyaan niini

ang akong tinan-awan sa kalibotan
kawanangan

usa ako ka blanko nga papel nga
mapunit ni bisan kinsa nga sulatan nila ug
bisag-unsa nga inig ka sayop o inig kapuno sa
bisan unsa
mahimo na usab nilang ilabay bisan
asa.

oo, wala na kanako ang gugma
bisan kanus-a bisan asa
kon imo akong hikapon wala nimo ako
mahikap
kon imo akong hagkan ang akong mga ngabil
wala makaila kanimo
kon imo akong gakson ang akong  mga kamot
ug mga bukton
morag mga dahon lamang nga
dili na madutlan sa hangin sa kahayag sa kainit

wala na kanako ang gugma
sultihan ko na ikaw bahin niini
wala na ako sa akong kaugalingon
wala na ako dinhi
wala na usab ako didto

kabahin ni roberto nga imong basahon kuyog sa pagpamati sa musika ni Shigeru Umebayashi

ah mao roberto kaw lang gihapon diha sulod sa imong lawak namitay ug mga bitoon sa kilid sa imong bongbong

nanghayhay sa pito ka bulan diha sa kisame nga gihimong balayan sa usa ka tiki nga imong

higala

sa imong mga balak nakigsulti ka ba sa tiki?

nahibalag mo na ba ang gugma diha sa tiki?

nagkasinabot na ba kamo ug ang imong tiki?

ah mao roberto, kining kamingaw usahay makamaong magmugna sa bisan unsa aron lang

kita mopadayon diha sa pagpakabuhi kay abi mo roberto kon ugma makaplagan na nila ang imong

patay nga lawas nga nagbitay diha sa pisi nga imong gihikot sa pultahan sa imong kasilyas

mahingangha silang tanan nganong kini si roberto nga kusog kaayo nga mubohakhak ug katawa didto sa gawas dapit sa tersena ni Karing anaa man diay tinagoan nga kabuang diha sa pagkutlo sa buwak sa antuwanga nga atua mitapot sa gabok nga kahoy sa lasang sa kasakit.

bahin kanatong duha usa ka kagabhion niana

mikurog gamay ang
akong mga ngabil sa dihang
gisulti ko na kanimo ang
tinood nga panghitabo dili diay
nato matago ang kamingaw
unya kon isulti kini mora bag
nahabwa ang tanang hugaw diha
sa sulod sa dughan
nga inig kahuman mogaan ang
kabug-at sa mga pagbati

ikaw sab nga namati nga anaa
sa kakiwa sa usa ka bugnaw nga
panahon ning kagabhion
morag nataha nga motutok sa akong
pagkamatinooron
bisag kadyot lang bisag karon lang

mipahiyom ka unya kaiyakon ang
imong mga mata

gipugngan mo ang pagkahulog sa 
mga luha
daw sama sa mga manggang dili pa
kaayo hinog
aron plantigon kini sa hangin
dayog kahulog

ang umaabot

didto ang bulan mikuyanap sa
lungsod milanab sa suba sa nagluhod nga
anino sa kahoy
unya ang mga balay nga gagmay 
naglaray sa daplin sa kalsada samtang
ang mga manag-uyab nagpunay ug
hunghunganay sa ilang mga gigilukan nga
mga dunggan
unya bisag wala kay madungog kon unsa ang ilang mga kasikas sayod 
ka nga sila
wala gayod maghunahuna bahin anang
gikahadlokan mo nga moabot nga linog o kaha ba
kamatayon....

alang kanimo M.

wala nimo
nakita ang pag-ambak
sa kasingkasing
gikan sa labat
sa kapit-os paingon sa
pikas tampi sa
langit

unsaon mo ba
pagkasayod nga
buta diay
ang kabayo nga
tiguwang 

nga misabsab sa
bag-ong mitubo nga
kumpay didto
sa kilid sa
suba nga miawit
sa bulang 
masulub-on?

