ang batang apyogon

nakita nako ang akong kaugalingon diha nimo.
karaang dalan, gitawag ko nila nga apyogon.
kada lihok iyak. kon dili ihatag dalhon sa pag-iyak.
walay undang. aron malinaw, biyaan. aron mahuman
pasagdan. nagbaha ang luha sa kuna. asgad na ang
hangin sa pagkabata. ang batang apyogon. masakiton.
maldito. dili  mohilom bisan hapohapon ang likod og
dughan. hangtod nakat-unan ang pag-inosara ang
pagpakabuhi nga wala nay sangpiton og iyakan.

sa pagdako unya, balikon ang nakat-onan. walay
iyakan bisag kinsa pa ang mamatay. kadtong mikatkat siya sa kuna aron makab-ot ang kagawasan siya nahulog naligid sa salog apan
walay mikuha. malditong bata. apyogon. kusong moiyak.

milanog ang bakho sa bata sa tibook balay nga walay tawo. nahurot ang luha. wala kabangon hangtod nga siya nakat-on. walay gahom ang luha. walay kuha ang pag-iyak. 

walay iyakan bisag kinsa pa ang sunod mamatay.
walay paaboton nga mopatindog. walay labot.