ikaw nga naa
sige sa sulod sa
imong lawak
dili ka makatug-an
kon karon
buntag na ba o
gabii pa ba gihapon

giingnan ta ka
nga igo na kanako
ang imong panyo
ayaw na ako
ug duola
aron imong pangutan-on
kon para ba kini
sa akong
mga luha nga midagayday
ug
kinahanglang pahiran
diri sa
aron dili ra kaayo asgad
unya ang
akong aping kon ugaling
imo pa kining
hagkan

nakita mo ba ang
alibangbang
sa kilid sa pultahan
nga usa na lay
pako?

kon nakita mo kini
unta mabati mo
na usab kon unsa ang
nahitabo nako

drama

gikaon mo
ang gidili nga
mansanas
sa hardin nga
dili imo

adan
nabuhat na
ang tanan

eba
gipangutana ka
kon 
maayo ka bang
kauban niya
diha sa usa
ka tintal

bitin
karong nahuman na
ang pagbuhat
sa sala
unsa na ba usab
ang imong buhaton

ang Ginoo anaa
nagpangita gihapon
kaninyo
kon asa na kamo
ug nganong hangtod
karon
nagpabilin kamong
mibati sa kaulaw
nga wala man unta
kana niya
gitanom diha
sa inyong mga
kasingkasing

andam na ang
entablado sa
lain lain natong
mga drama

pasigaa na ang
mga suga
biraha pataas
ang bagag nawong
nga kurtina

walay mga ulo

kadali ug kasayon mo
rang gigun-ob ang iyang
ngalan

dimalas ka
wala mitoo ang mga langgam
ang mga hulmigas anaa
nagpadayon
sa paghakot sa ilang 
pagkaon

patas lang
nakit-an sab kas bata nga
di kamaong mamakak
naglakaw ka
sama nako nga wala nay
ulo

akong matooron

nakalabang
na ako sa suba
nakalakaw na
ako sa tubig
sa ibabaw sa
buko buko sa
mga buaya

sa pikas tampi
nagpungko ko
sa dakong bato
unya sa akong
lapalapa anaa 
ang itom nga 
balas

gilantaw nakog
balik ang akong
giagian ang akong
gilabyan
wala pa gihapon
nako nasabti kon
giunsa ug ngano

ugma ambakan nako
ang bangaw
unya kon atua pa
gihapon ang
imong gihandom nga
kolon ako gayod kining
buk-on

ang mga buak niini
akong yatakan
akong ipakita nimo
nga walay matood
sa ilang mga
gipanulat ug
gipanugilon

hangtod karon

ingon ka
kuyugan sa
usa ka
pahiyom nga

mahimo baya
nga uyab mong
duha apan
dili ka mingawon
niya

kanus-a mo lang
kini nakat-onan?

oo, mahimo baya
nga ang imong
gihigugma 
wala diha
unya bisan ang
iyang anino
dili mo makita

mahimo baya nga
kamong duha
nag-ipon sa usa
ka balay
dungan ug pamahaw
matag adlaw
apan wala diha ang
kasingkasing

sayo nako kining
nakat-onan maong
hangtod karon
ania, bisag unsaon
ako gihapon
nagpabiling
malipayon

sayri nga nakat-onan
mo kini
niadtong maayong
pagkasamad ang 
imong kasingkasing

ang kahapdos walay
sama
unya ang tambal
wala mo pa gayod
nakalap.

tapsing

baga lagi ang 
panapton nga
imong gisuot

nganong itom
na man kaayo
ang imong buhok?

kamao kong
motagna sa
imong kapalaran

pahawira kos
imong kamot
padagana ang
ang akong 
mga tudlo sa
imong palad

nganong baga
man ang panapton
nga imong gisuot?

ugma mahimamat
mo ang imong
higugmaon apan
wala siyay
gugma nimo

solilukoy

nangutana ang amahan
nga nabyudo
sa pag-abot sa kwarenta
dias gikan sa haya
sa iyang asawa

unsa ba ang anaa diha 
sa taas sa balay? mihangad
siya nga morag nangita ug
damgo didto sa langit

walay tawo diha tay
hagbay rang namahawa ang
nagpuyo nga
magtiayon sa dihang wala na
sila nagkasinabot
sa ilang mga gibati

karong gabii dalhi ako ug
batan-ong babaye 
gusto ko nga diha ko matulog
sa abogon nga katre

mihangad sab ang anak didto
sa langit
gisubay sab kon duna pa bay
nahibilin nga damgo alang usab
kaniya

sulod sa iyang dughan nagbalik
balik ang pangadyeon nga unta 
iiway siya sa kadaotan

'...ug dili mo kami itugyan sa 
panulay
hinonoa luwasa kami sa daotan"

unsa ba ang daotan? nangutana ang
wala pay buot nga kamanghoran

kaminyoon

samtang nagtalikod ka
bisag
wala pa nimo malitok
ang unta
hagbay mo rang
isulti unya sa tinood lang
gipaabot baya pod nako
anaa na ang akong kasingkasing
nga mabudhion
nagpanikad
sa iyang bag-ong pako nga gusto
na sang molupad

apan nganong sa kadugay
sa panahon
wala pa  man gayod kini
nahimo?

unsa ba ang ania sa atong mga
palad?
pagkagahi na ba sa mga kubal
niini
nga dili na man madutlan 
sa atong gustong isulti

unsa kaha ang ania sa salog nga
hangtod karon
haskang pilita pa man sa atong
mga lapa-lapa?

gugma nga kuno dili gugma matod pa niya

sakit
ang paghandom
sa nahitabo
kaniadto

anaa pa gihapon
ang tugsok sa
punyal
nagpabilin
sa lawak sa 
hunahuna

apan ang nahigugma
mahigugma lang
gayod gihapon 
bisan pag ingnon nimo
nga kini
dili gugma

balikan ang lawak
nga wala nay
sulod
hangpon ang habol 
nga wala nay
kainit
hagkan ang alugnan
nga walay aping ug
ngabil

ang akong mga tiil

inig abot sa ulan
ang wala mitagam nga
mga tiil
anaa 
kasayawon na pod
gustong mabasa 
maglapok-lapok didto
sa gawas
bisag
niadtong miaging
bulan
natunok kini sa
baha

..sa gawsanan

sa dihang 
human ka naligo
mitutok ka
sa imong kaugalingon
diha sa
samin

giyubit mo
"nganong dili
man ako
ikaw?"

nalubog ang
samin
nawala ang 
unta
kadto ikaw

sagad sa naandan
gibalikan mo ang
pultahan

paingon sa imong
gawsanan

..kaplag

nawala ka sulod
sa bus
nangutana ka kon
asa ang
gawsanan

nawala ka sulod sa
balay nga karaan
sa sirado nga bentana
sa pultahan nga 
ngitngit

nawala ka sa hagip-ot
nga agianan
samtang nangatawa lang
ang imong
gipanglabyan

nawala ka sa imong
kaugalingon
gikapkap mo ang kamot
sa imong kalag
gihandom mo ang 
kahilom
aron sa makausa pa
makaplagan na usab
ang kaugalingon

...didto sa salog

unta ang akong mga
kamot
para lang gayod unta
nimo

apan sa dihang mihapyod
na kini sa
imong dughan

walay nabatian ang akong
pagbati 
diha sa imong pagbati

walay pulos ang kalipay
kon usa lang ang malipay

busa gisirad-an ko usab
ang akong pultahan

kusog ang ulan sa akong
lawak
apan dili na kinahanglang
imo pang madungog

ang pagkahulog sa dagkong
luha
didto sa salog

..duha...

ang uhay sa humay
 nahulog sa iyang
kaugalingong gapnod
ako sab sa akong gisandigan
 nga
kangitngit
natulilik dayog kahagba

..wala....

gidawat na nako
nga dili ka para ako

naglisod siyag dawat
nga dili ko para niya

kitang tanan
naglisod
dili daling dawaton
apan madawat
lang gihapon
sa dugay pa nga 
panahon

kinsa ba kanato ang
malipayon?
kini ang tigmo nga
ang tanan kanato
nakahibalo sa tubag
apan wala nay
gana pa nga molitok
sa pulong nga
wala

..inig ka buntag

tungod kay gihigugma mo
ang maong huni
kanunay mo kining giawit

ganado ang baba 
mas miabtik ang dili
mikiat ang alingagngag
pati gani ang mga
ngipon
naghandom nga unta
silang tanan
humok

apan ang huni sayod
ka 
gitag-iyahan sa hangin
nga kunsabo
sa kagabhion

inig kabuntag
namad-an ka sa laway
unya
nanimaho kang
patay

..mas daghan pa

kaniadto
gihawiran mo ang iyang kamot
gibira mo siya sa
pagkahulog

gidalitan ka niya sa 
pahiyom
usa ka hilom nga
pasalamat

dali ra siyang 
nahikalimot niini
dunay higayon
nga nakapangutana siya
kon kinsa ka

nakahunghong ka
sa hangin
ug militok kini sa
daghang mga ngalan
sa sama kaniya

gipamalid na kini
sa kawanangan
apan matod pa niya
daghan pa ang 
umaabot

mas daghan pa gani
sa abog
nga makita nimo
sa kahayag nga gihatag
sa kandila nga
hapit na
mapalong

usa ka gabii niana

usa ka kagabhion niana
anaa ang pagtanday sa imong
paa

anaa ang paggakos sa imong
mga bukton
paghalok sa imong aping
paghapuhap sa imong dughan

anaa ang paghandom sa
kagahapon
kitang duha didto sa 
baybayon
nag-unot sa usa ka gugma
sama sa mga balod ug
lapyahan

nahikatulog ka
kinsa ba ang magdahom nga
kadtong tanan diay
usa man ka panamilit?

ang lakip....

dunay butang nga gipakabahandi
gihipos, dako kaayo ang bili
dili mo mapahulam, labi na nga
dili mo ikahatag,

miabot ang kausbanan unya
ang tanang butang nahimong
mga gapas, ang uban kinumot nga
papel, ang uban morag napudpod
nga lapis, putol, unya wala ka nay
gana diha sa pagtahal,

anaa ang usa ka sulat nga imong
gitipigan, larawan sa ilalom sa
imong higdaanan, wala na nimo
basaha pag-usab, wala na nimo
lantawa, unya sa dihang mibangon
ka imong giukab ang kutson sa
higdaanan, unya dayon nimog
labay ang tanan didto gawas sa
bentana

wala ka pa matagbaw, mikanaog
ka, gitapok nimo, dayon imong
gisunog aron mawala na gayod kini
pati gani ang abo nga nahibilin
imo mang gisuta nga kining tanan
naapil na ug panaw sa kusog nga
hangin

ayaw kahiubos o kasuko
lakip ka didto.

Mocha Uson

Gigitik ba ang imong utok?
o basi iyang gitusok
nikatawa man gud ka'g hilaw
komedya'ng nabahaw?

Dali ra baya nang sabton
kon ikaw ba bakakon,
niagik-ik man gud ang kikik
dihang ako kang gibitik.

Matod niya dili baya ko aswang
ilang kasing kasing lang ang haw-ang
ang pagbanaw sa dugo,
dili lang maoy ilang tuyo

Kay matod pa ni Hitler nga Aleman
naghuot na ang Hudeyo sa kalibutan,
sila angay patyon! matod pa ni tatay Digong
sa mga adik, dili ko kapugong!

Nagsuot og pantalon nga dako og bulsa
misayaw siya kay puno na sa kwarta,
kaniadto nagkiay-kiay siyang hubo
sa kasadya nitaghoy ang mga iro

Makatakod ang ilang hudyaka
labi na kon ang utok nagyaka
kaning katapol sa paghunahuna
Ang kalinaw sa tanan, nawad-ag luna.

Tan O Monique2/16/17
#PoorFilipinoLivesMatter

sa velentine's day ni dr. L.

ang pipino, tupad sa chorizo,
ang puso, ang melon, ang
sandwich, ang letsugas,
pati na gani ang bulad nga
palotpot puros
hulmag kasingkasing.

ang gipatay

dili sa tanang
panahon nga nindot
lantawon unya
nindot sab kaonon

apan walay mawala
diha sa pagsulay
sa usa ka hangyo kon
kini mahimo bang
kan-on

bisag sa uban dili nila
mahimong tunlon
bisag moingon sila
nga mora kag irong 
buang
durong pamaak maong
gibukbok gipatay
sa mga silingan

pasumangil

dugay nakong
gihikap ang iyang
palad

init, humot
makaibog

pasumangil lang
kadtong 
akong hangyo
hangyo sa
gibaligya niyang
singsing

pasayloa....

unta dili mo
makaplagan kining
akong gitang-ogan

unta dili mo mabasa
ang akong tinipigan

hinoon andam na ako
sa akong pagkaparot

kon mihibaw-an mo 
na kini
pasayloa, wala gayod
seguro ako 
nasayod sa akong
gibuhat

nadala ako sa sulog
sa pagbati
nga mianod sa akong
lawas
nga mipikas sa
akong kasingkasing
nga mipapas sa akong
malabtik nga
hunahuna

kon kanus-a....

unsa kahay
naa nimo nga
ang akong
kasingkasing
makamao na
mang mosayaw
human kini
gipiiangay sa
gugmang kanhiay?

kon kanus-a nawad-an
ug paglaum ang mga dahon
karon pa man hinoon 
miabot ang kahayug kuyog
sa bisibis sa ulan

naa na kanako ang
tanan
sumala sa akong
pagtoo
hangtod nga
nahigugma ko nimo

wala diay kanako
bisan gani ang panglantaw
dahon akong gidagit
sa sulog sa gabon

tanghaga sa gugma ni danika

usa ka pyuos
ang gihigugma
sa adlaw

sa dihang iyang
gihagkan kini
siya ang nasunog

..ngano ba....

karong gabhiona
gibutangan nakog bato
ang atong utlanan

dayag ang kalipay
giawitan ko ang akong
kalibotan

sa dihang gihapuhap 
ko ang imong dughan
unya pagkahuman 
gidalin-os ko ang akong
mga kamot didto sa
imong pus-on
wala ko magdahom nga
kini imong iwakli 
paingon sa kapanganoran

nawala ang pagtoo
mibanos ang kalibog
nakapanguros kos akong
daghang "abi kog".

salamat na lang usab
sa imong pag-antos
nganong wala ka man
nagsulti kanako samtang
sayo pa, samtang ang 
mga manok wala pa
kagawas sa ilang mga
tugpahanan?

college 1980

bisag talagsa ra
tang magkita sa
drama 101
kay lagi ang
atong maestra
sigi mang absent
pirmi ka nakong
gihandom oi.

bisan pag dili
ko nimo type
in-love pa gihapon
ko nimo

walay but-anay
adtong panahona
kon kinsang dughan
ang maguba

nakatawa gyod kos
akong kaugalingon
nga gapaisog-isog
gihapon sa walay
paglubad samtang 
ikaw siging gihagwa
sa imong uyab.

high school love

naghawiran tas
atong mga kamot
didto sa sulod sa
simbahan sa sto.
rosario unya 
gipiyong nato ang
atong mga mata
nag-ampo kabahin
anang forever

pagkahulog....

daghang mga mata
ang naniid
nangutana ug unsa

daghang mga kamot
ang nagpaabot diha
sa imong kanus-a

ang katawhan naghandom
sa dakong buto-buto diha
sa pagkalaglag

ang kasagaran milantaw 
sa langit
gisukod ang kahabog sa
imong pagkahulog

pasayloa kay dili ko kini makaon

sa dihang gisukad mo na sa lamesa
ang akong lamiang pagkaon
ambot, duna may mibabag sa akong
tilaok, mibara sa akong alingagngag
mipiit sa akong dila,

bisag lamian na kini sa uban
aduna akoy nasimhot nga dili angayan

nilimbongan mo ba ang ginikanan niini?

dili ko kini makaon.

bisag unsaon natog paputi kining inidoro inidoro lang gihapon walay mausab

bisag unsaon natog
paputi
kining inidoro

inidoro lang gihapon
walay mausab

kadtong giputlan
ug ulo nga barangay
kapitan sa isla
di ba god to imo?

ibutang ta nga pulo
ka ulo usab ang ila
apan ang imoha
mas labaw pa

bisag unsaon natog
paputi
kining inidoro

inidoro lang gihapon
walay mausab

kadtong imong giilad
sa usa ka dakong pyramid
di ba imo sab kadto?

kadtong imong gipasemento
ug gipaunglod didto sa
dagat, imo sab kadto

kadtong imong giilugan ug
yuta, kadtong imong gibihag
ug gipalukat gikan sa insik
imo sab kadto busa

bisag unsaon natog
paputi
kining inidoro

inidoro lang gihapon
walay mausab

bugnaw nga tubig

ang imong awit
sa kataposan
nakalingkawas ra
gayod sa
bilanggoan diha
sa imong tilaok
mora kinig ok-ok
nga sadya kaayong
milupad didtos
imong banyo samtang
gihapohap ka sa 
bugnaw nga tubig

kagawasan

dili mo magapos
ang kahilom
dili mo na kini
masakpan
kay sulod sa 
akong dughan
kini mitago ug
nagpahuraray

bisan gani ang
kalapating mubog
lupad dili mo na 
usab madakpan

ang imong mga
kamot nahimo na
nga higala sa hangin

ang mas nindot

mas nindot dagway
kon dili ipakita ang
mga nawong
mas makaayo dagway
kini sa gaung-ong nga
kaulaw diha sa wala na
kapugngi sa pagpanambo
sa tinagoang kaulag

adunay mga butang 
nga himoon diha sa
dakong tabon nga
kangitngit kay pati
ang mga mata sa 
imong kaugalingon
maulaw man nga 
molantaw bisan gani
ang baba sa atay
makasuka man sa
gustong buhaton

ang hinog nga mangga

ang hinog nga
mangga hapit na
nga mahulog ug
ang mga wala 
mananom andam
na sa pagpunit ug
kon dili mahulog
andam na ang 
bato nga ibono
niini sa higayon
nga ang tag-iya
malingat sa iyang
pagbantay

..kaha?

dili baya usab mahimong
sigihon
basin ug maputol basin ug
sa kalabihan sa pagbas
na hinoon malata

inat-inaton lang 
tanyahon kon asa taman
kon asa ang ligti
kon asa gayod ang bugtuanan
sa maong pisi

sulayi pagtugkad ang kalalom
ang kakulangon sa hangin
ang kahilom hangtod nga mabati
mo ang tingog sa imong tingog

ang awit nga dili mo maawit
ang kalisud nga bisan sa usa ka
pulong dili mo gustong
mahinumduman pa og balik


sulayi ang pagmata dayon susiha
pagbalik kon unsa ang gusto isulti
kanimo diha sa imong damgo 
nga bisag nahinumduman mo na
gusto na gayod nimo kining hikalimtan
sa dayon. . . kusi-a ang imong kiting
sagpaa ang imong nawong
pakusgan mo pa kaha?

ang dili na para kanato

kasagaran ang
atong mga gamot
anaa
nagpalayo man
hinoon kanato

moingon ang usa
nagpalalom ko aron dili
kita mapalid

moingon ang usa
mikuyanap ko aron ta
managhan

ang tiunay nga kahoy
ang panit nga naghatag ug
kinabuhi sa
tanan
anaa nagpakahilom sa
kamingaw

puhon kon magpadayon 
kini
hangyoon ko ang tag-iya
sa hait nga sundang
nga ipaputol kadtong 
mipalayo na gayod kaayo

dili ako magpanuko
dili ko moingon nga 
basolan ko kini

anaay mga gamot nga
dili na nato kaila
unya wala na usab nakaila
kanato

wala damha
naputol ko na ang
dili na para kanato

...kadtong akong gipiyongan

kadtong akong
gihawiran dili to mao
ang akong gihigugma
apan gigakos ko 
gihapon 
tungod kay wala 
ka man
kadtong akong gihawiran
ug gigakos
akong gipiyongan
unya sa dihang mipiyong 
na ko
ikaw ang atua didto
sa kanunay